← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܡܶܛܽܠ ܕܣܰܓܿܺܝܶܐܐ̈ ܨܒܼܰܘ܃ ܕܢܰܟܼܬܿܒܼܽܘܢ ܬܰܫܥܝܳܬܼܳܐ̈ ܕܿܣܽܘܥܪ̈ܳܢܶܐ܂ ܐܰܝܠܶܝܢ ܕܰܚܢܰܢ ܡܦܿܳܣܺܝܢ ܚ̱ܢܰܢ ܒܗܽܘܢ܃
01:02 [ai]ܐܰܝܟܼ ܡܶܕܶܡ ܕܰܐܫܠܶܡܘ ܠܰܢ ܗܳܢܽܘܢ ܕܡܶܢ ܩܕܼܺܝܡ ܗܘܰܘ ܚܰܙܳܝܶܐ̈ ܘܰܡܫܰܡܫܳܢܶܐ̈ ܕܺܝܠܳܗ ܕܡܶܠܬܼܳܐ܃
01:03 [ai]ܐܶܬܼܚܙܺܝ ܐܳܦܼ ܠܺܝ܂ ܡܶܛܽܠ ܕܩܰܪܺܝܒܼ ܗ̱ܘܺܝܬܼ ܝܰܨܺܝܦܼܳܐܺܝܬܼ ܠܟܼܽܠܗܽܘܢ܃ ܕܟܽܠ ܡܶܕܶܡ ܒܛܶܟܿܣܶܗ ܐܶܟܼܬܽܘܒܼ ܠܳܟܼ ܢܰܨܺܝܚܳܐ܃ ܬܿܶܐܳܘܦܼܺܝܠܶܐ܂
01:04 [ai]ܕܬܶܕܿܰܥ ܫܪܳܪܳܐ ܕܡܶܠܶܐ̈ ܕܶܐܬܿܬܿܰܠܡܰܕܿܬܿ ܠܗܶܝܢ܀܀
01:05 [ai]ܗܘܳܐ ܒܝܰܘܡܳܬܼܶܗ̈ ܕܗܶܪܳܘܕܼܶܣ ܡܰܠܟܿܳܐ ܕܺܝܗܽܘܕܼܳܐ܃ ܟܳܗܢܳܐ ܚܰܕܼ ܕܰܫܡܶܗ ܗ̱ܘܳܐ ܙܟܼܰܪܝܳܐ܂ ܡܶܢ ܬܿܶܫܡܶܫܬܳܐ ܕܒܶܝܬܼ ܐܰܒܼܺܝܰܐ܂ ܘܰܐܢ̱ܬܿܬܼܶܗ܂ ܡܶܢ ܒܢܳܬܼܶܗ ܕܰܐܗܪܽܘܢ܂ ܫܡܳܗ ܗ̱ܘܳܐ ܐܶܠܺܝܫܒܼܰܥ܂
01:06 [ai]ܬܿܪ̈ܰܝܗܽܘܢ ܕܶܝܢ܂ ܙܰܕܿܺܝܩܺܝܢ ܗ̱ܘܰܘ ܩܕܼܳܡ ܐܰܠܳܗܳܐ܂ ܘܰܡܗܰܠܟܼܺܝܢ ܒܟܽܠܗܽܘܢ ܦܽܘܩܕܳܢܰܘܗ̱ܝ̈܂ ܘܰܒܟܼܺܐܢܽܘܬܼܶܗ ܕܡܳܪܝܳܐ܂ ܕܠܳܐ ܥܶܕܼܠܳܝ܂
01:07 [ai]ܒܪܳܐ ܕܶܝܢ܂ ܠܰܝܬܿ ܗ̱ܘܳܐ ܠܗܽܘܢ܂ ܡܶܛܽܠ ܕܶܐܠܺܝܫܒܼܰܥ ܥܩܰܪܬܼܳܐ ܗ̱ܘܳܬܼ܂ ܘܰܬܼܪ̈ܰܝܗܽܘܢ܂ ܣܰܓܿܺܝܰܐܝ̈ ܒܝܰܘܡܳܬܼܗܽܘܢ̈ ܗ̱ܘܰܘ܀
01:08 [ai]ܗܘܳܐ ܗ̱ܘܳܐ ܕܶܝܢ܂ ܟܰܕܼ ܡܟܼܰܗܶܢ ܗ̱ܘܳܐ ܒܛܶܟܿܣܳܐ ܕܬܶܫܡܶܫܬܿܶܗ ܩܕܼܳܡ ܐܰܠܳܗܳܐ܂
