← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


15:01 [ai]ܗܳܝܕܶܝܢ ܩܪܶܒܼܘ ܠܘܳܬܼ ܝܶܫܽܘܥ ܦܿܪ̈ܺܝܫܶܐ ܘܣܳܦܼܪ̈ܶܐ ܕܡܶܢ ܐܽܘܪܺܫܠܶܡ܂ ܘܳܐܡܪܺܝܢ܂
15:02 [ai]ܠܡܳܢܳܐ ܬܰܠܡܺܝܕܼܰܝܟܿ̈ ܥܳܒܼܪܺܝܢ ܥܰܠ ܡܰܫܠܡܳܢܽܘܬܼܳܐ ܕܩܰܫܺܝܫܶܐ̈܃ ܘܠܳܐ ܡܫܺܝܓܼܺܝܢ ܐܺܝܕܼܰܝܗܽܘܢ̈܂ ܡܳܐ ܕܳܐܟܼܠܺܝܢ ܠܰܚܡܳܐ܂
15:03 [ai]ܥܢܳܐ ܝܶܫܽܘܥ ܘܶܐܡܰܪ ܠܗܽܘܢ܂ ܠܡܳܢܳܐ ܐܳܦܼ ܐܰܢ̱ܬܿܽܘܢ ܥܳܒܼܪܺܝܢ ܐܢ̱ܬܿܽܘܢ ܥܰܠ ܦܽܘܩܕܳܢܳܐ ܕܰܐܠܳܗܳܐ܂ ܡܶܛܽܠ ܡܰܫܠܡܳܢܽܘܬܼܟܼܽܘܢ܂
15:04 [ai]ܐܰܠܳܗܳܐ ܓܶܝܪ ܐܶܡܰܪ܂ ܝܰܩܰܪ ܠܰܐܒܼܽܘܟܼ܂ ܘܠܶܐܡܳܟܼ܂ ܘܡܰܢ ܕܰܡܨܰܚܶܐ ܠܰܐܒܼܽܘܗ̱ܝܘ ܠܶܐܡܶܗ܂ ܡܡܳܬܼ ܢܡܽܘܬܼ܂
15:05 [ai]ܐܰܢ̱ܬܿܽܘܢ ܕܶܝܢ ܐܳܡܪܺܝܢ ܐܢ̱ܬܿܽܘܢ ܟܽܠ ܡܰܢ ܕܢܺܐܡܰܪ ܠܰܐܒܼܳܐ ܐܰܘ ܠܶܐܡܳܐ܂ ܩܽܘܪܒܿܳܢܝ ܡܶܕܶܡ ܕܬܶܬܼܗܢܶܐ ܡܶܢܝ܂ ܘܠܳܐ ܢܝܰܩܰܪ ܠܰܐܒܼܽܘܗ̱ܝ ܐܰܘ ܠܶܐܡܶܗ܂
15:06 [ai]ܘܒܼܰܛܶܠܬܿܽܘܢ ܡܶܠܬܼܳܐ ܕܰܐܠܳܗܳܐ ܡܶܛܽܠ ܡܰܫܠܡܳܢܽܘܬܼܳܐ ܕܺܝܠܟܼܽܘܢ܂
15:07 [ai]ܢܳܣܒܰܝ̈ ܒܰܐܦܿܶܐ̈܂ ܫܰܦܿܺܝܪ ܐܶܬܼܢܰܒܺܝ ܥܠܰܝܟܿܽܘܢ ܐܶܫܰܥܝܳܐ܂ ܘܶܐܡܰܪ܂
15:08 [ai]ܥܰܡܳܐ ܗܳܢܳܐ ܒܣܶܦܼܘܳܬܼܶܗ̈ ܗ̱ܘ ܡܝܰܩܰܪ ܠܺܝ܂ ܠܶܒܗܽܘܢ ܕܶܝܢ ܣܰܓܿܺܝ ܪܰܚܺܝܩ ܡܶܢܝ܂
