← Back
The Comprehensive Aramaic Lexicon
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


15:01 [ai]ܘܡܶܚܕܼܳܐ ܒܨܰܦܼܪܳܐ܃ ܥܒܼܰܕܼܘ ܡܶܠܟܿܳܐ ܪ̈ܰܒܰܝ ܟܳܗܢܶܐ̈܂ ܥܰܡ ܩܰܫܺܝܫܶܐ̈ ܘܥܰܡ ܣܳܦܼܪ̈ܶܐ܂ ܘܥܰܡ ܟܽܠܳܗ ܟܢܽܘܫܬܳܐ܂ ܘܶܐܣܰܪܘ ܠܝܶܫܽܘܥ܂ ܘܰܐܘܒܿܠܽܘܗ̱ܝ܂ ܘܰܐܫܠܡܽܘܗ̱ܝ ܠܦܿܺܝܠܰܛܳܘܣ܀
15:02 [ai]ܘܫܰܐܠܶܗ ܦܿܺܝܠܰܛܳܘܣ܂ ܐܰܢ̱ܬܿ ܗ̱ܽܘ ܡܰܠܟܿܳܐ ܕܺܝܗܽܘܕܼܳܝܶܐ̈܃ ܗܽܘ ܕܶܝܢ ܥܢܳܐ܂ ܘܶܐܡܰܪ ܠܶܗ܂ ܐܰܢ̱ܬܿ ܐܶܡܰܪܬܿ܀
15:03 [ai]ܘܳܐܟܼܠܺܝܢ ܗ̱ܘܰܘ ܩܰܪ̈ܨܰܘܗ̱ܝ ܪ̈ܰܒܰܝ ܟܳܗܢܶܐ̈܂ ܒܣܰܓܿܺܝܳܐܬܼܳܐ̈܂
15:04 [ai]ܗܽܘ ܕܶܝܢ ܦܿܺܝܠܰܛܳܘܣ ܬܽܘܒܼ ܫܰܐܠܶܗ܂ ܘܶܐܡܰܪ ܠܶܗ܂ ܠܳܐ ܡܦܼܰܢܶܐ ܐܰܢ̱ܬܿ ܦܶܬܼܓܼܳܡܳܐ܃ ܚܙܺܝ ܟܡܳܐ ܡܰܣܗܕܼܺܝܢ ܥܠܰܝܟܿ܀
15:05 [ai]ܗܽܘ ܕܶܝܢ ܝܶܫܽܘܥ܂ ܡܶܕܶܡ ܦܶܬܼܓܼܳܡܳܐ ܠܳܐ ܝܰܗ̱ܒܼ܂ ܐܰܝܟܿܰܢܳܐ ܕܿܢܶܬܿܕܰܡܰܪ ܦܿܺܝܠܰܛܳܘܣ܀
15:06 [ai]ܡܥܳܕܼ ܗ̱ܘܳܐ ܕܶܝܢ ܒܟܽܠ ܥܺܐܕܼܳܐ܃ ܠܡܶܫܪܳܐ ܠܗܽܘܢ ܐܰܣܺܝܪܳܐ ܚܰܕܼ܂ ܐܰܝܢܳܐ ܕܫܳܐܠܺܝܢ܂
15:07 [ai]ܘܺܐܝܬܼ ܗ̱ܘܳܐ ܚܰܕܼ ܕܡܶܬܼܩܪܶܐ܂ ܒܰܪ ܐܰܒܿܰܐ܂ ܕܰܐܣܺܝܪ ܗ̱ܘܳܐ ܥܰܡ ܥܳܒܼܕܿܰܝ̈ ܐܶܣܛܰܣܺܝܢ܂ ܗܳܢܽܘܢ ܕܩܶܛܠܳܐ ܒܶܐܣܛܰܣܺܝܢ ܥܒܼܰܕܼܘ܂
