The Comprehensive Aramaic Lexicon

11:01 [ai]	ܘܰܗܘܳܐ ܕܟܰܕܼ ܫܰܠܶܡ ܝܶܫܽܘܥ ܠܰܡܦܼܰܩܳܕܼܽܘ ܠܰܬܼܪܶܥܣܰܪ ܬܰܠܡܺܝܕܼܰܘܗ̱ܝ̈܃ ܫܰܢܺܝ ܡܶܢ ܬܰܡܳܢ܂ ܠܡܰܠܳܦܼܽܘ ܘܰܠܡܰܟܼܪܳܙܽܘ ܒܰܡܕܼܺܝܢܳܬܼܗܽܘܢ̈܀
11:02 [ai]	ܝܽܘܚܰܢܳܢ ܕܶܝܢ܂ ܟܰܕܼ ܫܡܰܥ ܒܶܝܬܼ ܐܰܣܺܝܪ̈ܶܐ ܥܒܼܳܕܼܰܘܗ̱ܝ̈ ܕܰܡܫܺܝܚܳܐ܃ ܫܰܕܿܰܪ ܒܝܰܕܼ ܬܰܠܡܺܝܕܼܰܘܗ̱ܝ̈܂
11:03 [ai]	ܘܶܐܡܰܪ ܠܶܗ܂ ܐܰܢ̱ܬܿ ܗ̱ܽܘ ܗܰܘ܃ ܕܳܐܬܼܶܐ܃ ܐܰܘ ܠܰܐ̱ܚܪܺܝܢ ܗ̱ܽܘ ܡܣܰܟܿܶܝܢ ܐܶܢܰܚܢܰܢ܂
11:04 [ai]	ܥܢܳܐ ܝܶܫܽܘܥ ܘܶܐܡܰܪ ܠܗܽܘܢ܂ ܙܶܠܘ ܐܶܫܬܿܰܥܰܘ ܠܝܽܘܚܰܢܳܢ ܐܰܝܠܶܝܢ ܕܫܳܡܥܺܝܢ ܐܢ̱ܬܿܽܘܢ ܘܚܳܙܶܝܢ܂
11:05 [ai]	ܣܡܰܝܳܐ̈܂ ܚܳܙܶܝܢ܂ ܘܰܚܓܼܺܝܪ̈ܶܐ܂ ܡܗܰܠܟܼܺܝܢ܂ ܘܓܼܰܪ̈ܒܿܶܐ܂ ܡܶܬܿܕܿܰܟܿܶܝܢ܂ ܘܚܰܪ̈ܫܶܐ܂ ܫܳܡܥܺܝܢ܂ ܘܡܺܝܬܼܶܐ̈܂ ܩܳܝܡܺܝܢ܂ ܘܡܶܣܟܿܺܢܶܐ̈܂ ܡܶܣܬܿܰܒܿܪܺܝܢ܂
11:06 [ai]	ܘܛܽܘܒܼܰܘܗ̱ܝ ܠܰܐܝܢܳܐ ܕܠܳܐ ܢܶܬܼܟܿܫܶܠ ܒܺܝ܂
11:07 [ai]	ܟܰܕܼ ܕܶܝܢ ܐܶܙܰܠܘ܃ ܫܰܪܺܝ ܝܶܫܽܘܥ ܠܡܺܐܡܰܪ ܠܟܼܶܢܫܶܐ̈ ܥܰܠ ܝܽܘܚܰܢܳܢ܂ ܡܳܢܳܐ ܢܦܼܰܩܬܿܽܘܢ ܠܚܽܘܪܒܿܳܐ ܠܡܶܚܙܳܐ܃ ܩܰܢܝܳܐ ܕܡܶܢ ܪܽܘܚܳܐ ܡܶܬܿܬܿܙܺܝܥ܂
