The Comprehensive Aramaic Lexicon

13:01 [ai]	ܒܗܰܘ ܕܶܝܢ ܝܰܘܡܳܐ܂ ܢܦܼܰܩ ܝܶܫܽܘܥ ܡܶܢ ܒܰܝܬܳܐ܃ ܘܺܝܬܼܶܒܼ ܥܰܠ ܝܰܕܼ ܝܰܡܳܐ܂
13:02 [ai]	ܘܶܐܬܼܟܿܰܢܰܫܘ ܠܘܳܬܼܶܗ ܟܶܢܫܶܐ̈ ܣܰܓܿܺܝܶܐܐ̈܃ ܐܰܝܟܼ ܕܢܶܣܰܩ ܢܶܬܶܒܼ ܠܶܗ ܒܶܐܠܦܼܳܐ܂ ܘܟܼܽܠܶܗ ܟܶܢܫܳܐ܂ ܩܳܐܶܡ ܗ̱ܘܳܐ ܥܰܠ ܣܦܼܳܪ ܝܰܡܳܐ܂
13:03 [ai]	ܘܣܰܓܿܺܝ ܡܡܰܠܶܠ ܗ̱ܘܳܐ ܥܰܡܗܽܘܢ܂ ܒܦܶܠܳܐܬܼܳܐ̈܂ ܘܳܐܡܰܪ܂ ܗܳܐ ܢܦܼܰܩ ܙܳܪܽܘܥܳܐ ܕܢܶܙܪܽܘܥ܂
13:04 [ai]	ܘܟܼܰܕܼ ܙܪܰܥ܃ ܐܺܝܬܼ ܕܰܢܦܼܰܠ ܥܰܠ ܝܰܕܼ ܐܽܘܪܚܳܐ܂ ܘܶܐܬܼܳܬܼ ܦܳܪܰܚܬܼܳܐ܂ ܘܶܐܟܼܰܠܬܼܶܗ܂
13:05 [ai]	ܘܰܐ̱ܚܪܺܢܳܐ ܢܦܼܰܠ ܥܰܠ ܫܽܘܥܳܐ܂ ܐܰܝܟܿܳܐ ܕܠܰܝܬܿ ܗ̱ܘܳܐ ܡܶܕܼܪܳܐ ܣܰܓܿܺܝܳܐܐ܂ ܘܒܼܰܪ ܫܳܥܬܼܶܗ ܫܘܰܚ܃ ܡܶܛܽܠ ܕܠܰܝܬܿ ܗ̱ܘܳܐ ܥܽܘܡܩܳܐ ܕܰܐܪܥܳܐ܂
13:06 [ai]	ܟܰܕܼ ܕܢܰܚ ܕܶܝܢ ܫܶܡܫܳܐ܂ ܚܰܡ܂ ܘܡܶܛܽܠ ܕܠܰܝܬܿ ܗ̱ܘܳܐ ܠܶܗ ܥܶܩܳܪܳܐ܂ ܺܝܒܼܶܫ܂
13:07 [ai]	ܘܰܐ̱ܚܪܺܢܳܐ ܢܦܼܰܠ ܒܶܝܬܼ ܟܽܘܒܿܶܐ̈܂ ܘܰܣܠܶܩܘ ܟܽܘܒܿܶܐ̈ ܘܚܰܢܩܽܘܗ̱ܝ܂
13:08 [ai]	ܘܰܐ̱ܚܪܺܢܳܐ ܢܦܼܰܠ ܒܰܐܪܥܳܐ ܛܳܒܼܬܼܳܐ܃ ܘܝܰܗ̱ܒܼ ܦܿܺܐܪ̈ܶܐ܂ ܐܺܝܬܼ ܕܰܡܳܐܐ܂ ܘܺܐܝܬܼ ܕܶܫܬܿܺܝܢ܂ ܘܺܐܝܬܼ ܕܰܬܼܠܳܬܼܺܝܢ܂
13:09 [ai]	ܡܰܢ ܕܺܐܝܬܼ ܠܶܗ ܐܶܕܼܢܶܐ̈ ܕܢܶܫܡܰܥ܂ ܢܶܫܡܰܥ܀܀
