← Back
The Comprehensive Aramaic Lexicon
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


14:01 [ai]ܒܳܬܼܰܪ ܕܶܝܢ ܬܿܪ̈ܶܝܢ ܝܰܘܡܺܝܢ̈܃ ܗܳܘܶܐ ܗ̱ܘܳܐ ܦܶܨܚܳܐ ܕܿܦܼܰܛܺܝܪ̈ܶܐ܂ ܘܒܼܳܥܶܝܰܢ ܗ̱ܘܰܘ ܪ̈ܰܒܰܝ ܟܳܗܢܶܐ̈ ܘܣܳܦܼܪ̈ܶܐ܃ ܐܰܝܟܿܰܢܳܐ ܒܢܶܟܼܠܳܐ ܢܶܐܚܕܼܽܘܢ ܘܢܶܩܛܠܽܘܢܳܝܗ̱ܝ܂
14:02 [ai]ܘܳܐܡܪܺܝܢ ܗ̱ܘܰܘ܂ ܠܳܐ ܒܥܰܕܼܥܺܕܼܳܐ܂ ܕܰܠܡܳܐ ܢܶܗܘܶܐ ܫܓܼܽܘܫܝܳܐ ܒܥܰܡܳܐ܀܀
14:03 [ai]ܘܟܼܰܕܼ ܗܽܘ ܐܺܝܬܼܰܘܗ̱ܝ ܒܒܼܶܝܬܼ ܥܰܢܝܳܐ܃ ܒܒܼܰܝܬܿܶܗ ܕܫܶܡܥܽܘܢ ܓܰܪܒܿܳܐ܂ ܟܰܕܼ ܣܡܺܝܟܼ܃ ܐܶܬܼܳܬܼ ܐܰܢ̱ܬܿܬܼܳܐ ܕܺܐܝܬܼ ܥܠܶܝܗ ܫܳܛܺܝܦܼܬܳܐ ܕܒܶܣܡܳܐ ܕܢܰܪܕܺܝܢ ܪܺܫܳܝܳܐ ܣܰܓܿܺܝ ܕܡܰܝܳܐ̈܂ ܘܰܦܼܬܼܰܚܬܼܳܗ܂ ܘܰܐܫܦܿܰܥܬܼܳܗ ܥܰܠ ܪܺܫܶܗ ܕܝܶܫܽܘܥ܀
14:04 [ai]ܐܺܝܬܼ ܗ̱ܘܰܘ ܕܶܝܢ ܐ̱ܢܳܫܳܐ̈ ܡܶܢ ܬܰܠܡܺܝܕܼܶܐ̈܂ ܕܶܐܬܼܒܿܶܐܫ ܠܗܽܘܢ ܒܢܰܦܼܫܗܽܘܢ܂ ܘܶܐܡܰܪܘ܂ ܕܰܠܡܳܢܳܐ ܗܘܳܐ ܐܰܒܼܕܳܢܳܐ ܕܗܳܢܳܐ ܒܶܣܡܳܐ܂
14:05 [ai]ܡܶܫܟܿܰܚ ܗ̱ܘܳܐ ܓܶܝܪ ܠܡܶܙܕܿܰܒܿܳܢܽܘ܂ ܝܰܬܿܺܝܪ ܡܶܢ ܬܠܳܬܼܡܳܐܐ ܕܺܝܢܳܪ̈ܺܝܢ܃ ܘܰܠܡܶܬܼܺܝܗܳܒܼܽܘ ܠܡܶܣܟܿܺܢܶܐ̈܂ ܘܡܶܙܕܿܰܥܦܿܺܝܢ ܗ̱ܘܰܘ ܒܶܗ܀
14:06 [ai]ܗܽܘ ܕܶܝܢ ܝܶܫܽܘܥ ܐܶܡܰܪ܂ ܫܽܘܒܼܩܽܘܗ܂ ܡܳܢܳܐ ܡܰܗܪܺܝܢ ܐܢ̱ܬܿܽܘܢ ܠܳܗ܂ ܥܒܼܳܕܼܳܐ ܫܰܦܿܺܝܪܳܐ ܥܶܒܼܕܿܰܬܼ ܠܘܳܬܼܝ܂
14:07 [ai]ܒܟܽܠܙܒܼܰܢ ܓܶܝܪ ܡܶܣܟܿܺܢܶܐ̈ ܐܺܝܬܼ ܠܟܼܽܘܢ ܥܰܡܟܼܽܘܢ܂ ܘܶܐܡܰܬܼܝ ܕܨܳܒܼܶܝܢ ܐܢ̱ܬܿܽܘܢ܂ ܡܶܫܟܿܚܺܝܢ ܐܢ̱ܬܿܽܘܢ ܕܬܶܥܒܿܕܼܽܘܢ ܠܗܽܘܢ ܕܫܰܦܿܺܝܪ܂ ܐܶܢܳܐ ܕܶܝܢ ܠܳܐ ܒܟܽܠܙܒܼܰܢ ܐܺܝܬܼܰܝ ܠܘܳܬܼܟܼܽܘܢ܂
