← Back
The Comprehensive Aramaic Lexicon
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


12:01 [ai]ܘܫܰܪܺܝ ܕܰܢܡܰܠܶܠ ܥܰܡܗܽܘܢ ܒܡܰܬܼܠܶܐ̈܂ ܓܰܒܼܪܳܐ ܚܰܕܼ ܢܨܰܒܼ ܟܰܪܡܳܐ܂ ܘܰܐܚܕܿܪܶܗ ܣܝܳܓܼܳܐ܂ ܘܰܚܦܼܰܪ ܒܶܗ ܡܰܥܨܰܪܬܳܐ܂ ܘܰܒܢܳܐ ܒܶܗ ܡܰܓܼܕܠܳܐ܂ ܘܰܐܘܚܕܼܶܗ ܠܦܼܰܠܳܚܶܐ̈܂ ܘܰܚܙܰܩ܂
12:02 [ai]ܘܫܰܕܿܰܪ ܠܘܳܬܼ ܦܰܠܳܚܶܐ̈ ܥܰܒܼܕܿܶܗ ܒܙܰܒܼܢܳܐ܃ ܕܡܶܢ ܦܿܺܐܪ̈ܶܐ ܕܟܰܪܡܳܐ ܢܶܣܰܒܼ܂
12:03 [ai]ܗܶܢܽܘܢ ܕܶܝܢ ܡܚܰܐܘܽܗ̱ܝ܂ ܘܫܰܕܿܪܽܘܗ̱ܝ ܟܰܕܼ ܣܦܼܺܝܩ܂
12:04 [ai]ܘܫܰܕܿܰܪ ܬܽܘܒܼ ܠܘܳܬܼܗܽܘܢ ܥܰܒܼܕܿܳܐ ܐ̱ܚܪܺܢܳܐ܂ ܘܳܐܦܼ ܠܗܰܘ ܪܰܓܼܡܽܘܗ̱ܝ܂ ܘܨܰܠܦܼܽܘܗ̱ܝ܂ ܘܫܰܕܿܪܽܘܗ̱ܝ ܒܨܰܥܪܳܐ܂
12:05 [ai]ܘܫܰܕܿܰܪ ܬܽܘܒܼ ܐ̱ܚܪܺܢܳܐ܂ ܐܳܦܼ ܠܗܰܘ ܩܰܛܠܽܘܗ̱ܝ܂ ܘܰܠܣܰܓܿܺܝܶܐܐ̈ ܥܰܒܼܕܿܶܐ̈ ܐ̱ܚܪ̈ܳܢܶܐ ܫܰܕܿܰܪ܂ ܘܡܶܢܗܽܘܢ܂ ܡܚܰܘ܂ ܡܶܢܗܽܘܢ ܕܶܝܢ܂ ܩܰܛܶܠܘ܂
12:06 [ai]ܚܰܪܬܼܳܐ ܕܶܝܢ܂ ܚܰܕܼ ܒܪܳܐ ܚܰܒܺܝܒܼܳܐ ܐܺܝܬܼ ܗ̱ܘܳܐ ܠܶܗ܃ ܘܫܰܕܿܪܶܗ ܠܘܳܬܼܗܽܘܢ ܐ̱ܚܪܳܝܰܬܼ܂ ܐܶܡܰܪ ܓܶܝܪ܂ ܟܒܼܰܪ ܢܶܒܼܗܬܼܽܘܢ ܡܶܢ ܒܶܪܝ܂
12:07 [ai]ܗܳܢܽܘܢ ܕܶܝܢ ܦܰܠܳܚܶܐ̈܂ ܐܶܡܰܪܘ ܒܢܰܦܼܫܗܽܘܢ܂ ܗܳܢܰܘ ܝܳܪܬܳܐ܂ ܬܰܘ ܢܶܩܛܠܺܝܘܗ̱ܝ܃ ܘܬܼܶܗܘܶܐ ܕܺܝܠܰܢ ܝܳܪܬܿܽܘܬܼܳܐ܂
12:08 [ai]ܘܰܢܣܰܒܼܘ ܩܰܛܠܽܘܗ̱ܝ܂ ܘܰܐܦܿܩܽܘܗ̱ܝ ܠܒܼܰܪ ܡܶܢ ܟܰܪܡܳܐ܂
