The Comprehensive Aramaic Lexicon

20:01 [ai]	ܕܳܡܝܳܐ ܓܶܝܪ ܡܰܠܟܿܽܘܬܼܳܐ ܕܰܫܡܰܝܳܐ܃ ܠܓܼܰܒܼܪܳܐ܃ ܡܳܪܶܐ ܒܰܝܬܳܐ܃ ܕܰܢܦܼܰܩ ܒܨܰܦܼܪܳܐ ܕܢܶܐܓܼܽܘܪ ܦܳܥܠܶܐ̈ ܠܟܼܰܪܡܶܗ܂
20:02 [ai]	ܩܰܨ ܕܶܝܢ ܥܰܡ ܦܳܥܠܶܐ̈܂ ܡܶܢ ܕܺܝܢܳܪܳܐ ܒܝܰܘܡܳܐ܂ ܘܫܰܕܿܰܪ ܐܶܢܽܘܢ ܠܟܼܰܪܡܶܗ܂
20:03 [ai]	ܘܰܢܦܼܰܩ ܒܰܬܼܠܳܬܼ ܫܳܥܺܝܢ̈܃ ܘܰܚܙܳܐ ܐ̱ܚܪ̈ܳܢܶܐ ܕܩܳܝܡܺܝܢ ܒܫܽܘܩܳܐ܂ ܘܒܼܰܛܺܝܠܺܝܢ܂
20:04 [ai]	ܘܶܐܡܰܪ ܠܗܽܘܢ܂ ܙܶܠܘ܂ ܐܳܦܼ ܐܰܢ̱ܬܿܽܘܢ ܠܟܼܰܪܡܳܐ܂ ܘܡܶܕܶܡ ܕܘܳܠܶܐ܂ ܝܳܗܶܒܼ ܐ̱ܢܳܐ ܠܟܼܽܘܢ܂
20:05 [ai]	ܗܶܢܽܘܢ ܕܶܝܢ ܐܶܙܰܠܘ܂ ܘܰܢܦܼܰܩ ܬܽܘܒܼ ܒܫܶܬܼ܂ ܘܒܼܰܬܼܫܰܥ ܫܳܥܺܝܢ̈܃ ܘܰܥܒܼܰܕܼ ܗܳܟܼܘܳܬܼ܂
20:06 [ai]	ܘܠܰܐܦܿܰܝ̈ ܚܕܼܰܥܶܣܪ̈ܶܐ ܫܳܥܺܝܢ̈܃ ܢܦܼܰܩ ܘܶܐܫܟܿܰܚ ܐ̱ܚܪ̈ܳܢܶܐ ܕܩܳܝܡܺܝܢ ܘܒܼܰܛܺܝܠܺܝܢ܂ ܘܶܐܡܰܪ ܠܗܽܘܢ܂ ܡܳܢܳܐ ܩܳܝܡܺܝܢ ܐܢ̱ܬܿܽܘܢ ܝܰܘܡܳܐ ܟܽܠܶܗ܃ ܘܒܼܰܛܳܠܺܝܢ܂
20:07 [ai]	ܐܳܡܪܺܝܢ ܠܶܗ܂ ܕܠܳܐ ܐ̱ܢܳܫ ܐܰܓܼܪܳܢ܂ ܐܳܡܰܪ ܠܗܽܘܢ܂ ܙܶܠܘ ܐܳܦܼ ܐܰܢ̱ܬܿܽܘܢ܂ ܠܟܼܰܪܡܳܐ܃ ܘܡܶܕܶܡ ܕܘܳܠܶܐ ܢܳܣܒܺܝܢ ܐܢ̱ܬܿܽܘܢ܂
20:08 [ai]	ܟܰܕܼ ܗܘܳܐ ܕܶܝܢ ܪܰܡܫܳܐ܃ ܐܶܡܰܪ ܡܳܪܶܐ ܟܰܪܡܳܐ ܠܪܰܒܰܝܬܿܶܗ܂ ܩܪܺܝ ܦܳܥܠܶܐ̈܂ ܘܗܰܒܼ ܠܗܽܘܢ ܐܰܓܼܪܗܽܘܢ܂ ܘܫܰܪܳܐ ܡܶܢ ܐ̱ܚܪ̈ܳܝܶܐ ܘܰܥܕܼܰܡܳܐ ܠܩܰܕܼܡܳܝ̈ܶܐ܂
20:09 [ai]	ܘܶܐܬܼܰܘ ܗܳܢܽܘܢ ܕܿܰܚܕܼܰܥܶܣܪ̈ܶܐ ܫܳܥܺܝܢ̈܃ ܢܣܰܒܼܘ܂ ܕܺܝܢܳܪ ܕܺܝܢܳܪ܂
