← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


08:01 [ai]ܒܗܳܢܽܘܢ ܕܶܝܢ ܝܰܘܡܳܬܼܳܐ̈܃ ܟܰܕܼ ܟܶܢܫܳܐ ܣܰܓܿܺܝܳܐܐ ܐܺܝܬܼ ܗ̱ܘܳܐ܃ ܘܠܳܐ ܐܺܝܬܼ ܗ̱ܘܳܐ ܡܶܕܶܡ ܕܢܶܐܟܼܠܽܘܢ܃ ܩܪܳܐ ܠܬܼܰܠܡܺܝܕܼܰܘܗ̱ܝ̈ ܘܶܐܡܰܪ ܠܗܽܘܢ܂
08:02 [ai]ܡܶܬܼܪܰܚܰܡ ܐ̱ܢܳܐ ܥܰܠ ܟܶܢܫܳܐ ܗܳܢܳܐ܃ ܕܗܳܐ ܬܠܳܬܼܳܐ ܝܰܘܡܺܝܢ̈ ܩܰܘܺܝܘ ܠܘܳܬܼܝ܂ ܘܠܰܝܬܿ ܠܗܽܘܢ ܡܳܢܳܐ ܢܶܐܟܼܠܽܘܢ܂
08:03 [ai]ܘܶܐܢ ܗܽܘ ܕܫܳܪܶܐ ܐ̱ܢܳܐ ܠܗܽܘܢ ܟܰܕܼ ܨܳܝܡܺܝܢ̈ ܠܒܼܳܬܿܰܝܗܽܘܢ̈܃ ܥܳܝܦܿܺܝܢ ܒܽܐܘܪܚܳܐ܂ ܐ̱ܢܳܫܳܐ ܓܶܝܪ ܡܶܢܗܽܘܢ܂ ܡܶܢ ܪܽܘܚܩܳܐ ܐܰܬܿܺܝܐܺܝܢ܂
08:04 [ai]ܐܳܡܪܺܝܢ ܠܶܗ ܬܰܠܡܺܝܕܼܰܘܗ̱ܝ̈܂ ܐܰܝܡܶܟܿܳܐ ܡܶܫܟܿܰܚ ܐ̱ܢܳܫ ܗܳܪܟܿܳܐ ܒܚܽܘܪܒܿܳܐ܃ ܕܰܢܣܰܒܿܰܥ ܠܰܚܡܳܐ ܠܗܳܠܶܝܢ ܟܽܠܗܽܘܢ܂
08:05 [ai]ܘܫܰܐܶܠ ܐܶܢܽܘܢ ܗܽܘ܃ ܟܡܳܐ ܠܰܚܡܺܝܢ̈ ܐܺܝܬܼ ܠܟܼܽܘܢ܂ ܐܳܡܪܺܝܢ ܠܶܗ܂ ܫܰܒܼܥܳܐ܂
08:06 [ai]ܘܰܦܼܩܰܕܼ ܠܟܼܶܢܫܶܐ̈ ܕܢܶܣܬܿܰܡܟܿܽܘܢ ܥܰܠ ܐܰܪܥܳܐ܂ ܘܰܢܣܰܒܼ ܗܳܢܽܘܢ ܫܰܒܼܥܳܐ ܠܰܚܡܺܝܢ̈܃ ܘܒܼܰܪܶܟܼ ܘܰܩܨܳܐ܂ ܘܝܰܗ̱ܒܼ ܠܬܼܰܠܡܺܝܕܼܰܘܗ̱ܝ̈ ܕܰܢܣܺܝܡܽܘܢ܂ ܘܣܳܡܘ ܠܟܼܶܢܫܶܐ̈܂
08:07 [ai]ܘܺܐܝܬܼ ܗ̱ܘܰܘ ܢܽܘܢܶܐ̈ ܩܰܠܺܝܠ܃ ܘܳܐܦܼ ܥܠܰܝܗܽܘܢ ܒܰܪܶܟܼ܂ ܘܶܐܡܰܪ ܕܰܢܣܺܝܡܽܘܢ ܐܶܢܽܘܢ܂
