The Comprehensive Aramaic Lexicon

12:01 [ai]	ܒܗܰܘ ܙܰܒܼܢܳܐ܃ ܡܗܰܠܶܟܼ ܗ̱ܘܳܐ ܝܶܫܽܘܥ ܒܫܰܒܿܬܼܳܐ ܒܶܝܬܼ ܙܰܪ̈ܥܶܐ܂ ܘܬܼܰܠܡܺܝܕܼܰܘܗ̱ܝ̈ ܟܦܼܶܢܘ܂ ܘܫܰܪܺܝܘ ܡܳܠܓܿܺܝܢ ܫܶܒܿܠܶܐ̈܂ ܘܳܐܟܼܠܺܝܢ܂
12:02 [ai]	ܦܿܪ̈ܺܝܫܶܐ ܕܶܝܢ ܟܰܕܼ ܚܙܰܘ ܐܶܢܽܘܢ܃ ܐܳܡܪܺܝܢ ܠܶܗ܂ ܗܳܐ ܬܰܠܡܺܝܕܼܰܝܟܿ̈ ܥܳܒܼܕܺܝܢ ܡܶܕܶܡ ܕܠܳܐ ܫܰܠܺܝܛ ܠܡܶܥܒܿܰܕܼ ܒܫܰܒܿܬܼܳܐ܂
12:03 [ai]	ܗܽܘ ܕܶܝܢ ܐܶܡܰܪ ܠܗܽܘܢ܂ ܠܳܐ ܩܪܰܝܬܿܽܘܢ ܡܳܢܳܐ ܥܒܼܰܕܼ ܕܿܰܘܺܝܕܼ܂ ܟܰܕܼ ܟܦܼܶܢ ܘܰܐܝܠܶܝܢ ܕܥܰܡܶܗ܃
12:04 [ai]	ܐܰܝܟܿܰܢܳܐ ܥܰܠ ܠܒܼܰܝܬܳܐ ܕܰܐܠܳܗܳܐ܃ ܘܠܰܚܡܳܐ ܕܦܳܬܼܽܘܪܶܗ ܕܡܳܪܝܳܐ ܐܶܟܼܰܠ܃ ܗܰܘ ܕܠܳܐ ܫܰܠܺܝܛ ܗ̱ܘܳܐ ܠܶܗ ܠܡܶܐܟܼܰܠ܃ ܘܠܳܐ ܠܰܐܝܠܶܝܢ ܕܥܰܡܶܗ܂ ܐܶܠܳܐ ܐܶܢ ܠܟܼܳܗܢܶܐ̈ ܒܰܠܚܽܘܕܼ܀
12:05 [ai]	ܐܰܘ ܠܳܐ ܩܪܰܝܬܿܽܘܢ ܒܽܐܘܪܳܝܬܳܐ܃ ܕܟܳܗܢܶܐ̈ ܒܗܰܝܟܠܳܐ܂ ܡܰܚܠܺܝܢ ܠܳܗ ܠܫܰܒܿܬܼܳܐ܂ ܘܰܕܼܠܳܐ ܥܶܕܼܠܳܝ ܐܶܢܽܘܢ܂
12:06 [ai]	ܐܳܡܰܪ ܐ̱ܢܳܐ ܠܟܼܽܘܢ ܕܶܝܢ܃ ܕܪܰܒܿ ܡܶܢ ܗܰܝܟܠܳܐ ܐܺܝܬܼ ܗܳܪܟܿܳܐ܂
12:07 [ai]	ܐܶܠܽܘ ܕܶܝܢ ܝܳܕܼܥܺܝܢ ܗܘܰܝܬܿܽܘܢ ܡܳܢܰܘ܃ ܚܢܳܢܳܐ ܨܳܒܼܶܐ ܐ̱ܢܳܐ ܘܠܳܐ ܕܶܒܼܚܬܼܳܐ܃ ܠܳܐ ܡܚܰܝܒܼܺܝܢ ܗ̱ܘܰܝܬܿܽܘܢ ܠܰܐܝܠܶܝܢ ܕܰܕܼܠܳܐ ܥܶܕܼܠܳܝ ܐܶܢܽܘܢ܂
