← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


07:01 [ai]ܘܰܟܼܢܰܫܘ ܠܘܳܬܼܶܗ ܦܿܪ̈ܺܝܫܶܐ ܘܣܳܦܼܪ̈ܶܐ܂ ܕܶܐܬܼܰܘ ܡܶܢ ܐܽܘܪܺܫܠܶܡ܂
07:02 [ai]ܘܰܚܙܰܘ ܐ̱ܢܳܫܺܝܢ̈ ܡܶܢ ܬܰܠܡܺܝܕܼܰܘܗ̱ܝ̈܂ ܕܳܐܟܼܠܺܝܢ ܠܰܚܡܳܐ܂ ܟܰܕܼ ܠܳܐ ܡܫܳܓܼܳܢ̈ ܐܺܝܕܼܰܝܗܽܘܢ̈܃ ܘܶܐܬܼܥܰܕܿܰܠܘ܂
07:03 [ai]ܟܽܠܗܽܘܢ ܓܶܝܪ ܺܝܗܽܘܕܼܳܝܶܐ̈ ܘܰܦܼܪ̈ܺܝܫܶܐ܃ ܐܶܢ ܗܽܘ ܕܰܒܼܛܺܝܠܳܐܺܝܬܼ܂ ܠܳܐ ܡܫܺܝܓܼܺܝܢ ܐܺܝܕܼܰܝܗܽܘܢ̈܂ ܠܳܐ ܠܳܥܣܺܝܢ܂ ܡܶܛܽܠ ܕܰܐܚܺܝܕܼܺܝܢ ܡܰܫܠܡܳܢܽܘܬܼܳܐ ܕܩܰܫܺܝܫܶܐ̈܂
07:04 [ai]ܘܡܶܢ ܫܽܘܩܳܐ܂ ܐܶܠܳܐ ܥܳܡܕܺܝܢ܂ ܠܳܐ ܠܳܥܣܺܝܢ܂ ܘܣܰܓܿܺܝܳܐܬܼܳܐ̈ ܐ̱ܚܪ̈ܳܢܝܳܬܼܳܐ ܐܺܝܬܼ ܐܰܝܠܶܝܢ ܕܩܰܒܿܶܠܘ ܕܢܶܛܪܽܘܢ܂ ܡܰܥܡܽܘܕܼܝܳܬܼܳܐ̈ ܕܟܳܣܶܐ̈܂ ܘܰܕܼܩܶܣܛܶܐ̈܃ ܘܰܕܼܡܳܐܢܰܝ̈ ܢܚܳܫܳܐ܂ ܘܰܕܼܥܰܪ̈ܣܳܬܼܳܐ܀
07:05 [ai]ܘܫܰܐܠܽܘܗ̱ܝ ܣܳܦܼܪ̈ܶܐ ܘܰܦܼܪ̈ܺܝܫܶܐ܃ ܠܡܳܢܳܐ ܬܰܠܡܺܝܕܼܰܝܟܿ̈ ܠܳܐ ܡܗܰܠܟܼܺܝܢ ܐܰܝܟܼ ܡܰܫܠܡܳܢܽܘܬܼܳܐ ܕܩܰܫܺܝܫܶܐ̈܃ ܐܶܠܳܐ ܟܰܕܼ ܠܳܐ ܡܫܳܓܼܳܢ̈ ܐܺܝܕܼܰܝܗܽܘܢ̈܂ ܐܳܟܼܠܺܝܢ ܠܰܚܡܳܐ܂
07:06 [ai]ܗܽܘ ܕܶܝܢ ܐܶܡܰܪ ܠܗܽܘܢ܂ ܫܰܦܿܺܝܪ ܐܶܬܼܢܰܒܺܝ ܥܠܰܝܟܿܽܘܢ ܐܶܫܰܥܝܳܐ ܢܒܼܺܝܳܐ܂ ܢܳܣܒܰܝ̈ ܒܰܐܦܿܶܐ̈܃ ܐܰܝܟܼ ܕܰܟܼܬܼܺܝܒܼ܂ ܕܥܰܡܳܐ ܗܳܢܳܐ܂ ܒܣܶܦܼܘܳܬܼܶܗ̈ ܗ̱ܽܘ ܡܝܰܩܰܪ ܠܺܝ܂ ܠܶܒܗܽܘܢ ܕܶܝܢ܂ ܣܰܓܿܺܝ ܪܰܚܺܝܩ ܡܶܢܝ܂
