The Comprehensive Aramaic Lexicon

14:01 [ai]	ܒܗܰܘ ܕܶܝܢ ܙܰܒܼܢܳܐ܃ ܫܡܰܥ ܗܶܪܳܘܕܼܶܣ ܛܶܛܪܰܪܟܼܰܐ ܫܶܡܥܶܗ ܕܝܶܫܽܘܥ܂
14:02 [ai]	ܘܶܐܡܰܪ ܠܥܰܒܼܕܿܰܘܗ̱ܝ̈܂ ܗܳܢܰܘ ܝܽܘܚܰܢܳܢ ܡܰܥܡܕܼܳܢܳܐ܂ ܗܽܘ ܩܳܡ ܡܶܢ ܒܶܝܬܼ ܡܺܝܬܼܶܐ̈܂ ܡܶܛܽܠ ܗܳܢܳܐ ܚܰܝܠܶܐ̈ ܡܶܣܬܿܰܥܪܺܝܢ ܒܶܗ܀
14:03 [ai]	ܗܰܘ ܓܶܝܪ ܗܶܪܳܘܕܼܶܣ ܐܶܚܰܕܼ ܗ̱ܘܳܐ ܠܝܽܘܚܰܢܳܢ܃ ܘܰܐܣܪܶܗ ܘܰܐܪܡܝܶܗ ܒܶܝܬܼ ܐܰܣܺܝܪ̈ܶܐ܂ ܡܶܛܽܠ ܗܶܪܳܘܕܼܺܝܰܐ܂ ܐܰܢ̱ܬܿܰܬܼ ܦܼܺܝܠܺܝܦܿܳܘܣ ܐܰܚܽܘܗ̱ܝ܂
14:04 [ai]	ܐܳܡܰܪ ܗ̱ܘܳܐ ܠܶܗ ܓܶܝܪ ܝܽܘܚܰܢܳܢ܃ ܕܠܳܐ ܫܰܠܺܝܛ ܕܬܶܗܘܶܐ ܠܳܟܼ ܐܰܢ̱ܬܿܬܼܳܐ܂
14:05 [ai]	ܘܨܳܒܼܶܐ ܗ̱ܘܳܐ ܠܡܶܩܛܠܶܗ܂ ܘܕܼܳܚܶܠ ܗ̱ܘܳܐ ܡܶܢ ܥܰܡܳܐ܂ ܕܰܐܝܟܼ ܕܠܰܢܒܼܺܝܳܐ ܐܰܚܺܝܕܼܺܝܢ ܗ̱ܘܰܘ ܠܶܗ܀
14:06 [ai]	ܟܰܕܼ ܗܘܳܐ ܕܶܝܢ ܒܶܝܬܼ ܝܰܠܕܿܶܗ ܕܗܶܪܳܘܕܼܶܣ܃ ܪܰܩܕܼܰܬܼ ܒܰܪܬܼܳܗ ܕܗܶܪܳܘܕܼܺܝܰܐ ܩܕܼܳܡ ܣܡܺܝܟܼܶܐ̈܂ ܘܫܶܦܼܪܰܬܼ ܠܶܗ ܠܗܶܪܳܘܕܼܶܣ܂
14:07 [ai]	ܡܶܛܽܠ ܗܳܢܳܐ ܒܡܰܘܡܳܬܼܳܐ ܺܝܡܳܐ ܠܳܗ܃ ܕܢܶܬܿܶܠ ܠܳܗ ܟܽܠܡܶܕܶܡ ܕܬܶܫܰܐܠ܂
14:08 [ai]	ܗܺܝ ܕܶܝܢ ܡܶܛܽܠ ܕܡܰܠܦܼܳܐ ܗ̱ܘܳܬܼ ܠܶܐܡܳܗ܂ ܐܶܡܪܰܬܼ܂ ܗܰܒܼ ܠܺܝ ܗܳܪܟܿܳܐ ܒܦܺܝܢܟܿܳܐ܃ ܪܺܫܶܗ ܕܝܽܘܚܰܢܳܢ ܡܰܥܡܕܼܳܢܳܐ܂
14:09 [ai]	ܘܟܼܶܪܝܰܬܼ ܠܶܗ ܠܡܰܠܟܿܳܐ܂ ܡܶܛܽܠ ܕܶܝܢ ܡܰܘܡܳܬܼܳܐ ܘܰܣܡܺܝܟܼܶܐ̈܃ ܦܩܰܕܼ ܕܢܶܬܼܺܝܗܶܒܼ ܠܳܗ܂
