The Comprehensive Aramaic Lexicon

26:01 [ai]	ܘܰܗܘܳܐ ܕܟܰܕܼ ܫܰܠܶܡ ܝܶܫܽܘܥ ܟܽܠܗܶܝܢ ܡܶܠܶܐ̈ ܗܳܠܶܝܢ܃ ܐܶܡܰܪ ܠܬܼܰܠܡܺܝܕܼܰܘܗ̱ܝ̈܂
26:02 [ai]	ܝܳܕܼܥܺܝܢ ܐܢ̱ܬܿܽܘܢ ܕܒܳܬܼܰܪ ܬܿܪ̈ܶܝܢ ܝܰܘܡܺܝܢ̈ ܗܳܘܶܐ ܦܶܨܚܳܐ܂ ܘܰܒܪܶܗ ܕܐ̱ܢܳܫܳܐ ܡܶܫܬܿܠܶܡ ܕܢܶܙܕܿܩܶܦܼ܀
26:03 [ai]	ܗܳܝܕܶܝܢ ܐܶܬܼܟܿܰܢܰܫܘ ܪ̈ܰܒܰܝ ܟܳܗܢܶܐ̈܂ ܘܣܳܦܼܪ̈ܶܐ܂ ܘܩܰܫܺܝܫܶܐ̈ ܕܥܰܡܳܐ܃ ܠܕܼܳܪܬܿܶܗ ܕܿܪ̈ܰܒܿ ܟܿܳܗܢܶܐ܂ ܕܡܶܬܼܩܪܶܐ ܩܰܝܳܦܼܳܐ܂
26:04 [ai]	ܘܶܐܬܼܡܰܠܰܟܼܘ ܥܰܠ ܝܶܫܽܘܥ܃ ܕܰܒܼܢܶܟܼܠܳܐ ܢܶܐܚܕܿܽܘܢܳܝܗ̱ܝ܂ ܘܢܶܩܛܠܽܘܢܳܝܗ̱ܝ܂
26:05 [ai]	ܘܳܐܡܪܺܝܢ ܗ̱ܘܰܘ܃ ܠܳܐ ܒܥܰܕܼܥܺܕܼܳܐ܂ ܕܠܳܐ ܢܶܗܘܶܐ ܫܓܼܽܘܫܝܳܐ ܒܥܰܡܳܐ ܿ܀ܿ܀ܿ
26:06 [ai]	ܘܟܼܰܕܼ ܗܘܳܐ ܝܶܫܽܘܥ ܒܒܼܶܝܬܼ ܥܰܢܝܳܐ܂ ܒܒܼܰܝܬܿܶܗ ܕܫܶܡܥܽܘܢ ܓܰܪܒܿܳܐ
26:07 [ai]	ܩܶܪܒܿܰܬܼ ܠܶܗ ܐܰܢ̱ܬܿܬܼܳܐ܂ ܕܺܐܝܬܼ ܥܠܶܝܗ ܫܳܛܺܝܦܼܬܳܐ ܕܡܶܫܚܳܐ܂ ܕܒܶܣܡܳܐ ܣܰܓܿܺܝ ܕܡܰܝܳܐ̈܂ ܘܰܐܫܦܿܰܥܬܼܳܗ ܥܰܠ ܪܺܫܶܗ ܕܝܶܫܽܘܥ܂ ܟܰܕܼ ܣܡܺܝܟܼ܀
26:08 [ai]	ܚܙܰܘ ܕܶܝܢ ܬܰܠܡܺܝܕܼܰܘܗ̱ܝ̈܂ ܘܶܐܬܼܒܿܶܐܫ ܠܗܽܘܢ܂ ܘܶܐܡܰܪܘ܂ ܠܡܳܢܳܐ ܐܰܒܼܕܳܢܳܐ ܗܳܢܳܐ܂
26:09 [ai]	ܡܶܫܟܿܰܚ ܗ̱ܘܳܐ ܓܶܝܪ ܕܿܢܶܙܕܿܰܒܰܢ ܗܳܢܳܐ ܒܣܰܓܿܺܝ܂ ܘܢܶܬܼܺܝܗܶܒܼ ܠܡܶܣܟܿܺܢܶܐ̈܀
26:10 [ai]	ܝܶܫܽܘܥ ܕܶܝܢ ܺܝܕܼܰܥ܂ ܘܶܐܡܰܪ ܠܗܽܘܢ܂ ܡܳܢܳܐ ܡܰܠܶܐܝܢ ܐܢ̱ܬܿܽܘܢ ܠܳܗ ܠܰܐܢ̱ܬܿܬܼܳܐ܂ ܥܒܼܳܕܼܳܐ ܫܰܦܿܺܝܪܳܐ ܥܶܒܼܕܿܰܬܼ ܠܘܳܬܼܝ܂
26:11 [ai]	ܒܟܽܠܙܒܼܰܢ ܓܶܝܪ ܡܶܣܟܿܺܢܶܐ̈ ܐܺܝܬܼ ܠܟܼܽܘܢ ܥܰܡܟܼܽܘܢ܂ ܠܺܝ ܕܶܝܢ܂ ܠܳܐ ܒܟܽܠܙܒܼܰܢ ܐܺܝܬܼ ܠܟܼܽܘܢ܂
