← Back
The Comprehensive Aramaic Lexicon
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


11:01 [ai]ܘܟܼܰܕܼ ܩܪܶܒܼ ܠܽܐܘܪܺܫܠܶܡ܃ ܥܰܠ ܓܶܢ̱ܒܼ ܒܶܝܬܼ ܦܿܳ̈̈ܓܿܶܐ܂ ܘܒܼܶܝܬܼ ܥܰܢܝܳܐ܂ ܠܘܳܬܼ ܛܽܘܪܳܐ ܕܙܰܝܬܿܶܐ̈܃ ܫܰܕܿܰܪ ܬܿܪ̈ܶܝܢ ܡܶܢ ܬܰܠܡܺܝܕܼܰܘܗ̱ܝ̈܂
11:02 [ai]ܘܶܐܡܰܪ ܠܗܽܘܢ܂ ܙܶܠܘ ܠܰܩܪܺܝܬܼܳܐ ܗܳܝ ܕܰܠܩܽܘܒܼܠܰܢ܂ ܘܒܼܰܪ ܫܳܥܬܼܶܗ ܕܥܳܐܠܺܝܢ ܐܢ̱ܬܿܽܘܢ ܠܳܗ܃ ܡܶܫܟܿܚܺܝܢ ܐܢ̱ܬܿܽܘܢ ܥܺܝܠܳܐ ܕܰܐܣܺܝܪ܂ ܕܐ̱ܢܳܫ ܡܶܢ ܒܢܰܝܢܳܫܳܐ܂ ܠܳܐ ܪܰܟܼܒܶܗ܂ ܫܪܰܘ ܐܰܝܬܿܰܐܘܽܗ̱ܝ܂
11:03 [ai]ܘܶܐܢ ܐ̱ܢܳܫ ܢܺܐܡܰܪ ܠܟܼܽܘܢ܂ ܡܳܢܳܐ ܥܳܒܼܕܺܝܢ ܐܢ̱ܬܿܽܘܢ ܗܳܕܼܶܐ܃ ܐܶܡܰܪܘ ܠܶܗ܂ ܕܰܠܡܳܪܰܢ ܡܶܬܼܒܿܥܶܐ܂ ܘܡܶܚܕܼܳܐ ܡܫܰܕܿܰܪ ܠܶܗ ܠܟܼܳܐ܀
11:04 [ai]ܘܶܐܙܰܠܘ ܐܶܫܟܿܰܚܘ ܥܺܝܠܳܐ ܕܰܐܣܺܝܪ ܥܰܠ ܬܰܪܥܳܐ܂ ܠܒܼܰܪ ܒܫܽܘܩܳܐ܂ ܘܟܼܰܕܼ ܫܳܪܶܝܢ ܠܶܗ܃
11:05 [ai]ܐ̱ܢܳܫܺܝܢ̈ ܡܶܢ ܐܰܝܠܶܝܢ ܕܩܳܝܡܺܝܢ܂ ܐܶܡܰܪܘ ܠܗܽܘܢ܃ ܡܳܢܳܐ ܥܳܒܼܕܺܝܢ ܐܢ̱ܬܿܽܘܢ ܕܫܳܪܶܝܢ ܐܢ̱ܬܿܽܘܢ ܥܺܝܠܳܐ܂
11:06 [ai]ܗܶܢܽܘܢ ܕܶܝܢ ܐܶܡܰܪܘ ܠܗܽܘܢ܂ ܐܰܝܟܼ ܕܦܰܩܶܕܼ ܐܶܢܽܘܢ ܝܶܫܽܘܥ܃ ܘܰܫܒܼܰܩܘ ܐܶܢܽܘܢ܂
