← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


18:01 [ai]ܒܗܳܝ ܫܳܥܬܼܳܐ܃ ܩܪܶܒܼܘ ܬܰܠܡܺܝܕܼܶܐ̈ ܠܘܳܬܼ ܝܶܫܽܘܥ܂ ܘܳܐܡܪܺܝܢ܂ ܡܰܢܽܘ ܟܰܝ ܪܰܒܼ ܒܡܰܠܟܿܽܘܬܼܳܐ ܕܰܫܡܰܝܳܐ܂
18:02 [ai]ܘܰܩܪܳܐ ܝܶܫܽܘܥ ܛܰܠܝܳܐ܂ ܘܰܐܩܺܝܡܶܗ ܒܰܝܢܳܬܼܗܽܘܢ܂
18:03 [ai]ܘܶܐܡܰܪ܂ ܐܰܡܺܝܢ ܐܳܡܰܪܢܳܐ ܠܟܼܽܘܢ܂ ܕܶܐܠܳܐ ܬܶܬܼܗܰܦܼܟܿܽܘܢ܂ ܘܬܼܶܗܘܽܘܢ ܐܰܝܟܼ ܛܠܳܝܶܐ̈܃ ܠܳܐ ܬܶܥܠܽܘܢ ܠܡܰܠܟܿܽܘܬܼܳܐ ܕܰܫܡܰܝܳܐ܂
18:04 [ai]ܡܰܢ ܗܳܟܼܺܝܠ ܕܰܡܡܰܟܿܶܟܼ ܢܰܦܼܫܶܗ܂ ܐܰܝܟܼ ܗܳܢܳܐ ܛܰܠܝܳܐ܃ ܗܽܘ ܢܶܗܘܶܐ ܪܰܒܼ ܒܡܰܠܟܿܽܘܬܼܳܐ ܕܰܫܡܰܝܳܐ܂
18:05 [ai]ܘܡܰܢ ܕܰܢܩܰܒܿܶܠ ܐܰܝܟܼ ܛܰܠܝܳܐ ܗܳܢܳܐ܂ ܒܫܶܡܝ܂ ܠܺܝ ܡܩܰܒܿܶܠ܂
18:06 [ai]ܘܟܼܽܠ ܕܢܰܟܼܫܶܠ ܠܚܰܕܼ ܡܶܢ ܗܳܠܶܝܢ ܙܥܽܘܪ̈ܶܐ܂ ܕܰܡܗܰܝܡܢܺܝܢ ܒܺܝ܃ ܦܰܩܳܚ ܗ̱ܘܳܐ ܠܶܗ ܕܬܶܗܘܶܐ ܬܰܠܝܳܐ ܪܰܚܝܳܐ ܕܰܚܡܳܪܳܐ ܒܨܰܘܪܶܗ܃ ܘܰܡܛܰܒܿܰܥ ܒܥܽܘܡܩܰܘܗ̱ܝ̈ ܕܝܰܡܳܐ܀
18:07 [ai]ܘܳܝ ܠܥܳܠܡܳܐ ܡܶܢ ܡܰܟܼܫܽܘܠܶܐ̈܂ ܐܰܢܰܢܩܺܐ ܓܶܝܪ ܕܢܺܐܬܼܽܘܢ ܡܰܟܼܫܽܘܠܶܐ̈܂ ܘܳܝ ܕܶܝܢ ܠܓܼܰܒܼܪܳܐ ܕܒܺܐܝܕܼܶܗ ܢܺܐܬܼܽܘܢ ܡܰܟܼܫܽܘܠܶܐ̈܀