26:12 [ai]	ܗܳܕܼܶܐ ܕܶܝܢ ܕܰܐܪܡܝܰܬܼ ܒܶܣܡܳܐ ܗܳܢܳܐ ܥܰܠ ܓܽܘܫܡܝ܃ ܐܰܝܟܼ ܕܿܰܠܡܶܩܒܪܰܢܝ ܥܶܒܼܕܿܰܬܼ܂
26:13 [ai]	ܘܰܐܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܰܐܝܟܿܳܐ ܕܬܶܬܼܟܿܪܶܙ ܣܒܼܰܪܬܼܝ ܗܳܕܼܶܐ܂ ܒܟܽܠܶܗ ܥܳܠܡܳܐ܃ ܢܶܬܼܡܰܠܰܠ ܐܳܦܼ ܡܶܕܶܡ ܕܥܶܒܼܕܿܰܬܼ ܗܳܕܼܶܐ܂ ܠܕܼܽܘܟܼܪܳܢܳܗ܀
26:14 [ai]	ܗܳܝܕܶܝܢ ܐܶܙܰܠ ܚܰܕܼ ܡܶܢ ܬܪܶܥܣܰܪ܂ ܕܡܶܬܼܩܪܶܐ ܺܝܗܽܘܕܼܳܐ ܣܟܼܰܪܝܽܘܛܳܐ܃ ܠܘܳܬܼ ܪ̈ܰܒܰܝ ܟܳܗܢܶܐ̈܂
26:15 [ai]	ܘܶܐܡܰܪ ܠܗܽܘܢ܂ ܡܳܢܳܐ ܨܳܒܼܶܝܢ ܐܢ̱ܬܿܽܘܢ ܠܡܶܬܿܰܠ ܠܺܝ܃ ܘܶܐܢܳܐ ܡܰܫܠܶܡ ܐ̱ܢܳܐ ܠܶܗ ܠܟܼܽܘܢ܀ ܗܶܢܽܘܢ ܕܶܝܢ ܐܰܩܺܝܡܘ ܠܶܗ ܬܠܳܬܼܺܝܢ ܕܟܶܣܦܿܳܐ܂
26:16 [ai]	ܘܡܶܢ ܗܳܝܕܶܝܢ܂ ܒܿܳܥܶܐ ܗ̱ܘܳܐ ܠܶܗ ܦܶܠܥܳܐ ܕܢܰܫܠܡܺܝܘܗ̱ܝ܀܀
26:17 [ai]	ܒܝܰܘܡܳܐ ܕܶܝܢ ܩܰܕܼܡܳܝܳܐ ܕܿܦܼܰܛܺܝܪ̈ܶܐ܃ ܩܪܶܒܼܘ ܬܰܠܡܺܝܕܼܶܐ̈ ܠܘܳܬܼ ܝܶܫܽܘܥ܂ ܘܶܐܡܰܪܘ ܠܶܗ܂ ܐܰܝܟܿܳܐ ܨܳܒܼܶܐ ܐܰܢ̱ܬܿ ܕܰܢܛܰܝܶܒܼ ܠܳܟܼ܂ ܕܬܶܠܥܰܣ ܦܶܨܚܳܐ܂
26:18 [ai]	ܗܽܘ ܕܶܝܢ ܐܶܡܰܪ ܠܗܽܘܢ܂ ܙܶܠܘ ܠܰܡܕܼܺܝܢ̱ܬܳܐ܂ ܠܘܳܬܼ ܦܠܳܢ܂ ܘܶܐܡܰܪܘ ܠܶܗ܂ ܪܰܒܰܢ ܐܳܡܰܪ܃ ܙܰܒܼܢܝ ܡܛܳܐ ܠܶܗ܂ ܠܘܳܬܼܳܟܼ ܥܳܒܼܶܕܼ ܐ̱ܢܳܐ ܦܶܨܚܳܐ܂ ܥܰܡ ܬܰܠܡܺܝܕܼܰܝ̈܂
26:19 [ai]	ܘܬܼܰܠܡܺܝܕܼܰܘܗ̱ܝ̈܂ ܥܒܼܰܕܼܘ ܐܰܝܟܿܰܢܳܐ ܕܰܦܼܩܰܕܼ ܠܗܽܘܢ ܝܶܫܽܘܥ܂ ܘܛܰܝܶܒܼ ܘܦܶܨܚܳܐ܂
26:20 [ai]	ܘܟܼܰܕܼ ܗܘܳܐ ܪܰܡܫܳܐ܂ ܣܡܺܝܟܼ ܗܘܳܐ ܥܰܡ ܬܪܶܥܣܰܪ ܬܰܠܡܺܝܕܼܰܘܗ̱ܝ̈܀