14:08 [ai]ܗܰܘ ܕܺܐܝܬܼ ܗ̱ܘܳܐ ܠܳܗ ܠܗܳܕܼܶܐ܂ ܥܶܒܼܕܿܰܬܼ܂ ܘܩܰܕܿܡܰܬܼ ܐܰܝܟܼ ܕܠܰܩܒܼܽܘܪܬܳܐ܂ ܒܰܣܡܰܬܼ ܓܽܘܫܡܝ܂
14:09 [ai]ܘܰܐܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܟܽܠ ܐܰܝܟܿܳܐ ܕܬܶܬܼܟܿܪܶܙ ܣܒܼܰܪܬܼܝ ܗܳܕܼܶܐ ܒܟܽܠܶܗ ܥܳܠܡܳܐ܃ ܘܳܐܦܼ ܡܶܕܶܡ ܕܥܶܒܼܕܿܰܬܼ ܗܳܕܼܶܐ܂ ܢܶܬܼܡܰܠܰܠ ܠܕܼܽܘܟܼܪܳܢܳܗ܀
14:10 [ai]ܺܝܗܽܘܕܼܳܐ ܕܶܝܢ ܣܟܼܰܪܝܽܘܛܳܐ ܚܰܕܼ ܡܶܢ ܬܿܪ̈ܶܥܣܰܪ܃ ܐܶܙܰܠ ܠܘܳܬܼ ܪ̈ܰܒܰܝ ܟܳܗܢܶܐ̈܂ ܐܰܝܟܼ ܕܢܰܫܠܡܺܝܘܗ̱ܝ ܠܗܽܘܢ ܠܝܶܫܽܘܥ܀
14:11 [ai]ܗܶܢܽܘܢ ܕܶܝܢ ܟܰܕܼ ܫܡܰܥܘ܂ ܚܕܼܺܝܘ܂ ܘܶܐܫܬܰܘܕܿܺܝܘ ܟܶܣܦܿܳܐ ܕܢܶܬܿܠܽܘܢ ܠܶܗ܂ ܘܒܼܳܥܶܐ ܗ̱ܘܳܐ ܠܶܗ ܦܶܠܥܳܐ܂ ܕܢܰܫܠܡܺܝܘܗ̱ܝ܀
14:12 [ai]ܘܰܒܝܰܘܡܳܐ ܩܰܕܼܡܳܝܳܐ ܕܿܦܼܰܛܺܝܪ̈ܶܐ܃ ܕܒܶܗ ܕܳܒܼܚܺܝܢ ܺܝܗܽܘܕܼܳܝܶܐ̈ ܦܶܨܚܳܐ܃ ܐܳܡܪܺܝܢ ܠܶܗ ܬܰܠܡܺܝܕܼܰܘܗ̱ܝ̈܂ ܐܰܝܟܿܳܐ ܨܳܒܼܶܐ ܐܰܢ̱ܬܿ܂ ܕܢܺܐܙܰܠ ܢܛܰܝܶܒܼ ܠܳܟܼ ܕܬܶܐܟܼܽܘܠ ܦܶܨܚܳܐ܂
14:13 [ai]ܘܫܰܕܿܰܪ ܬܿܪ̈ܶܝܢ ܡܶܢ ܬܰܠܡܺܝܕܼܰܘܗ̱ܝ̈܂ ܘܶܐܡܰܪ ܠܗܽܘܢ܂ ܙܶܠܘ ܠܰܡܕܼܺܝܢ̱ܬܳܐ܃ ܘܗܳܐ ܦܳܓܼܰܥ ܒܟܽܘܢ܂ ܓܰܒܼܪܳܐ ܕܰܫܩܺܝܠ ܡܳܐܢܳܐ ܕܡܰܝܳܐ̈܂ ܙܶܠܘ ܒܳܬܼܪܶܗ܂
14:14 [ai]ܘܠܰܐܝܟܿܳܐ ܕܥܳܐܶܠ܂ ܐܶܡܰܪܘ ܠܡܳܪܶܐ ܒܰܝܬܳܐ܂ ܪܰܒܰܢ ܐܳܡܰܪ܃ ܐܰܝܟܿܰܘ ܒܶܝܬܼ ܡܰܫܪܝܳܐ܂ ܐܰܝܟܿܳܐ ܕܶܐܟܼܽܘܠ ܥܰܡ ܬܰܠܡܺܝܕܼܰܝ̈ ܦܶܨܚܳܐ܂
14:15 [ai]ܘܗܳܐ ܡܚܰܘܶܐ ܠܟܼܽܘܢ ܥܶܠܺܝܬܼܳܐ ܪܰܒܿܬܼܳܐ ܕܰܡܫܰܘܝܳܐ܂ ܘܰܡܛܰܝܒܼܳܐ܂ ܬܰܡܳܢ ܬܰܩܶܢܘ ܠܰܢ܂