08:08 [ai]ܘܶܐܟܼܰܠܘ܂ ܘܰܣܒܼܰܥܘ܂ ܘܰܫܩܰܠܘ ܬܰܘܬܿܳܪ̈ܶܐ ܕܰܩܨܳܝܶܐ̈ ܫܰܒܼܥܳܐ ܐܶܣܦܿܪ̈ܺܝܕܼܺܝܢ܂
08:09 [ai]ܐܺܝܬܼܰܝܗܽܘܢ ܗ̱ܘܰܘ ܕܶܝܢ ܐ̱ܢܳܫܳܐ ܕܶܐܟܼܰܠܘ܃ ܐܰܝܟܼ ܐܰܪܒܥܳܐ ܐܰܠܦܼܺܝܢ̈܂
08:10 [ai]ܘܰܫܪܳܐ ܐܶܢܽܘܢ܂ ܘܰܣܠܶܩ ܡܶܚܕܼܳܐ ܠܰܣܦܼܺܝܢ̱ܬܳܐ ܥܰܡ ܬܰܠܡܺܝܕܼܰܘܗ̱ܝ̈܃ ܘܶܐܬܼܳܐ ܠܰܐܬܼܪܳܐ ܕܕܼܰܠܡܳܢܽܘܬܼܳܐ܀
08:11 [ai]ܘܰܢܦܼܰܩܘ ܦܿܪ̈ܺܝܫܶܐ܂ ܘܫܰܪܺܝܘ ܠܡܶܒܼܥܳܐ ܥܰܡܶܗ܂ ܘܫܳܐܠܺܝܢ ܗ̱ܘܰܘ ܠܶܗ ܐܳܬܼܳܐ ܡܶܢ ܫܡܰܝܳܐ܂ ܟܰܕܼ ܡܢܰܣܶܝܢ ܠܶܗ܀
08:12 [ai]ܘܶܐܬܿܬܿܰܢܰܚ ܒܪܽܘܚܶܗ܂ ܘܶܐܡܰܪ܂ ܡܳܢܳܐ ܒܿܳܥܝܳܐ ܐܳܬܼܳܐ ܫܰܪܒܿܬܼܳܐ ܗܳܕܼܶܐ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܂ ܕܠܳܐ ܬܶܬܼܺܝܗܶܒܼ ܠܳܗ ܐܳܬܼܳܐ ܠܫܰܪܒܿܬܼܳܐ ܗܳܕܼܶܐ܂
08:13 [ai]ܘܰܫܒܼܰܩ ܐܶܢܽܘܢ܂ ܘܰܣܠܶܩ ܠܰܣܦܼܺܝܢ̱ܬܳܐ܃ ܘܶܐܙܰܠܘ ܠܗܰܘ ܥܶܒܼܪܳܐ܂
08:14 [ai]ܘܰܛܥܰܘ ܕܢܶܣܒܼܽܘܢ ܠܰܚܡܳܐ܂ ܘܶܐܠܳܐ ܚܕܼܳܐ ܓܪܺܝܨܬܳܐ܂ ܠܰܝܬܿ ܗ̱ܘܳܐ ܥܰܡܗܽܘܢ ܒܰܣܦܼܺܝܢ̱ܬܳܐ܀
08:15 [ai]ܘܦܼܰܩܶܕܼ ܐܶܢܽܘܢ܂ ܘܶܐܡܰܪ ܠܗܽܘܢ܂ ܚܙܰܘ ܐܶܙܕܿܰܗ̱ܪܘ ܡܶܢ ܚܡܺܝܪܳܐ ܕܿܰܦܼܪ̈ܺܝܫܶܐ܂ ܘܡܶܢ ܚܡܺܝܪܶܗ ܕܗܶܪܳܘܕܼܶܣ܂
08:16 [ai]ܘܡܶܬܼܚܰܫܒܼܺܝܢ ܗ̱ܘܰܘ ܚܰܕܼ ܥܰܡ ܚܰܕܼ ܘܳܐܡܪܺܝܢ܃ ܕܠܰܚܡܳܐ ܠܰܝܬܿ ܠܰܢ܂
