The Comprehensive Aramaic Lexicon

27:01 [ai]	ܟܰܕܼ ܕܶܝܢ ܗܘܳܐ ܨܰܦܼܪܳܐ܃ ܡܶܠܟܿܳܐ ܢܣܰܒܼܘ ܥܰܠ ܝܶܫܽܘܥ܂܂܀ ܟܽܠܗܽܘܢ ܪ̈ܰܒܰܝ ܟܳܗܢܶܐ̈ ܘܩܰܫܺܝܫܶܐ̈ ܕܥܰܡܳܐ܂ ܐܰܝܟܼ ܕܰܢܡܺܝܬܼܽܘܢܳܝܗ̱ܝ܂
27:02 [ai]	ܘܰܐܣܪܽܘܗ̱ܝ܂ ܘܰܐܘܒܿܠܽܘܗ̱ܝ܂ ܘܰܐܫܠܡܽܘܗ̱ܝ ܠܦܿܺܝܠܰܛܳܘܣ ܗܺܓܼܡܽܘܢܳܐ܀
27:03 [ai]	ܗܳܝܕܶܝܢ ܺܝܗܽܘܕܼܳܐ ܡܰܫܠܡܳܢܳܐ܃ ܟܰܕܼ ܚܙܳܐ ܕܶܐܬܼܚܰܝܰܒܼ ܝܶܫܽܘܥ܂ ܐܶܬܿܬܿܘܺܝ܂ ܘܶܐܙܰܠ ܐܰܗܦܿܶܟܼ ܗܳܠܶܝܢ ܬܠܳܬܼܺܝܢ ܕܟܶܣܦܿܳܐ܂ ܠܪ̈ܰܒܰܝ ܟܳܗܢܶܐ̈܂ ܘܰܠܩܰܫܺܝܫܶܐ̈܂
27:04 [ai]	ܘܶܐܡܰܪ܂ ܚܛܺܝܬܼ܂ ܕܰܐܫܠܡܶܬܼ ܕܡܳܐ ܙܰܟܿܳܝܳܐ܂ ܗܶܢܽܘܢ ܕܶܝܢ ܐܶܡܰܪܘ ܠܶܗ܂ ܠܰܢ ܡܳܐ ܠܰܢ܂ ܐܰܢ̱ܬܿ ܝܳܕܼܰܥ ܐܰܢ̱ܬܿ܂
27:05 [ai]	ܘܰܫܕܼܳܝܗ̱ܝ ܟܶܣܦܿܳܐ ܒܗܰܝܟܠܳܐ܂ ܘܫܰܢܺܝ܂ ܘܶܐܙܰܠ ܚܢܰܩ ܢܰܦܼܫܶܗ܀
27:06 [ai]	ܪ̈ܰܒܰܝ ܟܳܗܢܶܐ̈ ܕܶܝܢ ܫܰܩܠܽܘܗ̱ܝ ܠܟܼܶܣܦܿܳܐ܂ ܘܶܐܡܰܪܘ܂ ܠܳܐ ܫܰܠܺܝܛ ܕܢܰܪܡܶܝܘܗ̱ܝ ܒܶܝܬܼ ܩܽܘܪܒܿܳܢܳܐ܂ ܡܶܛܽܠ ܕܛܺܝܡܰܝ̈ ܕܡܳܐ ܗܽܘ܂
27:07 [ai]	ܘܰܢܣܰܒܼܘ ܡܶܠܟܿܳܐ܃ ܘܰܙܒܼܰܢܘ ܒܶܗ ܐܳܓܼܽܘܪܣܶܗ ܕܦܰܚܳܪܳܐ܂ ܠܒܼܶܝܬܼ ܩܒܼܽܘܪܳܐ ܕܰܐܟܼܣܢܳܝܶܐ̈܂
27:08 [ai]	ܡܶܛܽܠ ܗܳܢܳܐ ܐܶܬܼܩܪܺܝ ܐܳܓܼܽܘܪܣܳܐ ܗܰܘ܂ ܩܪܺܝܬܼܳܐ ܕܰܕܼܡܳܐ܂ ܥܕܼܰܡܳܐ ܠܝܰܘܡܳܢܳܐ܀
