← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


25:01 [ai]ܗܳܝܕܶܝܢ ܬܿܶܕܰܡܶܐ ܡܰܠܟܿܽܘܬܼܳܐ ܕܰܫܡܰܝܳܐ܂ ܠܰܥܣܰܪ ܒܬܽܘܠܳܢ̈܂ ܗܳܢܶܝܢ̈ ܕܰܢܣܰܒܼ ܠܰܡܦܿܺܕܼܰܝܗܶܝܢ̈܂ ܘܰܢܦܼܰܩ ܠܽܐܘܪܰܥ ܚܰܬܼܢܳܐ ܘܟܼܰܠܬܼܳܐ܂
25:02 [ai]ܚܰܡܶܫ ܕܶܝܢ ܡܶܢܗܶܝܢ ܚܰܟܿܺܝܡܳܢ̈ ܗ̱ܘܰܝ܂ ܘܚܰܡܶܫ ܣܰܟܼܠܳܢ̈܂
25:03 [ai]ܘܗܳܢܶܝܢ̈ ܣܰܟܼܠܳܬܼܳܐ̈܂ ܢܣܰܒܼ ܠܰܡܦܿܺܕܼܰܝܗܶܝܢ̈܃ ܘܠܳܐ ܢܣܰܒܼ ܥܰܡܗܶܝܢ ܡܶܫܚܳܐ܂
25:04 [ai]ܗܳܢܶܝܢ̈ ܕܶܝܢ ܚܰܟܿܺܝܡܳܬܼܳܐ̈܃ ܢܣܰܒܼ ܡܶܫܚܳܐ ܒܡܳܐܢܶܐ̈܂ ܥܰܡ ܠܰܡܦܿܺܕܼܰܝܗܶܝܢ̈܂
25:05 [ai]ܟܰܕܼ ܐܰܘܚܰܪ ܕܶܝܢ ܚܰܬܼܢܳܐ܃ ܢܳܡ ܟܽܠܗܶܝܢ܂ ܘܰܕܼܡܶܟܼ܂
25:06 [ai]ܘܰܒܦܼܶܠܓܼܶܗ ܕܠܺܠܝܳܐ܂ ܗܘܳܬܼ ܩܥܳܬܼܳܐ܂ ܗܳܐ ܚܰܬܼܢܳܐ ܐܳܬܼܶܐ܂ ܦܽܘܩܘ ܠܽܐܘܪܥܶܗ܂
25:07 [ai]ܗܳܝܕܶܝܢ ܩܳܡ ܟܽܠܗܶܝܢ ܒܬܽܘܠܳܬܼܳܐ̈ ܗܳܠܶܝܢ̈܂ ܘܬܼܰܩܶܢ ܠܰܡܦܿܺܕܼܰܝܗܶܝܢ̈܂
25:08 [ai]ܐܳܡܪ̈ܳܢ ܕܶܝܢ ܗܳܢܶܝܢ̈ ܣܰܟܼܠܳܬܼܳܐ̈ ܠܚܰܟܿܺܝܡܳܬܼܳܐ̈܂ ܗܰܒܼܶܝܢ̈ ܠܰܢ ܡܶܢ ܡܶܫܚܟܼܶܝܢ܃ ܕܗܳܐ ܕܥܶܟܼܘ ܠܗܽܘܢ ܠܰܡܦܿܺܕܼܰܝܢ̈܂
25:09 [ai]ܥܢܰܝ̈ ܗܳܠܶܝܢ̈ ܚܰܟܿܺܝܡܳܬܼܳܐ̈܂ ܘܳܐܡܪ̈ܳܢ܂ ܠܡܳܐ ܠܳܐ ܢܶܣܦܿܰܩ ܠܰܢ ܘܰܠܟܼܶܝܢ܂ ܐܶܠܳܐ ܙܶܠܶܝܢ̈ ܠܘܳܬܼ ܐܰܝܠܶܝܢ ܕܰܡܙܰܒܢܺܝܢ܂ ܘܰܙܒܼܶܢܶܝܢ̈ ܠܟܼܶܝܢ܂
