← Back
The Comprehensive Aramaic Lexicon
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


21:01 [ai]ܘܟܼܰܕܼ ܩܪܶܒܼ ܠܽܐܘܪܺܫܠܶܡ܂ ܘܶܐܬܼܳܐ ܠܒܼܶܝܬܼ ܦܿܳܓܿ̈ܶܐ܃ ܥܰܠ ܓܶܢ̱ܒܼ ܛܽܘܪܳܐ ܕܙܰܝܬܿܶܐ̈܃ ܫܰܕܿܰܪ ܝܶܫܽܘܥ ܬܪܶܝܢ ܡܶܢ ܬܰܠܡܺܝܕܼܰܘܗ̱ܝ̈܂
21:02 [ai]ܘܶܐܡܰܪ ܠܗܽܘܢ܂ ܙܶܠܘ ܠܰܩܪܺܝܬܼܳܐ ܗܳܕܼܶܐ ܕܰܠܩܽܘܒܼܰܠܟܼܽܘܢ܂ ܘܡܶܚܕܼܳܐ ܡܶܫܟܿܚܺܝܢ ܐܢ̱ܬܿܽܘܢ ܚܡܳܪܳܐ ܕܰܐܣܺܝܪܳܐ܂ ܘܥܺܝܠܳܐ ܥܰܡܳܗ܂ ܫܪܰܘ ܐܰܝܬܰܘ ܠܺܝ܂
21:03 [ai]ܘܶܐܢ ܐ̱ܢܳܫ ܐܳܡܰܪ ܠܟܼܽܘܢ ܡܶܕܶܡ܃ ܐܶܡܰܪܘ ܠܶܗ܂ ܕܰܠܡܳܪܰܢ ܡܶܬܼܒܿܥܶܝܢ܂ ܘܡܶܚܕܼܳܐ ܡܫܰܕܿܰܪ ܠܗܽܘܢ ܠܟܼܳܐ܀
21:04 [ai]ܗܳܕܼܶܐ ܕܶܝܢ ܕܰܗܘܳܬܼ܃ ܕܢܶܬܼܡܰܠܶܐ ܡܶܕܶܡ ܕܶܐܬܼܶܐܡܰܪ ܒܝܰܕܼ ܢܒܼܺܝܳܐ ܕܶܐܡܰܪ܃
21:05 [ai]ܐܶܡܰܪܘ ܠܒܼܰܪ̱ܬܼ ܨܶܗܝܽܘܢ܃ ܗܳܐ ܡܰܠܟܿܶܟܼܝ ܐܳܬܼܶܐ ܠܶܟܼܝ܃ ܡܰܟܿܺܝܟܼ ܘܰܪܟܼܺܝܒܼ ܥܰܠ ܚܡܳܪܳܐ܂ ܘܥܰܠ ܥܺܝܠܳܐ ܒܰܪ ܐܰܬܼܳܢܳܐ܂
21:06 [ai]ܘܶܐܙܰܠܘ ܬܰܠܡܺܝܕܼܶܐ̈܃ ܘܰܥܒܼܰܕܼܘ ܐܰܝܟܿܰܢܳܐ ܕܰܦܼܩܰܕܼ ܠܗܽܘܢ ܝܶܫܽܘܥ܂
21:07 [ai]ܘܰܐܝܬܿܺܝܘ ܠܰܚܡܳܪܳܐ ܘܰܠܥܺܝܠܳܐ܂ ܘܣܳܡܘ ܥܰܠ ܥܺܝܠܳܐ ܢܰܚܬܿܰܝܗܽܘܢ̈܃ ܘܰܪܟܼܶܒܼ ܥܠܰܘܗ̱ܝ ܝܶܫܽܘܥ܀
