← Back
The Comprehensive Aramaic Lexicon
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


13:01 [ai]ܘܟܼܰܕܼ ܢܦܼܰܩ ܝܶܫܽܘܥ ܡܶܢ ܗܰܝܟܠܳܐ܃ ܐܶܡܰܪ ܠܶܗ ܚܰܕܼ ܡܶܢ ܬܰܠܡܺܝܕܼܰܘܗ̱ܝ̈܂ ܡܰܠܦܼܳܢܳܐ܃ ܗܳܐ ܚܙܺܝ ܐܰܝܠܶܝܢ ܟܺܐܦܼܶܐ̈܂ ܘܰܐܝܠܶܝܢ ܒܶܢܝܳܢܶܐ̈܂
13:02 [ai]ܝܶܫܽܘܥ ܕܶܝܢ ܐܶܡܰܪ ܠܶܗ܂ ܚܳܙܶܐ ܐܰܢ̱ܬܿ ܗܳܠܶܝܢ ܒܶܢܝܳܢܶܐ̈ ܪ̈ܰܘܪܒܼܶܐ܃ ܠܳܐ ܡܶܫܬܿܰܒܼܩܳܐ ܗܳܪܟܿܳܐ ܟܺܐܦܼ ܥܰܠ ܟܺܐܦܼ ܕܠܳܐ ܡܶܣܬܿܰܬܼܪܳܐ܀
13:03 [ai]ܘܟܼܰܕܼ ܺܝܬܼܶܒܼ ܝܶܫܽܘܥ ܒܛܽܘܪܳܐ ܕܙܰܝܬܿܶܐ̈܂ ܠܽܘܩܒܼܰܠ ܗܰܝܟܠܳܐ܃ ܫܰܐܠܽܘܗ̱ܝ ܟܺܐܦܼܳܐ ܘܝܰܥܩܽܘܒܼ ܘܝܽܘܚܰܢܳܢ ܘܰܐܢܕܿܪܶܐܘܳܣ܃ ܒܰܠܚܽܘܕܼܰܝܗܽܘܢ܂
13:04 [ai]ܐܶܡܰܪ ܠܰܢ ܐܶܡܰܬܼܝ ܗܳܠܶܝܢ ܢܶܗܘܝܳܢ̈܃ ܘܡܳܢܳܐ ܐܳܬܼܳܐ܂ ܡܳܐ ܕܿܩܰܪ̈ܺܝܒܼܳܢ ܗܳܠܶܝܢ ܟܽܠܗܶܝܢ ܠܡܶܫܬܿܰܠܳܡܽܘ܂
13:05 [ai]ܗܽܘ ܕܶܝܢ ܝܶܫܽܘܥ܂ ܫܰܪܺܝ ܠܡܺܐܡܰܪ ܠܗܽܘܢ܂ ܚܙܰܘ܂ ܕܰܠܡܳܐ ܐ̱ܢܳܫ ܢܰܛܥܶܝܟܼܽܘܢ܂
13:06 [ai]ܣܰܓܿܺܝܶܐܐ̈ ܓܶܝܪ ܢܺܐܬܼܽܘܢ ܒܫܶܡܝ܃ ܘܢܺܐܡܪܽܘܢ ܕܶܐܢܳܐ ܐ̱ܢܳܐ܂ ܘܰܠܣܰܓܿܺܝܶܐܐ̈ ܢܰܛܥܽܘܢ܂
13:07 [ai]ܡܳܐ ܕܶܝܢ ܕܰܫܡܰܥܬܿܽܘܢ ܩܪ̈ܳܒܼܶܐ܂ ܘܛܶܒܿܳܐ ܕܿܩܺܐܪ̈ܣܶܐ܂ ܠܳܐ ܬܶܕܼܚܠܽܘܢ܂ ܥܬܼܺܝܕܼ ܗ̱ܽܘ ܕܢܶܗܘܶܐ܂ ܐܶܠܳܐ ܠܳܐ ܥܕܼܰܟܿܺܝܠ ܚܰܪܬܼܳܐ܂