12:08 [ai]	ܡܳܪܳܗ ܓܶܝܪ ܕܫܰܒܿܬܼܳܐ ܐܺܝܬܼܰܘܗ̱ܝ ܒܪܶܗ ܕܐ̱ܢܳܫܳܐ܀܀
12:09 [ai]	ܘܫܰܢܺܝ ܡܶܢ ܬܰܡܳܢ ܝܶܫܽܘܥ܂ ܘܶܐܬܼܳܐ ܠܰܟܼܢܽܘܫܬܿܗܽܘܢ܂
12:10 [ai]	ܘܓܼܰܒܼܪܳܐ ܚܰܕܼ ܐܺܝܬܼ ܗ̱ܘܳܐ ܬܰܡܳܢ܂ ܕܿܝܰܒܺܝܫܳܐ ܐܺܝܕܼܶܗ܂ ܘܰܡܫܰܐܠܺܝܢ ܗ̱ܘܰܘ ܠܶܗ܂ ܘܳܐܡܪܺܝܢ ܕܶܐܢ ܫܰܠܺܝܛ ܒܫܰܒܿܬܼܳܐ ܠܡܰܐܣܳܝܽܘ܂ ܐܰܝܟܼ ܕܢܶܐܟܼܠܽܘܢ ܩܰܪ̈ܨܰܘܗ̱ܝ܂
12:11 [ai]	ܗܽܘ ܕܶܝܢ ܐܶܡܰܪ ܠܗܽܘܢ܂ ܡܰܢܽܘ ܡܶܢܟܼܽܘܢ ܓܰܒܼܪܳܐ܂ ܕܺܐܝܬܼ ܠܶܗ ܥܶܪܒܿܳܐ ܚܰܕܼ܃ ܘܶܐܢ ܢܳܦܼܶܠ ܒܚܰܒܿܳܪܳܐ ܒܝܰܘܡܳܐ ܕܫܰܒܿܬܼܳܐ܃ ܠܳܐ ܐܳܚܶܕܼ ܘܰܡܩܺܝܡ ܠܶܗ܂
12:12 [ai]	ܟܡܳܐ ܕܶܝܢ ܝܰܬܿܺܝܪ ܒܰܪܢܳܫܳܐ ܡܶܢ ܥܶܪܒܿܳܐ܂ ܡܳܕܼܶܝܢ ܫܰܠܺܝܛ ܗ̱ܽܘ ܒܫܰܒܿܬܼܳܐ ܠܡܶܥܒܿܰܕܼ ܕܫܰܦܿܺܝܪ܂
12:13 [ai]	ܗܳܝܕܶܝܢ ܐܶܡܰܪ ܠܗܰܘ ܓܰܒܼܪܳܐ܃ ܦܫܽܘܛ ܐܺܝܕܼܳܟܼ܂ ܘܰܦܼܫܰܛ ܐܺܝܕܼܶܗ܂ ܘܬܼܶܩܢܰܬܼ ܐܰܝܟܼ ܚܒܼܰܪܬܿܳܗ܀܀
12:14 [ai]	ܘܰܢܦܼܰܩܘ ܦܿܪ̈ܺܝܫܶܐ܃ ܘܡܶܠܟܿܳܐ ܢܣܰܒܼܘ ܥܠܰܘܗ̱ܝ܂ ܐܰܝܟܼ ܕܢܰܘܒܿܕܼܽܘܢܳܝܗ̱ܝ܂
12:15 [ai]	ܝܶܫܽܘܥ ܕܶܝܢ ܺܝܕܼܰܥ܃ ܘܫܰܢܺܝ ܠܶܗ ܡܶܢ ܬܰܡܳܢ܂ ܘܶܐܙܰܠܘ ܒܳܬܼܪܶܗ ܟܶܢܫܶܐ̈ ܣܰܓܿܺܝܶܐܐ̈܃ ܘܰܐܣܺܝ ܠܟܼܽܠܗܽܘܢ܂
