← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


02:01 [ai]ܘܥܰܠ ܬܽܘܒܼ ܝܶܫܽܘܥ ܠܰܟܼܦܼܰܪܢܰܚܽܘܡ܂ ܠܝܰܘܡܳܬܼܳܐ̈܂ ܘܟܼܰܕܼ ܫܡܰܥܘ ܕܰܒܼܒܼܰܝܬܳܐ ܗܽܘ܃
02:02 [ai]ܐܶܬܼܟܿܰܢܰܫܘ ܣܰܓܿܺܝܶܐܐ̈܃ ܐܰܝܟܿܰܢܳܐ ܕܠܳܐ ܐܶܫܟܿܰܚ ܐܳܚܶܕܼ ܐܶܢܽܘܢ܂ ܐܳܦܼܠܳܐ ܩܕܼܳܡ ܬܰܪܥܳܐ܂ ܘܰܡܡܰܠܶܠ ܗ̱ܘܳܐ ܥܰܡܗܽܘܢ ܡܶܠܬܼܳܐ܀
02:03 [ai]ܘܶܐܬܼܰܘ ܠܘܳܬܼܶܗ܃ ܘܰܐܝܬܿܺܝܘ ܠܶܗ ܡܫܰܪܝܳܐ܂ ܟܰܕܼ ܫܩܺܝܠܺܝܢ ܠܶܗ ܒܶܝܬܼ ܐܰܪܒܥܳܐ܂
02:04 [ai]ܘܰܕܼܠܳܐ ܐܶܫܟܿܰܚܘ ܠܡܶܬܼܩܰܪܳܒܼܽܘ ܠܘܳܬܼܶܗ ܡܶܛܽܠ ܟܶܢܫܳܐ܃ ܣܠܶܩܘ ܠܗܽܘܢ ܠܶܐܓܿܳܪܳܐ܂ ܘܰܐܪܺܝܡܘ ܬܰܛܠܺܝܠܳܐ ܕܰܐܬܼܰܪ ܕܺܐܝܬܼܰܘܗ̱ܝ ܗ̱ܘܳܐ ܝܶܫܽܘܥ܃ ܘܫܰܒܿܽܘܗ ܥܰܪܣܳܐ ܕܰܪܡܶܐ ܗ̱ܘܳܐ ܒܿܳܗ ܡܫܰܪܝܳܐ܀
02:05 [ai]ܟܰܕܼ ܚܙܳܐ ܕܶܝܢ ܝܶܫܽܘܥ ܗܰܝܡܳܢܽܘܬܼܗܽܘܢ܂ ܐܶܡܰܪ ܠܗܰܘ ܡܫܰܪܝܳܐ܂ ܒܶܪܝ܂ ܫܒܼܺܝܩܺܝܢ ܠܳܟܼ ܚܛܳܗܰܝܟܿ̈܂
02:06 [ai]ܐܺܝܬܼ ܗ̱ܘܰܘ ܕܶܝܢ ܬܰܡܳܢ ܡܶܢ ܣܳܦܼܪ̈ܶܐ ܘܰܦܼܪ̈ܺܝܫܶܐ ܕܿܝܳܬܼܒܺܝܢ܂ ܘܡܶܬܼܪܰܥܶܝܢ ܗ̱ܘܰܘ ܒܿܠܶܒܗܽܘܢ܂
02:07 [ai]ܕܡܳܢܳܐ ܗܳܢܳܐ ܡܡܰܠܶܠ ܓܽܘܕܿܳܦܼܳܐ܂ ܡܰܢܽܘ ܡܶܫܟܿܰܚ ܠܡܶܫܒܿܰܩ ܚܛܳܗܶܐ̈܃ ܐܶܠܳܐ ܐܶܢ ܚܰܕܼ ܐܰܠܳܗܳܐ܂
