← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


22:01 [ai]ܘܰܥܢܳܐ ܬܽܘܒܼ ܝܶܫܽܘܥ ܒܡܰܬܼܠܶܐ̈܂ ܘܶܐܡܰܪ܂
22:02 [ai]ܐܶܬܿܕܰܡܝܰܬܼ ܡܰܠܟܿܽܘܬܼܳܐ ܕܰܫܡܰܝܳܐ܃ ܠܓܼܰܒܼܪܳܐ ܡܰܠܟܿܳܐ ܕܰܥܒܼܰܕܼ ܡܶܫܬܿܽܘܬܼܳܐ ܠܰܒܼܪܶܗ܂
22:03 [ai]ܘܫܰܕܿܰܪ ܠܥܰܒܼܕܿܰܘܗ̱ܝ̈ ܕܢܶܩܪܽܘܢ ܠܰܡܙܰܡܢܶܐ̈ ܠܡܶܫܬܿܽܘܬܼܳܐ܃ ܘܠܳܐ ܨܒܼܰܘ ܠܡܶܐܬܼܳܐ܂
22:04 [ai]ܬܽܘܒܼ ܫܰܕܿܰܪ ܥܰܒܼܕܿܶܐ̈ ܐ̱ܚܪ̈ܳܢܶܐ܂ ܘܶܐܡܰܪ܂ ܐܶܡܰܪܘ ܠܰܡܙܰܡܢܶܐ̈܃ ܕܗܳܐ ܫܳܪܽܘܬܼܝ ܡܛܰܝܒܼܳܐ܂ ܘܬܼܰܘܪ̈ܰܝ܂ ܘܰܡܦܼܰܛܡܰܝ̈܂ ܩܛܺܝܠܺܝܢ܂ ܘܟܼܽܠ ܡܶܕܶܡ ܡܛܰܝܰܒܼ܃ ܬܰܘ ܠܡܶܫܬܿܽܘܬܼܳܐ܂
22:05 [ai]ܗܶܢܽܘܢ ܕܶܝܢ ܒܣܰܘ܂ ܘܶܐܙܰܠܘ܂ ܐܺܝܬܼ ܕܠܰܩܪܺܝܬܼܶܗ܂ ܘܺܐܝܬܼ ܕܰܠܬܼܶܐܓܼܽܘܪܬܿܶܗ܂
22:06 [ai]ܫܰܪܟܿܳܐ ܕܶܝܢ ܐܶܚܰܕܼܘ ܠܥܰܒܼܕܿܰܘܗ̱ܝ̈܂ ܘܨܰܥܰܪܘ܂ ܘܩܰܛܶܠܘ܂
22:07 [ai]ܟܰܕܼ ܫܡܰܥ ܕܶܝܢ ܡܰܠܟܿܳܐ܂ ܪܓܼܶܙ܃ ܘܫܰܕܿܰܪ ܚܰܝܠܰܘܳܬܼܶܗ̈ ܐܰܘܒܿܶܕܼ ܠܩܳܛܽܘܠܶܐ̈ ܗܳܢܽܘܢ܂ ܘܠܰܡܕܼܺܝܢ̱ܬܿܗܽܘܢ ܐܰܘܩܶܕܼ܂
22:08 [ai]ܗܳܝܕܶܝܢ ܐܶܡܰܪ ܠܥܰܒܼܕܿܰܘܗ̱ܝ̈܂ ܡܶܫܬܿܽܘܬܼܳܐ ܡܛܰܝܒܼܳܐ܃ ܘܗܳܢܽܘܢ ܕܰܡܙܰܡܢܺܝܢ ܗ̱ܘܰܘ܂ ܠܳܐ ܫܳܘܶܝܢ ܗ̱ܘܰܘ܂
22:09 [ai]ܙܶܠܘ ܗܳܟܼܺܝܠ ܠܡܰܦܿܩܳܢܶܐ̈ ܕܿܽܐܘܪ̈ܚܳܬܼܳܐ܃ ܘܟܼܽܠ ܡܰܢ ܕܡܶܫܟܿܚܺܝܢ ܐܢ̱ܬܿܽܘܢ܂ ܩܪܰܘ ܠܡܶܫܬܿܽܘܬܼܳܐ܂