13:08 [ai]ܢܩܽܘܡ ܓܶܝܪ ܥܰܡܳܐ ܥܰܠ ܥܰܡܳܐ܃ ܘܡܰܠܟܿܽܘ ܥܰܠ ܡܰܠܟܿܽܘ܂ ܘܢܶܗܘܽܘܢ ܙܰܘܥܶܐ̈܂ ܒܕܽܘܟܿܳܐ ܕܽܘܟܿܳܐ܂ ܘܢܶܗܘܽܘܢ ܟܰܦܼܢܶܐ̈ ܘܰܫܓܼܽܘܫܝܶܐ̈܂ ܗܳܠܶܝܢ ܪܺܫܳܐ ܐܶܢܶܝܢ̈ ܕܚܶܒܼܠܶܐ̈܀
13:09 [ai]ܚܙܰܘ ܕܶܝܢ ܐܰܢ̱ܬܿܽܘܢ ܢܰܦܼܫܟܼܽܘܢ܂ ܢܰܫܠܡܽܘܢܳܟܼܽܘܢ ܓܶܝܪ ܠܕܼܰܝܳܢܶܐ̈܂ ܘܒܼܰܟܼܢܽܘܫܳܬܼܗܽܘܢ̈ ܬܶܬܼܢܰܓܿܕܼܽܘܢ܂ ܘܰܩܕܼܳܡ ܡܰܠܟܿܶܐ̈ ܘܗܺܓܼܡܽܘܢܶܐ̈ ܬܩܽܘܡܽܘܢ ܡܶܛܽܠܳܬܼܝ܂ ܠܣܳܗܕܿܽܘܬܼܗܽܘܢ܀
13:10 [ai]ܠܽܘܩܕܼܰܡ ܕܶܝܢ ܥܬܼܺܝܕܼܳܐ ܕܬܶܬܼܟܿܪܶܙ ܣܒܼܰܪܬܼܝ܂ ܒܟܽܠܗܽܘܢ ܥܰܡ̱ܡܶܐ̈܀
13:11 [ai]ܡܳܐ ܕܰܡܩܰܪܒܼܺܝܢ ܠܟܼܽܘܢ ܕܶܝܢ ܕܢܰܫܠܡܽܘܢܳܟܼܽܘܢ܂ ܠܳܐ ܬܩܰܕܿܡܽܘܢ ܬܺܐܨܦܿܽܘܢ ܡܳܢܳܐ ܬܡܰܠܠܽܘܢ܂ ܘܠܳܐ ܬܶܪܢܽܘܢ܂ ܐܶܠܳܐ ܡܶܕܶܡ ܕܡܶܬܼܺܝܗܶܒܼ ܠܟܼܽܘܢ ܒܗܳܝ ܫܳܥܬܼܳܐ܂ ܗܰܘ ܡܰܠܶܠܘ܂ ܠܳܐ ܗ̱ܘܳܐ ܓܶܝܪ ܐܰܢ̱ܬܿܽܘܢ ܡܡܰܠܠܺܝܢ܂ ܐܶܠܳܐ ܪܽܘܚܳܐ ܕܩܽܘܕܼܫܳܐ܂
13:12 [ai]ܢܰܫܠܶܡ ܕܶܝܢ ܐܰܚܳܐ ܠܰܐܚܽܘܗ̱ܝ ܠܡܰܘܬܳܐ܃ ܘܰܐܒܼܳܐ ܠܰܒܼܪܶܗ܂ ܘܰܢܩܽܘܡܽܘܢ ܒܢܰܝܳܐ ܥܰܠ ܐܰܒܼܳܗܰܝܗܽܘܢ̈܂ ܘܰܢܡܺܝܬܼܽܘܢ ܐܶܢܽܘܢ܂
13:13 [ai]ܘܬܼܶܗܘܽܘܢ ܣܢܺܝܐܺܝܢ̈ ܡܶܢ ܟܽܠܢܳܫ܂ ܡܶܛܽܠ ܫܶܡܝ܂ ܡܰܢ ܕܶܝܢ ܕܿܰܢܣܰܝܒܰܪ ܥܕܼܰܡܳܐ ܠܚܰܪܬܼܳܐ܂ ܗܽܘ ܢܺܚܶܐ ܿ܀ܿ܀ܿ