08:17 [ai]ܝܶܫܽܘܥ ܕܶܝܢ ܺܝܕܼܰܥ ܘܶܐܡܰܪ ܠܗܽܘܢ܂ ܡܳܢܳܐ ܪܳܢܶܝܢ ܐܢ̱ܬܿܽܘܢ܃ ܕܠܰܚܡܳܐ ܠܰܝܬܿ ܠܟܼܽܘܢ܂ ܠܳܐ ܥܕܼܰܡܳܐ ܠܗܳܫܳܐ ܝܳܕܼܥܺܝܢ ܐܢ̱ܬܿܽܘܢ܃ ܘܠܳܐ ܡܶܣܬܿܰܟܠܺܝܢ ܐܢ̱ܬܿܽܘܢ܃ ܥܕܼܰܟܿܺܝܠ ܠܶܒܿܳܐ ܩܰܫܝܳܐ ܐܺܝܬܼ ܠܟܼܽܘܢ܃
08:18 [ai]ܘܥܰܝܢܶܐ̈ ܐܺܝܬܼ ܠܟܼܽܘܢ܂ ܘܠܳܐ ܚܳܙܶܝܢ ܐܢ̱ܬܿܽܘܢ܂ ܘܶܐܕܼܢܶܐ̈ ܐܺܝܬܼ ܠܟܼܽܘܢ܂ ܘܠܳܐ ܫܳܡܥܺܝܢ ܐܢ̱ܬܿܽܘܢ܂ ܘܠܳܐ ܥܳܗܕܺܝܢ ܐܢ̱ܬܿܽܘܢ܂
08:19 [ai]ܟܰܕܼ ܗܳܠܶܝܢ ܚܰܡܫܳܐ ܠܰܚܡܺܝܢ̈ ܩܨܺܝܬܼ ܠܚܰܡܫܳܐ ܐܰܠܦܼܺܝܢ̈܃ ܟܡܳܐ ܩܽܘܦܼܺܝܢܺܝܢ̈ ܕܰܩܨܳܝܶܐ̈ ܟܰܕܼ ܡܠܶܝܢ ܫܩܰܠܬܿܽܘܢ܂ ܐܳܡܪܺܝܢ ܠܶܗ ܬܪܶܥܣܰܪ܂
08:20 [ai]ܐܳܡܰܪ ܠܗܽܘܢ܂ ܘܟܼܰܕܼ ܫܰܒܼܥܳܐ ܠܰܐܪܒܥܳܐ ܐܰܠܦܼܺܝܢ̈܃ ܟܡܳܐ ܐܶܣܦܿܪ̈ܺܝܕܼܺܝܢ ܕܰܩܨܳܝܶܐ̈ ܟܰܕܼ ܡܠܶܝܢ ܫܩܰܠܬܿܽܘܢ܂ ܐܳܡܪܺܝܢ ܫܰܒܼܥܳܐ܂
08:21 [ai]ܐܳܡܰܪ ܠܗܽܘܢ܂ ܐܰܝܟܿܰܘ ܠܳܐ ܥܕܼܰܡܳܐ ܠܗܳܫܳܐ ܡܶܣܬܿܰܟܠܺܝܢ ܐܢ̱ܬܿܽܘܢ܀
08:22 [ai]ܘܶܐܬܼܳܐ ܠܒܼܶܝܬܼ ܨܰܝܳܕܿܳܐ܂ ܘܰܐܝܬܿܺܝܘ ܠܶܗ ܣܰܡܝܳܐ܂ ܘܒܼܳܥܶܝܢ ܗ̱ܘܰܘ ܡܶܢܶܗ܂ ܕܢܶܩܪܽܘܒܼ ܠܶܗ܂
08:23 [ai]ܘܶܐܚܰܕܼ ܒܺܐܝܕܼܶܗ ܕܣܰܡܝܳܐ܂ ܘܰܐܦܿܩܶܗ ܠܒܼܰܪ ܡܶܢ ܩܪܺܝܬܼܳܐ܂ ܘܪܰܩ ܒܥܰܝܢܰܘܗ̱ܝ̈܂ ܘܣܳܡ ܐܺܝܕܼܶܗ ܘܫܰܐܠܶܗ܂ ܕܡܳܢܳܐ ܚܳܙܶܐ܂