12:16 [ai]	ܘܰܟܼܐܳܐ ܒܗܽܘܢ܂ ܕܠܳܐ ܢܶܓܼܠܽܘܢܳܝܗ̱ܝ܂
12:17 [ai]	ܕܢܶܬܼܡܰܠܶܐ ܡܶܕܶܡ ܕܶܐܬܼܶܐܡܰܪ ܒܝܰܕܼ ܐܶܫܰܥܝܳܐ ܢܒܼܺܝܳܐ ܕܶܐܡܰܪ܃
12:18 [ai]	ܗܳܐ ܥܰܒܼܕܿܝ ܕܶܐܨܛܒܼܺܝܬܼ ܒܶܗ܂ ܚܰܒܺܝܒܼܝ ܕܣܶܘܚܰܬܼ ܒܶܗ ܢܰܦܼܫܝ܂ ܪܽܘܚܝ ܐܶܣܺܝܡ ܥܠܰܘܗ̱ܝ܂ ܘܕܼܺܝܢܳܐ ܠܥܰܡ̱ܡܶܐ̈ ܢܰܟܼܪܶܙ܂
12:19 [ai]	ܠܳܐ ܢܶܬܼܚܪܶܐ܂ ܘܠܳܐ ܢܶܩܥܶܐ܂ ܘܠܳܐ ܐ̱ܢܳܫ ܢܶܫܡܰܥ ܩܳܠܶܗ ܒܫܽܘܩܳܐ܂
12:20 [ai]	ܩܰܢܝܳܐ ܪܥܺܝܥܳܐ ܠܳܐ ܢܶܬܼܒܰܪ܂ ܘܰܫܪܳܓܼܳܐ ܕܰܡܛܰܦܼܛܶܦܼ܂ ܠܳܐ ܢܰܕܼܥܶܟܼ܂ ܥܕܼܰܡܳܐ ܕܢܰܦܿܶܩ ܕܺܝܢܳܐ ܠܙܳܟܼܽܘܬܼܳܐ܃
12:21 [ai]	ܘܒܼܰܫܡܶܗ ܥܰܡ̱ܡܶܐ̈ ܢܣܰܒܿܪܽܘܢ܀܀
12:22 [ai]	ܗܳܝܕܶܝܢ ܩܰܪܶܒܼܘ ܠܶܗ ܕܰܝܘܳܢܳܐ ܚܰܕܼ ܕܰܚܪܶܫ܂ ܘܰܥܘܺܝܪ܂ ܘܰܐܣܝܶܗ܃ ܐܰܝܟܿܰܢܳܐ ܕܚܰܪܫܳܐ ܘܣܰܡܝܳܐ ܢܡܰܠܶܠ ܘܢܶܚܙܶܐ܂
12:23 [ai]	ܘܡܶܬܿܕܰܡܪܺܝܢ ܗ̱ܘܰܘ ܟܽܠܗܽܘܢ ܟܶܢܫܶܐ̈܂ ܘܳܐܡܪܺܝܢ܂ ܕܰܠܡܳܐ܃ ܗܳܢܰܘ ܒܪܶܗ ܕܕܼܰܘܺܝܕܼ܀
12:24 [ai]	ܦܿܪ̈ܺܝܫܶܐ ܕܶܝܢ ܟܰܕܼ ܫܡܰܥܘ܂ ܐܳܡܪܺܝܢ܂ ܗܳܢܳܐ ܠܳܐ ܡܰܦܿܶܩ ܫܺܐܕܼܶܐ̈܃ ܐܶܠܳܐ ܒܿܰܒܼܥܶܠܙܒܼܽܘܒܼ ܪܺܫܳܐ ܕܕܼܰܝܘܶܐ̈܂