27:09 [ai]	ܗܳܝܕܶܝܢ ܐܶܬܼܡܰܠܺܝ܂ ܡܶܕܶܡ ܕܶܐܬܼܶܐܡܰܪ ܒܝܰܕܼ ܢܒܼܺܝܳܐ܂ ܕܶܐܡܰܪ܃ ܕܢܶܣܒܿܶܬܼ ܬܠܳܬܼܺܝܢ ܕܟܶܣܦܿܳܐ ܕܡܰܘܗ̱ܝ̈ ܕܝܰܩܺܝܪܳܐ܃ ܕܩܰܨܘ ܡܶܢ ܒܢܰܝ ܐܺܝܣܪܳܝܶܠ܃
27:10 [ai]	ܘܝܶܗܒܿܶܬܼ ܐܶܢܽܘܢ ܠܳܐܓܼܽܘܪܣܶܗ ܕܦܰܚܳܪܳܐ܂ ܐܰܝܟܼ ܕܰܦܼܩܰܕܼ ܠܺܝ ܡܳܪܝܳܐ܀
27:11 [ai]	ܗܽܘ ܕܶܝܢ ܝܶܫܽܘܥ܂ ܩܳܡ ܩܕܼܳܡ ܗܺܓܼܡܽܘܢܳܐ܂ ܘܫܰܐܠܶܗ ܗܺܓܼܡܽܘܢܳܐ܂ ܘܶܐܡܰܪ ܠܶܗ܂ ܐܰܢ̱ܬܿ ܗ̱ܽܘ ܡܰܠܟܿܳܐ ܕܺܝܗܽܘܕܼܳܝܶܐ̈܃ ܐܳܡܰܪ ܠܶܗ ܝܶܫܽܘܥ܂ ܐܰܢ̱ܬܿ ܐܶܡܰܪܬܿ܀
27:12 [ai]	ܘܟܼܰܕܼ ܐܳܟܼܠܺܝܢ ܗ̱ܘܰܘ ܩܰܪ̈ܨܰܘܗ̱ܝ܂ ܪ̈ܰܒܰܝ ܟܳܗܢܶܐ̈ ܘܩܰܫܺܝܫܶܐ̈܃ ܡܶܕܶܡ ܦܶܬܼܓܼܳܡܳܐ܂ ܗܽܘ ܠܳܐ ܦܰܢܺܝ܀
27:13 [ai]	ܗܳܝܕܶܝܢ ܐܶܡܰܪ ܠܶܗ ܦܿܺܝܠܰܛܳܘܣ܂ ܠܳܐ ܫܳܡܰܥ ܐܰܢ̱ܬܿ܃ ܟܡܳܐ ܡܰܣܗܕܼܺܝܢ ܥܠܰܝܟܿ܀
27:14 [ai]	ܘܠܳܐ ܝܰܗ̱ܒܼ ܠܶܗ ܦܶܬܼܓܼܳܡܳܐ܂ ܘܠܳܐ ܒܰܚܕܼܳܐ ܡܶܠܳܐ܂ ܘܥܰܠ ܗܳܕܼܶܐ ܐܶܬܿܕܰܡܰܪ ܛܳܒܼ܀
27:15 [ai]	ܒܟܽܠ ܥܺܐܕܼܳܐ ܕܶܝܢ܃ ܡܥܳܕܼ ܗ̱ܘܳܐ ܗܺܓܼܡܽܘܢܳܐ ܕܢܶܫܪܶܐ ܐܰܣܺܝܪܳܐ ܚܰܕܼ ܠܥܰܡܳܐ܃ ܐܰܝܢܳܐ ܕܗܶܢܽܘܢ ܨܳܒܼܶܝܢ ܗ̱ܘܰܘ܂
27:16 [ai]	ܐܰܣܺܝܪ ܗ̱ܘܳܐ ܠܗܽܘܢ ܕܶܝܢ ܐܰܣܺܝܪܳܐ ܺܝܕܼܺܝܥܳܐ܂ ܕܡܶܬܼܩܪܶܐ܂ ܒܰܪ ܐܰܒܿܰܐ܂
27:17 [ai]	ܘܟܼܰܕܼ ܟܢܺܝܫܺܝܢ܂ ܐܶܡܰܪ ܠܗܽܘܢ ܦܿܺܝܠܰܛܳܘܣ܂ ܠܡܰܢ ܨܳܒܼܶܝܢ ܐܢ̱ܬܿܽܘܢ ܕܶܐܫܪܶܐ ܠܟܼܽܘܢ܃ ܠܒܼܰܪ ܐܰܒܿܰܐ܂ ܐܰܘ ܠܝܶܫܽܘܥ ܕܡܶܬܼܩܪܶܐ ܡܫܺܝܚܳܐ܀