13:10 [ai]	ܘܰܩܪܶܒܼܘ ܬܰܠܡܺܝܕܼܰܘܗ̱ܝ̈ ܘܳܐܡܪܺܝܢ ܠܶܗ܂ ܠܡܳܢܳܐ ܒܦܶܠܳܐܬܼܳܐ̈ ܡܡܰܠܶܠ ܐܰܢ̱ܬܿ ܥܰܡܗܽܘܢ܂
13:11 [ai]	ܗܽܘ ܕܶܝܢ ܥܢܳܐ܂ ܘܶܐܡܰܪ ܠܗܽܘܢ܂ ܕܰܠܟܼܽܘܢ ܗ̱ܽܘ ܺܝܗܺܝܒܼ ܠܡܶܕܿܰܥ ܐ̱ܪܳܙܳܐ ܕܡܰܠܟܿܽܘܬܼܳܐ ܕܰܫܡܰܝܳܐ܃ ܠܗܳܢܽܘܢ ܕܶܝܢ ܠܳܐ ܺܝܗܺܝܒܼ܂
13:12 [ai]	ܠܡܰܢ ܓܶܝܪ ܕܺܐܝܬܼ ܠܶܗ ܢܶܬܼܺܝܗܶܒܼ ܠܶܗ܂ ܘܢܶܬܼܝܰܬܿܰܪ ܠܶܗ܂
13:13 [ai]	ܘܰܠܡܰܢ ܕܠܰܝܬܿ ܠܶܗ܂ ܘܗܰܘ ܕܺܐܝܬܼ ܠܶܗ܂ ܢܶܫܬܿܩܶܠ ܡܶܢܶܗ܂ ܡܶܛܽܠ ܗܳܢܳܐ ܒܦܶܠܳܐܬܼܳܐ̈ ܡܡܰܠܶܠ ܐ̱ܢܳܐ ܥܰܡܗܽܘܢ܂ ܡܶܛܽܠ ܕܚܳܙܶܝܢ܂ ܘܠܳܐ ܚܳܙܶܝܢ܂ ܘܫܳܡܥܺܝܢ܂ ܘܠܳܐ ܫܳܡܥܺܝܢ܂ ܘܠܳܐ ܡܶܣܬܿܰܟܠܺܝܢ܂
13:14 [ai]	ܘܫܳܠܡܳܐ ܒܗܽܘܢ ܢܒܼܺܝܽܘܬܼܶܗ ܕܶܐܫܰܥܝܳܐ܂ ܕܶܐܡܰܪ܂ ܕܫܶܡܥܳܐ ܬܶܫܡܥܽܘܢ܂ ܘܠܳܐ ܬܿܶܣܬܿܰܟܠܽܘܢ܃ ܘܡܶܚܙܳܐ ܬܶܚܙܽܘܢ܂ ܘܠܳܐ ܬܶܕܿܥܽܘܢ܂
13:15 [ai]	ܐܶܬܼܥܰܒܺܝ ܠܶܗ ܓܶܝܪ ܠܶܒܶܗ ܕܥܰܡܳܐ ܗܳܢܳܐ܂ ܘܒܼܶܐܕܼܢܰܝܗܽܘܢ̈ ܝܰܩܺܝܪܳܐܺܝܬܼ ܫܡܰܥܘ܂ ܘܥܰܝܢܰܝܗܽܘܢ̈܂ ܥܰܡܶܨܘ܂ ܕܠܳܐ ܢܶܚܙܽܘܢ ܒܥܰܝܢܰܝܗܽܘܢ̈܂ ܘܢܶܫܡܥܽܘܢ ܒܶܐܕܼܢܰܝܗܽܘܢ̈܃ ܘܢܶܣܬܿܰܟܠܽܘܢ ܒܿܠܶܒܗܽܘܢ܃ ܘܢܶܬܼܦܿܢܽܘܢ܂ ܘܰܐܣܶܐ ܐܶܢܽܘܢ܀
13:16 [ai]	ܕܺܝܠܟܼܽܘܢ ܕܶܝܢ ܛܽܘܒܼܰܝܗܶܝܢ ܠܥܰܝܢܰܝܟܿܽܘܢ̈ ܕܚܳܙܝܳܢ̈܂ ܘܠܶܐܕܼܢܰܝܟܿܽܘܢ̈ ܕܫܳܡܥܳܢ̈܂