12:09 [ai]ܡܳܢܳܐ ܗܳܟܼܺܝܠ ܢܶܥܒܿܶܕܼ ܡܳܪܶܐ ܟܰܪܡܳܐ܂ ܢܺܐܬܼܶܐ ܢܰܘܒܿܶܕܼ ܠܗܳܢܽܘܢ ܦܰܠܳܚܶܐ̈܃ ܘܢܶܬܿܠܺܝܘܗ̱ܝ ܟܰܪܡܳܐ ܠܰܐ̱ܚܪ̈ܳܢܶܐ܂
12:10 [ai]ܘܳܐܦܼܠܳܐ ܟܬܼܳܒܼܳܐ ܗܳܢܳܐ ܩܪܰܝܬܿܽܘܢ܃ ܕܟܺܐܦܼܳܐ ܕܰܐܣܠܺܝܘ ܒܰܢܳܝܶܐ̈܃ ܗܺܝ ܗܘܳܬܼ ܠܪܺܫܳܐ ܕܙܳܘܺܝܬܼܳܐ܂
12:11 [ai]ܡܶܢ ܠܘܳܬܼ ܡܳܪܝܳܐ ܗܘܳܬܼ ܗܳܕܼܶܐ܂ ܘܺܐܝܬܼܶܝܗ ܬܿܶܕܼܡܽܘܪܬܳܐ ܒܥܰܝܢܰܝܢ̈܀
12:12 [ai]ܘܒܼܳܥܶܝܢ ܗ̱ܘܰܘ ܠܡܶܐܚܕܿܶܗ܂ ܘܰܕܼܚܶܠܘ ܡܶܢ ܥܰܡܳܐ܂ ܺܝܕܼܰܥܘ ܓܶܝܪ ܕܰܥܠܰܝܗܽܘܢ ܐܶܡܰܪ ܡܰܬܼܠܳܐ ܗܳܢܳܐ܂ ܘܫܰܒܼܩܽܘܗ̱ܝ܂ ܘܶܐܙܰܠܘ ܿ܀ܿ܀ܿ
12:13 [ai]ܘܫܰܕܿܰܪܘ ܠܘܳܬܼܶܗ ܐ̱ܢܳܫܳܐ̈ ܡܶܢ ܣܳܦܼܪ̈ܶܐ܂ ܘܡܶܢ ܕܒܶܝܬܼ ܗܶܪܳܘܕܼܶܣ܂ ܕܰܢܨܽܘܕܼܽܘܢܳܝܗ̱ܝ ܒܡܶܠܬܼܳܐ܂
12:14 [ai]ܗܶܢܽܘܢ ܕܶܝܢ ܐܶܬܼܰܘ܂ ܘܫܰܐܠܽܘܗ̱ܝ܂ ܡܰܠܦܼܳܢܳܐ܃ ܝܳܕܼܥܺܝܢ ܚ̱ܢܰܢ ܕܫܰܪܺܝܪ ܐܰܢ̱ܬܿ܂ ܫܩܺܝܠ ܐܰܢ̱ܬܿ ܨܶܦܼܬܼܳܐ ܠܐ̱ܢܳܫ܂ ܠܳܐ ܓܶܝܪ ܚܳܐܰܪ ܐܰܢ̱ܬܿ ܒܦܿܰܪ̈ܨܽܘܦܿܶܐ ܕܿܰܒܼܢܰܝܐ̱ܢܳܫܳܐ̈܂ ܐܶܠܳܐ ܒܰܫܪܳܪܳܐ܂ ܐܽܘܪܚܳܐ ܕܰܐܠܳܗܳܐ ܡܰܠܶܦܼ ܐܰܢ̱ܬܿ܂ ܫܰܠܺܝܛ ܠܡܶܬܿܰܠ ܟܣܶܦܼ ܪܺܫܳܐ ܠܩܶܣܰܪ܂ ܐܰܘ ܠܳܐ܂ ܢܶܬܿܶܠ܂ ܐܰܘ ܠܳܐ ܢܶܬܿܶܠ܂
12:15 [ai]ܗܽܘ ܕܶܝܢ ܺܝܕܼܰܥ ܢܶܟܼܠܗܽܘܢ܂ ܘܶܐܡܰܪ ܠܗܽܘܢ܂ ܡܳܢܳܐ ܡܢܰܣܶܝܢ ܐܢ̱ܬܿܽܘܢ ܠܺܝ܂ ܐܰܝܬܰܘ ܠܺܝ ܕܺܝܢܳܪܳܐ ܐܶܚܙܶܐ܂
