← Back
The Comprehensive Aramaic Lexicon
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


05:01 [ai]ܘܶܐܬܼܳܐ ܠܥܶܒܼܪܳܐ ܕܝܰܡܳܐ܂ ܠܰܐܬܼܪܳܐ ܕܿܓܼܳܕܼܪ̈ܳܝܶܐ܂
05:02 [ai]ܘܟܼܰܕܼ ܢܦܼܰܩ ܡܶܢ ܣܦܼܺܝܢ̱ܬܳܐ܃ ܦܓܼܰܥ ܒܶܗ ܡܶܢ ܒܶܝܬܼ ܩܒܼܽܘܪ̈ܶܐ܂ ܓܰܒܼܪܳܐ ܕܺܐܝܬܼ ܒܶܗ ܪܽܘܚܳܐ ܛܰܢܦܼܬܼܳܐ܂
05:03 [ai]ܘܥܳܡܰܪ ܗ̱ܘܳܐ ܒܶܝܬܼ ܩܒܼܽܘܪ̈ܶܐ܂ ܘܰܒܫܺܫܠܳܬܼܳܐ̈ ܐ̱ܢܳܫ ܠܳܐ ܡܶܫܟܿܰܚ ܗ̱ܘܳܐ ܠܡܶܐܣܪܶܗ܂
05:04 [ai]ܡܶܛܽܠ ܕܟܽܠ ܐܶܡܰܬܼܝ ܕܰܒܼܣܽܘܛܡܶܐ̈ ܘܰܒܫܺܫܠܳܬܼܳܐ̈ ܡܶܬܼܶܐܣܰܪ ܗ̱ܘܳܐ܃ ܫܺܫܠܳܬܼܳܐ̈ ܡܬܼܰܒܰܪ ܗ̱ܘܳܐ܂ ܘܣܽܘܛܡܶܐ̈ ܡܦܼܰܣܶܩ ܗ̱ܘܳܐ܂ ܘܠܳܐ ܐ̱ܢܳܫ ܡܶܫܟܿܰܚ ܗ̱ܘܳܐ ܠܡܶܟܼܒܿܫܶܗ܂
05:05 [ai]ܘܰܒܟܼܽܠ ܙܒܼܰܢ ܒܠܺܠܝܳܐ ܘܒܼܺܐܝܡܳܡܳܐ܃ ܒܒܼܶܝܬܼ ܩܒܼܽܘܪ̈ܶܐ ܘܰܒܛܽܘܪ̈ܶܐ܂ ܐܺܝܬܼܰܘܗ̱ܝ ܗ̱ܘܳܐ܂ ܘܩܳܥܶܐ ܗ̱ܘܳܐ܂ ܘܰܡܨܰܠܶܦܼ ܢܰܦܼܫܶܗ ܒܟܺܐܦܼܶܐ̈܂
05:06 [ai]ܟܰܕܼ ܚܙܳܐ ܕܶܝܢ ܠܝܶܫܽܘܥ ܡܶܢ ܪܽܘܚܩܳܐ܃ ܪܗܶܛ ܣܓܼܶܕܼ ܠܶܗ܂
05:07 [ai]ܘܰܩܥܳܐ ܒܩܳܠܳܐ ܪܳܡܳܐ܂ ܘܶܐܡܰܪ܂ ܡܳܐ ܠܺܝ ܘܠܳܟܼ܂ ܝܶܫܽܘܥ܃ ܒܪܶܗ ܕܰܐܠܳܗܳܐ ܡܪܰܝܡܳܐ܂ ܡܰܘܡܶܐ ܐ̱ܢܳܐ ܠܳܟܼ ܒܰܐܠܳܗܳܐ܂ ܕܠܳܐ ܬܫܰܢܩܰܢܝ܂
05:08 [ai]ܐܳܡܰܪ ܗ̱ܘܳܐ ܠܶܗ ܓܶܝܪ܃ ܦܽܘܩ ܡܶܢ ܒܰܪܢܳܫܳܐ܂ ܪܽܘܚܳܐ ܛܰܢܦܼܳܐ܂
