The Comprehensive Aramaic Lexicon

09:01 [ai]	ܘܶܐܡܰܪ ܗ̱ܘܳܐ ܠܗܽܘܢ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܺܐܝܬܼ ܐ̱ܢܳܫܳܐ ܕܩܳܝܡܺܝܢ ܬܢܳܢ܃ ܕܠܳܐ ܢܶܛܥܡܽܘܢ ܡܰܘܬܳܐ܃ ܥܕܼܰܡܳܐ ܕܢܶܚܙܽܘܢ ܡܰܠܟܿܽܘܬܼܶܗ ܕܰܐܠܳܗܳܐ ܕܶܐܬܼܳܬܼ ܒܚܰܝܠܳܐ܀܀
09:02 [ai]	ܘܒܼܳܬܼܰܪ ܫܬܳܐ ܝܰܘܡܺܝܢ̈܃ ܕܒܰܪ ܝܶܫܽܘܥ ܠܟܼܺܐܦܼܳܐ܂ ܘܰܠܝܰܥܩܽܘܒܼ܂ ܘܰܠܝܽܘܚܰܢܳܢ܂ ܘܰܐܣܶܩ ܐܶܢܽܘܢ ܠܛܽܘܪܳܐ ܪܳܡܳܐ ܒܰܠܚܽܘܕܼܰܝܗܽܘܢ܂ ܘܶܐܬܼܚܰܠܰܦܼ ܠܥܺܢܰܝܗܽܘܢ̈܂
09:03 [ai]	ܘܡܰܙܗܰܪ ܗ̱ܘܳܐ ܠܒܼܽܘܫܶܗ܂ ܘܡܰܚܘܰܪ ܛܳܒܼ܂ ܐܰܝܟܼ ܬܰܠܓܿܳܐ܂ ܐܰܝܟܿܰܢܳܐ ܕܿܰܒܼܢܰܝ ܐ̱ܢܳܫܳܐ̈ ܠܡܰܚܘܳܪܽܘ ܒܰܐܪܥܳܐ܂ ܠܳܐ ܡܶܫܟܿܚܺܝܢ܂
09:04 [ai]	ܘܶܐܬܼܚܙܺܝܘ ܠܗܽܘܢ ܐܺܠܺܝܳܐ ܘܡܽܘܫܶܐ܂ ܟܰܕܼ ܡܡܰܠܠܺܝܢ ܥܰܡ ܝܶܫܽܘܥ܂
09:05 [ai]	ܘܶܐܡܰܪ ܠܶܗ ܟܺܐܦܼܳܐ܂ ܪܰܒܺܝ܃ ܫܰܦܿܺܝܪ ܗ̱ܽܘ ܠܰܢ܂ ܕܗܳܪܟܿܳܐ ܢܶܗܘܶܐ܂ ܘܢܶܥܒܿܶܕܼ ܬܠܳܬܼ ܡܰܛܠܺܝܢ̈܂ ܠܳܟܼ ܚܕܼܳܐ܂ ܘܰܠܡܽܘܫܶܐ ܚܕܼܳܐ܂ ܘܠܺܐܠܺܝܳܐ ܚܕܼܳܐ܂
09:06 [ai]	ܠܳܐ ܕܶܝܢ ܝܳܕܼܰܥ ܗ̱ܘܳܐ ܡܳܢܳܐ ܐܳܡܰܪ܂ ܐܺܝܬܼܰܝܗܽܘܢ ܗ̱ܘܰܘ ܓܶܝܪ ܒܕܶܚܠܬܼܳܐ܂
