The Comprehensive Aramaic Lexicon

04:01 [ai]	ܬܽܘܒܼ ܕܶܝܢ ܫܰܪܺܝ ܗ̱ܘܳܐ ܡܰܠܶܦܼ܂ ܥܰܠ ܝܰܕܼ ܝܰܡܳܐ܂ ܘܶܐܬܼܟܿܰܢܰܫܘ ܠܘܳܬܼܶܗ ܟܶܢܫܶܐ̈ ܣܰܓܿܺܝܶܐܐ̈܃ ܐܰܝܟܼ ܕܢܶܣܰܩ ܢܶܬܶܒܼ ܠܶܗ ܒܰܣܦܼܺܝܢ̱ܬܳܐ ܒܝܰܡܳܐ܂ ܘܟܼܽܠܶܗ ܟܶܢܫܳܐ܂ ܩܳܐܶܡ ܗ̱ܘܳܐ ܥܰܠ ܐܰܪܥܳܐ ܥܰܠ ܝܰܕܼ ܝܰܡܳܐ܂
04:02 [ai]	ܘܡܰܠܶܦܼ ܗ̱ܘܳܐ ܠܗܽܘܢ ܒܡܰܬܼܠܶܐ̈ ܣܰܓܿܺܝ܂ ܘܳܐܡܰܪ ܗ̱ܘܳܐ ܒܝܽܘܠܦܿܳܢܶܗ܂
04:03 [ai]	ܫܡܰܥܘ܂ ܗܳܐ ܢܦܼܰܩ ܙܳܪܽܘܥܳܐ܂ ܠܡܶܙܪܰܥ܂
04:04 [ai]	ܘܟܼܰܕܼ ܙܪܰܥ܃ ܐܺܝܬܼ ܕܰܢܦܼܰܠ ܥܰܠ ܝܰܕܼ ܐܽܘܪܚܳܐ܂ ܘܶܐܬܼܳܬܼ ܦܳܪܰܚܬܼܳܐ܂ ܘܶܐܟܼܰܠܬܼܶܗ܂
04:05 [ai]	ܐ̱ܚܪܺܢܳܐ ܕܶܝܢ ܢܦܼܰܠ ܥܰܠ ܫܽܘܥܳܐ܂ ܐܰܝܟܿܳܐ ܕܠܰܝܬܿ ܐܰܪܥܳܐ ܣܰܓܿܺܝ܂ ܘܒܼܰܪ ܫܳܥܬܼܶܗ܂ ܒܠܰܨ܂ ܡܶܛܽܠ ܕܠܰܝܬܿ ܗ̱ܘܳܐ ܥܽܘܡܩܳܐ ܕܰܐܪܥܳܐ܂
04:06 [ai]	ܟܰܕܼ ܕܢܰܚ ܕܶܝܢ ܫܶܡܫܳܐ܂ ܚܡܳܐ܂ ܘܡܶܛܽܠ ܕܠܰܝܬܿ ܗ̱ܘܳܐ ܠܶܗ ܥܶܩܳܪܳܐ܂ ܺܝܒܼܶܫ܂
04:07 [ai]	ܘܰܐ̱ܚܪܺܢܳܐ ܢܦܼܰܠ ܒܶܝܬܼ ܟܽܘܒܿܶܐ̈܂ ܘܰܣܠܶܩܘ ܟܽܘܒܿܶܐ̈܂ ܘܚܰܢܩܽܘܗ̱ܝ܂ ܘܦܼܺܐܪ̈ܶܐ ܠܳܐ ܝܰܗ̱ܒܼ܂
04:08 [ai]	ܐ̱ܚܪܺܢܳܐ ܕܶܝܢ܂ ܢܦܼܰܠ ܥܰܠ ܐܰܪܥܳܐ ܛܳܒܼܬܼܳܐ܃ ܘܰܣܠܶܩ܂ ܘܰܪܒܼܳܐ܂ ܘܝܰܗ̱ܒܼ ܦܿܺܐܪ̈ܶܐ܂ ܐܺܝܬܼ ܕܰܬܼܠܳܬܼܺܝܢ܂ ܘܺܐܝܬܼ ܕܶܫܬܿܺܝܢ܂ ܘܺܐܝܬܼ ܕܰܡܳܐܐ܂
