← Back
The Comprehensive Aramaic Lexicon
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


10:01 [ai]ܘܩܳܡ ܡܶܢ ܬܰܡܳܢ܃ ܘܶܐܬܼܳܐ ܠܰܬܼܚܽܘܡܳܐ ܕܺܝܗܽܘܕܼ܂ ܠܥܶܒܼܪܳܐ ܕܝܽܘܪܕܿܢܳܢ܂ ܘܶܐܙܰܠܘ ܠܬܼܰܡܳܢ ܠܘܳܬܼܶܗ ܟܶܢܫܶܐ̈ ܣܰܓܿܺܝܶܐܐ̈܃ ܘܡܰܠܶܦܼ ܗ̱ܘܳܐ ܠܗܽܘܢ ܬܽܘܒܼ܂ ܐܰܝܟܼ ܕܰܡܥܳܕܼ ܗ̱ܘܳܐ܂
10:02 [ai]ܘܰܩܪܶܒܼܘ ܦܿܪ̈ܺܝܫܶܐ܂ ܡܢܰܣܶܝܢ ܠܶܗ ܘܰܡܫܰܐܠܺܝܢ܃ ܕܶܐܢ ܫܰܠܺܝܛ ܠܓܼܰܒܼܪܳܐ܂ ܕܢܶܫܒܿܽܘܩ ܐܰܢ̱ܬܿܬܼܶܗ܂
10:03 [ai]ܐܳܡܰܪ ܠܗܽܘܢ܂ ܡܳܢܳܐ ܦܰܩܶܕܼܟܼܽܘܢ ܡܽܘܫܶܐ܂
10:04 [ai]ܗܶܢܽܘܢ ܕܶܝܢ ܐܳܡܪܺܝܢ܂ ܡܽܘܫܶܐ ܐܰܦܿܶܣ ܠܰܢ܃ ܕܢܶܟܼܬܽܘܒܼ ܟܬܼܳܒܼܳܐ ܕܫܽܘܒܼܩܳܢܳܐ܂ ܘܢܶܫܪܶܐ܂
10:05 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܠܽܘܩܒܼܰܠ ܩܰܫܝܽܘܬܼ ܠܶܒܟܽܘܢ ܟܬܼܰܒܼ ܠܟܼܽܘܢ ܦܽܘܩܕܳܢܳܐ ܗܳܢܳܐ܂
10:06 [ai]ܡܶܢ ܒܪܺܫܺܝܬܼ ܕܶܝܢ܂ ܕܶܟܼܪܳܐ ܘܢܶܩܒܿܬܼܳܐ ܥܒܼܰܕܼ ܐܶܢܽܘܢ ܐܰܠܳܗܳܐ܂
10:07 [ai]ܡܶܛܽܠ ܗܳܢܳܐ ܢܶܫܒܿܽܘܩ ܓܰܒܼܪܳܐ ܠܰܐܒܼܽܘܗ̱ܝ ܘܠܶܐܡܶܗ܂ ܘܢܶܩܰܦܼ ܠܰܐܢ̱ܬܿܬܼܶܗ܃
10:08 [ai]ܘܢܶܗܘܽܘܢ ܬܿܪ̈ܰܝܗܽܘܢ܂ ܚܰܕܼ ܒܣܰܪ܂ ܡܶܟܿܺܝܠ ܠܳܐ ܗ̱ܘܰܘ ܬܿܪ̈ܶܝܢ܂ ܐܶܠܳܐ ܚܰܕܼ ܒܣܰܪ܂