14:16 [ai]ܘܰܢܦܼܰܩܘ ܬܰܠܡܺܝܕܼܰܘܗ̱ܝ̈܂ ܘܶܐܬܼܰܘ ܠܰܡܕܼܺܝܢ̱ܬܳܐ܂ ܘܶܐܫܟܿܰܚܘ ܐܰܝܟܿܰܢܳܐ ܕܶܐܡܰܪ ܠܗܽܘܢ܃ ܘܛܰܝܶܒܼܘ ܦܶܨܚܳܐ܀܀
14:17 [ai]ܘܟܼܰܕܼ ܗܘܳܐ ܪܰܡܫܳܐ܂ ܐܶܬܼܳܐ ܥܰܡ ܬܪܶܥܣܰܪܬܿܶܗ܀
14:18 [ai]ܘܟܼܰܕܼ ܣܡܺܝܟܼܺܝܢ ܘܠܳܥܣܺܝܢ܂ ܐܶܡܰܪ ܝܶܫܽܘܥ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܂ ܕܚܰܕܼ ܡܶܢܟܼܽܘܢ ܕܳܐܟܼܶܠ ܥܰܡܝ܂ ܗܽܘ ܢܰܫܠܡܰܢܝ܀
14:19 [ai]ܗܶܢܽܘܢ ܕܶܝܢ ܫܰܪܺܝܘ ܡܶܬܿܬܿܥܺܝܩܺܝܢ܂ ܘܳܐܡܪܺܝܢ ܠܶܗ܂ ܚܰܕܼ ܚܰܕܼ܂ ܠܡܳܐ ܐܶܢܳܐ܀
14:20 [ai]ܗܽܘ ܕܶܝܢ ܐܶܡܰܪ ܠܗܽܘܢ܂ ܚܰܕܼ ܡܶܢ ܬܿܪ̈ܶܥܣܰܪ܂ ܕܨܳܒܼܰܥ ܥܰܡܝ ܒܠܰܓܿܬܼܳܐ܂
14:21 [ai]ܘܰܒܪܶܗ ܕܐ̱ܢܳܫܳܐ܂ ܐܳܙܶܠ ܐܰܝܟܿܰܢܳܐ ܕܰܟܼܬܼܺܝܒܼ ܥܠܰܘܗ̱ܝ܂ ܘܳܝ ܕܶܝܢ ܠܓܼܰܒܼܪܳܐ ܗܰܘ ܕܒܺܐܝܕܼܶܗ ܡܶܫܬܿܠܶܡ ܒܪܶܗ ܕܐ̱ܢܳܫܳܐ܂ ܦܰܩܳܚ ܗ̱ܘܳܐ ܠܶܗ ܠܓܼܰܒܼܪܳܐ ܗܰܘ܂ ܐܶܠܽܘ ܠܳܐ ܐܶܬܼܺܝܠܶܕܼ܀
14:22 [ai]ܘܟܼܰܕܼ ܗܶܢܽܘܢ ܠܳܥܣܺܝܢ܃ ܢܣܰܒܼ ܝܶܫܽܘܥ ܠܰܚܡܳܐ܃ ܘܒܼܰܪܶܟܼ܂ ܘܰܩܨܳܐ ܘܝܰܗ̱ܒܼ ܠܗܽܘܢ܂ ܘܶܐܡܰܪ ܠܗܽܘܢ܂ ܣܰܒܼܘ܂ ܗܳܢܳܐ ܐܺܝܬܼܰܘܗ̱ܝ ܦܰܓܼܪܝ܀
14:23 [ai]ܘܰܢܣܰܒܼ ܟܳܣܳܐ܂ ܘܰܐܘܕܿܺܝ ܘܒܼܰܪܶܟܼ܂ ܘܝܰܗ̱ܒܼ ܠܗܽܘܢ܂ ܘܶܐܫܬܿܺܝܘ ܡܶܢܶܗ ܟܽܠܗܽܘܢ܂
14:24 [ai]ܘܶܐܡܰܪ ܠܗܽܘܢ܂ ܗܳܢܰܘ ܕܶܡܝ ܕܕܼܺܝܰܬܼܺܩܺܐ ܚܕܼܰܬܼܳܐ܃ ܕܰܚܠܳܦܼ ܣܰܓܿܺܝܶܐܐ̈ ܡܶܬܼܶܐܫܶܕܼ܂