04:09 [ai]	ܘܶܐܡܰܪ ܗ̱ܘܳܐ܃ ܡܰܢ ܕܺܐܝܬܼ ܠܶܗ ܐܶܕܼܢܶܐ̈ ܕܢܶܫܡܰܥ܂ ܢܶܫܡܰܥ܀
04:10 [ai]	ܟܰܕܼ ܗܘܰܘ ܕܶܝܢ ܒܰܠܚܽܘܕܼܰܝܗܽܘܢ܃ ܫܰܐܠܽܘܗ̱ܝ ܗܶܢܽܘܢ ܕܥܰܡܶܗ ܥܰܡ ܬܿܪ̈ܶܥܣܰܪܬܿܶܗ܂ ܡܰܬܼܠܳܐ ܗܰܘ܂
04:11 [ai]	ܘܶܐܡܰܪ ܠܗܽܘܢ ܝܶܫܽܘܥ܂ ܠܟܼܽܘܢ ܺܝܗܺܝܒܼ ܠܡܶܕܿܰܥ ܐ̱ܪܳܙܳܐ ܕܡܰܠܟܿܽܘܬܼܶܗ ܕܰܐܠܳܗܳܐ܂ ܠܒܼܰܪ̈ܳܝܶܐ ܕܶܝܢ ܟܽܠ ܡܶܕܶܡ܂ ܒܡܰܬܼܠܶܐ̈ ܗܳܘܶܐ܂
04:12 [ai]	ܕܟܰܕܼ ܚܳܙܶܝܢ܂ ܢܶܚܙܽܘܢ܂ ܘܠܳܐ ܢܶܚܙܽܘܢ܂ ܘܟܼܰܕܼ ܫܳܡܥܺܝܢ܂ ܢܶܫܡܥܽܘܢ܂ ܘܠܳܐ ܢܶܣܬܿܰܟܠܽܘܢ܂ ܕܰܠܡܳܐ ܢܶܬܼܦܿܢܽܘܢ܂ ܘܢܶܫܬܿܰܒܼܩܽܘܢ ܠܗܽܘܢ ܚܛܳܗܰܝܗܽܘܢ̈܀
04:13 [ai]	ܘܶܐܡܰܪ ܠܗܽܘܢ܂ ܠܳܐ ܝܳܕܼܥܺܝܢ ܐܢ̱ܬܿܽܘܢ ܠܶܗ ܠܡܰܬܼܠܳܐ ܗܳܢܳܐ܃ ܘܰܐܝܟܿܰܢܳܐ ܟܽܠܗܽܘܢ ܡܰܬܼܠܶܐ̈ ܬܶܕܿܥܽܘܢ܀
04:14 [ai]	ܙܳܪܽܘܥܳܐ ܕܰܙܪܰܥ܂ ܡܶܠܬܼܳܐ ܙܪܰܥ܂
04:15 [ai]	ܗܳܠܶܝܢ ܕܶܝܢ ܕܥܰܠ ܝܰܕܼ ܐܽܘܪܚܳܐ܃ ܗܳܠܶܝܢ ܐܶܢܽܘܢ ܕܡܶܙܕܿܰܪܥܳܐ ܒܗܽܘܢ ܡܶܠܬܼܳܐ܂ ܘܡܳܐ ܕܰܫܡܰܥܘ܃ ܡܶܚܕܼܳܐ ܐܳܬܼܶܐ ܣܳܛܳܢܳܐ܂ ܘܫܳܩܶܠ ܠܳܗ ܠܡܶܠܬܼܳܐ ܕܰܙܪܺܝܥܳܐ ܒܿܠܶܒܗܽܘܢ܂
04:16 [ai]	ܘܗܳܢܽܘܢ ܕܥܰܠ ܫܽܘܥܳܐ ܐܶܙܕܿܪܰܥܘ܃ ܗܳܠܶܝܢ ܐܶܢܽܘܢ ܕܡܳܐ ܕܰܫܡܰܥܘ ܡܶܠܬܼܳܐ܃ ܡܶܚܕܼܳܐ ܒܚܰܕܼܽܘܬܼܳܐ ܡܩܰܒܿܠܺܝܢ ܠܳܗ܂
04:17 [ai]	ܘܠܰܝܬܿ ܠܗܽܘܢ ܥܶܩܳܪܳܐ ܒܢܰܦܼܫܗܽܘܢ܂ ܐܶܠܳܐ ܕܙܰܒܼܢܳܐ ܐܶܢܽܘܢ܂ ܘܡܳܐ ܕܰܗܘܳܐ ܐܽܘܠܨܳܢܳܐ܂ ܐܰܘ ܪܕܼܽܘܦܼܝܳܐ ܡܶܛܽܠ ܡܶܠܬܼܳܐ܃ ܥܓܼܰܠ ܡܶܬܼܟܿܰܫܠܺܝܢ܂