07:07 [ai]ܘܰܣܪܺܝܩܳܐܺܝܬܼ ܕܳܚܠܺܝܢ ܠܺܝ܂ ܟܰܕܼ ܡܰܠܦܼܺܝܢ ܝܽܘܠܦܿܳܢܶܐ̈ ܕܦܽܘܩܕܳܢܶܐ̈ ܕܿܰܒܼܢܰܝ ܐ̱ܢܳܫܳܐ̈܂
07:08 [ai]ܫܒܼܰܩܬܿܽܘܢ ܓܶܝܪ ܦܽܘܩܕܳܢܳܐ ܕܰܐܠܳܗܳܐ܃ ܘܰܐܚܺܝܕܼܺܝܢ ܐܢ̱ܬܿܽܘܢ ܡܰܫܠܡܳܢܽܘܬܼܳܐ ܕܿܰܒܼܢܰܝ ܐ̱ܢܳܫܳܐ̈܂ ܡܰܥܡܽܘܕܼܝܳܬܼܳܐ̈ ܕܟܳܣܶܐ̈܂ ܘܰܕܼܩܶܣܛܶܐ̈܂ ܘܣܰܓܿܺܝܳܐܬܼܳܐ̈ ܐܰܝܠܶܝܢ ܕܰܠܗܳܠܶܝܢ ܕܳܡܝܳܢ̈܂
07:09 [ai]ܐܳܡܰܪ ܠܗܽܘܢ܂ ܫܰܦܿܺܝܪ ܛܳܠܡܺܝܢ ܐܢ̱ܬܿܽܘܢ ܦܽܘܩܕܳܢܳܐ ܕܰܐܠܳܗܳܐ܃ ܕܰܬܼܩܺܝܡܽܘܢ ܡܰܫܠܡܳܢܽܘܬܼܟܼܽܘܢ܂
07:10 [ai]ܡܽܘܫܶܐ ܓܶܝܪ ܐܶܡܰܪ܂ ܕܝܰܩܰܪ ܠܰܐܒܼܽܘܟܼ܂ ܘܠܶܐܡܳܟܼ܂ ܘܡܰܢ ܕܰܡܨܰܚܶܐ ܠܰܐܒܼܳܐ܂ ܘܠܶܐܡܳܐ܂ ܡܰܘܬܳܐ ܢܡܽܘܬܼ܂
07:11 [ai]ܐܰܢ̱ܬܿܽܘܢ ܕܶܝܢ ܐܳܡܪܺܝܢ ܐܢ̱ܬܿܽܘܢ܂ ܐܶܢ ܢܺܐܡܰܪ ܓܰܒܼܪܳܐ ܠܰܐܒܼܽܘܗ̱ܝ ܐܰܘ ܠܶܐܡܶܗ܃ ܩܽܘܪܒܿܳܢܝ܂ ܡܶܕܶܡ ܕܡܶܢܝ ܬܺܐܬܼܰܪ܂
07:12 [ai]ܘܠܳܐ ܫܳܒܼܩܺܝܢ ܐܢ̱ܬܿܽܘܢ ܠܶܗ܂ ܕܢܶܥܒܿܶܕܼ ܡܶܕܶܡ ܠܰܐܒܼܽܘܗ̱ܝ ܐܰܘ ܠܶܐܡܶܗ܂
07:13 [ai]ܘܡܰܣܠܶܝܢ ܐܢ̱ܬܿܽܘܢ ܡܶܠܬܼܳܐ ܕܰܐܠܳܗܳܐ܃ ܡܶܛܽܠ ܡܰܫܠܡܳܢܽܘܬܼܳܐ ܕܰܐܫܠܶܡܬܿܽܘܢ܂ ܘܰܕܼܕܼܳܡܝܳܢ̈ ܠܗܳܠܶܝܢ ܣܰܓܿܺܝܳܐܬܼܳܐ̈ ܥܳܒܼܕܺܝܢ ܐܢ̱ܬܿܽܘܢ܀܀