11:07 [ai]ܘܰܐܝܬܿܝܽܘܗ̱ܝ ܠܥܺܝܠܳܐ ܠܘܳܬܼ ܝܶܫܽܘܥ܃ ܘܰܐܪܡܺܝܘ ܥܠܰܘܗ̱ܝ ܡܳܐܢܰܝܗܽܘܢ̈܂ ܘܰܪܟܼܶܒܼ ܥܠܰܘܗ̱ܝ ܝܶܫܽܘܥ܀
11:08 [ai]ܣܰܓܿܺܝܶܐܐ̈ ܕܶܝܢ܂ ܡܫܰܘܶܝܢ ܗ̱ܘܰܘ ܢܰܚܬܿܰܝܗܽܘܢ̈ ܒܽܐܘܪܚܳܐ܂ ܘܰܐ̱ܚܪ̈ܳܢܶܐ ܦܳܣܩܺܝܢ ܗ̱ܘܰܘ ܣܰܘܟܿܶܐ̈ ܡܶܢ ܐܺܝܠܳܢܶܐ̈܂ ܘܰܡܫܰܘܶܝܢ ܒܽܐܘܪܚܳܐ܂
11:09 [ai]ܘܗܳܢܽܘܢ ܕܰܩܕܼܳܡܰܘܗ̱ܝ܂ ܘܗܳܢܽܘܢ ܕܒܳܬܼܪܶܗ܃ ܩܳܥܶܝܢ ܗ̱ܘܰܘ܂ ܘܳܐܡܪܺܝܢ܂ ܐܽܘܫܰܥܢܳܐ܃ ܒܪܺܝܟܼ ܗ̱ܽܘ ܕܳܐܬܼܶܐ ܒܰܫܡܶܗ ܕܡܳܪܝܳܐ܂
11:10 [ai]ܘܰܒܪܺܝܟܼܳܐ ܗ̱ܝ ܡܰܠܟܿܽܘܬܼܳܐ ܕܳܐܬܼܝܳܐ ܕܰܐܒܼܽܘܢ ܕܿܰܘܺܝܕܼ܂ ܐܽܘܫܰܥܢܳܐ ܒܰܡܪ̈ܰܘܡܶܐ܀
11:11 [ai]ܘܥܰܠ ܝܶܫܽܘܥ ܠܽܐܘܪܺܫܠܶܡ ܠܗܰܝܟܠܳܐ܃ ܘܰܚܙܳܐ ܟܽܠܡܶܕܶܡ܂ ܟܰܕܼ ܗܘܳܐ ܕܶܝܢ ܥܶܕܳܢܳܐ ܕܪܰܡܫܳܐ܃ ܢܦܼܰܩ ܠܒܼܶܝܬܼ ܥܰܢܝܳܐ ܥܰܡ ܬܿܪ̈ܶܥܣܰܪ܂
11:12 [ai]ܘܰܠܝܰܘܡܳܐ ܐ̱ܚܪܺܢܳܐ܂ ܟܰܕܼ ܢܦܼܰܩ ܡܶܢ ܒܶܝܬܼ ܥܰܢܝܳܐ܂ ܟܦܼܶܢ܂
11:13 [ai]ܘܰܚܙܳܐ ܬܿܺܬܳܐ ܚܕܼܳܐ ܡܶܢ ܪܽܘܚܩܳܐ܂ ܕܺܐܝܬܼ ܒܿܳܗ ܛܰܪ̈ܦܼܶܐ܂ ܘܶܐܬܼܳܐ ܠܘܳܬܼܳܗ ܕܶܐܢ ܢܶܫܟܿܰܚ ܒܿܳܗ ܡܶܕܶܡ܂ ܘܟܼܰܕܼ ܐܶܬܼܳܐ܃ ܠܳܐ ܐܶܫܟܿܰܚ ܒܿܳܗ ܐܶܠܳܐ ܐܶܢ ܛܰܪ̈ܦܼܶܐ܂ ܙܰܒܼܢܳܐ ܓܶܝܪ ܠܳܐ ܗܘܳܐ ܗ̱ܘܳܐ ܕܬܺܐܢܶܐ̈܂