27:18 [ai]	ܝܳܕܼܰܥ ܗ̱ܘܳܐ ܓܶܝܪ ܦܿܺܝܠܰܛܳܘܣ܂ ܕܡܶܢ ܚܣܳܡܳܐ ܐܰܫܠܡܽܘܗ̱ܝ܀
27:19 [ai]	ܟܰܕܼ ܺܝܬܼܶܒܼ ܕܶܝܢ ܗܺܓܼܡܽܘܢܳܐ ܥܰܠ ܒܺܝܡ ܕܺܝܠܶܗ܃ ܫܶܠܚܰܬܼ ܠܶܗ ܐܰܢ̱ܬܿܬܼܶܗ܂ ܘܳܐܡܪܳܐ ܠܶܗ܂ ܠܳܐ ܠܳܟܼ ܘܰܠܗܰܘ ܙܰܕܿܺܝܩܳܐ܂ ܣܰܓܿܺܝ ܓܶܝܪ ܚܶܫܶܬܼ ܒܚܶܠܡܝ ܝܰܘܡܳܢܳܐ ܡܶܛܽܠܳܬܼܶܗ܀
27:20 [ai]	ܪ̈ܰܒܰܝ ܟܳܗܢܶܐ̈ ܕܶܝܢ ܘܩܰܫܺܝܫܶܐ̈ ܐܰܦܿܺܝܣܘ ܠܟܼܶܢܫܶܐ̈܃ ܕܢܶܫܶܐܠܽܘܢ܂ ܠܒܼܰܪ ܐܰܒܿܰܐ܂ ܠܝܶܫܽܘܥ ܕܶܝܢ܂ ܕܢܰܘܒܿܕܼܽܘܢ܀
27:21 [ai]	ܘܰܥܢܳܐ ܗܺܓܼܡܽܘܢܳܐ܂ ܘܶܐܡܰܪ ܠܗܽܘܢ܂ ܠܡܰܢ ܨܳܒܼܶܝܢ ܐܢ̱ܬܿܽܘܢ ܕܶܐܫܪܶܐ ܠܟܼܽܘܢ܂ ܡܶܢ ܬܿܪ̈ܰܝܗܽܘܢ܂ ܗܶܢܽܘܢ ܕܶܝܢ ܐܶܡܰܪܘ܃ ܠܒܼܰܪ ܐܰܒܿܰܐ܂
27:22 [ai]	ܐܳܡܰܪ ܠܗܽܘܢ ܦܿܺܝܠܰܛܳܘܣ܂ ܘܰܠܝܶܫܽܘܥ ܕܡܶܬܼܩܪܶܐ ܡܫܺܝܚܳܐ܂ ܡܳܢܳܐ ܐܶܥܒܿܶܕܼ ܠܶܗ܂ ܐܳܡܪܺܝܢ ܟܽܠܗܽܘܢ܂ ܢܶܙܕܿܩܶܦܼ܂
27:23 [ai]	ܐܳܡܰܪ ܠܗܽܘܢ ܗܺܓܼܡܽܘܢܳܐ܂ ܡܳܢܳܐ ܓܶܝܪ ܕܒܺܝܫ ܥܒܼܰܕܼ܂ ܗܶܢܽܘܢ ܕܶܝܢ ܝܰܬܿܺܝܪܳܐܺܝܬܼ ܩܥܰܘ ܘܶܐܡܰܪܘ܂ ܢܶܙܕܿܩܶܦܼ܀
27:24 [ai]	ܦܿܺܝܠܰܛܳܘܣ ܕܶܝܢ܂ ܟܰܕܼ ܚܙܳܐ ܕܿܡܶܕܶܡ ܠܳܐ ܡܰܘܬܿܰܪ܃ ܐܶܠܳܐ ܝܰܬܿܺܝܪܳܐܺܝܬܼ ܪܰܘܒܿܳܐ ܗܳܘܶܐ܃ ܫܩܰܠ ܡܰܝܳܐ̈܂ ܐܰܫܺܝܓܼ ܐܺܝܕܼܰܘܗ̱ܝ̈ ܠܥܺܝܢ ܟܶܢܫܳܐ܂ ܘܶܐܡܰܪ܂ ܡܚܰܣܰܝ ܐ̱ܢܳܐ ܡܶܢ ܕܡܶܗ ܕܗܳܢܳܐ ܙܰܕܿܺܝܩܳܐ܂ ܐܰܢ̱ܬܿܽܘܢ ܬܶܕܿܥܽܘܢ܂