11:08 [ai]	ܘܶܐܠܳܐ ܡܳܢܳܐ ܢܦܼܰܩܬܿܽܘܢ ܠܡܶܚܙܳܐ܃ ܓܰܒܼܪܳܐ ܕܢܰܚܬܿܶܐ̈ ܪ̈ܰܟܿܺܝܟܼܶܐ ܠܒܼܺܝܫ܂ ܗܳܐ ܐܰܝܠܶܝܢ ܕܿܪ̈ܰܟܿܺܝܟܼܶܐ ܠܒܼܺܝܫܺܝܢ ܒܶܝܬܼ ܡܰܠܟܿܶܐ̈ ܐܶܢܽܘܢ܂
11:09 [ai]	ܘܶܐܠܳܐ ܡܳܢܳܐ ܢܦܼܰܩܬܿܽܘܢ ܠܡܶܚܙܳܐ܃ ܢܒܼܺܝܳܐ܃ ܐܺܝܢ ܐܳܡܰܪ ܐ̱ܢܳܐ ܠܟܼܽܘܢ܂ ܘܝܰܬܿܺܝܪ ܡܶܢ ܢܒܼܺܝܶܐ̈܂
11:10 [ai]	ܗܳܢܰܘ ܓܶܝܪ ܕܰܥܠܰܘܗ̱ܝ ܟܬܼܺܝܒܼ܃ ܕܗܳܐ ܐܶܢܳܐ ܡܫܰܕܿܰܪ ܐ̱ܢܳܐ ܡܰܠܰܐܟܼܝ ܩܕܼܳܡ ܦܰܪܨܽܘܦܿܳܟܼ܃ ܕܢܰܬܼܩܶܢ ܐܽܘܪܚܳܐ ܩܕܼܳܡܰܝܟܿ ܿ܀ܿ܀ܿ
11:11 [ai]	ܐܰܡܺܝܢ ܐܳܡܰܪܢܳܐ ܠܟܼܽܘܢ܃ ܕܠܳܐ ܩܳܡ ܒܺܝܠܺܝܕܼܰܝ̈ ܢܶܫܶܐ̈ ܕܪܰܒܿ ܡܶܢ ܝܽܘܚܰܢܳܢ ܡܰܥܡܕܼܳܢܳܐ܂ ܙܥܽܘܪܳܐ ܕܶܝܢ ܒܡܰܠܟܿܽܘܬܼ ܫܡܰܝܳܐ܂ ܪܰܒܼ ܗ̱ܽܘ ܡܶܢܶܗ܂
11:12 [ai]	ܡܶܢ ܝܰܘܡܰܝ̈ ܝܽܘܚܰܢܳܢ ܕܶܝܢ ܡܰܥܡܕܼܳܢܳܐ܂ ܘܰܥܕܼܰܡܳܐ ܠܗܳܫܳܐ܃ ܡܰܠܟܿܽܘܬܼܳܐ ܕܰܫܡܰܝܳܐ ܒܰܩܛܺܝܪܳܐ ܡܶܬܿܕܰܒܼܪܳܐ܃ ܘܰܩܛܺܝܪ̈ܳܢܶܐ ܡܚܰܛܦܼܺܝܢ ܠܳܗ܂
11:13 [ai]	ܟܽܠܗܽܘܢ ܓܶܝܪ ܢܒܼܺܝܶܐ̈ ܘܽܐܘܪܳܝܬܳܐ܃ ܥܕܼܰܡܳܐ ܠܝܽܘܚܰܢܳܢ ܐܶܬܼܢܰܒܺܝܘ܀
11:14 [ai]	ܘܶܐܢ ܨܳܒܼܶܝܢ ܐܢ̱ܬܿܽܘܢ ܩܰܒܿܶܠܘ܃ ܕܗܽܘܝܽܘ ܐܶܠܺܝܳܐ܂ ܕܰܥܬܼܺܝܕܼ ܠܡܶܐܬܼܳܐ܀
11:15 [ai]	ܡܰܢ ܕܺܐܝܬܼ ܠܶܗ ܐܶܕܼܢܶܐ̈ ܕܢܶܫܡܰܥ܂ ܢܶܫܡܰܥ܀
11:16 [ai]	ܠܡܰܢ ܕܶܝܢ ܐܶܕܰܡܺܝܗ ܠܫܰܪܒܿܬܼܳܐ ܗܳܕܼܶܐ܂ ܕܳܡܝܳܐ ܠܰܛܠܳܝܶܐ̈ ܕܿܝܳܬܼܒܺܝܢ ܒܫܽܘܩܳܐ܃ ܘܩܳܥܶܝܢ ܠܚܰܒܼܪ̈ܰܝܗܽܘܢ