09:07 [ai]	ܘܰܗܘܳܬܼ ܥܢܳܢܳܐ܂ ܘܡܰܛܠܳܐ ܗ̱ܘܳܬܼ ܥܠܰܝܗܽܘܢ܂ ܘܩܳܠܳܐ ܡܶܢ ܥܢܳܢܳܐ ܕܳܐܡܰܪ܂ ܗܳܢܰܘ ܒܶܪܝ ܚܰܒܺܝܒܼܳܐ܃ ܠܶܗ ܫܡܰܥܘ܂
09:08 [ai]	ܘܡܶܢ ܫܶܠܝܳܐ܂ ܟܰܕܼ ܚܳܪܘ ܬܰܠܡܺܝܕܼܶܐ̈܃ ܠܐ̱ܢܳܫ ܠܳܐ ܚܙܰܘ܂ ܐܶܠܳܐ ܠܝܶܫܽܘܥ ܒܰܠܚܽܘܕܼܰܘܗ̱ܝ ܥܰܡܗܽܘܢ܂
09:09 [ai]	ܘܟܼܰܕܼ ܢܳܚܬܿܺܝܢ ܡܶܢ ܛܽܘܪܳܐ܃ ܡܦܼܰܩܶܕܼ ܗ̱ܘܳܐ ܠܗܽܘܢ܃ ܕܰܠܐ̱ܢܳܫ ܠܳܐ ܢܺܐܡܪܽܘܢ ܡܶܕܶܡ ܕܰܚܙܰܘ܃ ܐܶܠܳܐ ܐܶܢ ܡܳܐ ܕܩܳܡ ܒܪܶܗ ܕܐ̱ܢܳܫܳܐ ܡܶܢ ܡܺܝܬܼܶܐ̈܀
09:10 [ai]	ܘܰܐܚܕܿܽܘܗ ܠܡܶܠܬܼܳܐ ܒܢܰܦܼܫܗܽܘܢ܂ ܘܒܼܳܥܶܝܢ ܗ̱ܘܰܘ܂ ܕܡܳܢܳܐ ܗ̱ܝ ܗܳܕܼܶܐ ܡܶܠܬܼܳܐ܂ ܕܡܳܐ ܕܩܳܡ ܡܶܢ ܒܶܝܬܼ ܡܺܝܬܼܶܐ̈܀
09:11 [ai]	ܘܰܡܫܰܐܠܺܝܢ ܗ̱ܘܰܘ ܠܶܗ܂ ܘܳܐܡܪܺܝܢ܂ ܡܳܢܳܐ ܗܳܟܼܺܝܠ ܐܳܡܪܺܝܢ ܣܳܦܼܪ̈ܶܐ܃ ܕܺܐܠܺܝܳܐ ܘܳܠܶܐ ܕܢܺܐܬܼܶܐ ܠܽܘܩܕܼܰܡ܂
09:12 [ai]	ܐܳܡܰܪ ܠܗܽܘܢ܂ ܐܺܠܺܝܳܐ ܐܳܬܼܶܐ ܠܽܘܩܕܼܰܡ܂ ܕܟܽܠܡܶܕܶܡ ܢܰܬܼܩܶܢ܂ ܘܰܐܝܟܿܰܢܳܐ ܟܬܼܺܝܒܼ ܥܰܠ ܒܪܶܗ ܕܐ̱ܢܳܫܳܐ܂ ܕܣܰܓܿܺܝ ܢܶܚܰܫ܂ ܘܢܶܣܬܠܶܐ܂
09:13 [ai]	ܐܶܠܳܐ ܐܳܡܰܪ ܐ̱ܢܳܐ ܠܟܼܽܘܢ܂ ܕܳܐܦܼ ܐܺܠܺܝܳܐ ܐܶܬܼܳܐ܃ ܘܰܥܒܼܰܕܼܘ ܒܶܗ܂ ܟܽܠܡܳܐ ܕܰܨܒܼܰܘ܂ ܐܰܝܟܿܰܢܳܐ ܕܰܟܼܬܼܺܝܒܼ ܥܠܰܘܗ̱ܝ܀
09:14 [ai]	ܘܟܼܰܕܼ ܐܶܬܼܳܐ ܠܘܳܬܼ ܬܰܠܡܺܝܕܼܶܐ̈܃ ܚܙܳܐ ܠܘܳܬܼܗܽܘܢ ܟܶܢܫܳܐ ܣܰܓܿܺܝܳܐܐ܂ ܘܣܳܦܼܪ̈ܶܐ ܟܰܕܼ ܕܳܪܫܺܝܢ ܥܰܡܗܽܘܢ܂