27:25 [ai]	ܘܰܥܢܰܘ ܟܽܠܶܗ ܥܰܡܳܐ܂ ܘܶܐܡܰܪܘ܂ ܕܡܶܗ ܥܠܰܝܢ܂ ܘܥܰܠ ܒܢܰܝܢ܀
27:26 [ai]	ܗܳܝܕܶܝܢ ܫܪܳܐ ܠܗܽܘܢ ܠܒܼܰܪ ܐܰܒܿܰܐ܃ ܘܢܰܓܿܶܕܼ ܒܰܦܼܪ̈ܳܓܼܶܠܶܐ܂ ܠܝܶܫܽܘܥ܂ ܘܰܐܫܠܡܶܗ ܕܢܶܙܕܿܩܶܦܼ܀
27:27 [ai]	ܗܳܝܕܶܝܢ ܐܶܣܛܪ̈ܰܛܺܝܽܘܛܶܐ ܕܗܺܓܼܡܽܘܢܳܐ܃ ܕܰܒܼܪܽܘܗ̱ܝ ܠܝܶܫܽܘܥ ܠܰܦܿܪܶܛܳܘܪܺܝܢ܂ ܘܰܟܼܢܰܫܘ ܥܠܰܘܗ̱ܝ ܠܟܼܽܠܶܗ ܐܶܣܦܿܺܝܪ܂
27:28 [ai]	ܘܰܐܫܠܚܽܘܗ̱ܝ܂ ܘܰܐܠܒܿܫܽܘܗ̱ܝ ܟܼܠܰܡܺܝܣ ܕܰܙܚܽܘܪܺܝܬܼܳܐ܂
27:29 [ai]	ܘܰܓܼܕܼܰܠܘ ܟܠܺܝܠܳܐ ܕܥܰܘܙܢܳܝܶܐ̈܂ ܘܣܳܡܘ ܒܪܺܫܶܗ܂ ܘܩܰܢܝܳܐ ܒܝܰܡܺܝܢܶܗ܂ ܘܰܒܪܰܟܼ ܘܥܰܠ ܒܽܘܪ̈ܟܰܝܗܽܘܢ ܩܕܼܳܡܰܘܗ̱ܝ܂ ܘܰܡܒܼܰܙܚܺܝܢ ܗ̱ܘܰܘ ܒܶܗ܂ ܘܳܐܡܪܺܝܢ܂ ܫܠܳܡ܂ ܡܰܠܟܿܳܐ܃ ܕܺܝܗܽܘܕܼܳܝܶܐ̈܂
27:30 [ai]	ܘܪܰܩܘ ܒܦܰܪܨܽܘܦܿܶܗ܂ ܘܰܫܩܰܠܘ ܩܰܢܝܳܐ܂ ܘܡܳܚܶܝܢ ܗ̱ܘܰܘ ܠܶܗ ܥܰܠ ܪܺܫܶܗ܀
27:31 [ai]	ܘܟܼܰܕܼ ܒܰܙܰܚܘ ܒܶܗ܃ ܐܰܫܠܚܽܘܗ̱ܝ ܟܼܠܰܡܺܝܣ܂ ܘܰܐܠܒܿܫܽܘܗ̱ܝ ܢܰܚܬܰܘܗ̱ܝ̈܂ ܘܰܐܘܒܿܠܽܘܗ̱ܝ ܕܢܶܙܕܿܩܶܦܼ܀
27:32 [ai]	ܘܟܼܰܕܼ ܢܳܦܼܩܺܝܢ܂ ܐܶܫܟܿܰܚܘ ܓܰܒܼܪܳܐ ܩܽܘܪܺܝܢܳܝܳܐ ܕܰܫܡܶܗ ܫܶܡܥܽܘܢ܂ ܠܗܳܢܳܐ ܫܰܚܰܪܘ ܕܢܶܫܩܽܘܠ ܙܩܺܝܦܼܶܗ܀
27:33 [ai]	ܘܶܐܬܼܰܘ ܠܕܼܽܘܟܿܬܼܳܐ ܕܡܶܬܼܩܰܪܝܳܐ܂ ܓܳܓܼܽܘܠܬܳܐ܂ ܗܳܝ܂ ܕܡܶܬܼܦܿܰܫܩܳܐ܂ ܩܰܪܩܰܦܼܬܼܳܐ܀
