← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


17:01 [ai]ܘܒܼܳܬܼܰܪ ܫܬܳܐ ܝܰܘܡܺܝܢ̈܃ ܕܒܰܪ ܝܶܫܽܘܥ ܠܟܼܺܐܦܼܳܐ܂ ܘܰܠܝܥܰܩܽܘܒܼ܂ ܘܰܠܝܽܘܚܰܢܳܢ ܐܰܚܽܘܗ̱ܝ܃ ܘܰܐܣܶܩ ܐܶܢܽܘܢ ܠܛܽܘܪܳܐ ܪܳܡܳܐ܂ ܒܰܠܚܽܘܕܼܰܝܗܽܘܢ܂
17:02 [ai]ܘܶܐܫܬܿܰܚܠܰܦܼ ܝܶܫܽܘܥ ܩܕܼܳܡܰܝܗܽܘܢ܂ ܘܰܢܗܰܪ ܦܰܪܨܽܘܦܿܶܗ܂ ܐܰܝܟܼ ܫܶܡܫܳܐ܂ ܢܰܚܬܰܘܗ̱ܝ̈ ܕܶܝܢ ܚܘܰܪܘ ܐܰܝܟܼ ܢܽܘܗܪܳܐ܂
17:03 [ai]ܘܶܐܬܼܚܙܺܝܘ ܠܗܽܘܢ ܡܽܘܫܶܐ ܘܶܐܠܺܝܳܐ܂ ܟܰܕܼ ܡܡܰܠܠܺܝܢ ܥܰܡܶܗ܂
17:04 [ai]ܥܢܳܐ ܕܶܝܢ ܟܺܐܦܼܳܐ܂ ܘܶܐܡܰܪ ܠܝܶܫܽܘܥ܂ ܡܳܪܝ܃ ܫܰܦܿܺܝܪ ܗ̱ܽܘ ܠܰܢ܂ ܕܰܬܼܢܳܢ ܢܶܗܘܶܐ܂ ܘܶܐܢ ܨܳܒܼܶܐ ܐܰܢ̱ܬܿ܂ ܢܶܥܒܿܶܕܼ ܬܢܳܢ܂ ܬܠܳܬܼ ܡܰܛܠܺܝܢ̈܂ ܚܕܼܳܐ ܠܳܟܼ܂ ܘܰܚܕܼܳܐ ܠܡܽܘܫܶܐ܂ ܘܰܚܕܼܳܐ ܠܶܐܠܺܝܳܐ܂
17:05 [ai]ܘܥܰܕܼ ܗܽܘ ܡܡܰܠܶܠ܃ ܗܳܐ ܥܢܳܢܳܐ ܢܰܗܺܝܪܬܳܐ ܐܰܛܠܰܬܼ܂ ܥܠܰܝܗܽܘܢ܂ ܘܩܳܠܳܐ ܗܘܳܐ ܡܶܢ ܥܢܳܢܳܐ ܕܳܐܡܰܪ܂ ܗܳܢܰܘ ܒܶܪܝ ܚܰܒܺܝܒܼܳܐ܂ ܕܒܶܗ ܐܶܨܛܒܼܺܝܬܼ܂ ܠܶܗ ܫܡܰܥܘ ܿ܀ܿ܀ܿ
17:06 [ai]ܘܟܼܰܕܼ ܫܡܰܥܘ ܬܰܠܡܺܝܕܼܶܐ̈܃ ܢܦܼܰܠܘ ܥܰܠ ܐܰܦܿܰܝܗܽܘܢ̈܂ ܘܰܕܼܚܶܠܘ ܛܳܒܼ܂
17:07 [ai]ܘܶܐܬܼܩܰܪܰܒܼ ܠܘܳܬܼܗܽܘܢ ܝܶܫܽܘܥ܃ ܘܰܩܪܶܒܼ ܠܗܽܘܢ܂ ܘܶܐܡܰܪ܂ ܩܽܘܡܘ܂ ܠܳܐ ܬܶܕܼܚܠܽܘܢ܂