05:09 [ai]ܘܫܰܐܠܶܗ܂ ܐܰܝܟܿܰܢܳܐ ܫܡܳܟܼ܂ ܐܳܡܰܪ ܠܶܗ ܠܶܓܼܝܽܘܢ ܫܡܰܢ܂ ܡܶܛܽܠ ܕܣܰܓܿܺܝܶܐܐ̈ ܚ̱ܢܰܢ܂
05:10 [ai]ܘܒܼܳܥܶܐ ܗ̱ܘܳܐ ܡܶܢܶܗ ܣܰܓܿܺܝ܃ ܕܠܳܐ ܢܫܰܕܿܪܺܝܘܗ̱ܝ ܠܒܼܰܪ ܡܶܢ ܐܰܬܼܪܳܐ܂
05:11 [ai]ܐܺܝܬܼ ܗ̱ܘܳܐ ܕܶܝܢ ܬܰܡܳܢ ܠܘܳܬܼ ܛܽܘܪܳܐ܃ ܒܰܩܪܳܐ ܪܰܒܿܬܼܳܐ ܕܰܚܙܺܝܪ̈ܶܐ܂ ܕܪܳܥܝܳܐ܃
05:12 [ai]ܘܒܼܳܥܶܝܢ ܗ̱ܘܰܘ ܡܶܢܶܗ ܗܳܢܽܘܢ ܫܺܐܕܼܶܐ̈܂ ܘܳܐܡܪܺܝܢ܂ ܫܰܕܿܰܪܝܰܢ ܥܰܠ ܗܳܢܽܘܢ ܚܙܺܝܪ̈ܶܐ܃ ܕܰܒܼܗܽܘܢ ܢܶܥܽܘܠ܂
05:13 [ai]ܘܰܐܦܿܶܣ ܠܗܽܘܢ܂ ܘܰܢܦܼܰܩ ܪ̈ܽܘܚܶܐ ܗܳܠܶܝܢ ܛܰܢܦܼܳܬܼܳܐ̈܂ ܘܥܰܠ ܒܰܚܙܺܝܪ̈ܶܐ܂ ܘܪܶܗܛܰܬܼ ܗܳܝ ܒܰܩܪܳܐ ܠܰܫܩܺܝܦܼܳܐ܃ ܘܢܶܦܼܠܰܬܼ ܒܝܰܡܳܐ܂ ܐܰܝܟܼ ܬܿܪ̈ܶܝܢ ܐܰܠܦܼܺܝܢ̈܂ ܘܶܐܬܼܚܰܢܰܩܘ ܒܡܰܝܳܐ̈ ܿ܀ܿ܀ܿ
05:14 [ai]ܘܗܳܢܽܘܢ ܕܪܳܥܶܝܢ ܗ̱ܘܰܘ ܠܗܽܘܢ܂ ܥܪܰܩܘ ܘܶܐܡܰܪܘ ܒܰܡܕܼܺܝܢ̱ܬܳܐ܂ ܘܳܐܦܼ ܒܩܽܘܪ̈ܝܳܐ܂ ܘܰܢܦܼܰܩܘ ܠܡܶܚܙܳܐ ܡܶܕܶܡ ܕܰܗܘܳܐ܂
05:15 [ai]ܘܶܐܬܼܰܘ ܠܘܳܬܼ ܝܶܫܽܘܥ܃ ܘܰܚܙܰܐܘܽܗ̱ܝ ܠܗܰܘ ܕܫܺܐܕܼܰܘܗ̱ܝ̈܂ ܟܰܕܼ ܠܒܼܺܝܫ܂ ܘܰܡܢܰܟܿܰܦܼ܂ ܘܝܳܬܼܶܒܼ܃ ܗܰܘ ܕܺܐܝܬܼ ܗ̱ܘܳܐ ܒܶܗ ܠܶܓܼܝܽܘܢ܃ ܘܰܕܼܚܶܠܘ܂
05:16 [ai]ܘܶܐܫܬܿܰܥܺܝܘ ܠܗܽܘܢ ܗܳܢܽܘܢ ܕܰܚܙܰܘ܃ ܕܰܐܝܟܿܰܢܳܐ ܗܘܳܐ ܠܗܰܘ ܕܫܺܐܕܼܰܘܗ̱ܝ̈܂ ܘܳܐܦܼ ܥܰܠ ܗܳܢܽܘܢ ܚܙܺܝܪ̈ܶܐ܂
05:17 [ai]ܘܫܰܪܺܝܘ ܒܿܳܥܶܝܢ ܡܶܢܶܗ ܕܢܺܐܙܰܠ ܠܶܗ ܡܶܢ ܬܚܽܘܡܗܽܘܢ܀