27:34 [ai]	ܘܝܰܗ̱ܒܼܘ ܠܶܗ ܕܢܶܫܬܿܶܐ ܚܰܠܳܐ܂ ܕܰܚܠܺܝܛ ܒܰܡܪܳܪܬܳܐ܂ ܘܰܛܥܶܡ܂ ܘܠܳܐ ܨܒܼܳܐ ܠܡܶܫܬܳܐ ܿ܀ܿ܀ܿ
27:35 [ai]	ܘܟܼܰܕܼ ܙܰܩܦܿܽܘܗ̱ܝ܃ ܦܰܠܶܓܼܘ ܢܰܚܬܰܘܗ̱ܝ̈ ܒܦܶܣܳܐ܂
27:36 [ai]	ܘܝܳܬܼܒܺܝܢ ܗ̱ܘܰܘ܂ ܘܢܳܛܪܺܝܢ ܠܶܗ ܬܰܡܳܢ܀
27:37 [ai]	ܘܣܳܡܘ ܠܥܶܠ ܡܶܢ ܪܺܫܶܗ ܥܶܠܬܼܳܐ ܕܡܰܘܬܿܶܗ܂ ܒܰܟܼܬܼܳܒܼܳܐ܂ ܗܳܢܰܘ ܝܶܫܽܘܥ܂ ܡܰܠܟܿܳܐ ܕܺܝܗܽܘܕܼܳܝܶܐ̈܀
27:38 [ai]	ܘܶܐܙܕܿܩܶܦܼܘ ܥܰܡܶܗ܂ ܬܿܪ̈ܶܝܢ ܠܶܣܛܳܝܶܐ̈܂ ܚܰܕܼ ܡܶܢ ܝܰܡܺܝܢܶܗ܂ ܘܚܰܕܼ ܡܶܢ ܣܶܡܳܠܶܗ܀
27:39 [ai]	ܐܰܝܠܶܝܢ ܕܶܝܢ ܕܥܳܒܼܪܺܝܢ ܗ̱ܘܰܘ܃ ܡܓܼܰܕܿܦܼܺܝܢ ܗ̱ܘܰܘ ܥܠܰܘܗ̱ܝ܂ ܘܰܡܢܺܝܕܼܺܝܢ ܪ̈ܺܫܰܝܗܽܘܢ܂
27:40 [ai]	ܘܳܐܡܪܺܝܢ܂ ܣܳܬܼܰܪ ܗܰܝܟܠܳܐ܂ ܘܒܼܳܢܶܐ ܠܶܗ ܠܰܬܼܠܳܬܼܳܐ ܝܰܘܡܺܝܢ̈܃ ܦܰܨܳܐ ܢܰܦܼܫܳܟܼ܂ ܐܶܢ ܒܪܶܗ ܐܰܢ̱ܬܿ ܕܰܐܠܳܗܳܐ܂ ܘܚܽܘܬܼ ܡܶܢ ܙܩܺܝܦܼܳܐ܀
27:41 [ai]	ܗܳܟܼܘܳܬܼ ܐܳܦܼ ܪ̈ܰܒܰܝ ܟܳܗܢܶܐ̈܂ ܡܒܼܰܙܚܺܝܢ ܗ̱ܘܰܘ܂ ܥܰܡ ܣܳܦܼܪ̈ܶܐ ܘܩܰܫܺܝܫܶܐ̈܂ ܘܰܦܼܪ̈ܺܝܫܶܐ܂
27:42 [ai]	ܘܳܐܡܪܺܝܢ܂ ܠܰܐ̱ܚܪ̈ܳܢܶܐ ܐܰܚܺܝ܃ ܢܰܦܼܫܶܗ܃ ܠܳܐ ܡܶܫܟܿܰܚ ܠܡܰܚܳܝܽܘ܃ ܐܶܢ ܡܰܠܟܿܶܗ ܗ̱ܽܘ ܕܺܐܝܣܪܳܝܶܠ܃ ܢܶܚܽܘܬܼ ܗܳܫܳܐ ܡܶܢ ܙܩܺܝܦܼܳܐ܂ ܘܰܢܗܰܝܡܶܢ ܒܶܗ܂
27:43 [ai]	ܬܟܼܺܝܠ ܥܰܠ ܐܰܠܳܗܳܐ܂ ܢܶܦܼܪܩܺܝܘܗ̱ܝ ܗܳܫܳܐ ܐܶܢ ܨܳܒܼܶܐ ܒܶܗ܂ ܐܳܡܰܪ ܓܶܝܪ܂ ܕܰܒܼܪܶܗ ܐ̱ܢܳܐ ܕܰܐܠܳܗܳܐ܀