07:14 [ai]ܘܰܩܪܳܐ ܝܶܫܽܘܥ ܠܟܼܶܢܫܳܐ ܟܽܠܶܗ ܘܶܐܡܰܪ ܠܗܽܘܢ܂ ܫܽܘܡܥܽܘܢܝ ܟܽܠܟܼܽܘܢ܂ ܘܶܐܣܬܿܰܟ̱ܿܠܘ܂
07:15 [ai]ܠܰܝܬܿ ܡܶܕܶܡ ܕܰܠܒܼܰܪ ܡܶܢ ܒܰܪܢܳܫܳܐ ܗܽܘ܂ ܘܥܳܐܶܠ ܠܶܗ܃ ܕܡܶܫܟܿܰܚ ܡܣܰܝܶܒܼ ܠܶܗ܂ ܐܶܠܳܐ ܡܶܕܶܡ ܕܢܳܦܼܶܩ ܡܶܢܶܗ܃ ܗܰܘ ܗ̱ܽܘ ܡܣܰܝܶܒܼ ܠܒܼܰܪ ܐ̱ܢܳܫܳܐ܂
07:16 [ai]ܡܰܢ ܕܺܐܝܬܼ ܠܶܗ ܐܶܕܼܢܶܐ̈ ܕܢܶܫܡܰܥ܂ ܢܶܫܡܰܥ ܿ܀ܿ܀ܿ
07:17 [ai]ܟܰܕܼ ܕܶܝܢ ܥܰܠ ܝܶܫܽܘܥ ܠܒܼܰܝܬܳܐ ܡܶܢ ܟܶܢܫܳܐ܃ ܫܰܐܠܽܘܗ̱ܝ ܬܰܠܡܺܝܕܼܰܘܗ̱ܝ̈ ܥܰܠ ܡܰܬܼܠܳܐ ܗܰܘ܂
07:18 [ai]ܐܳܡܰܪ ܠܗܽܘܢ܂ ܗܳܟܼܰܢܳܐ ܐܳܦܼ ܐܰܢ̱ܬܿܽܘܢ ܥܰܛܠܺܝܢ ܐܢ̱ܬܿܽܘܢ܃ ܠܳܐ ܝܳܕܼܥܺܝܢ ܐܢ̱ܬܿܽܘܢ܂ ܕܟܽܠ ܡܶܕܶܡ ܕܡܶܢ ܠܒܼܰܪ ܥܳܐܶܠ ܠܒܼܰܪ ܐ̱ܢܳܫܳܐ܃ ܠܳܐ ܡܶܫܟܿܰܚ ܡܣܰܝܶܒܼ ܠܶܗ܂
07:19 [ai]ܕܠܳܐ ܗ̱ܘܳܐ ܠܠܶܒܶܗ ܥܳܐܶܠ܂ ܐܶܠܳܐ ܠܟܼܰܪܣܶܗ܂ ܘܡܶܫܬܿܕܼܶܐ ܒܬܰܕܼܟܿܺܝܬܼܳܐ܂ ܕܰܡܕܼܰܟܿܝܳܐ ܟܽܠܳܗ ܡܶܐܟܼܽܘܠܬܳܐ܂
07:20 [ai]ܡܶܕܶܡ ܕܶܝܢ ܕܢܳܦܼܶܩ ܡܶܢ ܒܰܪܢܳܫܳܐ܃ ܗܰܘ ܗ̱ܽܘ ܡܣܰܝܶܒܼ ܠܒܼܰܪ ܐ̱ܢܳܫܳܐ܂
07:21 [ai]ܡܶܢ ܠܓܼܰܘ ܓܶܝܪ ܡܶܢ ܠܶܒܿܳܐ ܕܿܰܒܼܢܰܝ ܐ̱ܢܳܫܳܐ̈܂ ܢܳܦܼܩܳܢ ܡܰܚܫܒܼܳܬܼܳܐ̈ ܒܺܝܫܳܬܼܳܐ̈܂ ܓܰܘܪܳܐ܂ ܙܳܢܝܽܘܬܼܳܐ܂ ܓܰܢܳܒܼܽܘܬܼܳܐ܂ ܩܶܛܠܳܐ܂