05:18 [ai]ܘܟܼܰܕܼ ܣܠܶܩ ܠܰܣܦܼܺܝܢ̱ܬܳܐ܃ ܒܿܳܥܶܐ ܗ̱ܘܳܐ ܡܶܢܶܗ ܗܰܘ ܕܫܺܐܕܼܰܘܗ̱ܝ̈܂ ܕܥܰܡܶܗ ܢܶܗܘܶܐ܂
05:19 [ai]ܘܠܳܐ ܫܰܒܼܩܶܗ܂ ܐܶܠܳܐ ܐܶܡܰܪ ܠܶܗ܃ ܙܶܠ ܠܒܼܰܝܬܿܳܟܼ ܠܘܳܬܼ ܐ̱ܢܳܫܰܝܟܿ̈܃ ܘܶܐܫܬܿܰܥܳܐ ܠܗܽܘܢ ܡܶܕܶܡ ܕܰܥܒܼܰܕܼ ܠܳܟܼ ܡܳܪܝܳܐ܂ ܘܕܼܶܐܬܼܪܰܚܰܡ ܥܠܰܝܟܿ܂
05:20 [ai]ܘܶܐܙܰܠ܂ ܘܫܰܪܺܝ ܡܰܟܼܪܶܙ ܒܥܶܣܪܰܬܼ ܡ̈ܕܼܺܝܢܳܬܼܳܐ܂ ܡܶܕܶܡ ܕܰܥܒܼܰܕܼ ܠܶܗ ܝܶܫܽܘܥ܂ ܘܟܼܽܠܗܽܘܢ ܬܰܡܺܝܗܺܝܢ ܗܘܰܘ܀
05:21 [ai]ܘܟܼܰܕܼ ܥܒܼܰܪ ܝܶܫܽܘܥ ܒܰܣܦܼܺܝܢ̱ܬܳܐ ܠܗܰܘ ܥܶܒܼܪܳܐ܃ ܬܽܘܒܼ ܐܶܬܼܟܿܰܢܰܫܘ ܥܠܰܘܗ̱ܝ ܟܶܢܫܶܐ̈ ܣܰܓܿܺܝܶܐܐ̈܃ ܟܰܕܼ ܐܺܝܬܼܰܘܗ̱ܝ ܥܰܠ ܝܰܕܼ ܝܰܡܳܐ܂
05:22 [ai]ܘܶܐܬܼܳܐ ܚܰܕܼ ܕܰܫܡܶܗ ܝܽܘܐܳܪܳܫ ܡܶܢ ܪ̈ܰܒܰܝ ܟܢܽܘܫܬܳܐ܃ ܘܟܼܰܕܼ ܚܙܳܝܗ̱ܝ܂ ܢܦܼܰܠ ܠܘܳܬܼ ܪ̈ܶܓܼܠܰܘܗ̱ܝ܂
05:23 [ai]ܘܒܼܳܥܶܐ ܗ̱ܘܳܐ ܡܶܢܶܗ ܣܰܓܿܺܝ܂ ܘܳܐܡܰܪ ܠܶܗ܂ ܒܪܰܬܼܝ ܒܺܝܫܳܐܺܝܬܼ ܥܒܼܺܝܕܼܳܐ܂ ܬܳܐ ܣܺܝܡ ܐܺܝܕܼܳܟܼ ܥܠܶܝܗ܂ ܘܬܼܶܬܼܚܠܶܡ܂ ܘܬܼܺܚܶܐ܂
05:24 [ai]ܘܶܐܙܰܠ ܥܰܡܶܗ ܝܶܫܽܘܥ܂ ܘܕܼܰܒܺܝܩ ܗ̱ܘܳܐ ܠܶܗ ܟܶܢܫܳܐ ܣܰܓܿܺܝܳܐܐ܃ ܘܚܳܒܼܨܺܝܢ ܗ̱ܘܰܘ ܠܶܗ܀܀
05:25 [ai]ܐܰܢ̱ܬܿܬܼܳܐ ܕܶܝܢ ܚܕܼܳܐ܂ ܕܺܐܝܬܼܶܝܗ ܗ̱ܘܳܬܼ ܒܡܰܪܕܿܺܝܬܼܳܐ ܕܰܕܼܡܳܐ܂ ܫܢܺܝܢ̈ ܬܿܰܪ̈ܬܿܰܥܶܣܪܶܐ܃
05:26 [ai]ܐܰܝܕܼܳܐ ܕܣܰܓܿܺܝ ܣܶܒܼܠܰܬܼ ܡܶܢ ܐܳܣܰܘܳܬܼܳܐ̈ ܣܰܓܿܺܝܶܐܐ̈܃ ܘܰܐܦܿܩܰܬܼ ܟܽܠ ܡܶܕܶܡ ܕܺܐܝܬܼ ܠܳܗ܃ ܘܡܶܕܶܡ ܠܳܐ ܐܶܬܼܥܰܕܿܪܰܬܼ܂ ܐܶܠܳܐ ܐܳܦܼ ܝܰܬܿܺܝܪܳܐܺܝܬܼ ܐܶܬܼܰܐܠܨܰܬܼ܂
