← Back
The Comprehensive Aramaic Lexicon
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


03:01 [ai]ܒܰܫܢܰܬܼ ܚܰܡܫܰܥܶܣܪ̈ܶܐ ܕܶܝܢ ܕܡܰܠܟܿܽܘܬܼܶܗ ܕܛܺܝܒܼܶܪܺܝܳܘܣ ܩܶܣܰܪ܃ ܒܗܺܓܼܡܳܢܽܘܬܼܳܐ ܕܦܿܳܢܛܺܝܳܘܣ ܦܿܺܝܠܰܛܳܘܣ ܒܺܝܗܽܘܕܼ܃ ܟܰܕܼ ܪܺܫܳܐ ܪܒܼܺܝܥܳܝܳܐ ܗܶܪܳܘܕܼܶܣ ܒܰܓܼܠܺܝܠܳܐ܃ ܘܦܼܺܝܠܺܝܦܿܳܘܣ ܐܰܚܽܘܗ̱ܝ܂ ܪܺܫܳܐ ܪܒܼܺܝܥܳܝܳܐ܃ ܒܺܐܝܛܽܘܪܺܝܰܐ܂ ܘܒܼܰܐܬܼܪܳܐ ܕܰܛܪܰܟܼܳܘܢܳܐ܃ ܘܠܽܘܣܰܢܺܝܰܐ ܪܺܫܳܐ ܪܒܼܺܝܥܳܝܳܐ܂ ܕܰܐܒܼܺܝܠܺܝܢܶܐ܃
03:02 [ai]ܒܪܰܒܿܽܘܬܼ ܟܳܗܢܽܘܬܼܳܐ ܕܚܰܢܳܢ ܘܰܕܼܩܰܝܳܦܼܳܐ܃ ܗܘܳܬܼ ܡܶܠܬܼܳܐ ܕܰܐܠܳܗܳܐ ܥܰܠ ܝܽܘܚܰܢܳܢ ܒܰܪ ܙܟܼܰܪܝܳܐ ܒܚܽܘܪܒܿܳܐ܂
03:03 [ai]ܘܶܐܬܼܳܐ ܒܟܽܠܶܗ ܐܰܬܼܪܳܐ ܕܿܰܚܕܼܳܪ̈ܰܝ ܝܽܘܪܕܿܢܳܢ܂ ܟܰܕܼ ܡܰܟܼܪܶܙ ܡܰܥܡܽܘܕܼܺܝܬܼܳܐ ܕܰܬܼܝܳܒܼܽܘܬܼܳܐ܂ ܠܫܽܘܒܼܩܳܢܳܐ ܕܰܚܛܳܗܶܐ̈܀
03:04 [ai]ܐܰܝܟܿܰܢܳܐ ܕܰܟܼܬܼܺܝܒܼ ܒܰܟܼܬܼܳܒܼܳܐ ܕܡܶܠܶܐ̈ ܕܶܐܫܰܥܝܳܐ ܢܒܼܺܝܳܐ܂ ܕܶܐܡܰܪ܂ ܩܳܠܳܐ ܕܩܳܪܶܐ ܒܚܽܘܪܒܿܳܐ܂ ܛܰܝܶܒܼܘ ܐܽܘܪܚܶܗ ܕܡܳܪܝܳܐ܃ ܘܰܬܼܪܽܘܨܘ ܒܰܦܼܩܰܥܬܼܳܐ ܫܒܼܺܝܠܶܐ̈ ܠܰܐܠܳܗܰܢ܂