14:25 [ai]ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܬܽܘܒܼ ܠܳܐ ܐܶܫܬܿܶܐ ܡܶܢ ܝܰܠܕܿܳܐ ܕܰܓܼܦܼܶܬܳܐ܃ ܥܕܼܰܡܳܐ ܠܝܰܘܡܳܐ ܗܰܘ ܕܒܶܗ ܐܶܫܬܿܶܝܘܗ̱ܝ ܚܰܕ̱ܬܳܐܺܝܬܼ ܒܡܰܠܟܿܽܘܬܼܶܗ ܕܰܐܠܳܗܳܐ܀
14:26 [ai]ܘܫܰܒܿܰܚܘ܂ ܘܰܢܦܼܰܩܘ ܠܛܽܘܪ ܙܰܝܬܿܶܐ̈ ܿ܀ܿ܀ܿ
14:27 [ai]ܘܶܐܡܰܪ ܠܗܽܘܢ ܝܶܫܽܘܥ܂ ܕܟܽܠܟܼܽܘܢ ܬܶܬܼܟܿܰܫܠܽܘܢ ܒܺܝ ܒܗܳܢܳܐ ܠܺܠܝܳܐ܂ ܟܬܼܺܝܒܼ ܓܶܝܪ܂ ܕܶܐܡܚܶܐ ܠܪܳܥܝܳܐ܂ ܘܢܶܬܼܒܿܰܕܿܪܽܘܢ ܐܶܡܪ̈ܰܘܗ̱ܝ܂
14:28 [ai]ܐܶܠܳܐ ܡܳܐ ܕܩܳܡܶܬܼ܃ ܩܳܕܼܶܡ ܐ̱ܢܳܐ ܠܟܼܽܘܢ ܠܰܓܼܠܺܝܠܳܐ܀
14:29 [ai]ܐܳܡܰܪ ܠܶܗ ܟܺܐܦܼܳܐ܂ ܐܶܢ ܟܽܠܗܽܘܢ ܢܶܬܼܟܿܰܫܠܽܘܢ܃ ܐܶܠܳܐ ܠܳܐ ܐܶܢܳܐ܂
14:30 [ai]ܐܳܡܰܪ ܠܶܗ ܝܶܫܽܘܥ܂ ܐܰܡܺܝܢ ܐܳܡܰܪ ܐ̱ܢܳܐ ܠܳܟܼ܃ ܕܰܐܢ̱ܬܿ ܝܰܘܡܳܢܳܐ܂ ܒܠܺܠܝܳܐ ܗܳܢܳܐ܂ ܩܕܼܳܡ ܕܢܶܩܪܶܐ ܬܰܪܢܳܓܼܠܳܐ ܬܿܰܪ̈ܬܿܶܝܢ ܙܰܒܼܢܺܝܢ̈܃ ܬܠܳܬܼ ܬܶܟܼܦܿܽܘܪ ܒܺܝ܀
14:31 [ai]ܗܽܘ ܕܶܝܢ ܝܰܬܿܺܝܪܳܐܺܝܬܼ ܐܳܡܰܪ ܗ̱ܘܳܐ܂ ܕܶܐܢ ܢܶܗܘܶܐ ܠܺܝ ܠܰܡܡܳܬܼ ܥܰܡܳܟܼ܃ ܠܳܐ ܐܶܟܼܦܿܽܘܪ ܒܳܟܼ܂ ܡܳܪܝ܂ ܘܰܐܟܼܘܳܬܼܶܗ ܐܳܦܼ ܟܽܠܗܽܘܢ ܐܶܡܰܪܘ܀
14:32 [ai]ܘܶܐܬܼܰܘ ܠܕܼܽܘܟܿܬܼܳܐ ܐܰܝܕܼܳܐ ܕܡܶܬܼܩܰܪܝܳܐ܂ ܓܿܶܕܿܣܺܡܰܢ܂ ܘܶܐܡܰܪ ܠܬܼܰܠܡܺܝܕܼܰܘܗ̱ܝ̈܂ ܬܶܒܼܘ ܗܳܪܟܿܳܐ܂ ܥܰܕܼ ܡܨܰܠܶܐ ܐ̱ܢܳܐ܂
14:33 [ai]ܘܰܕܼܒܼܰܪ ܥܰܡܶܗ ܠܟܼܺܐܦܼܳܐ܂ ܘܰܠܝܰܥܩܽܘܒܼ܂ ܘܰܠܝܽܘܚܰܢܳܢ܃ ܘܫܰܪܺܝ ܠܡܶܬܼܟܿܡܳܪܽܘ܂ ܘܰܠܡܶܬܿܬܿܥܳܩܽܘ܂
14:34 [ai]ܘܶܐܡܰܪ ܠܗܽܘܢ܂ ܟܰܪܝܳܐ ܗ̱ܝ ܠܳܗ ܠܢܰܦܼܫܝ܂ ܥܕܼܰܡܳܐ ܠܡܰܘܬܳܐ܂ ܩܰܘܰܘ ܗܳܪܟܿܳܐ ܘܶܐܬܿܬܿܥܺܝܪܘ܀