02:08 [ai]ܝܶܫܽܘܥ ܕܶܝܢ ܺܝܕܼܰܥ ܒܪܽܘܚܶܗ܂ ܕܗܳܠܶܝܢ ܡܶܬܼܪܰܥܶܝܢ ܒܢܰܦܼܫܗܽܘܢ܂ ܘܶܐܡܰܪ ܠܗܽܘܢ܂ ܡܳܢܳܐ ܡܶܬܼܪܰܥܶܝܢ ܐܢ̱ܬܿܽܘܢ ܗܳܠܶܝܢ ܒܿܠܶܒܟܽܘܢ܂
02:09 [ai]ܐܰܝܕܼܳܐ ܦܫܺܝܩܳܐ ܠܡܺܐܡܰܪ ܠܰܡܫܰܪܝܳܐ܂ ܕܰܫܒܼܺܝܩܺܝܢ ܠܳܟܼ ܚܛܳܗܰܝܟܿ̈܃ ܐܰܘ ܠܡܺܐܡܰܪ܂ ܕܩܽܘܡ ܫܩܽܘܠ ܥܰܪܣܳܟܼ܂ ܘܗܰܠܶܟܼ܂
02:10 [ai]ܕܬܶܕܿܥܽܘܢ ܕܶܝܢ ܕܫܰܠܺܝܛ ܗ̱ܽܘ ܒܪܶܗ ܕܐ̱ܢܳܫܳܐ ܒܰܐܪܥܳܐ ܠܡܶܫܒܿܰܩ ܚܛܳܗܶܐ̈܂ ܐܶܡܰܪ ܠܰܡܫܰܪܝܳܐ܂
02:11 [ai]ܠܳܟܼ ܐܳܡܰܪ ܐ̱ܢܳܐ܂ ܩܽܘܡ܂ ܫܩܽܘܠ ܥܰܪܣܳܟܼ܂ ܘܙܶܠ ܠܒܼܰܝܬܿܳܟܼ܂
02:12 [ai]ܘܩܳܡ ܒܰܪ ܫܳܥܬܼܶܗ܂ ܘܰܫܩܰܠ ܥܰܪܣܶܗ܂ ܘܰܢܦܼܰܩ ܠܥܺܝܢ ܟܽܠܗܽܘܢ܂ ܐܰܝܟܿܰܢܳܐ ܕܿܢܶܬܿܕܰܡܪܽܘܢ ܟܽܠܗܽܘܢ܂ ܘܰܢܫܰܒܿܚܽܘܢ ܠܰܐܠܳܗܳܐ܂ ܟܰܕܼ ܐܳܡܪܺܝܢ܂ ܕܠܳܐ ܡܶܡܬܼܽܘܡ ܚܙܰܝܢ ܗܳܟܼܰܢܳܐ ܿ܀ܿ܀ܿ
02:13 [ai]ܘܰܢܦܼܰܩ ܬܽܘܒܼ ܠܘܳܬܼ ܝܰܡܳܐ܂ ܘܟܼܽܠܶܗ ܟܶܢܫܳܐ ܐܳܬܼܶܝܢ ܗ̱ܘܰܘ ܠܘܳܬܼܶܗ܃ ܘܡܰܠܶܦܼ ܗ̱ܘܳܐ ܠܗܽܘܢ܀
02:14 [ai]ܘܟܼܰܕܼ ܥܳܒܼܰܪ܃ ܚܙܳܐ ܠܠܶܘܺܝ ܒܰܪ ܚܰܠܦܼܰܝ܂ ܕܝܳܬܼܶܒܼ ܒܶܝܬܼ ܡܳܟܼܣܶܐ̈܂ ܘܶܐܡܰܪ ܠܶܗ܂ ܬܳܐ ܒܳܬܼܰܪܝ܂ ܘܩܳܡ ܐܶܙܰܠ ܒܳܬܼܪܶܗ܀
02:15 [ai]ܘܰܗܘܳܐ ܕܟܰܕܼ ܣܡܺܝܟܼ ܒܒܼܰܝܬܿܶܗ܃ ܣܰܓܿܺܝܶܐܐ̈ ܡܳܟܼܣܶܐ̈ ܘܚܰܛܳܝܶܐ̈ ܣܡܺܝܟܼܺܝܢ ܗܘܰܘ ܥܰܡ ܝܶܫܽܘܥ ܘܥܰܡ ܬܰܠܡܺܝܕܼܰܘܗ̱ܝ̈܂ ܐܺܝܬܼܰܝܗܽܘܢ ܗ̱ܘܰܘ ܓܶܝܪ ܣܰܓܿܺܝܶܐܐ̈܂ ܘܶܐܬܼܰܘ ܒܳܬܼܪܶܗ܂
