← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


03:01 [ai]ܘܥܰܠ ܬܽܘܒܼ ܝܶܫܽܘܥ ܠܰܟܼܢܽܘܫܬܳܐ܂ ܘܺܐܝܬܼ ܗ̱ܘܳܐ ܬܰܡܳܢ܂ ܓܰܒܼܪܳܐ ܚܰܕܼ ܕܿܝܰܒܺܝܫܳܐ ܐܺܝܕܼܶܗ܂
03:02 [ai]ܘܢܳܛܪܺܝܢ ܗ̱ܘܰܘ ܠܶܗ ܕܶܐܢ ܡܰܐܣܶܐ ܠܶܗ ܒܫܰܒܿܬܼܳܐ܂ ܢܩܰܛܪܓܼܽܘܢܳܝܗ̱ܝ܂
03:03 [ai]ܘܶܐܡܰܪ ܠܗܰܘ ܓܰܒܼܪܳܐ ܕܿܝܰܒܺܝܫܳܐ ܐܺܝܕܼܶܗ܂ ܩܽܘܡ ܒܰܡܨܰܥܬܼܳܐ܂
03:04 [ai]ܐܶܡܰܪ ܕܶܝܢ ܐܳܦܼ ܠܗܽܘܢ܂ ܫܰܠܺܝܛ ܒܫܰܒܿܬܼܳܐ܂ ܠܡܶܥܒܿܰܕܼ ܕܛܳܒܼ܂ ܐܰܘ ܕܒܺܝܫ܂ ܢܰܦܼܫܳܐ ܠܡܰܚܳܝܽܘ܃ ܐܰܘ ܠܡܰܘܒܿܳܕܼܽܘ܂ ܗܶܢܽܘܢ ܕܶܝܢ ܫܰܬܿܺܝܩܺܝܢ ܗ̱ܘܰܘ܂
03:05 [ai]ܘܚܳܪ ܒܗܽܘܢ ܒܚܶܡܬܳܐ܂ ܟܰܕܼ ܟܰܪܝܳܐ ܠܶܗ ܥܰܠ ܩܰܫܝܽܘܬܼ ܠܶܒܗܽܘܢ܂ ܘܶܐܡܰܪ ܠܗܰܘ ܓܰܒܼܪܳܐ܂ ܦܫܽܘܛ ܐܺܝܕܼܳܟܼ܂ ܘܰܦܼܫܰܛ܂ ܘܬܼܶܩܢܰܬܼ ܐܺܝܕܼܶܗ܀
03:06 [ai]ܘܰܢܦܼܰܩܘ ܦܿܪ̈ܺܝܫܶܐ ܒܰܪ ܫܳܥܬܼܶܗ܂ ܥܰܡ ܕܒܶܝܬܼ ܗܶܪܳܘܕܼܶܣ܃ ܘܡܶܠܟܿܳܐ ܢܣܰܒܼܘ ܥܠܰܘܗ̱ܝ܂ ܐܰܝܟܿܰܢܳܐ ܕܢܰܘܒܿܕܼܽܘܢܳܝܗ̱ܝ܂
03:07 [ai]ܘܝܶܫܽܘܥ ܥܰܡ ܬܰܠܡܺܝܕܼܰܘܗ̱ܝ̈܂ ܐܶܙܰܠ ܠܶܗ ܠܘܳܬܼ ܝܰܡܳܐ܂ ܘܥܰܡܳܐ ܣܰܓܿܺܝܳܐܐ ܡܶܢ ܓܠܺܝܠܳܐ ܢܰܩܦܿܶܗ ܗ̱ܘܳܐ܂ ܘܡܶܢ ܺܝܗܽܘܕܼ܂