14:35 [ai]ܘܰܩܪܶܒܼ ܩܰܠܺܝܠ܂ ܘܰܢܦܼܰܠ ܥܰܠ ܐܰܪܥܳܐ܂ ܘܰܡܨܰܠܶܐ ܗ̱ܘܳܐ܂ ܕܶܐܢ ܡܶܫܟܿܚܳܐ܂ ܬܿܶܥܒܰܪ ܡܶܢܶܗ ܫܳܥܬܼܳܐ܂
14:36 [ai]ܘܶܐܡܰܪ܂ ܐܰܒܼܳܐ ܐܳܒܼܝ܃ ܟܽܠ ܡܶܕܶܡ ܡܶܫܟܿܰܚ ܐܰܢ̱ܬܿ܂ ܐܰܥܒܰܪ ܡܶܢܝ ܟܳܣܳܐ ܗܳܢܳܐ܂ ܐܶܠܳܐ ܠܳܐ ܨܶܒܼܝܳܢܝ ܕܺܝܠܝ܂ ܐܶܠܳܐ ܕܺܝܠܳܟܼ܀
14:37 [ai]ܘܶܐܬܼܳܐ ܐܶܫܟܿܰܚ ܐܶܢܽܘܢ ܟܰܕܼ ܕܰܡܟܿܺܝܢ܂ ܘܶܐܡܰܪ ܠܟܼܺܐܦܼܳܐ܂ ܫܶܡܥܽܘܢ܂ ܕܡܶܟܼܬܿ ܠܳܟܼ܃ ܠܳܐ ܐܶܫܟܿܰܚܬܿ ܚܕܼܳܐ ܫܳܥܳܐ ܠܡܶܬܿܬܿܥܳܪܽܘ܂
14:38 [ai]ܐܶܬܿܬܿܥܺܝܪܘ ܘܨܰܠܰܘ܂ ܕܠܳܐ ܬܶܥܠܽܘܢ ܠܢܶܣܝܽܘܢܳܐ܂ ܪܽܘܚܳܐ ܨܳܒܼܝܳܐ܂ ܘܰܡܛܰܝܒܼܳܐ܂ ܐܶܠܳܐ ܦܰܓܼܪܳܐ ܟܪܺܝܗ܀
14:39 [ai]ܘܶܐܙܰܠ ܬܽܘܒܼ܂ ܨܰܠܺܝ܂ ܘܗܺܝ ܡܶܠܬܼܳܐ ܐܶܡܰܪ܂
14:40 [ai]ܘܰܗܦܼܰܟܼ ܐܶܬܼܳܐ ܬܽܘܒܼ܂ ܐܶܫܟܿܰܚ ܐܶܢܽܘܢ ܟܰܕܼ ܕܰܡܟܿܺܝܢ܂ ܡܶܛܽܠ ܕܥܰܝܢܰܝܗܽܘܢ̈ ܝܰܩܺܝܪ̈ܳܢ ܗ̱ܘܰܝ̈܂ ܘܠܳܐ ܝܳܕܼܥܺܝܢ ܗ̱ܘܰܘ ܡܳܢܳܐ ܢܺܐܡܪܽܘܢ ܠܶܗ܂
14:41 [ai]ܘܶܐܬܼܳܐ ܕܰܬܼܠܳܬܼ ܙܰܒܼܢܺܝܢ̈܂ ܘܶܐܡܰܪ ܠܗܽܘܢ܂ ܕܡܰܟܼܘ ܡܶܟܿܺܝܠ܂ ܘܶܐܬܿܬܿܢܺܝܚܘ܂ ܡܛܳܬܼ ܚܰܪܬܼܳܐ܂ ܘܶܐܬܼܳܬܼ ܫܳܥܬܼܳܐ܂ ܘܗܳܐ ܡܶܫܬܿܠܶܡ ܒܪܶܗ ܕܐ̱ܢܳܫܳܐ ܒܺܐܝܕܼܰܝܗܽܘܢ̈ ܕܚܰܛܳܝܶܐ̈܂
14:42 [ai]ܩܽܘܡܘ܂ ܢܺܐܙܰܠ܂ ܗܳܐ ܩܪܶܒܼ ܗܰܘ ܕܡܰܫܠܶܡ ܠܺܝ܀
14:43 [ai]ܘܥܰܕܼ ܗܽܘ ܡܡܰܠܶܠ܃ ܐܶܬܼܳܐ ܺܝܗܽܘܕܼܳܐ ܣܟܼܰܪܝܽܘܛܳܐ ܚܰܕܼ ܡܶܢ ܬܿܪ̈ܶܥܣܰܪ܃ ܘܥܰܡܳܐ ܣܰܓܿܺܝܳܐܐ܂ ܥܰܡ ܣܰܦܼܣܺܪ̈ܶܐ܂ ܘܚܽܘܛܪ̈ܶܐ܃ ܡܶܢ ܠܘܳܬܼ ܪ̈ܰܒܰܝ ܟܳܗܢܶܐ̈܂ ܘܣܳܦܼܪ̈ܶܐ ܘܩܰܫܺܝܫܶܐ̈܀
