The Comprehensive Aramaic Lexicon

19:01 [ai]	ܘܰܗܘܳܐ ܕܟܰܕܼ ܫܰܠܶܡ ܝܶܫܽܘܥ ܡܶܠܶܐ̈ ܗܳܠܶܝܢ܃ ܫܩܰܠ ܡܶܢ ܓܠܺܝܠܳܐ܃ ܘܶܐܬܼܳܐ ܠܰܬܼܚܽܘܡܳܐ ܕܺܝܗܽܘܕܼ܂ ܠܥܶܒܼܪܳܐ ܕܝܽܘܪܕܿܢܳܢ܂
19:02 [ai]	ܘܶܐܬܼܰܘ ܒܳܬܼܪܶܗ ܟܶܢܫܶܐ̈ ܣܰܓܿܺܝܶܐܐ̈܃ ܘܰܐܣܺܝ ܐܶܢܽܘܢ ܬܰܡܳܢ܂
19:03 [ai]	ܘܰܩܪܶܒܼܘ ܠܘܳܬܼܶܗ ܦܿܪ̈ܺܝܫܶܐ܃ ܘܰܡܢܰܣܶܝܢ ܗ̱ܘܰܘ ܠܶܗ ܘܳܐܡܪܺܝܢ܂ ܐܶܢ ܫܰܠܺܝܛ ܠܐ̱ܢܳܫ ܕܢܶܫܪܶܐ ܐܰܢܬܿܬܼܶܗ ܒܟܽܠ ܥܶܠܳܐ܀
19:04 [ai]	ܗܽܘ ܕܶܝܢ ܥܢܳܐ ܘܶܐܡܰܪ ܠܗܽܘܢ܂ ܠܳܐ ܩܪܰܝܬܿܽܘܢ܂ ܕܗܰܘ ܕܰܥܒܼܰܕܼ ܡܶܢ ܒܪܺܫܺܝܬܼ܃ ܕܶܟܼܪܳܐ ܘܢܶܩܒܿܬܼܳܐ ܥܒܼܰܕܼ ܐܶܢܽܘܢ܃
19:05 [ai]	ܘܶܐܡܰܪ܂ ܡܶܛܽܠ ܗܳܢܳܐ܂ ܢܶܫܒܿܽܘܩ ܓܰܒܼܪܳܐ ܠܰܐܒܼܽܘܗ̱ܝ܂ ܘܠܶܐܡܶܗ܂ ܘܢܶܩܰܦܼ ܠܰܐܢ̱ܬܿܬܼܶܗ܂ ܘܢܶܗܘܽܘܢ ܬܿܪ̈ܰܝܗܽܘܢ܂ ܚܰܕܼ ܒܣܰܪ܂
19:06 [ai]	ܡܳܕܼܶܝܢ ܠܳܐ ܗܘܰܘ ܬܿܪ̈ܶܝܢ܂ ܐܶܠܳܐ ܚܰܕܼ ܦܓܼܰܪ܂ ܡܶܕܶܡ ܗܳܟܼܺܝܠ܂ ܕܰܐܠܳܗܳܐ ܙܰܘܶܓܼ܃ ܒܰܪܢܳܫܳܐ ܠܳܐ ܢܦܼܰܪܶܫ܂
19:07 [ai]	ܐܳܡܪܺܝܢ ܠܶܗ܂ ܠܡܳܢܳܐ ܗܳܟܼܺܝܠ ܡܽܘܫܶܐ ܦܰܩܶܕܼ܃ ܕܢܶܬܿܶܠ ܟܬܼܳܒܼܳܐ ܕܫܽܘܒܼܩܳܢܳܐ܂ ܘܢܶܫܪܺܝܗ܂
19:08 [ai]	ܐܳܡܰܪ ܠܗܽܘܢ܂ ܡܽܘܫܶܐ܂ ܠܽܘܩܒܼܰܠ ܩܰܫܝܽܘܬܼ ܠܶܒܟܽܘܢ ܐܰܦܿܶܣ ܠܟܼܽܘܢ ܕܬܶܫܪܽܘܢ ܢܶܫܰܝܟܿܽܘܢ̈܂ ܡܶܢ ܒܪܺܫܺܝܬܼ ܕܶܝܢ܂ ܠܳܐ ܗܘܳܐ ܗܳܟܼܰܢܳܐ܂