13:17 [ai]	ܐܰܡܺܝܢ ܓܶܝܪ ܐܳܡܰܪܢܳܐ ܠܟܼܽܘܢ܃ ܕܣܰܓܿܺܝܶܐܐ̈ ܢܒܼܺܝܶܐ̈ ܘܙܰܕܿܺܝܩܶܐ̈ ܐܶܬܼܪܰܓܼܪܰܓܼܘ ܕܢܶܚܙܽܘܢ܂ ܡܶܕܶܡ ܕܚܳܙܶܝܢ ܐܢ̱ܬܿܽܘܢ܂ ܘܠܳܐ ܚܙܰܘ܃ ܘܰܠܡܶܫܡܰܥ ܡܶܕܶܡ ܕܫܳܡܥܺܝܢ ܐܢ̱ܬܿܽܘܢ܂ ܘܠܳܐ ܫܡܰܥܘ܀
13:18 [ai]	ܐܰܢ̱ܬܿܽܘܢ ܕܶܝܢ ܫܡܰܥܘ ܡܰܬܼܠܳܐ ܕܙܰܪܥܳܐ܂
13:19 [ai]	ܟܽܠ ܕܫܳܡܰܥ ܡܶܠܬܼܳܐ ܕܡܰܠܟܿܽܘܬܼܳܐ܂ ܘܠܳܐ ܡܶܣܬܿܰܟܿܰܠ ܒܿܳܗ܃ ܐܳܬܼܶܐ ܒܺܝܫܳܐ܂ ܘܚܳܛܶܦܼ ܡܶܠܬܼܳܐ ܕܰܙܪܺܝܥܳܐ ܒܿܠܶܒܶܗ܂ ܗܳܢܰܘ ܗܰܘ ܕܥܰܠ ܝܰܕܼ ܐܽܘܪܚܳܐ ܐܶܙܕܿܪܰܥ܂
13:20 [ai]	ܗܰܘ ܕܶܝܢ ܕܥܰܠ ܫܽܘܥܳܐ ܐܶܙܕܿܪܰܥ܃ ܗܰܘ ܗ̱ܽܘ ܕܫܳܡܰܥ ܡܶܠܬܼܳܐ܂ ܘܒܼܰܪ ܫܳܥܬܼܶܗ ܒܚܰܕܼܽܘܬܼܳܐ ܡܩܰܒܿܶܠ ܠܳܗ܂
13:21 [ai]	ܠܰܝܬܿ ܠܳܗ ܕܶܝܢ ܥܶܩܳܪܳܐ ܒܶܗ܂ ܐܶܠܳܐ ܕܙܰܒܼܢܳܐ ܗܽܘ܂ ܘܡܳܐ ܕܰܗܘܳܐ ܐܽܘܠܨܳܢܳܐ ܐܰܘ ܪܕܼܽܘܦܼܝܳܐ܂ ܡܶܛܽܠ ܡܶܠܬܼܳܐ܂ ܥܓܼܰܠ ܡܶܬܼܟܿܫܶܠ܂
13:22 [ai]	ܗܰܘ ܕܶܝܢ ܕܒܶܝܬܼ ܟܽܘܒܿܶܐ̈ ܐܶܙܕܿܪܰܥ܃ ܗܰܘ ܗ̱ܽܘ ܕܫܳܡܰܥ ܡܶܠܬܼܳܐ܃ ܘܪܶܢܝܳܐ ܕܥܳܠܡܳܐ ܗܳܢܳܐ܂ ܘܛܽܘܥܝܰܝ ܕܥܽܘܬܼܪܳܐ܂ ܚܳܢܩܺܝܢ ܠܳܗ ܠܡܶܠܬܼܳܐ܂ ܘܰܕܼܠܳܐ ܦܿܺܐܪ̈ܶܐ ܗܳܘܝܳܐ܂
13:23 [ai]	ܗܰܘ ܕܶܝܢ ܕܥܰܠ ܐܰܪܥܳܐ ܛܳܒܼܬܼܳܐ ܐܶܙܕܿܪܰܥ܃ ܗܰܘ ܗ̱ܽܘ ܕܫܳܡܰܥ ܡܶܠܰܬܼܝ܃ ܘܡܶܣܬܿܰܟܿܰܠ ܘܝܳܗܶܒܼ ܦܿܺܐܪ̈ܶܐ܂ ܘܥܳܒܼܶܕܼ܂ ܐܺܝܬܼ ܕܰܡܳܐܐ܂ ܘܺܐܝܬܼ ܕܶܫܬܿܺܝܢ܂ ܘܺܐܝܬܼ ܕܰܬܼܠܳܬܼܺܝܢ ܿ܀ܿ܀ܿ