15:08 [ai]ܘܰܩܥܰܘ ܥܰܡܳܐ܃ ܘܫܰܪܺܝܘ ܠܡܶܫܰܐܠ܂ ܐܰܝܟܼ ܕܰܡܥܳܕܼ ܗ̱ܘܳܐ ܥܳܒܼܶܕܼ ܠܗܽܘܢ܂
15:09 [ai]ܗܽܘ ܕܶܝܢ ܦܿܺܝܠܰܛܳܘܣ ܥܢܳܐ܂ ܘܶܐܡܰܪ܂ ܨܳܒܼܶܝܢ ܐܢ̱ܬܿܽܘܢ܃ ܐܶܫܪܶܐ ܠܟܼܽܘܢ ܡܰܠܟܿܳܐ ܕܺܝܗܽܘܕܼܳܝܶܐ̈܂
15:10 [ai]ܝܳܕܼܰܥ ܗ̱ܘܳܐ ܓܶܝܪ ܦܿܺܝܠܰܛܳܘܣ܂ ܕܡܶܢ ܚܣܳܡܳܐ ܐܰܫܠܡܽܘܗ̱ܝ ܪ̈ܰܒܰܝ ܟܳܗܢܶܐ̈ ܿ܀ܿ܀ܿ
15:11 [ai]ܪ̈ܰܒܰܝ ܟܳܗܢܶܐ̈ ܕܶܝܢ܂ ܝܰܬܿܺܝܪܳܐܺܝܬܼ ܚܰܦܿܶܛܘ ܠܟܼܶܢܫܶܐ̈܃ ܕܰܠܒܼܰܪ ܐܰܒܼܰܐ ܢܶܫܪܶܐ ܠܗܽܘܢ܀
15:12 [ai]ܗܽܘ ܕܶܝܢ ܦܿܺܝܠܰܛܳܘܣ ܐܶܡܰܪ ܠܗܽܘܢ܂ ܡܳܢܳܐ ܗܳܟܼܺܝܠ ܨܳܒܼܶܝܢ ܐܢ̱ܬܿܽܘܢ ܐܶܥܒܿܶܕܼ ܠܗܳܢܳܐ܃ ܕܩܳܪܶܝܢ ܐܢ̱ܬܿܽܘܢ ܡܰܠܟܿܳܐ ܕܺܝܗܽܘܕܼܳܝܶܐ̈܂
15:13 [ai]ܗܶܢܽܘܢ ܕܶܝܢ ܬܽܘܒܼ ܩܥܰܘ܂ ܙܩܽܘܦܼܳܝܗ̱ܝ܀
15:14 [ai]ܗܽܘ ܕܶܝܢ ܦܿܺܝܠܰܛܳܘܣ ܐܶܡܰܪ ܠܗܽܘܢ܂ ܡܳܢܳܐ ܓܶܝܪ ܕܒܺܝܫ ܥܒܼܰܕܼ܂ ܘܗܶܢܽܘܢ ܝܰܬܿܺܝܪܳܐܺܝܬܼ ܩܳܥܶܝܢ ܗ̱ܘܰܘ܂ ܙܩܽܘܦܼܳܝܗ̱ܝ܀
15:15 [ai]ܦܿܺܝܠܰܛܳܘܣ ܕܶܝܢ ܨܒܼܳܐ܂ ܕܢܶܥܒܿܶܕܼ ܨܶܒܼܝܳܢܳܐ ܠܟܼܶܢܫܶܐ̈܂ ܘܰܫܪܳܐ ܠܗܽܘܢ ܠܒܼܰܪ ܐܰܒܿܰܐ܂ ܘܰܐܫܠܶܡ ܠܗܽܘܢ ܠܝܶܫܽܘܥ܂ ܟܰܕܼ ܡܢܰܓܿܰܕܼ܂ ܕܢܶܙܕܿܩܶܦܼ܀