11:17 [ai]	ܘܳܐܡܪܺܝܢ܂ ܙܡܰܪܢ ܠܟܼܽܘܢ܂ ܘܠܳܐ ܪܰܩܶܕܼܬܿܽܘܢ܂ ܘܶܐܠܰܝܢ ܠܟܼܽܘܢ܂ ܘܠܳܐ ܐܰܪܩܶܕܼܬܿܽܘܢ܂
11:18 [ai]	ܐܶܬܼܳܐ ܓܶܝܪ ܝܽܘܚܰܢܳܢ܂ ܕܠܳܐ ܐܳܟܼܶܠ ܘܠܳܐ ܫܳܬܼܶܐ܃ ܘܳܐܡܪܺܝܢ܂ ܕܰܝܘܳܐ ܐܺܝܬܼ ܒܶܗ܂
11:19 [ai]	ܐܶܬܼܳܐ ܒܪܶܗ ܕܐ̱ܢܳܫܳܐ܂ ܐܳܟܼܶܠ ܘܫܳܬܼܶܐ܃ ܘܳܐܡܪܺܝܢ܂ ܗܳܐ ܓܰܒܼܪܳܐ ܐܳܟܽܘܠܳܐ ܘܫܳܬܼܶܐ ܚܰܡܪܳܐ܃ ܘܪܳܚܡܳܐ ܕܡܳܟܼܣܶܐ̈ ܘܰܕܼܚܰܛܳܝܶܐ̈܂ ܘܶܐܙܕܿܰܕܿܩܰܬܼ ܚܶܟܼܡܬܼܳܐ ܡܶܢ ܥܒܼܳܕܼܶܝܗ̈܀܀
11:20 [ai]	ܗܳܝܕܶܝܢ ܫܰܪܺܝ ܝܶܫܽܘܥ ܠܰܡܚܰܣܳܕܼܽܘ ܡܕܼܺܝܢܳܬܼܳܐ̈܃ ܐܰܝܠܶܝܢ ܕܰܗܘܰܘ ܒܗܶܝܢ ܚܰܝܠܰܘܗ̱ܝ̈ ܣܰܓܿܺܝܶܐܐ̈܂ ܘܠܳܐ ܬܳܒܼܘ܂
11:21 [ai]	ܘܳܐܡܰܪ ܗ̱ܘܳܐ܃ ܘܳܝ ܠܶܟܼܝ ܟܳܘܪܰܙܺܝܢ܃ ܘܳܝ ܠܶܟܼܝ ܒܶܝܬܼ ܨܰܝܳܕܼܳܐ܃ ܕܶܐܠܽܘ ܒܨܽܘܪ ܘܰܒܨܰܝܕܳܢ ܗܘܰܘ ܚܰܝܠܶܐ̈܂ ܐܰܝܠܶܝܢ ܕܰܗܘܰܘ ܒܟܶܝܢ܃ ܟܒܼܰܪ ܕܶܝܢ ܒܣܰܩܶܐ̈ ܘܰܒܩܶܛܡܳܐ ܬܳܒܼܘ܂
11:22 [ai]	ܒܪܰܡ ܐܳܡܰܪ ܐ̱ܢܳܐ ܠܟܼܶܝܢ܃ ܕܰܠܨܽܘܪ ܘܰܠܨܰܝܕܳܢ ܢܶܗܘܶܐ ܢܺܝܚ ܒܝܰܘܡܳܐ ܕܕܼܺܝܢܳܐ܃ ܐܰܘ ܠܟܼܶܝܢ܂
11:23 [ai]	ܘܰܐܢ̱ܬܿܝ ܟܦܼܰܪܢܰܚܽܘܡ܂ ܗܳܝ ܕܰܥܕܼܰܡܳܐ ܠܰܫܡܰܝܳܐ ܐܶܬܿܬܿܪܺܝܡܬܿܝ܃ ܥܕܼܰܡܳܐ ܠܰܫܝܽܘܠ ܬܶܬܿܰܚܬܿܶܝܢ܂ ܕܶܐܠܽܘ ܒܰܣܕܼܽܘܡ ܗܘܰܘ ܚܰܝܠܶܐ̈܂ ܐܰܝܠܶܝܢ ܕܰܗܘܰܘ ܒܶܟܼܝ܃ ܩܰܝܳܡܳܐ ܗ̱ܘܳܬܼ ܥܕܼܰܡܳܐ ܠܝܰܘܡܳܢܳܐ܂