26:21 [ai]	ܘܟܼܰܕܼ ܠܳܥܣܺܝܢ܂ ܐܶܡܰܪ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܚܰܕܼ ܡܶܢܟܼܽܘܢ ܡܰܫܠܶܡ ܠܺܝ܀
26:22 [ai]	ܘܟܼܶܪܝܰܬܼ ܠܗܽܘܢ܂ ܛܳܒܼ܂ ܘܫܰܪܺܝܘ ܠܡܺܐܡܰܪ ܠܶܗ ܚܰܕܼ ܚܰܕܼ ܡܶܢܗܽܘܢ܂ ܠܡܳܐ܃ ܐܶܢܳܐ ܡܳܪܝ܂܂܀
26:23 [ai]	ܗܽܘ ܕܶܝܢ ܥܢܳܐ܂ ܘܶܐܡܰܪ܂ ܡܰܢ ܕܨܳܒܼܰܥ ܐܺܝܕܼܶܗ ܥܰܡܝ ܒܠܰܓܿܬܼܳܐ܂ ܗܽܘ ܢܰܫܠܡܰܢܝ܂
26:24 [ai]	ܘܰܒܪܶܗ ܕܐ̱ܢܳܫܳܐ ܐܳܙܶܠ܂ ܐܰܝܟܿܰܢܳܐ ܕܰܟܼܬܼܺܝܒܼ ܥܠܰܘܗ̱ܝ܂ ܘܳܝ ܠܶܗ ܕܶܝܢ ܠܓܼܰܒܼܪܳܐ܂ ܗܰܘ ܕܒܺܐܝܕܼܶܗ ܒܪܶܗ ܕܐ̱ܢܳܫܳܐ ܡܶܫܬܿܠܶܡ܂ ܦܰܩܳܚ ܗ̱ܘܳܐ ܠܶܗ ܠܓܼܰܒܼܪܳܐ ܗܰܘ܂ ܐܶܠܽܘ ܠܳܐ ܐܶܬܼܺܝܠܶܕܼ܀
26:25 [ai]	ܥܢܳܐ ܺܝܗܽܘܕܼܳܐ ܡܰܫܠܡܳܢܳܐ܂ ܘܶܐܡܰܪ܂ ܕܰܠܡܳܐ܃ ܐܶܢܳܐ ܗܽܘ ܪܰܒܺܝ܃ ܐܳܡܰܪ ܠܶܗ ܝܶܫܽܘܥ܂ ܐܰܢ̱ܬܿ ܐܶܡܰܪܬܿ܀
26:26 [ai]	ܟܰܕܼ ܕܶܝܢ ܠܳܥܣܺܝܢ܃ ܫܩܰܠ ܝܶܫܽܘܥ ܠܰܚܡܳܐ܂ ܘܒܼܰܪܶܟܼ܂ ܘܰܩܨܳܐ܂ ܘܝܰܗ̱ܒܼ ܠܬܼܰܠܡܺܝܕܼܰܘܗ̱ܝ̈܂ ܘܶܐܡܰܪ܂ ܣܰܒܼܘ ܐܰܟܼܽܘܠܘ܂ ܗܳܢܰܘ ܦܰܓܼܪܝ܀
26:27 [ai]	ܘܰܫܩܰܠ ܟܳܣܳܐ܂ ܘܰܐܘܕܿܺܝ܃ ܘܝܰܗ̱ܒܼ ܠܗܽܘܢ܂ ܘܶܐܡܰܪ܂ ܣܰܒܼܘ ܐܶܫܬܰܘ ܡܶܢܶܗ܂ ܟܽܠܟܼܽܘܢ܂
26:28 [ai]	ܗܳܢܰܘ ܕܶܡܝ ܕܕܼܺܝܰܬܼܺܩܺܐ ܚܰܕܼ̱ܬܼܳܐ܃ ܕܰܚܠܳܦܼ ܣܰܓܿܺܝܶܐܐ̈ ܡܶܬܼܶܐܫܶܕܼ ܠܫܽܘܒܼܩܳܢܳܐ ܕܰܚܛܳܗܶܐ̈܀
26:29 [ai]	ܐܳܡܰܪ ܐ̱ܢܳܐ ܠܟܼܽܘܢ ܕܶܝܢ܃ ܕܠܳܐ ܐܶܫܬܿܶܐ ܡܶܢ ܗܳܫܳܐ ܡܶܢ ܗܳܢܳܐ ܝܰܠܕܿܳܐ ܕܰܓܼܦܼܶܬܳܐ܃ ܥܕܼܰܡܳܐ ܠܝܰܘܡܳܐ ܕܒܶܗ ܐܶܫܬܿܶܝܘܗ̱ܝ ܥܰܡܟܼܽܘܢ ܚܰܕܼ̱ܬܼܳܐ܂ ܒܡܰܠܟܿܽܘܬܼܶܗ ܕܳܐܒܼܝ܀
26:30 [ai]	ܘܫܰܒܿܰܚܘ܂ ܘܰܢܦܼܰܩܘ ܠܛܽܘܪ ܙܰܝܬܿܶܐ̈܀