04:18 [ai]	ܘܗܳܢܽܘܢ ܕܒܶܝܬܼ ܟܽܘܒܿܶܐ̈ ܡܶܙܕܿܰܪܥܺܝܢ܃ ܗܳܠܶܝܢ ܐܶܢܽܘܢ ܗܳܢܽܘܢ ܕܰܫܡܰܥܘ ܡܶܠܬܼܳܐ܃
04:19 [ai]	ܘܪܶܢܝܳܐ ܕܥܳܠܡܳܐ ܗܳܢܳܐ܂ ܘܛܽܘܥܝܰܝ ܕܥܽܘܬܼܪܳܐ܃ ܘܫܰܪܟܿܳܐ ܕܿܰܪ̈ܓܼܺܝܓܼܳܬܼܳܐ ܐ̱ܚܪ̈ܳܢܝܳܬܼܳܐ ܥܳܐܠܳܢ̈ ܚܳܢܩܳܢ̈ ܠܳܗ ܠܡܶܠܬܼܳܐ܃ ܘܰܕܼܠܳܐ ܦܿܺܐܪ̈ܶܐ ܗܳܘܝܳܐ܂
04:20 [ai]	ܘܗܳܢܽܘܢ ܕܒܰܐܪܥܳܐ ܛܳܒܼܬܼܳܐ ܐܶܙܕܿܪܰܥܘ܃ ܗܳܠܶܝܢ ܐܶܢܽܘܢ ܕܫܳܡܥܺܝܢ ܡܶܠܬܼܳܐ܃ ܘܰܡܩܰܒܿܠܺܝܢ ܘܝܳܗܒܺܝܢ ܦܿܺܐܪ̈ܶܐ܃ ܒܰܬܼܠܳܬܼܺܝܢ ܘܒܼܰܫܬܿܺܝܢ ܘܒܼܰܡܳܐܐ܀
04:21 [ai]	ܘܶܐܡܰܪ ܠܗܽܘܢ܂ ܕܰܠܡܳܐ ܐܳܬܼܶܐ ܫܪܳܓܼܳܐ܂ ܕܰܬܼܚܶܝܬܼ ܣܰܐܬܼܳܐ ܢܶܬܿܬܣܺܝܡ܃ ܐܰܘ ܬܚܶܝܬܼ ܥܰܪܣܳܐ܃ ܠܳܐ ܗ̱ܘܳܐ܃ ܕܥܰܠ ܡܢܳܪܬܳܐ ܢܶܬܿܬܣܺܝܡ܂
04:22 [ai]	ܠܰܝܬܿ ܓܶܝܪ ܡܶܕܶܡ ܕܰܛܫܶܐ܂ ܕܠܳܐ ܢܶܬܼܓܠܶܐ܂ ܘܠܳܐ ܗ̱ܘܳܐ ܒܛܽܘܫܝܳܐ ܘܠܳܐ ܡܶܬܼܓܠܶܐ܀
04:23 [ai]	ܐܶܢ ܐ̱ܢܳܫ ܐܺܝܬܼ ܠܶܗ ܐܶܕܼܢܶܐ̈ ܕܢܶܫܡܰܥ܂ ܢܶܫܡܰܥ܀
04:24 [ai]	ܘܶܐܡܰܪ ܠܗܽܘܢ܂ ܚܙܰܘ ܡܳܢܳܐ ܫܳܡܥܺܝܢ ܐܢ̱ܬܿܽܘܢ܂ ܒܗܳܝ ܟܝܳܠܬܳܐ ܕܰܡܟܼܺܝܠܺܝܢ ܐܢ̱ܬܿܽܘܢ܂ ܡܶܬܿܬܟܼܺܝܠ ܠܟܼܽܘܢ܂ ܘܡܶܬܿܬܰܘܣܰܦܼ ܠܟܼܽܘܢ܂ ܠܰܐܝܠܶܝܢ ܕܫܳܡܥܺܝܢ܂
04:25 [ai]	ܡܰܢ ܕܺܐܝܬܼ ܠܶܗ ܓܶܝܪ܂ ܢܶܬܼܺܝܗܶܒܼ ܠܶܗ܂ ܘܡܰܢ ܕܠܰܝܬܿ ܠܶܗ܃ ܐܳܦܼ ܗܰܘ ܕܺܐܝܬܼ ܠܶܗ܂ ܢܶܫܬܿܩܶܠ ܡܶܢܶܗ܀