01:09 [ai]ܒܰܥܝܳܕܼܳܐ ܕܟܳܗܢܽܘܬܼܳܐ܃ ܡܛܳܝܗ̱ܝ ܕܰܢܣܺܝܡ ܒܶܣܡܶܐ̈܂ ܘܥܰܠ ܠܗܰܝܟܠܶܗ ܕܡܳܪܝܳܐ܂
01:10 [ai]ܘܟܼܽܠܶܗ ܟܶܢܫܳܐ ܕܥܰܡܳܐ܂ ܡܨܰܠܶܐ ܗ̱ܘܳܐ ܠܒܼܰܪ ܒܥܶܕܳܢܳܐ ܕܒܶܣܡܶܐ̈܂
01:11 [ai]ܘܶܐܬܼܚܙܺܝ ܠܶܗ ܠܰܙܟܼܰܪܝܳܐ ܡܰܠܰܐܟܼܳܐ ܕܡܳܪܝܳܐ܃ ܕܩܳܐܶܡ ܡܶܢ ܝܰܡܺܝܢܳܐ ܕܡܰܕܼܒܿܚܳܐ ܕܒܶܣܡܶܐ̈܂
01:12 [ai]ܘܶܐܫܬܿܓܼܶܫ ܙܟܼܰܪܝܳܐ ܟܰܕܼ ܚܙܳܝܗ̱ܝ܂ ܘܕܼܶܚܠܬܼܳܐ ܢܶܦܼܠܰܬܼ ܥܠܰܘܗ̱ܝ܂
01:13 [ai]ܘܶܐܡܰܪ ܠܶܗ ܡܰܠܰܐܟܼܳܐ܂ ܠܳܐ ܬܶܕܼܚܰܠ ܙܟܼܰܪܝܳܐ܃ ܡܶܛܽܠ ܕܶܐܫܬܿܰܡܥܰܬܼ ܨܠܽܘܬܼܳܟܼ܂ ܘܰܐܢ̱ܬܿܬܼܳܟܼ ܐܶܠܺܝܫܒܼܰܥ܂ ܬܺܐܠܰܕܼ ܠܳܟܼ ܒܪܳܐ܂ ܘܬܼܶܩܪܶܐ ܫܡܶܗ܂ ܝܽܘܚܰܢܳܢ܂
01:14 [ai]ܘܬܼܶܗܘܶܐ ܠܳܟܼ ܚܰܕܼܽܘܬܼܳܐ܂ ܘܰܐܪܘܳܙܳܐ܂ ܘܣܰܓܿܺܝܶܐܐ̈ ܢܶܚܕܿܽܘܢ ܒܡܰܘܠܳܕܼܶܗ܂
01:15 [ai]ܢܶܗܘܶܐ ܓܶܝܪ ܪܰܒܼ ܩܕܼܳܡ ܡܳܪܝܳܐ܂ ܘܚܰܡܪܳܐ ܘܫܰܟܼܪܳܐ܂ ܠܳܐ ܢܶܫܬܿܶܐ܂ ܘܪܽܘܚܳܐ ܕܩܽܘܕܼܫܳܐ ܢܶܬܼܡܠܶܐ܂ ܥܰܕܼ ܗܽܘ ܒܟܰܪܣܳܐ ܕܶܐܡܶܗ܂
01:16 [ai]ܘܣܰܓܿܺܝܶܐܐ̈ ܡܶܢ ܒܢܰܝ ܐܺܝܣܪܳܝܶܠ ܢܰܦܼܢܶܐ ܠܘܳܬܼ ܡܳܪܝܳܐ ܐܰܠܳܗܗܽܘܢ܂
01:17 [ai]ܘܗܽܘ ܢܺܐܙܰܠ ܩܕܼܳܡܰܘܗ̱ܝ܂ ܒܪܽܘܚܳܐ܂ ܘܰܒܚܰܝܠܳܐ ܕܺܐܠܺܝܳܐ ܢܒܼܺܝܳܐ܂ ܕܢܰܦܼܢܶܐ ܠܶܒܿܳܐ ܕܰܐܒܼܳܗܶܐ̈ ܥܰܠ ܒܢܰܝܳܐ܂ ܘܠܰܐܝܠܶܝܢ ܕܠܳܐ ܡܶܬܿܛܦܿܺܝܣܺܝܢ܂ ܠܺܝܕܼܰܥܬܼܳܐ ܕܟܺܐܢܶܐ̈܂ ܘܰܢܛܰܝܶܒܼ ܠܡܳܪܝܳܐ ܥܰܡܳܐ ܓܡܺܝܪܳܐ܂