03:05 [ai]ܟܽܠܗܽܘܢ ܢܰܚܠܶܐ̈ ܢܶܬܼܡܠܽܘܢ܂ ܘܟܼܽܠܗܽܘܢ ܛܽܘܪ̈ܶܐ ܘܪ̈ܳܡܳܬܼܳܐ܂ ܢܶܬܼܡܰܟܿܟܼܽܘܢ܂ ܘܢܶܗܘܶܐ ܥܰܪܡܳܐ ܠܫܰܦܼܝܳܐ܂ ܘܰܐܬܼܪܳܐ ܥܰܣܩܳܐ ܠܰܦܼܩܰܥܬܼܳܐ܂
03:06 [ai]ܘܢܶܚܙܶܐ ܟܽܠ ܒܣܰܪ ܚܰܝ̈ܶܐ ܕܰܐܠܳܗܳܐ܀
03:07 [ai]ܘܶܐܡܰܪ ܗ̱ܘܳܐ ܠܟܼܶܢܫܶܐ̈܂ ܐܰܝܠܶܝܢ ܕܳܐܬܼܶܝܢ ܗ̱ܘܰܘ ܠܘܳܬܼܶܗ ܠܡܶܥܡܰܕܼ܂ ܝܰܠܕܿܳܐ ܕܳܐܟܼܶܕܼܢܶܐ̈܃ ܡܰܢܽܘ ܚܰܘܺܝܟܼܽܘܢ ܠܡܶܥܪܰܩ ܡܶܢ ܪܽܘܓܼܙܳܐ ܕܰܥܬܼܺܝܕܼ܂
03:08 [ai]ܥܒܼܶܕܼܘ ܗܳܟܼܺܝܠ ܦܿܺܐܪ̈ܶܐ ܕܫܳܘܶܝܢ ܠܰܬܼܝܳܒܼܽܘܬܼܳܐ܂ ܘܠܳܐ ܬܫܰܪܽܘܢ ܠܡܺܐܡܰܪ ܒܢܰܦܼܫܟܼܽܘܢ܃ ܕܰܐܒܼܳܐ ܐܺܝܬܼ ܠܰܢ ܐܰܒܼܪܳܗܳܡ܂ ܐܳܡܰܪ ܐ̱ܢܳܐ ܠܟܼܽܘܢ ܓܶܝܪ܃ ܕܡܶܢ ܗܳܠܶܝܢ ܟܺܐܦܼܶܐ̈ ܡܶܫܟܿܰܚ ܐܰܠܳܗܳܐ ܠܰܡܩܳܡܽܘ ܒܢܰܝܳܐ ܠܰܐܒܼܪܳܗܳܡ܂
03:09 [ai]ܗܳܐ ܕܶܝܢ ܢܳܪܓܼܳܐ ܣܺܝܡ ܥܰܠ ܥܶܩܳܪܳܐ ܕܺܐܝܠܳܢܶܐ̈܂ ܟܽܠ ܐܺܝܠܳܢܳܐ ܗܳܟܼܺܝܠ܂ ܕܿܦܼܺܐܪ̈ܶܐ ܛܳܒܼܶܐ̈ ܠܳܐ ܥܳܒܼܶܕܼ܃ ܡܶܬܼܦܿܣܶܩ܂ ܘܰܒܢܽܘܪܳܐ ܢܳܦܼܶܠ܀
03:10 [ai]ܘܰܡܫܰܐܠܺܝܢ ܗ̱ܘܰܘ ܠܶܗ ܟܶܢܫܶܐ̈܂ ܘܳܐܡܪܺܝܢ܂ ܡܳܢܳܐ ܗܳܟܼܺܝܠ ܢܶܥܒܿܶܕܼ܂
