← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


16:01 [ai]ܘܟܼܰܕܼ ܥܶܒܼܪܰܬܼ ܫܰܒܿܬܼܳܐ܃ ܡܰܪܝܰܡ ܡܰܓܼܕܿܠܳܝܬܳܐ܂ ܘܡܰܪܝܰܡ ܕܝܰܥܩܽܘܒܼ ܘܫܳܠܽܘܡ܃ ܙܒܼܰܢ ܗܶܪ̈ܽܘܡܶܐ ܕܢܺܐܬܼܝܳܢ܂ ܢܶܡܫܚܳܢܳܝܗ̱ܝ̈܀܀
16:02 [ai]ܒܫܰܦܼܪܳܐ ܕܶܝܢ ܒܚܰܕܼ ܒܫܰܒܿܳܐ܃ ܐܶܬܼܰܝ̈ ܠܒܼܶܝܬܼ ܩܒܼܽܘܪܳܐ܂ ܟܰܕܼ ܕܢܰܚ ܫܶܡܫܳܐ܂
16:03 [ai]ܘܳܐܡܪ̈ܳܢ ܗ̱ܘܰܝ̈ ܒܢܰܦܼܫܗܶܝܢ܃ ܡܰܢ ܕܶܝܢ ܥܰܓܿܶܠ ܠܰܢ ܟܺܐܦܼܳܐ܂ ܡܶܢ ܬܰܪܥܳܐ ܕܒܶܝܬܼ ܩܒܼܽܘܪܳܐ܂
16:04 [ai]ܘܚܳܪ ܚܙܰܝ̈܂ ܕܰܡܥܰܓܠܳܐ ܗܳܝ ܟܺܐܦܼܳܐ܂ ܪܰܒܿܳܐ ܗ̱ܘܳܬܼ ܓܶܝܪ ܛܳܒܼ܀
16:05 [ai]ܘܥܰܠܶܝܢ̈ ܠܒܼܶܝܬܼ ܩܒܼܽܘܪܳܐ܃ ܘܰܚܙܰܝ̈ ܥܠܰܝܡܳܐ܂ ܕܝܳܬܼܶܒܼ ܡܶܢ ܝܰܡܺܝܢܳܐ܃ ܘܰܥܛܺܝܦܼ ܐܶܣܛܠܳܐ ܚܶܘܳܪܬܳܐ܂ ܘܰܬܼܡܰܗ܂
16:06 [ai]ܗܽܘ ܕܶܝܢ ܐܶܡܰܪ ܠܗܶܝܢ܂ ܠܳܐ ܬܶܕܼܚܠܳܢ̈܂ ܠܝܶܫܽܘܥ ܢܳܨܪܳܝܳܐ ܒܿܳܥܝܳܢ̈ ܐܢ̱ܬܿܶܝܢ܂ ܗܰܘ ܕܶܐܙܕܿܩܶܦܼ܂ ܩܳܡ ܠܶܗ܂ ܠܳܐ ܗ̱ܘܳܐ ܬܢܳܢ܂ ܗܳܐ ܕܽܘܟܿܬܼܳܐ ܐܰܝܟܿܳܐ ܕܣܺܝܡ ܗ̱ܘܳܐ܂
16:07 [ai]ܐܶܠܳܐ ܙܶܠܶܝܢ ܐܶܡܰܪܶܝܢ ܠܬܼܰܠܡܺܝܕܼܰܘܗ̱ܝ̈܂ ܘܰܠܟܼܺܐܦܼܳܐ܃ ܕܗܳܐ ܩܳܕܼܶܡ ܠܟܼܽܘܢ ܠܰܓܼܠܺܝܠܳܐ܂ ܬܰܡܳܢ ܬܶܚܙܽܘܢܳܝܗ̱ܝ܂ ܐܰܝܟܿܰܢܳܐ ܕܶܐܡܰܪ ܠܟܼܽܘܢ܀
16:08 [ai]ܘܟܼܰܕܼ ܫܡܰܥ܃ ܥܪܰܩ܂ ܘܰܢܦܼܰܩ ܡܶܢ ܩܰܒܼܪܳܐ܂ ܐܰܚܺܝܕܼ ܗ̱ܘܳܐ ܠܗܶܝܢ ܓܶܝܪ ܬܶܗܪܳܐ܂ ܘܰܪܬܼܺܝܬܼܳܐ܂ ܘܰܠܐ̱ܢܳܫ ܡܶܕܶܡ ܠܳܐ ܐܶܡܰܪܶܝܢ܂ ܕܰܚܺܝܠܳܢ ܗ̱ܘܰܝ̈ ܓܶܝܪ܀܀
16:09 [ai]ܒܫܰܦܼܪܳܐ ܕܶܝܢ ܒܚܰܕܼ ܒܫܰܒܿܳܐ܃ ܩܳܡ ܘܶܐܬܼܚܙܺܝ ܠܽܘܩܕܼܰܡ܂ ܠܡܰܪܝܰܡ ܡܰܓܼܕܿܠܳܝܬܳܐ܂ ܗܳܝ ܕܫܰܒܼܥܳܐ ܫܺܐܕܼܺܝܢ̈ ܐܰܦܿܶܩ ܗ̱ܘܳܐ ܡܶܢܳܗ܂