12:25 [ai]	ܝܶܫܽܘܥ ܕܶܝܢ ܺܝܕܼܰܥ ܡܰܚܫܒܼܳܬܼܗܽܘܢ̈܂ ܘܶܐܡܰܪ ܠܗܽܘܢ܂ ܟܽܠ ܡܰܠܟܿܽܘ ܕܬܶܬܼܦܿܰܠܰܓܼ ܥܰܠ ܢܰܦܼܫܳܗ܂ ܬܶܚܪܰܒܼ܂ ܘܟܼܽܠ ܒܰܝ ܘܰܡܕܼܺܝܢܳܐ ܕܢܶܬܼܦܿܰܠܰܓܼ ܥܰܠ ܢܰܦܼܫܳܗ܂ ܠܳܐ ܢܩܽܘܡ܂
12:26 [ai]	ܘܶܐܢ ܣܳܛܳܢܳܐ ܠܣܳܛܳܢܳܐ ܡܰܦܿܶܩ܃ ܥܰܠ ܢܰܦܼܫܶܗ ܐܶܬܼܦܿܰܠܰܓܼ܂ ܐܰܝܟܿܰܢܳܐ ܗܳܟܼܺܝܠ ܩܳܝܡܳܐ ܡܰܠܟܿܽܘܬܼܶܗ܂
12:27 [ai]	ܘܶܐܢ ܐܶܢܳܐ ܒܿܰܒܼܥܶܠܙܒܼܽܘܒܼ ܡܰܦܿܶܩ ܐ̱ܢܳܐ ܕܰܝܘܶܐ̈܂ ܒܢܰܝܟܿܽܘܢ܂ ܒܡܳܢܳܐ ܡܰܦܿܩܺܝܢ ܠܗܽܘܢ܂ ܡܶܛܽܠ ܗܳܢܳܐ ܗܶܢܽܘܢ ܢܶܗܘܽܘܢ ܠܟܼܽܘܢ ܕܰܝܳܢܶܐ̈܂
12:28 [ai]	ܘܶܐܢ ܒܪܽܘܚܳܐ ܕܰܐܠܳܗܳܐ ܐܶܢܳܐ ܡܰܦܿܶܩ ܐ̱ܢܳܐ ܕܰܝܘܶܐ̈܃ ܩܶܪܒܿܰܬܼ ܠܳܗ ܥܠܰܝܟܿܽܘܢ ܡܰܠܟܿܽܘܬܼܳܐ ܕܰܐܠܳܗܳܐ܂
12:29 [ai]	ܐܰܘ ܐܰܝܟܿܰܢܳܐ ܐ̱ܢܳܫ ܡܶܫܟܿܰܚ ܕܢܶܥܽܘܠ ܠܒܼܶܝܬܼ ܚܰܣܺܝܢܳܐ܂ ܘܡܳܐܢܰܘܗ̱ܝ̈ ܢܶܒܿܽܘܙ܃ ܐܶܠܳܐ ܐܶܢ ܠܽܘܩܕܼܰܡ ܢܶܐܣܪܺܝܘܗ̱ܝ ܠܚܰܣܺܝܢܳܐ܂ ܘܗܳܝܕܶܝܢ ܒܰܝܬܿܶܗ ܢܶܒܿܽܘܙ܀
12:30 [ai]	ܡܰܢ ܕܠܳܐ ܗܘܳܐ ܥܰܡܝ܂ ܠܽܘܩܒܼܰܠܝ ܗ̱ܽܘ܂ ܘܡܰܢ ܕܠܳܐ ܟܳܢܶܫ ܥܰܡܝ܂ ܡܒܼܰܕܿܳܪܽܘ ܡܒܼܰܕܿܰܪ ܿ܀ܿ܀ܿ
12:31 [ai]	ܡܶܛܽܠ ܗܳܢܳܐ ܐܳܡܰܪ ܐ̱ܢܳܐ ܠܟܼܽܘܢ܃ ܕܟܽܠ ܚܛܳܗܺܝܢ̈ ܘܓܼܽܘܕܿܳܦܼܺܝܢ̈܂ ܢܶܫܬܿܰܒܼܩܽܘܢ ܠܰܒܼܢܰܝܢܳܫܳܐ܂ ܓܽܘܕܿܳܦܼܳܐ ܕܶܝܢ ܕܥܰܠ ܪܽܘܚܳܐ܂ ܠܳܐ ܢܶܫܬܿܒܼܶܩ ܠܰܒܼܢܰܝܢܳܫܳܐ܂