08:24 [ai]ܚܳܪ ܘܶܐܡܰܪ܂ ܚܳܙܶܐ ܐ̱ܢܳܐ ܒܢܰܝ ܐ̱ܢܳܫܳܐ̈܂ ܐܰܝܟܼ ܐܺܝܠܳܢܶܐ̈ ܕܰܡܗܰܠܟܼܺܝܢ܂
08:25 [ai]ܬܽܘܒܼ ܣܳܡ ܐܺܝܕܼܶܗ ܥܰܠ ܥܰܝܢܰܘܗ̱ܝ̈܂ ܘܰܬܼܩܶܢ܂ ܘܚܳܙܶܐ ܗ̱ܘܳܐ ܟܽܠ ܡܶܕܶܡ ܢܰܗܺܝܪܳܐܺܝܬܼ܂
08:26 [ai]ܘܫܰܕܿܪܶܗ ܠܒܼܰܝܬܿܶܗ܂ ܘܶܐܡܰܪ܂ ܐܳܦܼ ܠܳܐ ܠܰܩܪܺܝܬܼܳܐ ܬܶܥܽܘܠ܂ ܘܠܳܐ ܬܺܐܡܰܪ ܠܐ̱ܢܳܫ ܒܰܩܪܺܝܬܼܳܐ܀܀
08:27 [ai]ܘܰܢܦܼܰܩ ܝܶܫܽܘܥ ܘܬܼܰܠܡܺܝܕܼܰܘܗ̱ܝ̈ ܠܩܽܘܪ̈ܝܳܐ ܕܩܶܣܰܪܺܝܰܐ ܕܼܦܼܺܝܠܺܝܦܿܳܘܣ܀ ܘܰܡܫܰܐܶܠ ܗ̱ܘܳܐ ܠܬܼܰܠܡܺܝܕܼܰܘܗ̱ܝ̈ ܒܽܐܘܪܚܳܐ܂ ܘܳܐܡܰܪ ܠܗܽܘܢ܂ ܡܰܢܽܘ ܐܳܡܪܺܝܢ ܥܠܰܝ ܐ̱ܢܳܫܳܐ̈ ܕܺܐܝܬܼܰܝ܂
08:28 [ai]ܗܶܢܽܘܢ ܕܶܝܢ ܐܶܡܰܪܘ܂ ܕܝܽܘܚܰܢܳܢ ܡܰܥܡܕܼܳܢܳܐ܂ ܘܰܐ̱ܚܪ̈ܳܢܶܐ ܕܺܐܠܺܝܳܐ܂ ܘܰܐ̱ܚܪ̈ܳܢܶܐ ܚܰܕܼ ܡܶܢ ܢܒܼܺܝܶܐ̈܂
08:29 [ai]ܐܳܡܰܪ ܠܗܽܘܢ ܝܶܫܽܘܥ܂ ܐܰܢ̱ܬܿܽܘܢ ܕܶܝܢ܂ ܡܰܢܽܘ ܐܳܡܪܺܝܢ ܐܢ̱ܬܿܽܘܢ ܥܠܰܝ܂ ܕܺܐܝܬܼܰܝ܂ ܥܢܳܐ ܫܶܡܥܽܘܢ܂ ܘܶܐܡܰܪ ܠܶܗ܂ ܐܰܢ̱ܬܿ ܗ̱ܽܘ ܡܫܺܝܚܳܐ܂ ܒܪܶܗ ܕܰܐܠܳܗܳܐ ܚܰܝܳܐ܀
08:30 [ai]ܘܰܟܼܐܳܐ ܒܗܽܘܢ܂ ܕܰܠܐ̱ܢܳܫ ܠܳܐ ܢܺܐܡܪܽܘܢ ܥܠܰܘܗ̱ܝ܂
08:31 [ai]ܘܫܰܪܺܝ ܗ̱ܘܳܐ ܠܡܰܠܳܦܼܽܘ ܐܶܢܽܘܢ܃ ܕܰܥܬܼܺܝܕܼ ܗ̱ܽܘ ܒܪܶܗ ܕܐ̱ܢܳܫܳܐ܂ ܕܢܶܚܰܫ ܣܰܓܿܺܝ܂ ܘܰܕܼܢܶܣܬܠܶܐ ܡܶܢ ܩܰܫܺܝܫܶܐ̈܂ ܘܡܶܢ ܪ̈ܰܒܰܝ ܟܳܗܢܶܐ̈܂ ܘܡܶܢ ܣܳܦܼܪ̈ܶܐ܃ ܘܢܶܬܼܩܛܶܠ܂ ܘܠܰܬܼܠܳܬܼܳܐ ܝܰܘܡܺܝܢ̈܂ ܢܩܽܘܡ܂