21:08 [ai]ܘܣܽܘܓܼܳܐܐ ܕܟܶܢܫܶܐ̈܂ ܡܫܰܘܶܝܢ ܗ̱ܘܰܘ ܡܳܐܢܰܝܗܽܘܢ̈ ܒܽܐܘܪܚܳܐ܂ ܐ̱ܚܪ̈ܳܢܶܐ ܕܶܝܢ ܦܳܣܩܺܝܢ ܗ̱ܘܰܘ ܣܰܘܟܿܶܐ̈ ܡܶܢ ܐܺܝܠܳܢܶܐ̈܂ ܘܪܳܡܶܝܢ ܒܽܐܘܪܚܳܐ܂
21:09 [ai]ܟܶܢܫܶܐ̈ ܕܶܝܢ܂ ܐܰܝܠܶܝܢ ܕܳܐܙܺܠ̱ܝܢ ܗ̱ܘܰܘ ܩܕܼܳܡܰܘܗ̱ܝ܂ ܘܳܐܬܼܶܝܢ ܒܳܬܼܪܶܗ܃ ܩܳܥܶܝܢ ܗ̱ܘܰܘ܂ ܘܳܐܡܪܺܝܢ܂ ܐܽܘܫܰܥܢܳܐ ܠܰܒܼܪܶܗ ܕܕܼܰܘܺܝܕܼ܂ ܒܪܺܝܟܼ ܗ̱ܽܘ ܕܳܐܬܼܶܐ ܒܰܫܡܶܗ ܕܡܳܪܝܳܐ܂ ܐܽܘܫܰܥܢܳܐ ܒܰܡܪ̈ܰܘܡܶܐ܀
21:10 [ai]ܘܟܼܰܕܼ ܥܰܠ ܠܽܐܘܪܺܫܠܶܡ܃ ܐܶܬܿܬܿܙܺܝܥܰܬܼ ܟܽܠܳܗ ܡܕܼܺܝܢ̱ܬܳܐ܂ ܘܳܐܡܪܺܝܢ ܗ̱ܘܰܘ܂ ܡܰܢܽܘ ܗܳܢܳܐ܂
21:11 [ai]ܟܶܢܫܶܐ̈ ܕܶܝܢ ܐܳܡܪܺܝܢ ܗ̱ܘܰܘ܃ ܗܳܢܰܘ ܝܶܫܽܘܥ܂ ܢܒܼܺܝܳܐ ܕܡܶܢ ܢܳܨܪܰܬܼ ܕܰܓܼܠܺܝܠܳܐ܀
21:12 [ai]ܘܥܰܠ ܝܶܫܽܘܥ ܠܗܰܝܟܠܳܐ ܕܰܐܠܳܗܳܐ܃ ܘܰܐܦܿܶܩ ܠܟܼܽܠܗܽܘܢ ܕܙܳܒܼܢܺܝܢ ܘܰܡܙܰܒܢܺܝܢ ܒܗܰܝܟܠܳܐ܂ ܘܣܰܚܶܦܼ ܦܿܳܬܼܽܘܪ̈ܶܐ ܕܰܡܥܰܪ̈ܦܼܳܢܶܐ܂ ܘܟܼܽܘܪ̈ܣܰܘܳܬܼܳܐ ܕܗܳܢܽܘܢ ܕܰܡܙܰܒܢܺܝܢ ܝܰܘܢܶܐ̈܂
21:13 [ai]ܘܶܐܡܰܪ ܠܗܽܘܢ܂ ܟܬܼܺܝܒܼ ܗ̱ܽܘ܂ ܕܒܰܝܬܿܝ܂ ܒܶܝܬܼ ܨܠܽܘܬܼܳܐ ܢܶܬܼܩܪܶܐ܂ ܐܰܢ̱ܬܿܽܘܢ ܕܶܝܢ ܥܒܼܰܕܿܬܿܽܘܢܳܝܗ̱ܝ ܡܥܰܪܬܼܳܐ ܕܠܶܣܛܳܝܶܐ̈܀
21:14 [ai]ܘܩܰܪܶܒܼܘ ܠܶܗ ܒܗܰܝܟܠܳܐ܂ ܣܡܰܝܳܐ̈ ܘܰܚܓܼܺܝܣܶܐ̈܂ ܘܰܐܣܺܝ ܐܶܢܽܘܢ܀