16:10 [ai]ܘܗܺܝ ܐܶܙܰܠ̱ܬܼ܂ ܣܰܒܿܪܰܬܼ ܠܗܳܢܽܘܢ ܕܥܰܡܶܗ ܗ̱ܘܰܘ܃ ܕܰܐܒܼܺܝܠܺܝܢ ܗܘܰܘ܂ ܘܒܼܳܟܼܶܝܢ܂
16:11 [ai]ܘܗܶܢܽܘܢ ܟܰܕܼ ܫܡܰܥܘ ܕܳܐܡܪܳܢ ܕܚܰܝ܂ ܘܶܐܬܼܚܙܺܝ ܠܗܶܝܢ܃ ܠܳܐ ܗܰܝܡܶܢܘ ܐܶܢܶܝܢ̈܀
16:12 [ai]ܒܳܬܼܰܪ ܗܳܠܶܝܢ܂ ܐܶܬܼܚܙܺܝ ܠܰܬܼܪ̈ܶܝܢ ܡܶܢܗܽܘܢ܂ ܒܰܕܼܡܽܘܬܼܳܐ ܐ̱ܚܪܺܬܼܳܐ܃ ܟܰܕܼ ܡܗܰܠܟܼܺܝܢ܂ ܘܳܐܙܺܠ̱ܝܢ ܠܰܩܪܺܝܬܼܳܐ܂
16:13 [ai]ܘܗܶܢܽܘܢ ܐܶܙܰܠܘ܂ ܐܶܡܰܪܘ ܠܫܰܪܟܿܳܐ܂ ܐܳܦܼ ܠܳܐ ܠܗܳܢܽܘܢ ܗܰܝܡܶܢܘ܀
16:14 [ai]ܐ̱ܚܪܳܝܰܬܼ ܕܶܝܢ ܐܶܬܼܚܙܺܝ ܠܰܚܕܼܰܥܣܰܪ ܟܰܕܼ ܣܡܺܝܟܼܺܝܢ܃ ܘܚܰܣܶܕܼ ܠܚܰܣܺܝܪܽܘܬܼ ܗܰܝܡܳܢܽܘܬܼܗܽܘܢ ܘܰܠܩܰܫܝܽܘܬܼ ܠܶܒܗܽܘܢ܂ ܕܰܠܗܳܢܽܘܢ ܕܰܚܙܰܐܘܽܗ̱ܝ ܕܩܳܡ܂ ܠܳܐ ܗܰܝܡܶܢܘ܀
16:15 [ai]ܘܶܐܡܰܪ ܠܗܽܘܢ܂ ܙܶܠܘ ܠܥܳܠܡܳܐ ܟܽܠܶܗ܃ ܘܰܐܟܼܪܶܙܘ ܣܒܼܰܪܬܼܝ܂ ܒܟܽܠܳܗ ܒܪܺܝܬܼܳܐ܂
16:16 [ai]ܐܰܝܢܳܐ ܕܰܡܗܰܝܡܶܢ ܘܥܳܡܶܕܼ܂ ܚܳܝܶܐ܂ ܘܰܐܝܢܳܐ ܕܠܳܐ ܡܗܰܝܡܶܢ܂ ܡܶܬܼܚܰܝܰܒܼ܂
16:17 [ai]ܐܳܬܼܘܳܬܼܳܐ̈ ܕܶܝܢ ܠܰܐܝܠܶܝܢ ܕܰܡܗܰܝܡܢܺܝܢ܂ ܗܳܠܶܝܢ ܢܶܩܦܼܳܢ܂ ܒܫܶܡܝ ܫܺܐܕܼܶܐ̈ ܢܰܦܿܩܽܘܢ܂ ܘܰܒܠܶܫܳܢܶܐ̈ ܚܰܕܼ̱ܬܼܶܐ̈ ܢܡܰܠܠܽܘܢ܂
16:18 [ai]ܘܰܚܘܰܘܳܬܼܳܐ̈ ܢܶܫܩܠܽܘܢ܂ ܘܶܐܢ ܣܰܡܳܐ ܕܡܰܘܬܳܐ ܢܶܫܬܿܽܘܢ܂ ܠܳܐ ܢܰܗܰܪ ܐܶܢܽܘܢ܂ ܘܺܐܝܕܼܰܝܗܽܘܢ̈ ܢܣܺܝܡܽܘܢ ܥܰܠ ܟܿܪ̈ܺܝܗܶܐ܂ ܘܢܶܬܼܚܰܠܡܽܘܢ܀
16:19 [ai]ܝܶܫܽܘܥ ܕܶܝܢ ܡܳܪܰܢ܂ ܡܶܢ ܒܳܬܼܰܪ ܕܡܰܠܶܠ ܥܰܡܗܽܘܢ܂ ܠܰܫܡܰܝܳܐ ܣܠܶܩ܃ ܘܺܝܬܼܶܒܼ ܡܶܢ ܝܰܡܺܝܢܳܐ ܕܰܐܠܳܗܳܐ܂
16:20 [ai]ܗܶܢܽܘܢ ܕܶܝܢ ܢܦܼܰܩܘ܂ ܘܰܐܟܼܪܶܙܘ ܒܟܽܠ ܕܽܘܟܿܳܐ܂ ܘܡܳܪܰܢ ܡܥܰܕܿܰܪ ܗ̱ܘܳܐ ܠܗܽܘܢ܂ ܘܡܰܫܰܪ ܡܶܠܰܝܗܽܘܢ̈܂ ܒܳܐܬܼܘܳܬܼܳܐ̈ ܕܥܳܒܼܕܺܝܢ ܗ̱ܘܰܘ ܿ܀ܿ܀ܿ