09:15 [ai]	ܘܒܼܰܪ ܫܳܥܬܼܶܗ ܟܽܠܶܗ ܟܶܢܫܳܐ ܚܙܰܐܘܽܗ̱ܝ܂ ܘܰܬܼܘܰܗܘ܂ ܘܰܪܗܶܛܘ ܫܶܐܠܘ ܒܰܫܠܳܡܶܗ܂
09:16 [ai]	ܘܰܡܫܰܐܶܠ ܗ̱ܘܳܐ ܠܣܳܦܼܪ̈ܶܐ܂ ܡܳܢܳܐ ܕܳܪܫܺܝܢ ܐܢ̱ܬܿܽܘܢ ܥܰܡܗܽܘܢ܀
09:17 [ai]	ܘܰܥܢܳܐ ܚܰܕܼ ܡܶܢ ܟܶܢܫܳܐ܂ ܘܶܐܡܰܪ܂ ܡܰܠܦܼܳܢܳܐ܃ ܐܰܝܬܿܺܝܬܼ ܒܶܪܝ ܠܘܳܬܼܳܟܼ܃ ܕܺܐܝܬܼ ܠܶܗ ܪܽܘܚܳܐ܂ ܕܠܳܐ ܡܡܰܠܠܳܐ܂
09:18 [ai]	ܘܰܐܝܟܿܳܐ ܕܡܰܕܼܪܟܼܳܐ ܠܶܗ܂ ܚܳܒܼܛܳܐ ܠܶܗ܂ ܘܡܰܪܥܶܬܼ܂ ܘܰܡܚܰܪܶܩ ܫܶܢܰܘܗ̱ܝ̈܂ ܘܝܳܒܼܶܫ܂ ܘܶܐܡܪܶܬܼ ܠܬܼܰܠܡܺܝܕܼܰܝܟܿ̈܂ ܕܢܰܦܿܩܽܘܢܳܝܗ̱ܝ܂ ܘܠܳܐ ܐܶܫܟܿܰܚܘ܂
09:19 [ai]	ܥܢܳܐ ܝܶܫܽܘܥ܂ ܘܶܐܡܰܪ ܠܶܗ܂ ܐܽܘܢ ܫܰܪܒܿܬܼܳܐ ܕܠܳܐ ܡܗܰܝܡܢܳܐ܃ ܥܕܼܰܡܳܐ ܠܶܐܡܰܬܼܝ ܐܶܗܘܶܐ ܠܘܳܬܼܟܼܽܘܢ܂ ܘܰܥܕܼܰܡܳܐ ܠܶܐܡܰܬܼܝ ܐܶܣܰܝܒܰܪܟܼܽܘܢ܂ ܐܰܝܬܿܰܐܘܽܗ̱ܝ ܠܘܳܬܼܝ܂
09:20 [ai]	ܘܰܐܝܬܿܝܽܘܗ̱ܝ ܠܘܳܬܼܶܗ܂ ܘܟܼܰܕܼ ܚܙܳܬܼܶܗ ܪܽܘܚܳܐ܂ ܒܰܪ ܫܳܥܬܼܶܗ ܚܒܼܰܛܬܼܶܗ܂ ܘܰܢܦܼܰܠ ܥܰܠ ܐܰܪܥܳܐ܃ ܘܡܶܬܼܒܿܰܥܰܩ ܗ̱ܘܳܐ܂ ܘܡܰܪܥܶܬܼ܀
09:21 [ai]	ܘܫܰܐܶܠ ܝܶܫܽܘܥ ܠܰܐܒܼܽܘܗ̱ܝ܃ ܕܰܟܼܡܳܐ ܠܶܗ ܙܰܒܼܢܳܐ܂ ܗܳܐ ܡܶܢ ܕܗܳܟܼܰܢܳܐ ܗܽܘ܂ ܐܳܡܰܪ ܠܶܗ܃ ܗܳܐ ܡܶܢ ܛܰܠܝܽܘܬܼܶܗ܂