01:18 [ai]ܘܶܐܡܰܪ ܙܟܼܰܪܝܳܐ ܠܡܰܠܰܐܟܼܳܐ܂ ܐܰܝܟܿܰܢܳܐ ܐܶܕܿܰܥ ܗܳܕܼܶܐ܂ ܐܶܢܳܐ ܓܶܝܪ ܐܺܝܬܼܰܝ ܣܳܒܼܳܐ܂ ܘܰܐܢ̱ܬܿܰܬܼܝ܂ ܣܰܓܿܺܝܰܐܬܼ ܒܝܰܘܡܳܬܼܳܗ̈ ܗ̱ܺܝ܂
01:19 [ai]ܘܰܥܢܳܐ ܡܰܠܰܐܟܼܳܐ܂ ܘܶܐܡܰܪ ܠܶܗ܂ ܐܶܢܳܐ ܐ̱ܢܳܐ ܓܿܰܒܼܪܺܝܐܝܶܠ ܕܩܳܐܶܡ ܐ̱ܢܳܐ ܩܕܼܳܡ ܐܰܠܳܗܳܐ܂ ܘܶܐܫܬܿܰܠܚܶܬܼ ܕܶܐܡܰܠܶܠ ܥܰܡܳܟܼ܂ ܘܶܐܣܰܒܪܳܟܼ ܗܳܠܶܝܢ܂
01:20 [ai]ܡܶܟܿܺܝܠ ܬܶܗܘܶܐ ܫܰܬܿܺܝܩ܂ ܘܠܳܐ ܬܶܫܟܿܰܚ ܠܰܡܡܰܠܳܠܽܘ܃ ܥܕܼܰܡܳܐ ܠܝܰܘܡܳܐ ܕܗܳܠܶܝܢ ܢܶܗܘܝܳܢ̈܂ ܥܰܠ ܕܠܳܐ ܗܰܝܡܶܢܬܿ ܠܡܶܠܰܝ̈ ܗܳܠܶܝܢ ܕܡܶܬܼܡܰܠܝܳܢ̈ ܒܙܰܒܼܢܗܶܝܢ܂
01:21 [ai]ܥܰܡܳܐ ܕܶܝܢ ܩܳܐܶܡ ܗ̱ܘܳܐ܂ ܘܰܡܣܰܟܿܶܐ ܠܰܙܟܼܰܪܝܳܐ܂ ܘܬܼܰܡܺܝܗܺܝܢ ܗܘܰܘ ܥܰܠ ܬܰܘܚܳܪܬܿܶܗ ܕܰܒܼܗܰܝܟܠܳܐ܂
01:22 [ai]ܟܰܕܼ ܢܦܼܰܩ ܕܶܝܢ ܙܟܼܰܪܝܳܐ܃ ܠܳܐ ܡܶܫܟܿܰܚ ܗ̱ܘܳܐ ܕܰܢܡܰܠܶܠ ܥܰܡܗܽܘܢ܂ ܘܶܐܣܬܿܰܟܿܰܠ ܘܕܚܶܙܘܳܐ ܚܙܳܐ ܒܗܰܝܟܠܳܐ܂ ܘܗܽܘ ܡܶܪܡܰܙ ܪܳܡܶܙ ܗ̱ܘܳܐ ܠܗܽܘܢ܂ ܘܩܰܘܺܝ܂ ܟܰܕܼ ܚܪܶܫ܂
01:23 [ai]ܘܟܼܰܕܼ ܐܶܬܼܡܰܠܺܝܘ ܝܰܘܡܳܬܼܳܐ̈ ܕܬܶܫܡܶܫܬܿܶܗ܂ ܐܶܙܰܠ ܠܒܼܰܝܬܿܶܗ܂
01:24 [ai]ܘܰܗܘܳܐ ܡܶܢ ܒܳܬܼܰܪ ܝܰܘܡܳܬܼܳܐ̈ ܗܳܢܽܘܢ܃ ܒܶܛܢܰܬܼ ܐܶܠܺܝܫܒܼܰܥ ܐܰܢ̱ܬܿܬܼܶܗ܂ ܘܰܡܛܰܫܝܳܐ ܗ̱ܘܳܬܼ ܢܰܦܼܫܳܗ ܝܰܪ̈ܚܶܐ ܚܰܡܫܳܐ܂ ܘܳܐܡܪܳܐ ܗ̱ܘܳܬܼ܃
01:25 [ai]ܕܗܳܠܶܝܢ ܥܒܼܰܕܼ ܠܺܝ ܡܳܪܝܳܐ܃ ܒܝܰܘܡܳܬܼܳܐ̈ ܕܚܳܪ ܒܺܝ܃ ܠܡܶܣܰܒܼ ܚܶܣܕܿܝ ܕܒܶܝܬܼ ܒܢܰܝ ܐ̱ܢܳܫܳܐ܀܀