04:26 [ai]	ܘܶܐܡܰܪ ܗ̱ܘܳܐ܂ ܗܳܟܼܰܢܳܐ ܗ̱ܝ ܡܰܠܟܿܽܘܬܼܳܐ ܕܰܐܠܳܗܳܐ܃ ܐܰܝܟܼ ܐ̱ܢܳܫ ܕܢܰܪܡܶܐ ܙܰܪܥܳܐ ܒܰܐܪܥܳܐ܃
04:27 [ai]	ܘܢܶܕܼܡܰܟܼ ܘܰܢܩܽܘܡ ܒܠܺܠܝܳܐ ܘܒܼܺܐܝܡܳܡܳܐ܃ ܘܙܰܪܥܳܐ ܢܶܪܒܿܶܐ ܘܢܺܐܪܰܟܼ܂ ܟܰܕܼ ܗܽܘ ܠܳܐ ܝܳܕܼܰܥ܂
04:28 [ai]	ܐܰܪܥܳܐ ܓܶܝܪ ܡܰܝܬܿܝܳܐ ܠܶܗ ܠܦܼܺܐܪܳܐ܂ ܘܠܽܘܩܕܼܰܡ ܗܳܘܶܐ ܥܶܣܒܿܳܐ܂ ܘܒܼܳܬܼܪܶܗ ܫܶܒܠܳܐ܂ ܐ̱ܚܪܳܝܰܬܼ ܕܶܝܢ ܚܶܛܬܼܳܐ ܡܫܰܡܠܰܝܬܳܐ܂ ܒܫܶܒܠܳܐ܂
04:29 [ai]	ܡܳܐ ܕܰܫܡܶܢ ܕܶܝܢ ܦܺܐܪܳܐ܃ ܡܶܚܕܼܳܐ ܐܳܬܼܝܳܐ ܡܰܓܠܳܐ܂ ܕܡܰܛܺܝ ܚܨܳܕܼܳܐ܀
04:30 [ai]	ܘܶܐܡܰܪ܂ ܠܡܳܢܳܐ ܢܕܼܰܡܶܝܗ ܠܡܰܠܟܿܽܘܬܼܳܐ ܕܰܐܠܳܗܳܐ܃ ܘܒܼܰܐܝܢܳܐ ܡܰܬܼܠܳܐ ܢܰܡܬܿܠܺܝܗ܂
04:31 [ai]	ܐܰܝܟܼ ܦܪܶܕܿܬܳܐ ܗ̱ܝ ܕܿܚܰܪܕܠܳܐ܂ ܗܳܝ ܕܡܳܐ ܕܶܐܙܕܿܰܪܥܰܬܼ ܒܰܐܪܥܳܐ܃ ܙܥܽܘܪܝܳܐ ܗ̱ܝ ܡܶܢ ܟܽܠܗܽܘܢ ܙܰܪ̈ܥܽܘܢܶܐ ܕܥܰܠ ܐܰܪܥܳܐ܂
04:32 [ai]	ܘܡܳܐ ܕܶܐܙܕܿܰܪܥܰܬܼ܃ ܣܳܠܩܳܐ ܘܗܳܘܝܳܐ ܪܰܒܿܳܐ܂ ܡܶܢ ܟܽܠܗܽܘܢ ܝܰܪ̈ܩܽܘܢܶܐ܂ ܘܥܳܒܼܕܿܳܐ ܣܰܘܟܿܶܐ̈ ܪ̈ܰܘܪܒܼܳܬܼܳܐ܃ ܐܰܝܟܼ ܕܬܶܫܟܿܰܚ܂ ܕܰܒܼܛܶܠܳܠܳܗ ܦܳܪܰܚܬܼܳܐ ܬܶܫܟܿܰܢ܀
04:33 [ai]	ܒܡܰܬܼܠܶܐ̈ ܕܰܐܝܟܼ ܗܳܠܶܝܢ ܡܡܰܠܶܠ ܗ̱ܘܳܐ ܝܶܫܽܘܥ ܥܰܡܗܽܘܢ ܡܰܬܼܠܶܐ̈܃ ܐܰܝܟܼ ܕܡܶܫܟܿܚܺܝܢ ܗ̱ܘܰܘ ܠܡܶܫܡܰܥ܂