09:22 [ai]	ܘܙܰܒܼܢܺܝܢ̈ ܣܰܓܿܺܝܳܐܢ̈܂ ܐܰܪܡܝܰܬܼܶܗ ܒܢܽܘܪܳܐ ܘܰܒܡܰܝܳܐ̈܂ ܕܬܰܘܒܿܕܼܺܝܘܗ̱ܝ܂ ܐܶܠܳܐ ܡܶܕܶܡ ܕܡܶܫܟܿܰܚ ܐܰܢ̱ܬܿ܂ ܥܰܕܿܰܪܰܝܢܝ܂ ܘܶܐܬܼܪܰܚܰܡ ܥܠܰܝ܂
09:23 [ai]	ܐܳܡܰܪ ܠܶܗ ܝܶܫܽܘܥ܂ ܐܶܢ ܡܶܫܟܿܰܚ ܐܰܢ̱ܬܿ ܕܰܬܼܗܰܝܡܶܢ܃ ܟܽܠ ܡܶܕܶܡ ܡܶܫܟܿܰܚ ܕܢܶܗܘܶܐ ܠܡܰܢ ܕܰܡܗܰܝܡܶܢ܂
09:24 [ai]	ܘܒܼܰܪ ܫܳܥܬܼܶܗ ܩܥܳܐ ܐܰܒܼܽܘܗ̱ܝ ܕܛܰܠܝܳܐ ܟܰܕܼ ܒܳܟܼܶܐ܂ ܘܳܐܡܰܪ܂ ܡܗܰܝܡܶܢ ܐ̱ܢܳܐ ܡܳܪܝ܃ ܥܰܕܿܰܪ ܠܚܰܣܺܝܪܽܘܬܼ ܗܰܝܡܳܢܽܘܬܼܝ܂
09:25 [ai]	ܟܰܕܼ ܚܙܳܐ ܕܶܝܢ ܝܶܫܽܘܥ ܕܪܳܗܶܛ ܥܰܡܳܐ܂ ܘܡܶܬܼܟܿܰܢܰܫ ܠܘܳܬܼܶܗ܃ ܟܐܳܐ ܒܗܳܝ ܪܽܘܚܳܐ ܛܰܢܦܼܬܼܳܐ܂ ܘܶܐܡܰܪ ܠܳܗ܂ ܪܽܘܚܳܐ ܚܰܪܶܫܬܼܳܐ ܕܠܳܐ ܡܡܰܠܠܳܐ܂ ܐܶܢܳܐ ܦܳܩܶܕܼ ܐ̱ܢܳܐ ܠܶܟܼܝ܃ ܦܽܘܩܝ ܡܶܢܶܗ܂ ܘܬܼܽܘܒܼ܂ ܠܳܐ ܬܶܥܠܺܝܢ ܠܶܗ܂
09:26 [ai]	ܘܰܩܥܳܐ ܫܺܐܕܼܳܐ ܗܰܘ ܣܰܓܿܺܝ܂ ܘܫܰܚܩܶܗ܃ ܘܰܢܦܼܰܩ܂ ܘܰܗܘܳܐ ܐܰܝܟܼ ܡܺܝܬܼܳܐ܂ ܐܰܝܟܼ ܕܣܰܓܿܺܝܶܐܐ̈ ܢܺܐܡܪܽܘܢ܂ ܕܡܺܝܬܼ ܠܶܗ܂
09:27 [ai]	ܗܽܘ ܕܶܝܢ ܝܶܫܽܘܥ ܐܰܚܕܿܶܗ ܒܺܐܝܕܼܶܗ܂ ܘܰܐܩܺܝܡܶܗ܀
09:28 [ai]	ܟܰܕܼ ܥܰܠ ܕܶܝܢ ܠܒܼܰܝܬܳܐ ܝܶܫܽܘܥ܃ ܫܰܐܠܽܘܗ̱ܝ ܬܰܠܡܺܝܕܼܰܘܗ̱ܝ̈ ܒܰܠܚܽܘܕܼܰܝܗܽܘܢ܂ ܠܡܳܢܳܐ ܚܢܰܢ ܠܳܐ ܐܶܫܟܿܰܚܢ ܠܡܰܦܿܳܩܽܘܬܼܶܗ܂