15:09 [ai]ܘܰܣܪܺܝܩܳܐܺܝܬܼ ܕܳܚܠܺܝܢ ܠܺܝ܂ ܟܰܕܼ ܡܰܠܦܼܺܝܢ ܝܽܘܠܦܿܳܢܶܐ̈ ܕܦܽܘܩܕܳܢܶܐ̈ ܕܿܰܒܼܢܰܝܢܳܫܳܐ܂
15:10 [ai]ܘܰܩܪܳܐ ܠܟܼܶܢܫܶܐ̈܂ ܘܶܐܡܰܪ ܠܗܽܘܢ ܫܡܰܥܘ܂ ܘܶܐܣܬܿܰܟ̱ܿܠܘ܂
15:11 [ai]ܠܳܐ ܗ̱ܘܳܐ ܡܶܕܶܡ ܕܥܳܐܶܠ ܠܦܼܽܘܡܳܐ ܡܣܰܝܶܒܼ ܠܒܼܰܪܢܳܫܳܐ܂ ܐܶܠܳܐ ܡܶܕܶܡ ܕܢܳܦܼܶܩ ܡܶܢ ܦܽܘܡܳܐ܃ ܗܰܘ ܗ̱ܽܘ ܡܣܰܝܶܒܼ ܠܒܼܰܪܢܳܫܳܐ܀
15:12 [ai]ܗܳܝܕܶܝܢ ܩܪܶܒܼܘ ܬܰܠܡܺܝܕܼܰܘܗ̱ܝ̈܂ ܘܳܐܡܪܺܝܢ ܠܶܗ܂ ܝܳܕܼܰܥ ܐܰܢ̱ܬܿ܃ ܕܿܰܦܼܪ̈ܺܝܫܶܐ ܕܰܫܡܰܥܘ ܡܶܠܬܼܳܐ ܗܳܕܼܶܐ܂ ܐܶܬܼܟܿܫܶܠܘ܂
15:13 [ai]ܗܽܘ ܕܶܝܢ ܥܢܳܐ ܘܶܐܡܰܪ ܠܗܽܘܢ܂ ܟܽܠ ܢܶܨܒܿܬܼܳܐ ܐܰܝܕܼܳܐ ܕܠܳܐ ܢܰܨܒܿܳܗ ܐܳܒܼܝ ܕܒܰܫܡܰܝܳܐ܂ ܬܶܬܼܥܩܰܪ܂
15:14 [ai]ܫܒܼܽܘܩܘ ܠܗܽܘܢ܂ ܣܡܰܝܳܐ̈ ܐܶܢܽܘܢ܂ ܢܳܓܼܽܘܕܼܶܐ̈ ܕܰܣܡܰܝܳܐ̈܂ ܣܰܡܝܳܐ ܕܶܝܢ ܠܣܰܡܝܳܐ ܐܶܢ ܢܶܕܼܒܰܪ܃ ܬܿܪ̈ܰܝܗܽܘܢ܂ ܒܓܽܘܡܳܨܳܐ ܢܳܦܼܠܺܝܢ܀
15:15 [ai]ܘܰܥܢܳܐ ܫܶܡܥܽܘܢ ܟܺܐܦܼܳܐ܂ ܘܶܐܡܰܪ ܠܶܗ܂ ܡܳܪܝ܂ ܦܰܫܶܩ ܠܰܢ ܡܰܬܼܠܳܐ ܗܳܢܳܐ܂
15:16 [ai]ܗܽܘ ܕܶܝܢ ܐܶܡܰܪ ܠܗܽܘܢ܂ ܥܕܼܰܡܳܐ ܠܗܳܫܳܐ ܐܳܦܼ ܐܰܢ̱ܬܿܽܘܢ܃ ܠܳܐ ܡܶܣܬܿܰܟܠܺܝܢ ܐܢ̱ܬܿܽܘܢ܃
15:17 [ai]ܠܳܐ ܝܳܕܼܥܺܝܢ ܐܢ̱ܬܿܽܘܢ ܕܿܡܶܕܶܡ ܕܥܳܐܶܠ ܠܦܼܽܘܡܳܐ܂ ܠܟܼܰܪܣܳܐ ܗܽܘ ܐܳܙܶܠ܃ ܘܡܶܢ ܬܰܡܳܢ ܒܬܰܕܼܟܿܺܝܬܼܳܐ ܡܶܫܬܿܕܼܶܐ ܠܒܼܰܪ܃