17:08 [ai]ܘܰܐܪܺܝܡܘ ܥܰܝܢܰܝܗܽܘܢ̈܂ ܘܰܠܐ̱ܢܳܫ ܠܳܐ ܚܙܰܘ܃ ܐܶܠܳܐ ܐܶܢ ܠܝܶܫܽܘܥ ܒܰܠܚܽܘܕܼܰܘܗ̱ܝ܂
17:09 [ai]ܘܟܼܰܕܼ ܢܳܚܬܿܺܝܢ ܡܶܢ ܛܽܘܪܳܐ܃ ܦܰܩܶܕܼ ܐܶܢܽܘܢ ܝܶܫܽܘܥ܂ ܘܶܐܡܰܪ ܠܗܽܘܢ܂ ܠܥܺܝܢ ܐ̱ܢܳܫ܂ ܠܳܐ ܬܺܐܡܪܽܘܢ ܚܶܙܘܳܐ ܗܳܢܳܐ܃ ܥܕܼܰܡܳܐ ܕܰܢܩܽܘܡ ܒܪܶܗ ܕܐ̱ܢܳܫܳܐ ܡܶܢ ܡܺܝܬܼܶܐ̈܀
17:10 [ai]ܘܫܰܐܠܽܘܗ̱ܝ ܬܰܠܡܺܝܕܼܰܘܗ̱ܝ̈܂ ܘܳܐܡܪܺܝܢ ܠܶܗ܂ ܡܳܢܳܐ ܗܳܟܼܺܝܠ ܣܳܦܼܪ̈ܶܐ ܐܳܡܪܺܝܢ܃ ܕܶܐܠܺܝܳܐ ܘܳܠܶܐ ܕܢܺܐܬܼܶܐ ܠܽܘܩܕܼܰܡ܂
17:11 [ai]ܥܢܳܐ ܝܶܫܽܘܥ ܘܶܐܡܰܪ܂ ܐܶܠܺܝܳܐ ܐܳܬܼܶܐ ܠܽܘܩܕܼܰܡ܃ ܕܟܽܠ ܡܶܕܶܡ ܢܫܰܠܶܡ܂
17:12 [ai]ܐܳܡܰܪ ܐ̱ܢܳܐ ܠܟܼܽܘܢ ܕܶܝܢ܃ ܕܗܳܐ ܐܶܠܺܝܳܐ ܐܶܬܼܳܐ܂ ܘܠܳܐ ܝܰܕܼܥܽܘܗ̱ܝ܂ ܘܰܥܒܼܰܕܼܘ ܒܶܗ ܟܽܠ ܡܳܐ ܕܰܨܒܼܰܘ܂ ܗܳܟܼܰܢܳܐ ܐܳܦܼ ܒܪܶܗ ܕܐ̱ܢܳܫܳܐ ܥܬܼܺܝܕܼ ܕܢܶܚܰܫ ܡܶܢܗܽܘܢ܂
17:13 [ai]ܗܳܝܕܶܝܢ ܐܶܣܬܿܰܟܿܰܠܘ ܬܰܠܡܺܝܕܼܶܐ̈܂ ܕܥܰܠ ܝܽܘܚܰܢܳܢ ܡܰܥܡܕܼܳܢܳܐ ܐܶܡܰܪ ܠܗܽܘܢ܀
17:14 [ai]ܘܟܼܰܕܼ ܐܶܬܼܰܘ ܠܘܳܬܼ ܟܶܢܫܳܐ܃ ܩܪܶܒܼ ܠܶܗ ܓܰܒܼܪܳܐ܂ ܘܰܒܪܶܟܼ ܥܰܠ ܒܽܘܪ̈ܟܿܰܘܗ̱ܝ܂