18:08 [ai]ܐܶܢ ܕܶܝܢ ܐܺܝܕܼܳܟܼ܂ ܐܰܘ ܪܶܓܼܠܳܟܼ܂ ܡܰܟܼܫܠܳܐ ܠܳܟܼ܃ ܦܣܽܘܩܶܝܗ ܘܰܫܕܼܺܝܗ ܡܶܢܳܟܼ܂ ܛܳܒܼ ܗ̱ܽܘ ܠܳܟܼ ܕܬܶܥܽܘܠ ܠܚܰܝ̈ܶܐ܂ ܟܰܕܼ ܚܓܼܺܝܣ ܐܰܢ̱ܬܿ ܐܰܘ ܟܰܕܼ ܦܫܺܝܓܼ܃ ܘܠܳܐ ܟܰܕܼ ܐܺܝܬܼ ܠܳܟܼ ܬܿܰܪ̈ܬܿܶܝܢ ܐܺܝܕܼܺܝܢ̈ ܐܰܘ ܬܿܰܪ̈ܬܿܶܝܢ ܪ̈ܶܓܼܠܺܝܢ܃ ܬܶܦܿܶܠ ܒܢܽܘܪܳܐ ܕܰܠܥܳܠܰܡ܂
18:09 [ai]ܘܶܐܢ ܗܽܘ ܕܥܰܝܢܳܟܼ ܡܰܟܼܫܠܳܐ ܠܳܟܼ܃ ܚܨܺܝܗ܂ ܘܰܫܕܼܺܝܗ ܡܶܢܳܟܼ܂ ܛܳܒܼ ܗ̱ܽܘ ܠܳܟܼ ܕܒܰܚܕܼܳܐ ܥܰܝܢܳܐ ܬܶܥܽܘܠ ܠܚܰܝ̈ܶܐ܃ ܘܠܳܐ ܟܰܕܼ ܐܺܝܬܼ ܠܳܟܼ ܬܿܰܪ̈ܬܿܶܝܢ ܥܰܝܢܺܝܢ̈ ܬܶܦܿܶܠ ܒܓܺܗܰܢܳܐ ܕܢܽܘܪܳܐ܀
18:10 [ai]ܚܙܰܘ ܠܳܐ ܬܶܒܼܣܽܘܢ ܥܰܠ ܚܰܕܼ ܡܶܢ ܗܳܠܶܝܢ ܙܥܽܘܪ̈ܶܐ܂ ܐܳܡܰܪ ܐ̱ܢܳܐ ܠܟܼܽܘܢ ܓܶܝܪ܃ ܕܡܰܠܰܐܟܼܰܝܗܽܘܢ̈ ܒܰܫܡܰܝܳܐ܃ ܒܟܽܠܙܒܼܰܢ ܚܳܙܶܝܢ ܦܰܪܨܽܘܦܿܶܗ ܕܳܐܒܼܝ ܕܒܰܫܡܰܝܳܐ܂
18:11 [ai]ܐܶܬܼܳܐ ܓܶܝܪ ܒܪܶܗ ܕܐ̱ܢܳܫܳܐ܃ ܕܢܰܚܶܐ ܡܶܕܶܡ ܕܿܰܐܒܺܝܕܼ ܗ̱ܘܳܐ܀
18:12 [ai]ܡܳܢܳܐ ܡܶܬܼܚܙܶܐ ܠܟܼܽܘܢ܂ ܐܶܢ ܢܶܗܘܽܘܢ ܠܐ̱ܢܳܫ ܡܳܐܐ ܥܶܪ̈ܒܺܝܢ܃ ܘܢܶܛܥܶܐ ܚܰܕܼ ܡܶܢܗܽܘܢ܃ ܠܳܐ ܫܳܒܼܶܩ ܬܶܫܥܺܝܢ ܘܬܼܶܫܥܳܐ ܒܛܽܘܪܳܐ܃ ܘܳܐܙܶܠ ܒܿܳܥܶܐ ܠܗܰܘ ܕܰܛܥܳܐ܂
18:13 [ai]ܘܶܐܢ ܢܶܫܟܿܚܶܗ܂ ܐܰܡܺܝܢ ܐܳܡܰܪܢܳܐ ܠܟܼܽܘܢ܃ ܕܚܳܕܼܶܐ ܒܶܗ ܝܰܬܿܺܝܪ ܡܶܢ ܬܶܫܥܺܝܢ ܘܬܼܶܫܥܳܐ ܕܠܳܐ ܛܥܰܘ܀