07:22 [ai]ܥܳܠܽܘܒܼܽܘܬܼܳܐ܂ ܒܺܝܫܽܘܬܼܳܐ܂ ܢܶܟܼܠܳܐ܂ ܨܰܚܢܽܘܬܼܳܐ܂ ܥܰܝܢܳܐ ܒܺܝܫܬܳܐ܂ ܓܽܘܕܿܳܦܼܳܐ܂ ܫܰܒܼܗܪܳܢܽܘܬܼܳܐ܂ ܫܳܛܝܽܘܬܼܳܐ܂
07:23 [ai]ܗܳܠܶܝܢ ܟܽܠܗܶܝܢ ܒܺܝܫܳܬܼܳܐ̈ ܡܶܢ ܠܓܼܰܘ ܗ̱ܽܘ ܢܳܦܼܩܳܢ܃ ܘܰܡܣܰܝܒܼܳܢ ܠܶܗ ܠܒܼܰܪܢܳܫܳܐ܀
07:24 [ai]ܡܶܢ ܬܰܡܳܢ ܩܳܡ ܝܶܫܽܘܥ܃ ܘܶܐܬܼܳܐ ܠܰܬܼܚܽܘܡܳܐ ܕܨܽܘܪ ܘܰܕܼܨܰܝܕܳܢ܂ ܘܥܰܠ ܠܒܼܰܝܬܳܐ ܚܰܕܼ܃ ܘܠܳܐ ܨܳܒܼܶܐ ܗ̱ܘܳܐ ܕܐ̱ܢܳܫ ܢܶܕܿܰܥ ܒܶܗ܂ ܘܠܳܐ ܐܶܫܟܿܰܚ ܕܢܶܛܫܶܐ܂
07:25 [ai]ܡܶܚܕܼܳܐ ܓܶܝܪ ܫܶܡܥܰܬܼ ܐܰܢ̱ܬܿܬܼܳܐ ܚܕܼܳܐ ܡܶܛܽܠܳܬܼܶܗ܃ ܕܺܐܝܬܼ ܗ̱ܘܳܬܼ ܠܒܼܰܪܬܼܳܗ ܪܽܘܚܳܐ ܛܰܢܦܼܬܼܳܐ܃ ܘܶܐܬܼܳܬܼ ܢܶܦܼܠܰܬܼ ܩܕܼܳܡ ܪ̈ܶܓܼܠܰܘܗ̱ܝ܂
07:26 [ai]ܗܺܝ ܕܶܝܢ ܐܰܢ̱ܬܿܬܼܳܐ ܐܺܝܬܼܶܝܗ ܗ̱ܘܳܬܼ ܚܰܢܦܼܬܼܳܐ܂ ܡܶܢ ܦܿܽܘܢܺܝܩܺܐ ܕܣܽܘܪܺܝܰܐ܂ ܘܒܼܳܥܝܳܐ ܗ̱ܘܳܬܼ ܡܶܢܶܗ܂ ܕܢܰܦܿܶܩ ܫܺܐܕܼܳܐ ܡܶܢ ܒܰܪܬܼܳܗ܂
07:27 [ai]ܘܶܐܡܰܪ ܠܳܗ ܝܶܫܽܘܥ܂ ܫܒܼܽܘܩܝ ܠܽܘܩܕܼܰܡ ܕܢܶܣܒܿܥܽܘܢ ܒܢܰܝܳܐ܂ ܠܳܐ ܗ̱ܘܳܬܼ ܓܶܝܪ ܫܰܦܿܺܝܪܳܐ ܕܢܶܣܰܒܼ ܠܰܚܡܳܐ ܕܿܰܒܼܢܰܝܳܐ܂ ܘܢܰܪܡܶܐ ܠܟܼܰܠܒܿܶܐ̈܂
07:28 [ai]ܗܺܝ ܕܶܝܢ ܥܢܳܬܼ܂ ܘܳܐܡܪܳܐ ܠܶܗ܂ ܐܺܝܢ ܡܳܪܝ܂ ܐܳܦܼ ܟܰܠܒܿܶܐ̈܂ ܡܶܢ ܬܚܶܝܬܼ ܦܿܳܬܼܽܘܪ̈ܶܐ܂ ܐܳܟܼܠܺܝܢ ܦܿܰܪ̈ܬܿܽܘܬܼܶܐ ܕܿܰܒܼܢܰܝܳܐ܂
07:29 [ai]ܐܳܡܰܪ ܠܳܗ ܝܶܫܽܘܥ܂ ܙܶܠܝ܂ ܡܶܛܽܠ ܗܳܕܼܶܐ ܡܶܠܬܼܳܐ܂ ܢܦܼܰܩ ܠܶܗ ܫܺܐܕܼܳܐ ܡܶܢ ܒܰܪܬܼܶܟܼܝ܂