27:44 [ai]	ܗܳܟܼܘܳܬܼ ܐܳܦܼ ܓܰܝܳܣܶܐ̈ ܗܳܢܽܘܢ ܕܶܐܙܕܿܩܶܦܼܘ ܥܰܡܶܗ܂ ܡܚܰܣܕܼܺܝܢ ܗ̱ܘܰܘ ܠܶܗ܀
27:45 [ai]	ܡܶܢ ܫܶܬܼ ܫܳܥܺܝܢ̈ ܕܶܝܢ܂ ܗܘܳܐ ܚܶܫܽܘܟܼܳܐ܂ ܥܰܠ ܟܽܠܳܗ ܐܰܪܥܳܐ܃ ܥܕܼܰܡܳܐ ܠܫܳܥܶܐ̈ ܬܫܰܥ܂
27:46 [ai]	ܘܠܰܐܦܿܰܝ̈ ܬܫܰܥ ܫܳܥܺܝܢ̈܃ ܩܥܳܐ ܝܶܫܽܘܥ܂ ܒܩܳܠܳܐ ܪܳܡܳܐ܂ ܘܶܐܡܰܪ܂ ܐܺܝܠ܂ ܐܺܝܠ܂ ܠܡܳܢܳܐ ܫܒܼܰܩܬܿܳܢܝ܂
27:47 [ai]	ܐ̱ܢܳܫܺܝܢ̈ ܕܶܝܢ܂ ܡܶܢ ܗܳܢܽܘܢ ܕܩܳܝܡܺܝܢ ܗ̱ܘܰܘ ܬܰܡܳܢ܃ ܟܰܕܼ ܫܡܰܥܘ܂ ܐܳܡܪܺܝܢ ܗ̱ܘܰܘ܂ ܗܳܢܳܐ ܠܺܐܠܺܝܳܐ ܩܪܳܐ܂
27:48 [ai]	ܘܒܼܳܗ ܒܫܳܥܬܼܳܐ܃ ܪܗܶܛ ܚܰܕܼ ܡܶܢܗܽܘܢ܂ ܘܰܫܩܰܠ ܐܶܣܦܼܽܘܓܿܳܐ܂ ܘܰܡܠܳܗ ܚܰܠܳܐ܃ ܘܣܳܡܳܗ ܒܩܰܢܝܳܐ܂ ܘܡܰܫܩܶܐ ܗ̱ܘܳܐ ܠܶܗ܂
27:49 [ai]	ܫܰܪܟܿܳܐ ܕܶܝܢ܂ ܐܳܡܪܺܝܢ ܗ̱ܘܰܘ܂ ܫܒܼܽܘܩܘ܂ ܢܶܚܙܶܐ ܐܶܢ ܐܳܬܼܶܐ ܐܺܠܺܝܳܐ܂ ܠܡܶܦܼܪܩܶܗ܀
27:50 [ai]	ܗܽܘ ܕܶܝܢ ܝܶܫܽܘܥ ܬܽܘܒܼ ܩܥܳܐ܂ ܒܩܳܠܳܐ ܪܳܡܳܐ܂ ܘܰܫܒܼܰܩ ܪܽܘܚܶܗ܀
27:51 [ai]	ܘܡܶܚܕܼܳܐ܂ ܐܰܦܿܰܝ̈ ܬܰܪܥܳܐ ܕܗܰܝܟܠܳܐ܂ ܐܶܨܛܪ̈ܺܝ ܠܰܬܼܪܶܝܢ܂ ܡܶܢ ܠܥܶܠ܂ ܥܕܼܰܡܳܐ ܠܬܼܰܚܬܿ܂ ܘܰܐܪܥܳܐ܂ ܐܶܬܿܬܿܙܺܝܥܰܬܼ܂ ܘܟܼܺܐܦܼܶܐ̈܂ ܐܶܨܛܰܪ̈ܺܝ܂
27:52 [ai]	ܘܒܼܶܝܬܼ ܩܒܼܽܘܪ̈ܶܐ܂ ܐܶܬܼܦܰܬܿܰܚܘ܂ ܘܦܼܰܓܼܪ̈ܶܐ ܣܰܓܿܺܝܶܐܐ̈ ܕܩܰܕܿܺܝܫܶܐ̈ ܕܰܫܟܼܺܝܒܼܺܝܢ ܗ̱ܘܰܘ܂ ܩܳܡܘ܂