13:14 [ai]ܡܳܐ ܕܶܝܢ ܕܰܚܙܰܝܬܿܽܘܢ ܐܳܬܼܳܐ ܛܰܢܦܼܬܼܳܐ ܕܚܽܘܪܒܿܳܐ܃ ܗܳܝ ܕܰܐܡܺܝܪܳܐ ܒܕܼܳܢܺܝܐܝܶܠ ܢܒܼܺܝܳܐ܃ ܕܩܳܝܡܳܐ ܐܰܝܟܿܳܐ ܕܠܳܐ ܘܳܠܶܐ܃ ܗܰܘ ܕܩܳܪܶܐ ܢܶܣܬܿܰܟܿܰܠ܂ ܗܳܝܕܶܝܢ ܐܰܝܠܶܝܢ ܕܒܺܝܗܽܘܕܼ ܐܶܢܽܘܢ܂ ܢܶܥܪܩܽܘܢ ܠܛܽܘܪܳܐ܂
13:15 [ai]ܘܡܰܢ ܕܒܶܐܓܿܳܪܳܐ ܗ̱ܘ܂ ܠܳܐ ܢܶܚܽܘܬܼ܂ ܘܠܳܐ ܢܶܥܽܘܠ ܠܡܶܫܩܰܠ ܡܶܕܶܡ ܡܶܢ ܒܰܝܬܿܶܗ܂
13:16 [ai]ܘܡܰܢ ܕܰܒܼܚܰܩܠܳܐ ܗ̱ܘ܃ ܠܳܐ ܢܶܬܼܗܦܼܶܟܼ ܠܒܼܶܣܬܿܪܶܗ ܕܢܶܫܩܽܘܠ ܠܒܼܳܫܶܗ܀
13:17 [ai]ܘܳܝ ܕܶܝܢ ܠܒܼܰܛܢܳܬܼܳܐ̈܂ ܘܠܰܐܝܠܶܝܢ ܕܡܰܝܢܩܳܢ̈ ܒܗܳܢܽܘܢ ܝܰܘܡܳܬܼܳܐ̈܀
13:18 [ai]ܨܰܠܰܘ ܕܶܝܢ ܕܠܳܐ ܢܶܗܘܶܐ ܥܪܽܘܩܺܝܟܼܽܘܢ ܒܣܰܬܼܘܳܐ܂
13:19 [ai]ܢܶܗܘܶܐ ܓܶܝܪ ܒܝܰܘܡܳܬܼܳܐ̈ ܗܳܢܽܘܢ ܐܽܘܠܨܳܢܳܐ܃ ܕܠܳܐ ܗܘܳܐ ܐܰܟܼܘܳܬܼܶܗ܂ ܡܶܢ ܪܺܝܫ ܒܪܺܝܬܼܳܐ ܕܰܒܼܪܳܐ ܐܰܠܳܗܳܐ ܥܕܼܰܡܳܐ ܠܗܳܫܳܐ܂ ܘܠܳܐ ܢܶܗܘܶܐ܂
13:20 [ai]ܘܶܐܠܽܘ ܠܳܐ ܡܳܪܝܳܐ ܕܟܰܪܺܝ ܝܰܘܡܳܬܼܳܐ̈ ܗܳܢܽܘܢ܃ ܠܳܐ ܚܳܝܶܐ ܗ̱ܘܳܐ ܟܽܠ ܒܣܰܪ܂ ܐܶܠܳܐ ܡܶܛܽܠ ܓܒܼܰܝܳܐ̈ ܕܰܓܼܒܼܳܐ܂ ܟܰܪܺܝ ܝܰܘܡܳܬܼܳܐ̈ ܗܳܢܽܘܢ܀
13:21 [ai]ܗܳܝܕܶܝܢ ܐܶܢ ܐ̱ܢܳܫ ܢܺܐܡܰܪ ܠܟܼܽܘܢ܃ ܕܗܳܐ ܗܳܪܟܿܳܐ ܗ̱ܘ ܡܫܺܝܚܳܐ܃ ܘܗܳܐ ܗܳܪܬܰܡܳܢ܃ ܠܳܐ ܬܗܰܝܡܢܽܘܢ܂