17:15 [ai]ܘܶܐܡܰܪ ܠܶܗ܂ ܡܳܪܝ܃ ܐܶܬܼܪܰܚܰܡ ܥܠܰܝ܂ ܒܶܪܝ ܕܺܐܝܬܼ ܠܶܗ ܒܰܪ ܐܶܓܿܳܪܳܐ܂ ܘܒܼܺܝܫܳܐ ܺܝܬܼܥܒܼܺܝܕܼ܂ ܟܡܳܐ ܓܶܝܪ ܙܰܒܼܢܺܝܢ̈ ܒܢܽܘܪܳܐ ܢܳܦܼܶܠ܃ ܘܰܟܼܡܳܐ ܙܰܒܼܢܺܝܢ̈ ܒܡܰܝܳܐ̈܂
17:16 [ai]ܘܩܰܪܶܒܼܬܼܶܗ ܠܬܼܰܠܡܺܝܕܼܰܝܟܿ̈܂ ܘܠܳܐ ܐܶܫܟܿܰܚܘ ܠܡܰܐܣܳܝܽܘܬܼܶܗ܂
17:17 [ai]ܥܢܳܐ ܝܶܫܽܘܥ܂ ܘܶܐܡܰܪ܂ ܐܽܘܢ ܫܰܪܒܿܬܼܳܐ ܕܠܳܐ ܡܗܰܝܡܢܳܐ܂ ܘܰܡܥܰܩܰܠܬܳܐ܂ ܥܕܼܰܡܳܐ ܠܶܐܡܰܬܼܝ ܐܶܗܘܶܐ ܥܰܡܟܼܽܘܢ܂ ܘܰܥܕܼܰܡܳܐ ܠܶܐܡܰܬܼܝ ܐܶܣܰܝܒܰܪܟܼܽܘܢ܂ ܐܰܝܬܿܳܝܗ̱ܝ ܠܺܝ ܠܟܼܳܐ܀
17:18 [ai]ܘܰܟܼܐܳܐ ܒܶܗ ܝܶܫܽܘܥ܃ ܘܰܢܦܼܰܩ ܡܶܢܶܗ ܫܺܐܕܼܳܐ܂ ܘܶܐܬܼܰܐܣܺܝ ܛܰܠܝܳܐ ܡܶܢ ܗܳܝ ܫܳܥܬܼܳܐ܀
17:19 [ai]ܗܳܝܕܶܝܢ ܩܪܶܒܼܘ ܬܰܠܡܺܝܕܼܶܐ̈ ܠܘܳܬܼ ܝܶܫܽܘܥ ܒܰܠܚܽܘܕܼܰܘܗ̱ܝ܂ ܘܶܐܡܰܪܘ ܠܶܗ܂ ܠܡܳܢܳܐ ܚܢܰܢ ܠܳܐ ܐܶܫܟܿܰܚܢ ܠܡܰܐܣܳܝܽܘܬܼܶܗ܂
17:20 [ai]ܐܳܡܰܪ ܠܗܽܘܢ ܝܶܫܽܘܥ܂ ܡܶܛܽܠ ܠܳܐ ܗܰܝܡܳܢܽܘܬܼܟܼܽܘܢ܀ ܐܰܡܺܝܢ ܓܶܝܪ ܐܳܡܰܪ ܐ̱ܢܳܐ ܠܟܼܽܘܢ܃ ܕܶܐܢ ܬܶܗܘܶܐ ܒܟܽܘܢ ܗܰܝܡܳܢܽܘܬܼܳܐ܂ ܐܰܝܟܼ ܦܪܶܕܿܬܳܐ ܕܿܚܰܪܕܠܳܐ܃ ܬܺܐܡܪܽܘܢ ܠܛܽܘܪܳܐ ܗܳܢܳܐ܃ ܕܫܰܢܳܐ ܡܶܟܿܳܐ܂ ܘܰܢܫܰܢܶܐ܃ ܘܡܶܕܶܡ ܠܳܐ ܢܶܚܣܰܢܟܼܽܘܢ܂
17:21 [ai]ܗܳܢܳܐ ܕܶܝܢ ܓܶܢܣܳܐ ܠܳܐ ܢܳܦܼܶܩ܂ ܐܶܠܳܐ ܒܨܰܘܡܳܐ܂ ܘܒܼܰܨܠܽܘܬܼܳܐ܀