21:15 [ai]ܟܰܕܼ ܚܙܰܘ ܕܶܝܢ ܪ̈ܰܒܰܝ ܟܳܗܢܶܐ̈ ܘܰܦܼܪ̈ܺܝܫܶܐ܂ ܬܿܶܕܼܡܪ̈ܳܬܼܳܐ ܕܥܳܒܼܶܕܼ܃ ܘܰܛܠܳܝܶܐ̈ ܕܩܳܥܶܝܢ ܒܗܰܝܟܠܳܐ ܘܳܐܡܪܺܝܢ܃ ܐܽܘܫܰܥܢܳܐ ܠܰܒܼܪܶܗ ܕܕܼܰܘܺܝܕܼ܃ ܐܶܬܼܒܿܶܐܫ ܠܗܽܘܢ܂
21:16 [ai]ܘܳܐܡܪܺܝܢ ܠܶܗ܂ ܫܳܡܰܥ ܐܰܢ̱ܬܿ܃ ܡܳܢܳܐ ܐܳܡܪܺܝܢ ܗܳܠܶܝܢ܂ ܐܳܡܰܪ ܠܗܽܘܢ ܝܶܫܽܘܥ܂ ܐܺܝܢ܂ ܡܶܢ ܡܬܼܽܘܡ ܠܳܐ ܩܪܰܝܬܿܽܘܢ܃ ܕܡܶܢ ܦܽܘܡܳܐ ܕܰܛܠܳܝܶܐ̈ ܘܰܕܼܝܰܠܽܘܕܼܶܐ̈܂ ܬܰܩܶܢܬܿ ܬܿܶܫܒܿܽܘܚܬܳܐ܀
21:17 [ai]ܘܰܫܒܼܰܩ ܐܶܢܽܘܢ܃ ܘܰܢܦܼܰܩ ܠܒܼܰܪ ܡܶܢ ܡܕܼܺܝܢ̱ܬܳܐ ܠܒܼܶܝܬܼ ܥܰܢܝܳܐ܂ ܘܒܼܳܬܼ ܬܰܡܳܢ܂
21:18 [ai]ܒܨܰܦܼܪܳܐ ܕܶܝܢ܂ ܟܰܕܼ ܗܦܼܰܟܼ ܠܰܡܕܼܺܝܢ̱ܬܳܐ܂ ܟܦܼܶܢ܂
21:19 [ai]ܘܰܚܙܳܐ ܬܿܺܬܳܐ ܚܕܼܳܐ ܒܽܐܘܪܚܳܐ܂ ܘܶܐܬܼܳܐ ܠܘܳܬܼܳܗ܂ ܘܠܳܐ ܐܶܫܟܿܰܚ ܒܿܳܗ ܡܶܕܶܡ܂ ܐܶܠܳܐ ܐܶܢ ܛܰܪ̈ܦܼܶܐ ܒܰܠܚܽܘܕܼ܂ ܘܶܐܡܰܪ ܠܳܗ܂ ܠܳܐ ܢܶܗܘܽܘܢ ܒܶܟܼܝ ܬܽܘܒܼ ܦܿܺܐܪ̈ܶܐ܂ ܠܥܳܠܰܡ܂ ܘܡܶܚܕܼܳܐ ܝܶܒܼܫܰܬܼ ܬܿܺܬܳܐ ܗܳܝ܂
21:20 [ai]ܘܰܚܙܰܘ ܬܰܠܡܺܝܕܼܶܐ̈ ܘܰܬܼܗܰܪܘ܂ ܘܳܐܡܪܺܝܢ܃ ܐܰܝܟܿܰܢܳܐ ܒܰܪ ܫܳܥܬܼܶܗ ܝܶܒܼܫܰܬܼ ܬܿܺܬܳܐ܂