15:16 [ai]ܐܶܣܛܪ̈ܰܛܺܝܽܘܛܶܐ ܕܶܝܢ ܐܰܘܒܿܠܽܘܗ̱ܝ ܠܓܼܰܘ ܕܳܪܬܳܐ܂ ܕܺܐܝܬܼܶܝܗ ܦܪܶܛܳܘܪܺܝܳܢ܂ ܘܰܩܪܰܘ ܠܟܼܽܠܳܗ ܐܶܣܦܿܺܝܪ܂
15:17 [ai]ܘܰܐܠܒܿܫܽܘܗ̱ܝ ܐܰܪ̈ܓܼܳܘܢܶܐ܂ ܘܰܓܼܕܼܰܠܘ ܣܳܡܘ ܠܶܗ ܟܠܺܝܠܳܐ ܕܟ̈ܽܘܒܿܶܐ܃
15:18 [ai]ܘܫܰܪܺܝܘ ܠܡܶܫܰܐܠ ܒܰܫܠܳܡܶܗ܃ ܫܠܳܡ ܡܰܠܟܿܳܐ ܕܺܝܗܽܘܕܼܳܝܶܐ̈܃
15:19 [ai]ܘܡܳܚܶܝܢ ܗ̱ܘܰܘ ܠܶܗ ܥܰܠ ܪܺܫܶܗ ܒܩܰܢܝܳܐ܂ ܘܪܳܩܺܝܢ ܗ̱ܘܰܘ ܒܰܐܦܿܰܘܗ̱ܝ̈܂ ܘܒܼܳܪܟܿܺܝܢ ܗ̱ܘܰܘ ܥܰܠ ܒܽܘܪ̈ܟܰܝܗܽܘܢ܂ ܘܣܳܓܼܕܺܝܢ ܠܶܗ܀
15:20 [ai]ܘܟܼܰܕܼ ܒܰܙܰܚܘ ܒܶܗ܃ ܐܰܫܠܚܽܘܗ̱ܝ ܐܰܪ̈ܓܼܳܘܢܶܐ܂ ܘܰܐܠܒܿܫܽܘܗ̱ܝ ܡܳܐܢܰܘܗ̱ܝ̈܂ ܘܰܐܦܿܩܽܘܗ̱ܝ ܕܢܶܙܩܦܼܽܘܢܳܝܗ̱ܝ܀
15:21 [ai]ܘܫܰܚܰܪܘ ܚܰܕܼ ܕܥܳܒܼܰܪ ܗ̱ܘܳܐ܃ ܫܶܡܥܽܘܢ ܩܽܘܪܺܝܢܳܝܳܐ܃ ܕܳܐܬܼܶܐ ܗ̱ܘܳܐ ܡܶܢ ܩܪܺܝܬܼܳܐ܂ ܐܰܒܼܽܘܗ̱ܝ ܕܰܐܠܶܟܿܣܰܢܕܿܪܳܘܣ ܘܰܕܼܪܽܘܦܼܳܘܣ܂ ܕܢܶܫܩܽܘܠ ܙܩܺܝܦܼܶܗ܀
15:22 [ai]ܘܰܐܝܬܿܝܽܘܗ̱ܝ ܠܓܳܓܼܽܘܠܬܳܐ܂ ܕܽܘܟܿܬܼܳܐ ܕܡܶܬܼܦܿܰܫܩܳܐ܂ ܩܰܪܩܰܦܼܬܼܳܐ܀
15:23 [ai]ܘܝܰܗ̱ܒܼܘ ܠܶܗ ܠܡܶܫܬܳܐ܂ ܚܰܡܪܳܐ ܕܰܚܠܺܝܛ ܒܶܗ ܡܽܘܪܳܐ܂ ܗܽܘ ܕܶܝܢ ܠܳܐ ܢܣܰܒܼ܀
15:24 [ai]ܘܟܼܰܕܼ ܙܰܩܦܿܽܘܗ̱ܝ܃ ܦܰܠܶܓܼܘ ܡܳܐܢܰܘܗ̱ܝ̈܂ ܘܰܐܪܡܺܝܘ ܥܠܰܝܗܽܘܢ ܦܶܣܳܐ܃ ܡܰܢܽܘ ܡܳܢܳܐ ܢܶܣܰܒܼ܀