12:32 [ai]	ܘܟܼܽܠ ܡܰܢ ܕܢܺܐܡܰܪ ܡܶܠܬܼܳܐ ܥܰܠ ܒܪܶܗ ܕܐ̱ܢܳܫܳܐ܂ ܢܶܫܬܿܒܼܶܩ ܠܶܗ܂ ܟܽܠ ܕܶܝܢ ܕܥܰܠ ܪܽܘܚܳܐ ܕܩܽܘܕܼܫܳܐ ܢܺܐܡܰܪ܂ ܠܳܐ ܢܶܫܬܿܒܼܶܩ ܠܶܗ܂ ܠܳܐ ܒܥܳܠܡܳܐ ܗܳܢܳܐ܂ ܘܠܳܐ ܒܥܳܠܡܳܐ ܕܰܥܬܼܺܝܕܼ܀
12:33 [ai]	ܐܰܘ ܥܒܼܶܕܼܘ ܐܺܝܠܳܢܳܐ ܫܰܦܿܺܝܪܳܐ܂ ܘܦܼܺܐܪ̈ܰܘܗ̱ܝ ܫܰܦܿܺܝܪ̈ܶܐ܃ ܐܰܘ ܥܒܼܶܕܼܘ ܐܺܝܠܳܢܳܐ ܒܺܝܫܳܐ܂ ܘܦܼܺܐܪ̈ܰܘܗ̱ܝ ܒܺܝܫܶܐ̈܂ ܡܶܢ ܦܿܺܐܪ̈ܰܘܗ̱ܝ ܗܽܘ ܓܶܝܪ ܡܶܬܼܺܝܕܼܰܥ ܐܺܝܠܳܢܳܐ܂
12:34 [ai]	ܝܰܠܕܿܳܐ ܕܳܐܟܼܶܕܼܢܶܐ̈܂ ܐܰܝܟܿܰܢܳܐ ܡܶܫܟܿܚܺܝܢ ܐܢ̱ܬܿܽܘܢ ܛܳܒܼܳܬܼܳܐ̈ ܠܰܡܡܰܠܳܠܽܘ ܕܒܺܝܫܶܐ̈ ܐܢ̱ܬܿܽܘܢ܂ ܡܶܢ ܬܰܘܬܿܳܪ̈ܰܝ ܠܶܒܿܳܐ ܓܶܝܪ ܡܡܰܠܶܠ ܦܽܘܡܳܐ܂
12:35 [ai]	ܓܰܒܼܪܳܐ ܛܳܒܼܳܐ܂ ܡܶܢ ܣܺܝܡܳܬܼܳܐ̈ ܛܳܒܼܳܬܼܳܐ̈ ܡܰܦܿܶܩ ܛܳܒܼܳܬܼܳܐ̈܂ ܘܓܼܰܒܼܪܳܐ ܒܺܝܫܳܐ܂ ܡܶܢ ܣܺܝܡܳܬܼܳܐ̈ ܒܺܝܫܳܬܼܳܐ̈ ܡܰܦܿܶܩ ܒܺܝܫܳܬܼܳܐ̈܀
12:36 [ai]	ܐܳܡܰܪ ܐ̱ܢܳܐ ܠܟܼܽܘܢ ܓܶܝܪ܂ ܕܟܽܠ ܡܶܠܳܐ ܒܰܛܳܠܳܐ ܕܢܺܐܡܪܽܘܢ ܒܢܰܝ ܐ̱ܢܳܫܳܐ̈܃ ܢܶܬܿܠܽܘܢ ܦܶܬܼܓܿܳܡܳܗ ܒܝܰܘܡܳܐ ܕܕܼܺܝܢܳܐ܂
12:37 [ai]	ܡܶܢ ܡܶܠܰܝܟܿ̈ ܓܶܝܪ ܬܶܙܕܿܰܕܿܰܩ܂ ܘܡܶܢ ܡܶܠܰܝܟܿ̈ ܬܶܬܼܚܰܝܰܒܼ܀܀