13:24 [ai]	ܐ̱ܚܪܺܢܳܐ ܡܰܬܼܠܳܐ ܐܰܡܬܿܶܠ ܠܗܽܘܢ܂ ܘܶܐܡܰܪ܂ ܕܳܡܝܳܐ ܡܰܠܟܿܽܘܬܼܳܐ ܕܰܫܡܰܝܳܐ܃ ܠܓܼܰܒܼܪܳܐ ܕܰܙܪܰܥ ܙܰܪܥܳܐ ܛܳܒܼܳܐ ܒܰܩܪܺܝܬܼܶܗ܃
13:25 [ai]	ܘܟܼܰܕܼ ܕܡܶܟܼܘ ܐ̱ܢܳܫܳܐ܃ ܐܶܬܼܳܐ ܒܥܶܠܕܿܒܼܳܒܼܶܗ ܘܰܙܪܰܥ ܙܺܝܙܳܢܶܐ̈ ܒܰܝܢܳܬܼ ܚܶܛܶܐ̈܂ ܘܶܐܙܰܠ܂
13:26 [ai]	ܟܰܕܼ ܕܶܝܢ ܺܝܥܳܐ ܥܶܣܒܿܳܐ܂ ܘܰܥܒܼܰܕܼ ܦܿܺܐܪ̈ܶܐ܃ ܗܳܝܕܶܝܢ ܐܶܬܼܚܙܺܝܘ ܐܳܦܼ ܙܺܝܙܳܢܶܐ̈܂
13:27 [ai]	ܘܰܩܪܶܒܼܘ ܥܰܒܼܕܿܰܘܗ̱ܝ̈ ܕܡܳܪܶܐ ܒܰܝܬܳܐ܂ ܘܶܐܡܰܪܘ ܠܶܗ܂ ܡܳܪܰܢ܂ ܠܳܐ ܗܳܐ܃ ܙܰܪܥܳܐ ܛܳܒܼܳܐ ܙܪܰܥܬܿ ܒܰܩܪܺܝܬܼܳܟܼ܂ ܡܶܢ ܐܰܝܡܶܟܿܳܐ ܐܺܝܬܼ ܒܶܗ ܙܺܝܙܳܢܶܐ̈܂
13:28 [ai]	ܗܽܘ ܕܶܝܢ ܐܶܡܰܪ ܠܗܽܘܢ܂ ܓܰܒܼܪܳܐ ܒܥܶܠܕܿܒܼܳܒܼܳܐ ܥܒܼܰܕܼ ܗܳܕܼܶܐ܂ ܐܳܡܪܺܝܢ ܠܶܗ ܥܰܒܼܕܿܰܘܗ̱ܝ̈܂ ܨܳܒܼܶܐ ܐܰܢ̱ܬܿ܃ ܢܺܐܙܰܠ ܢܓܼܰܒܿܶܐ ܐܶܢܽܘܢ܂
13:29 [ai]	ܗܽܘ ܕܶܝܢ ܐܶܡܰܪ ܠܗܽܘܢ܂ ܕܰܠܡܳܐ ܟܰܕܼ ܡܓܼܰܒܿܝܶܢ ܐܢ̱ܬܿܽܘܢ ܙܺܝܙܳܢܶܐ̈܃ ܬܶܥܩܪܽܘܢ ܥܰܡܗܽܘܢ ܐܳܦܼ ܚܶܛܶܐ̈܂