13:22 [ai]ܢܩܽܘܡܽܘܢ ܓܶܝܪ ܡܫܺܝܚܶܐ̈ ܕܕܼܰܓܳܠܽܘܬܼܳܐ܂ ܘܰܢܒܼܺܝܶܐ̈ ܕܟܰܕܿܳܒܼܽܘܬܼܳܐ܂ ܘܢܶܬܿܠܽܘܢ ܐܳܬܼܘܳܬܼܳܐ̈܂ ܘܬܼܶܕܼܡܪ̈ܳܬܼܳܐ܂ ܘܢܰܛܥܽܘܢ ܐܶܢ ܡܶܫܟܿܚܳܐ܂ ܐܳܦܼ ܠܰܓܼܒܼܰܝܳܐ̈܂
13:23 [ai]ܐܰܢ̱ܬܿܽܘܢ ܕܶܝܢ܂ ܐܶܙܕܿܰܗ̱ܪܘ܂ ܗܳܐ ܩܰܕܿܡܶܬܼ ܐܶܡܪܶܬܼ ܠܟܼܽܘܢ܂ ܟܽܠܡܶܕܶܡ܀
13:24 [ai]ܒܗܳܢܽܘܢ ܕܶܝܢ ܝܰܘܡܳܬܼܳܐ̈܂ ܒܳܬܼܰܪ ܐܽܘܠܨܳܢܳܐ ܗܰܘ܃ ܫܶܡܫܳܐ ܢܶܚܫܰܟܼ܂ ܘܣܰܗܪܳܐ ܠܳܐ ܢܶܬܿܶܠ ܢܽܘܗܪܶܗ܂
13:25 [ai]ܘܟܼܰܘܟܿܒܼܶܐ̈ ܢܶܦܿܠܽܘܢ ܡܶܢ ܫܡܰܝܳܐ܂ ܘܚܰܝܠܰܘܳܬܼܳܐ̈ ܕܰܫܡܰܝܳܐ ܢܶܬܿܬܿܙܺܝܥܽܘܢ܂
13:26 [ai]ܘܗܳܝܕܶܝܢ ܢܶܚܙܽܘܢܳܝܗ̱ܝ ܠܰܒܼܪܶܗ ܕܐ̱ܢܳܫܳܐ ܟܰܕܼ ܐܳܬܼܶܐ ܒܰܥܢܳܢܶܐ̈܃ ܥܰܡ ܚܰܝܠܳܐ ܪܰܒܿܳܐ ܘܥܰܡ ܫܽܘܒܼܚܳܐ܂
13:27 [ai]ܗܳܝܕܶܝܢ ܢܫܰܕܿܰܪ ܡܰܠܰܐܟܼܰܘܗ̱ܝ̈܃ ܘܰܢܟܼܰܢܶܫ ܠܰܓܼܒܼܰܘܗ̱ܝ̈ ܡܶܢ ܐܰܪܒܿܥܳܬܼܰܝܗܶܝܢ ܪ̈ܽܘܚܶܐ܂ ܡܶܢ ܪܺܫܳܗ ܕܰܐܪܥܳܐ܂ ܘܰܥܕܼܰܡܳܐ ܠܪܺܫܳܗ ܕܰܫܡܰܝܳܐ܀
13:28 [ai]ܡܶܢ ܬܿܺܬܳܐ ܕܶܝܢ ܺܝܠܰܦܼܘ ܦܶܠܶܐܬܼܳܐ܂ ܕܡܳܐ ܕܪܰܟܼ ܣܰܘܟܿܶܝܗ̈܂ ܘܰܦܼܪܰܥܘ ܛܰܪ̈ܦܼܶܝܗ܃ ܝܳܕܼܥܺܝܢ ܐܢ̱ܬܿܽܘܢ܂ ܕܰܡܛܳܐ ܩܰܝܛܳܐ܂
13:29 [ai]ܗܳܟܼܰܢܳܐ ܐܳܦܼ ܐܰܢ̱ܬܿܽܘܢ ܡܳܐ ܕܰܚܙܰܝܬܿܽܘܢ ܗܳܠܶܝܢ ܕܗܳܘܝܳܢ̈܃ ܕܰܥܘ܂ ܕܩܰܪܺܝܒܼܳܐ ܗ̱ܝ ܥܰܠ ܬܰܪܥܳܐ܂