26:31 [ai]	ܗܳܝܕܶܝܢ ܐܶܡܰܪ ܠܗܽܘܢ ܝܶܫܽܘܥ܂ ܐܰܢ̱ܬܿܽܘܢ ܟܽܠܟܼܽܘܢ ܬܶܬܼܟܿܰܫܠܽܘܢ ܒܺܝ ܒܗܳܢܳܐ ܠܺܠܝܳܐ܂ ܟܬܼܺܝܒܼ ܓܶܝܪ܂ ܕܶܐܡܚܶܐ ܠܪܳܥܝܳܐ܂ ܘܢܶܬܼܒܿܰܕܿܪܽܘܢ ܥܶܪ̈ܒܿܶܐ ܕܥܳܢܶܗ܂
26:32 [ai]	ܡܶܢ ܒܳܬܼܰܪ ܕܩܳܐܶܡ ܐ̱ܢܳܐ ܕܶܝܢ܃ ܩܳܕܼܶܡ ܐ̱ܢܳܐ ܠܟܼܽܘܢ ܠܰܓܼܠܺܝܠܳܐ܀
26:33 [ai]	ܥܢܳܐ ܟܺܐܦܼܳܐ܂ ܘܶܐܡܰܪ ܠܶܗ܂ ܐܳܦܼܶܢ ܟܽܠܢܳܫ܂ ܢܶܬܼܟܿܫܶܠ ܒܳܟܼ܃ ܐܶܢܳܐ ܡܬܼܽܘܡ܂ ܠܳܐ ܐܶܬܼܟܿܫܶܠ ܒܳܟܼ܂
26:34 [ai]	ܐܳܡܰܪ ܠܶܗ ܝܶܫܽܘܥ܂ ܐܰܡܺܝܢ ܐܳܡܰܪ ܐ̱ܢܳܐ ܠܳܟܼ܂ ܕܰܒܼܗܳܢܳܐ ܠܺܠܝܳܐ܂ ܩܕܼܳܡ ܕܢܶܩܪܶܐ ܬܰܪܢܳܓܼܠܳܐ܃ ܬܠܳܬܼ ܙܰܒܼܢܺܝܢ̈ ܬܶܟܼܦܿܽܘܪ ܒܺܝ܂
26:35 [ai]	ܐܳܡܰܪ ܠܶܗ ܟܺܐܦܼܳܐ܂ ܐܶܢ ܢܶܗܘܶܐ ܠܺܝ ܠܰܡܡܳܬܼ ܥܰܡܳܟܼ܂ ܠܳܐ ܐܶܟܼܦܿܽܘܪ ܒܳܟܼ܂ ܘܗܳܟܼܘܳܬܼ܂ ܐܳܦܼ ܟܽܠܗܽܘܢ ܬܰܠܡܺܝܕܼܶܐ̈ ܐܶܡܰܪܘ܀܀
26:36 [ai]	ܗܳܝܕܶܝܢ ܐܶܬܼܳܐ ܥܰܡܗܽܘܢ ܝܶܫܽܘܥ܂ ܠܕܼܽܘܟܿܬܼܳܐ ܕܡܶܬܼܩܰܪܝܳܐ ܓܿܶܕܿܣܺܡܰܢ܂ ܘܶܐܡܰܪ ܠܬܼܰܠܡܺܝܕܼܰܘܗ̱ܝ̈܂ ܬܶܒܼܘ ܗܳܪܟܿܳܐ܂ ܥܰܕܼ ܐܺܙܰܠ ܐܶܨܰܠܶܐ܂
26:37 [ai]	ܘܰܕܼܒܼܰܪ ܠܟܼܺܐܦܼܳܐ܂ ܘܠܰܬܼܪ̈ܰܝܗܽܘܢ ܒܢܰܝ ܙܰܒܼܕܼܰܝ܂ ܘܫܰܪܺܝ ܠܡܶܬܼܟܿܡܳܪܽܘ܂ ܘܰܠܡܶܬܼܥܳܩܽܘ܂
26:38 [ai]	ܘܶܐܡܰܪ ܠܗܽܘܢ܂ ܟܰܪܝܳܐ ܗ̱ܝ ܠܳܗ ܠܢܰܦܼܫܝ܂ ܥܕܼܰܡܳܐ ܠܡܰܘܬܳܐ܂ ܩܰܘܰܘ ܠܺܝ ܗܳܪܟܿܳܐ܂ ܘܰܫܗܰܪܘ ܥܰܡܝ܀
26:39 [ai]	ܘܰܦܼܪܰܩ ܩܰܠܺܝܠ܂ ܘܰܢܦܼܰܠ ܥܰܠ ܐܰܦܿܰܘܗ̱ܝ̈܂ ܘܰܡܨܰܠܶܐ ܗ̱ܘܳܐ܂ ܘܳܐܡܰܪ܂ ܐܳܒܼܝ܃ ܐܶܢ ܡܶܫܟܿܚܳܐ܂ ܢܶܥܒܪܰܢܝ ܟܳܣܳܐ ܗܳܢܳܐ܂ ܒܪܰܡ ܠܳܐ ܐܰܝܟܼ ܕܶܐܢܳܐ ܨܳܒܼܶܐ ܐ̱ܢܳܐ܂ ܐܶܠܳܐ܂ ܐܰܝܟܼ ܕܰܐܢ̱ܬܿ܀