27:53 [ai]	ܘܰܢܦܼܰܩܘ܂ ܘܒܼܳܬܼܰܪ ܩܝܳܡܬܿܶܗ ܥܰܠܘ ܠܰܡܕܼܺܝܢ̱ܬܳܐ ܩܰܕܿܺܝܫܬܳܐ܂ ܘܶܐܬܼܚܙܺܝܘ ܠܣܰܓܿܺܝܶܐܐ̈܀
27:54 [ai]	ܩܶܢܛܪܽܘܢܳܐ ܕܶܝܢ ܘܰܕܼܥܰܡܶܗ܂ ܕܢܳܛܪܺܝܢ ܗ̱ܘܰܘ ܠܝܶܫܽܘܥ܃ ܟܰܕܼ ܚܙܰܘ ܙܰܘܥܳܐ܂ ܘܰܐܝܠܶܝܢ ܕܰܗܘܰܝ̈܃ ܕܚܶܠܘ܂ ܛܳܒܼ܂ ܘܶܐܡܰܪܘ܂ ܫܰܪܺܝܪܳܐܺܝܬܼ ܗܳܢܳܐ܂ ܒܪܶܗ ܗ̱ܘܳܐ ܕܰܐܠܳܗܳܐ܀
27:55 [ai]	ܐܺܝܬܼ ܗ̱ܘܰܝ̈ ܕܶܝܢ ܐܳܦܼ ܬܰܡܳܢ܃ ܢܶܫܶܐ̈ ܣܰܓܿܺܝܳܐܬܼܳܐ̈܂ ܕܚܳܙܝܳܢ̈ ܗ̱ܘܰܝ̈ ܡܶܢ ܪܽܘܚܩܳܐ܂ ܗܳܢܶܝܢ ܕܶܐܬܼܰܝ̈ ܗ̱ܘܰܝ̈ ܒܳܬܼܪܶܗ ܕܝܶܫܽܘܥ܂ ܡܶܢ ܓܠܺܝܠܳܐ܂ ܘܰܡܫܰܡܫܳܢ̈ ܗ̱ܘܰܝ̈ ܠܶܗ܂
27:56 [ai]	ܕܰܚܕܼܳܐ ܡܶܢܗܶܝܢ܂ ܡܰܪܝܰܡ ܡܰܓܼܕܿܠܳܝܬܳܐ܂ ܘܡܰܪܝܰܡ ܐܶܡܶܗ ܕܝܥܰܩܽܘܒܼ ܘܰܕܼܝܳܘܣܺܐ܃ ܘܶܐܡܗܽܘܢ ܕܿܰܒܼܢܰܝ ܙܰܒܼܕܼܰܝ܀
27:57 [ai]	ܟܰܕܼ ܗܘܳܐ ܕܶܝܢ ܪܰܡܫܳܐ܃ ܐܶܬܼܳܐ ܓܰܒܼܪܳܐ ܥܰܬܿܺܝܪܳܐ ܡܶܢ ܪܳܡܬܼܳܐ܂ ܕܰܫܡܶܗ ܝܰܘܣܶܦܼ܂ ܕܳܐܦܼ ܗܽܘ ܐܶܬܿܬܿܰܠܡܰܕܼ ܗ̱ܘܳܐ ܠܝܶܫܽܘܥ܂
27:58 [ai]	ܗܳܢܳܐ ܩܪܶܒܼ ܠܘܳܬܼ ܦܿܺܝܠܰܛܳܘܣ܃ ܘܰܫܐܶܠ ܦܰܓܼܪܶܗ ܕܝܶܫܽܘܥ܂ ܘܰܦܼܩܰܕܼ ܦܿܺܝܠܰܛܳܘܣ܂ ܕܢܶܬܼܺܝܗܶܒܼ ܠܶܗ ܦܰܓܼܪܳܐ܀
27:59 [ai]	ܘܫܰܩܠܶܗ ܝܰܘܣܶܦܼ ܠܦܼܰܓܼܪܳܐ܃ ܘܟܼܰܪܟܼܶܗ ܒܰܚܝܳܨܳܐ ܕܟܶܬܿܳܢܳܐ ܢܰܩܕܿܳܐ܃