11:24 [ai]	ܒܪܰܡ ܐܳܡܰܪܢܳܐ ܠܶܟܼܝ܃ ܕܠܰܐܪܥܳܐ ܕܰܣܕܼܽܘܡ ܢܶܗܘܶܐ ܢܺܝܚ ܒܝܰܘܡܳܐ ܕܕܼܺܝܢܳܐ܂ ܐܰܘ ܠܶܟܼܝ܀܀
11:25 [ai]	ܒܗܰܘ ܙܰܒܼܢܳܐ܃ ܥܢܳܐ ܝܶܫܽܘܥ ܘܶܐܡܰܪ܂ ܡܰܘܕܿܶܐ ܐ̱ܢܳܐ ܠܳܟܼ ܐܳܒܼܝ܂ ܡܳܪ‍<‍ܝ‍>‍ܳܐ ܕܰܫܡܰܝܳܐ ܘܕܼܰܐܪܥܳܐ܃ ܕܟܰܣܺܝܬܿ ܗܳܠܶܝܢ ܡܶܢ ܚܰܟܿܺܝܡܶܐ̈ ܘܣܰܟܽܘܠܬܼܳܢܶܐ̈܃ ܘܰܓܼܠܰܝܬܿ ܐܶܢܶܝܢ̈ ܠܝܰܠܽܘܕܼܶܐ̈܂
11:26 [ai]	ܐܺܝܢ ܐܳܒܼܝ܃ ܕܗܳܟܼܰܢܳܐ ܗܘܳܐ ܨܶܒܼܝܳܢܳܐ ܩܕܼܳܡܰܝܟܿ܀
11:27 [ai]	ܟܽܠ ܡܶܕܶܡ ܐܶܫܬܿܠܶܡ ܠܺܝ ܡܶܢ ܐܳܒܼܝ܂ ܘܠܳܐ ܐ̱ܢܳܫ ܝܳܕܼܰܥ ܠܰܒܼܪܳܐ ܐܶܠܳܐ ܐܶܢ ܐܰܒܼܳܐ܂ ܐܳܦܼܠܳܐ ܠܰܐܒܼܳܐ ܐ̱ܢܳܫ ܝܳܕܼܰܥ܂ ܐܶܠܳܐ ܐܶܢ ܒܪܳܐ܂ ܘܰܠܡܰܢ ܕܨܳܒܼܶܐ ܒܪܳܐ ܕܢܶܓܼܠܶܐ܀
11:28 [ai]	ܬܰܘ ܠܘܳܬܼܝ܂ ܟܽܠܟܼܽܘܢ ܠܰܐܝܳܐ̈܂ ܘܰܫܩܺܝܠܰܝ̈ ܡܰܘܒܿܠܶܐ̈܂ ܘܶܐܢܳܐ ܐܰܢܺܝܚܟܼܽܘܢ܂
11:29 [ai]	ܫܩܽܘܠܘ ܢܺܝܪܝ ܥܠܰܝܟܿܽܘܢ܂ ܘܺܝܠܰܦܼܘ ܡܶܢܝ܃ ܕܢܺܝܚ ܐ̱ܢܳܐ܂ ܘܡܰܟܿܺܝܟܼ ܐ̱ܢܳܐ ܒܠܶܒܿܝ܃ ܘܡܶܫܟܿܚܺܝܢ ܐܢ̱ܬܿܽܘܢ ܢܝܳܚܳܐ ܠܢܰܦܼܫܳܬܼܟܼܽܘܢ̈܂
11:30 [ai]	ܢܺܝܪܝ ܓܶܝܪ ܒܰܣܺܝܡ ܗ̱ܘ܃ ܘܡܰܘܒܿܰܠܝ ܩܰܠܺܝܠܳܐ ܗ̱ܝ܀܀

next chapter