13:30 [ai]ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܠܳܐ ܬܿܶܥܒܰܪ ܫܰܪܒܿܬܼܳܐ ܗܳܕܼܶܐ܃ ܥܕܼܰܡܳܐ ܕܗܳܠܶܝܢ ܟܽܠܗܶܝܢ ܢܶܗܘܝܳܢ̈܂
13:31 [ai]ܫܡܰܝܳܐ ܘܰܐܪܥܳܐ ܢܶܥܒܿܪܽܘܢ܃ ܘܡܶܠܰܝ̈ ܠܳܐ ܢܶܥܒܿܪ̈ܳܢ܀
13:32 [ai]ܥܰܠ ܕܶܝܢ ܝܰܘܡܳܐ ܗܰܘ܂ ܘܥܰܠ ܫܳܥܬܼܳܐ ܗܳܝ܃ ܐ̱ܢܳܫ ܠܳܐ ܝܳܕܼܰܥ܂ ܐܳܦܼܠܳܐ ܡܰܠܰܐܟܼܶܐ̈ ܕܰܫܡܰܝܳܐ܂ ܘܠܳܐ ܒܪܳܐ܂ ܐܶܠܳܐ ܐܶܢ ܐܰܒܼܳܐ܀
13:33 [ai]ܚܙܰܘ܂ ܐܶܬܿܬܿܥܺܝܪܘ܂ ܘܨܰܠܰܘ܂ ܠܳܐ ܓܶܝܪ ܝܳܕܼܥܺܝܢ ܐܢ̱ܬܿܽܘܢ ܐܶܡܰܬܼܝ ܗ̱ܽܘ ܙܰܒܼܢܳܐ܀
13:34 [ai]ܐܰܝܟܼ ܓܰܒܼܪܳܐ ܗ̱ܘ ܓܶܝܪ ܕܰܚܙܰܩ܂ ܘܰܫܒܼܰܩ ܒܰܝܬܿܶܗ܃ ܘܝܰܗ̱ܒܼ ܫܽܘܠܛܳܢܳܐ ܠܥܰܒܼܕܿܰܘܗ̱ܝ̈܂ ܘܰܠܐ̱ܢܳܫ ܐ̱ܢܳܫ ܥܒܼܳܕܼܶܗ܂ ܘܰܠܬܼܳܪܥܳܐ ܦܰܩܶܕܼ܂ ܕܢܶܗܘܶܐ ܥܺܝܪ܂
13:35 [ai]ܐܶܬܿܬܿܥܺܝܪܘ ܗܳܟܼܺܝܠ܂ ܕܠܳܐ ܝܳܕܼܥܺܝܢ ܐܢ̱ܬܿܽܘܢ ܐܶܡܰܬܼܝ ܐܳܬܼܶܐ ܡܳܪܶܗ ܕܒܰܝܬܳܐ܂ ܒܪܰܡܫܳܐ܂ ܐܰܘ ܒܦܶܠܓܿܶܗ ܕܠܺܠܝܳܐ܂ ܐܰܘ ܒܡܰܩܪܳܐ ܬܰܪܢܳܓܼܠܳܐ܂ ܐܰܘ ܒܨܰܦܼܪܳܐ܂
13:36 [ai]ܕܰܠܡܳܐ ܢܺܐܬܼܶܐ ܡܶܢ ܫܶܠܝܳܐ܂ ܘܢܶܫܟܿܰܚܟܼܽܘܢ ܟܰܕܼ ܕܰܡܟܿܺܝܢ ܐܢ̱ܬܿܽܘܢ܂
13:37 [ai]ܡܶܕܶܡ ܕܰܠܟܼܽܘܢ ܕܶܝܢ ܐܳܡܰܪ ܐ̱ܢܳܐ܂ ܠܟܼܽܠܟܼܽܘܢ ܗ̱ܽܘ ܐܳܡܰܪ ܐ̱ܢܳܐ܃ ܗܘܰܝܬܿܽܘܢ ܥܺܝܪܺܝܢ܀

next chapter