07:30 [ai]ܘܶܐܙܰܠ̱ܬܼ ܠܒܼܰܝܬܿܳܗ܃ ܘܶܐܫܟܿܚܰܬܼ ܒܰܪܬܼܳܗ ܟܰܕܼ ܪܰܡܝܳܐ ܒܥܰܪܣܳܐ܂ ܘܢܰܦܿܺܝܩ ܡܶܢܳܗ ܫܺܐܕܼܳܗ܀
07:31 [ai]ܬܽܘܒܼ ܢܦܼܰܩ ܝܶܫܽܘܥ ܡܶܢ ܬܚܽܘܡܳܐ ܕܨܽܘܪ ܘܰܕܼܨܰܝܕܳܢ܂ ܘܶܐܬܼܳܐ ܠܝܰܡܳܐ ܕܰܓܼܠܺܝܠܳܐ܂ ܒܰܬܼܚܽܘܡܳܐ ܕܥܶܣܪܰܬܼ ܡ̈ܕܼܺܝܢܳܬܼܳܐ܂
07:32 [ai]ܘܰܐܝܬܿܺܝܘ ܠܶܗ ܚܰܪܫܳܐ ܚܰܕܼ ܦܺܐܩܳܐ܂ ܘܒܼܳܥܶܐ ܗ̱ܘܰܘ ܡܶܢܶܗ܂ ܕܰܢܣܺܝܡ ܥܠܰܘܗ̱ܝ ܐܺܝܕܼܳܐ܂
07:33 [ai]ܘܢܰܓܼܕܿܶܗ ܡܶܢ ܟܶܢܫܳܐ ܒܰܠܚܽܘܕܼܰܘܗ̱ܝ܃ ܘܰܐܪܡܺܝ ܨܶܒܼܥܳܬܼܶܗ̈ ܒܶܐܕܼܢܰܘܗ̱ܝ̈܂ ܘܪܰܩ܂ ܘܰܩܪܶܒܼ ܠܠܶܫܳܢܶܗ܂
07:34 [ai]ܘܚܳܪ ܒܰܫܡܰܝܳܐ܂ ܘܶܐܬܿܬܿܰܢܰܚ܂ ܘܶܐܡܰܪ ܠܶܗ܂ ܐܶܬܼܦܿܰܬ̱ܿܚ܂
07:35 [ai]ܘܒܼܳܗ ܒܫܳܥܬܼܳܐ܂ ܐܶܬܼܦܰܬܿܰܚ ܐܶܕܼܢܰܘܗ̱ܝ̈܃ ܘܶܐܫܬܿܰܪܺܝ ܐܶܣܳܪܳܐ ܕܠܶܫܳܢܶܗ܂ ܘܡܰܠܶܠ ܦܫܺܝܩܳܐܺܝܬܼ܂
07:36 [ai]ܘܙܰܗܰܪ ܐܶܢܽܘܢ܂ ܕܰܠܐ̱ܢܳܫ ܠܳܐ ܢܺܐܡܪܽܘܢ܀ ܘܰܟܼܡܳܐ ܕܗܽܘ ܡܙܰܗܰܪ ܗ̱ܘܳܐ ܠܗܽܘܢ܃ ܗܶܢܽܘܢ ܝܰܬܿܺܝܪ ܡܰܟܼܪܙܺܝܢ ܗ̱ܘܰܘ܂
07:37 [ai]ܘܝܰܬܿܺܝܪܳܐܺܝܬܼ ܡܶܬܿܕܰܡܪܺܝܢ ܗ̱ܘܰܘ܂ ܘܳܐܡܪܺܝܢ܂ ܕܟܽܠ ܡܶܕܶܡ ܫܰܦܿܺܝܪ ܥܳܒܼܶܕܼ܂ ܠܚܰܪ̈ܫܶܐ܂ ܥܳܒܼܶܕܼ ܕܢܶܫܡܥܽܘܢ܃ ܘܰܕܼܠܳܐ ܡܡܰܠܠܺܝܢ ܕܰܢܡܰܠܠܽܘܢ܀

next chapter