22:10 [ai]ܘܰܢܦܼܰܩܘ ܥܰܒܼܕܿܶܐ̈ ܗܳܢܽܘܢ ܠܽܐܘܪ̈ܚܳܬܼܳܐ܃ ܘܟܼܰܢܶܫܘ ܟܽܠ ܕܶܐܫܟܿܰܚܘ܂ ܒܺܝܫܶܐ̈܂ ܘܛܳܒܼܶܐ̈܂ ܘܶܐܬܼܡܠܺܝ ܒܶܝܬܼ ܡܶܫܬܿܽܘܬܼܳܐ ܣܡܺܝܟܼܶܐ̈܀
22:11 [ai]ܘܥܰܠ ܡܰܠܟܿܳܐ ܕܢܶܚܙܶܐ ܣܡܺܝܟܼܶܐ̈܃ ܘܰܚܙܳܐ ܬܰܡܳܢ ܓܰܒܼܪܳܐ܂ ܕܠܳܐ ܠܒܼܺܝܫ ܠܒܼܽܘܫܶܐ̈ ܕܡܶܫܬܿܽܘܬܼܳܐ܂
22:12 [ai]ܘܶܐܡܰܪ ܠܶܗ܂ ܚܰܒܼܪܝ܃ ܐܰܝܟܿܰܢܳܐ ܥܰܠܬܿ ܠܟܼܳܐ܃ ܟܰܕܼ ܢܰܚܬܿܶܐ̈ ܕܡܶܫܬܿܽܘܬܼܳܐ ܠܰܝܬܿ ܠܳܟܼ܂ ܗܽܘ ܕܶܝܢ ܐܶܫܬܿܰܬܿܰܩ܂
22:13 [ai]ܗܳܝܕܶܝܢ ܐܶܡܰܪ ܡܰܠܟܿܳܐ ܠܰܡܫܰܡܫܳܢܶܐ̈܂ ܐܰܣܽܘܪܘ ܐܺܝܕܼܰܘܗ̱ܝ̈ ܘܪ̈ܶܓܼܠܰܘܗ̱ܝ܃ ܘܰܐܦܿܩܽܘܗ̱ܝ ܠܚܶܫܽܘܟܼܳܐ ܒܰܪܳܝܳܐ܂ ܬܰܡܳܢ ܢܶܗܘܶܐ ܒܶܟܼܝܳܐ܂ ܘܚܽܘܪܳܩ ܫܶܢܶܐ̈܂
22:14 [ai]ܣܰܓܿܺܝܐܺܝܢ̈ ܐܶܢܽܘܢ ܓܶܝܪ ܩܪ̈ܰܝܳܐ܂ ܘܰܙܥܽܘܪ̈ܺܝܢ ܓܒܼܰܝܳܐ̈܀
22:15 [ai]ܗܳܝܕܶܝܢ܂ ܐܶܙܰܠܘ ܦܿܪ̈ܺܝܫܶܐ ܢܣܰܒܼܘ ܡܶܠܟܿܳܐ܃ ܕܰܐܝܟܿܰܢܳܐ ܢܨܽܘܕܼܽܘܢܳܝܗ̱ܝ ܒܡܶܠܬܼܳܐ܂
22:16 [ai]ܘܫܰܕܿܰܪܘ ܠܘܳܬܼܶܗ ܬܰܠܡܺܝܕܼܰܝܗܽܘܢ̈܂ ܥܰܡ ܕܒܶܝܬܼ ܗܶܪܳܘܕܼܶܣ܂ ܘܳܐܡܪܺܝܢ ܠܶܗ܂ ܡܰܠܦܼܳܢܳܐ܃ ܝܳܕܼܥܺܝܢܰܢ ܕܫܰܪܺܝܪ ܐܰܢ̱ܬܿ܂ ܘܽܐܘܪܚܳܐ ܕܰܐܠܳܗܳܐ܂ ܒܩܽܘܫܬܳܐ ܡܰܠܶܦܼ ܐܰܢ̱ܬܿ܂ ܘܠܳܐ ܫܩܺܝܠ ܐܰܢ̱ܬܿ ܨܶܦܼܬܼܳܐ ܕܐ̱ܢܳܫ܂ ܠܳܐ ܓܶܝܪ ܢܳܣܶܒܼ ܐܰܢ̱ܬܿ ܒܰܐܦܿܶܐ̈ ܕܐ̱ܢܳܫܳܐ܂