02:16 [ai]ܘܣܳܦܼܪ̈ܶܐ ܘܰܦܼܪ̈ܺܝܫܶܐ܂ ܟܰܕܼ ܚܙܰܐܘܽܗ̱ܝ ܕܠܳܥܶܣ ܥܰܡ ܡܳܟܼܣܶܐ̈ ܘܥܰܡ ܚܰܛܳܝܶܐ̈܃ ܐܶܡܰܪܘ ܠܬܼܰܠܡܺܝܕܼܰܘܗ̱ܝ̈܂ ܡܳܢܰܘ ܥܰܡ ܡܳܟܼܣܶܐ̈ ܘܚܰܛܳܝܶܐ̈ ܐܳܟܼܶܠ ܘܫܳܬܼܶܐ܀
02:17 [ai]ܟܰܕܼ ܫܡܰܥ ܕܶܝܢ ܝܶܫܽܘܥ܂ ܐܶܡܰܪ ܠܗܽܘܢ܂ ܠܳܐ ܣܢܺܝܩܺܝܢ ܚܠܺܝܡܶܐ̈ ܥܰܠ ܐܳܣܝܳܐ܂ ܐܶܠܳܐ ܐܰܝܠܶܝܢ ܕܒܺܝܫ ܒܺܝܫ ܥܒܼܺܝܕܼܺܝܢ܂ ܠܳܐ ܐܶܬܼܺܝܬܼ ܕܶܐܩܪܶܐ ܠܙܰܕܿܺܝܩܶܐ̈܂ ܐܶܠܳܐ ܠܚܰܛܳܝܶܐ̈܂
02:18 [ai]ܬܰܠܡܺܝܕܼܰܘܗ̱ܝ̈ ܕܶܝܢ ܕܝܽܘܚܰܢܳܢ ܘܰܦܼܪ̈ܺܝܫܶܐ܂ ܨܳܝܡܺܝܢ ܗ̱ܘܰܘ܂ ܘܶܐܬܼܰܘ ܘܳܐܡܪܺܝܢ ܠܶܗ܂ ܠܡܳܢܳܐ ܬܰܠܡܺܝܕܼܰܘܗ̱ܝ̈ ܕܝܽܘܚܰܢܳܢ ܘܕܼܰܦܼܪ̈ܺܝܫܶܐ ܨܳܝܡܺܝܢ܃ ܘܬܼܰܠܡܺܝܕܼܰܝܟܿ̈ ܕܺܝܠܳܟܼ ܠܳܐ ܨܳܝܡܺܝܢ܂
02:19 [ai]ܐܳܡܰܪ ܠܗܽܘܢ ܝܶܫܽܘܥ܂ ܠܡܳܐ ܡܶܫܟܿܚܺܝܢ ܒܢܰܘܗ̱ܝ ܕܰܓܼܢܽܘܢܳܐ܃ ܟܡܳܐ ܕܚܰܬܼܢܳܐ ܥܰܡܗܽܘܢ ܗ̱ܽܘ ܕܰܢܨܽܘܡܽܘܢ܃ ܠܳܐ܂
02:20 [ai]ܢܺܐܬܼܽܘܢ ܕܶܝܢ ܝܰܘܡܳܬܼܳܐ̈܂ ܕܡܳܐ ܕܶܐܫܬܿܩܶܠ ܡܶܢܗܽܘܢ ܚܰܬܼܢܳܐ܃ ܗܳܝܕܶܝܢ ܢܨܽܘܡܽܘܢ ܒܗܰܘ ܝܰܘܡܳܐ܂
02:21 [ai]ܠܳܐ ܐ̱ܢܳܫ ܪܳܡܶܐ ܐܽܘܪܩܰܥܬܼܳܐ ܚܕܼܰܬܼܳܐ܂ ܘܚܳܐܶܛ ܥܰܠ ܡܳܐܢܳܐ ܒܠܳܝܳܐ܂ ܕܠܳܐ ܢܳܣܒܿܳܐ ܡܰܠܝܽܘܬܼܳܗ ܗܳܝ ܚܕܼܰܬܼܳܐ ܡܶܢ ܒܠܳܝܳܐ܃ ܘܗܳܘܶܐ ܣܶܕܼܩܳܐ ܝܰܬܿܺܝܪܳܐ܂