21:21 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܶܐܢ ܬܶܗܘܶܐ ܒܟܽܘܢ ܗܰܝܡܳܢܽܘܬܼܳܐ܂ ܘܠܳܐ ܬܶܬܼܦܿܰܠܓܼܽܘܢ܃ ܠܳܐ ܒܰܠܚܽܘܕܼ ܗܳܕܼܶܐ ܕܬܺܬܳܐ ܬܶܥܒܿܕܼܽܘܢ܂ ܐܶܠܳܐ ܐܳܦܼܶܢ ܠܛܽܘܪܳܐ ܗܳܢܳܐ ܬܺܐܡܪܽܘܢ ܃ ܕܶܐܫܬܿܰܩ̱ܠ܂ ܘܦܼܶܠ ܒܝܰܡܳܐ܂ ܬܶܗܘܶܐ܂
21:22 [ai]ܘܟܼܽܠ ܡܶܕܶܡ ܕܬܶܫܶܐܠܽܘܢ ܒܰܨܠܽܘܬܼܳܐ܂ ܘܰܬܼܗܰܝܡܢܽܘܢ܂ ܬܶܣܒܼܽܘܢ ܿ܀ܿ܀ܿ
21:23 [ai]ܘܟܼܰܕܼ ܐܶܬܼܳܐ ܝܶܫܽܘܥ ܠܗܰܝܟܠܳܐ܃ ܩܪܶܒܼܘ ܠܶܗ ܪ̈ܰܒܰܝ ܟܳܗܢܶܐ̈܂ ܘܩܰܫܺܝܫܶܐ̈ ܕܥܰܡܳܐ܂ ܟܰܕܼ ܡܰܠܶܦܼ܂ ܘܳܐܡܪܺܝܢ ܠܶܗ܂ ܒܰܐܝܢܳܐ ܫܽܘܠܛܳܢ ܗܳܠܶܝܢ ܥܳܒܼܶܕܼ ܐܰܢ̱ܬܿ܂ ܘܡܰܢܽܘ ܝܰܗ̱ܒܼ ܠܳܟܼ܂ ܫܽܘܠܛܳܢܳܐ ܗܳܢܳܐ܂
21:24 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܐܶܫܰܐܶܠܟܼܽܘܢ ܐܳܦܼ ܐܶܢܳܐ ܡܶܠܬܼܳܐ ܚܕܼܳܐ܂ ܘܶܐܢ ܬܺܐܡܪܽܘܢ ܠܺܝ܃ ܘܳܐܦܼ ܐܶܢܳܐ ܐܳܡܰܪ ܐ̱ܢܳܐ ܠܟܼܽܘܢ܂ ܒܰܐܝܢܳܐ ܫܽܘܠܛܳܢܳܐ ܗܳܠܶܝܢ ܥܳܒܼܶܕܼ ܐ̱ܢܳܐ܂
21:25 [ai]ܡܰܥܡܽܘܕܼܺܝܬܼܶܗ ܕܝܽܘܚܰܢܳܢ܂ ܐܰܝܡܶܟܿܳܐ ܐܺܝܬܼܶܝܗ܂ ܡܶܢ ܫܡܰܝܳܐ ܗ̱ܝ܂ ܐܰܘ ܡܶܢ ܒܢܰܝܢܳܫܳܐ܂ ܗܶܢܽܘܢ ܕܶܝܢ ܡܶܬܼܪܰܥܶܝܢ ܗ̱ܘܰܘ ܒܢܰܦܼܫܗܽܘܢ܂ ܘܳܐܡܪܺܝܢ܂ ܕܶܐܢ ܢܺܐܡܰܪ ܡܶܢ ܫܡܰܝܳܐ܃ ܐܳܡܰܪ ܠܰܢ܃ ܘܥܰܠ ܡܳܢܳܐ ܠܳܐ ܗܰܝܡܶܢܬܿܽܘܢܳܝܗ̱ܝ܂
21:26 [ai]ܘܰܕܼܢܺܐܡܰܪ ܡܶܢ ܒܢܰܝܢܳܫܳܐ܃ ܕܳܚܠܺܝܢ ܐܶܢܰܚܢܰܢ ܡܶܢ ܟܶܢܫܳܐ܂ ܟܽܠܗܽܘܢ ܓܶܝܪ ܐܰܝܟܼ ܢܒܼܺܝܳܐ܂ ܐܰܚܺܝܕܼܺܝܢ ܗ̱ܘܰܘ ܠܶܗ ܠܝܽܘܚܰܢܳܢ܂