13:30 [ai]	ܫܒܼܽܘܩܘ ܪܳܒܼܶܝܢ ܬܿܪ̈ܰܝܗܽܘܢ ܐܰܟܼܚܕܼܳܐ܂ ܥܕܼܰܡܳܐ ܠܰܚܨܳܕܼܳܐ܂ ܘܰܒܙܰܒܼܢܳܐ ܕܰܚܨܳܕܼܳܐ ܐܳܡܰܪ ܐ̱ܢܳܐ ܠܚܳܨܽܘܕܼܶܐ̈܃ ܓܰܒܿܰܘ ܠܽܘܩܕܼܰܡ ܙܺܝܙܳܢܶܐ̈܃ ܘܰܐܣܽܘܪܘ ܐܶܢܽܘܢ ܡܶܐܣܳܪ̈ܝܳܬܼܳܐ܂ ܕܢܺܐܩܕܼܽܘܢ܂ ܚܶܛܶܐ̈ ܕܶܝܢ܂ ܟܰܢܶܫܘ ܐܶܢܶܝܢ̈ ܠܰܐܘܨܪ̈ܰܝ܀
13:31 [ai]	ܐ̱ܚܪܺܢܳܐ ܡܰܬܼܠܳܐ ܐܰܡܬܿܶܠ ܠܗܽܘܢ܂ ܘܶܐܡܰܪ܂ ܕܳܡܝܳܐ ܡܰܠܟܿܽܘܬܼܳܐ ܕܰܫܡܰܝܳܐ܃ ܠܰܦܼܪܶܕܿܬܳܐ ܕܿܚܰܪܕܠܳܐ܃ ܕܰܢܣܰܒܼ ܓܰܒܼܪܳܐ ܙܰܪܥܳܗ ܒܰܩܪܺܝܬܼܶܗ܂
13:32 [ai]	ܘܗܺܝ ܙܥܽܘܪܝܳܐ ܗ̱ܝ ܡܶܢ ܟܽܠܗܽܘܢ ܙܰܪ̈ܥܽܘܢܶܐ܂ ܡܳܐ ܕܶܝܢ ܕܰܪܒܼܳܬܼ܃ ܪܰܒܿܳܐ ܗ̱ܝ ܡܶܢ ܟܽܠܗܽܘܢ ܝܰܪ̈ܩܽܘܢܶܐ܂ ܘܗܳܘܝܳܐ ܐܺܝܠܳܢܳܐ܃ ܐܰܝܟܼ ܕܬܺܐܬܼܶܐ ܦܳܪܰܚܬܼܳܐ ܕܰܫܡܰܝܳܐ ܬܰܩܶܢ ܒܣܰܘܟܿܶܝܗ̈܀
13:33 [ai]	ܐ̱ܚܪܺܢܳܐ ܡܰܬܼܠܳܐ ܐܶܡܰܪ ܠܗܽܘܢ܂ ܕܳܡܝܳܐ ܡܰܠܟܿܽܘܬܼܳܐ ܕܰܫܡܰܝܳܐ܃ ܠܰܚܡܺܝܪܳܐ ܗܰܘ ܕܫܶܩܠܰܬܼ ܐܰܢ̱ܬܿܬܼܳܐ܂ ܛܶܡܪܰܬܼ ܒܰܬܼܠܳܬܼ ܣܳܐܺܝܢ̈ ܕܩܰܡܚܳܐ܃ ܥܕܼܰܡܳܐ ܕܟܽܠܶܗ ܚܡܰܥ܀
13:34 [ai]	ܗܳܠܶܝܢ ܟܽܠܗܶܝܢ ܡܰܠܶܠ ܝܶܫܽܘܥ ܒܦܶܠܳܐܬܼܳܐ̈ ܠܟܼܶܢܫܶܐ̈܂ ܘܰܕܼܠܳܐ ܦܶܠܳܐܬܼܳܐ̈܂ ܠܳܐ ܡܡܰܠܶܠ ܗ̱ܘܳܐ ܥܰܡܗܽܘܢ܂
13:35 [ai]	ܐܰܝܟܼ ܕܢܶܬܼܡܰܠܶܐ ܡܶܕܶܡ ܕܶܐܬܼܶܐܡܰܪ ܒܝܰܕܼ ܢܒܼܺܝܳܐ ܕܶܐܡܰܪ܃ ܐܶܦܼܬܿܰܚ ܦܽܘܡܝ ܒܡܰܬܼܠܶܐ̈܂ ܘܰܐܒܿܰܥ ܟܰܣܝܳܬܼܳܐ̈ ܕܡܶܢ ܩܕܼܳܡ ܬܿܰܪ̈ܡܝܳܬܼܶܗ ܕܥܳܠܡܳܐ܀