02:22 [ai]ܘܠܳܐ ܐ̱ܢܳܫ ܪܳܡܶܐ ܚܰܡܪܳܐ ܚܰܕܼ̱ܬܼܳܐ ܒܙܶܩܶܐ̈ ܒܠܳܝܳܬܼܳܐ̈܂ ܕܠܳܐ ܚܰܡܪܳܐ ܡܨܰܪܶܐ ܠܙܶܩܶܐ̈܃ ܘܙܶܩܶܐ̈ ܐܳܒܼܕܳܢ̈܂ ܘܚܰܡܪܳܐ ܡܶܬܼܶܐܫܶܕܼ܂ ܐܶܠܳܐ ܪܳܡܶܝܢ ܚܰܡܪܳܐ ܚܰܕܼ̱ܬܼܳܐ ܒܙܶܩܶܐ̈ ܚܰܕܼ̱ܬܿܳܬܼܳܐ̈܀
02:23 [ai]ܘܰܗܘܳܐ ܕܟܰܕܼ ܐܳܙܶܠ ܝܶܫܽܘܥ ܒܫܰܒܿܬܼܳܐ܂ ܒܶܝܬܼ ܙܰܪ̈ܥܶܐ܃ ܬܰܠܡܺܝܕܼܰܘܗ̱ܝ̈ ܡܗܰܠܟܼܺܝܢ ܗ̱ܘܰܘ܂ ܘܡܳܠܓܿܺܝܢ ܫܶܒܿܠܶܐ̈܂
02:24 [ai]ܘܳܐܡܪܺܝܢ ܠܶܗ ܦܿܪ̈ܺܝܫܶܐ܂ ܚܙܺܝ ܡܳܢܳܐ ܥܳܒܼܕܺܝܢ ܒܫܰܒܿܬܼܳܐ܂ ܡܶܕܶܡ ܕܠܳܐ ܫܰܠܺܝܛ܂
02:25 [ai]ܐܳܡܰܪ ܠܗܽܘܢ ܝܶܫܽܘܥ܂ ܠܳܐ ܡܶܡܬܼܽܘܡ ܩܪܰܝܬܿܽܘܢ܂ ܡܳܢܳܐ ܥܒܼܰܕܼ ܕܿܰܘܺܝܕܼ܃ ܟܰܕܼ ܐܶܣܬܿܢܶܩ ܘܰܟܼܦܼܶܢ܂ ܗܽܘ ܘܰܕܼܥܰܡܶܗ܃
02:26 [ai]ܐܰܝܟܿܰܢܳܐ ܥܰܠ ܠܒܼܰܝܬܿܶܗ ܕܰܐܠܳܗܳܐ܃ ܟܰܕܼ ܐܰܒܼܺܝܬܼܳܪ ܪܰܒܿ ܟܳܗܢܶܐ̈܃ ܘܠܰܚܡܳܐ ܕܦܳܬܼܽܘܪܶܗ ܕܡܳܪܝܳܐ ܐܶܟܼܰܠ܃ ܗܰܘ ܕܠܳܐ ܫܰܠܺܝܛ ܠܡܶܐܟܼܰܠ܂ ܐܶܠܳܐ ܐܶܢ ܠܟܼܳܗܢܶܐ̈܂ ܘܝܰܗ̱ܒܼ ܐܳܦܼ ܠܰܐܝܠܶܝܢ ܕܥܰܡܶܗ ܗ̱ܘܰܘ܂
02:27 [ai]ܘܶܐܡܰܪ ܠܗܽܘܢ܂ ܕܫܰܒܿܬܼܳܐ ܡܶܛܽܠ ܒܰܪܢܳܫܳܐ ܐܶܬܼܒܰܪܝܰܬܼ܃ ܘܠܳܐ ܗ̱ܘܳܐ ܒܰܪܢܳܫܳܐ ܡܶܛܽܠ ܫܰܒܿܬܼܳܐ܂
02:28 [ai]ܡܳܪܶܗ ܗ̱ܽܘ ܗܳܟܼܺܝܠ ܘܳܐܦܼ ܕܫܰܒܿܬܼܳܐ܂ ܒܪܶܗ ܕܐ̱ܢܳܫܳܐ܀

next chapter