03:08 [ai]ܘܡܶܢ ܐܽܘܪܺܫܠܶܡ܂ ܘܡܶܢ ܐܰܕܼܽܘܡ܂ ܘܡܶܢ ܥܶܒܼܪܳܐ ܕܝܽܘܪܕܿܢܳܢ܂ ܘܡܶܢ ܨܽܘܪ܂ ܘܡܶܢ ܨܰܝܕܳܢ܃ ܟܶܢܫܶܐ̈ ܣܰܓܿܺܝܶܐܐ̈܂ ܕܰܫܡܰܥܘ ܗ̱ܘܰܘ ܟܽܠ ܕܥܳܒܼܶܕܼ܂ ܐܶܬܼܰܘ ܠܘܳܬܼܶܗ܂
03:09 [ai]ܘܶܐܡܰܪ ܠܬܼܰܠܡܺܝܕܼܰܘܗ̱ܝ̈ ܕܰܢܩܰܪܒܼܽܘܢ ܠܶܗ ܣܦܼܺܝܢ̱ܬܳܐ܃ ܡܶܛܽܠ ܟܶܢܫܶܐ̈ ܕܠܳܐ ܢܶܚܒܿܨܽܘܢܳܝܗ̱ܝ܂
03:10 [ai]ܣܰܓܿܺܝܶܐܐ̈ ܓܶܝܪ ܡܰܐܣܶܐ ܗ̱ܘܳܐ܃ ܥܕܼܰܡܳܐ ܕܢܶܗܘܽܘܢ ܢܳܦܼܠܺܝܢ ܥܠܰܘܗ̱ܝ܂ ܡܶܛܽܠ ܕܢܶܬܼܩܰܪܒܼܽܘܢ ܠܶܗ܂
03:11 [ai]ܘܰܐܝܠܶܝܢ ܕܺܐܝܬܼ ܗ̱ܘܰܝ̈ ܠܗܽܘܢ ܡܰܚܘܳܬܼܳܐ̈܂ ܕܿܪ̈ܽܘܚܶܐ ܛܰܢܦܼܳܬܼܳܐ̈܂ ܡܳܐ ܕܰܚܙܰܐܘܽܗ̱ܝ܂ ܢܳܦܼܠܺܝܢ ܗ̱ܘܰܘ ܘܩܳܥܶܝܢ ܘܳܐܡܪܺܝܢ܂ ܐܰܢ̱ܬܿ ܗ̱ܽܘ ܒܪܶܗ ܕܰܐܠܳܗܳܐ܂
03:12 [ai]ܘܣܰܓܿܺܝ ܟܳܐܶܐ ܗ̱ܘܳܐ ܒܗܽܘܢ܂ ܕܠܳܐ ܢܶܓܼܠܽܘܢܳܝܗ̱ܝ܀
03:13 [ai]ܘܰܣܠܶܩ ܠܛܽܘܪܳܐ܂ ܘܰܩܪܳܐ ܠܰܐܝܠܶܝܢ ܕܰܨܒܼܳܐ܃ ܘܶܐܬܼܰܘ ܠܘܳܬܼܶܗ܂
03:14 [ai]ܘܰܓܼܒܼܳܐ ܬܪܶܥܣܰܪ ܕܢܶܗܘܽܘܢ ܥܰܡܶܗ܂ ܘܕܼܰܢܫܰܕܿܰܪ ܐܶܢܽܘܢ ܕܢܰܟܼܪܙܽܘܢ܃
03:15 [ai]ܘܰܕܼܢܶܗܘܽܘܢ ܫܰܠܺܝܛܺܝܢ܂ ܕܢܰܐܣܽܘܢ ܟܿܪ̈ܺܝܗܶܐ܂ ܘܢܰܦܿܩܽܘܢ ܕܰܝܘܶܐ̈܀
03:16 [ai]ܘܫܰܡܺܝ ܠܫܶܡܥܽܘܢ ܫܡܳܐ܂ ܟܺܐܦܼܳܐ܂
03:17 [ai]ܘܰܠܝܰܥܩܽܘܒܼ ܒܰܪ ܙܰܒܼܕܼܰܝ܂ ܘܰܠܝܽܘܚܰܢܳܢ ܐܰܚܽܘܗ̱ܝ ܕܝܰܥܩܽܘܒܼ܃ ܣܳܡ ܠܗܽܘܢ ܫܡܳܐ܂ ܒ̈ܢܰܝ ܪܓܼܶܫܝ܃ ܕܺܐܝܬܼܰܘܗ̱ܝ ܒܢܰܝ ܪܰܥܡܳܐ܂