01:26 [ai]ܒܝܰܪܚܳܐ ܕܶܝܢ ܕܶܫܬܳܐ܃ ܐܶܫܬܿܠܰܚ ܓܿܰܒܼܪܺܝܐܝܶܠ ܡܰܠܰܐܟܼܳܐ ܡܶܢ ܠܘܳܬܼ ܐܰܠܳܗܳܐ ܠܰܓܼܠܺܝܠܳܐ܃ ܠܰܡܕܼܺܝܢ̱ܬܳܐ ܕܰܫܡܳܗ ܢܳܨܪܰܬܼ܂
01:27 [ai]ܠܘܳܬܼ ܒܬܽܘܠܬܳܐ ܕܰܡܟܼܺܝܪܳܐ ܠܓܼܰܒܼܪܳܐ ܕܰܫܡܶܗ ܝܰܘܣܶܦܼ܂ ܡܶܢ ܒܰܝܬܿܶܗ ܕܕܼܰܘܺܝܕܼ܂ ܘܰܫܡܳܗ ܠܰܒܼܬܼܽܘܠܬܳܐ܂ ܡܰܪܝܰܡ܂
01:28 [ai]ܘܥܰܠ ܠܘܳܬܼܳܗ ܡܰܠܰܐܟܼܳܐ܂ ܘܶܐܡܰܪ ܠܳܗ܂ ܫܠܳܡ ܠܶܟܼܝ ܡܰܠܝܰܬܼ ܛܰܝܒܿܽܘܬܼܳܐ܃ ܡܳܪܰܢ ܥܰܡܶܟܼܝ܂ ܒܪܺܝܟܼܰܬܼ ܒܢܶܫܶܐ̈܂
01:29 [ai]ܗܺܝ ܕܶܝܢ ܟܰܕܼ ܚܙܳܬܼ܂ ܐܶܬܼܪܰܗܒܿܰܬܼ ܒܡܶܠܬܼܶܗ܂ ܘܡܶܬܼܚܰܫܒܼܳܐ ܗ̱ܘܳܬܼ܃ ܕܡܳܢܳܐ ܗ̱ܘ ܫܠܳܡܳܐ ܗܳܢܳܐ܂
01:30 [ai]ܘܶܐܡܰܪ ܠܳܗ ܡܰܠܰܐܟܼܳܐ܂ ܠܳܐ ܬܶܕܼܚܠܺܝܢ ܡܰܪܝܰܡ܃ ܐܶܫܟܿܰܚܬܿܝ ܓܶܝܪ ܛܰܝܒܿܽܘܬܼܳܐ ܠܘܳܬܼ ܐܰܠܳܗܳܐ܂
01:31 [ai]ܗܳܐ ܓܶܝܪ ܬܩܰܒܿܠܺܝܢ ܒܰܛܢܳܐ܂ ܘܬܼܺܐܠܕܺܝܢ ܒܪܳܐ܂ ܘܬܼܶܩܪܶܝܢ ܫܡܶܗ ܝܶܫܽܘܥ܂
01:32 [ai]ܗܳܢܳܐ܂ ܢܶܗܘܶܐ ܪܰܒܼ܂ ܘܰܒܪܶܗ ܕܥܶܠܳܝܳܐ ܢܶܬܼܩܪܶܐ܂ ܘܢܶܬܿܶܠ ܠܶܗ ܡܳܪܝܳܐ ܐܰܠܳܗܳܐ܂ ܟܽܘܪܣܝܶܗ ܕܕܼܰܘܺܝܕܼ ܐܰܒܼܽܘܗ̱ܝ܂
01:33 [ai]ܘܢܰܡܠܶܟܼ ܥܰܠ ܒܰܝܬܿܶܗ ܕܝܰܥܩܽܘܒܼ܂ ܠܥܳܠܰܡ܂ ܘܰܠܡܰܠܟܿܽܘܬܼܶܗ܂ ܣܽܘܦܼ ܠܳܐ ܢܶܗܘܶܐ܂
01:34 [ai]ܐܳܡܪܳܐ ܡܰܪܝܰܡ ܠܡܰܠܰܐܟܼܳܐ܂ ܐܰܝܟܿܰܢܳܐ ܬܶܗܘܶܐ ܗܳܕܼܶܐ܂ ܕܓܰܒܼܪܳܐ ܠܳܐ ܚܟܼܺܝܡ ܠܺܝ܂
01:35 [ai]ܥܢܳܐ ܡܰܠܰܐܟܼܳܐ܂ ܘܶܐܡܰܪ ܠܳܗ܂ ܪܽܘܚܳܐ ܕܩܽܘܕܼܫܳܐ ܬܺܐܬܼܶܐ܂ ܘܚܰܝܠܶܗ ܕܥܶܠܳܝܳܐ ܢܰܓܿܶܢ ܥܠܰܝܟܿܝ܂ ܡܶܛܽܠ ܗܳܢܳܐ܂ ܗܰܘ ܕܡܶܬܼܺܝܠܶܕܼ ܒܶܟܼܝ܂ ܩܰܕܿܺܝܫܳܐ ܗܽܘ܃ ܘܰܒܪܶܗ ܕܰܐܠܳܗܳܐ ܢܶܬܼܩܪܶܐ܀