14:10 [ai]	ܘܫܰܕܿܰܪ ܦܰܣܩܶܗ ܪܺܫܶܗ ܕܝܽܘܚܰܢܳܢ܂ ܒܶܝܬܼ ܐܰܣܺܝܪ̈ܶܐ܂
14:11 [ai]	ܘܰܐܝܬܿܺܝ ܪܺܫܶܗ ܒܦܺܝܢܟܿܳܐ܃ ܘܶܐܬܼܺܝܗܶܒܼ ܠܰܛܠܺܝܬܼܳܐ܂ ܘܰܐܝܬܿܝܰܬܼܶܗ ܠܶܐܡܳܗ܂
14:12 [ai]	ܘܰܩܪܶܒܼܘ ܬܰܠܡܺܝܕܼܰܘܗ̱ܝ̈܂ ܫܩܰܠܘ ܫܠܰܕܿܶܗ ܩܒܼܰܪܘ܃ ܘܶܐܬܼܰܘ ܚܰܘܺܝܘ ܠܝܶܫܽܘܥ ܿ܀ܿ܀ܿ
14:13 [ai]	ܝܶܫܽܘܥ ܕܶܝܢ ܟܰܕܼ ܫܡܰܥ܃ ܫܰܢܺܝ ܡܶܢ ܬܰܡܳܢ ܒܶܐܠܦܼܳܐ ܠܰܐܬܼܪܳܐ ܚܽܘܪܒܿܳܐ ܒܰܠܚܽܘܕܼܰܘܗ̱ܝ܂ ܘܟܼܰܕܼ ܫܡܰܥܘ ܟܶܢܫܶܐ̈܃ ܐܶܙܰܠܘ ܒܳܬܼܪܶܗ ܒܝܰܒܼܫܳܐ ܡܶܢ ܡܕܼܺܝܢܳܬܼܳܐ̈܂
14:14 [ai]	ܘܰܢܦܼܰܩ ܝܶܫܽܘܥ܂ ܚܙܳܐ ܟܶܢܫܶܐ̈ ܣܰܓܿܺܝܶܐܐ̈܃ ܘܶܐܬܼܪܰܚܰܡ ܥܠܰܝܗܽܘܢ܂ ܘܰܐܣܺܝ ܟܿܪ̈ܺܝܗܰܝܗܽܘܢ܀
14:15 [ai]	ܟܰܕܼ ܗܘܳܐ ܕܶܝܢ ܪܰܡܫܳܐ܂ ܩܪܶܒܼܘ ܠܘܳܬܼܶܗ ܬܰܠܡܺܝܕܼܰܘܗ̱ܝ̈܂ ܘܶܐܡܰܪܘ ܠܶܗ܂ ܐܰܬܼܪܳܐ ܚܽܘܪܒܿܳܐ ܗܽܘ܂ ܘܥܶܕܳܢܳܐ ܥܒܼܰܪ ܠܶܗ܂ ܫܪܺܝ ܟܶܢܫܶܐ̈ ܕܐ̱ܢܳܫܳܐ܂ ܕܢܺܐܙܽܠ̱ܘܢ ܠܩܽܘܪ̈ܝܳܐ܃ ܘܢܶܙܒܿܢܽܘܢ ܠܗܽܘܢ ܣܰܝܒܿܳܪܬܳܐ܀
14:16 [ai]	ܗܽܘ ܕܶܝܢ ܐܶܡܰܪ ܠܗܽܘܢ܂ ܠܳܐ ܡܶܬܼܒܿܥܶܐ ܠܗܽܘܢ ܠܡܺܐܙܰܠ܂ ܗܰܒܼܘ ܠܗܽܘܢ ܐܰܢ̱ܬܿܽܘܢ ܠܡܶܐܟܼܰܠ܂
14:17 [ai]	ܗܶܢܽܘܢ ܕܶܝܢ ܐܶܡܰܪܘ ܠܶܗ܂ ܠܰܝܬܿ ܠܰܢ ܬܢܳܢ܃ ܐܶܠܳܐ ܚܰܡܶܫ ܓܿܪ̈ܺܝܨܳܢ܂ ܘܰܬܼܪ̈ܶܝܢ ܢܽܘܢܺܝܢ̈܂
14:18 [ai]	ܐܳܡܰܪ ܠܗܽܘܢ ܝܶܫܽܘܥ܂ ܐܰܝܬܰܘ ܐܶܢܽܘܢ ܠܺܝ ܠܗܳܪܟܿܳܐ܂