22:17 [ai]ܐܶܡܰܪ ܠܰܢ ܗܳܟܼܺܝܠ ܐܰܝܟܿܰܢܳܐ ܡܶܬܼܚܙܶܐ ܠܳܟܼ܂ ܫܰܠܺܝܛ ܠܡܶܬܿܰܠ ܟܣܶܦܼ ܪܺܫܳܐ ܠܩܶܣܰܪ܂ ܐܰܘ ܠܳܐ܂
22:18 [ai]ܝܶܫܽܘܥ ܕܶܝܢ ܺܝܕܼܰܥ ܒܺܝܫܽܘܬܼܗܽܘܢ܂ ܘܶܐܡܰܪ܂ ܡܳܢܳܐ ܡܢܰܣܶܝܢ ܐܢ̱ܬܿܽܘܢ ܠܺܝ܂ ܢܳܣܒܰܝ̈ ܒܰܐܦܿܶܐ̈܃
22:19 [ai]ܚܰܘܰܐܘܽܢܝ ܕܺܝܢܳܪܳܐ ܕܰܟܼܣܶܦܼ ܪܺܫܳܐ܂ ܗܶܢܽܘܢ ܕܶܝܢ ܩܰܪܶܒܼܘ ܠܶܗ ܕܺܝܢܳܪܳܐ܂
22:20 [ai]ܘܶܐܡܰܪ ܠܗܽܘܢ ܝܶܫܽܘܥ܂ ܕܡܰܢܽܘ ܨܰܠܡܳܐ ܗܳܢܳܐ ܘܰܟܼܬܼܳܒܼܳܐ܂
22:21 [ai]ܐܳܡܪܺܝܢ܂ ܕܩܶܣܰܪ܂ ܐܶܡܰܪ ܠܗܽܘܢ܂ ܗܰܒܼܘ ܗܳܟܼܺܝܠ܂ ܕܩܶܣܰܪ ܠܩܶܣܰܪ܂ ܘܕܼܰܐܠܳܗܳܐ ܠܰܐܠܳܗܳܐ܂
22:22 [ai]ܘܟܼܰܕܼ ܫܡܰܥܘ܃ ܐܶܬܿܕܰܡܰܪܘ܂ ܘܫܰܒܼܩܽܘܗ̱ܝ܂ ܘܶܐܙܰܠܘ ܿ܀ܿ܀ܿ
22:23 [ai]ܒܗܰܘ ܝܰܘܡܳܐ ܩܪܶܒܼܘ ܙܰܕܿܽܘܩܳܝܶܐ̈܂ ܘܳܐܡܪܺܝܢ ܠܶܗ܂ ܠܰܝܬܿ ܚܰܝܰܬܼ ܡܺܝܬܼܶܐ̈܂ ܘܫܰܐܠܽܘܗ̱ܝ܂
22:24 [ai]ܘܳܐܡܪܺܝܢ ܠܶܗ܂ ܡܰܠܦܼܳܢܳܐ܃ ܡܽܘܫܶܐ ܐܶܡܰܪ ܠܰܢ܂ ܕܶܐܢ ܐ̱ܢܳܫ ܢܡܽܘܬܼ܂ ܟܰܕܼ ܠܰܝܬܿ ܠܶܗ ܒܢܰܝܳܐ܃ ܢܶܣܰܒܼ ܐܰܚܽܘܗ̱ܝ ܐܰܢ̱ܬܿܬܼܶܗ܂ ܘܰܢܩܺܝܡ ܙܰܪܥܳܐ ܠܰܐܚܽܘܗ̱ܝ܂
22:25 [ai]ܐܺܝܬܼ ܗ̱ܘܰܘ ܕܶܝܢ ܠܘܳܬܼܰܢ ܐܰܚܶܐ̈ ܫܰܒܼܥܳܐ܂ ܩܰܕܼܡܳܝܳܐ ܫܩܰܠ ܐܰܢ̱ܬܿܬܼܳܐ܂ ܘܡܺܝܬܼ܂ ܘܰܕܼܠܰܝܬܿ ܗ̱ܘܳܐ ܠܶܗ ܒܢܰܝܳܐ܃ ܫܰܒܼܩܳܗ ܐܰܢ̱ܬܿܬܼܶܗ ܠܰܐܚܽܘܗ̱ܝ܂
22:26 [ai]ܗܳܟܼܘܳܬܼ ܐܳܦܼ ܗܰܘ ܕܿܰܬܼܪ̈ܶܝܢ܂ ܘܳܐܦܼ ܗܰܘ ܕܰܬܼܠܳܬܼܳܐ܂ ܘܰܥܕܼܰܡܳܐ ܠܫܰܒܼܥܳܬܼܰܝܗܽܘܢ̈܂