04:34 [ai]	ܘܰܕܼܠܳܐ ܡܰܬܼܠܶܐ̈܂ ܠܳܐ ܡܡܰܠܶܠ ܗ̱ܘܳܐ ܥܰܡܗܽܘܢ܂ ܠܬܼܰܠܡܺܝܕܼܰܘܗ̱ܝ̈ ܕܶܝܢ܂ ܒܰܝܢܰܘܗ̱ܝ ܘܰܠܗܽܘܢ ܡܦܼܰܫܶܩ ܗ̱ܘܳܐ ܟܽܠܡܶܕܶܡ܀
04:35 [ai]	ܘܶܐܡܰܪ ܠܗܽܘܢ܂ ܒܗܰܘ ܝܰܘܡܳܐ ܒܪܰܡܫܳܐ܂ ܢܶܥܒܰܪ ܠܰܢ ܠܥܶܒܼܪܳܐ܀
04:36 [ai]	ܘܰܫܒܼܰܩܘ ܠܟܼܶܢܫܶܐ̈܃ ܘܕܼܰܒܼܪܽܘܗ̱ܝ ܟܰܕܼ ܒܰܣܦܼܺܝܢ̱ܬܳܐ ܗܽܘ܂ ܘܰܣܦܼܺܝܢܶܐ̈ ܐ̱ܚܪ̈ܳܢܝܳܬܼܳܐ ܐܺܝܬܼ ܗ̱ܘܰܝ̈ ܥܰܡܗܽܘܢ܂
04:37 [ai]	ܘܰܗܘܳܬܼ ܥܰܠܥܳܠܳܐ ܪܰܒܿܬܼܳܐ܂ ܘܪܽܘܚܳܐ܂ ܘܓܼܰܠ̱ܠܶܐ̈ ܢܳܦܼܠܺܝܢ ܗ̱ܘܰܘ ܒܰܣܦܼܺܝܢ̱ܬܳܐ܂ ܘܩܰܪܺܝܒܼܳܐ ܗ̱ܘܳܬܼ ܕܬܶܬܼܡܠܶܐ܂
04:38 [ai]	ܗܽܘ ܕܶܝܢ ܝܶܫܽܘܥ ܥܰܠ ܒܶܣܳܕܼܝܳܐ ܕܡܶܟܼ ܗ̱ܘܳܐ܂ ܒܚܰܪܬܼܳܗ ܕܰܣܦܼܺܝܢ̱ܬܳܐ܂ ܘܶܐܬܼܰܘ ܐܰܩܺܝܡܽܘܗ̱ܝ܂ ܘܳܐܡܪܺܝܢ ܠܶܗ܂ ܪܰܒܰܢ܃ ܠܳܐ ܒܛܺܝܠ ܠܳܟܼ ܕܳܐܒܼܕܺܝܢ ܚ̱ܢܰܢ܂
04:39 [ai]	ܘܩܳܡ ܘܰܟܼܐܳܐ ܒܪܽܘܚܳܐ܂ ܘܶܐܡܰܪ ܠܝܰܡܳܐ܂ ܫܠܺܝ܂ ܙܓܼܺܝܪ ܐܰܢ̱ܬܿ܂ ܘܫܶܠܝܰܬܼ ܪܽܘܚܳܐ܂ ܘܰܗܘܳܐ ܢܰܘܚܳܐ ܪܰܒܿܳܐ܂
04:40 [ai]	ܘܶܐܡܰܪ ܠܗܽܘܢ܂ ܠܡܳܢܳܐ ܕܰܚܽܘܠܬܼܳܢܺܝܢ̈ ܐܢ̱ܬܿܽܘܢ ܗܳܟܼܰܢ ܘܰܠܡܳܢܳܐ ܠܰܝܬܿ ܒܟܽܘܢ ܗܰܝܡܳܢܽܘܬܼܳܐ܂
04:41 [ai]	ܘܰܕܼܚܶܠܘ܂ ܕܶܚܠܬܼܳܐ ܪܰܒܿܬܼܳܐ܂ ܘܳܐܡܪܺܝܢ ܗ̱ܘܰܘ ܚܰܕܼ ܠܚܰܕܼ܃ ܡܰܢܽܘ ܟܰܝ ܗܳܢܳܐ܂ ܕܿܪ̈ܽܘܚܶܐ ܘܝܰܡܳܐ ܡܶܫܬܿܰܡܥܺܝܢ ܠܶܗ܀܀

next chapter