19:09 [ai]	ܐܳܡܰܪ ܐ̱ܢܳܐ ܠܟܼܽܘܢ ܕܶܝܢ܃ ܕܡܰܢ ܕܫܳܒܼܶܩ ܐܰܢ̱ܬܿܬܼܶܗ ܕܠܳܐ ܓܰܘܪܳܐ܃ ܘܢܳܣܶܒܼ ܐ̱ܚܪܺܬܼܳܐ܂ ܓܳܐܰܪ܂ ܘܡܰܢ ܕܢܳܣܶܒܼ ܫܒܼܺܝܩܬܳܐ܂ ܓܳܐܰܪ܀
19:10 [ai]	ܐܳܡܪܺܝܢ ܠܶܗ ܬܰܠܡܺܝܕܼܰܘܗ̱ܝ̈܂ ܐܶܢ ܗܳܟܼܰܢܳܐ ܐܺܝܬܼ ܥܶܕܼܠܳܝܳܐ܂ ܒܰܝܢܰܝ ܓܰܒܼܪܳܐ ܠܰܐܢ̱ܬܿܬܼܳܐ܃ ܠܳܐ ܦܰܩܳܚ ܠܡܶܣܰܒܼ ܐܰܢ̱ܬܿܬܼܳܐ܂
19:11 [ai]	ܗܽܘ ܕܶܝܢ ܐܶܡܰܪ ܠܗܽܘܢ܂ ܠܳܐ ܟܽܠܢܳܫ ܣܳܦܼܶܩ ܠܳܗ ܠܡܶܠܬܼܳܐ ܗܳܕܼܶܐ܃ ܐܶܠܳܐ ܡܰܢ ܕܺܝܗܺܝܒܼ ܠܶܗ܂
19:12 [ai]	ܐܺܝܬܼ ܓܶܝܪ ܡܗܰܝܡܢܶܐ̈܂ ܕܡܶܢ ܟܰܪܣܳܐ ܕܶܐܡܗܽܘܢ ܐܶܬܼܺܝܠܶܕܼܘ ܗܳܟܼܰܢܳܐ܂ ܘܺܐܝܬܼ ܡܗܰܝܡܢܶܐ̈܂ ܕܡܶܢ ܒܢܰܝܢܳܫܳܐ ܗܘܰܘ ܡܗܰܝܡܢܶܐ̈܂ ܘܺܐܝܬܼ ܡܗܰܝܡܢܶܐ̈܃ ܕܗܶܢܽܘܢ ܥܒܼܰܕܼܘ ܢܰܦܼܫܗܽܘܢ ܡܗܰܝܡܢܶܐ̈܂ ܡܶܛܽܠ ܡܰܠܟܿܽܘܬܼܳܐ ܕܰܫܡܰܝܳܐ܂ ܡܰܢ ܕܡܶܫܟܿܰܚ ܕܢܶܣܦܿܰܩ܂ ܢܶܣܦܿܰܩ܀
19:13 [ai]	ܗܳܝܕܶܝܢ ܩܰܪܶܒܼܘ ܠܶܗ ܛܠܳܝܶܐ̈ ܕܰܢܣܺܝܡ ܐܺܝܕܼܶܗ ܥܠܰܝܗܽܘܢ܂ ܘܰܢܨܰܠܶܐ܂ ܘܰܟܼܰܐܘ ܒܗܽܘܢ ܬܰܠܡܺܝܕܼܰܘܗ̱ܝ̈܂
19:14 [ai]	ܗܽܘ ܕܶܝܢ ܝܶܫܽܘܥ ܐܶܡܰܪ ܠܗܽܘܢ܂ ܫܒܼܽܘܩܘ ܛܠܳܝܶܐ̈ ܐܳܬܼܶܝܢ ܠܘܳܬܼܝ܂ ܘܠܳܐ ܬܶܟܼܠܽܘܢ ܐܶܢܽܘܢ܂ ܕܕܼܰܐܝܠܶܝܢ ܓܶܝܪ ܕܰܐܝܟܼ ܗܳܠܶܝܢ ܐܶܢܽܘܢ܂ ܐܺܝܬܼܶܝܗ ܡܰܠܟܿܽܘܬܼܳܐ ܕܰܫܡܰܝܳܐ܂
19:15 [ai]	ܘܣܳܡ ܐܺܝܕܼܶܗ ܥܠܰܝܗܽܘܢ܂ ܘܶܐܙܰܠ ܡܶܢ ܬܰܡܳܢ܀
19:16 [ai]	ܘܶܐܬܼܳܐ ܚܰܕܼ ܩܪܶܒܼ ܘܶܐܡܰܪ ܠܶܗ܂ ܡܰܠܦܼܳܢܳܐ ܛܳܒܼܳܐ܃ ܡܳܢܳܐ ܕܛܳܒܼ ܐܶܥܒܿܶܕܼ ܕܢܶܗܘܽܘܢ ܠܺܝ ܚܰܝ̈ܶܐ ܕܰܠܥܳܠܰܡ܂