14:44 [ai]ܘܝܰܗ̱ܒܼ ܠܗܽܘܢ ܐܳܬܼܳܐ ܡܰܫܠܡܳܢܳܐ ܗܰܘ ܕܡܰܫܠܶܡ܂ ܘܶܐܡܰܪ܂ ܗܰܘ ܕܢܳܫܶܩ ܐ̱ܢܳܐ܂ ܗܽܘܝܽܘ܂ ܐܽܘܚܕܿܽܘܗ̱ܝ ܙܗܺܝܪܳܐܺܝܬܼ܂ ܘܰܐܘܒܿܠܽܘܗ̱ܝ܀
14:45 [ai]ܘܒܼܰܪ ܫܳܥܬܼܶܗ ܩܪܶܒܼ܂ ܘܶܐܡܰܪ ܠܶܗ܂ ܪܰܒܺܝ܂ ܪܰܒܺܝ܂ ܘܢܰܫܩܶܗ܂
14:46 [ai]ܗܶܢܽܘܢ ܕܶܝܢ ܐܰܪܡܺܝܘ ܥܠܰܘܗ̱ܝ ܐܺܝܕܼܰܝܳܐ̈܂ ܘܰܐܚܕܿܽܘܗ̱ܝ܀
14:47 [ai]ܚܰܕܼ ܕܶܝܢ ܡܶܢ ܗܳܢܽܘܢ ܕܩܳܝܡܺܝܢ܃ ܫܡܰܛ ܣܰܝܦܼܳܐ܂ ܘܰܡܚܳܝܗ̱ܝ ܠܥܰܒܼܕܿܶܗ ܕܿܪ̈ܰܒܿ ܟܿܳܗܢܶܐ܂ ܘܫܰܩܠܳܗ ܐܶܕܼܢܶܗ܀
14:48 [ai]ܗܽܘ ܕܶܝܢ ܝܶܫܽܘܥ ܥܢܳܐ܂ ܘܶܐܡܰܪ ܠܗܽܘܢ܂ ܐܰܝܟܼ ܕܥܰܠ ܓܰܝܳܣܳܐ ܢܦܼܰܩܬܿܽܘܢ܃ ܒܣܰܝܦܼܶܐ̈ ܘܰܒܚܽܘܛܪ̈ܶܐ܂ ܕܬܶܐܚܕܿܽܘܢܳܢܝ܃
14:49 [ai]ܟܽܠܝܽܘܡ ܠܘܳܬܼܟܼܽܘܢ ܗܘܺܝܬܼ ܟܰܕܼ ܡܰܠܶܦܼ ܐ̱ܢܳܐ ܒܗܰܝܟܠܳܐ܃ ܘܠܳܐ ܐܶܚܰܕܿܬܿܽܘܢܳܢܝ܂ ܐܶܠܳܐ ܕܢܶܫܠܡܽܘܢ ܟܬܼܳܒܼܶܐ̈ ܗܘܳܬܼ ܗܳܕܼܶܐ܀
14:50 [ai]ܗܳܝܕܶܝܢ ܫܰܒܼܩܽܘܗ̱ܝ ܬܰܠܡܺܝܕܼܰܘܗ̱ܝ̈܂ ܘܰܥܪܰܩܘ܀
14:51 [ai]ܘܰܥܠܰܝܡܳܐ ܚܰܕܼ ܐܳܬܼܶܐ ܗ̱ܘܳܐ ܒܳܬܼܪܶܗ܃ ܘܰܥܛܺܝܦܼ ܣܶܕܿܽܘܢܳܐ ܥܰܪܛܶܠ܂ ܘܰܐܚܕܿܽܘܗ̱ܝ܂
14:52 [ai]ܗܽܘ ܕܶܝܢ ܫܒܼܰܩ ܣܶܕܿܽܘܢܳܐ܂ ܘܰܥܪܰܩ ܥܰܪܛܶܠ܀
14:53 [ai]ܘܰܐܘܒܿܠܽܘܗ̱ܝ ܠܝܶܫܽܘܥ ܠܘܳܬܼ ܩܰܝܳܦܼܳܐ ܪܰܒܿ ܟܳܗܢܶܐ̈܂ ܘܶܐܬܼܟܿܰܢܰܫܘ ܠܘܳܬܼܶܗ ܟܽܠܗܽܘܢ ܪ̈ܰܒܰܝ ܟܳܗܢܶܐ̈܂ ܘܣܳܦܼܪ̈ܶܐ ܘܩܰܫܺܝܫܶܐ̈܀
14:54 [ai]ܫܶܡܥܽܘܢ ܕܶܝܢ ܡܶܢ ܪܽܘܚܩܳܐ ܐܳܬܼܶܐ ܗ̱ܘܳܐ ܒܳܬܼܪܶܗ܃ ܥܕܼܰܡܳܐ ܠܓܼܰܘ ܕܳܪܬܳܐ ܕܿܪ̈ܰܒܿ ܟܿܳܗܢܶܐ܂ ܘܝܳܬܼܶܒܼ ܗ̱ܘܳܐ ܥܰܡ ܡܫܰܡܫܳܢܶܐ̈܂ ܘܫܳܚܶܢ ܠܽܘܩܒܼܰܠ ܢܽܘܪܳܐ܀