20:10 [ai]	ܘܟܼܰܕܼ ܐܶܬܼܰܘ ܩܰܕܼܡܳܝ̈ܶܐ܃ ܣܒܼܰܪܘ܂ ܕܝܰܬܿܺܝܪ ܫܳܩܠܺܝܢ܂ ܘܰܫܩܰܠܘ ܕܺܝܢܳܪ܂ ܕܺܝܢܳܪ܂ ܐܳܦܼ ܗܶܢܽܘܢ܂
20:11 [ai]	ܘܟܼܰܕܼ ܫܩܰܠܘ܃ ܪܰܛܶܢܘ ܥܰܠ ܡܳܪܶܐ ܒܰܝܬܳܐ܂
20:12 [ai]	ܘܳܐܡܪܺܝܢ܂ ܗܳܠܶܝܢ ܐ̱ܚܪ̈ܳܝܶܐ ܚܕܼܳܐ ܫܳܥܳܐ ܥܒܼܰܕܼܘ܃ ܘܰܐܫܘܺܝܬܼ ܐܶܢܽܘܢ ܥܰܡܰܢ܃ ܕܰܫܩܰܠܢ ܝܽܘܩܪܶܗ ܕܝܰܘܡܳܐ ܘܚܽܘܡܶܗ܂
20:13 [ai]	ܗܽܘ ܕܶܝܢ ܥܢܳܐ܂ ܘܶܐܡܰܪ ܠܚܰܕܼ ܡܶܢܗܽܘܢ܂ ܚܰܒܼܪܝ܂ ܠܳܐ ܡܰܥܘܶܠ ܐ̱ܢܳܐ ܒܳܟܼ܂ ܠܳܐ ܗ̱ܘܳܐ ܒܕܺܝܢܳܪ ܩܰܨܬܿ ܥܰܡܝ܂
20:14 [ai]	ܣܰܒܼ ܕܺܝܠܳܟܼ܂ ܘܙܶܠ܂ ܨܳܒܼܶܐ ܐ̱ܢܳܐ ܕܶܝܢ܂ ܕܰܠܗܳܢܳܐ ܐ̱ܚܪܳܝܳܐ܂ ܐܶܬܿܶܠ ܐܰܝܟܼ ܕܠܳܟܼ܂
20:15 [ai]	ܐܰܘ ܠܳܐ ܫܰܠܺܝܛ ܠܺܝ܂ ܕܿܡܶܕܶܡ ܕܨܳܒܼܶܐ ܐ̱ܢܳܐ܂ ܐܶܥܒܿܶܕܼ ܒܕܺܝܠܝ܂ ܐܰܘ ܥܰܝܢܳܟܼ ܒܺܝܫܳܐ ܕܶܐܢܳܐ ܛܳܒܼ ܐ̱ܢܳܐ܂
20:16 [ai]	ܗܳܟܼܰܢܳܐ ܢܶܗܘܽܘܢ ܐ̱ܚܪ̈ܳܝܶܐ ܩܰܕܼܡܳܝ̈ܶܐ܃ ܘܩܰܕܼܡܳܝ̈ܶܐ ܐ̱ܚܪ̈ܳܝܶܐ܂ ܣܰܓܿܺܝܐܺܝܢ̈ ܐܶܢܽܘܢ ܓܶܝܪ ܩܪ̈ܰܝܳܐ܂ ܘܰܙܥܽܘܪ̈ܺܝܢ ܓܒܼܰܝܳܐ̈ ܿ܀ܿ܀ܿ
20:17 [ai]	ܥܬܼܺܝܕܼ ܗܘܳܐ ܕܶܝܢ ܝܶܫܽܘܥ܂ ܕܢܶܣܰܩ ܠܽܐܘܪܺܫܠܶܡ܀ ܘܰܕܼܒܼܰܪ ܠܰܬܼܪܶܥܣܰܪ ܬܰܠܡܺܝܕܼܰܘܗ̱ܝ̈܂ ܒܰܝܢܰܘܗ̱ܝ ܘܰܠܗܽܘܢ ܒܽܐܘܪܚܳܐ܂ ܘܶܐܡܰܪ ܠܗܽܘܢ܂
20:18 [ai]	ܗܳܐ ܣܳܠܩܺܝܢ ܚ̱ܢܰܢ ܠܽܐܘܪܺܫܠܶܡ܂ ܘܰܒܪܶܗ ܕܐ̱ܢܳܫܳܐ ܡܶܫܬܿܠܶܡ ܠܪ̈ܰܒܰܝ ܟܳܗܢܶܐ̈܂ ܘܰܠܣܳܦܼܪ̈ܶܐ܂ ܘܰܢܚܰܝܒܼܽܘܢܳܝܗ̱ܝ ܠܡܰܘܬܳܐ܂