01:36 [ai]ܘܗܳܐ ܐܶܠܺܝܫܒܼܰܥ ܐܰܚܝܳܢܬܿܶܟܼܝ܃ ܐܳܦܼ ܗܺܝ ܒܰܛܢܳܐ ܒܪܳܐ ܒܣܰܝܒܿܽܘܬܼܳܗ܂ ܘܗܳܢܳܐ ܝܰܪܚܳܐ ܕܶܫܬܳܐ ܠܳܗ ܠܗܳܝ ܕܡܶܬܼܩܰܪܝܳܐ ܥܩܰܪܬܼܳܐ܂
01:37 [ai]ܡܶܛܽܠ ܕܠܳܐ ܥܛܶܠ ܠܰܐܠܳܗܳܐ ܡܶܕܶܡ܂
01:38 [ai]ܐܳܡܪܳܐ ܡܰܪܝܰܡ܂ ܗܳܐ ܐܶܢܳܐ ܐܰܡܬܼܶܗ ܕܡܳܪܝܳܐ܂ ܢܶܗܘܶܐ ܠܺܝ܂ ܐܰܝܟܼ ܡܶܠܬܼܳܟܼ܂ ܘܶܐܙܰܠ ܡܰܠܰܐܟܼܳܐ ܡܶܢ ܠܘܳܬܼܳܗ܀
01:39 [ai]ܩܳܡܰܬܼ ܕܶܝܢ ܡܰܪܝܰܡ ܒܗܽܘܢ ܒܝܰܘܡܳܬܼܳܐ̈ ܗܳܢܽܘܢ܃ ܘܶܐܙܰܠ̱ܬܼ ܒܛܺܝܠܳܐܺܝܬܼ ܠܛܽܘܪܳܐ܂ ܠܰܡܕܼܺܝܢ̱ܬܳܐ ܕܺܝܗܽܘܕܼ܂
01:40 [ai]ܘܥܶܠܰܬܼ ܠܒܼܰܝܬܿܶܗ ܕܰܙܟܼܰܪܝܳܐ܂ ܘܫܶܐܠܰܬܼ ܫܠܳܡܳܗ ܕܶܐܠܺܝܫܒܼܰܥ܂
01:41 [ai]ܘܰܗܘܳܐ ܕܟܰܕܼ ܫܶܡܥܰܬܼ ܐܶܠܺܝܫܒܼܰܥ ܫܠܳܡܳܗ ܕܡܰܪܝܰܡ܃ ܕܳܨ ܥܽܘܠܳܐ ܒܟܰܪܣܳܗ܂ ܘܶܐܬܼܡܰܠܝܰܬܼ ܐܶܠܺܝܫܒܼܰܥ ܪܽܘܚܳܐ ܕܩܽܘܕܼܫܳܐ܃
01:42 [ai]ܘܰܩܥܳܬܼ ܒܩܳܠܳܐ ܪܳܡܳܐ܂ ܘܶܐܡܪܰܬܼ ܠܡܰܪܝܰܡ܂ ܡܒܼܰܪܰܟܼܬܳܐ ܐܰܢ̱ܬܿܝ ܒܢܶܫܶܐ̈܂ ܘܰܡܒܼܰܪܰܟܼ ܗ̱ܽܘ ܦܺܐܪܳܐ ܕܰܒܼܟܼܰܪܣܶܟܼܝ܂
01:43 [ai]ܐܰܝܡܶܟܿܳܐ ܠܺܝ ܗܳܕܼܶܐ܃ ܕܶܐܡܶܗ ܕܡܳܪܝ ܬܺܐܬܼܶܐ ܠܘܳܬܼܝ܂
01:44 [ai]ܗܳܐ ܓܶܝܪ ܟܰܕܼ ܢܦܼܰܠ ܩܳܠܳܐ ܕܰܫܠܳܡܶܟܼܝ ܒܶܐܕܼܢܰܝ̈܃ ܒܚܰܕܼܽܘܬܼܳܐ ܪܰܒܿܬܼܳܐ ܕܳܨ ܥܽܘܠܳܐ ܒܟܰܪܣܝ܂