10:09 [ai]ܡܶܕܶܡ ܕܰܐܠܳܗܳܐ܂ ܗܳܟܼܺܝܠ ܙܰܘܶܓܼ܃ ܒܰܪܢܳܫܳܐ܂ ܠܳܐ ܢܦܼܰܪܶܫ܂
10:10 [ai]ܘܫܰܐܠܽܘܗ̱ܝ ܬܽܘܒܼ ܬܰܠܡܺܝܕܼܰܘܗ̱ܝ̈ ܒܒܼܰܝܬܳܐ ܥܰܠ ܗܳܕܼܶܐ܂
10:11 [ai]ܘܶܐܡܰܪ ܠܗܽܘܢ܂ ܟܽܠ ܡܰܢ ܕܢܶܫܪܶܐ ܐܰܢ̱ܬܿܬܼܶܗ܂ ܘܢܶܣܰܒܼ ܐ̱ܚܪܺܬܼܳܐ܂ ܓܳܐܰܪ܂
10:12 [ai]ܘܶܐܢ ܐܰܢ̱ܬܿܬܼܳܐ ܬܶܫܪܶܐ ܒܰܥܠܳܗ܂ ܘܬܼܶܗܘܶܐ ܠܰܐ̱ܚܪܺܢܳܐ܂ ܓܳܝܪܳܐ܀
10:13 [ai]ܘܰܡܩܰܪܒܼܺܝܢ ܗ̱ܘܰܘ ܠܶܗ ܛܠܳܝܶܐ̈ ܕܢܶܩܪܽܘܒܼ ܠܗܽܘܢ܂ ܬܰܠܡܺܝܕܼܰܘܗ̱ܝ̈ ܕܶܝܢ܂ ܟܳܐܶܝܢ ܗ̱ܘܰܘ ܒܗܳܠܶܝܢ ܕܰܡܩܰܪܒܼܺܝܢ ܠܗܽܘܢ܂
10:14 [ai]ܝܶܫܽܘܥ ܕܶܝܢ ܚܙܳܐ܂ ܘܶܐܬܼܒܿܶܐܫ ܠܶܗ܂ ܘܶܐܡܰܪ ܠܗܽܘܢ܂ ܫܒܼܽܘܩܘ ܛܠܳܝܶܐ̈܂ ܐܳܬܼܶܝܢ ܠܘܳܬܼܝ܂ ܘܠܳܐ ܬܶܟܼܠܽܘܢ ܐܶܢܽܘܢ܂ ܕܕܼܰܐܝܠܶܝܢ ܓܶܝܪ܂ ܕܰܐܝܟܼ ܗܳܠܶܝܢ ܐܶܢܽܘܢ܂ ܐܺܝܬܼܶܝܗ ܡܰܠܟܿܽܘܬܼܳܐ ܕܰܐܠܳܗܳܐ܂
10:15 [ai]ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܟܽܠ ܕܠܳܐ ܢܩܰܒܿܶܠ ܡܰܠܟܿܽܘܬܼܳܐ ܕܰܐܠܳܗܳܐ ܐܰܝܟܼ ܛܰܠܝܳܐ܂ ܠܳܐ ܢܶܥܽܘܠ ܠܳܗ܂
10:16 [ai]ܘܰܫܩܰܠ ܐܶܢܽܘܢ ܥܰܠ ܕܿܪ̈ܳܥܰܘܗ̱ܝ܃ ܘܣܳܡ ܐܺܝܕܼܶܗ ܥܠܰܝܗܽܘܢ܂ ܘܒܼܰܪܶܟܼ ܐܶܢܽܘܢ܀
10:17 [ai]ܘܟܼܰܕܼ ܪܳܕܼܶܐ ܒܽܐܘܪܚܳܐ܃ ܪܗܶܛ ܚܰܕܼ܂ ܢܦܼܰܠ ܥܰܠ ܒܽܘܪ̈ܟܿܰܘܗ̱ܝ܂ ܘܰܡܫܰܐܶܠ ܗ̱ܘܳܐ ܠܶܗ܂ ܘܳܐܡܰܪ܂ ܡܰܠܦܼܳܢܳܐ ܛܳܒܼܳܐ܃ ܡܳܢܳܐ ܐܶܥܒܿܶܕܼ ܕܺܐܬܼܰܪ ܚܰܝ̈ܶܐ ܕܰܠܥܳܠܰܡ܂