15:18 [ai]ܡܶܕܶܡ ܕܶܝܢ ܕܡܶܢ ܦܽܘܡܳܐ ܢܳܦܼܶܩ܂ ܡܶܢ ܠܶܒܿܳܐ ܢܳܦܼܶܩ܂ ܘܗܽܘܝܽܘ ܡܣܰܝܶܒܼ ܠܶܗ ܠܒܼܰܪܢܳܫܳܐ܂
15:19 [ai]ܡܶܢ ܠܶܒܿܳܐ ܗܽܘ ܓܶܝܪ ܢܳܦܼܩܳܢ̈ ܡܰܚܫܒܼܳܬܼܳܐ̈ ܒܺܝܫܳܬܼܳܐ̈܂ ܓܰܘܪܳܐ܂ ܩܶܛܠܳܐ܂ ܙܳܢܝܽܘܬܼܳܐ܂ ܓܰܢܳܒܼܽܘܬܼܳܐ܂ ܣܳܗܕܿܽܘܬܼ ܫܽܘܩܪܳܐ܂ ܓܽܘܕܿܳܦܼܳܐ܂
15:20 [ai]ܗܳܠܶܝܢ ܐܶܢܶܝܢ̈ ܕܰܡܣܰܝܒܼܳܢ̈ ܠܒܼܰܪܢܳܫܳܐ܂ ܐܶܢ ܐ̱ܢܳܫ ܕܶܝܢ ܢܶܠܥܰܣ ܟܰܕܼ ܠܳܐ ܡܫܳܓܼܳܢ̈ ܐܺܝܕܼܰܘܗ̱ܝ̈܂ ܠܳܐ ܡܶܣܬܿܰܝܰܒܼ܀܀
15:21 [ai]ܘܰܢܦܼܰܩ ܡܶܢ ܬܰܡܳܢ ܝܶܫܽܘܥ܃ ܘܶܐܬܼܳܐ ܠܰܬܼܚܽܘܡܳܐ ܕܨܽܘܪ ܘܰܕܼܨܰܝܕܳܢ܂
15:22 [ai]ܘܗܳܐ ܐܰܢ̱ܬܿܬܼܳܐ ܟܢܰܥܢܳܝܬܳܐ܂ ܡܶܢ ܬܚܽܘܡܶܐ ܗܳܢܽܘܢ܂ ܢܶܦܼܩܰܬܼ ܟܰܕܼ ܩܳܥܝܳܐ܂ ܘܳܐܡܪܳܐ܂ ܐܶܬܼܪܰܚܰܡ ܥܠܰܝ ܡܳܪܝ܃ ܒܪܶܗ ܕܕܼܰܘܺܝܕܼ܂ ܒܪܰܬܼܝ ܒܺܝܫܳܐܺܝܬܼ ܡܶܬܿܕܰܒܼܪܳܐ ܡܶܢ ܫܺܐܕܼܳܐ܂
15:23 [ai]ܗܽܘ ܕܶܝܢ ܠܳܐ ܦܰܢܝܳܗ ܦܶܬܼܓܼܳܡܳܐ܃ ܘܰܩܪܶܒܼܘ ܬܰܠܡܺܝܕܼܰܘܗ̱ܝ̈ ܒܥܰܘ ܡܶܢܶܗ܂ ܘܳܐܡܪܺܝܢ܂ ܫܪܺܝܗ ܕܩܳܥܝܳܐ ܒܳܬܼܪܰܢ܂
15:24 [ai]ܗܽܘ ܕܶܝܢ ܥܢܳܐ ܘܶܐܡܰܪ ܠܗܽܘܢ܂ ܠܳܐ ܐܶܫܬܿܰܕܿܪܶܬܼ܂ ܐܶܠܳܐ ܠܘܳܬܼ ܥܶܪ̈ܒܿܶܐ ܕܰܛܥܰܘ ܡܶܢ ܒܶܝܬܼ ܐܺܝܣܪܳܝܶܠ܂
15:25 [ai]ܗܺܝ ܕܶܝܢ ܐܶܬܼܳܬܼ ܣܶܓܼܕܿܰܬܼ ܠܶܗ܂ ܘܶܐܡܪܰܬܼ܂ ܡܳܪܝ܂ ܥܰܕܿܰܪܰܝܢܝ܂