12:38 [ai]	ܗܳܝܕܶܝܢ ܥܢܰܘ ܐ̱ܢܳܫܳܐ ܡܶܢ ܣܳܦܼܪ̈ܶܐ ܘܡܶܢ ܦܿܪ̈ܺܝܫܶܐ܂ ܘܳܐܡܪܺܝܢ ܠܶܗ܂ ܡܰܠܦܼܳܢܳܐ܂ ܨܳܒܼܶܝܢ ܚ̱ܢܰܢ ܕܢܶܚܙܶܐ ܡܶܢܳܟܼ ܐܳܬܼܳܐ܀
12:39 [ai]	ܗܽܘ ܕܶܝܢ ܥܢܳܐ ܘܶܐܡܰܪ ܠܗܽܘܢ܂ ܫܰܪܒܿܬܼܳܐ ܒܺܝܫܬܳܐ ܘܓܼܰܝܳܪܬܼܳܐ܂ ܐܳܬܼܳܐ ܒܿܳܥܝܳܐ܂ ܘܳܐܬܼܳܐ ܠܳܐ ܬܶܬܼܺܝܗܶܒܼ ܠܳܗ܃ ܐܶܠܳܐ ܐܳܬܼܶܗ ܕܝܰܘܢܳܢ ܢܒܼܺܝܳܐ܂
12:40 [ai]	ܐܰܝܟܿܰܢܳܐ ܓܶܝܪ ܕܰܗܘܳܐ ܝܰܘܢܳܢ ܒܟܰܪܣܶܗ ܕܢܽܘܢܳܐ܂ ܬܠܳܬܼܳܐ ܝܰܘܡܺܝܢ̈ ܘܰܬܼܠܳܬܼܳܐ ܠܰܝܠܰܘܳܢ̈܃ ܗܳܟܼܰܢܳܐ ܢܶܗܘܶܐ ܒܪܶܗ ܕܐ̱ܢܳܫܳܐ ܒܠܶܒܿܳܗ ܕܰܐܪܥܳܐ܃ ܬܠܳܬܼܳܐ ܐܺܝܡܳܡܺܝܢ̈ ܘܰܬܼܠܳܬܼܳܐ ܠܰܝܠܰܘܳܢ̈܂
12:41 [ai]	ܓܿܰܒܼܪ̈ܶܐ ܢܺܝܢܘܳܝܶܐ̈ ܢܩܽܘܡܽܘܢ ܒܕܺܝܢܳܐ ܥܰܡ ܫܰܪܒܿܬܼܳܐ ܗܳܕܼܶܐ܂ ܘܰܢܚܰܝܒܼܽܘܢܳܗ܂ ܕܗܶܢܽܘܢ ܬܳܒܼܘ ܒܟܳܪܽܘܙܽܘܬܼܶܗ ܕܝܰܘܢܳܢ܃ ܘܗܳܐ ܕܪܰܒܿ ܡܶܢ ܝܰܘܢܳܢ ܬܢܳܢ܂
12:42 [ai]	ܡܰܠܟܿܬܼܳܐ ܕܬܰܝܡܢܳܐ ܬܩܽܘܡ ܒܕܺܝܢܳܐ ܥܰܡ ܫܰܪܒܿܬܼܳܐ ܗܳܕܼܶܐ܂ ܘܰܬܼܚܰܝܒܼܺܝܗ܂ ܕܶܐܬܼܳܬܼ ܡܶܢ ܥܶܒܼܪ̈ܶܝܗ ܕܰܐܪܥܳܐ ܕܬܶܫܡܰܥ ܚܶܟܼܡܬܼܶܗ ܕܰܫܠܶܝܡܽܘܢ܂ ܘܗܳܐ ܕܝܰܬܿܺܝܪ ܡܶܢ ܫܠܶܝܡܳܘܢ ܗܳܪܟܿܳܐ܀
12:43 [ai]	ܐܶܡܰܬܼܝ ܕܶܝܢ ܕܪܽܘܚܳܐ ܛܰܢܦܼܬܼܳܐ ܬܿܶܦܽܘܩ ܡܶܢ ܒܰܪܢܳܫܳܐ܃ ܡܶܬܼܟܰܪܟܿܳܐ ܒܰܐܬܼܪ̈ܰܘܳܬܼܳܐ ܕܡܰܝܳܐ̈ ܠܰܝܬܿ ܒܗܽܘܢ܂ ܘܒܼܳܥܝܳܐ ܢܝܳܚܳܐ܂ ܘܠܳܐ ܡܶܫܟܿܚܳܐ܂