12:16 [ai]ܘܰܐܝܬܿܺܝܘ ܠܶܗ܂ ܐܳܡܰܪ ܠܗܽܘܢ܂ ܕܡܰܢܽܘ ܨܰܠܡܳܐ ܗܳܢܳܐ ܘܰܟܼܬܼܳܒܼܳܐ܂ ܗܶܢܽܘܢ ܕܶܝܢ ܐܶܡܰܪܘ܂ ܕܩܶܣܰܪ܂
12:17 [ai]ܐܳܡܰܪ ܠܗܽܘܢ ܝܶܫܽܘܥ܂ ܕܩܶܣܰܪ ܗܰܒܼܘ ܠܩܶܣܰܪ܃ ܘܕܼܰܐܠܳܗܳܐ܂ ܠܰܐܠܳܗܳܐ܂ ܘܰܬܼܡܰܗܘ ܗ̱ܘܰܘ ܒܶܗ܀
12:18 [ai]ܘܶܐܬܼܰܘ ܙܰܕܿܽܘܩܳܝܶܐ̈ ܠܘܳܬܼܶܗ܃ ܗܳܢܽܘܢ ܕܳܐܡܪܺܝܢ ܕܰܩܝܳܡܬܳܐ ܠܰܝܬܿ܂ ܘܰܡܫܰܐܠܺܝܢ ܗ̱ܘܰܘ ܠܶܗ ܘܳܐܡܪܺܝܢ܂
12:19 [ai]ܡܰܠܦܼܳܢܳܐ܂ ܡܽܘܫܶܐ ܟܬܼܰܒܼ ܠܰܢ܃ ܕܶܐܢ ܡܳܐܶܬܼ ܐܰܚܽܘܗ̱ܝ ܕܐ̱ܢܳܫ܃ ܘܫܳܒܼܶܩ ܐܰܢ̱ܬܿܬܼܳܐ܂ ܘܰܒܢܰܝܳܐ ܠܳܐ ܫܳܒܼܶܩ܃ ܢܶܣܰܒܼ ܐܰܚܽܘܗ̱ܝ ܐܰܢ̱ܬܿܬܼܶܗ܂ ܘܰܢܩܺܝܡ ܙܰܪܥܳܐ ܠܰܐܚܽܘܗ̱ܝ܂
12:20 [ai]ܫܰܒܼܥܳܐ ܐܰܚܺܝܢ̈ ܐܺܝܬܼ ܗ̱ܘܰܘ܂ ܩܰܕܼܡܳܝܳܐ ܢܣܰܒܼ ܐܰܢ̱ܬܿܬܼܳܐ܂ ܘܡܺܝܬܼ܂ ܘܠܳܐ ܫܒܼܰܩ ܙܰܪܥܳܐ܂
12:21 [ai]ܘܕܼܰܬܼܪ̈ܶܝܢ ܢܰܣܒܿܳܗ ܘܡܺܝܬܼ܃ ܟܰܕܼ ܐܳܦܼ ܠܳܐ ܗܽܘ ܫܒܼܰܩ ܙܰܪܥܳܐ܂ ܘܕܼܰܬܼܠܳܬܼܳܐ ܗܳܟܼܘܳܬܼ܂
12:22 [ai]ܘܫܰܒܼܥܳܬܼܰܝܗܽܘܢ̈ ܢܰܣܒܿܽܘܗ܃ ܘܠܳܐ ܫܒܼܰܩܘ ܙܰܪܥܳܐ܂ ܐ̱ܚܪܳܝܰܬܼ ܟܽܠܗܽܘܢ ܡܺܝܬܼܰܬܼ ܐܳܦܼ ܗܺܝ ܐܰܢ̱ܬܿܬܼܳܐ܂
12:23 [ai]ܒܰܩܝܳܡܬܳܐ ܗܳܟܼܺܝܠ܂ ܕܰܐܝܢܳܐ ܡܶܢܗܽܘܢ ܬܶܗܘܶܐ ܐܰܢ̱ܬܿܬܼܳܐ܂ ܫܰܒܼܥܳܬܼܰܝܗܽܘܢ̈ ܓܶܝܪ ܢܰܣܒܿܽܘܗ܂
12:24 [ai]ܐܳܡܰܪ ܠܗܽܘܢ ܝܶܫܽܘܥ܂ ܠܳܐ ܗ̱ܘܳܐ ܡܶܛܽܠ ܗܳܕܼܶܐ ܛܥܶܝܢ ܐܢ̱ܬܿܽܘܢ܃ ܕܠܳܐ ܝܳܕܼܥܺܝܢ ܐܢ̱ܬܿܽܘܢ ܟܬܼܳܒܼܶܐ̈܃ ܘܠܳܐ ܚܰܝܠܶܗ ܕܰܐܠܳܗܳܐ܃