05:27 [ai]ܟܰܕܼ ܫܶܡܥܰܬܼ ܥܰܠ ܝܶܫܽܘܥ܃ ܐܶܬܼܳܬܼ ܒܚܶܒܼܨܳܐ ܕܟܶܢܫܳܐ ܡܶܢ ܒܶܣܬܿܪܶܗ܂ ܩܶܪܒܿܰܬܼ ܠܰܠܒܼܽܘܫܶܗ܂
05:28 [ai]ܐܳܡܪܳܐ ܗ̱ܘܳܬܼ ܓܶܝܪ܃ ܕܳܐܦܼܶܢ ܠܰܠܒܼܽܘܫܶܗ ܩܳܪܒܿܳܐ ܐ̱ܢܳܐ܂ ܚܳܝܳܐ ܐ̱ܢܳܐ܃
05:29 [ai]ܘܡܶܚܕܼܳܐ ܝܶܒܼܫܰܬܼ ܡܥܺܝܢܳܐ ܕܰܕܼܡܳܗ܂ ܘܰܐܪܓܿܫܰܬܼ ܒܦܰܓܼܪܳܗ܂ ܕܶܐܬܼܰܐܣܝܰܬܼ ܡܶܢ ܡܚܽܘܬܼܳܗ܂
05:30 [ai]ܝܶܫܽܘܥ ܕܶܝܢ ܡܶܚܕܼܳܐ ܺܝܕܼܰܥ ܒܢܰܦܼܫܶܗ܂ ܕܚܰܝܠܳܐ ܢܦܼܰܩ ܡܶܢܶܗ܂ ܘܶܐܬܼܦܿܢܺܝ ܠܘܳܬܼ ܟܶܢܫܳܐ܂ ܘܶܐܡܰܪ܂ ܡܰܢܽܘ ܩܪܶܒܼ ܠܡܳܐܢܰܝ̈܂
05:31 [ai]ܘܳܐܡܪܺܝܢ ܠܶܗ ܬܰܠܡܺܝܕܼܰܘܗ̱ܝ̈܂ ܚܳܙܶܐ ܐܰܢ̱ܬܿ ܠܟܼܶܢܫܶܐ̈ ܕܚܳܒܼܨܺܝܢ ܠܳܟܼ܃ ܘܳܐܡܰܪ ܐܰܢ̱ܬܿ܃ ܡܰܢܽܘ ܩܪܶܒܼ ܠܺܝ܃
05:32 [ai]ܘܚܳܐܰܪ ܗ̱ܘܳܐ ܕܢܶܚܙܶܐ ܡܰܢܽܘ ܗܳܕܼܶܐ ܥܒܼܰܕܼ܂
05:33 [ai]ܗܳܝ ܕܶܝܢ ܐܰܢ̱ܬܿܬܼܳܐ܂ ܟܰܕܼ ܕܰܚܺܝܠܳܐ ܘܪܰܬܿܺܝܬܼܳܐ܂ ܕܝܶܕܼܥܰܬܼ ܡܳܐ ܕܰܗܘܳܐ ܠܳܗ܃ ܐܶܬܼܳܬܼ ܢܶܦܼܠܰܬܼ ܩܕܼܳܡܰܘܗ̱ܝ܂ ܘܶܐܡܪܰܬܼ ܠܶܗ ܟܽܠܶܗ ܫܪܳܪܳܐ܂
05:34 [ai]ܗܽܘ ܕܶܝܢ ܐܶܡܰܪ ܠܳܗ܂ ܒܪܰܬܼܝ܂ ܗܰܝܡܳܢܽܘܬܼܶܟܼܝ ܐܰܚܝܰܬܼܶܟܼܝ܂ ܙܶܠܝ ܒܰܫܠܳܡܳܐ܂ ܘܰܗܘܰܝܬܿܝ ܚܠܺܝܡܳܐ ܡܶܢ ܡܚܽܘܬܼܶܟܼܝ܀܀
05:35 [ai]ܘܥܰܕܼ ܗܽܘ ܡܡܰܠܶܠ܃ ܐܶܬܼܰܘ ܡܶܢ ܕܒܶܝܬܼ ܪܰܒܿ ܟܢܽܘܫܬܳܐ܂ ܘܳܐܡܪܺܝܢ܂ ܕܒܰܪܬܼܳܟܼ ܡܺܝܬܼܰܬܼ܂ ܠܡܳܢܳܐ ܡܶܟܿܺܝܠ ܡܰܥܡܶܠ ܐܰܢ̱ܬܿ ܠܡܰܠܦܼܳܢܳܐ܂