22:27 [ai]ܒܚܰܪܬܼܳܐ ܕܶܝܢ ܕܟܽܠܗܽܘܢ ܡܺܝܬܼܰܬܼ܂ ܐܳܦܼ ܐܰܢ̱ܬܿܬܼܳܐ܂
22:28 [ai]ܒܰܩܝܳܡܬܳܐ ܗܳܟܼܺܝܠ܂ ܠܰܐܝܢܳܐ ܡܶܢ ܗܳܠܶܝܢ ܫܰܒܼܥܳܐ ܬܶܗܘܶܐ ܐܰܢ̱ܬܿܬܼܳܐ܂ ܟܽܠܗܽܘܢ ܓܶܝܪ ܢܰܣܒܿܽܘܗ܂
22:29 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܛܳܥܶܝܢ ܐܢ̱ܬܿܽܘܢ܃ ܕܠܳܐ ܝܳܕܼܥܺܝܢ ܐܢ̱ܬܿܽܘܢ ܟܬܼܳܒܼܶܐ̈܂ ܘܠܳܐ ܚܰܝܠܶܗ ܕܰܐܠܳܗܳܐ܂
22:30 [ai]ܒܰܩܝܳܡܬܳܐ ܓܶܝܪ ܕܡܺܝܬܼܶܐ̈܂ ܠܳܐ ܢܳܣܒܺܝܢ ܢܶܫܶܐ̈܂ ܐܳܦܼܠܳܐ ܢܶܫܶܐ̈ ܗܳܘܝܳܢ ܠܓܼܰܒܼܪ̈ܶܐ܂ ܐܶܠܳܐ ܐܰܝܟܼ ܡܰܠܰܐܟܼܶܐ̈ ܕܰܐܠܳܗܳܐ ܒܰܫܡܰܝܳܐ ܐܺܝܬܼܰܝܗܽܘܢ܂
22:31 [ai]ܥܰܠ ܩܝܳܡܬܳܐ ܕܶܝܢ ܕܡܺܝܬܼܶܐ̈܃ ܠܳܐ ܩܪܰܝܬܿܽܘܢ ܡܶܕܶܡ ܕܶܐܬܼܶܐܡܰܪ ܠܟܼܽܘܢ܂ ܡܶܢ ܐܰܠܳܗܳܐ܂ ܕܶܐܡܰܪ܂
22:32 [ai]ܕܶܐܢܳܐ ܐ̱ܢܳܐ ܐܰܠܳܗܶܗ ܕܰܐܒܼܪܳܗܳܡ܃ ܐܰܠܳܗܶܗ ܕܺܐܝܣܚܳܩ܂ ܐܰܠܳܗܶܗ ܕܝܥܰܩܽܘܒܼ܃ ܘܰܐܠܳܗܳܐ ܠܳܐ ܗ̱ܘܳܐ ܕܡܺܝܬܼܶܐ̈܂ ܐܶܠܳܐ ܕܚܰܝ̈ܶܐ܂
22:33 [ai]ܘܟܼܰܕܼ ܫܡܰܥܘ ܟܶܢܫܶܐ̈܃ ܡܶܬܿܬܿܰܡܗܺܝܢ ܗ̱ܘܰܘ ܒܝܽܘܠܦܿܳܢܶܗ܀
22:34 [ai]ܦܿܪ̈ܺܝܫܶܐ ܕܶܝܢ܂ ܟܰܕܼ ܫܡܰܥܘ ܕܫܰܬܿܶܩ ܠܙܰܕܿܽܘܩܳܝܶܐ̈܃ ܐܶܬܼܟܿܰܢܰܫܘ ܐܰܟܼܚܕܼܳܐ܂
22:35 [ai]ܘܫܰܐܠܶܗ ܚܰܕܼ ܡܶܢܗܽܘܢ܂ ܕܝܳܕܼܰܥ ܢܳܡܽܘܣܳܐ܂ ܟܰܕܼ ܡܢܰܣܶܐ ܠܶܗ܂