26:40 [ai]	ܘܶܐܬܼܳܐ ܠܘܳܬܼ ܬܰܠܡܺܝܕܼܰܘܗ̱ܝ̈܃ ܘܶܐܫܟܿܰܚ ܐܶܢܽܘܢ܂ ܟܰܕܼ ܕܰܡܟܿܺܝܢ܂ ܘܶܐܡܰܪ ܠܟܼܺܐܦܼܳܐ܂ ܗܳܟܼܰܢܳܐ܂ ܠܳܐ ܐܶܫܟܿܰܚܬܿܽܘܢ܃ ܚܕܼܳܐ ܫܳܥܳܐ܃ ܕܬܶܫܗܪܽܘܢ ܥܰܡܝ܂
26:41 [ai]	ܐܶܬܿܬܿܥܺܝܪܘ܂ ܘܨܰܠܰܘ܂ ܕܠܳܐ ܬܶܥܠܽܘܢ ܠܢܶܣܝܽܘܢܳܐ܂ ܪܽܘܚܳܐ܂ ܡܛܰܝܒܼܳܐ܂ ܦܰܓܼܪܳܐ ܕܶܝܢ ܟܪܺܝܗ܀
26:42 [ai]	ܬܽܘܒܼ ܐܶܙܰܠ ܕܿܬܼܰܪ̈ܬܿܶܝܢ ܙܰܒܼܢܺܝܢ̈܂ ܨܰܠܺܝ܂ ܘܶܐܡܰܪ܂ ܐܳܒܼܝ܃ ܐܶܢ ܠܳܐ ܡܶܫܟܿܰܚ ܗܳܢܳܐ ܟܳܣܳܐ ܕܿܢܶܥܒܰܪ܂ ܐܶܠܳܐ ܐܶܢ ܐܶܫܬܿܺܝܬܼܶܗ܃ ܢܶܗܘܶܐ ܨܶܒܼܝܳܢܳܟܼ܀
26:43 [ai]	ܘܶܐܬܼܳܐ ܬܽܘܒܼ܂ ܐܶܫܟܿܰܚ ܐܶܢܽܘܢ ܟܰܕܼ ܕܰܡܟܿܺܝܢ܂ ܥܰܝܢܰܝܗܽܘܢ̈ ܓܶܝܪ ܝܰܩܺܝܪ̈ܳܢ ܗ̱ܘܰܝ̈܂
26:44 [ai]	ܘܰܫܒܼܰܩ ܐܶܢܽܘܢ܂ ܘܶܐܙܰܠ ܬܽܘܒܼ܂ ܨܰܠܺܝ ܕܰܬܼܠܳܬܼ ܙܰܒܼܢܺܝܢ̈܃ ܘܠܳܗ ܠܡܶܠܬܼܳܐ ܐܶܡܰܪ܂
26:45 [ai]	ܗܳܝܕܶܝܢ ܐܶܬܼܳܐ ܠܘܳܬܼ ܬܰܠܡܺܝܕܼܰܘܗ̱ܝ̈܂ ܘܶܐܡܰܪ ܠܗܽܘܢ܂ ܕܡܰܟܼܘ ܡܶܟܿܺܝܠ܂ ܘܶܐܬܿܬܿܢܺܝܚܘ܂ ܗܳܐ ܡܛܳܬܼ ܫܳܥܬܼܳܐ܂ ܘܰܒܪܶܗ ܕܐ̱ܢܳܫܳܐ ܡܶܫܬܿܠܶܡ ܒܺܐܝܕܼܰܝܗܽܘܢ̈ ܕܚܰܛܳܝܶܐ̈܂
26:46 [ai]	ܩܽܘܡܘ܂ ܢܺܐܙܰܠ܂ ܗܳܐ ܡܛܳܐ ܗܰܘ ܕܡܰܫܠܶܡ ܠܺܝ܀
26:47 [ai]	ܘܥܰܕܼ ܗܽܘ ܡܡܰܠܶܠ܃ ܗܳܐ ܺܝܗܽܘܕܼܳܐ ܡܰܫܠܡܳܢܳܐ܂ ܚܰܕܼ ܡܶܢ ܬܪܶܥܣܰܪܬܳܐ ܐܶܬܼܳܐ܂ ܘܟܼܶܢܫܳܐ ܥܰܡܶܗ ܣܰܓܿܺܝܳܐܐ܂ ܥܰܡ ܣܰܦܼܣܺܪ̈ܶܐ܂ ܘܚܽܘܛܪ̈ܶܐ܂ ܡܶܢ ܠܘܳܬܼ ܪ̈ܰܒܰܝ ܟܳܗܢܶܐ̈܂ ܘܩܰܫܺܝܫܶܐ̈ ܕܥܰܡܳܐ܀
26:48 [ai]	ܘܝܰܗ̱ܒܼ ܗ̱ܘܳܐ ܠܗܽܘܢ ܐܳܬܼܳܐ܂ ܺܝܗܽܘܕܼܳܐ ܡܰܫܠܡܳܢܳܐ܂ ܘܶܐܡܰܪ܂ ܠܗܰܘ ܕܢܳܫܶܩ ܐ̱ܢܳܐ܂ ܗܽܘܝܽܘ܂ ܠܶܗ ܐܰܚܽܘܕܼܘ܀