05:36 [ai]ܝܶܫܽܘܥ ܕܶܝܢ ܫܡܰܥ ܠܡܶܠܬܼܳܐ ܕܶܐܡܰܪܘ܂ ܘܶܐܡܰܪ ܠܗܰܘ ܪܰܒܿ ܟܢܽܘܫܬܳܐ܂ ܠܳܐ ܬܶܕܼܚܰܠ܂ ܒܰܠܚܽܘܕܼ ܗܰܝܡܶܢ܂
05:37 [ai]ܘܠܳܐ ܫܒܼܰܩ ܠܐ̱ܢܳܫ ܕܢܺܐܙܰܠ ܥܰܡܶܗ܃ ܐܶܠܳܐ ܠܫܶܡܥܽܘܢ ܟܺܐܦܼܳܐ܃ ܘܰܠܝܰܥܩܽܘܒܼ܂ ܘܰܠܝܽܘܚܰܢܳܢ ܐܰܚܽܘܗ̱ܝ ܕܝܰܥܩܽܘܒܼ܂
05:38 [ai]ܘܶܐܬܼܰܘ ܠܒܼܰܝܬܳܐ ܕܗܰܘ ܪܰܒܿ ܟܢܽܘܫܬܳܐ܂ ܘܰܚܙܳܐ ܕܰܪܗܺܝܒܼܺܝܢ܂ ܘܒܼܳܟܼܶܝܢ܂ ܘܡܰܝܠܠܺܝܢ܂
05:39 [ai]ܘܥܰܠ܂ ܘܶܐܡܰܪ ܠܗܽܘܢ܂ ܡܳܢܳܐ ܪܗܺܝܒܼܺܝܢ ܐܢ̱ܬܿܽܘܢ ܘܒܼܳܟܼܶܝܢ܂ ܛܠܺܝܬܼܳܐ ܠܳܐ ܡܺܝܬܼܰܬܼ܂ ܐܶܠܳܐ ܕܰܡܟܿܳܐ ܗ̱ܝ܂
05:40 [ai]ܘܓܼܳܚܟܿܺܝܢ ܗ̱ܘܰܘ ܥܠܰܘܗ̱ܝ܂ ܗܽܘ ܕܶܝܢ ܐܰܦܿܶܩ ܠܟܼܽܠܗܽܘܢ܂ ܘܰܕܼܒܼܰܪ ܠܰܐܒܼܽܘܗ ܕܰܛܠܺܝܬܼܳܐ ܘܠܶܐܡܳܗ܂ ܘܰܠܗܳܢܽܘܢ ܕܥܰܡܶܗ܃ ܘܥܰܠ ܠܰܐܝܟܿܳܐ ܕܪܰܡܝܳܐ ܗ̱ܘܳܬܼ ܛܠܺܝܬܼܳܐ܂
05:41 [ai]ܘܶܐܚܰܕܼ ܒܺܐܝܕܼܳܗ ܕܰܛܠܺܝܬܼܳܐ܂ ܘܶܐܡܰܪ ܠܳܗ܂ ܛܠܺܝܬܼܳܐ܂ ܩܽܘܡܝ܂
05:42 [ai]ܘܒܼܰܪ ܫܳܥܬܼܶܗ ܩܳܡܰܬܼ ܛܠܺܝܬܼܳܐ܂ ܘܰܡܗܰܠܟܼܳܐ ܗ̱ܘܳܬܼ܂ ܐܺܝܬܼܶܝܗ ܗ̱ܘܳܬܼ ܓܶܝܪ ܒܰܪ̱ܬܼ ܫܢܺܝܢ̈ ܬܿܰܪ̈ܬܿܰܥܶܣܪܶܐ܂ ܘܡܶܬܿܕܰܡܪܺܝܢ ܗ̱ܘܰܘ ܕܽܘܡܳܪܳܐ ܪܰܒܿܳܐ܂
05:43 [ai]ܘܦܼܰܩܶܕܼ ܐܶܢܽܘܢ ܣܰܓܿܺܝ܂ ܕܠܳܐ ܐ̱ܢܳܫ ܢܶܕܿܰܥ ܗܳܕܼܶܐ܂ ܘܶܐܡܰܪ ܕܢܶܬܿܠܽܘܢ ܠܳܗ ܠܡܶܠܥܰܣ܀

next chapter