03:18 [ai]ܘܰܐܢܕܿܪܶܐܘܳܣ ܘܦܼܺܝܠܺܝܦܿܳܘܣ܂ ܘܒܼܰܪ ܬܿܽܘܠܡܰܝ܂ ܘܡܰܬܿܰܝ܂ ܘܬܼܳܐܘܡܰܐ܂ ܘܝܰܥܩܽܘܒܼ ܒܰܪ ܚܰܠܦܼܰܝ܂ ܘܬܼܰܕܿܰܝ܂ ܘܫܶܡܥܽܘܢ ܩܢܳܢܳܝܳܐ܂
03:19 [ai]ܘܺܝܗܽܘܕܼܳܐ ܣܟܼܰܪܝܽܘܛܳܐ܃ ܗܰܘ ܕܰܐܫܠܡܶܗ܀ ܘܶܐܬܼܰܘ ܠܒܼܰܝܬܳܐ܂
03:20 [ai]ܘܶܐܬܼܟܿܰܢܰܫܘ ܟܶܢܫܶܐ̈ ܬܽܘܒܼ܃ ܐܰܝܟܿܰܢܳܐ ܕܠܳܐ ܢܶܫܟܿܚܽܘܢ ܗ̱ܘܰܘ ܠܰܚܡܳܐ ܠܡܶܐܟܼܰܠ܂
03:21 [ai]ܘܰܫܡܰܥܘ ܐ̱ܚܝܳܢܰܘܗ̱ܝ̈܂ ܘܰܢܦܼܰܩܘ ܠܡܶܐܚܕܿܶܗ܂ ܐܳܡܪܺܝܢ ܗ̱ܘܰܘ ܓܶܝܪ܂ ܕܡܶܢ ܗܰܘܢܶܗ ܢܦܼܰܩ܀
03:22 [ai]ܘܣܳܦܼܪ̈ܶܐ ܐܰܝܠܶܝܢ ܕܡܶܢ ܐܽܘܪܺܫܠܶܡ ܢܚܶܬܼܘ܂ ܐܳܡܪܺܝܢ ܗ̱ܘܰܘ܂ ܒܥܶܠܙܒܼܽܘܒܼ ܐܺܝܬܼ ܒܶܗ܂ ܘܰܒܪܺܫܳܐ ܕܕܼܰܝܘܶܐ̈ ܡܰܦܿܶܩ ܕܰܝܘܶܐ̈܀
03:23 [ai]ܘܰܩܪܳܐ ܐܶܢܽܘܢ ܝܶܫܽܘܥ܃ ܘܰܒܡܰܬܼܠܶܐ̈ ܐܶܡܰܪ ܠܗܽܘܢ܂ ܐܰܝܟܿܰܢܳܐ ܡܶܫܟܿܰܚ ܣܳܛܳܢܳܐ ܠܣܳܛܳܢܳܐ ܠܡܰܦܿܳܩܽܘ܂
03:24 [ai]ܐܶܢ ܡܰܠܟܿܽܘܬܼܳܐ ܓܶܝܪ ܥܰܠ ܢܰܦܼܫܳܗ ܬܶܬܼܦܿܰܠܰܓܼ܃ ܠܳܐ ܡܶܫܟܿܚܳܐ ܠܰܡܩܳܡ ܡܰܠܟܿܽܘܬܼܳܐ ܗܳܝ܂
03:25 [ai]ܘܶܐܢ ܒܰܝܬܳܐ ܥܰܠ ܢܰܦܼܫܶܗ ܢܶܬܼܦܿܰܠܰܓܼ܃ ܠܳܐ ܡܶܫܟܿܰܚ ܒܰܝܬܳܐ ܗܰܘ ܠܰܡܩܳܡ܂
03:26 [ai]ܘܶܐܢ ܗܽܘ ܕܣܳܛܳܢܳܐ ܩܳܡ ܥܰܠ ܢܰܦܼܫܶܗ ܘܶܐܬܼܦܿܰܠܰܓܼ܃ ܠܳܐ ܡܶܫܟܿܰܚ ܠܰܡܩܳܡ܂ ܐܶܠܳܐ ܚܰܪܬܼܶܗ ܗ̱ܺܝ܂