25:10 [ai]ܘܟܼܰܕܼ ܐܶܙܰܠ ܠܡܶܙܒܰܢ܃ ܐܶܬܼܳܐ ܚܰܬܼܢܳܐ܂ ܘܰܐܝܠܶܝܢ ܕܰܡܛܰܝܒܼܳܢ̈ ܗ̱ܘܰܝ܂ ܥܰܠ ܥܰܡܶܗ܂ ܠܒܼܶܝܬܼ ܚܠܽܘܠܳܐ܃ ܘܶܐܬܿܬܿܚܶܕܼ ܬܰܪܥܳܐ܂
25:11 [ai]ܒܚܰܪܬܼܳܐ ܕܶܝܢ ܐܶܬܼܰܝ̈ ܐܳܦܼ ܗܳܢܶܝܢ̈ ܒܬܽܘܠܳܬܼܳܐ̈ ܐ̱ܚܪ̈ܳܢܝܳܬܼܳܐ܂ ܘܳܐܡܪ̈ܳܢ܃ ܡܳܪܰܢ ܡܳܪܰܢ܃ ܦܬܼܰܚ ܠܰܢ܂
25:12 [ai]ܗܽܘ ܕܶܝܢ ܥܢܳܐ܂ ܘܶܐܡܰܪ ܠܗܶܝܢ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܶܝܢ܃ ܕܠܳܐ ܝܳܕܼܰܥ ܐ̱ܢܳܐ ܠܟܼܶܝܢ܂
25:13 [ai]ܐܶܬܿܬܿܥܺܝܪܘ ܗܳܟܼܺܝܠ܂ ܕܠܳܐ ܝܳܕܼܥܺܝܢ ܐܢ̱ܬܿܽܘܢ ܠܝܰܘܡܳܐ ܗܰܘ܂ ܘܠܳܐ ܠܫܳܥܬܼܳܐ܀
25:14 [ai]ܐܰܝܟܼ ܓܰܒܼܪܳܐ ܓܶܝܪ ܕܰܚܙܰܩ܃ ܩܪܳܐ ܠܥܰܒܼܕܿܰܘܗ̱ܝ̈܂ ܘܰܐܫܠܶܡ ܠܗܽܘܢ ܩܶܢܝܳܢܶܗ܂
25:15 [ai]ܐܺܝܬܼ ܕܝܰܗ̱ܒܼ ܠܶܗ ܚܰܡܶܫ ܟܿܰܟܿܪ̈ܺܝܢ܂ ܘܺܐܝܬܼ ܕܿܬܼܰܪ̈ܬܿܶܝܢ܂ ܘܺܐܝܬܼ ܕܰܚܕܼܳܐ܂ ܐ̱ܢܳܫ ܐ̱ܢܳܫ ܐܰܝܟܼ ܚܰܝܠܶܗ܂ ܘܰܚܙܰܩ ܡܶܚܕܼܳܐ܀
25:16 [ai]ܐܶܙܰܠ ܕܶܝܢ ܗܰܘ ܕܰܢܣܰܒܼ ܚܰܡܶܫ ܟܿܰܟܿܪ̈ܺܝܢ܂ ܐܶܬܿܬܿܰܓܿܰܪ ܒܗܶܝܢ܂ ܘܺܝܬܼܰܪ ܚܰܡܶܫ ܐ̱ܚܪ̈ܳܢܝܳܢ܂
25:17 [ai]ܘܗܳܟܼܘܳܬܼ ܐܳܦܼ ܗܰܘ ܕܿܬܼܰܪ̈ܬܿܶܝܢ܂ ܐܶܬܿܬܿܰܓܿܰܪ܂ ܬܿܰܪ̈ܬܿܶܝܢ ܐ̱ܚܪ̈ܳܢܝܳܢ܂
25:18 [ai]ܗܰܘ ܕܶܝܢ ܕܰܢܣܰܒܼ ܚܕܼܳܐ܂ ܐܶܙܰܠ ܚܦܼܰܪ ܒܰܐܪܥܳܐ܃ ܘܛܰܫܺܝ ܟܶܣܦܿܳܐ ܕܡܳܪܶܗ܀