15:25 [ai]ܐܺܝܬܼ ܗ̱ܘܳܐ ܕܶܝܢ ܫܳܥܶܐ̈ ܬܠܳܬܼ܂ ܟܰܕܼ ܙܰܩܦܿܽܘܗ̱ܝ܀
15:26 [ai]ܘܰܟܼܬܼܺܝܒܼܳܐ ܗ̱ܘܳܬܼ ܥܶܠܬܼܳܐ ܕܡܰܘܬܿܶܗ܂ ܒܰܟܼܬܼܳܒܼܳܐ܂ ܗܳܢܳܐ ܗ̱ܘ ܡܰܠܟܿܳܐ ܕܺܝܗܽܘܕܼܳܝܶܐ̈܀
15:27 [ai]ܘܰܙܩܰܦܼܘ ܥܰܡܶܗ ܬܿܪ̈ܶܝܢ ܠܶܣܛܳܝܶܐ̈܂ ܚܰܕܼ ܡܶܢ ܝܰܡܺܝܢܶܗ܂ ܘܚܰܕܼ ܡܶܢ ܣܶܡܳܠܶܗ܂
15:28 [ai]ܘܰܫܠܶܡ ܟܬܼܳܒܼܳܐ ܕܶܐܡܰܪ܂ ܕܥܰܡ ܥܰܘܳܠܶܐ̈ ܐܶܬܼܚܫܶܒܼ܀
15:29 [ai]ܘܳܐܦܼ ܐܰܝܠܶܝܢ ܕܶܝܢ ܕܥܳܒܼܪܺܝܢ ܗ̱ܘܰܘ܂ ܡܓܼܰܕܿܦܼܺܝܢ ܗ̱ܘܰܘ ܥܠܰܘܗ̱ܝ܂ ܘܰܡܢܺܝܕܼܺܝܢ ܪ̈ܺܫܰܝܗܽܘܢ܂ ܘܳܐܡܪܺܝܢ܂ ܐܽܘܢ ܫܳܪܶܐ ܗܰܝܟܠܳܐ܂ ܘܒܼܳܢܶܐ ܠܶܗ ܠܰܬܼܠܳܬܼܳܐ ܝܰܘܡܺܝܢ̈܃
15:30 [ai]ܦܰܨܳܐ ܢܰܦܼܫܳܟܼ܂ ܘܚܽܘܬܼ ܡܶܢ ܙܩܺܝܦܼܳܐ܀
15:31 [ai]ܘܗܳܟܼܰܢܳܐ ܐܳܦܼ ܪ̈ܰܒܰܝ ܟܳܗܢܶܐ̈ ܓܳܚܟܿܺܝܢ ܗ̱ܘܰܘ ܚܰܕܼ ܥܰܡ ܚܰܕܼ ܘܣܳܦܼܪ̈ܶܐ܂ ܘܳܐܡܪܺܝܢ܂ ܐ̱ܚܪ̈ܳܢܶܐ ܐܰܚܺܝ܃ ܢܰܦܼܫܶܗ܃ ܠܳܐ ܡܶܫܟܿܰܚ ܠܡܰܚܳܝܽܘ܃
15:32 [ai]ܡܫܺܝܚܳܐ ܡܰܠܟܿܶܗ ܕܺܐܝܣܪܳܝܶܠ܃ ܢܶܚܽܘܬܼ ܗܳܫܳܐ ܡܶܢ ܙܩܺܝܦܼܳܐ܂ ܕܢܶܚܙܶܐ܂ ܘܰܢܗܰܝܡܶܢ ܒܶܗ܀ ܘܳܐܦܼ ܗܳܢܽܘܢ ܕܶܝܢ ܕܰܙܩܺܝܦܼܺܝܢ ܗ̱ܘܰܘ ܥܰܡܶܗ܃ ܡܚܰܣܕܼܺܝܢ ܗ̱ܘܰܘ ܠܶܗ܀