19:17 [ai]	ܗܽܘ ܕܶܝܢ ܐܶܡܰܪ ܠܶܗ܂ ܡܳܢܳܐ ܩܳܪܶܐ ܐܰܢ̱ܬܿ ܠܺܝ ܛܳܒܼܳܐ܂ ܠܰܝܬܿ ܛܳܒܼܳܐ܂ ܐܶܠܳܐ ܐܶܢ ܚܰܕܼ ܐܰܠܳܗܳܐ܂ ܐܶܢ ܕܶܝܢ ܨܳܒܼܶܐ ܐܰܢ̱ܬܿ ܕܬܶܥܽܘܠ ܠܚܰܝ̈ܶܐ܂ ܛܰܪ ܦܽܘܩܕܳܢܶܐ̈܂
19:18 [ai]	ܐܳܡܰܪ ܠܶܗ ܐܰܝܠܶܝܢ܂ ܗܽܘ ܕܶܝܢ ܝܶܫܽܘܥ܂ ܐܶܡܰܪ ܠܶܗ܂ ܕܠܳܐ ܬܶܩܛܽܘܠ܂ ܘܠܳܐ ܬܓܼܽܘܪ܂ ܘܠܳܐ ܬܶܓܼܢܽܘܒܼ܂ ܘܠܳܐ ܬܶܣܗܰܕܼ ܣܳܗܕܿܽܘܬܼ ܫܽܘܩܪܳܐ܂
19:19 [ai]	ܘܝܰܩܰܪ ܠܰܐܒܼܽܘܟܼ܂ ܘܠܶܐܡܳܟܼ܂ ܘܬܼܰܚܶܒܼ ܠܩܰܪܺܝܒܼܳܟܼ܂ ܐܰܝܟܼ ܢܰܦܼܫܳܟܼ܂
19:20 [ai]	ܐܳܡܰܪ ܠܶܗ ܗܰܘ ܥܠܰܝܡܳܐ܂ ܗܳܠܶܝܢ ܟܽܠܗܶܝܢ ܢܶܛܪܶܬܼ ܐܶܢܶܝܢ̈ ܡܶܢ ܛܰܠܝܽܘܬܼܝ܂ ܡܳܢܳܐ ܚܣܺܝܪ ܐ̱ܢܳܐ܂
19:21 [ai]	ܐܳܡܰܪ ܠܶܗ ܝܶܫܽܘܥ܂ ܐܶܢ ܨܳܒܼܶܐ ܐܰܢ̱ܬܿ ܓܡܺܝܪܳܐ ܠܡܶܗܘܳܐ܃ ܙܶܠ ܙܰܒܿܶܢ ܩܶܢܝܳܢܳܟܼ܂ ܘܗܰܒܼ ܠܡܶܣܟܿܺܢܶܐ̈܂ ܘܬܼܶܗܘܶܐ ܠܳܟܼ ܣܺܝܡܬܼܳܐ ܒܰܫܡܰܝܳܐ܂ ܘܬܼܳܐ ܒܳܬܼܰܪܝ܀
19:22 [ai]	ܫܡܰܥ ܕܶܝܢ ܗܰܘ ܥܠܰܝܡܳܐ܂ ܡܶܠܬܼܳܐ ܗܳܕܼܶܐ܃ ܘܶܐܙܰܠ܂ ܟܰܕܼ ܟܰܪܝܳܐ ܠܶܗ܂ ܐܺܝܬܼ ܗ̱ܘܳܐ ܠܶܗ ܓܶܝܪ ܩܶܢܝܳܢܳܐ ܣܰܓܿܺܝܳܐܐ܂
19:23 [ai]	ܝܶܫܽܘܥ ܕܶܝܢ ܐܶܡܰܪ ܠܬܼܰܠܡܺܝܕܼܰܘܗ̱ܝ̈܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܥܰܛܠܳܐ ܗ̱ܝ ܠܥܰܬܿܺܝܪܳܐ ܕܢܶܥܽܘܠ ܠܡܰܠܟܿܽܘܬܼ ܫܡܰܝܳܐ܂
19:24 [ai]	ܬܽܘܒܼ ܕܶܝܢ ܐܳܡܰܪܢܳܐ ܠܟܼܽܘܢ܃ ܕܰܕܼܠܺܝܠ ܗ̱ܽܘ ܠܓܼܰܡܠܳܐ܂ ܠܡܶܥܰܠ ܒܰܚܪܽܘܪܳܐ ܕܰܡܚܰܛܳܐ܂ ܐܰܘ ܥܰܬܿܺܝܪܳܐ ܕܢܶܥܽܘܠ ܠܡܰܠܟܿܽܘܬܼܳܐ ܕܰܐܠܳܗܳܐ܂