13:36 [ai]	ܗܳܝܕܶܝܢ ܝܶܫܽܘܥ ܫܒܼܰܩ ܠܟܼܶܢܫܶܐ̈܂ ܘܶܐܬܼܳܐ ܠܒܼܰܝܬܳܐ܂ ܘܰܩܪܶܒܼܘ ܠܘܳܬܼܶܗ ܬܰܠܡܺܝܕܼܰܘܗ̱ܝ̈܂ ܘܳܐܡܪܺܝܢ ܠܶܗ܂ ܦܰܫܶܩ ܠܰܢ ܡܰܬܼܠܳܐ ܗܰܘ ܕܙܺܝܙܳܢܶܐ̈ ܘܕܼܰܩܪܺܝܬܼܳܐ܂
13:37 [ai]	ܗܽܘ ܕܶܝܢ ܥܢܳܐ ܘܶܐܡܰܪ ܠܗܽܘܢ܂ ܗܰܘ ܕܰܙܪܰܥ ܙܰܪܥܳܐ ܛܳܒܼܳܐ܂ ܐܺܝܬܼܰܘܗ̱ܝ ܒܪܶܗ ܕܐ̱ܢܳܫܳܐ܂
13:38 [ai]	ܘܰܩܪܺܝܬܼܳܐ ܐܺܝܬܼܶܝܗ ܥܳܠܡܳܐ܂ ܙܰܪܥܳܐ ܕܶܝܢ ܛܳܒܼܳܐ܂ ܒܢܶܝܗ ܐܶܢܽܘܢ ܕܡܰܠܟܿܽܘܬܼܳܐ܂ ܙܺܝܙܳܢܶܐ̈ ܕܶܝܢ ܐܺܝܬܼܰܝܗܽܘܢ ܒܢܰܘܗ̱ܝ ܕܒܺܝܫܳܐ܂
13:39 [ai]	ܒܥܶܠܕܿܒܼܳܒܼܳܐ ܕܶܝܢ ܕܰܙܪܰܥ ܐܶܢܽܘܢ܂ ܐܺܝܬܼܰܘܗ̱ܝ ܣܳܛܳܢܳܐ܂ ܚܨܳܕܼܳܐ ܕܶܝܢ ܐܺܝܬܼܰܘܗ̱ܝ ܫܽܘܠܳܡܶܗ ܕܥܳܠܡܳܐ܂ ܚܳܨܽܘܕܼܶܐ̈ ܕܶܝܢ ܡܰܠܰܐܟܼܶܐ̈܂
13:40 [ai]	ܐܰܝܟܿܰܢܳܐ ܗܳܟܼܺܝܠ ܕܡܶܬܼܓܿܰܒܿܶܝܢ ܙܺܝܙܳܢܶܐ̈ ܘܝܳܩܕܺܝܢ ܒܢܽܘܪܳܐ܃ ܗܳܟܼܰܢܳܐ ܢܶܗܘܶܐ ܒܫܽܘܠܳܡܶܗ ܕܥܳܠܡܳܐ ܗܳܢܳܐ܂
13:41 [ai]	ܢܫܰܕܿܰܪ ܒܪܶܗ ܕܐ̱ܢܳܫܳܐ ܡܰܠܰܐܟܼܰܘܗ̱ܝ̈܃ ܘܰܢܓܼܰܒܿܽܘܢ ܡܶܢ ܡܰܠܟܿܽܘܬܼܶܗ ܟܽܠܗܽܘܢ ܡܰܟܼܫܽܘܠܶܐ̈܃ ܘܟܼܽܠܗܽܘܢ ܥܳܒܼܕܿܰܝ̈ ܥܰܘܠܳܐ܂
13:42 [ai]	ܘܢܰܪܡܽܘܢ ܐܶܢܽܘܢ ܒܰܐܬܿܽܘܢܳܐ ܕܢܽܘܪܳܐ܂ ܬܰܡܳܢ ܢܶܗܘܶܐ ܒܶܟܼܝܳܐ܂ ܘܚܽܘܪܳܩ ܫܶܢܶܐ̈܂
13:43 [ai]	ܗܳܝܕܶܝܢ ܙܰܕܿܺܝܩܶܐ̈ ܢܶܢܗܪܽܘܢ ܐܰܝܟܼ ܫܶܡܫܳܐ ܒܡܰܠܟܿܽܘܬܼܶܗ ܕܰܐܒܼܽܘܗܽܘܢ܀ ܡܰܢ ܕܺܐܝܬܼ ܠܶܗ ܐܶܕܼܢܶܐ̈ ܕܢܶܫܡܰܥ܂ ܢܶܫܡܰܥ ܀