15:33 [ai]ܘܟܼܰܕܼ ܗܘܰܝ̈ ܫܶܬܼ ܫܳܥܺܝܢ̈܃ ܗܘܳܐ ܚܶܫܽܘܟܼܳܐ ܥܰܠ ܟܽܠܳܗ ܐܰܪܥܳܐ܂ ܥܕܼܰܡܳܐ ܠܫܳܥܶܐ̈ ܬܫܰܥ܂
15:34 [ai]ܘܒܼܰܬܼܫܰܥ ܫܳܥܺܝܢ̈܃ ܩܥܳܐ ܝܶܫܽܘܥ ܒܩܳܠܳܐ ܪܳܡܳܐ܂ ܘܶܐܡܰܪ܂ ܐܺܝܠ܂ ܐܺܝܠ܂ ܠܡܳܢܳܐ ܫܒܼܰܩܬܿܳܢܝ܂ ܕܺܐܝܬܼܶܝܗ ܐܰܠܳܗܝ܂ ܐܰܠܳܗܝ܂ ܠܡܳܢܳܐ ܫܒܼܰܩܬܿܳܢܝ܀
15:35 [ai]ܘܐ̱ܢܳܫܺܝܢ̈ ܕܰܫܡܰܥܘ ܡܶܢ ܗܳܢܽܘܢ ܕܩܳܝܡܺܝܢ܃ ܐܳܡܪܺܝܢ ܗ̱ܘܰܘ܂ ܠܺܐܠܺܝܳܐ ܩܪܳܐ܂
15:36 [ai]ܪܗܶܛ ܕܶܝܢ ܚܰܕܼ ܘܰܡܠܳܐ ܐܶܣܦܼܽܘܓܿܳܐ ܚܰܠܳܐ܃ ܘܶܐܣܰܪ ܒܩܰܢܝܳܐ ܕܢܰܫܩܶܝܘܗ̱ܝ܂ ܘܶܐܡܰܪܘ܂ ܫܒܼܽܘܩܘ܂ ܢܶܚܙܶܐ ܐܶܢ ܐܳܬܼܶܐ ܐܺܠܺܝܳܐ܂ ܡܰܚܶܬܼ ܠܶܗ܀
15:37 [ai]ܗܽܘ ܕܶܝܢ ܝܶܫܽܘܥ ܩܥܳܐ ܒܩܳܠܳܐ ܪܳܡܳܐ܂ ܘܰܫܠܶܡ܀
15:38 [ai]ܘܰܐܦܿܰܝ̈ ܬܰܪܥܳܐ ܕܗܰܝܟܠܳܐ܂ ܐܶܨܛܪ̈ܺܝ ܠܰܬܼܪ̈ܶܝܢ܂ ܡܶܢ ܠܥܶܠ܂ ܥܕܼܰܡܳܐ ܠܬܼܰܚܬܿ܀
15:39 [ai]ܟܰܕܼ ܚܙܳܐ ܕܶܝܢ ܩܶܢܛܪܽܘܢܳܐ܂ ܗܰܘ ܕܩܳܐܶܡ ܗ̱ܘܳܐ ܠܘܳܬܼܶܗ܃ ܕܗܳܟܼܰܢܳܐ ܩܥܳܐ ܘܰܫܠܶܡ܂ ܐܶܡܰܪ܃ ܫܰܪܺܝܪܳܐܺܝܬܼ ܗܳܢܳܐ ܓܰܒܼܪܳܐ܂ ܒܪܶܗ ܗܘܳܐ ܕܰܐܠܳܗܳܐ܀
15:40 [ai]ܐܺܝܬܼ ܗ̱ܘܰܝ̈ ܕܶܝܢ ܐܳܦܼ ܢܶܫܶܐ̈ ܡܶܢ ܪܽܘܚܩܳܐ ܕܚܳܙܝܳܢ̈ ܗ̱ܘܰܝ̈܂ ܡܰܪܝܰܡ ܡܰܓܼܕܿܠܳܝܬܳܐ܃ ܘܡܰܪܝܰܡ ܐܶܡܶܗ ܕܝܰܥܩܽܘܒܼ ܙܥܽܘܪܳܐ܂ ܘܰܕܼܝܳܘܣܺܐ܂ ܘܫܳܠܽܘܡ܂