25:19 [ai]ܒܳܬܼܰܪ ܕܶܝܢ ܙܰܒܼܢܳܐ ܣܰܓܿܺܝܳܐܐ܃ ܐܶܬܼܳܐ ܡܳܪܗܽܘܢ ܕܥܰܒܼܕܿܶܐ̈ ܗܳܢܽܘܢ܂ ܘܰܢܣܰܒܼ ܡܶܢܗܽܘܢ ܚܽܘܫܒܿܳܢܳܐ܂
25:20 [ai]ܘܰܩܪܶܒܼ ܗܰܘ ܕܰܢܣܰܒܼ ܗ̱ܘܳܐ ܚܰܡܶܫ ܟܿܰܟܿܪ̈ܺܝܢ܃ ܘܩܰܪܶܒܼ ܚܰܡܶܫ ܐ̱ܚܪ̈ܳܢܝܳܢ܂ ܘܶܐܡܰܪ܂ ܡܳܪܝ܃ ܚܰܡܶܫ ܟܿܰܟܿܪ̈ܺܝܢ ܝܰܗ̱ܒܼܬܿ ܠܺܝ܃ ܗܳܐ ܚܰܡܶܫ ܐ̱ܚܪ̈ܳܢܝܳܢ ܐܶܬܿܬܿܰܓܿܪܶܬܼ ܥܠܰܝܗܶܝܢ܂
25:21 [ai]ܐܳܡܰܪ ܠܶܗ ܡܳܪܶܗ܂ ܐܺܝܘ ܥܰܒܼܕܿܳܐ ܛܳܒܼܳܐ ܘܰܡܗܰܝܡܢܳܐ܂ ܥܰܠ ܩܰܠܺܝܠ ܡܗܰܝܡܰܢ ܗ̱ܘܰܝܬܿ܂ ܥܰܠ ܣܰܓܿܺܝ ܐܰܩܺܝܡܳܟܼ܂ ܥܽܘܠ ܠܚܰܕܼܽܘܬܼܶܗ ܕܡܳܪܳܟܼ܂
25:22 [ai]ܘܰܩܪܶܒܼ ܗܰܘ ܕܿܬܼܰܪ̈ܬܿܶܝܢ ܟܿܰܟܿܪ̈ܰܘܗ̱ܝ܂ ܘܶܐܡܰܪ܂ ܡܳܪܝ܃ ܬܿܰܪ̈ܬܿܶܝܢ ܟܿܰܟܿܪ̈ܺܝܢ ܝܰܗ̱ܒܼܬܿ ܠܺܝ܃ ܗܳܐ ܬܿܰܪ̈ܬܿܶܝܢ ܐ̱ܚܪ̈ܳܢܝܳܢ ܐܶܬܿܬܿܰܓܿܪܶܬܼ ܥܠܰܝܗܶܝܢ܂
25:23 [ai]ܐܳܡܰܪ ܠܶܗ ܡܳܪܶܗ܂ ܐܺܝܘ ܥܰܒܼܕܿܳܐ ܛܳܒܼܳܐ ܘܰܡܗܰܝܡܢܳܐ܂ ܥܰܠ ܩܰܠܺܝܠ ܡܗܰܝܡܰܢ ܗ̱ܘܰܝܬܿ܂ ܥܰܠ ܣܰܓܿܺܝ ܐܰܩܺܝܡܳܟܼ܂ ܥܽܘܠ ܠܚܰܕܼܽܘܬܼܶܗ ܕܡܳܪܳܟܼ܂
25:24 [ai]ܩܪܶܒܼ ܕܶܝܢ ܐܳܦܼ ܗܰܘ ܕܰܢܣܰܒܼ ܚܕܼܳܐ ܟܰܟܿܪܳܐ܂ ܘܶܐܡܰܪ܂ ܡܳܪܝ܃ ܝܳܕܼܰܥ ܗ̱ܘܺܝܬܼ ܠܳܟܼ܂ ܕܓܰܒܼܪܳܐ ܐܰܢ̱ܬܿ܂ ܩܰܫܝܳܐ܂ ܘܚܳܨܶܕܼ ܐܰܢ̱ܬܿ ܐܰܝܟܿܳܐ ܕܠܳܐ ܙܪܰܥܬܿ܂ ܘܰܡܟܼܰܢܶܫ ܐܰܢ̱ܬܿ ܡܶܢ ܐܰܝܟܿܳܐ ܕܠܳܐ ܒܰܕܿܰܪܬܿ܂