21:27 [ai]ܥܢܰܘ ܘܳܐܡܪܺܝܢ ܠܶܗ܂ ܠܳܐ ܝܳܕܼܥܺܝܢܰܢ܂ ܐܳܡܰܪ ܠܗܽܘܢ ܝܶܫܽܘܥ܂ ܐܳܦܼ ܠܳܐ ܐܶܢܳܐ܂ ܐܳܡܰܪ ܐ̱ܢܳܐ ܠܟܼܽܘܢ܂ ܒܰܐܝܢܳܐ ܫܽܘܠܛܳܢܳܐ ܗܳܠܶܝܢ ܥܳܒܼܶܕܼ ܐ̱ܢܳܐ܀
21:28 [ai]ܡܳܢܳܐ ܕܶܝܢ ܡܶܬܼܚܙܶܐ ܠܟܼܽܘܢ܂ ܓܰܒܼܪܳܐ ܚܰܕܼ ܐܺܝܬܼ ܗ̱ܘܰܘ ܠܶܗ܂ ܒܢܰܝܳܐ ܬܿܪ̈ܶܝܢ܂ ܘܰܩܪܶܒܼ ܠܘܳܬܼ ܩܰܕܼܡܳܝܳܐ܂ ܘܶܐܡܰܪ ܠܶܗ܂ ܒܶܪܝ܂ ܙܶܠ ܝܰܘܡܳܢܳܐ ܦܠܽܘܚ ܒܟܰܪܡܳܐ܂
21:29 [ai]ܗܽܘ ܕܶܝܢ ܥܢܳܐ ܘܶܐܡܰܪ܂ ܠܳܐ ܨܳܒܼܶܐ ܐ̱ܢܳܐ܃ ܒܚܰܪܬܼܳܐ ܕܶܝܢ ܐܶܬܿܬܿܘܺܝ܂ ܘܶܐܙܰܠ܂
21:30 [ai]ܘܰܩܪܶܒܼ ܠܘܳܬܼ ܐ̱ܚܪܺܢܳܐ܂ ܘܶܐܡܰܪ ܠܶܗ ܗܳܟܼܘܳܬܼ܂ ܗܽܘ ܕܶܝܢ܂ ܥܢܳܐ ܘܶܐܡܰܪ܂ ܐܶܢܳܐ ܡܳܪܝ܂ ܘܠܳܐ ܐܶܙܰܠ܂
21:31 [ai]ܡܰܢܽܘ ܡܶܢ ܗܳܠܶܝܢ ܬܿܪ̈ܰܝܗܽܘܢ ܥܒܼܰܕܼ ܨܶܒܼܝܳܢܳܐ ܕܰܐܒܼܽܘܗ̱ܝ܂ ܐܳܡܪܺܝܢ ܠܶܗ܂ ܗܰܘ ܩܰܕܼܡܳܝܳܐ܂ ܐܳܡܰܪ ܠܗܽܘܢ ܝܶܫܽܘܥ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܡܳܟܼܣܶܐ̈ ܘܙܳܢܝܳܬܼܳܐ̈ ܩܳܕܼܡܺܝܢ ܠܟܼܽܘܢ ܠܡܰܠܟܿܽܘܬܼܳܐ ܕܰܐܠܳܗܳܐ܂