18:14 [ai]ܗܳܟܼܰܢܳܐ܂ ܠܰܝܬܿ ܨܶܒܼܝܳܢܳܐ ܩܕܼܳܡ ܐܰܒܼܽܘܟܼܽܘܢ ܕܒܰܫܡܰܝܳܐ܃ ܕܢܺܐܒܼܰܕܼ ܚܰܕܼ ܡܶܢ ܙܥܽܘܪ̈ܶܐ ܗܳܠܶܝܢ܀
18:15 [ai]ܐܶܢ ܕܶܝܢ ܐܰܣܟܿܶܠ ܒܳܟܼ ܐܰܚܽܘܟܼ܃ ܙܶܠ ܐܰܟܿܶܣܳܝܗ̱ܝ܂ ܒܰܝܢܰܝܟܿ܂ ܘܠܶܗ ܒܰܠܚܽܘܕܼ܂ ܐܶܢ ܫܰܡܥܳܟܼ܂ ܺܝܬܼܰܪܬܿ ܐܰܚܽܘܟܼ܂
18:16 [ai]ܘܶܐܠܳܐ ܫܰܡܥܳܟܼ܃ ܕܒܰܪ ܥܰܡܳܟܼ܂ ܚܰܕܼ ܐܰܘ ܬܿܪ̈ܶܝܢ܂ ܕܥܰܠ ܦܽܘܡ ܬܿܪ̈ܶܝܢ ܐܰܘ ܬܠܳܬܼܳܐ ܣܳܗܕܺܝܢ̈܂ ܬܩܽܘܡ ܟܽܠ ܡܶܠܳܐ܂
18:17 [ai]ܐܶܢ ܕܶܝܢ ܐܳܦܼ ܠܳܐ ܠܗܳܢܽܘܢ ܢܶܫܡܰܥ܃ ܐܶܡܰܪ ܠܥܺܕ̱ܿܬܳܐ܂ ܐܶܢ ܕܶܝܢ ܐܳܦܼ ܠܳܐ ܠܥܺܕ̱ܿܬܳܐ ܢܶܫܡܰܥ܃ ܢܶܗܘܶܐ ܠܳܟܼ ܐܰܝܟܼ ܡܳܟܼܣܳܐ܂ ܘܰܐܝܟܼ ܚܰܢܦܼܳܐ܀
18:18 [ai]ܘܰܐܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܟܽܠ ܡܳܐ ܕܬܶܐܣܪܽܘܢ ܒܰܐܪܥܳܐ܃ ܢܶܗܘܶܐ ܐܰܣܺܝܪ ܒܰܫܡܰܝܳܐ܂ ܘܡܶܕܶܡ ܕܬܶܫܪܽܘܢ ܒܰܐܪܥܳܐ܃ ܢܶܗܘܶܐ ܫܪܶܐ ܒܰܫܡܰܝܳܐ܀
18:19 [ai]ܬܽܘܒܼ ܐܳܡܰܪܢܳܐ ܠܟܼܽܘܢ܂ ܕܶܐܢ ܬܿܪ̈ܶܝܢ ܡܶܢܟܼܽܘܢ ܢܶܫܬܿܘܽܘܢ ܒܰܐܪܥܳܐ܂ ܥܰܠ ܟܽܠ ܨܒܼܽܘ ܕܢܶܫܶܐܠܽܘܢ܃ ܢܶܗܘܶܐ ܠܗܽܘܢ ܡܶܢ ܠܘܳܬܼ ܐܳܒܼܝ ܕܒܰܫܡܰܝܳܐ܂
18:20 [ai]ܐܰܝܟܿܳܐ ܓܶܝܪ ܕܿܰܬܼܪ̈ܶܝܢ ܐܰܘ ܬܠܳܬܼܳܐ ܟܢܺܝܫܺܝܢ ܒܫܶܡܝ܃ ܬܰܡܳܢ ܐܶܢܳܐ ܒܰܝܢܳܬܼܗܽܘܢ܀