25:25 [ai]ܘܕܼܶܚܠܶܬܼ܂ ܘܶܐܙܶܠ̱ܬܼ ܛܰܫܺܝܬܼܳܗ ܟܰܟܿܪܳܟܼ ܒܰܐܪܥܳܐ܂ ܗܳܐ ܐܺܝܬܼ ܠܳܟܼ ܕܺܝܠܳܟܼ܂
25:26 [ai]ܥܢܳܐ ܡܳܪܶܗ܂ ܘܶܐܡܰܪ ܠܶܗ܂ ܥܰܒܼܕܿܳܐ ܒܺܝܫܳܐ ܘܰܚܒܼܰܢܳܢܳܐ܃ ܝܳܕܼܰܥ ܗ̱ܘܰܝܬܿ ܕܚܳܨܶܕܼ ܐ̱ܢܳܐ ܐܰܝܟܿܳܐ ܕܠܳܐ ܙܶܪܥܶܬܼ ܃ ܘܰܡܟܼܰܢܶܫ ܐ̱ܢܳܐ ܡܶܢ ܐܰܝܟܿܳܐ ܕܠܳܐ ܒܰܕܿܪܶܬܼ܃
25:27 [ai]ܘܳܠܶܐ ܗ̱ܘܳܐ ܠܳܟܼ ܕܬܰܪܡܶܐ ܟܶܣܦܿܝ܂ ܥܰܠ ܦܳܬܼܽܘܪܳܐ܂ ܘܳܐܬܼܶܐ ܗ̱ܘܺܝܬܼ ܐܶܢܳܐ܂ ܘܬܼܳܒܼܰܥ ܗ̱ܘܺܝܬܼ ܕܺܝܠܝ܂ ܥܰܡ ܪ̈ܶܒܿܝܳܬܼܶܗ܂
25:28 [ai]ܣܰܒܼܘ ܗܳܟܼܺܝܠ ܡܶܢܶܗ ܟܰܟܿܪܳܐ܂ ܘܽܗ̱ܒܼܽܘܗ ܠܗܰܘ ܕܺܐܝܬܼ ܠܶܗ ܥܣܰܪ ܟܿܰܟܿܪ̈ܺܝܢ܂
25:29 [ai]ܠܡܰܢ ܓܶܝܪ ܕܺܐܝܬܼ ܠܶܗ܂ ܢܶܬܼܺܝܗܶܒܼ ܠܶܗ܂ ܘܢܶܬܿܬܰܘܣܰܦܼ ܠܶܗ܂ ܘܗܰܘ ܕܶܝܢ ܕܠܰܝܬܿ ܠܶܗ܃ ܘܳܐܦܼ ܗܰܘ ܕܺܐܝܬܼ ܠܶܗ܂ ܢܶܫܬܿܩܶܠ ܡܶܢܶܗ܂
25:30 [ai]ܘܰܠܥܰܒܼܕܿܳܐ ܒܰܛܺܝܠܳܐ܂ ܐܰܦܿܩܽܘܗ̱ܝ ܠܚܶܫܽܘܟܼܳܐ ܒܰܪܳܝܳܐ܂ ܬܰܡܳܢ ܢܶܗܘܶܐ ܒܶܟܼܝܳܐ ܘܚܽܘܪܳܩ ܫܶܢܶܐ̈܀
25:31 [ai]ܡܳܐ ܕܳܐܬܼܶܐ ܕܶܝܢ ܒܪܶܗ ܕܐ̱ܢܳܫܳܐ ܒܫܽܘܒܼܚܶܗ܃ ܘܟܼܽܠܗܽܘܢ ܡܰܠܰܐܟܼܰܘܗ̱ܝ̈ ܩܰܕܿܺܝܫܶܐ̈ ܥܰܡܶܗ܃ ܗܳܝܕܶܝܢ ܢܶܬܶܒܼ ܥܰܠ ܬܪܳܢܳܘܣ ܕܫܽܘܒܼܚܶܗ܂
25:32 [ai]ܘܢܶܬܼܟܿܰܢܫܽܘܢ ܩܕܼܳܡܰܘܗ̱ܝ ܟܽܠܗܽܘܢ ܥܰܡ̱ܡܶܐ̈܂ ܘܰܢܦܼܰܪܶܫ ܐܶܢܽܘܢ܂ ܚܰܕܼ ܡܶܢ ܚܰܕܼ܂ ܐܰܝܟܼ ܪܳܥܝܳܐ ܕܰܡܦܼܰܪܶܫ ܥܶܪ̈ܒܿܶܐ ܡܶܢ ܓܕܼܰܝܳܐ̈܂