10:18 [ai]ܐܳܡܰܪ ܠܶܗ ܝܶܫܽܘܥ܃ ܡܳܢܳܐ ܩܳܪܶܐ ܐܰܢ̱ܬܿ ܠܺܝ ܛܳܒܼܳܐ܂ ܠܰܝܬܿ ܛܳܒܼܳܐ ܐܶܠܳܐ ܐܶܢ ܚܰܕܼ ܐܰܠܳܗܳܐ܂
10:19 [ai]ܦܽܘܩܕܳܢܶܐ̈ ܝܳܕܼܰܥ ܐܰܢ̱ܬܿ܂ ܠܳܐ ܬܓܼܽܘܪ܂ ܠܳܐ ܬܶܓܼܢܽܘܒܼ܂ ܠܳܐ ܬܶܩܛܽܘܠ܂ ܘܠܳܐ ܬܶܣܗܰܕܼ ܣܳܗܕܿܽܘܬܼܳܐ ܕܰܓܿܳܠܬܼܳܐ܂ ܠܳܐ ܬܶܛܠܽܘܡ܂ ܝܰܩܰܪ ܠܰܐܒܼܽܘܟܼ܂ ܘܠܶܐܡܳܟܼ܂
10:20 [ai]ܗܽܘ ܕܶܝܢ ܥܢܳܐ܂ ܘܶܐܡܰܪ ܠܶܗ܂ ܡܰܠܦܼܳܢܳܐ܃ ܗܳܠܶܝܢ ܟܽܠܗܶܝܢ ܢܶܛܪܶܬܼ ܐܶܢܶܝܢ̈܂ ܡܶܢ ܛܰܠܝܽܘܬܼܝ܂
10:21 [ai]ܝܶܫܽܘܥ ܕܶܝܢ ܚܳܪ ܒܶܗ܂ ܘܰܐܚܒܼܶܗ܂ ܘܶܐܡܰܪ ܠܶܗ܂ ܚܕܼܳܐ ܚܰܣܺܝܪܳܐ ܠܳܟܼ܂ ܙܶܠ ܙܰܒܿܶܢ ܟܽܠ ܡܶܕܶܡ ܕܺܐܝܬܼ ܠܳܟܼ܂ ܘܗܰܒܼ ܠܡܶܣܟܿܺܢܶܐ̈܃ ܘܬܼܶܗܘܶܐ ܠܳܟܼ ܣܺܝܡܬܼܳܐ ܒܰܫܡܰܝܳܐ܃ ܘܣܰܒܼ ܨܠܺܝܒܼܳܐ܂ ܘܬܼܳܐ ܒܳܬܼܰܪܝ܀
10:22 [ai]ܗܽܘ ܕܶܝܢ ܐܶܬܼܟܿܡܰܪ ܒܡܶܠܬܼܳܐ ܗܳܕܼܶܐ܂ ܘܶܐܙܰܠ܂ ܟܰܕܼ ܥܰܝܺܝܩܳܐ ܠܶܗ܂ ܐܺܝܬܼ ܗ̱ܘܳܐ ܠܶܗ ܓܶܝܪ ܢܶܟܼܣܶܐ̈ ܣܰܓܿܺܝܶܐܐ̈܂
10:23 [ai]ܚܳܪ ܕܶܝܢ ܝܶܫܽܘܥ ܒܬܰܠܡܺܝܕܼܰܘܗ̱ܝ̈܂ ܘܶܐܡܰܪ ܠܗܽܘܢ܂ ܟܡܳܐ ܥܰܛܠܳܐ ܠܰܐܝܠܶܝܢ ܕܺܐܝܬܼ ܠܗܽܘܢ ܢܶܟܼܣܶܐ̈܃ ܕܢܶܥܠܽܘܢ ܠܡܰܠܟܿܽܘܬܼܳܐ ܕܰܐܠܳܗܳܐ܂