12:25 [ai]ܡܳܐ ܓܶܝܪ ܕܩܳܡܘ ܡܶܢ ܡܺܝܬܼܶܐ̈܂ ܠܳܐ ܢܳܣܒܺܝܢ ܢܶܫܶܐ̈܂ ܐܳܦܼ ܠܳܐ ܢܶܫܶܐ̈ ܗܳܘܝܳܢ̈ ܠܓܼܰܒܼܪ̈ܶܐ܂ ܐܶܠܳܐ ܐܺܝܬܼܰܝܗܽܘܢ܂ ܐܰܝܟܼ ܡܰܠܰܐܟܼܶܐ̈ ܕܒܰܫܡܰܝܳܐ܂
12:26 [ai]ܥܰܠ ܡܺܝܬܼܶܐ̈ ܕܶܝܢ ܕܩܳܝܡܺܝܢ܃ ܠܳܐ ܩܪܰܝܬܿܽܘܢ܂ ܒܰܟܼܬܼܳܒܼܳܐ ܕܡܽܘܫܶܐ܃ ܐܰܝܟܿܰܢܳܐ ܡܶܢ ܣܰܢܝܳܐ ܐܶܡܰܪ ܠܶܗ ܐܰܠܳܗܳܐ܃ ܐܶܢܳܐ ܐ̱ܢܳܐ ܐܰܠܳܗܶܗ ܕܰܐܒܼܪܳܗܳܡ܂ ܘܰܐܠܳܗܶܗ ܕܺܐܝܣܚܳܩ܂ ܘܰܐܠܳܗܶܗ ܕܝܰܥܩܽܘܒܼ܃
12:27 [ai]ܘܠܳܐ ܗܘܳܐ ܐܰܠܳܗܳܐ ܕܡܺܝܬܼܶܐ̈܂ ܐܶܠܳܐ ܕܚܰܝ̈ܶܐ܂ ܐܰܢ̱ܬܿܽܘܢ ܗܳܟܼܺܝܠ܂ ܣܰܓܿܺܝ ܛܳܥܶܝܢ ܐܢ̱ܬܿܽܘܢ܀܀
12:28 [ai]ܘܰܩܪܶܒܼ ܚܰܕܼ ܡܶܢ ܣܳܦܼܪ̈ܶܐ܃ ܘܰܫܡܰܥ ܐܶܢܽܘܢ ܕܕܼܳܪܫܺܝܢ܂ ܘܰܚܙܳܐ ܕܫܰܦܿܺܝܪ ܐܰܬܼܺܝܒܼ ܠܗܽܘܢ ܦܶܬܼܓܼܳܡܳܐ܂ ܘܫܰܐܠܶܗ܂ ܐܰܝܢܰܘ ܦܽܘܩܕܳܢܳܐ ܩܰܕܼܡܳܝܳܐ ܕܟܽܠܗܽܘܢ܂
12:29 [ai]ܐܳܡܰܪ ܠܶܗ ܝܶܫܽܘܥ܂ ܩܰܕܼܡܳܝ ܡܶܢ ܟܽܠܗܽܘܢ ܦܽܘܩܕܳܢܶܐ̈܃ ܫܡܰܥ ܐܺܝܣܪܳܝܶܠ܃ ܡܳܪܝܳܐ ܐܰܠܳܗܰܢ܂ ܡܳܪܝܳܐ ܚܰܕܼ ܗ̱ܽܘ܂
12:30 [ai]ܘܰܕܼܬܼܶܪܚܰܡ ܠܡܳܪܝܳܐ ܐܰܠܳܗܳܟܼ܂ ܡܶܢ ܟܽܠܶܗ ܠܶܒܳܟܼ܂ ܘܡܶܢ ܟܽܠܳܗ ܢܰܦܼܫܳܟܼ܂ ܘܡܶܢ ܟܽܠܶܗ ܪܶܥܝܳܢܳܟܼ܂ ܘܡܶܢ ܟܽܠܶܗ ܚܰܝܠܳܟܼ܂ ܗܳܢܰܘ ܦܽܘܩܕܳܢܳܐ ܩܰܕܼܡܳܝܳܐ܃