25:33 [ai]ܘܰܢܩܺܝܡ ܥܶܪ̈ܒܿܶܐ ܡܶܢ ܝܰܡܺܝܢܶܗ܃ ܘܰܓܼܕܼܰܝܳܐ̈ ܡܶܢ ܣܶܡܳܠܶܗ܂
25:34 [ai]ܗܳܝܕܶܝܢ ܢܺܐܡܰܪ ܡܰܠܟܿܳܐ ܠܗܳܢܽܘܢ ܕܡܶܢ ܝܰܡܺܝܢܶܗ܂ ܬܰܘ ܒܪ̈ܺܝܟܼܰܘܗ̱ܝ ܕܳܐܒܼܝ܂ ܺܝܪܰܬܼܘ ܡܰܠܟܿܽܘܬܼܳܐ܃ ܕܰܥܬܼܺܝܕܼܳܐ ܗ̱ܘܳܬܼ ܠܟܼܽܘܢ ܡܶܢ ܬܿܰܪ̈ܡܝܳܬܼܶܗ ܕܥܳܠܡܳܐ܂
25:35 [ai]ܟܶܦܼܢܶܬܼ ܓܶܝܪ܂ ܘܝܰܗ̱ܒܼܬܿܽܘܢ ܠܺܝ ܠܡܶܐܟܼܰܠ܂ ܘܰܨܗܺܝܬܼ܂ ܘܰܐܫܩܺܝܬܿܽܘܢܳܢܝ܂ ܐܰܟܼܣܢܳܝܳܐ ܗ̱ܘܺܝܬܼ܂ ܘܟܼܰܢܶܫܬܿܽܘܢܳܢܝ܂
25:36 [ai]ܥܰܪܛܶܠܳܝܳܐ ܗ̱ܘܺܝܬܼ܂ ܘܟܼܰܣܺܝܬܿܽܘܢܳܢܝ܂ ܟܪܺܝܗ ܗ̱ܘܺܝܬܼ܂ ܘܰܣܥܰܪܬܿܽܘܢܳܢܝ܂ ܘܒܼܶܝܬܼ ܐܰܣܺܝܪ̈ܶܐ ܗ̱ܘܺܝܬܼ܂ ܘܶܐܬܼܰܝܬܿܽܘܢ ܠܘܳܬܼܝ܂
25:37 [ai]ܗܳܝܕܶܝܢ ܢܺܐܡܪܽܘܢ ܠܶܗ ܗܳܢܽܘܢ ܙܰܕܿܺܝܩܶܐ̈܂ ܡܳܪܰܢ܃ ܐܶܡܰܬܼܝ ܚܙܰܝܢܳܟܼ ܕܰܟܼܦܼܶܢ ܐܰܢ̱ܬܿ܂ ܘܬܼܰܪܣܺܝܢܳܟܼ܃ ܐܰܘ ܕܰܨܗܶܐ ܐܰܢ̱ܬܿ܂ ܘܰܐܫܩܺܝܢܳܟܼ܂
25:38 [ai]ܘܶܐܡܰܬܼܝ ܚܙܰܝܢܳܟܼ ܕܰܐܟܼܣܢܳܝܳܐ ܐܰܢ̱ܬܿ܂ ܘܟܼܰܢܶܫܢܳܟܼ܃ ܐܰܘ ܕܥܰܪܛܶܠܳܝ ܐܰܢ̱ܬܿ܂ ܘܟܼܰܣܺܝܢܳܟܼ܂
25:39 [ai]ܘܶܐܡܰܬܼܝ ܚܙܰܝܢܳܟܼ ܟܪܺܝܗܳܐ܂ ܐܰܘ ܒܶܝܬܼ ܐܰܣܺܝܪ̈ܶܐ܂ ܘܶܐܬܼܰܝܢ ܠܘܳܬܼܳܟܼ܂
25:40 [ai]ܘܰܥܢܳܐ ܡܰܠܟܿܳܐ܂ ܘܶܐܡܰܪ ܠܗܽܘܢ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܰܟܼܡܳܐ ܕܰܥܒܼܰܕܿܬܿܽܘܢ ܠܚܰܕܼ ܡܶܢ ܗܳܠܶܝܢ ܐܰܚܰܝ̈ ܙܥܽܘܪ̈ܶܐ܂ ܠܺܝ ܗ̱ܽܘ ܥܒܼܰܕܿܬܿܽܘܢ܂