10:24 [ai]ܬܰܠܡܺܝܕܼܶܐ̈ ܕܶܝܢ ܡܶܬܿܕܰܡܪܺܝܢ ܗ̱ܘܰܘ ܥܰܠ ܡܶܠܰܘܗ̱ܝ̈܂ ܘܰܥܢܳܐ ܬܽܘܒܼ ܝܶܫܽܘܥ܂ ܘܶܐܡܰܪ ܠܗܽܘܢ܂ ܒܢܰܝ܃ ܟܡܳܐ ܥܰܛܠܳܐ ܠܰܐܝܠܶܝܢ ܕܰܬܼܟܼܺܝܠܺܝܢ ܥܰܠ ܢܶܟܼܣܰܝܗܽܘܢ̈ ܕܢܶܥܠܽܘܢ ܠܡܰܠܟܿܽܘܬܼܶܗ ܕܰܐܠܳܗܳܐ܂
10:25 [ai]ܦܫܺܝܩ ܗ̱ܽܘ ܠܓܼܰܡܠܳܐ ܕܢܶܥܽܘܠ ܒܰܚܪܽܘܪܳܐ ܕܰܡܚܰܛܳܐ܃ ܐܰܘ ܥܰܬܿܺܝܪܳܐ ܠܡܰܠܟܿܽܘܬܼܶܗ ܕܰܐܠܳܗܳܐ ܠܡܶܥܰܠ܂
10:26 [ai]ܗܶܢܽܘܢ ܕܶܝܢ ܝܰܬܿܺܝܪܳܐܺܝܬܼ ܡܶܬܿܕܰܡܪܺܝܢ ܗ̱ܘܰܘ܂ ܘܳܐܡܪܺܝܢ ܒܰܝܢܰܝܗܽܘܢ܂ ܡܰܢܽܘ ܡܶܫܟܿܰܚ ܠܡܶܚܳܐ܂
10:27 [ai]ܚܳܪ ܕܶܝܢ ܒܗܽܘܢ ܝܶܫܽܘܥ܂ ܘܶܐܡܰܪ ܠܗܽܘܢ܂ ܠܘܳܬܼ ܒܢܰܝ ܐ̱ܢܳܫܳܐ̈܂ ܗܳܕܼܶܐ ܠܳܐ ܡܶܫܟܿܚܳܐ܃ ܐܶܠܳܐ ܠܘܳܬܼ ܐܰܠܳܗܳܐ܂ ܟܽܠ ܡܶܕܶܡ ܓܶܝܪ܂ ܡܶܫܟܿܚܳܐ ܠܘܳܬܼ ܐܰܠܳܗܳܐ܀܀
10:28 [ai]ܘܫܰܪܺܝ ܟܺܐܦܼܳܐ ܠܡܺܐܡܰܪ܂ ܗܳܐ ܚܢܰܢ ܫܒܼܰܩܢ ܟܽܠ ܡܶܕܶܡ܂ ܘܰܢܩܶܦܼܢܳܟܼ܂
10:29 [ai]ܥܢܳܐ ܝܶܫܽܘܥ܂ ܘܶܐܡܰܪ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܠܰܝܬܿ ܐ̱ܢܳܫ ܕܫܳܒܼܶܩ ܒܳܬܿܶܐ̈ ܐܰܘ ܐܰܚܶܐ̈ ܐܰܘ ܐܰܚܘܳܬܼܳܐ̈܃ ܐܰܘ ܐܰܒܼܳܐ ܐܰܘ ܐܶܡܳܐ܃ ܐܰܘ ܐܰܢ̱ܬܿܬܼܳܐ ܐܰܘ ܒܢܰܝܳܐ܃ ܐܰܘ ܩܽܘܪ̈ܝܳܐ܂ ܡܶܛܽܠܳܬܼܝ܂ ܘܡܶܛܽܠ ܣܒܼܰܪܬܼܝ܃
10:30 [ai]ܘܠܳܐ ܢܩܰܒܿܶܠ ܚܰܕܼ ܒܰܡܳܐܐ܂ ܗܳܫܳܐ ܒܙܰܒܼܢܳܐ ܗܳܢܳܐ܃ ܒܳܬܿܶܐ̈܂ ܘܰܐܚܶܐ̈ ܘܰܐܚܘܳܬܼܳܐ̈ ܘܶܐܡܗܳܬܼܳܐ̈܃ ܘܰܒܢܰܝܳܐ ܘܩܽܘܪ̈ܝܳܐ܂ ܥܰܡ ܪܕܼܽܘܦܼܝܳܐ܂ ܘܰܒܥܳܠܡܳܐ ܕܳܐܬܼܶܐ܂ ܚܰܝ̈ܶܐ ܕܰܠܥܳܠܰܡ܀