03:27 [ai]ܠܳܐ ܐ̱ܢܳܫ ܡܶܫܟܿܰܚ ܕܢܶܥܽܘܠ ܠܒܼܶܝܬܼ ܚܰܣܺܝܢܳܐ܂ ܘܢܶܚܛܽܘܦܼ ܡܳܐܢܰܘܗ̱ܝ̈܃ ܐܶܠܳܐ ܐܶܢ ܠܽܘܩܕܼܰܡ ܠܚܰܣܺܝܢܳܐ ܢܶܐܣܽܘܪ܃ ܘܗܳܝܕܶܝܢ ܒܰܝܬܿܶܗ ܢܶܒܿܽܘܙ܀
03:28 [ai]ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܟܽܠܗܽܘܢ ܚܛܳܗܶܐ̈ ܘܓܼܽܘܕܿܳܦܼܶܐ̈ ܕܰܢܓܼܰܕܿܦܼܽܘܢ ܒܢܰܝܐ̱ܢܳܫܳܐ̈܂ ܢܶܫܬܿܰܒܼܩܽܘܢ ܠܗܽܘܢ܂
03:29 [ai]ܡܰܢ ܕܶܝܢ ܕܰܢܓܼܰܕܿܶܦܼ ܥܰܠ ܪܽܘܚܳܐ ܕܩܽܘܕܼܫܳܐ܃ ܠܰܝܬܿ ܠܶܗ ܫܽܘܒܼܩܳܢܳܐ ܠܥܳܠܰܡ܂ ܐܶܠܳܐ ܡܚܰܝܰܒܼ ܗ̱ܽܘ ܠܕܼܺܝܢܳܐ ܕܰܠܥܳܠܰܡ܂
03:30 [ai]ܡܶܛܽܠ ܕܳܐܡܪܺܝܢ ܗ̱ܘܰܘ܂ ܕܪܽܘܚܳܐ ܛܰܢܦܼܬܼܳܐ ܐܺܝܬܼ ܒܶܗ܀
03:31 [ai]ܘܶܐܬܼܰܘ ܐܶܡܶܗ ܘܰܐܚܰܘܗ̱ܝ̈܂ ܩܳܝܡܺܝܢ ܠܒܼܰܪ܃ ܘܫܰܕܿܰܪܘ ܕܢܶܩܪܽܘܢܳܝܗ̱ܝ ܠܗܽܘܢ܃
03:32 [ai]ܝܳܬܼܶܒܼ ܗ̱ܘܳܐ ܕܶܝܢ ܚܕܼܳܪ̈ܰܘܗ̱ܝ ܟܶܢܫܳܐ܂ ܘܶܐܡܰܪܘ ܠܶܗ܂ ܗܳܐ ܐܶܡܳܟܼ ܘܰܐܚܰܝܟܿ̈ ܠܒܼܰܪ ܒܿܳܥܶܝܢ ܠܳܟܼ܂
03:33 [ai]ܘܰܥܢܳܐ܂ ܘܶܐܡܰܪ ܠܗܽܘܢ܂ ܡܰܢ ܗ̱ܺܝ ܐܶܡܝ܂ ܘܡܰܢ ܐܶܢܽܘܢ ܐܰܚܰܝ̈܂
03:34 [ai]ܘܚܳܪ ܒܰܐܝܠܶܝܢ ܕܿܝܳܬܼܒܺܝܢ ܠܘܳܬܼܶܗ܂ ܘܶܐܡܰܪ܂ ܗܳܐ ܐܶܡܝ܂ ܘܗܳܐ ܐܰܚܰܝ̈܂
03:35 [ai]ܡܰܢ ܕܢܶܥܒܿܶܕܼ ܓܶܝܪ ܨܶܒܼܝܳܢܶܗ ܕܰܐܠܳܗܳܐ܃ ܗܽܘܝܽܘ ܐܳܚܝ܂ ܘܚܳܬܼܝ܂ ܘܶܐܡܝ ܿ܀ܿ܀ܿ

next chapter