25:41 [ai]ܗܳܝܕܶܝܢ ܢܺܐܡܰܪ ܐܳܦܼ ܠܗܳܢܽܘܢ ܕܡܶܢ ܣܶܡܳܠܶܗ܂ ܙܶܠܘ ܠܟܼܽܘܢ ܡܶܢܝ ܠܺܝܛܶܐ̈܃ ܠܢܽܘܪܳܐ ܕܰܠܥܳܠܰܡ܂ ܗܳܝ ܕܰܡܛܰܝܒܼܳܐ ܠܳܐܟܼܶܠܩܰܪܨܳܐ܂ ܘܰܠܡܰܠܰܐܟܼܰܘܗ̱ܝ̈܂
25:42 [ai]ܟܶܦܼܢܶܬܼ ܓܶܝܪ܂ ܘܠܳܐ ܝܰܗ̱ܒܼܬܿܽܘܢ ܠܺܝ ܠܡܶܐܟܼܰܠ܂ ܘܰܨܗܺܝܬܼ܂ ܘܠܳܐ ܐܰܫܩܺܝܬܿܽܘܢܳܢܝ܂
25:43 [ai]ܘܰܐܟܼܣܢܳܝܳܐ ܗ̱ܘܺܝܬܼ܂ ܘܠܳܐ ܟܰܢܶܫܬܿܽܘܢܳܢܝ܂ ܘܥܰܪܛܶܠܳܝܳܐ ܗ̱ܘܺܝܬܼ܂ ܘܠܳܐ ܟܰܣܺܝܬܿܽܘܢܳܢܝ܂ ܘܰܟܼܪܺܝܗܳܐ ܗ̱ܘܺܝܬܼ܂ ܘܒܼܶܝܬܼ ܐܰܣܺܝܪ̈ܶܐ ܗ̱ܘܺܝܬܼ܂ ܘܠܳܐ ܣܥܰܪܬܿܽܘܢܳܢܝ܂
25:44 [ai]ܗܳܝܕܶܝܢ ܢܶܥܢܽܘܢ ܐܳܦܼ ܗܶܢܽܘܢ܂ ܘܢܺܐܡܪܽܘܢ܂ ܡܳܪܰܢ܃ ܐܶܡܰܬܼܝ ܚܙܰܝܢܳܟܼ ܟܰܦܼܢܳܐ܂ ܐܰܘ ܨܰܗܝܳܐ܃ ܐܰܘ ܐܰܟܼܣܢܳܝܳܐ܂ ܐܰܘ ܥܰܪܛܶܠܳܝܳܐ܃ ܐܰܘ ܟܪܺܝܗܳܐ܂ ܐܰܘ ܒܶܝܬܼ ܐܰܣܺܝܪ̈ܶܐ܃ ܘܠܳܐ ܫܰܡܶܫܢܳܟܼ܂
25:45 [ai]ܗܳܝܕܶܝܢ ܢܶܥܢܶܐ܂ ܘܢܺܐܡܰܪ ܠܗܽܘܢ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܂ ܕܰܟܼܡܳܐ ܕܠܳܐ ܥܒܼܰܕܿܬܿܽܘܢ ܠܚܰܕܼ ܡܶܢ ܗܳܠܶܝܢ ܙܥܽܘܪ̈ܶܐ܃ ܐܳܦܼ ܠܳܐ ܠܺܝ ܥܒܼܰܕܿܬܿܽܘܢ܂
25:46 [ai]ܘܢܺܐܙܽܠ̱ܘܢ ܗܳܠܶܝܢ ܠܬܼܰܫܢܺܝܩܳܐ ܕܰܠܥܳܠܰܡ܂ ܘܙܰܕܿܺܝܩܶܐ̈ ܠܚܰܝ̈ܶܐ ܕܰܠܥܳܠܰܡ܀܀

next chapter