14:19 [ai]	ܘܰܦܼܩܰܕܼ ܠܟܼܶܢܫܶܐ̈ ܠܡܶܣܬܿܡܳܟܼܽܘ ܥܰܠ ܐܰܪܥܳܐ܂ ܘܰܫܩܰܠ ܗܳܢܽܘܢ ܚܰܡܫܳܐ ܠܰܚܡܺܝܢ̈ ܘܰܬܼܪ̈ܶܝܢ ܢܽܘܢܺܝܢ̈܃ ܘܚܳܪ ܒܰܫܡܰܝܳܐ܂ ܘܒܼܰܪܶܟܼ ܘܰܩܨܳܐ܂ ܘܝܰܗ̱ܒܼ ܠܬܼܰܠܡܺܝܕܼܰܘܗ̱ܝ̈܂ ܘܗܶܢܽܘܢ ܬܰܠܡܺܝܕܼܶܐ̈ ܣܳܡܘ ܠܟܼܶܢܫܶܐ̈܂
14:20 [ai]	ܘܶܐܟܼܰܠܘ ܟܽܠܗܽܘܢ܂ ܘܰܣܒܼܰܥܘ܂ ܘܰܫܩܰܠܘ ܬܰܘܬܿܳܪ̈ܶܐ ܕܰܩܨܳܝܶܐ̈܂ ܬܪܶܥܣܰܪ ܩܽܘܦܼܺܝܢܺܝܢ̈ ܟܰܕܼ ܡܠܶܝܢ܂
14:21 [ai]	ܗܳܢܽܘܢ ܕܶܝܢ ܐ̱ܢܳܫܳܐ ܕܶܐܟܼܰܠܘ܃ ܗܳܘܶܝܢ ܗ̱ܘܰܘ ܐܰܠܦܼܶܐ̈ ܚܰܡܫܳܐ܃ ܣܛܰܪ ܡܶܢ ܢܶܫܶܐ̈ ܘܰܛܠܳܝܶܐ̈܀
14:22 [ai]	ܘܡܶܚܕܼܳܐ ܐܶܠܰܨ ܠܬܼܰܠܡܺܝܕܼܰܘܗ̱ܝ̈ ܕܢܶܣܩܽܘܢ ܠܰܣܦܼܺܝܢ̱ܬܳܐ܃ ܘܢܺܐܙܽܠ̱ܘܢ ܩܕܼܳܡܰܘܗ̱ܝ ܠܥܶܒܼܪܳܐ܂ ܥܰܕܼ ܫܳܪܶܐ ܗܽܘ ܠܟܼܶܢܫܶܐ̈܂
14:23 [ai]	ܘܟܼܰܕܼ ܫܪܳܐ ܠܟܼܶܢܫܶܐ̈܃ ܣܠܶܩ ܠܛܽܘܪܳܐ ܒܰܠܚܽܘܕܼܰܘܗ̱ܝ ܠܰܡܨܰܠܳܝܽܘ܀ ܘܟܼܰܕܼ ܚܶܫܟܿܰܬܼ܂ ܒܰܠܚܽܘܕܼܰܘܗ̱ܝ ܗ̱ܘܳܐ ܬܰܡܳܢ܂
14:24 [ai]	ܘܶܐܠܦܼܳܐ ܪܰܚܺܝܩܳܐ ܗ̱ܘܳܬܼ ܡܶܢ ܐܰܪܥܳܐ܂ ܐܶܣܛܕܼܰܘܳܬܼܳܐ̈ ܣܰܓܿܺܝܶܐܐ̈܂ ܟܰܕܼ ܡܶܫܬܿܰܓܼܫܳܐ ܣܰܓܿܺܝ ܡܶܢ ܓܰܠ̱ܠܶܐ̈܂ ܪܽܘܚܳܐ ܓܶܝܪ ܠܩܽܘܒܼܠܳܗ ܗ̱ܘܳܬܼ܂
14:25 [ai]	ܒܡܰܛܰܪܬܼܳܐ ܕܶܝܢ ܪܒܼܺܝܥܳܝܬܳܐ ܕܠܺܠܝܳܐ܃ ܐܶܬܼܳܐ ܠܘܳܬܼܗܽܘܢ ܝܶܫܽܘܥ܂ ܟܰܕܼ ܡܗܰܠܶܟܼ ܥܰܠ ܡܰܝܳܐ̈܂
14:26 [ai]	ܘܰܚܙܰܐܘܽܗ̱ܝ ܬܰܠܡܺܝܕܼܰܘܗ̱ܝ̈܂ ܕܰܡܗܰܠܶܟܼ ܥܰܠ ܡܰܝܳܐ̈܂ ܘܶܐܬܿܬܿܙܺܝܥܘ܂ ܘܳܐܡܪܺܝܢ ܗ̱ܘܰܘ܂ ܕܚܶܙܘܳܐ ܗܽܘ ܕܰܓܿܳܠܳܐ܂ ܘܡܶܢ ܕܶܚܠܰܬܼܗܽܘܢ܂ ܩܥܰܘ܂