13:44 [ai]	ܬܽܘܒܼ ܕܳܡܝܳܐ ܡܰܠܟܿܽܘܬܼܳܐ ܕܰܫܡܰܝܳܐ܃ ܠܣܺܝܡܬܼܳܐ ܕܰܡܛܰܫܝܳܐ ܒܰܩܪܺܝܬܼܳܐ܂ ܗܳܝ ܕܶܐܫܟܿܚܳܗ ܓܰܒܼܪܳܐ܂ ܘܛܰܫܝܳܗ܃ ܘܡܶܢ ܚܰܕܼܽܘܬܼܶܗ܂ ܐܶܙܰܠ ܙܰܒܿܶܢ ܟܽܠ ܕܺܐܝܬܼ ܠܶܗ܂ ܘܙܰܒܼܢܳܗ ܠܰܩܪܺܝܬܼܳܐ ܗܳܝ܀
13:45 [ai]	ܬܽܘܒܼ ܕܳܡܝܳܐ ܡܰܠܟܿܽܘܬܼܳܐ ܕܰܫܡܰܝܳܐ܃ ܠܓܼܰܒܼܪܳܐ ܬܰܓܿܳܪܳܐ ܕܒܳܥܶܐ ܗ̱ܘܳܐ ܡܰܪ̈ܓܿܳܢܝܳܬܼܳܐ ܛܳܒܼܳܬܼܳܐ̈܃
13:46 [ai]	ܟܰܕܼ ܕܶܝܢ ܐܶܫܟܿܰܚ ܡܰܪܓܿܳܢܺܝܬܼܳܐ ܚܕܼܳܐ ܝܰܩܺܝܪܰܬܼ ܕܡܰܝܳܐ̈܃ ܐܶܙܰܠ ܙܰܒܿܶܢ ܟܽܠ ܡܳܐ ܕܺܐܝܬܼ ܠܶܗ܂ ܘܙܰܒܼܢܳܗ܀
13:47 [ai]	ܬܽܘܒܼ ܕܳܡܝܳܐ ܡܰܠܟܿܽܘܬܼܳܐ ܕܰܫܡܰܝܳܐ܃ ܠܰܡܨܺܝܕܼܬܳܐ ܕܢܶܦܼܠܰܬܼ ܒܝܰܡܳܐ܃ ܘܡܶܢ ܟܽܠ ܓܢܶܣ ܟܶܢܫܰܬܼ܂
13:48 [ai]	ܘܟܼܰܕܼ ܡܠܳܬܼ܃ ܐܰܣܩܽܘܗ ܠܰܣܦܼܳܪ̈ܰܝ ܝܰܡܳܐ܂ ܘܺܝܬܼܶܒܼܘ ܓܿܰܒܺܝܘ܂ ܘܛܳܒܼܶܐ̈ ܐܰܪܡܺܝܘ ܒܡܳܐܢܶܐ̈܃ ܘܒܼܺܝܫܶܐ̈ ܫܕܼܰܘ ܠܒܼܰܪ܂
13:49 [ai]	ܗܳܟܼܰܢܳܐ ܢܶܗܘܶܐ ܒܫܽܘܠܳܡܶܗ ܕܥܳܠܡܳܐ܂ ܢܶܦܿܩܽܘܢ ܡܰܠܰܐܟܼܶܐ̈ ܘܰܢܦܼܰܪܫܽܘܢ ܒܺܝܫܶܐ̈ ܡܶܢ ܒܰܝܢܰܝ̈ ܙܰܕܿܺܝܩܶܐ̈܃
13:50 [ai]	ܘܢܰܪܡܽܘܢ ܐܶܢܽܘܢ ܒܰܐܬܿܽܘܢܳܐ ܕܢܽܘܪܳܐ܂ ܬܰܡܳܢ ܢܶܗܘܶܐ ܒܶܟܼܝܳܐ܂ ܘܚܽܘܪܳܩ ܫܶܢܶܐ̈܀