03:11 [ai]ܥܢܳܐ܂ ܘܶܐܡܰܪ ܠܗܽܘܢ܂ ܡܰܢ ܕܺܐܝܬܼ ܠܶܗ ܬܿܰܪ̈ܬܿܶܝܢ ܟܽܘܬܿܺܝܢܝܳܢ̈܃ ܢܶܬܿܶܠ ܠܡܰܢ ܕܠܰܝܬܿ ܠܶܗ܂ ܘܡܰܢ ܕܺܐܝܬܼ ܠܶܗ ܣܰܝܒܿܳܪܬܳܐ܃ ܗܳܟܼܰܢܳܐ ܢܶܥܒܿܶܕܼ܂
03:12 [ai]ܘܶܐܬܼܰܘ ܐܳܦܼ ܡܳܟܼܣܶܐ̈ ܠܡܶܥܡܰܕܼ܂ ܘܳܐܡܪܺܝܢ ܠܶܗ܂ ܡܰܠܦܼܳܢܳܐ܂ ܡܳܢܳܐ ܢܶܥܒܿܶܕܼ܂
03:13 [ai]ܗܽܘ ܕܶܝܢ ܐܶܡܰܪ ܠܗܽܘܢ܂ ܠܳܐ ܬܶܬܼܒܿܥܽܘܢ ܡܶܕܶܡ ܝܰܬܿܺܝܪ ܥܰܠ ܡܳܐ ܕܰܦܼܩܺܝܕܼ ܠܟܼܽܘܢ ܠܡܶܬܼܒܿܰܥ܂
03:14 [ai]ܘܰܡܫܰܐܠܺܝܢ ܗ̱ܘܰܘ ܠܶܗ ܦܳܠܚܰܝ̈ ܐܶܣܛܪܰܛܺܝܰܐ܂ ܘܳܐܡܪܺܝܢ܂ ܡܳܢܳܐ ܢܶܥܒܿܶܕܼ ܐܳܦܼ ܚܢܰܢ܂ ܐܳܡܰܪ ܠܗܽܘܢ܂ ܠܳܐ ܒܐ̱ܢܳܫ ܬܶܬܿܛܰܓܿܪܽܘܢ܂ ܘܰܠܐ̱ܢܳܫ ܠܳܐ ܬܶܥܫܩܽܘܢ܂ ܘܢܶܣܦܿܩܳܢ̈ ܠܟܼܽܘܢ ܐܰܦܼܣܳܘܢܝܳܬܼܟܼܽܘܢ̈܀܀
03:15 [ai]ܟܰܕܼ ܕܶܝܢ ܡܰܣܒܰܪ ܗ̱ܘܳܐ ܥܰܡܳܐ ܥܰܠ ܝܽܘܚܰܢܳܢ܃ ܘܟܼܽܠܗܽܘܢ ܡܶܬܼܚܰܫܒܼܺܝܢ ܗ̱ܘܰܘ ܒܿܠܶܒܗܽܘܢ܃ ܕܕܼܰܠܡܳܐ ܗܽܘܝܽܘ ܡܫܺܝܚܳܐ܃
03:16 [ai]ܥܢܳܐ ܝܽܘܚܰܢܳܢ ܘܶܐܡܰܪ ܠܗܽܘܢ܂ ܐܶܢܳܐ ܗܳܐ ܡܰܥܡܶܕܼ ܐ̱ܢܳܐ ܠܟܼܽܘܢ ܒܡܰܝܳܐ̈܂ ܐܳܬܼܶܐ ܕܶܝܢ ܗܰܘ ܕܚܰܝܠܬܼܳܢ ܡܶܢܝ܂ ܗܰܘ ܕܠܳܐ ܫܳܘܶܐ ܐ̱ܢܳܐ ܕܶܐܫܪܶܐ ܥܰܪ̈ܩܶܐ ܕܰܡܣܳܢܰܘܗ̱ܝ̈܂ ܗܽܘ ܢܰܥܡܶܕܼܟܼܽܘܢ ܒܪܽܘܚܳܐ ܕܩܽܘܕܼܫܳܐ ܘܰܒܢܽܘܪܳܐ܀