09:29 [ai]	ܐܳܡܰܪ ܠܗܽܘܢ܂ ܗܳܢܳܐ ܓܶܢܣܳܐ܂ ܒܡܶܕܶܡ ܠܳܐ ܡܶܫܟܿܰܚ ܠܡܶܦܿܰܩ܃ ܐܶܠܳܐ ܒܨܰܘܡܳܐ ܘܒܼܰܨܠܽܘܬܼܳܐ܀
09:30 [ai]	ܘܟܼܰܕܼ ܢܦܼܰܩ ܡܶܢ ܬܰܡܳܢ܃ ܥܳܒܼܪܺܝܢ ܗ̱ܘܰܘ ܒܰܓܼܠܺܝܠܳܐ܃ ܘܠܳܐ ܨܳܒܼܶܐ ܗ̱ܘܳܐ ܕܐ̱ܢܳܫ ܢܶܕܿܰܥ ܒܶܗ܂
09:31 [ai]	ܡܰܠܶܦܼ ܗ̱ܘܳܐ ܓܶܝܪ ܠܬܼܰܠܡܺܝܕܼܰܘܗ̱ܝ̈܂ ܘܳܐܡܰܪ ܠܗܽܘܢ܂ ܕܰܒܼܪܶܗ ܕܐ̱ܢܳܫܳܐ ܡܶܫܬܿܠܶܡ ܒܺܐܝܕܼܰܝ̈ ܐ̱ܢܳܫܳܐ܂ ܘܢܶܩܛܠܽܘܢܳܝܗ̱ܝ܂ ܘܡܳܐ ܕܶܐܬܼܩܛܶܠ܃ ܒܝܰܘܡܳܐ ܕܰܬܼܠܳܬܼܳܐ ܢܩܽܘܡ܂
09:32 [ai]	ܗܶܢܽܘܢ ܕܶܝܢ܂ ܠܳܐ ܝܳܕܼܥܺܝܢ ܗ̱ܘܰܘ ܠܳܗ ܠܡܶܠܬܼܳܐ܂ ܘܕܼܳܚܠܺܝܢ ܗ̱ܘܰܘ ܕܰܢܫܰܐܠܽܘܢܳܝܗ̱ܝ܀
09:33 [ai]	ܘܶܐܬܼܰܘ ܠܰܟܼܦܼܰܪܢܰܚܽܘܡ܂ ܘܟܼܰܕܼ ܥܰܠܘ ܠܒܼܰܝܬܳܐ܃ ܡܫܰܐܶܠ ܗ̱ܘܳܐ ܠܗܽܘܢ܂ ܕܡܳܢܳܐ ܡܶܬܼܚܰܫܒܼܺܝܢ ܗܘܰܝܬܿܽܘܢ ܒܽܐܘܪܚܳܐ ܒܰܝܢܳܬܼܟܼܽܘܢ܂
09:34 [ai]	ܗܶܢܽܘܢ ܕܶܝܢ ܫܰܬܿܺܝܩܺܝܢ ܗ̱ܘܰܘ܂ ܐܶܬܼܚܪܺܝܘ ܗ̱ܘܰܘ ܓܶܝܪ ܒܽܐܘܪܚܳܐ܂ ܚܰܕܼ ܥܰܡ ܚܰܕܼ܂ ܕܡܰܢܽܘ ܪܰܒܼ ܒܗܽܘܢ܂
09:35 [ai]	ܘܺܝܬܼܶܒܼ ܝܶܫܽܘܥ ܘܰܩܪܳܐ ܠܰܬܼܪܶܥܣܰܪ܂ ܘܶܐܡܰܪ ܠܗܽܘܢ܂ ܡܰܢ ܕܨܳܒܼܶܐ ܕܢܶܗܘܶܐ ܩܰܕܼܡܳܝܳܐ܃ ܢܶܗܘܶܐ ܐ̱ܚܪܳܝܳܐ ܕܟܽܠ ܐ̱ܢܳܫ܂ ܘܰܡܫܰܡܫܳܢܳܐ ܕܟܽܠ ܐ̱ܢܳܫ܂