26:49 [ai]	ܘܡܶܚܕܼܳܐ ܩܪܶܒܼ ܠܘܳܬܼ ܝܶܫܽܘܥ܂ ܘܶܐܡܰܪ܂ ܫܠܳܡ ܪܰܒܺܝ܃ ܘܢܰܫܩܶܗ܀
26:50 [ai]	ܗܽܘ ܕܶܝܢ ܝܶܫܽܘܥ܂ ܐܶܡܰܪ ܠܶܗ܂ ܥܰܠ ܗܳܝ ܕܶܐܬܼܰܝܬܿ ܚܰܒܼܪܝ܂܂܀ ܗܳܝܕܶܝܢ ܐܶܬܼܩܰܪܰܒܼܘ܃ ܘܰܐܪܡܺܝܘ ܐܺܝܕܼܰܝܗܽܘܢ̈܂ ܥܰܠ ܝܶܫܽܘܥ܂ ܘܰܐܚܕܿܽܘܗ̱ܝ܀
26:51 [ai]	ܘܗܳܐ ܚܰܕܼ ܡܶܢ ܗܳܢܽܘܢ ܕܥܰܡ ܝܶܫܽܘܥ܂ ܐܰܘܫܶܛ ܐܺܝܕܼܶܗ܂ ܘܰܫܡܰܛ ܣܰܦܼܣܺܪܳܐ܂ ܘܰܡܚܳܝܗ̱ܝ ܠܥܰܒܼܕܿܶܗ ܕܿܪ̈ܰܒܿ ܟܿܳܗܢܶܐ܂ ܘܫܰܩܠܳܗ ܐܶܕܼܢܶܗ܀
26:52 [ai]	ܗܳܝܕܶܝܢ ܐܶܡܰܪ ܠܶܗ ܝܶܫܽܘܥ܂ ܐܰܗܦܿܶܟܼ ܣܰܦܼܣܺܪܳܐ ܠܕܼܽܘܟܿܬܼܳܗ܂ ܟܽܠܗܽܘܢ ܓܶܝܪ ܗܳܢܽܘܢ ܕܰܢܣܰܒܼܘ ܣܰܝܦܼܶܐ̈܂ ܒܣܰܝܦܼܶܐ̈ ܢܡܽܘܬܼܽܘܢ܂
26:53 [ai]	ܐܰܘ ܣܳܒܼܰܪ ܐܰܢ̱ܬܿ ܕܠܳܐ ܡܶܫܟܿܰܚ ܐ̱ܢܳܐ ܕܶܐܒܼܥܶܐ ܡܶܢ ܐܳܒܼܝ܃ ܘܰܢܩܺܝܡ ܠܺܝ ܗܳܫܳܐ ܝܰܬܿܺܝܪ ܡܶܢ ܬܿܰܪ̈ܬܿܰܥܶܣܪܶܐ ܠܶܓܼܝܽܘܢܺܝܢ̈ ܕܡܰܠܰܐܟܼܶܐ̈܂
26:54 [ai]	ܐܰܝܟܿܰܢܳܐ ܗܳܟܼܺܝܠ ܢܶܬܼܡܰܠܽܘܢ ܟܬܼܳܒܼܶܐ̈܃ ܕܗܳܟܼܰܢܳܐ ܘܳܠܶܐ ܕܢܶܗܘܶܐ܀
26:55 [ai]	ܒܗܳܝ ܫܳܥܬܼܳܐ܂ ܐܶܡܰܪ ܝܶܫܽܘܥ ܠܟܼܶܢܫܶܐ̈܂ ܐܰܝܟܼ ܕܥܰܠ ܓܰܝܳܣܳܐ ܢܦܼܰܩܬܿܽܘܢ܂ ܒܣܰܦܼܣܺܪ̈ܶܐ ܘܰܒܚܽܘܛܪ̈ܶܐ܂ ܕܬܶܐܚܕܿܽܘܢܳܢܝ܃ ܟܽܠܝܽܘܡ ܠܘܳܬܼܟܼܽܘܢ ܒܗܰܝܟܠܳܐ܂ ܝܳܬܼܶܒܼ ܗ̱ܘܺܝܬܼ ܘܡܰܠܶܦܼ܂ ܘܠܳܐ ܐܶܚܰܕܿܬܿܽܘܢܳܢܝ܀
26:56 [ai]	ܗܳܕܼܶܐ ܕܶܝܢ ܕܰܗܘܳܬܼ܂ ܕܢܶܬܼܡܰܠܽܘܢ ܟܬܼܳܒܼܶܐ̈ ܕܰܢܒܼܺܝܶܐ̈܀ ܗܳܝܕܶܝܢ ܬܰܠܡܺܝܕܼܶܐ̈ ܟܽܠܗܽܘܢ܂ ܫܰܒܼܩܽܘܗ̱ܝ܂ ܘܰܥܪܰܩܘ ܀
26:57 [ai]	ܘܗܳܢܽܘܢ ܕܰܐܚܕܿܽܘܗ̱ܝ ܠܝܶܫܽܘܥ܂ ܐܰܘܒܿܠܽܘܗ̱ܝ ܠܘܳܬܼ ܩܰܝܳܦܼܳܐ ܪ̈ܰܒܿ ܟܿܳܗܢܶܐ܃ ܐܰܝܟܿܳܐ ܕܿܣܳܦܼܪ̈ܶܐ ܘܩܰܫܺܝܫܶܐ̈ ܟܢܺܝܫܺܝܢ ܗ̱ܘܰܘ܀