19:25 [ai]	ܬܰܠܡܺܝܕܼܶܐ̈ ܕܶܝܢ ܟܰܕܼ ܫܡܰܥܘ܃ ܬܰܗܺܝܪܺܝܢ ܗ̱ܘܰܘ ܛܳܒܼ܂ ܘܳܐܡܪܺܝܢ܂ ܡܰܢܽܘ ܟܰܝ ܡܶܫܟܿܰܚ ܕܢܺܚܶܐ܂
19:26 [ai]	ܚܳܪ ܒܗܽܘܢ ܝܶܫܽܘܥ܂ ܘܶܐܡܰܪ ܠܗܽܘܢ܂ ܠܘܳܬܼ ܒܢܰܝܢܳܫܳܐ ܗܳܕܼܶܐ ܠܳܐ ܡܶܫܟܿܚܳܐ܂ ܠܘܳܬܼ ܐܰܠܳܗܳܐ ܕܶܝܢ ܟܽܠܡܶܕܶܡ ܡܶܫܟܿܚܳܐ܂
19:27 [ai]	ܗܳܝܕܶܝܢ ܥܢܳܐ ܟܺܐܦܼܳܐ܂ ܘܶܐܡܰܪ ܠܶܗ܂ ܗܳܐ ܐܶܢܰܚܢܰܢ ܫܒܼܰܩܢ ܟܽܠܡܶܕܶܡ ܘܶܐܬܼܰܝܢ ܒܳܬܼܪܳܟܼ܂ ܡܳܢܳܐ ܟܰܝ ܢܶܗܘܶܐ ܠܰܢ܀
19:28 [ai]	ܐܳܡܰܪ ܠܗܽܘܢ ܝܶܫܽܘܥ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ ܕܰܐܢ̱ܬܿܽܘܢ ܕܶܐܬܼܰܝܬܿܽܘܢ ܒܳܬܼܰܪܝ܃ ܒܥܳܠܡܳܐ ܚܰܕܼ̱ܬܼܳܐ܂ ܡܳܐ ܕܝܳܬܼܶܒܼ ܒܪܶܗ ܕܐ̱ܢܳܫܳܐ ܥܰܠ ܬܪܳܢܳܘܣ ܕܫܽܘܒܼܚܶܗ܂ ܬܶܬܿܒܼܽܘܢ ܐܳܦܼ ܐܰܢ̱ܬܿܽܘܢ܂ ܥܰܠ ܬܿܪ̈ܶܥܣܰܪ ܟܿܽܘܪ̈ܣܰܘܳܢ܃ ܘܰܬܕܼܽܘܢܽܘܢ ܬܿܪ̈ܶܥܣܰܪ ܫܰܒܼܛܶܐ̈ ܕܺܐܝܣܪܳܐܝܶܠ܂
19:29 [ai]	ܘܟܼܽܠܢܳܫ ܕܫܳܒܼܶܩ ܒܳܬܿܶܐ̈܃ ܐܰܘ ܐܰܚܶܐ̈ ܐܰܘ ܐܰܚܘܳܬܼܳܐ̈ ܃ ܐܰܘ ܐܰܒܼܳܐ ܐܰܘ ܐܶܡܳܐ܃ ܐܰܘ ܐܰܢ̱ܬܿܬܼܳܐ ܐܰܘ ܒܢܰܝܳܐ܃ ܐܰܘ ܩܽܘܪ̈ܝܳܐ ܡܶܛܽܠ ܫܶܡܝ܃ ܚܰܕܼ ܒܰܡܳܐܐ ܢܩܰܒܿܶܠ܃ ܘܚܰܝ̈ܶܐ ܕܰܠܥܳܠܰܡ ܢܺܐܪܰܬܼ܀
19:30 [ai]	ܣܰܓܿܺܝܶܐܐ̈ ܕܶܝܢ ܩܰܕܼܡܳܝ̈ܶܐ܂ ܕܢܶܗܘܽܘܢ ܐ̱ܚܪ̈ܳܝܶܐ܃ ܘܰܐ̱ܚܪ̈ܳܝܶܐ܂ ܩܰܕܼܡܳܝ̈ܶܐ܀

next chapter