14:55 [ai]ܪ̈ܰܒܰܝ ܟܳܗܢܶܐ̈ ܕܶܝܢ܂ ܘܟܼܽܠܶܗ ܟܶܢܫܗܽܘܢ܃ ܒܿܳܥܶܝܢ ܗ̱ܘܰܘ ܥܰܠ ܝܶܫܽܘܥ ܣܳܗܕܿܽܘܬܼܳܐ܂ ܕܰܢܡܺܝܬܼܽܘܢܳܝܗ̱ܝ܃ ܘܠܳܐ ܐܶܫܟܿܰܚܘ܂
14:56 [ai]ܟܰܕܼ ܣܰܓܿܺܝܶܐܐ̈ ܓܶܝܪ ܡܰܣܗܕܼܺܝܢ ܗ̱ܘܰܘ ܥܠܰܘܗ̱ܝ܃ ܠܳܐ ܫܰܘܝܳܢ̈ ܗܘܰܝ̈ ܣܳܗܕܿܘܳܬܼܗܽܘܢ̈܂
14:57 [ai]ܐ̱ܢܳܫܺܝܢ ܕܶܝܢ ܩܳܡܘ ܥܠܰܘܗ̱ܝ܂ ܣܳܗܕܿܶܐ̈ ܕܫܽܘܩܪܳܐ܂ ܘܶܐܡܰܪܘ܂
14:58 [ai]ܕܰܚܢܰܢ ܫܡܰܥܢܳܝܗ̱ܝ ܕܶܐܡܰܪ܂ ܕܶܐܢܳܐ ܫܳܪܶܐ ܐ̱ܢܳܐ ܗܰܝܟܠܳܐ ܗܳܢܳܐ ܕܰܥܒܼܺܝܕܼ ܒܺܐܝܕܼܰܝܳܐ̈܃ ܘܠܰܬܼܠܳܬܼܳܐ ܝܰܘܡܺܝܢ̈ ܒܳܢܶܐ ܐ̱ܢܳܐ ܐ̱ܚܪܺܢܳܐ܂ ܕܠܳܐ ܥܒܼܺܝܕܼ ܒܺܐܝܕܼܰܝܳܐ̈܂
14:59 [ai]ܘܳܐܦܼܠܳܐ ܕܶܝܢ ܗܳܟܼܰܢܳܐ ܫܰܘܝܳܐ ܗ̱ܘܳܬܼ ܣܳܗܕܿܽܘܬܼܗܽܘܢ܂
14:60 [ai]ܘܩܳܡ ܪ̈ܰܒܿ ܟܿܳܗܢܶܐ ܒܰܡܨܰܥܬܼܳܐ܂ ܘܫܰܐܠܶܗ ܠܝܶܫܽܘܥ܂ ܘܶܐܡܰܪ܂ ܠܳܐ ܡܦܼܰܢܶܐ ܐܰܢ̱ܬܿ ܦܶܬܼܓܼܳܡܳܐ܃ ܡܳܢܳܐ ܡܰܣܗܕܼܺܝܢ ܥܠܰܝܟܿ ܗܳܠܶܝܢ܃
14:61 [ai]ܗܽܘ ܕܶܝܢ ܫܰܬܿܺܝܩ ܗ̱ܘܳܐ܂ ܘܡܶܕܶܡ ܠܳܐ ܥܢܳܝܗ̱ܝ܀ ܘܬܼܽܘܒܼ ܫܰܐܠܶܗ ܪ̈ܰܒܿ ܟܿܳܗܢܶܐ܂ ܘܶܐܡܰܪ܂ ܐܰܢ̱ܬܿ ܗ̱ܽܘ ܡܫܺܝܚܳܐ܂ ܒܪܶܗ ܕܰܡܒܼܰܪܟܼܳܐ܂
14:62 [ai]ܗܽܘ ܕܶܝܢ ܝܶܫܽܘܥ ܐܶܡܰܪ ܠܶܗ܂ ܐܶܢܳܐ ܐ̱ܢܳܐ܂ ܘܬܼܶܚܙܽܘܢ ܠܰܒܼܪܶܗ ܕܐ̱ܢܳܫܳܐ܂ ܕܝܳܬܼܶܒܼ ܡܶܢ ܝܰܡܺܝܢܳܐ ܕܚܰܝܠܳܐ܃ ܘܳܐܬܼܶܐ ܥܰܠ ܥܢܳܢܰܝ̈ ܫܡܰܝܳܐ܀
14:63 [ai]ܪ̈ܰܒܿ ܟܿܳܗܢܶܐ ܕܶܝܢ ܨܪܳܐ ܟܽܘܬܿܺܝܢܶܗ܂ ܘܶܐܡܰܪ܂ ܡܳܢܳܐ ܡܶܟܿܺܝܠ ܡܶܬܼܒܿܥܶܝܢ ܠܰܢ ܣܳܗܕܿܶܐ̈܂
14:64 [ai]ܗܳܐ ܡܶܢ ܦܽܘܡܶܗ ܫܡܰܥܬܿܽܘܢ ܓܽܘܕܿܳܦܼܳܐ܂ ܡܳܢܳܐ ܡܶܬܼܚܙܶܐ ܠܟܼܽܘܢ܂ ܗܶܢܽܘܢ ܕܶܝܢ ܟܽܠܗܽܘܢ ܕܳܢܘ܂ ܕܚܰܝܳܒܼ ܗ̱ܽܘ ܡܰܘܬܳܐ܀