17:22 [ai]ܟܰܕܼ ܡܶܬܼܗܰܦܿܟܼܺܝܢ ܕܶܝܢ ܒܰܓܼܠܺܝܠܳܐ܃ ܐܶܡܰܪ ܠܗܽܘܢ ܝܶܫܽܘܥ܂ ܥܬܼܺܝܕܼ ܗ̱ܽܘ ܒܪܶܗ ܕܐ̱ܢܳܫܳܐ ܕܢܶܫܬܿܠܶܡ ܒܺܐܝܕܼܰܝ̈ ܒܢܰܝ ܐ̱ܢܳܫܳܐ܂
17:23 [ai]ܘܢܶܩܛܠܽܘܢܳܝܗ̱ܝ܂ ܘܰܠܝܰܘܡܳܐ ܕܰܬܼܠܳܬܼܳܐ ܢܩܽܘܡ܂ ܘܟܼܶܪܝܰܬܼ ܠܗܽܘܢ ܛܳܒܼ܀܀
17:24 [ai]ܘܟܼܰܕܼ ܐܶܬܼܰܘ ܠܰܟܼܦܼܰܪܢܰܚܽܘܡ܃ ܩܪܶܒܼܘ ܗܳܢܽܘܢ ܕܿܢܳܣܒܺܝܢ ܬܿܪ̈ܶܝܢ ܬܿܪ̈ܶܝܢ ܙܽܘܙܺܝܢ̈ ܕܰܟܼܣܶܦܼ ܪܺܫܳܐ ܠܘܳܬܼ ܟܺܐܦܼܳܐ܂ ܘܶܐܡܰܪܘ ܠܶܗ܂ ܪܰܒܟܽܘܢ܂ ܠܳܐ ܝܳܗܶܒܼ ܬܿܪ̈ܶܝܢ ܙܽܘܙܰܘܗ̱ܝ̈܂
17:25 [ai]ܐܳܡܰܪ ܠܗܽܘܢ ܐܺܝܢ܂ ܘܟܼܰܕܼ ܥܰܠ ܟܺܐܦܼܳܐ ܠܒܼܰܝܬܳܐ܃ ܩܰܕܡܶܗ ܝܶܫܽܘܥ܂ ܘܶܐܡܰܪ ܠܶܗ܂ ܡܳܢܳܐ ܡܶܬܼܚܙܶܐ ܠܳܟܼ ܫܶܡܥܽܘܢ܂ ܡܰܠܟܿܶܝܗ̈ ܕܰܐܪܥܳܐ܃ ܡܶܢ ܡܰܢ ܢܳܣܒܺܝܢ ܡܰܟܼܣܳܐ ܘܰܟܼܣܶܦܼ ܪܺܫܳܐ܂ ܡܶܢ ܒܢܰܝܗܽܘܢ܂ ܐܰܘ ܡܶܢ ܢܽܘܟܼܪ̈ܳܝܶܐ܂
17:26 [ai]ܐܳܡܰܪ ܠܶܗ ܫܶܡܥܽܘܢ܂ ܡܶܢ ܢܽܘܟܼܪ̈ܳܝܶܐ܂ ܐܳܡܰܪ ܠܶܗ ܝܶܫܽܘܥ܂ ܡܳܕܼܶܝܢ ܒܢܰܝ ܚܺܐܪ̈ܶܐ ܐܶܢܽܘܢ ܒܢܰܝܳܐ܂
17:27 [ai]ܕܠܳܐ ܕܶܝܢ ܢܰܟܼܫܶܠ ܐܶܢܽܘܢ܂ ܙܶܠ ܠܝܰܡܳܐ܂ ܘܰܐܪܡܳܐ ܒܰܠܽܘܥܳܐ܂ ܘܢܽܘܢܳܐ ܩܰܕܼܡܳܝܳܐ ܕܣܳܠܶܩ܃ ܦܬܼܰܚ ܦܽܘܡܶܗ܂ ܘܬܼܶܫܟܿܰܚ ܐܶܣܬܿܺܪܳܐ܂ ܗܳܝ ܣܰܒܼ܃ ܘܗܰܒܼ ܚܠܳܦܼܰܝ܂ ܘܰܚܠܳܦܼܰܝܟܿ܀

next chapter