18:21 [ai]ܗܳܝܕܶܝܢ ܩܪܶܒܼ ܠܘܳܬܼܶܗ ܟܺܐܦܼܳܐ܂ ܘܶܐܡܰܪ܂ ܡܳܪܝ܃ ܟܡܳܐ ܙܰܒܼܢܺܝܢ̈܂ ܐܶܢ ܢܰܣܟܿܶܠ ܒܺܝ ܐܳܚܝ܂ ܐܶܫܒܿܽܘܩ ܠܶܗ܃ ܥܕܼܰܡܳܐ ܠܰܫܒܼܰܥ ܙܰܒܼܢܺܝܢ̈܃
18:22 [ai]ܐܳܡܰܪ ܠܶܗ ܝܶܫܽܘܥ܂ ܠܳܐ ܐܳܡܰܪ ܐ̱ܢܳܐ ܠܳܟܼ ܥܕܼܰܡܳܐ ܠܰܫܒܼܰܥ܂ ܐܶܠܳܐ ܥܕܼܰܡܳܐ ܠܫܰܒܼܥܺܝܢ ܙܰܒܼܢܺܝܢ̈ ܫܒܼܰܥ ܫܒܼܰܥ ܿ܀ܿ܀ܿ
18:23 [ai]ܡܶܛܽܠ ܗܳܢܳܐ ܐܶܬܿܕܰܡܝܰܬܼ ܡܰܠܟܿܽܘܬܼܳܐ ܕܰܫܡܰܝܳܐ܃ ܠܓܼܰܒܼܪܳܐ ܡܰܠܟܿܳܐ܂ ܕܰܨܒܼܳܐ ܕܢܶܣܰܒܼ ܚܽܘܫܒܿܳܢܳܐ ܡܶܢ ܥܰܒܼܕܿܰܘܗ̱ܝ̈܂
18:24 [ai]ܘܟܼܰܕܼ ܫܰܪܺܝ ܠܡܶܣܰܒܼ܃ ܩܰܪܶܒܼܘ ܠܶܗ ܚܰܕܼ ܕܚܰܝܳܒܼ ܪܶܒܿܽܘ ܟܿܰܟܿܪ̈ܺܝܢ܂
18:25 [ai]ܘܟܼܰܕܼ ܠܰܝܬܿ ܠܶܗ ܠܡܶܦܼܪܰܥ܃ ܦܩܰܕܼ ܡܳܪܶܗ ܕܿܢܶܙܕܿܰܒܰܢ܂ ܗܽܘ ܘܰܐܢ̱ܬܿܬܼܶܗ ܘܰܒܢܰܘܗ̱ܝ܃ ܘܟܼܽܠ ܡܶܕܶܡ ܕܺܐܝܬܼ ܠܶܗ܂ ܘܢܶܦܼܪܽܘܥ܂
18:26 [ai]ܘܰܢܦܼܰܠ ܗܰܘ ܥܰܒܼܕܿܳܐ܂ ܣܓܼܶܕܼ ܠܶܗ܂ ܘܶܐܡܰܪ܂ ܡܳܪܝ܂ ܐܰܓܿܰܪ ܥܠܰܝ ܪܽܘܚܳܐ܃ ܘܟܼܽܠ ܡܶܕܶܡ ܦܳܪܰܥ ܐ̱ܢܳܐ ܠܳܟܼ܂
18:27 [ai]ܘܶܐܬܼܪܰܚܰܡ ܡܳܪܶܗ ܕܥܰܒܼܕܿܳܐ ܗܰܘ܂ ܘܰܫܪܳܝܗ̱ܝ܂ ܘܚܰܘܒܿܬܼܶܗ ܫܒܼܰܩ ܠܶܗ܂