01:45 [ai]ܘܛܽܘܒܼܶܝܗ ܠܰܐܝܕܼܳܐ ܕܗܰܝܡܢܰܬܼ܃ ܕܗܳܘܶܐ ܫܽܘܠܳܡܳܐ ܠܰܐܝܠܶܝܢ ܕܶܐܬܼܡܰܠܶܠ ܥܰܡܳܗ ܡܶܢ ܠܘܳܬܼ ܡܳܪܝܳܐ܀
01:46 [ai]ܘܶܐܡܪܰܬܼ ܡܰܪܝܰܡ܃ ܡܰܘܪܒܼܳܐ ܢܰܦܼܫܝ ܠܡܳܪܝܳܐ܂
01:47 [ai]ܘܚܶܕܼܝܰܬܼ ܪܽܘܚܝ ܒܰܐܠܳܗܳܐ܂ ܡܰܚܝܳܢܝ܂
01:48 [ai]ܕܚܳܪ ܒܡܽܘܟܼܳܟܼܳܐ ܕܰܐܡܬܼܶܗ܂ ܗܳܐ ܓܶܝܪ ܡܶܢ ܗܳܫܳܐ܃ ܛܽܘܒܼܳܐ ܢܶܬܿܠܳܢ̈ ܠܺܝ ܫܰܪ̈ܒܿܳܬܼܳܐ ܟܽܠܗܶܝܢ̈܂
01:49 [ai]ܕܰܥܒܼܰܕܼ ܠܘܳܬܼܝ ܪ̈ܰܘܪܒܼܳܬܼܳܐ܂ ܗܰܘ ܕܚܰܝܠܬܼܳܢ܂ ܘܩܰܕܿܺܝܫ ܫܡܶܗ܂
01:50 [ai]ܘܰܚܢܳܢܶܗ ܠܕܼܳܪ̈ܶܐ ܘܫܰܪ̈ܒܿܳܬܼܳܐ܂ ܥܰܠ ܐܰܝܠܶܝܢ ܕܕܼܳܚܠܺܝܢ ܠܶܗ܂
01:51 [ai]ܥܒܼܰܕܼ ܙܳܟܼܽܘܬܼܳܐ ܒܰܕܼܪܳܥܶܗ܂ ܘܒܼܰܕܿܰܪ ܚܬܼܺܝܪ̈ܰܝ ܒܬܰܪܥܺܝܬܼܳܐ ܕܿܠܶܒܗܽܘܢ܂
01:52 [ai]ܣܰܚܶܦܼ ܬܰܩܺܝܦܼܶܐ̈ ܡܶܢ ܟܿܽܘܪ̈ܣܰܘܳܬܼܳܐ܂ ܘܰܐܪܺܝܡ ܡܰܟܿܺܝܟܼܶܐ̈܂
01:53 [ai]ܟܰܦܼܢܶܐ̈܂ ܣܰܒܿܰܥ ܛܳܒܼܳܬܼܳܐ̈܂ ܘܥܰܬܿܺܝܪ̈ܶܐ܂ ܫܪܳܐ ܣܦܼܺܝܩܳܐܺܝܬܼ܂
01:54 [ai]ܥܰܕܿܰܪ ܠܺܐܝܣܪܳܝܶܠ ܥܰܒܼܕܿܶܗ܂ ܘܶܐܬܿܕܿܟܼܰܪ ܚܢܳܢܶܗ܂
01:55 [ai]ܐܰܝܟܼ ܕܡܰܠܶܠ ܥܰܡ ܐܰܒܼܳܗܰܝܢ̈܃ ܥܰܡ ܐܰܒܼܪܳܗܳܡ ܘܥܰܡ ܙܰܪܥܶܗ ܠܥܳܠܰܡ܀
01:56 [ai]ܩܰܘܝܰܬܼ ܕܶܝܢ ܡܰܪܝܰܡ ܠܘܳܬܼ ܐܶܠܺܝܫܒܼܰܥ܂ ܐܰܝܟܼ ܝܰܪ̈ܚܶܐ ܬܠܳܬܼܳܐ܃ ܘܗܶܦܼܟܿܰܬܼ ܠܒܼܰܝܬܿܳܗ ܿ܀ܿ܀ܿ
01:57 [ai]ܐܶܠܺܝܫܒܼܰܥ ܕܶܝܢ ܗܘܳܐ ܗ̱ܘܳܐ ܠܳܗ ܙܰܒܼܢܳܐ ܕܬܺܐܠܰܕܼ܂ ܘܝܶܠܕܿܰܬܼ ܒܪܳܐ
01:58 [ai]ܘܰܫܡܰܥܘ ܫܒܼܳܒܼܶܝܗ̈ ܘܰܒܢܰܝ ܛܽܘܗܡܳܗ܃ ܕܰܐܣܓܿܺܝ ܐܰܠܳܗܳܐ ܚܢܳܢܶܗ ܠܘܳܬܼܳܗ܃ ܘܚܳܕܼܶܝܢ ܗ̱ܘܰܘ ܥܰܡܳܗ܀