12:31 [ai]ܘܕܼܰܬܼܪ̈ܶܝܢ ܕܕܼܳܡܶܐ ܠܶܗ܂ ܕܬܰܚܶܒܼ ܠܩܰܪܺܝܒܼܳܟܼ܂ ܐܰܝܟܼ ܢܰܦܼܫܳܟܼ܂ ܦܽܘܩܕܳܢܳܐ ܐ̱ܚܪܺܢܳܐ܂ ܕܪܰܒܿ ܡܶܢ ܗܳܠܶܝܢ ܠܰܝܬܿ܀
12:32 [ai]ܐܳܡܰܪ ܠܶܗ ܗܰܘ ܣܳܦܼܪܳܐ܂ ܫܰܦܿܺܝܪ ܪܰܒܺܝ܃ ܒܰܫܪܳܪܳܐ ܐܶܡܰܪܬܿ܂ ܕܚܰܕܼ ܗ̱ܽܘ܃ ܘܠܰܝܬܿ ܐ̱ܚܪܺܝܢ ܠܒܼܰܪ ܡܶܢܶܗ܂
12:33 [ai]ܘܰܕܼܢܶܪܚܡܺܝܘܗ̱ܝ ܐ̱ܢܳܫ ܡܶܢ ܟܽܠܶܗ ܠܶܒܿܳܐ܂ ܘܡܶܢ ܟܽܠܶܗ ܪܶܥܝܳܢܳܐ܂ ܘܡܶܢ ܟܽܠܳܗ ܢܰܦܼܫܳܐ܂ ܘܡܶܢ ܟܽܠܶܗ ܚܰܝܠܳܐ܂ ܘܰܕܼܢܶܪܚܰܡ ܩܰܪܺܝܒܼܶܗ ܐܰܝܟܼ ܢܰܦܼܫܶܗ܃ ܝܰܬܿܺܝܪܳܐ ܗ̱ܝ ܡܶܢ ܟܽܠܗܽܘܢ ܝܰܩܕܿܶܐ̈ ܘܕܼܶܒܼܚܶܐ̈܂
12:34 [ai]ܝܶܫܽܘܥ ܕܶܝܢ܂ ܚܙܳܝܗ̱ܝ ܕܚܰܟܿܺܝܡܳܐܺܝܬܼ ܡܦܼܰܢܶܐ ܦܶܬܼܓܼܳܡܳܐ܃ ܥܢܳܐ܂ ܘܶܐܡܰܪ ܠܶܗ܂ ܠܳܐ ܗ̱ܘܰܝܬܿ ܪܰܚܺܝܩ ܡܶܢ ܡܰܠܟܿܽܘܬܼܳܐ ܕܰܐܠܳܗܳܐ܀ ܘܠܳܐ ܐ̱ܢܳܫ ܬܽܘܒܼ ܐܰܡܪܰܚ ܕܰܢܫܰܐܠܺܝܘܗ̱ܝ܀
12:35 [ai]ܘܰܥܢܳܐ ܝܶܫܽܘܥ܂ ܘܶܐܡܰܪ ܟܰܕܼ ܡܰܠܶܦܼ ܒܗܰܝܟܠܳܐ܂ ܐܰܝܟܿܰܢܳܐ ܐܳܡܪܺܝܢ ܣܳܦܼܪ̈ܶܐ܃ ܕܰܡܫܺܝܚܳܐ ܒܪܶܗ ܗ̱ܽܘ ܕܕܼܰܘܺܝܕܼ܂
12:36 [ai]ܗܽܘ ܓܶܝܪ ܕܿܰܘܺܝܕܼ ܐܶܡܰܪ ܒܪܽܘܚܳܐ ܕܩܽܘܕܼܫܳܐ܃ ܕܶܐܡܰܪ ܡܳܪܝܳܐ ܠܡܳܪܝ܃ ܬܶܒܼ ܠܳܟܼ ܡܶܢ ܝܰܡܺܝܢܝ܂ ܥܕܼܰܡܳܐ ܕܶܐܣܺܝܡ ܒܥܶܠܕܿܒܼܳܒܼܰܝܟܿ̈ ܟܽܘܒܼܫܳܐ ܬܚܶܝܬܼ ܪ̈ܶܓܼܠܰܝܟܿ܂
12:37 [ai]ܗܽܘ ܗܳܟܼܺܝܠ ܕܿܰܘܺܝܕܼ ܩܳܪܶܐ ܠܶܗ ܡܳܪܝ܃ ܘܰܐܝܟܿܰܢܳܐ ܒܪܶܗ ܐܺܝܬܼܰܘܗ̱ܝ܂ ܘܟܼܽܠܶܗ ܟܶܢܫܳܐ ܫܳܡܰܥ ܗ̱ܘܳܐ ܠܶܗ ܒܰܣܺܝܡܳܐܺܝܬܼ܀