09:36 [ai]	ܘܰܢܣܰܒܼ ܛܰܠܝܳܐ ܚܰܕܼ ܘܰܐܩܺܝܡܶܗ ܒܰܡܨܰܥܬܼܳܐ܂ ܘܫܰܩܠܶܗ ܥܰܠ ܕܿܪ̈ܳܥܰܘܗ̱ܝ܂ ܘܶܐܡܰܪ ܠܗܽܘܢ܂
09:37 [ai]	ܟܽܠ ܡܰܢ ܕܰܢܩܰܒܿܶܠ ܐܰܝܟܼ ܗܳܢܳܐ ܛܰܠܝܳܐ ܒܫܶܡܝ܂ ܠܺܝ ܗܽܘ ܡܩܰܒܿܶܠ܂ ܘܡܰܢ ܕܠܺܝ ܡܩܰܒܿܶܠ܃ ܠܳܐ ܗ̱ܘܳܐ ܠܺܝ ܡܩܰܒܿܶܠ܂ ܐܶܠܳܐ ܠܡܰܢ ܕܫܰܕܿܪܰܢܝ܀
09:38 [ai]	ܐܳܡܰܪ ܠܶܗ ܝܽܘܚܰܢܳܢ܂ ܪܰܒܺܝ܃ ܚܙܰܝܢ ܐ̱ܢܳܫ܂ ܕܡܰܦܿܶܩ ܫܺܐܕܼܶܐ̈ ܒܰܫܡܳܟܼ܂ ܘܰܟܼܠܰܝܢܳܝܗ̱ܝ܂ ܥܰܠ ܕܠܳܐ ܢܩܶܦܼ ܠܰܢ܂
09:39 [ai]	ܐܳܡܰܪ ܠܗܽܘܢ ܝܶܫܽܘܥ܂ ܠܳܐ ܬܶܟܼܠܽܘܢܳܝܗ̱ܝ܂ ܠܰܝܬܿ ܓܶܝܪ ܐ̱ܢܳܫ ܕܥܳܒܼܶܕܼ ܚܰܝܠܶܐ̈ ܒܫܶܡܝ܃ ܘܡܶܫܟܿܰܚ ܥܓܼܰܠ ܐܳܡܰܪ ܥܠܰܝ ܕܒܺܝܫ܂
09:40 [ai]	ܡܰܢ ܕܠܳܐ ܗ̱ܘܳܐ ܗܳܟܼܺܝܠ ܠܽܘܩܒܼܰܠܟܼܽܘܢ܂ ܚܠܳܦܼܰܝܟܿܽܘܢ ܗ̱ܽܘ܀
09:41 [ai]	ܟܽܠ ܕܶܝܢ ܕܢܰܫܩܶܝܟܼܽܘܢ܂ ܟܳܣܳܐ ܕܡܰܝܳܐ̈ ܒܰܠܚܽܘܕܼ܃ ܒܰܫܡܳܐ ܕܕܼܰܡܫܺܝܚܳܐ ܐܰܢ̱ܬܿܽܘܢ܃ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܂ ܕܠܳܐ ܢܰܘܒܿܶܕܼ ܐܰܓܼܪܶܗ܀
09:42 [ai]	ܘܟܼܽܠ ܡܰܢ ܕܢܰܟܼܫܶܠ ܠܚܰܕܼ ܡܶܢ ܗܳܠܶܝܢ ܙܥܽܘܪ̈ܶܐ ܕܰܡܗܰܝܡܢܺܝܢ ܒܺܝ܃ ܦܰܩܳܚ ܗ̱ܘܳ ܠܶܗ܂ ܐܶܠܽܘ ܪܰܡܝܳܐ ܗ̱ܘܳܬܼ ܪܰܚܝܳܐ ܕܰܚܡܳܪܳܐ ܒܨܰܘܪܶܗ܂ ܘܰܫܕܼܶܐ ܒܝܰܡܳܐ܀