15:26 [ai]ܐܶܡܰܪ ܠܳܗ܂ ܠܳܐ ܫܰܦܿܺܝܪ ܠܡܶܣܰܒܼ ܠܰܚܡܳܐ ܕܿܰܒܼܢܰܝܳܐ܂ ܘܰܠܡܰܪܡܳܝܽܘ ܠܟܼܰܠܒܿܶܐ̈܂
15:27 [ai]ܗܺܝ ܕܶܝܢ ܐܶܡܪܰܬܼ܂ ܐܺܝܢ ܡܳܪܝ܃ ܐܳܦܼ ܟܰܠܒܿܶܐ̈܂ ܐܳܟܼܠܺܝܢ ܡܶܢ ܦܿܰܪ̈ܬܿܽܘܬܼܶܐ ܕܢܳܦܼܠܺܝܢ ܡܶܢ ܦܿܳܬܼܽܘܪ̈ܶܐ ܕܿܡܳܪ̈ܰܝܗܽܘܢ܂ ܘܚܳܐܶܝܢ܂
15:28 [ai]ܗܳܝܕܶܝܢ ܐܶܡܰܪ ܠܳܗ ܝܶܫܽܘܥ܂ ܐܳܘ ܐܰܢ̱ܬܿܬܼܳܐ܂ ܪܰܒܿܳܐ ܗ̱ܝ ܗܰܝܡܳܢܽܘܬܼܶܟܼܝ܂ ܢܶܗܘܶܐ ܠܶܟܼܝ܂ ܐܰܝܟܼ ܕܨܳܒܼܝܳܐ ܐܰܢ̱ܬܿܝ܂ ܘܶܐܬܼܰܐܣܝܰܬܼ ܒܰܪܬܼܳܗ܂ ܡܶܢ ܗܳܝ ܫܳܥܬܼܳܐ ܿ܀ܿ܀ܿ
15:29 [ai]ܘܫܰܢܺܝ ܡܶܢ ܬܰܡܳܢ ܝܶܫܽܘܥ܃ ܘܶܐܬܼܳܐ ܥܰܠ ܓܶܢ̱ܒܼ ܝܰܡܳܐ ܕܰܓܼܠܺܝܠܳܐ܀ ܘܰܣܠܶܩ ܠܛܽܘܪܳܐ܂ ܘܺܝܬܼܶܒܼ ܬܰܡܳܢ܂
15:30 [ai]ܘܰܩܪܶܒܼܘ ܠܘܳܬܼܶܗ ܟܶܢܫܶܐ̈ ܣܰܓܿܺܝܶܐܐ̈܃ ܕܺܐܝܬܼ ܗ̱ܘܰܘ ܥܰܡܗܽܘܢ܂ ܚܓܼܺܝܪ̈ܶܐ܂ ܘܰܣܡܰܝܳܐ̈܂ ܘܚܰܪ̈ܫܶܐ܂ ܘܰܦܼܫܺܝܓܼܶܐ̈܃ ܘܰܐ̱ܚܪ̈ܳܢܶܐ ܣܰܓܿܺܝܶܐܐ̈܂ ܘܰܐܪܡܺܝܘ ܐܶܢܽܘܢ ܠܘܳܬܼ ܪ̈ܶܓܼܠܰܘܗ̱ܝ ܕܝܶܫܽܘܥ܂ ܘܰܐܣܺܝ ܐܶܢܽܘܢ܂
15:31 [ai]ܐܰܝܟܼ ܕܿܢܶܬܿܕܰܡܪܽܘܢ ܟܶܢܫܶܐ̈ ܗܳܢܽܘܢ ܕܚܳܙܶܝܢ܃ ܚܰܪ̈ܫܶܐ ܕܰܡܡܰܠܠܺܝܢ܃ ܘܰܦܼܫܺܝܓܼܶܐ̈ ܕܡܶܬܼܚܰܠܡܺܝܢ܃ ܘܰܚܓܼܺܝܪ̈ܶܐ ܕܰܡܗܰܠܟܼܺܝܢ܃ ܘܰܣܡܰܝܳܐ̈ ܕܚܳܙܶܝܢ܂ ܘܫܰܒܿܰܚܘ ܠܰܐܠܳܗܳܐ ܕܺܝܣܪܳܝܶܠ܀