10:31 [ai]ܣܰܓܿܺܝܶܐܐ̈ ܕܶܝܢ ܩܰܕܼܡܳܝ̈ܶܐ܂ ܕܢܶܗܘܽܘܢ ܐ̱ܚܪ̈ܳܝܶܐ܃ ܘܰܐ̱ܚܪ̈ܳܝܶܐ ܩܰܕܼܡܳܝ̈ܶܐ܀܀
10:32 [ai]ܟܰܕܼ ܣܳܠܩܺܝܢ ܗ̱ܘܰܘ ܕܶܝܢ ܒܽܐܘܪܚܳܐ ܠܽܐܘܪܺܫܠܶܡ܃ ܗܽܘ ܝܶܫܽܘܥ ܩܕܼܺܝܡ ܗܘܳܐ ܠܗܽܘܢ܂ ܘܡܶܬܿܬܿܰܡܗܺܝܢ ܗ̱ܘܰܘ܂ ܘܳܐܙܺܠ̱ܝܢ ܗ̱ܘܰܘ ܒܳܬܼܪܶܗ܂ ܟܰܕܼ ܕܰܚܺܝܠܺܝܢ܀ ܘܰܕܼܒܼܰܪ ܠܰܬܼܪܶܥܣܰܪܬܿܶܗ܃ ܘܫܰܪܺܝ ܕܢܺܐܡܰܪ ܠܗܽܘܢ ܡܶܕܶܡ ܕܰܥܬܼܺܝܕܼ ܕܢܶܗܘܶܐ ܠܶܗ܂
10:33 [ai]ܕܗܳܐ ܣܳܠܩܺܝܢ ܚ̱ܢܰܢ ܠܽܐܘܪܺܫܠܶܡ܂ ܘܰܒܪܶܗ ܕܐ̱ܢܳܫܳܐ ܡܶܫܬܿܠܶܡ ܠܪ̈ܰܒܰܝ ܟܳܗܢܶܐ̈܂ ܘܰܠܣܳܦܼܪ̈ܶܐ܂ ܘܰܢܚܰܝܒܼܽܘܢܳܝܗ̱ܝ ܠܡܰܘܬܳܐ܂ ܘܢܰܫܠܡܽܘܢܳܝܗ̱ܝ ܠܥܰܡ̱ܡܶܐ̈܃
10:34 [ai]ܘܰܢܒܼܰܙܚܽܘܢ ܒܶܗ܂ ܘܰܢܢܰܓܿܕܼܽܘܢܳܝܗ̱ܝ܂ ܘܢܶܪܩܽܘܢ ܒܰܐܦܿܰܘܗ̱ܝ̈܂ ܘܢܶܩܛܠܽܘܢܳܝܗ̱ܝ܂ ܘܰܠܝܰܘܡܳܐ ܕܰܬܼܠܳܬܼܳܐ܂ ܢܩܽܘܡ܀
10:35 [ai]ܘܰܩܪܶܒܼܘ ܠܘܳܬܼܶܗ ܝܰܥܩܽܘܒܼ ܘܝܽܘܚܰܢܳܢ ܒܢܰܝ ܙܰܒܼܕܼܰܝ܂ ܘܳܐܡܪܺܝܢ ܠܶܗ܂ ܡܰܠܦܼܳܢܳܐ܃ ܨܳܒܼܶܝܢ ܚ̱ܢܰܢ܂ ܕܟܽܠ ܕܢܶܫܰܐܠ܂ ܬܶܥܒܿܶܕܼ ܠܰܢ܂
10:36 [ai]ܐܳܡܰܪ ܠܗܽܘܢ܂ ܡܳܢܳܐ ܨܳܒܼܶܝܢ ܐܢ̱ܬܿܽܘܢ ܐܶܥܒܿܶܕܼ ܠܟܼܽܘܢ܂
10:37 [ai]ܐܳܡܪܺܝܢ ܠܶܗ܂ ܗܰܒܼ ܠܰܢ ܕܚܰܕܼ ܢܶܬܶܒܼ ܡܶܢ ܝܰܡܺܝܢܳܟܼ܂ ܘܚܰܕܼ ܡܶܢ ܣܶܡܳܠܳܟܼ ܒܫܽܘܒܼܚܳܟܼ܂