11:14 [ai]ܘܶܐܡܰܪ ܠܳܗ܂ ܡܶܟܿܺܝܠ ܘܰܠܥܳܠܰܡ ܐ̱ܢܳܫ ܡܶܢܶܟܼܝ ܦܿܺܐܪ̈ܶܐ ܠܳܐ ܢܶܐܟܼܽܘܠ܂ ܘܰܫܡܰܥܘ ܬܰܠܡܺܝܕܼܰܘܗ̱ܝ̈܂ ܘܶܐܬܼܰܘ ܠܽܐܘܪܺܫܠܶܡ܀܀
11:15 [ai]ܘܥܰܠ ܝܶܫܽܘܥ ܠܗܰܝܟܠܳܐ ܕܰܐܠܳܗܳܐ܃ ܘܫܰܪܺܝ ܕܢܰܦܿܶܩ ܠܰܐܝܠܶܝܢ ܕܙܳܒܼܢܺܝܢ ܘܰܡܙܰܒܢܺܝܢ ܒܗܰܝܟܠܳܐ܂ ܘܰܗܦܼܰܟܼ ܦܿܳܬܼܽܘܪ̈ܶܐ ܕܰܡܥܰܪ̈ܦܼܳܢܶܐ܂ ܘܟܼܽܘܪ̈ܣܰܘܳܬܼܳܐ ܕܗܳܢܽܘܢ ܕܰܡܙܰܒܢܺܝܢ ܝܰܘܢܶܐ̈܂
11:16 [ai]ܘܠܳܐ ܫܳܒܼܶܩ ܗ̱ܘܳܐ ܕܐ̱ܢܳܫ ܢܰܥܒܰܪ ܡܳܐܢܶܐ̈ ܒܓܰܘ ܗܰܝܟܠܳܐ܂
11:17 [ai]ܘܡܰܠܶܦܼ ܗ̱ܘܳܐ܂ ܘܳܐܡܰܪ ܠܗܽܘܢ܂ ܠܳܐ ܟܬܼܺܝܒܼ܃ ܕܒܰܝܬܿܝ܂ ܒܶܝܬܼ ܨܠܽܘܬܼܳܐ ܢܶܬܼܩܪܶܐ ܠܟܼܽܠܗܽܘܢ ܥܰܡ̱ܡܶܐ̈܃ ܐܰܢ̱ܬܿܽܘܢ ܕܶܝܢ ܥܒܼܰܕܿܬܿܽܘܢܳܝܗ̱ܝ܂ ܡܥܰܪܬܼܳܐ ܕܠܶܣܛܳܝܶܐ̈܀
11:18 [ai]ܘܰܫܡܰܥܘ ܪ̈ܰܒܰܝ ܟܳܗܢܶܐ̈ ܘܣܳܦܼܪ̈ܶܐ܂ ܘܒܼܳܥܶܝܢ ܗ̱ܘܰܘ ܕܰܐܝܟܿܰܢܳܐ ܢܰܘܒܿܕܼܽܘܢܳܝܗ̱ܝ܂ ܕܳܚܠܺܝܢ ܗ̱ܘܰܘ ܓܶܝܪ ܡܶܢܶܗ܂ ܡܶܛܽܠ ܕܟܽܠܶܗ ܥܰܡܳܐ ܬܰܡܺܝܗܺܝܢ ܗ̱ܘܰܘ ܒܝܽܘܠܦܿܳܢܶܗ܀
11:19 [ai]ܘܟܼܰܕܼ ܗܘܳܐ ܪܰܡܫܳܐ܃ ܢܦܼܰܩܘ ܠܒܼܰܪ ܡܶܢ ܡܕܼܺܝܢ̱ܬܳܐ܀
11:20 [ai]ܘܰܒܨܰܦܼܪܳܐ ܟܰܕܼ ܥܳܒܼܪܺܝܢ܃ ܚܙܰܘ ܬܿܺܬܳܐ ܗܳܝ ܟܰܕܼ ܝܰܒܺܝܫܳܐ ܡܶܢ ܥܶܩܳܪܳܗ܂