15:41 [ai]ܗܳܢܶܝܢ̈ ܕܟܰܕܼ ܗ̱ܽܘ ܒܰܓܼܠܺܝܠܳܐ ܢܰܩܺܝܦܼܳܢ̈ ܗ̱ܘܰܝ̈ ܠܶܗ܂ ܘܰܡܫܰܡܫܳܢ̈ ܠܶܗ܂ ܘܰܐ̱ܚܪ̈ܳܢܝܳܬܼܳܐ ܣܰܓܿܺܝܳܐܬܼܳܐ̈ ܕܰܣܠܶܩ ܗ̱ܘܰܝ̈ ܥܰܡܶܗ ܠܽܐܘܪܺܫܠܶܡ܀
15:42 [ai]ܘܟܼܰܕܼ ܗܘܳܐ ܪܰܡܫܳܐ ܕܰܥܪܽܘܒܼܬܳܐ܂ ܕܺܐܝܬܼܶܝܗ ܩܕܼܳܡ ܫܰܒܿܬܼܳܐ܃
15:43 [ai]ܐܶܬܼܳܐ ܝܰܘܣܶܦܼ܂ ܗܰܘ ܕܡܶܢ ܪܳܡܬܼܳܐ܂ ܡܝܰܩܪܳܐ ܒܽܘܠܶܘܛܺܐ܃ ܐܰܝܢܳܐ ܕܳܐܦܼ ܗܽܘ ܡܣܰܟܿܶܐ ܗ̱ܘܳܐ ܠܡܰܠܟܿܽܘܬܼܳܐ ܕܰܐܠܳܗܳܐ܂ ܘܰܐܡܪܰܚ܂ ܘܥܰܠ ܠܘܳܬܼ ܦܿܺܝܠܰܛܳܘܣ܃ ܘܰܫܐܶܠ ܦܰܓܼܪܶܗ ܕܝܶܫܽܘܥ܂
15:44 [ai]ܦܿܺܝܠܰܛܳܘܣ ܕܶܝܢ ܬܡܰܗ܂ ܕܶܐܢ ܡܶܢ ܟܰܕܿܽܘ ܡܺܝܬܼ܂ ܘܰܩܪܳܐ ܠܩܶܢܛܪܽܘܢܳܐ܂ ܘܫܰܐܠܶܗ܃ ܕܶܐܢ ܡܶܢ ܩܕܼܳܡ ܥܶܕܳܢܳܐ ܡܺܝܬܼ܂
15:45 [ai]ܘܟܼܰܕܼ ܺܝܠܶܦܼ܃ ܝܰܗ̱ܒܼ ܦܰܓܼܪܶܗ ܠܝܰܘܣܶܦܼ܀
15:46 [ai]ܘܰܙܒܼܰܢ ܝܰܘܣܶܦܼ ܟܶܬܿܳܢܳܐ܃ ܘܰܐܚܬܼܶܗ܂ ܘܟܼܰܪܟܼܶܗ ܒܶܗ܂ ܘܣܳܡܶܗ ܒܩܰܒܼܪܳܐ ܕܰܢܩܺܝܪ ܗ̱ܘܳܐ ܒܫܽܘܥܳܐ܂ ܘܥܰܓܿܶܠ ܟܺܐܦܼܳܐ ܥܰܠ ܬܰܪܥܶܗ ܕܩܰܒܼܪܳܐ܀
15:47 [ai]ܡܰܪܝܰܡ ܕܶܝܢ ܡܰܓܼܕܿܠܳܝܬܳܐ܂ ܘܡܰܪܝܰܡ ܗܳܝ ܕܝܽܘܣܺܐ܃ ܚܙܰܝ̈ ܐܰܝܟܿܳܐ ܕܶܐܬܿܬܣܺܝܡ܀

next chapter