10:38 [ai]ܗܽܘ ܕܶܝܢ ܐܶܡܰܪ ܠܗܽܘܢ܂ ܠܳܐ ܝܳܕܼܥܺܝܢ ܐܢ̱ܬܿܽܘܢ ܡܳܢܳܐ ܫܳܐܠܺܝܢ ܐܢ̱ܬܿܽܘܢ܂ ܡܶܫܟܿܚܺܝܢ ܐܢ̱ܬܿܽܘܢ ܕܬܶܫܬܿܽܘܢ ܟܳܣܳܐ ܕܶܐܢܳܐ ܫܳܬܼܶܐ ܐ̱ܢܳܐ܃ ܘܡܰܥܡܽܘܕܼܺܝܬܼܳܐ ܕܶܐܢܳܐ ܥܳܡܶܕܼ ܐ̱ܢܳܐ܂ ܬܶܥܡܕܼܽܘܢ܃
10:39 [ai]ܐܳܡܪܺܝܢ ܠܶܗ܂ ܡܶܫܟܿܚܺܝܢܰܢ܂ ܐܳܡܰܪ ܠܗܽܘܢ ܝܶܫܽܘܥ܂ ܟܳܣܳܐ ܕܫܳܬܼܶܐ ܐ̱ܢܳܐ܂ ܬܶܫܬܿܽܘܢ܂ ܘܡܰܥܡܽܘܕܼܺܝܬܼܳܐ ܕܥܳܡܶܕܼ ܐ̱ܢܳܐ܂ ܬܶܥܡܕܼܽܘܢ܂
10:40 [ai]ܕܬܶܬܿܒܼܽܘܢ ܕܶܝܢ܂ ܡܶܢ ܝܰܡܺܝܢܝ ܘܡܶܢ ܣܶܡܳܠܝ܃ ܠܳܐ ܗܘܳܬܼ ܕܺܝܠܝ ܠܡܶܬܿܰܠ܃ ܐܶܠܳܐ ܠܰܐܝܠܶܝܢ ܕܰܡܛܰܝܒܼܳܐ܀
10:41 [ai]ܘܟܼܰܕܼ ܫܡܰܥܘ ܥܶܣܪܳܐ܃ ܫܰܪܺܝܘ ܪܳܛܢܺܝܢ ܥܰܠ ܝܰܥܩܽܘܒܼ ܘܝܽܘܚܰܢܳܢ܂
10:42 [ai]ܘܰܩܪܳܐ ܐܶܢܽܘܢ ܝܶܫܽܘܥ܂ ܘܶܐܡܰܪ ܠܗܽܘܢ܂ ܝܳܕܼܥܺܝܢ ܐܢ̱ܬܿܽܘܢ ܕܰܐܝܠܶܝܢ ܕܡܶܣܬܿܰܒܼܪܺܝܢ ܪ̈ܺܫܶܐ ܕܥܰܡ̱ܡܶܐ̈܂ ܡܳܪ̈ܰܝܗܽܘܢ ܐܶܢܽܘܢ܂ ܘܪ̈ܰܘܪܒܼܳܢܰܝܗܽܘܢ ܫܰܠܺܝܛܺܝܢ ܥܠܰܝܗܽܘܢ܂
10:43 [ai]ܠܳܐ ܕܶܝܢ ܗܳܟܼܰܢܳܐ ܢܶܗܘܶܐ ܒܰܝܢܳܬܼܟܼܽܘܢ܂ ܐܶܠܳܐ ܡܰܢ ܕܨܳܒܼܶܐ ܒܟܽܘܢ ܕܢܶܗܘܶܐ ܪܰܒܿܳܐ܃ ܢܶܗܘܶܐ ܠܟܼܽܘܢ ܡܫܰܡܫܳܢܳܐ܂
10:44 [ai]ܘܰܐܝܢܳܐ ܡܶܢܟܼܽܘܢ܂ ܕܨܳܒܼܶܐ ܕܢܶܗܘܶܐ ܩܰܕܼܡܳܝܳܐ܃ ܢܶܗܘܶܐ ܥܰܒܼܕܿܳܐ ܕܟܽܠܢܳܫ܀