26:58 [ai]	ܫܶܡܥܽܘܢ ܕܶܝܢ ܟܺܐܦܼܳܐ܂ ܐܳܙܶܠ ܗ̱ܘܳܐ ܒܳܬܼܪܶܗ ܡܶܢ ܪܽܘܚܩܳܐ܃ ܥܕܼܰܡܳܐ ܠܕܼܳܪܬܿܶܗ ܕܿܪ̈ܰܒܿ ܟܿܳܗܢܶܐ܂ ܘܥܰܠ ܺܝܬܼܶܒܼ ܠܓܼܰܘ ܥܰܡ ܕܰܚܫܶܐ̈܂ ܕܢܶܚܙܶܐ ܚܰܪܬܼܳܐ ܿ܀ܿ܀ܿ
26:59 [ai]	ܪ̈ܰܒܰܝ ܟܳܗܢܶܐ̈ ܕܶܝܢ ܘܩܰܫܺܝܫܶܐ̈܂ ܘܰܟܼܢܽܘܫܬܳܐ ܟܽܠܳܗ܃ ܒܿܳܥܶܝܢ ܗ̱ܘܰܘ ܥܰܠ ܝܶܫܽܘܥ ܣܳܗܕܿܶܐ̈܂ ܐܰܝܟܼ ܕܰܢܡܺܝܬܼܽܘܢܳܝܗ̱ܝ܂
26:60 [ai]	ܘܠܳܐ ܐܶܫܟܿܰܚܘ܂ ܘܶܐܬܼܰܘ ܣܰܓܿܺܝܶܐܐ̈ ܣܳܗܕܿܶܐ̈ ܕܫܽܘܩܪܳܐ܂ ܐ̱ܚܪܳܝܰܬܼ ܕܶܝܢ ܩܪܶܒܼܘ ܬܿܪ̈ܶܝܢ܂
26:61 [ai]	ܘܳܐܡܪܺܝܢ܂ ܗܳܢܳܐ ܐܶܡܰܪ܃ ܕܡܶܫܟܿܰܚ ܐ̱ܢܳܐ ܕܶܐܫܪܶܐ ܗܰܝܟܠܳܐ ܕܰܐܠܳܗܳܐ܂ ܘܠܰܬܼܠܳܬܼܳܐ ܝܰܘܡܺܝܢ̈ ܐܶܒܼܢܶܝܘܗ̱ܝ܂
26:62 [ai]	ܘܩܳܡ ܪ̈ܰܒܿ ܟܿܳܗܢܶܐ܂ ܘܶܐܡܰܪ ܠܶܗ܂ ܠܳܐ ܡܶܕܶܡ ܡܦܼܰܢܶܐ ܐܰܢ̱ܬܿ ܦܶܬܼܓܼܳܡܳܐ܃ ܡܳܢܳܐ ܡܰܣܗܕܼܺܝܢ ܥܠܰܝܟܿ ܗܳܠܶܝܢ܂
26:63 [ai]	ܝܶܫܽܘܥ ܕܶܝܢ܂ ܫܰܬܿܺܝܩ ܗ̱ܘܳܐ܀ ܘܰܥܢܳܐ ܪ̈ܰܒܿ ܟܿܳܗܢܶܐ܂ ܘܶܐܡܰܪ ܠܶܗ܂ ܡܰܘܡܶܐ ܐ̱ܢܳܐ ܠܳܟܼ ܒܰܐܠܳܗܳܐ ܚܰܝܳܐ܃ ܕܬܺܐܡܰܪ ܠܰܢ܂ ܐܶܢ ܐܰܢ̱ܬܿ ܗ̱ܽܘ ܡܫܺܝܚܳܐ ܒܪܶܗ ܕܰܐܠܳܗܳܐ܂
26:64 [ai]	ܐܳܡܰܪ ܠܶܗ ܝܶܫܽܘܥ܂ ܐܰܢ̱ܬܿ ܐܶܡܰܪܬܿ܂ ܐܳܡܰܪܢܳܐ ܠܟܼܽܘܢ ܕܶܝܢ܃ ܕܡܶܢ ܗܳܫܳܐ ܬܶܚܙܽܘܢܳܝܗ̱ܝ ܠܰܒܼܪܶܗ ܕܐ̱ܢܳܫܳܐ܂ ܕܝܳܬܼܶܒܼ ܡܶܢ ܝܰܡܺܝܢܳܐ ܕܚܰܝܠܳܐ܃ ܘܳܐܬܼܶܐ ܥܰܠ ܥܢܳܢܰܝ̈ ܫܡܰܝܳܐ܀
26:65 [ai]	ܗܳܝܕܶܝܢ ܪ̈ܰܒܿ ܟܿܳܗܢܶܐ ܨܰܪܺܝ ܡܳܐܢܰܘܗ̱ܝ̈܂ ܘܶܐܡܰܪ܂ ܗܳܐ ܓܰܕܿܶܦܼ܂ ܡܳܢܳܐ ܡܶܟܿܺܝܠ ܡܶܬܼܒܿܥܶܝܢ ܠܰܢ ܣܳܗܕܿܶܐ̈܂ ܗܳܐ ܗܳܫܳܐ ܫܡܰܥܬܿܽܘܢ ܓܽܘܕܿܳܦܼܶܗ܂