11:21 [ai]ܘܶܐܬܿܕܿܟܼܰܪ ܫܶܡܥܽܘܢ܂ ܘܶܐܡܰܪ ܠܶܗ܂ ܪܰܒܺܝ܃ ܗܳܐ ܬܿܺܬܳܐ ܗܳܝ ܕܠܳܛܬܿ܂ ܝܶܒܼܫܰܬܼ܂
11:22 [ai]ܘܰܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܬܶܗܘܶܐ ܒܟܽܘܢ ܗܰܝܡܳܢܽܘܬܼܳܐ ܕܰܐܠܳܗܳܐ܂
11:23 [ai]ܐܰܡܺܝܢ ܓܶܝܪ ܐܳܡܰܪ ܐ̱ܢܳܐ ܠܟܼܽܘܢ܃ ܕܡܰܢ ܕܢܺܐܡܰܪ ܠܛܽܘܪܳܐ ܗܳܢܳܐ܂ ܕܶܐܫܬܿܰܩ̱ܠ ܘܦܼܶܠ ܒܝܰܡܳܐ܃ ܘܠܳܐ ܢܶܬܼܦܿܰܠܰܓܼ ܒܿܠܶܒܶܗ܃ ܐܶܠܳܐ ܢܗܰܝܡܶܢ ܕܗܳܘܶܐ ܗܰܘ ܡܶܕܶܡ ܕܳܐܡܰܪ܃ ܢܶܗܘܶܐ ܠܶܗ ܡܶܕܶܡ ܕܳܐܡܰܪ܀
11:24 [ai]ܡܶܛܽܠ ܗܳܢܳܐ ܐܳܡܰܪ ܐ̱ܢܳܐ ܠܟܼܽܘܢ܂ ܕܟܽܠ ܡܶܕܶܡ ܕܰܡܨܰܠܶܝܢ ܐܢ̱ܬܿܽܘܢ܂ ܘܫܳܐܠܺܝܢ ܐܢ̱ܬܿܽܘܢ܃ ܗܰܝܡܶܢܘ ܕܿܢܳܣܒܺܝܢ ܐܢ̱ܬܿܽܘܢ܂ ܘܢܶܗܘܶܐ ܠܟܼܽܘܢ܀
11:25 [ai]ܘܡܳܐ ܕܩܳܝܡܺܝܢ ܐܢ̱ܬܿܽܘܢ ܠܰܡܨܰܠܳܝܽܘ܃ ܫܒܼܽܘܩܘ ܡܶܕܶܡ ܕܺܐܝܬܼ ܠܟܼܽܘܢ ܥܰܠ ܐ̱ܢܳܫ܂ ܕܳܐܦܼ ܐܰܒܼܽܘܟܼܽܘܢ ܕܒܰܫܡܰܝܳܐ܂ ܢܶܫܒܿܽܘܩ ܠܟܼܽܘܢ ܣܰܟܼܠܘܳܬܼܟܼܽܘܢ̈܂
11:26 [ai]ܐܶܢ ܕܶܝܢ ܐܰܢ̱ܬܿܽܘܢ ܠܳܐ ܫܳܒܼܩܺܝܢ ܐܢ̱ܬܿܽܘܢ܃ ܐܳܦܼܠܳܐ ܐܰܒܼܽܘܟܼܽܘܢ ܕܒܰܫܡܰܝܳܐ܂ ܢܶܫܒܿܽܘܩ ܠܟܼܽܘܢ ܣܰܟܼܠܘܳܬܼܟܼܽܘܢ̈܀
11:27 [ai]ܘܶܐܬܼܰܘ ܬܽܘܒܼ ܠܽܐܘܪܺܫܠܶܡ܂ ܘܟܼܰܕܼ ܡܗܰܠܶܟܼ ܗ̱ܘܳܐ ܒܗܰܝܟܠܳܐ܃ ܐܶܬܼܰܘ ܠܘܳܬܼܶܗ ܪ̈ܰܒܰܝܟܳܗܢܶܐ̈ ܘܣܳܦܼܪ̈ܶܐ ܘܩܰܫܺܝܫܶܐ̈܂