10:45 [ai]ܐܳܦܼ ܒܪܶܗ ܓܶܝܪ ܕܐ̱ܢܳܫܳܐ܃ ܠܳܐ ܐܶܬܼܳܐ ܕܢܶܫܬܿܰܡܰܫ܂ ܐܶܠܳܐ ܕܰܢܫܰܡܶܫ܂ ܘܰܕܼܢܶܬܿܶܠ ܢܰܦܼܫܶܗ ܦܽܘܪܩܳܢܳܐ ܚܠܳܦܼ ܣܰܓܿܺܝܶܐܐ̈܀
10:46 [ai]ܘܶܐܬܼܰܘ ܠܺܐܝܪܺܝܚܽܘ ܿ܀ܿ܀ܿ ܘܟܼܰܕܼ ܢܦܼܰܩ ܝܶܫܽܘܥ ܡܶܢ ܐܺܝܪܺܝܚܽܘ܃ ܗܽܘ ܘܬܼܰܠܡܺܝܕܼܰܘܗ̱ܝ̈ ܘܟܼܶܢܫܳܐ ܣܰܓܿܺܝܳܐܐ܃ ܛܺܝܡܰܝ܂ ܒܰܪ ܛܺܝܡܰܝ ܣܰܡܝܳܐ܃ ܝܳܬܼܶܒܼ ܗ̱ܘܳܐ ܥܰܠ ܝܰܕܼ ܐܽܘܪܚܳܐ܂ ܘܚܳܕܼܰܪ܂
10:47 [ai]ܘܰܫܡܰܥ ܕܝܶܫܽܘܥ ܗ̱ܽܘ ܢܳܨܪܳܝܳܐ܂ ܘܫܰܪܺܝ ܠܡܶܩܥܳܐ܂ ܘܰܠܡܺܐܡܰܪ܂ ܒܪܶܗ ܕܕܼܰܘܺܝܕܼ܃ ܐܶܬܼܪܰܚܰܡ ܥܠܰܝ܂
10:48 [ai]ܘܟܼܳܐܶܝܢ ܗ̱ܘܰܘ ܒܶܗ ܣܰܓܿܺܝܶܐܐ̈ ܕܢܶܫܬܿܽܘܩ܂ ܗܽܘ ܕܶܝܢ ܝܰܬܿܺܝܪܳܐܺܝܬܼ ܩܳܥܶܐ ܗ̱ܘܳܐ܂ ܘܳܐܡܰܪ܂ ܒܪܶܗ ܕܕܼܰܘܺܝܕܼ܃ ܐܶܬܼܪܰܚܰܡ ܥܠܰܝ܂
10:49 [ai]ܘܩܳܡ ܝܶܫܽܘܥ܂ ܘܰܦܼܩܰܕܼ ܕܢܶܩܪܽܘܢܳܝܗ̱ܝ܂ ܘܰܩܪܰܐܘܽܗ̱ܝ ܠܣܰܡܝܳܐ܂ ܘܳܐܡܪܺܝܢ ܠܶܗ܂ ܐܶܬܼܠܰܒ̱ܿܒܼ܂ ܩܽܘܡ܂ ܩܳܪܶܐ ܠܳܟܼ܂
10:50 [ai]ܗܽܘ ܕܶܝܢ ܣܰܡܝܳܐ ܫܕܼܳܐ ܠܒܼܳܫܶܗ܃ ܘܩܳܡ ܐܶܬܼܳܐ ܠܘܳܬܼ ܝܶܫܽܘܥ܂
10:51 [ai]ܐܳܡܰܪ ܠܶܗ ܝܶܫܽܘܥ܂ ܡܳܢܳܐ ܨܳܒܼܶܐ ܐܰܢ̱ܬܿ ܐܶܥܒܿܶܕܼ ܠܳܟܼ܂ ܗܽܘ ܕܶܝܢ ܣܰܡܝܳܐ܂ ܐܶܡܰܪ ܠܶܗ܂ ܪܰܒܺܝ܂ ܕܶܐܚܙܶܐ܂
10:52 [ai]ܘܝܶܫܽܘܥ ܐܶܡܰܪ ܠܶܗ܂ ܚܙܺܝ܂ ܗܰܝܡܳܢܽܘܬܼܳܟܼ ܐܰܚܝܰܬܼܳܟܼ܂ ܘܡܶܚܕܼܳܐ ܐܶܬܼܚܙܺܝ ܠܶܗ܃ ܘܳܐܙܶܠ ܗ̱ܘܳܐ ܒܽܐܘܪܚܳܐ܀

next chapter