20:19 [ai]	ܘܢܰܫܠܡܽܘܢܳܝܗ̱ܝ ܠܥܰܡ̱ܡܶܐ̈܂ ܘܰܢܒܼܰܙܚܽܘܢ ܒܶܗ܂ ܘܰܢܢܰܓܿܕܼܽܘܢܳܝܗ̱ܝ܂ ܘܢܶܙܩܦܼܽܘܢܳܝܗ̱ܝ܂ ܘܰܠܝܰܘܡܳܐ ܕܰܬܼܠܳܬܼܳܐ܂ ܢܩܽܘܡ܀
20:20 [ai]	ܗܳܝܕܶܝܢ ܩܶܪܒܿܰܬܼ ܠܶܗ ܐܶܡܗܽܘܢ ܕܿܰܒܼܢܰܝ ܙܰܒܼܕܼܰܝ܂ ܗܺܝ ܘܰܒܢܶܝܗ ܘܣܶܓܼܕܿܰܬܼ ܠܶܗ܂ ܘܫܳܐܠܳܐ ܗ̱ܘܳܬܼ ܠܶܗ ܡܶܕܶܡ܂
20:21 [ai]	ܗܽܘ ܕܶܝܢ ܐܶܡܰܪ ܠܳܗ܂ ܡܳܢܳܐ ܨܳܒܼܝܳܐ ܐܰܢ̱ܬܿܝ܂ ܐܳܡܪܳܐ ܠܶܗ܂ ܐܶܡܰܪ ܕܢܶܬܿܒܼܽܘܢ ܗܳܠܶܝܢ ܬܿܪ̈ܶܝܢ ܒܢܰܝ܃ ܚܰܕܼ ܡܶܢ ܝܰܡܺܝܢܳܟܼ܂ ܘܚܰܕܼ ܡܶܢ ܣܶܡܳܠܳܟܼ܂ ܒܡܰܠܟܿܽܘܬܼܳܟܼ܂
20:22 [ai]	ܥܢܳܐ ܝܶܫܽܘܥ܂ ܘܶܐܡܰܪ܂ ܠܳܐ ܝܳܕܼܥܺܝܢ ܐܢ̱ܬܿܽܘܢ ܡܳܢܳܐ ܫܳܐܠܺܝܢ ܐܢ̱ܬܿܽܘܢ܂ ܡܶܫܟܿܚܺܝܢ ܐܢ̱ܬܿܽܘܢ ܠܡܶܫܬܳܐ ܟܳܣܳܐ܂ ܕܶܐܢܳܐ ܥܬܼܺܝܕܼ ܠܡܶܫܬܳܐ܃ ܐܰܘ ܡܰܥܡܽܘܕܼܺܝܬܼܳܐ܂ ܕܶܐܢܳܐ ܥܳܡܶܕܼ ܐ̱ܢܳܐ܂ ܬܶܥܡܕܼܽܘܢ܃ ܐܳܡܪܺܝܢ ܠܶܗ܂ ܡܶܫܟܿܚܺܝܢ ܚ̱ܢܰܢ܂
20:23 [ai]	ܐܳܡܰܪ ܠܗܽܘܢ܂ ܟܳܣܝ ܬܶܫܬܿܽܘܢ܂ ܘܡܰܥܡܽܘܕܼܺܝܬܼܳܐ܂ ܕܶܐܢܳܐ ܥܳܡܶܕܼ ܐ̱ܢܳܐ܂ ܬܶܥܡܕܼܽܘܢ܂ ܕܬܶܬܿܒܼܽܘܢ ܕܶܝܢ ܡܶܢ ܝܰܡܺܝܢܝ ܘܡܶܢ ܣܶܡܳܠܝ܃ ܠܳܐ ܗ̱ܘܳܬܼ ܕܺܝܠܝ ܕܶܐܬܿܶܠ܃ ܐܶܠܳܐ ܠܰܐܝܠܶܝܢ ܕܶܐܬܿܛܰܝܒܼܰܬܼ ܡܶܢ ܐܳܒܼܝ܀
20:24 [ai]	ܟܰܕܼ ܕܶܝܢ ܫܡܰܥܘ ܥܶܣܪܳܐ܃ ܪܓܼܶܙܘ ܥܰܠ ܗܳܢܽܘܢ ܬܿܪ̈ܶܝܢ ܐܰܚܺܝܢ̈܂
20:25 [ai]	ܘܰܩܪܳܐ ܐܶܢܽܘܢ ܝܶܫܽܘܥ܂ ܘܶܐܡܰܪ ܠܗܽܘܢ܂ ܝܳܕܼܥܺܝܢ ܐܢ̱ܬܿܽܘܢ ܕܿܪ̈ܺܫܰܝܗܽܘܢ ܕܥܰܡ̱ܡܶܐ̈܂ ܡܳܪ̈ܰܝܗܽܘܢ ܐܶܢܽܘܢ܂ ܘܪ̈ܰܘܪܒܼܳܢܰܝܗܽܘܢ ܫܰܠܺܝܛܺܝܢ ܥܠܰܝܗܽܘܢ܂