01:59 [ai]ܘܰܗܘܳܐ ܠܝܰܘܡܳܐ ܕܰܬܼܡܳܢܝܳܐ܂ ܘܶܐܬܼܰܘ ܠܡܶܓܼܙܪܶܗ ܠܛܰܠܝܳܐ܂ ܘܩܳܪܶܝܢ ܗ̱ܘܰܘ ܠܶܗ ܒܰܫܡܳܐ ܕܰܐܒܼܽܘܗ̱ܝ ܙܟܼܰܪܝܳܐ܂
01:60 [ai]ܘܰܥܢܳܬܼ ܐܶܡܶܗ܂ ܘܳܐܡܪܳܐ ܠܗܽܘܢ܂ ܠܳܐ ܗܳܟܼܰܢܳܐ܂ ܐܶܠܳܐ ܢܶܬܼܩܪܶܐ ܝܽܘܚܰܢܳܢ܂
01:61 [ai]ܘܶܐܡܰܪܘ ܠܳܗ܂ ܕܠܰܝܬܿ ܐ̱ܢܳܫ ܒܫܰܪܒܿܬܼܶܟܼܝ ܕܡܶܬܼܩܪܶܐ ܒܰܫܡܳܐ ܗܳܢܳܐ܂
01:62 [ai]ܘܰܪܡܰܙܘ ܠܰܐܒܼܽܘܗ̱ܝ܂ ܕܰܐܝܟܿܰܢܳܐ ܨܳܒܼܶܐ ܕܰܢܫܰܡܶܝܘܗ̱ܝ܂
01:63 [ai]ܘܰܫܐܶܠ ܦܶܢܩܺܝܬܼܳܐ܂ ܘܰܟܼܬܼܰܒܼ ܘܶܐܡܰܪ܂ ܝܽܘܚܰܢܳܢ ܗ̱ܽܘ ܫܡܶܗ܂ ܘܶܐܬܿܕܰܡܰܪܘ ܟܽܠܢܳܫ܂
01:64 [ai]ܘܡܶܚܕܼܳܐ ܐܶܬܼܦܬܼܰܚ ܦܽܘܡܶܗ܂ ܘܠܶܫܳܢܶܗ܂ ܘܡܰܠܶܠ ܘܒܼܰܪܶܟܼ ܠܰܐܠܳܗܳܐ܂
01:65 [ai]ܘܰܗܘܳܬܼ ܕܶܚܠܬܼܳܐ ܥܰܠ ܟܽܠܗܽܘܢ ܫܒܼܳܒܼܰܝܗܽܘܢ̈܂ ܘܰܒܟܼܽܠܶܗ ܛܽܘܪܳܐ ܕܺܝܗܽܘܕܼ܂ ܗܳܠܶܝܢ ܡܶܬܼܡܰܠܠܳܢ̈ ܗ̱ܘܰܝ̈܂
01:66 [ai]ܘܟܼܽܠܗܽܘܢ ܕܰܫܡܰܥܘ܃ ܡܶܬܼܚܰܫܒܼܺܝܢ ܗ̱ܘܰܘ ܒܿܠܶܒܗܽܘܢ܂ ܘܳܐܡܪܺܝܢ܂ ܡܳܢܳܐ ܟܰܝ ܢܶܗܘܶܐ ܛܰܠܝܳܐ ܗܳܢܳܐ܂ ܘܺܐܝܕܼܶܗ ܕܡܳܪܝܳܐ ܐܺܝܬܼ ܗ̱ܘܳܬܼ ܥܰܡܶܗ܀
01:67 [ai]ܘܶܐܬܼܡܠܺܝ ܙܟܼܰܪܝܳܐ ܐܰܒܼܽܘܗ̱ܝ܂ ܪܽܘܚܳܐ ܕܩܽܘܕܼܫܳܐ܂ ܘܶܐܬܼܢܰܒܺܝ܂ ܘܶܐܡܰܪ܂
01:68 [ai]ܡܒܼܰܪܰܟܼ ܗ̱ܽܘ ܡܳܪܝܳܐ ܐܰܠܳܗܶܗ ܕܺܐܝܣܪܳܝܶܠ܃ ܕܰܣܥܰܪ ܥܰܡܶܗ܂ ܘܰܥܒܼܰܕܼ ܠܶܗ ܦܽܘܪܩܳܢܳܐ܃
01:69 [ai]ܘܰܐܩܺܝܡ ܠܰܢ ܩܰܪܢܳܐ ܕܦܽܘܪܩܳܢܳܐ ܒܒܼܰܝܬܿܶܗ ܕܕܼܰܘܺܝܕܼ ܥܰܒܼܕܿܶܗ܃