09:43 [ai]	ܐܶܢ ܕܶܝܢ ܡܰܟܼܫܠܳܐ ܠܳܟܼ ܐܺܝܕܼܳܟܼ܂ ܦܣܽܘܩܶܝܗ܂ ܦܰܩܳܚ ܗ̱ܽܘ ܠܳܟܼ܂ ܦܫܺܝܓܼܳܐ ܕܬܶܥܽܘܠ ܠܚܰܝ̈ܶܐ܃ ܐܰܘ ܟܰܕܼ ܐܺܝܬܼ ܠܳܟܼ ܬܿܰܪ̈ܬܿܶܝܢ ܐܺܝܕܼܺܝܢ̈܂ ܬܺܐܙܰܠ ܠܓܼܺܗܰܢܳܐ܂
09:44 [ai]	ܐܰܝܟܿܳܐ ܕܬܰܘܠܰܥܗܽܘܢ܂ ܠܳܐ ܡܳܝܬܳܐ܂ ܘܢܽܘܪܗܽܘܢ܂ ܠܳܐ ܕܳܥܟܿܳܐ܂
09:45 [ai]	ܘܶܐܢ ܪܶܓܼܠܳܟܼ ܡܰܟܼܫܠܳܐ ܠܳܟܼ܂ ܦܣܽܘܩܶܝܗ܂ ܦܰܩܳܚ ܗ̱ܽܘ ܠܳܟܼ ܕܬܶܥܽܘܠ ܠܚܰܝ̈ܶܐ ܚܓܼܺܝܣܳܐ܃ ܐܰܘ ܟܰܕܼ ܐܺܝܬܼ ܠܳܟܼ ܬܿܰܪ̈ܬܿܶܝܢ ܪ̈ܶܓܼܠܺܝܢ܂ ܬܶܦܿܶܠ ܒܓܺܗܰܢܳܐ܂
09:46 [ai]	ܐܰܝܟܿܳܐ ܕܬܰܘܠܰܥܗܽܘܢ܂ ܠܳܐ ܡܳܝܬܳܐ܂ ܘܢܽܘܪܗܽܘܢ܂ ܠܳܐ ܕܳܥܟܿܳܐ܀
09:47 [ai]	ܘܶܐܢ ܥܰܝܢܳܟܼ ܡܰܟܼܫܠܳܐ ܠܳܟܼ܂ ܚܨܺܝܗ܂ ܦܰܩܳܚ ܗ̱ܽܘ ܠܳܟܼ܂ ܕܒܰܚܕܼܳܐ ܥܰܝܢܳܟܼ ܬܶܥܽܘܠ ܠܡܰܠܟܿܽܘܬܼܶܗ ܕܰܐܠܳܗܳܐ܃ ܐܰܘ ܟܰܕܼ ܐܺܝܬܼ ܠܳܟܼ ܬܿܰܪ̈ܬܿܶܝܢ ܥܰܝܢܺܝܢ̈܂ ܬܶܦܿܶܠ ܒܓܺܗܰܢܳܐ ܕܢܽܘܪܳܐ܂
09:48 [ai]	ܐܰܝܟܿܳܐ ܕܬܰܘܠܰܥܗܽܘܢ܂ ܠܳܐ ܡܳܝܬܳܐ܂ ܘܢܽܘܪܗܽܘܢ܂ ܠܳܐ ܕܳܥܟܿܳܐ܀
09:49 [ai]	ܟܽܠ ܓܶܝܪ ܒܢܽܘܪܳܐ ܢܶܬܼܡܠܰܚ܂ ܘܟܼܽܠ ܕܶܒܼܚܬܼܳܐ ܒܡܶܠܚܳܐ ܬܶܬܼܡܠܰܚ܀
09:50 [ai]	ܫܰܦܿܺܝܪܳܐ ܗ̱ܝ ܡܶܠܚܳܐ܂ ܐܶܢ ܕܶܝܢ ܡܶܠܚܳܐ ܬܶܦܼܟܿܰܗ܂ ܒܡܳܢܳܐ ܬܶܬܼܡܠܰܚ܂ ܬܶܗܘܶܐ ܒܟܽܘܢ ܡܶܠܚܳܐ܂ ܘܰܒܫܰܝܢܳܐ ܗܘܰܘ ܚܰܕܼ ܥܰܡ ܚܰܕܼ܀܀

next chapter