08:32 [ai]ܘܥܺܝܢ ܒܰܓܼܠܶܐ܂ ܡܶܠܬܼܳܐ ܡܡܰܠܶܠ ܗ̱ܘܳܐ܂ ܘܕܼܰܒܼܪܶܗ ܟܺܐܦܼܳܐ܂ ܘܫܰܪܺܝ ܠܡܶܟܼܳܐܐ ܒܶܗ܂
08:33 [ai]ܗܽܘ ܕܶܝܢ ܐܶܬܼܦܿܢܺܝ܂ ܘܚܳܪ ܒܬܰܠܡܺܝܕܼܰܘܗ̱ܝ̈܂ ܘܰܟܼܐܳܐ ܒܫܶܡܥܽܘܢ܂ ܘܶܐܡܰܪ܂ ܙܶܠ ܠܳܟܼ ܠܒܼܶܣܬܿܰܪܝ ܣܳܛܳܢܳܐ܃ ܕܠܳܐ ܪܳܢܶܐ ܐܰܢ̱ܬܿ ܕܰܐܠܳܗܳܐ܂ ܐܶܠܳܐ ܕܿܰܒܼܢܰܝ ܐ̱ܢܳܫܳܐ̈ ܿ܀ܿ܀ܿ
08:34 [ai]ܘܰܩܪܳܐ ܝܶܫܽܘܥ ܠܟܼܶܢܫܶܐ̈܂ ܥܰܡ ܬܰܠܡܺܝܕܼܰܘܗ̱ܝ̈܂ ܘܶܐܡܰܪ ܠܗܽܘܢ܂ ܡܰܢ ܕܨܳܒܼܶܐ܂ ܕܢܺܐܬܼܶܐ ܒܳܬܼܰܪܝ܃ ܢܶܟܼܦܿܽܘܪ ܒܢܰܦܼܫܶܗ܂ ܘܢܶܫܩܽܘܠ ܙܩܺܝܦܼܶܗ܂ ܘܢܺܐܬܼܶܐ ܒܳܬܼܰܪܝ܂
08:35 [ai]ܟܽܠ ܡܰܢ ܕܨܳܒܼܶܐ ܓܶܝܪ ܕܢܰܚܶܐ ܢܰܦܼܫܶܗ܂ ܢܰܘܒܿܕܼܺܝܗ܂ ܘܟܼܽܠ ܕܢܰܘܒܿܶܕܼ ܢܰܦܼܫܶܗ ܡܶܛܽܠܳܬܼܝ܂ ܘܡܶܛܽܠ ܣܒܼܰܪܬܼܝ܂ ܢܰܚܶܝܗ܂
08:36 [ai]ܡܳܢܳܐ ܓܶܝܪ ܢܶܬܼܥܰܕܿܰܪ ܒܰܪܢܳܫܳܐ܃ ܐܶܢ ܥܳܠܡܳܐ ܟܽܠܶܗ ܢܺܐܬܼܰܪ܂ ܘܢܰܦܼܫܶܗ ܢܶܚܣܰܪ܂
08:37 [ai]ܐܰܘ ܡܳܢܳܐ ܢܶܬܿܶܠ ܒܰܪܢܳܫܳܐ ܬܰܚܠܽܘܦܼܳܐ ܕܢܰܦܼܫܶܗ܂
08:38 [ai]ܟܽܠ ܓܶܝܪ ܕܢܶܒܼܗܰܬܼ ܒܺܝ ܘܰܒܡܶܠܰܝ̈܂ ܒܫܰܪܒܿܬܼܳܐ ܗܳܕܼܶܐ ܚܰܛܳܝܬܳܐ ܘܓܼܰܝܳܪܬܼܳܐ܃ ܘܳܐܦܼ ܒܪܶܗ ܕܐ̱ܢܳܫܳܐ ܢܶܒܼܗܰܬܼ ܒܶܗ܃ ܡܳܐ ܕܳܐܬܼܶܐ ܒܫܽܘܒܼܚܳܐ ܕܰܐܒܼܽܘܗ̱ܝ܂ ܥܰܡ ܡܰܠܰܐܟܼܰܘܗ̱ܝ̈ ܩܰܕܿܺܝܫܶܐ̈܀

next chapter