20:26 [ai]	ܠܳܐ ܗܳܟܼܰܢܳܐ ܢܶܗܘܶܐ ܒܰܝܢܳܬܼܟܼܽܘܢ܂ ܐܶܠܳܐ ܡܰܢ ܕܨܳܒܼܶܐ ܒܟܽܘܢ ܕܢܶܗܘܶܐ ܪܰܒܿܳܐ܃ ܢܶܗܘܶܐ ܠܟܼܽܘܢ ܡܫܰܡܫܳܢܳܐ܂
20:27 [ai]	ܘܡܰܢ ܕܨܳܒܼܶܐ ܒܟܽܘܢ ܕܢܶܗܘܶܐ ܩܰܕܼܡܳܝܳܐ܃ ܢܶܗܘܶܐ ܠܟܼܽܘܢ ܥܰܒܼܕܿܳܐ܂
20:28 [ai]	ܐܰܝܟܿܰܢܳܐ ܕܰܒܼܪܶܗ ܕܐ̱ܢܳܫܳܐ܃ ܠܳܐ ܐܶܬܼܳܐ ܕܢܶܫܬܿܰܡܰܫ܂ ܐܶܠܳܐ ܕܰܢܫܰܡܶܫ܂ ܘܰܕܼܢܶܬܿܶܠ ܢܰܦܼܫܶܗ ܦܽܘܪܩܳܢܳܐ ܚܠܳܦܼ ܣܰܓܿܺܝܶܐܐ̈܀
20:29 [ai]	ܘܟܼܰܕܼ ܢܦܼܰܩ ܝܶܫܽܘܥ ܡܶܢ ܐܺܝܪܺܝܚܽܘ܃ ܐܳܬܼܶܐ ܗ̱ܘܳܐ ܒܳܬܼܪܶܗ ܟܶܢܫܳܐ ܣܰܓܿܺܝܳܐܐ܂
20:30 [ai]	ܘܗܳܐ ܣܡܰܝܳܐ̈ ܬܿܪ̈ܶܝܢ ܝܳܬܼܒܺܝܢ ܗ̱ܘܰܘ ܥܰܠ ܝܰܕܼ ܐܽܘܪܚܳܐ܂ ܘܟܼܰܕܼ ܫܡܰܥܘ ܕܝܶܫܽܘܥ ܥܳܒܼܰܪ܃ ܝܰܗ̱ܒܼܘ ܩܳܠܳܐ܂ ܘܳܐܡܪܺܝܢ܂ ܐܶܬܼܪܰܚܰܡ ܥܠܰܝܢ ܡܳܪܝ܃ ܒܪܶܗ ܕܕܼܰܘܺܝܕܼ܂
20:31 [ai]	ܟܶܢܫܶܐ̈ ܕܶܝܢ ܟܳܐܶܝܢ ܗ̱ܘܰܘ ܒܗܽܘܢ܂ ܕܢܶܫܬܿܩܽܘܢ܂ ܘܗܶܢܽܘܢ ܝܰܬܿܺܝܪܳܐܺܝܬܼ ܐܰܪܺܝܡܘ ܩܳܠܗܽܘܢ܂ ܘܳܐܡܪܺܝܢ܂ ܡܳܪܰܢ ܐܶܬܼܪܰܚܰܡ ܥܠܰܝܢ܂ ܒܪܶܗ ܕܕܼܰܘܺܝܕܼ܃
20:32 [ai]	ܘܩܳܡ ܝܶܫܽܘܥ܂ ܘܰܩܪܳܐ ܐܶܢܽܘܢ܂ ܘܶܐܡܰܪ܂ ܡܳܢܳܐ ܨܳܒܼܶܝܢ ܐܢ̱ܬܿܽܘܢ ܕܶܐܥܒܿܶܕܼ ܠܟܼܽܘܢ܂
20:33 [ai]	ܐܳܡܪܺܝܢ ܠܶܗ܂ ܡܳܪܰܢ܂ ܕܢܶܬܼܦܿܰܬܿܚܳܢ̈ ܥܰܝܢܰܝܢ̈܂
20:34 [ai]	ܘܶܐܬܼܪܰܚܰܡ ܥܠܰܝܗܽܘܢ ܝܶܫܽܘܥ܂ ܘܰܩܪܶܒܼ ܠܥܰܝܢܰܝܗܽܘܢ̈܂ ܘܒܼܰܪ ܫܳܥܬܼܶܗ ܐܶܬܼܦܰܬܿܰܚ ܥܰܝܢܰܝܗܽܘܢ̈܂ ܘܶܐܙܰܠܘ ܒܳܬܼܪܶܗ܀

next chapter