11:28 [ai]ܘܳܐܡܪܺܝܢ ܠܶܗ܂ ܒܰܐܝܢܳܐ ܫܽܘܠܛܳܢܳܐ ܗܳܠܶܝܢ ܥܳܒܼܶܕܼ ܐܰܢ̱ܬܿ܂ ܘܡܰܢܽܘ ܝܰܗ̱ܒܼ ܠܳܟܼ ܫܽܘܠܛܳܢܳܐ ܗܳܢܳܐ ܕܗܳܠܶܝܢ ܬܶܥܒܿܶܕܼ܂
11:29 [ai]ܗܽܘ ܕܶܝܢ ܝܶܫܽܘܥ܂ ܐܶܡܰܪ ܠܗܽܘܢ܂ ܐܶܫܰܐܶܠܟܼܽܘܢ ܐܳܦܼ ܐܶܢܳܐ ܡܶܠܬܼܳܐ ܚܕܼܳܐ܂ ܕܬܺܐܡܪܽܘܢ ܠܺܝ܃ ܘܶܐܢܳܐ ܐܳܡܰܪ ܐ̱ܢܳܐ ܠܟܼܽܘܢ܂ ܒܰܐܝܢܳܐ ܫܽܘܠܛܳܢܳܐ ܗܳܠܶܝܢ ܥܳܒܼܶܕܼ ܐ̱ܢܳܐ܂
11:30 [ai]ܡܰܥܡܽܘܕܼܺܝܬܼܶܗ ܕܝܽܘܚܰܢܳܢ ܡܶܢ ܐܰܝܡܶܟܿܳܐ ܗ̱ܝ܂ ܡܶܢ ܫܡܰܝܳܐ܂ ܐܰܘ ܡܶܢ ܒܢܰܝ ܐ̱ܢܳܫܳܐ̈܂ ܐܶܡܰܪܘ ܠܺܝ܂
11:31 [ai]ܘܶܐܬܼܚܰܫܰܒܼܘ ܒܢܰܦܼܫܗܽܘܢ܂ ܘܶܐܡܰܪܘ܂ ܕܶܐܢ ܢܺܐܡܰܪ ܠܶܗ ܕܡܶܢ ܫܡܰܝܳܐ܃ ܐܳܡܰܪ ܠܰܢ܂ ܘܰܠܡܳܢܳܐ ܠܳܐ ܗܰܝܡܶܢܬܿܽܘܢܳܝܗ̱ܝ܂
11:32 [ai]ܘܰܕܼܢܺܐܡܰܪ ܡܶܢ ܒܢܰܝ ܐ̱ܢܳܫܳܐ̈܃ ܕܶܚܠܬܼܳܐ ܗ̱ܝ ܡܶܢ ܥܰܡܳܐ܂ ܟܽܠܗܽܘܢ ܓܶܝܪ ܐܰܚܺܝܕܼܺܝܢ ܗܘܰܘ ܠܶܗ ܠܝܽܘܚܰܢܳܢ܃ ܕܫܰܪܺܝܪܳܐܺܝܬܼ ܢܒܼܺܝܳܐ ܗ̱ܘ܂
11:33 [ai]ܘܰܥܢܰܘ܂ ܘܳܐܡܪܺܝܢ ܠܶܗ ܠܝܶܫܽܘܥ܂ ܠܳܐ ܝܳܕܼܥܺܝܢܰܢ܂ ܐܳܡܰܪ ܠܗܽܘܢ܂ ܐܳܦܼܠܳܐ ܐܶܢܳܐ ܐܳܡܰܪ ܐ̱ܢܳܐ ܠܟܼܽܘܢ܂ ܒܰܐܝܢܳܐ ܫܽܘܠܛܳܢܳܐ ܗܳܠܶܝܢ ܥܳܒܼܶܕܼ ܐ̱ܢܳܐ܀

next chapter