21:32 [ai]ܐܶܬܼܳܐ ܓܶܝܪ ܠܘܳܬܼܟܼܽܘܢ ܝܽܘܚܰܢܳܢ܂ ܒܽܐܘܪܚܳܐ ܕܟܺܐܢܽܘܬܼܳܐ܂ ܘܠܳܐ ܗܰܝܡܶܢܬܿܽܘܢܳܝܗ̱ܝ܂ ܡܳܟܼܣܶܐ̈ ܕܶܝܢ܂ ܘܙܳܢܝܳܬܼܳܐ̈܂ ܗܰܝܡܢܽܘܗ̱ܝ܂ ܐܰܢ̱ܬܿܽܘܢ ܕܶܝܢ ܐܳܦܼ ܠܳܐ ܟܰܕܼ ܚܙܰܝܬܿܽܘܢ܂ ܐܶܬܿܬܿܘܺܝܬܿܽܘܢ ܒܚܰܪܬܼܳܐ܂ ܕܰܬܼܗܰܝܡܢܽܘܢ ܒܶܗ܀
21:33 [ai]ܫܡܰܥܘ ܐ̱ܚܪܺܢܳܐ ܡܰܬܼܠܳܐ܂ ܓܰܒܼܪܳܐ ܚܰܕܼ ܐܺܝܬܼ ܗ̱ܘܳܐ܂ ܡܳܪܶܐ ܒܰܝܬܳܐ܂ ܘܰܢܨܰܒܼ ܟܰܪܡܳܐ܂ ܘܰܐܚܕܿܪܶܗ ܣܝܳܓܼܳܐ܂ ܘܰܚܦܼܰܪ ܒܶܗ ܡܰܥܨܰܪܬܳܐ܂ ܘܰܒܢܳܐ ܒܶܗ ܡܰܓܼܕܠܳܐ܂ ܘܰܐܘܚܕܼܶܗ ܠܦܼܰܠܳܚܶܐ̈܂ ܘܰܚܙܰܩ܂
21:34 [ai]ܟܰܕܼ ܕܶܝܢ ܡܛܳܐ ܙܰܒܼܢܳܐ ܕܿܦܼܺܐܪ̈ܶܐ܃ ܫܰܕܿܰܪ ܠܥܰܒܼܕܿܰܘܗ̱ܝ̈ ܠܘܳܬܼ ܦܰܠܳܚܶܐ̈܃ ܕܰܢܫܰܕܿܪܽܘܢ ܠܶܗ ܡܶܢ ܦܿܺܐܪ̈ܶܐ ܕܟܰܪܡܶܗ܂
21:35 [ai]ܘܶܐܚܰܕܼܘ ܦܰܠܳܚܶܐ̈ ܠܥܰܒܼܕܿܰܘܗ̱ܝ̈܃ ܘܺܐܝܬܼ ܕܰܡܚܰܐܘܽܗ̱ܝ܂ ܘܺܐܝܬܼ ܕܪܰܓܼܡܽܘܗ̱ܝ܂ ܘܺܐܝܬܼ ܕܩܰܛܠܽܘܗ̱ܝ܂
21:36 [ai]ܘܬܼܽܘܒܼ ܫܰܕܿܰܪ ܐ̱ܚܪ̈ܳܢܶܐ ܥܰܒܼܕܿܶܐ̈܂ ܕܣܰܓܿܺܝܐܺܝܢ̈ ܡܶܢ ܩܰܕܼܡܳܝ̈ܶܐ܃ ܘܗܳܟܼܘܳܬܼ ܥܒܼܰܕܼܘ ܠܗܽܘܢ܂
21:37 [ai]ܐ̱ܚܪܳܝܰܬܼ ܕܶܝܢ܂ ܫܰܕܿܰܪ ܠܘܳܬܼܗܽܘܢ ܠܰܒܼܪܶܗ܂ ܟܰܕܼ ܐܳܡܰܪ܂ ܟܒܼܰܪ ܢܶܒܼܗܬܼܽܘܢ ܡܶܢ ܒܶܪܝ܂
21:38 [ai]ܦܰܠܳܚܶܐ̈ ܕܶܝܢ ܟܰܕܼ ܚܙܰܐܘܽܗ̱ܝ ܠܰܒܼܪܳܐ܂ ܐܶܡܰܪܘ ܒܰܝܢܳܬܼܗܽܘܢ܂ ܗܳܢܰܘ ܝܳܪܬܳܐ܂ ܬܰܘ ܢܶܩܛܠܺܝܘܗ̱ܝ܂ ܘܢܶܐܚܽܘܕܼ ܝܳܪܬܿܽܘܬܼܶܗ܂