18:28 [ai]ܢܦܼܰܩ ܕܶܝܢ ܥܰܒܼܕܿܳܐ ܗܰܘ܃ ܘܶܐܫܟܿܰܚ ܠܚܰܕܼ ܡܶܢ ܟܢܰܘܳܬܼܶܗ̈ ܕܚܰܝܳܒܼ ܗ̱ܘܳܐ ܠܶܗ܂ ܕܺܝܢܳܪ̈ܶܐ ܡܳܐܐ܂ ܘܰܐܚܕܿܶܗ܂ ܘܚܳܢܶܩ ܗ̱ܘܳܐ ܠܶܗ܂ ܘܶܐܡܰܪ ܠܶܗ܂ ܗܰܒܼܠܺܝ ܡܶܕܶܡ ܕܚܰܝܳܒܼ ܐܰܢ̱ܬܿ ܠܺܝ܂
18:29 [ai]ܘܰܢܦܼܰܠ ܗܰܘ ܟܢܳܬܼܶܗ ܥܰܠ ܪ̈ܶܓܼܠܰܘܗ̱ܝ܂ ܒܥܳܐ ܡܶܢܶܗ܂ ܘܶܐܡܰܪ ܠܶܗ܂ ܐܰܓܿܰܪ ܥܠܰܝ ܪܽܘܚܳܐ܂ ܘܦܼܳܪܰܥ ܐ̱ܢܳܐ ܠܳܟܼ܂
18:30 [ai]ܗܽܘ ܕܶܝܢ ܠܳܐ ܨܒܼܳܐ܂ ܐܶܠܳܐ ܐܶܙܰܠ ܐܰܪܡܝܶܗ ܒܶܝܬܼ ܐܰܣܺܝܪ̈ܶܐ܃ ܥܕܼܰܡܳܐ ܕܢܶܬܿܶܠ ܠܶܗ ܡܳܐ ܕܚܰܝܳܒܼ ܠܶܗ܂
18:31 [ai]ܟܰܕܼ ܚܙܰܘ ܕܶܝܢ ܟܢܰܘܳܬܼܗܽܘܢ̈ ܡܶܕܶܡ ܕܰܗܘܳܐ܃ ܟܶܪܝܰܬܼ ܠܗܽܘܢ܂ ܛܳܒܼ܂ ܘܶܐܬܼܰܘ܂ ܐܰܘܕܰܥܘ ܠܡܳܪܗܽܘܢ ܟܽܠ ܕܰܗܘܳܐ܂
18:32 [ai]ܗܳܝܕܶܝܢ ܩܪܳܝܗ̱ܝ ܡܳܪܶܗ܂ ܘܶܐܡܰܪ ܠܶܗ܂ ܥܰܒܼܕܿܳܐ ܒܺܝܫܳܐ܃ ܗܳܝ ܟܽܠܳܗ ܚܰܘܒܿܬܼܳܐ ܫܶܒܼܩܶܬܼ ܠܳܟܼ܂ ܕܰܒܼܥܰܝܬܿ ܡܶܢܝ܃
18:33 [ai]ܠܳܐ ܘܳܠܶܐ ܗ̱ܘܳܐ ܠܳܟܼ ܐܳܦܼ ܐܰܢ̱ܬܿ ܕܰܬܼܚܽܘܢ ܠܰܟܼܢܳܬܼܳܟܼ܃ ܐܰܝܟܿܰܢܳܐ ܕܶܐܢܳܐ ܚܳܢܬܿܳܟܼ܂
18:34 [ai]ܘܰܪܓܼܶܙ ܡܳܪܶܗ܂ ܘܰܐܫܠܡܶܗ ܠܰܡܢܰܓܿܕܼܳܢܶܐ̈܃ ܥܕܼܰܡܳܐ ܕܢܶܦܼܪܽܘܥ ܟܽܠ ܡܶܕܶܡ ܕܚܰܝܳܒܼ ܠܶܗ܂
18:35 [ai]ܗܳܟܼܰܢܳܐ ܢܶܥܒܿܶܕܼ ܠܟܼܽܘܢ ܐܳܒܼܝ ܕܒܰܫܡܰܝܳܐ܃ ܐܶܠܳܐ ܬܶܫܒܿܩܽܘܢ ܐ̱ܢܳܫ ܠܰܐܚܽܘܗ̱ܝ ܡܶܢ ܠܶܒܟܽܘܢ ܣܰܟܼܠܽܘܬܼܶܗ܀

next chapter