12:44 [ai]	ܗܳܝܕܶܝܢ ܐܳܡܪܳܐ܃ ܐܶܗܦܿܽܘܟܼ ܠܒܼܰܝܬܿܝ ܡܶܢ ܐܰܝܟܿܳܐ ܕܢܶܦܼܩܶܬܼ܂ ܘܳܐܬܼܝܳܐ ܡܶܫܟܿܚܳܐ܂ ܕܰܣܪܺܝܩ ܘܰܚܡܺܝܡ ܘܰܡܨܰܒܿܰܬܼ܂
12:45 [ai]	ܗܳܝܕܶܝܢ ܐܳܙܳܠ̱ܐ ܕܳܒܼܪܳܐ ܥܰܡܳܗ ܫܒܼܰܥ ܪ̈ܽܘܚܶܐ ܐ̱ܚܪ̈ܳܢܝܳܢ ܕܡܶܢܳܗ ܒܺܝܫܳܢ̈܃ ܘܥܳܐܠܳܢ̈܂ ܘܥܳܡܪ̈ܳܢ ܒܶܗ܂ ܘܗܳܘܝܳܐ ܚܰܪܬܼܶܗ ܕܓܰܒܼܪܳܐ ܗܰܘ ܒܺܝܫܳܐ ܡܶܢ ܩܰܕܼܡܳܝܬܿܶܗ܂ ܗܳܟܼܰܢܳܐ ܢܶܗܘܶܐ ܠܳܗ ܠܫܰܪܒܿܬܼܳܐ ܗܳܕܼܶܐ ܒܺܝܫܬܳܐ܀
12:46 [ai]	ܟܰܕܼ ܗܽܘ ܕܶܝܢ ܡܡܰܠܶܠ ܠܟܼܶܢܫܶܐ̈܃ ܐܶܬܼܰܘ ܐܶܡܶܗ ܘܰܐܚܰܘܗ̱ܝ̈܂ ܩܳܝܡܺܝܢ ܠܒܼܰܪ܂ ܘܒܼܳܥܶܝܢ ܕܰܢܡܰܠܠܽܘܢ ܥܰܡܶܗ܂
12:47 [ai]	ܐܶܡܰܪ ܠܶܗ ܕܶܝܢ ܐ̱ܢܳܫ܂ ܗܳܐ ܐܶܡܳܟܼ ܘܰܐܚܰܝܟܿ̈ ܩܳܝܡܺܝܢ ܠܒܼܰܪ܃ ܘܒܼܳܥܶܝܢ ܕܰܢܡܰܠܠܽܘܢ ܥܰܡܳܟܼ܂
12:48 [ai]	ܗܽܘ ܕܶܝܢ ܥܢܳܐ ܘܶܐܡܰܪ ܠܡܰܢ ܕܶܐܡܰܪ ܠܶܗ܂ ܡܰܢ ܗ̱ܝ ܐܶܡܝ܂ ܘܡܰܢ ܐܶܢܽܘܢ ܐܰܚܰܝ̈܂
12:49 [ai]	ܘܰܦܼܫܰܛ ܐܺܝܕܼܶܗ ܠܘܳܬܼ ܬܰܠܡܺܝܕܼܰܘܗ̱ܝ̈ ܘܶܐܡܰܪ܂ ܗܳܐ ܐܶܡܝ܂ ܘܗܳܐ ܐܰܚܰܝ̈܂
12:50 [ai]	ܟܽܠܢܳܫ ܓܶܝܪ ܕܥܳܒܼܶܕܼ ܨܶܒܼܝܳܢܶܗ ܕܳܐܒܼܝ ܕܒܰܫܡܰܝܳܐ܃ ܗܽܘܝܽܘ ܐܳܚܝ܂ ܘܚܳܬܼܝ܂ ܘܶܐܡܝ܀܀

next chapter