15:32 [ai]ܗܽܘ ܕܶܝܢ ܝܶܫܽܘܥ ܩܪܳܐ ܠܬܼܰܠܡܺܝܕܼܰܘܗ̱ܝ̈܂ ܘܶܐܡܰܪ ܠܗܽܘܢ܂ ܡܶܬܼܪܰܚܰܡ ܐ̱ܢܳܐ ܥܰܠ ܟܶܢܫܳܐ ܗܳܢܳܐ܃ ܕܗܳܐ ܬܠܳܬܼܳܐ ܝܰܘܡܺܝܢ̈ ܩܰܘܺܝܘ ܠܘܳܬܼܝ܃ ܘܠܰܝܬܿ ܠܗܽܘܢ ܡܳܐ ܕܢܶܐܟܼܠܽܘܢ܂ ܘܕܼܶܐܫܪܶܐ ܐܶܢܽܘܢ ܟܰܕܼ ܨܳܝܡܺܝܢ̈܂ ܠܳܐ ܨܳܒܼܶܐ ܐ̱ܢܳܐ܂ ܕܰܠܡܳܐ ܢܥܽܘܦܼܽܘܢ ܒܽܐܘܪܚܳܐ܂
15:33 [ai]ܐܳܡܪܺܝܢ ܠܶܗ ܬܰܠܡܺܝܕܼܰܘܗ̱ܝ̈܂ ܐܰܝܡܶܟܿܳܐ ܠܰܢ ܒܚܽܘܪܒܿܳܐ ܠܰܚܡܳܐ ܕܰܢܣܰܒܿܰܥ ܟܶܢܫܳܐ ܗܳܢܳܐ ܟܽܠܶܗ܂
15:34 [ai]ܐܳܡܰܪ ܠܗܽܘܢ ܝܶܫܽܘܥ܃ ܟܡܳܐ ܠܰܚܡܺܝܢ̈ ܐܺܝܬܼ ܠܟܼܽܘܢ܂ ܐܳܡܪܺܝܢ ܠܶܗ ܫܰܒܼܥܳܐ܂ ܘܩܰܠܺܝܠ ܢܽܘܢܶܐ̈ ܕܰܩܕܿܩܶܐ̈܂
15:35 [ai]ܘܰܦܼܩܰܕܼ ܠܟܼܶܢܫܶܐ̈ ܕܢܶܣܬܿܰܡܟܿܽܘܢ ܥܰܠ ܐܰܪܥܳܐ܂
15:36 [ai]ܘܰܫܩܰܠ ܠܗܳܠܶܝܢ ܫܰܒܼܥܳܐ ܠܰܚܡܺܝܢ̈ ܘܰܠܢܽܘܢܶܐ̈܃ ܘܫܰܒܿܰܚ܂ ܘܰܩܨܳܐ ܘܝܰܗ̱ܒܼ ܠܬܼܰܠܡܺܝܕܼܰܘܗ̱ܝ̈܂ ܘܬܼܰܠܡܺܝܕܼܶܐ̈܂ ܝܰܗ̱ܒܼܘ ܠܟܼܶܢܫܶܐ̈܂
15:37 [ai]ܘܶܐܟܼܰܠܘ ܟܽܠܗܽܘܢ܂ ܘܰܣܒܼܰܥܘ܂ ܘܰܫܩܰܠܘ ܬܰܘܬܿܳܪ̈ܶܐ ܕܰܩܨܳܝܶܐ̈܂ ܡܠܶܐ ܫܰܒܼܥܳܐ ܐܶܣܦܿܪ̈ܺܝܕܼܺܝܢ܂
15:38 [ai]ܗܳܢܽܘܢ ܕܶܝܢ ܕܶܐܟܼܰܠܘ܃ ܗܳܘܶܝܢ ܗ̱ܘܰܘ ܐܰܪܒܥܳܐ ܐܰܠܦܼܺܝܢ̈ ܓܿܰܒܼܪ̈ܶܐ܂ ܣܛܰܪ ܡܶܢ ܢܶܫܶܐ̈ ܘܰܛܠܳܝܶܐ̈܂
15:39 [ai]ܘܟܼܰܕܼ ܫܪܳܐ ܠܟܼܶܢܫܶܐ̈܃ ܣܠܶܩ ܠܶܐܠܦܼܳܐ܂ ܘܶܐܬܼܳܐ ܠܰܬܼܚܽܘܡܳܐ ܕܡܰܓܼܕܿܽܘ܀

next chapter