13:51 [ai]	ܐܶܡܰܪ ܠܗܽܘܢ ܝܶܫܽܘܥ ܐܶܣܬܿܰܟܿܰܠܬܿܽܘܢ܃ ܟܽܠܗܶܝܢ ܗܳܠܶܝܢ܂ ܐܳܡܪܺܝܢ ܠܶܗ ܐܺܝܢ܂ ܡܳܪܰܢ܃
13:52 [ai]	ܐܳܡܰܪ ܠܗܽܘܢ܂ ܡܶܛܽܠ ܗܳܢܳܐ ܟܽܠ ܣܳܦܼܪܳܐ ܕܡܶܬܿܬܿܰܠܡܰܕܼ ܠܡܰܠܟܿܽܘܬܼ ܫܡܰܝܳܐ܃ ܕܳܡܶܐ ܠܓܼܰܒܼܪܳܐ ܡܳܪܶܐ ܒܰܝܬܳܐ܃ ܕܡܰܦܿܶܩ ܡܶܢ ܣܺܝܡܳܬܼܶܗ̈ ܚܰܕܼ̱ܬܿܳܬܼܳܐ̈܂ ܘܥܰܬܿܺܝܩܳܬܼܳܐ̈܀
13:53 [ai]	ܘܰܗܘܳܐ ܕܟܰܕܼ ܫܰܠܶܡ ܝܶܫܽܘܥ ܡܰܬܼܠܶܐ̈ ܗܳܠܶܝܢ܃ ܫܰܢܺܝ ܡܶܢ ܬܰܡܳܢ܂
13:54 [ai]	ܘܶܐܬܼܳܐ ܠܰܡܕܼܺܝܢ̱ܬܿܶܗ܂ ܘܡܰܠܶܦܼ ܗ̱ܘܳܐ ܠܗܽܘܢ ܒܰܟܼܢܽܘܫܳܬܼܗܽܘܢ̈܂ ܐܰܝܟܿܰܢܳܐ ܕܢܶܬܼܗܪܽܘܢ܂ ܘܢܺܐܡܪܽܘܢ܂ ܐܰܝܡܶܟܿܳܐ ܠܶܗ ܠܗܳܢܳܐ ܚܶܟܼܡܬܼܳܐ ܗܳܕܼܶܐ ܘܚܰܝܠܶܐ̈܂
13:55 [ai]	ܠܳܐ ܗ̱ܘܳܐ ܗܳܢܳܐ ܒܪܶܗ ܕܢܰܓܿܳܪܳܐ܂ ܠܳܐ ܐܶܡܶܗ ܡܶܬܼܩܰܪܝܳܐ ܡܰܪܝܰܡ܃ ܘܰܐܚܰܘܗ̱ܝ̈ ܝܥܰܩܽܘܒܼ ܘܝܳܘܣܺܐ܃ ܘܫܶܡܥܽܘܢ ܘܺܝܗܽܘܕܼܳܐ܃
13:56 [ai]	ܘܰܐܚܘܳܬܼܶܗ̈ ܟܽܠܗܶܝܢ܃ ܠܳܐ ܗܳܐ ܠܘܳܬܼܰܢ ܐܶܢܶܝܢ̈܃ ܐܰܝܡܶܟܿܳܐ ܠܶܗ ܗܳܟܼܺܝܠ ܠܗܳܢܳܐ ܗܳܠܶܝܢ ܟܽܠܗܶܝܢ܂
13:57 [ai]	ܘܡܶܬܼܟܿܰܫܠܺܝܢ ܗ̱ܘܰܘ ܒܶܗ܀ ܗܽܘ ܕܶܝܢ ܝܶܫܽܘܥ ܐܶܡܰܪ ܠܗܽܘܢ܂ ܠܰܝܬܿ ܢܒܼܺܝܳܐ ܕܰܨܥܺܝܪ܃ ܐܶܠܳܐ ܒܰܡܕܼܺܝܢ̱ܬܿܶܗ܂ ܘܰܒܒܼܰܝܬܿܶܗ܂
13:58 [ai]	ܘܠܳܐ ܥܒܼܰܕܼ ܬܰܡܳܢ ܚܰܝܠܶܐ̈ ܣܰܓܿܺܝܶܐܐ̈܃ ܡܶܛܽܠ ܠܳܐ ܗܰܝܡܳܢܽܘܬܼܗܽܘܢ܀

next chapter