01:70 [ai]ܐܰܝܟܼ ܕܡܰܠܶܠ ܒܦܽܘܡܳܐ ܕܰܢܒܼܺܝܰܘܗ̱ܝ̈ ܩܰܕܿܺܝܫܶܐ̈ ܕܡܶܢ ܥܳܠܰܡ܃
01:71 [ai]ܕܢܶܦܼܪܩܰܢ ܡܶܢ ܒܥܶܠܕܿܒܼܳܒܼܰܝܢ̈܃ ܘܡܶܢ ܐܺܝܕܼܳܐ ܕܟܽܠܗܽܘܢ ܣܳܢܰܐܝܢ̈܂
01:72 [ai]ܘܰܥܒܼܰܕܼ ܚܢܳܢܶܗ ܥܰܡ ܐܰܒܼܳܗܰܝܢ̈܂ ܘܶܥ̱ܗܰܕܼ ܠܕܼܺܝܰܬܼܺܩܰܘܗ̱ܝ̈ ܩܰܕܿܺܝܫܳܬܼܳܐ̈܂
01:73 [ai]ܘܡܰܘܡܳܬܼܳܐ̈ ܕܺܝܡܳܐ ܠܰܐܒܼܪܳܗܳܡ ܐܰܒܼܽܘܢ܃ ܕܢܶܬܿܶܠ ܠܰܢ܂
01:74 [ai]ܕܢܶܬܼܦܿܪܶܩ ܡܶܢ ܐܺܝܕܼܳܐ ܕܰܒܼܥܶܠܕܿܒܼܳܒܼܰܝܢ̈܂ ܘܰܕܼܠܳܐ ܕܶܚܠܳܐ ܢܶܦܼܠܽܘܚ ܩܕܼܳܡܰܘܗ̱ܝ܂
01:75 [ai]ܟܽܠܗܽܘܢ ܝܰܘܡܳܬܼܰܢ̈܂ ܒܟܺܐܢܽܘܬܼܳܐ ܘܰܒܙܰܕܿܺܝܩܽܘܬܼܳܐ܂
01:76 [ai]ܘܰܐܢ̱ܬܿ ܛܰܠܝܳܐ܂ ܢܒܼܺܝܶܗ ܕܥܶܠܳܝܳܐ ܬܶܬܼܩܪܶܐ܂ ܬܺܐܙܰܠ ܓܶܝܪ ܩܕܼܳܡ ܦܰܪܨܽܘܦܿܶܗ ܕܡܳܪܝܳܐ܂ ܕܰܬܼܛܰܝܶܒܼ ܐܽܘܪܚܶܗ܂
01:77 [ai]ܕܢܶܬܿܶܠ ܡܰܕܿܥܳܐ ܕܚܰܝ̈ܶܐ ܠܥܰܡܶܗ܂ ܒܫܽܘܒܼܩܳܢܳܐ ܕܰܚܛܳܗܰܝܗܽܘܢ̈܃
01:78 [ai]ܒܪ̈ܰܚܡܶܐ ܕܰܚܢܳܢܳܐ ܕܰܐܠܳܗܰܢ܂ ܕܰܒܼܗܽܘܢ ܢܶܣܥܪܰܢ ܕܶܢܚܳܐ ܡܶܢ ܪܰܘܡܳܐ܂
01:79 [ai]ܠܡܰܢܗܳܪܽܘ ܠܰܐܝܠܶܝܢ ܕܰܒܼܚܶܫܽܘܟܼܳܐ ܘܰܒܛܶܠܳܠܶܐ̈ ܕܡܰܘܬܳܐ ܝܳܬܼܒܺܝܢ܂ ܕܢܶܬܼܪܽܘܨ ܪ̈ܶܓܼܠܰܝܢ ܒܽܐܘܪܚܳܐ ܕܰܫܠܳܡܳܐ܀
01:80 [ai]ܛܰܠܝܳܐ ܕܶܝܢ ܪܳܒܼܶܐ ܗ̱ܘܳܐ܂ ܘܡܶܬܼܚܰܝܰܠ ܒܪܽܘܚܳܐ܂ ܘܰܒܚܽܘܪܒܿܳܐ ܐܺܝܬܼܰܘܗ̱ܝ ܗ̱ܘܳܐ܃ ܥܕܼܰܡܳܐ ܠܝܰܘܡܳܐ ܕܬܰܚܘܺܝܬܼܶܗ ܕܰܠܘܳܬܼ ܐܺܝܣܪܳܝܶܠ܀

next chapter