21:39 [ai]ܘܶܐܚܰܕܼܘ ܐܰܦܿܩܽܘܗ̱ܝ ܠܒܼܰܪ ܡܶܢ ܟܰܪܡܳܐ܂ ܘܩܰܛܠܽܘܗ̱ܝ܂
21:40 [ai]ܡܳܐ ܕܶܐܬܼܳܐ ܗܳܟܼܺܝܠ ܡܳܪܶܗ ܕܟܰܪܡܳܐ܃ ܡܳܢܳܐ ܢܶܥܒܿܶܕܼ ܠܦܼܰܠܳܚܶܐ̈ ܗܳܢܽܘܢ܂
21:41 [ai]ܐܳܡܪܺܝܢ ܠܶܗ܂ ܕܒܺܝܫ ܒܺܝܫ ܢܰܘܒܿܶܕܼ ܐܶܢܽܘܢ܂ ܘܟܼܰܪܡܳܐ ܢܰܘܚܶܕܼ ܠܰܐ̱ܚܪ̈ܳܢܶܐ ܦܰܠܳܚܶܐ̈܃ ܐܰܝܠܶܝܢ ܕܿܝܳܗܒܺܝܢ ܠܶܗ ܦܿܺܐܪ̈ܶܐ ܒܙܰܒܼܢܗܽܘܢ܂
21:42 [ai]ܐܳܡܰܪ ܠܗܽܘܢ ܝܶܫܽܘܥ܂ ܠܳܐ ܡܶܡܬܼܽܘܡ ܩܪܰܝܬܿܽܘܢ ܒܰܟܼܬܼܳܒܼܳܐ܃ ܕܟܺܐܦܼܳܐ ܕܰܐܣܠܺܝܘ ܒܰܢܳܝܶܐ̈܃ ܗܺܝ ܗܘܳܬܼ ܠܪܺܫܳܐ ܕܙܳܘܺܝܬܼܳܐ܂ ܡܶܢ ܠܘܳܬܼ ܡܳܪܝܳܐ ܗܘܳܬܼ ܗܳܕܼܶܐ܃ ܘܺܐܝܬܼܶܝܗ ܬܿܶܕܼܡܽܘܪܬܳܐ ܒܥܰܝܢܰܝܢ̈܀
21:43 [ai]ܡܶܛܽܠ ܗܳܢܳܐ ܐܳܡܰܪ ܐ̱ܢܳܐ ܠܟܼܽܘܢ܂ ܕܬܶܫܬܿܩܶܠ ܡܶܢܟܼܽܘܢ ܡܰܠܟܿܽܘܬܼܳܐ ܕܰܐܠܳܗܳܐ܃ ܘܬܼܶܬܼܺܝܗܶܒܼ ܠܥܰܡܳܐ ܕܥܳܒܼܶܕܼ ܦܿܺܐܪ̈ܶܐ܂
21:44 [ai]ܘܡܰܢ ܕܢܶܦܿܶܠ ܥܰܠ ܟܺܐܦܼܳܐ ܗܳܕܼܶܐ܂ ܢܶܬܼܪܥܰܥ܂ ܘܟܼܽܠ ܡܰܢ ܕܗܺܝ ܬܶܦܿܶܠ ܥܠܰܘܗ̱ܝ܂ ܬܶܕܼܪܶܝܘܗ̱ܝ܀
21:45 [ai]ܘܟܼܰܕܼ ܫܡܰܥܘ ܪ̈ܰܒܰܝ ܟܳܗܢܶܐ̈܂ ܘܰܦܼܪ̈ܺܝܫܶܐ ܡܰܬܼܠܰܘܗ̱ܝ̈܃ ܺܝܕܼܰܥܘ ܕܰܥܠܰܝܗܽܘܢ ܐܶܡܰܪ܂
21:46 [ai]ܘܰܒܥܰܘ ܠܡܶܐܚܕܿܶܗ܂ ܘܰܕܼܚܶܠܘ ܡܶܢ ܟܶܢܫܳܐ܂ ܡܶܛܽܠ ܕܰܐܝܟܼ ܕܠܰܢܒܼܺܝܳܐ ܐܰܚܺܝܕܼܺܝܢ ܗ̱ܘܰܘ ܠܶܗ܀

next chapter