14:65 [ai]ܘܫܰܪܺܝܘ ܐ̱ܢܳܫܺܝܢ̈ ܪܳܩܺܝܢ ܒܦܰܪܨܽܘܦܿܶܗ܂ ܘܰܡܚܰܦܿܶܝܢ ܐܰܦܿܰܘܗ̱ܝ̈܂ ܘܰܡܩܰܦܿܚܺܝܢ ܠܶܗ܂ ܘܳܐܡܪܺܝܢ܂ ܐܶܬܼܢܰܒܿܳܐ܂ ܘܕܼܰܚܫܶܐ̈ ܡܳܚܶܝܢ ܗ̱ܘܰܘ ܠܶܗ ܥܰܠ ܦܰܟܿܰܘܗ̱ܝ̈܀
14:66 [ai]ܘܟܼܰܕܼ ܫܶܡܥܽܘܢ ܠܬܼܰܚܬܿ ܒܕܳܪܬܳܐ܃ ܐܶܬܼܳܬܼ ܥܠܰܝܡܬܼܳܐ ܚܕܼܳܐ ܕܿܪ̈ܰܒܿ ܟܿܳܗܢܶܐ܂
14:67 [ai]ܚܙܳܬܼܶܗ ܕܫܳܚܶܢ܂ ܘܚܳܪܰܬܼ ܒܶܗ܂ ܘܳܐܡܪܳܐ ܠܶܗ܂ ܘܳܐܦܼ ܐܰܢ̱ܬܿ ܥܰܡ ܝܶܫܽܘܥ ܗܘܰܝܬܿ ܢܳܨܪܳܝܳܐ܂
14:68 [ai]ܗܽܘ ܕܶܝܢ ܟܦܼܰܪ܂ ܘܶܐܡܰܪ܂ ܠܳܐ ܝܳܕܼܰܥ ܐ̱ܢܳܐ ܡܳܢܳܐ ܐܳܡܪܳܐ ܐܰܢ̱ܬܿܝ܂ ܘܰܢܦܼܰܩ ܠܒܼܰܪ ܠܣܶܦܿܳܐ܂ ܘܰܩܪܳܐ ܬܰܪܢܳܓܼܠܳܐ܂
14:69 [ai]ܘܰܚܙܳܬܼܶܗ ܬܽܘܒܼ ܥܠܰܝܡܬܼܳܐ ܗܳܝ܃ ܘܫܰܪܝܰܬܼ ܕܬܺܐܡܰܪ ܠܰܐܝܠܶܝܢ ܕܩܳܝܡܺܝܢ܃ ܕܳܐܦܼ ܗܳܢܳܐ ܡܶܢܗܽܘܢ ܗ̱ܽܘ܂
14:70 [ai]ܗܽܘ ܕܶܝܢ ܬܽܘܒܼ ܟܦܼܰܪ܂ ܘܒܼܳܬܼܰܪ ܩܰܠܺܝܠ܃ ܬܽܘܒܼ ܗܳܢܽܘܢ ܕܩܳܝܡܺܝܢ ܐܶܡܰܪܘ ܠܟܼܺܐܦܼܳܐ܂ ܫܰܪܺܝܪܳܐܺܝܬܼ ܡܶܢܗܽܘܢ ܐܰܢ̱ܬܿ܂ ܐܳܦܼ ܓܶܝܪ ܓܠܺܝܠܳܝܳܐ ܐܰܢ̱ܬܿ܂ ܘܡܰܡܠ̱ܠܳܟܼ ܕܳܡܶܐ܂
14:71 [ai]ܗܽܘ ܕܶܝܢ ܫܰܪܺܝ ܗ̱ܘܳܐ܂ ܡܰܚܪܶܡ ܘܝܳܡܶܐ܃ ܕܠܳܐ ܝܳܕܼܰܥ ܐ̱ܢܳܐ ܠܓܼܰܒܼܪܳܐ ܗܳܢܳܐ܂ ܕܳܐܡܪܺܝܢ ܐܢ̱ܬܿܽܘܢ܂
14:72 [ai]ܘܒܼܳܗ ܒܫܳܥܬܼܳܐ܂ ܩܪܳܐ ܬܰܪܢܳܓܼܠܳܐ ܕܿܬܼܰܪ̈ܬܿܶܝܢ ܙܰܒܼܢܺܝܢ̈܀ ܘܶܐܬܿܕܿܟܼܰܪ ܫܶܡܥܽܘܢ ܡܶܠܬܼܶܗ ܕܝܶܫܽܘܥ܂ ܕܶܐܡܰܪ ܗ̱ܘܳܐ ܠܶܗ܃ ܕܰܩܕܼܳܡ ܕܢܶܩܪܶܐ ܬܰܪܢܳܓܼܠܳܐ ܬܿܰܪ̈ܬܿܶܝܢ ܙܰܒܼܢܺܝܢ̈܂ ܬܠܳܬܼ ܬܶܟܼܦܿܽܘܪ ܒܺܝ܂ ܘܫܰܪܺܝ ܕܢܶܒܼܟܿܶܐ܀

next chapter