14:27 [ai]	ܗܽܘ ܕܶܝܢ ܝܶܫܽܘܥ ܒܰܪܫܳܥܬܼܶܗ ܡܰܠܶܠ ܥܰܡܗܽܘܢ܂ ܘܶܐܡܰܪ܂ ܐܶܬܼܠܰܒ̱ܿܒܼܘ܂ ܐܶܢܳܐ ܐ̱ܢܳܐ܂ ܠܳܐ ܬܶܕܼܚܠܽܘܢ܀
14:28 [ai]	ܘܰܥܢܳܐ ܟܺܐܦܼܳܐ܂ ܘܶܐܡܰܪ ܠܶܗ܂ ܡܳܪܝ܃ ܐܶܢ ܐܰܢ̱ܬܿ ܗ̱ܽܘ܂ ܦܩܽܘܕܼ ܠܺܝ ܐܺܬܼܶܐ ܠܘܳܬܼܳܟܼ ܥܰܠ ܡܰܝܳܐ̈܂
14:29 [ai]	ܝܶܫܽܘܥ ܕܶܝܢ ܐܶܡܰܪ ܠܶܗ܂ ܬܳܐ܂ ܘܰܢܚܶܬܼ ܟܺܐܦܼܳܐ ܡܶܢ ܐܶܠܦܼܳܐ܃ ܘܗܰܠܶܟܼ ܥܰܠ ܡܰܝܳܐ̈ ܕܢܺܐܬܼܶܐ ܠܘܳܬܼ ܝܶܫܽܘܥ܂
14:30 [ai]	ܘܟܼܰܕܼ ܚܙܳܐ ܪܽܘܚܳܐ ܕܩܰܫܝܳܐ܂ ܕܚܶܠ܂ ܘܫܰܪܺܝ ܠܡܶܛܒܿܰܥ܂ ܘܰܐܪܺܝܡ ܩܳܠܶܗ ܘܶܐܡܰܪ܂ ܡܳܪܝ܂ ܦܪܽܘܩܰܝܢܝ܂
14:31 [ai]	ܘܒܼܰܪ ܫܳܥܬܼܶܗ ܦܫܰܛ ܐܺܝܕܼܶܗ ܡܳܪܰܢ܃ ܘܰܐܚܕܿܶܗ܂ ܘܶܐܡܰܪ ܠܶܗ܂ ܙܥܽܘܪ ܗܰܝܡܳܢܽܘܬܼܳܐ܂ ܠܡܳܢܳܐ ܐܶܬܼܦܿܰܠܰܓܼܬܿ܀
14:32 [ai]	ܘܟܼܰܕܼ ܣܠܶܩܘ ܠܶܐܠܦܼܳܐ܂ ܫܶܠܝܰܬܼ ܪܽܘܚܳܐ܂
14:33 [ai]	ܘܶܐܬܼܰܘ ܗܳܢܽܘܢ ܕܒܶܐܠܦܼܳܐ܂ ܣܓܼܶܕܼܘ ܠܶܗ܂ ܘܶܐܡܰܪܘ܂ ܫܰܪܺܝܪܳܐܺܝܬܼ ܒܪܶܗ ܐܰܢ̱ܬܿ ܕܰܐܠܳܗܳܐ܀
14:34 [ai]	ܘܰܪܕܼܰܘ ܘܶܐܬܼܰܘ ܠܰܐܪܥܳܐ ܕܓܼܶܢܶܣܰܪ܂
14:35 [ai]	ܘܶܐܫܬܰܘܕܿܥܽܘܗ̱ܝ ܐ̱ܢܳܫܳܐ ܕܰܐܬܼܪܳܐ ܗܰܘ܂ ܘܫܰܕܿܰܪܘ ܠܟܼܽܠܗܶܝܢ ܩܽܘܪ̈ܝܳܐ ܕܿܰܚܕܼܳܪ̈ܰܝܗܽܘܢ܃ ܘܩܰܪܶܒܼܘ ܠܶܗ ܟܽܠܗܽܘܢ ܐܰܝܠܶܝܢ ܕܒܺܝܫ ܒܺܝܫ ܥܒܼܺܝܕܼܺܝܢ܂
14:36 [ai]	ܘܒܼܳܥܶܝܢ ܗ̱ܘܰܘ ܡܶܢܶܗ ܕܢܶܩܪܒܼܽܘܢ܂ ܐܳܦܼܶܢ ܠܟܼܶܢܦܼܳܐ ܒܰܠܚܽܘܕܼ ܕܰܠܒܼܽܘܫܶܗ܂ ܘܰܐܝܠܶܝܢ ܕܰܩܪܶܒܼܘ܂ ܐܶܬܼܰܐܣܺܝܘ܀

next chapter