27:60 [ai]	ܘܣܳܡܶܗ ܒܒܼܶܝܬܼ ܩܒܼܽܘܪܳܐ ܚܰܕܼ̱ܬܼܳܐ ܕܺܝܠܶܗ܂ ܕܰܢܩܺܝܪ ܒܟܺܐܦܼܳܐ܂ ܘܥܰܓܿܶܠ ܘܟܺܐܦܼܳܐ ܪܰܒܿܬܼܳܐ܃ ܐܰܪܡܺܝܘ ܥܰܠ ܬܰܪܥܳܐ ܕܒܶܝܬܼ ܩܒܼܽܘܪܳܐ܂ ܘܶܐܙܰܠܘ܀
27:61 [ai]	ܐܺܝܬܼ ܗ̱ܘܰܝ̈ ܕܶܝܢ ܬܰܡܳܢ ܡܰܪܝܰܡ ܡܰܓܼܕܿܠܳܝܬܳܐ܂ ܘܡܰܪܝܰܡ ܐ̱ܚܪܺܬܼܳܐ܂ ܕܝܳܬܼܒܿܳܢ̈ ܗ̱ܘܰܝ̈ ܠܩܽܘܒܼܠܶܗ ܕܩܰܒܼܪܳܐ܀
27:62 [ai]	ܠܝܰܘܡܳܐ ܕܶܝܢ ܕܰܡܚܳܪ܂ ܕܺܐܝܬܼܰܘܗ̱ܝ ܒܳܬܼܰܪ ܥܪܽܘܒܼܬܳܐ܃ ܐܶܬܼܟܿܰܢܰܫܘ ܪ̈ܰܒܰܝ ܟܳܗܢܶܐ̈ ܘܰܦܼܪ̈ܺܝܫܶܐ܂ ܠܘܳܬܼ ܦܿܺܝܠܰܛܳܘܣ܂
27:63 [ai]	ܘܳܐܡܪܺܝܢ ܠܶܗ܂ ܡܳܪܰܢ܂ ܐܶܬܿܕܿܟܼܰܪܢ܃ ܕܗܰܘ ܡܰܛܥܝܳܢܳܐ ܐܶܡܰܪ ܗ̱ܘܳܐ ܟܰܕܼ ܚܰܝ܃ ܕܡܶܢ ܒܳܬܼܰܪ ܬܠܳܬܼܳܐ ܝܰܘܡܺܝܢ̈ ܩܳܐܶܡ ܐ̱ܢܳܐ܂
27:64 [ai]	ܦܩܽܘܕܼ ܗܳܟܼܺܝܠ ܡܶܙܕܿܰܗܪܺܝܢ ܒܩܰܒܼܪܳܐ܂ ܥܕܼܰܡܳܐ ܠܰܬܼܠܳܬܼܳܐ ܝܰܘܡܺܝܢ̈܂ ܕܰܠܡܳܐ ܢܺܐܬܼܽܘܢ ܬܰܠܡܺܝܕܼܰܘܗ̱ܝ̈ ܢܶܓܼܢܒܼܽܘܢܳܝܗ̱ܝ ܒܠܺܠܝܳܐ܃ ܘܢܺܐܡܪܽܘܢ ܠܥܰܡܳܐ܂ ܕܡܶܢ ܒܶܝܬܼ ܡܺܝܬܼܶܐ̈ ܩܳܡ܃ ܘܬܼܶܗܘܶܐ ܛܽܘܥܝܰܝ ܐ̱ܚܪܳܝܬܳܐ ܒܺܝܫܳܐ ܡܶܢ ܩܰܕܼܡܳܝܬܳܐ܂
27:65 [ai]	ܐܳܡܰܪ ܠܗܽܘܢ ܦܿܺܝܠܰܛܳܘܣ܂ ܐܺܝܬܼ ܠܟܼܽܘܢ ܩܶܣܛܽܘܢܳܪ̈ܶܐ܂ ܙܶܠܘ ܐܶܙܕܿܰܗ̱ܪܘ܂ ܐܰܝܟܿܰܢܳܐ ܕܝܳܕܼܥܺܝܢ ܐܢ̱ܬܿܽܘܢ܂
27:66 [ai]	ܗܶܢܽܘܢ ܕܶܝܢ ܐܶܙܰܠܘ܂ ܐܶܙܕܿܗܰܪܘ ܒܩܰܒܼܪܳܐ܃ ܘܰܚܬܼܰܡܘ ܟܺܐܦܼܳܐ ܗܳܝ ܥܰܡ ܩܶܣܛܽܘܢܳܪ̈ܶܐ܀

next chapter