22:36 [ai]ܡܰܠܦܼܳܢܳܐ܂ ܐܰܝܢܳܐ ܦܽܘܩܕܳܢܳܐ ܪܰܒܼ ܒܢܳܡܽܘܣܳܐ܂
22:37 [ai]ܝܶܫܽܘܥ ܕܶܝܢ ܐܶܡܰܪ ܠܶܗ܂ ܕܬܶܪܚܰܡ ܠܡܳܪܝܳܐ ܐܰܠܳܗܳܟܼ܃ ܡܶܢ ܟܽܠܶܗ ܠܶܒܳܟܼ܂ ܘܡܶܢ ܟܽܠܳܗ ܢܰܦܼܫܳܟܼ܂ ܘܡܶܢ ܟܽܠܶܗ ܚܰܝܠܳܟܼ܂ ܘܡܶܢ ܟܽܠܶܗ ܪܶܥܝܳܢܳܟܼ܂
22:38 [ai]ܗܳܢܰܘ ܦܽܘܩܕܳܢܳܐ܂ ܪܰܒܿܳܐ ܘܩܰܕܼܡܳܝܳܐ܂
22:39 [ai]ܘܕܼܰܬܼܪ̈ܶܝܢ ܕܕܼܳܡܶܐ ܠܶܗ܃ ܕܬܶܪܚܰܡ ܠܩܰܪܺܝܒܼܳܟܼ܂ ܐܰܝܟܼ ܢܰܦܼܫܳܟܼ܂
22:40 [ai]ܒܗܳܠܶܝܢ ܬܿܪ̈ܶܝܢ ܦܽܘܩܕܳܢܺܝܢ̈܂ ܬܰܠܝܳܐ ܐܽܘܪܳܝܬܳܐ܂ ܘܰܢܒܼܺܝܶܐ̈܀
22:41 [ai]ܟܰܕܼ ܟܢܺܝܫܺܝܢ̈ ܕܶܝܢ ܦܿܪ̈ܺܝܫܶܐ܃ ܫܰܐܶܠ ܐܶܢܽܘܢ ܝܶܫܽܘܥ܂
22:42 [ai]ܘܶܐܡܰܪ܂ ܡܳܢܳܐ ܐܳܡܪܺܝܢ ܐܢ̱ܬܿܽܘܢ ܥܰܠ ܡܫܺܝܚܳܐ܂ ܒܰܪ ܡܰܢܽܘ܂ ܐܳܡܪܺܝܢ ܠܶܗ܂ ܒܰܪ ܕܿܰܘܺܝܕܼ܂
22:43 [ai]ܐܳܡܰܪ ܠܗܽܘܢ܂ ܘܰܐܝܟܿܰܢܳܐ ܕܿܰܘܺܝܕܼ ܒܪܽܘܚ܂ ܩܳܪܶܐ ܠܶܗ ܡܳܪܝܳܐ܂ ܐܳܡܰܪ ܓܶܝܪ܂
22:44 [ai]ܕܶܐܡܰܪ ܡܳܪܝܳܐ ܠܡܳܪܝ܂ ܬܶܒܼ ܠܳܟܼ ܡܶܢ ܝܰܡܺܝܢܝ܃ ܥܕܼܰܡܳܐ ܕܶܐܣܺܝܡ ܒܥܶܠܕܿܒܼܳܒܼܰܝܟܿ̈ ܬܚܶܝܬܼ ܪ̈ܶܓܼܠܰܝܟܿ܂
22:45 [ai]ܐܶܢ ܗܳܟܼܺܝܠ ܕܿܰܘܺܝܕܼ ܩܳܪܶܐ ܠܶܗ ܡܳܪܝܳܐ܃ ܐܰܝܟܿܰܢܳܐ ܒܪܶܗ ܗ̱ܽܘ܀
22:46 [ai]ܘܠܳܐ ܐ̱ܢܳܫ ܐܶܫܟܿܰܚ ܕܢܶܬܿܶܠ ܠܶܗ ܦܶܬܼܓܼܳܡܳܐ܂ ܘܠܳܐ ܐ̱ܢܳܫ ܐܰܡܪܰܚ ܬܽܘܒܼ ܡܶܢ ܗܰܘ ܝܰܘܡܳܐ܂ ܠܰܡܫܰܐܳܠܽܘܬܼܶܗ܀

next chapter