26:66 [ai]	ܡܳܢܳܐ ܨܳܒܼܶܝܢ ܐܢ̱ܬܿܽܘܢ܂ ܥܢܰܘ܂ ܘܳܐܡܪܺܝܢ܂ ܚܰܝܳܒܼ ܗ̱ܽܘ ܡܰܘܬܳܐ܀
26:67 [ai]	ܗܳܝܕܶܝܢ ܪܰܩܘ ܒܰܐܦܿܰܘܗ̱ܝ̈܂ ܘܰܡܩܰܦܿܚܺܝܢ ܗ̱ܘܰܘ ܠܶܗ܂ ܐ̱ܚܪ̈ܳܢܶܐ ܕܶܝܢ ܡܳܚܶܝܢ ܗ̱ܘܰܘ ܠܶܗ܃
26:68 [ai]	ܘܳܐܡܪܺܝܢ܂ ܐܶܬܼܢܰܒܿܳܐ ܠܰܢ ܡܫܺܝܚܳܐ܃ ܡܰܢܽܘ ܗܰܘ ܕܰܡܚܳܟܼ܀
26:69 [ai]	ܟܺܐܦܼܳܐ ܕܶܝܢ ܝܳܬܼܶܒܼ ܗ̱ܘܳܐ ܠܒܼܰܪ ܒܕܳܪܬܳܐ܃ ܘܩܶܪܒܿܰܬܼ ܠܘܳܬܼܶܗ ܐܰܡܬܼܳܐ ܚܕܼܳܐ܂ ܘܳܐܡܪܳܐ ܠܶܗ܂ ܐܳܦܼ ܐܰܢ̱ܬܿ܂ ܥܰܡ ܝܶܫܽܘܥ ܗ̱ܘܰܝܬܿ ܢܳܨܪܳܝܳܐ܂
26:70 [ai]	ܗܽܘ ܕܶܝܢ ܟܦܼܰܪ ܩܕܼܳܡ ܟܽܠܗܽܘܢ܂ ܘܶܐܡܰܪ܂ ܠܳܐ ܝܳܕܼܰܥ ܐ̱ܢܳܐ ܡܳܢܳܐ ܐܳܡܪܳܐ ܐܰܢ̱ܬܿܝ܂
26:71 [ai]	ܘܟܼܰܕܼ ܢܦܼܰܩ ܠܣܶܦܿܳܐ܃ ܚܙܳܬܼܶܗ ܐ̱ܚܪܺܬܼܳܐ܂ ܘܳܐܡܪܳܐ ܠܗܽܘܢ܂ ܕܬܰܡܳܢ ܗ̱ܘܳܐ ܐܳܦܼ ܗܳܢܳܐ܂ ܥܰܡ ܝܶܫܽܘܥ ܢܳܨܪܳܝܳܐ܂
26:72 [ai]	ܘܬܼܽܘܒܼ ܟܦܼܰܪ ܒܡܰܘܡܳܬܼܳܐ̈܃ ܕܠܳܐ ܝܳܕܼܰܥ ܐ̱ܢܳܐ ܠܶܗ ܠܓܼܰܒܼܪܳܐ܂
26:73 [ai]	ܡܶܢ ܒܳܬܼܰܪ ܩܰܠܺܝܠ ܕܶܝܢ܃ ܩܪܶܒܼܘ ܗܳܢܽܘܢ ܕܩܳܝܡܺܝܢ܂ ܘܶܐܡܰܪܘ ܠܟܼܺܐܦܼܳܐ܂ ܫܰܪܺܝܪܳܐܺܝܬܼ ܐܳܦܼ ܐܰܢ̱ܬܿ܂ ܡܶܢܗܽܘܢ ܐܰܢ̱ܬܿ܂ ܐܳܦܼ ܡܰܡܠ̱ܠܳܟܼ ܓܶܝܪ ܡܰܘܕܿܰܥ ܠܳܟܼ܂
26:74 [ai]	ܗܳܝܕܶܝܢ ܫܰܪܺܝ ܠܡܰܚܪܳܡܽܘ ܘܰܠܡܺܐܡܳܐ܃ ܕܠܳܐ ܝܳܕܼܰܥܢܳܐ ܠܶܗ ܠܓܼܰܒܼܪܳܐ܀ ܘܒܼܳܗ ܒܫܳܥܬܼܳܐ܂ ܩܪܳܐ ܬܰܪܢܳܓܼܠܳܐ܂
26:75 [ai]	ܘܶܐܬܿܕܿܟܼܰܪ ܟܺܐܦܼܳܐ ܡܶܠܬܼܳܐ ܕܝܶܫܽܘܥ܂ ܕܶܐܡܰܪ ܠܶܗ܃ ܕܰܩܕܼܳܡ ܕܢܶܩܪܶܐ ܬܰܪܢܳܓܼܠܳܐ܂ ܬܠܳܬܼ ܙܰܒܼܢܺܝܢ̈ ܬܶܟܼܦܿܽܘܪ ܒܺܝ܂ ܘܰܢܦܼܰܩ ܠܒܼܰܪ܂ ܒܟܳܐ ܡܰܪܺܝܪܳܐܺܝܬܼ܀

next chapter