12:38 [ai]ܘܰܒܝܽܘܠܦܿܳܢܶܗ ܐܳܡܰܪ ܗ̱ܘܳܐ ܠܗܽܘܢ܂ ܐܶܙܕܿܰܗ̱ܪܘ ܡܶܢ ܣܳܦܼܪ̈ܶܐ܂ ܕܨܳܒܼܶܝܢ ܕܒܶܐܣܛܠܶܐ̈ ܢܗܰܠܟܼܽܘܢ܃ ܘܪܳܚܡܺܝܢ ܫܠܳܡܳܐ ܒܫܽܘܩܶܐ̈܃
12:39 [ai]ܘܪܺܝܫ ܡܰܘܬܿܒܼܶܐ̈ ܒܰܟܼܢܽܘܫܳܬܼܳܐ̈܃ ܘܪܺܝܫ ܣܡܳܟܼܶܐ̈ ܒܰܚܫܳܡܝܳܬܼܳܐ̈܂
12:40 [ai]ܗܳܢܽܘܢ ܕܳܐܟܼܠܺܝܢ ܒܳܬܿܶܐ ܕܿܰܐܪ̈ܡܠܳܬܼܳܐ܃ ܒܥܶܠܬܼܳܐ ܕܡܰܘܪܟܼܺܝܢ ܨܠܰܘܳܬܼܗܽܘܢ̈܂ ܗܶܢܽܘܢ ܢܩܰܒܿܠܽܘܢ ܕܺܝܢܳܐ ܝܰܬܿܺܝܪܳܐ܀
12:41 [ai]ܘܟܼܰܕܼ ܺܝܬܼܶܒܼ ܝܶܫܽܘܥ ܠܽܘܩܒܼܰܠ ܒܶܝܬܼ ܓܰܙܳܐ܃ ܚܳܐܰܪ ܗ̱ܘܳܐ ܐܰܝܟܿܰܢܳܐ ܟܶܢܫܶܐ̈ ܪܳܡܶܝܢ ܥܽܘܪܦܼܳܢܳܐ ܒܶܝܬܼ ܓܰܙܳܐ܂ ܘܣܰܓܿܺܝܶܐܐ̈ ܥܰܬܿܺܝܪ̈ܶܐ ܪܳܡܶܝܢ ܗ̱ܘܰܘ ܣܰܓܿܺܝ܂
12:42 [ai]ܘܶܐܬܼܳܬܼ ܐܰܪܡܰܠܬܳܐ ܚܕܼܳܐ ܡܶܣܟܿܺܢܬܳܐ܃ ܐܰܪܡܝܰܬܼ ܬܿܪ̈ܶܝܢ ܡܢܺܝܢ̈܂ ܕܺܐܝܬܼܰܝܗܽܘܢ ܫܳܡܽܘܢܶܐ̈܂
12:43 [ai]ܘܰܩܪܳܐ ܝܶܫܽܘܥ ܠܬܼܰܠܡܺܝܕܼܰܘܗ̱ܝ̈܂ ܘܶܐܡܰܪ ܠܗܽܘܢ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܗܳܕܼܶܐ ܐܰܪܡܰܠܬܳܐ ܡܶܣܟܿܺܢܬܳܐ܃ ܝܰܬܿܺܝܪ ܡܶܢ ܟܽܠܗܽܘܢ ܐ̱ܢܳܫܳܐ ܕܪܳܡܶܝܢ ܐܰܪܡܝܰܬܼ ܒܶܝܬܼ ܓܰܙܳܐ܂
12:44 [ai]ܟܽܠܗܽܘܢ ܓܶܝܪ܂ ܡܶܢ ܡܶܕܶܡ ܕܝܰܬܿܺܝܪ ܠܗܽܘܢ ܐܰܪܡܺܝܘ܂ ܗܳܕܼܶܐ ܕܶܝܢ ܡܶܢ ܚܰܣܺܝܪܽܘܬܼܳܗ܃ ܟܽܠ ܡܶܕܶܡ ܕܺܐܝܬܼ ܗ̱ܘܳܐ ܠܳܗ ܐܰܪܡܝܰܬܼܶܗ܂ ܟܽܠܶܗ ܩܶܢܝܳܢܳܗ܀

next chapter