03:17 [ai]ܗܰܘ ܕܰܐܚܺܝܕܼ ܪܰܦܼܫܳܐ ܒܺܐܝܕܼܶܗ܂ ܘܰܡܕܼܰܟܿܶܐ ܐܶܕܿܪ̈ܰܘܗ̱ܝ܂ ܘܚܶܛܶܐ̈ ܟܳܢܶܫ ܠܰܐܘܨܪ̈ܰܘܗ̱ܝ܂ ܘܬܼܶܒܼܢܳܐ ܢܰܘܩܶܕܼ ܒܢܽܘܪܳܐ ܕܠܳܐ ܕܳܥܟܿܳܐ܀
03:18 [ai]ܐܳܦܼ ܐ̱ܚܪ̈ܳܢܝܳܬܼܳܐ ܕܶܝܢ ܣܰܓܿܺܝܳܐܬܼܳܐ̈܂ ܡܰܠܶܦܼ ܗ̱ܘܳܐ܂ ܘܰܡܣܰܒܰܪ ܠܥܰܡܳܐ܀
03:19 [ai]ܗܶܪܳܘܕܼܶܣ ܕܶܝܢ ܛܶܛܪܰܪܟܼܰܐ܃ ܡܶܛܽܠ ܕܡܶܬܼܟܿܣܶܣ ܗ̱ܘܳܐ ܡܶܢ ܝܽܘܚܰܢܳܢ ܥܰܠ ܗܶܪܳܘܕܼܺܝܰܐ ܐܰܢ̱ܬܿܰܬܼ ܦܼܺܝܠܺܝܦܿܳܘܣ ܐܰܚܽܘܗ̱ܝ܃ ܘܥܰܠ ܟܽܠܗܶܝܢ ܒܺܝܫܳܬܼܳܐ̈ ܕܥܳܒܼܶܕܼ ܗ̱ܘܳܐ܃
03:20 [ai]ܐܰܘܣܶܦܼ ܐܳܦܼ ܗܳܕܼܶܐ ܥܰܠ ܟܽܠܗܶܝܢ܃ ܘܚܰܒܼܫܶܗ ܠܝܽܘܚܰܢܳܢ ܒܶܝܬܼ ܐܰܣܺܝܪ̈ܶܐ܀
03:21 [ai]ܗܘܳܐ ܕܶܝܢ ܟܰܕܼ ܥܡܰܕܼ ܟܽܠܶܗ ܥܰܡܳܐ܃ ܘܳܐܦܼ ܝܶܫܽܘܥ ܥܡܰܕܼ܂ ܘܟܼܰܕܼ ܡܨܰܠܶܐ ܐܶܬܼܦܬܼܰܚܘ ܫܡܰܝܳܐ܂
03:22 [ai]ܘܢܶܚܬܿܰܬܼ ܪܽܘܚܳܐ ܕܩܽܘܕܼܫܳܐ ܥܠܰܘܗ̱ܝ܂ ܒܰܕܼܡܽܘܬܼ ܓܽܘܫܡܳܐ ܕܝܰܘܢܳܐ܂ ܘܩܳܠܳܐ ܗܘܳܐ ܡܶܢ ܫܡܰܝܳܐ܂ ܕܳܐܡܰܪ܂ ܐܰܢ̱ܬܿ ܗ̱ܽܘ ܒܶܪܝ ܚܰܒܺܝܒܼܳܐ܂ ܕܒܳܟܼ ܐܶܨܛܒܼܺܝܬܼ܀
03:23 [ai]ܗܽܘ ܕܶܝܢ ܝܶܫܽܘܥ ܐܺܝܬܼܰܘܗ̱ܝ ܗ̱ܘܳܐ ܐܰܝܟܼ ܒܰܪ ܫܢܺܝܢ̈ ܬܠܳܬܼܺܝܢ܂ ܘܡܶܣܬܿܒܼܰܪ ܗ̱ܘܳܐ܃ ܒܰܪ ܝܰܘܣܶܦܼ܂ ܒܰܪ ܗܶܠܺܝ܂
03:24 [ai]ܒܰܪ ܡܰܛܬܼܰܬܼ܂ ܒܰܪ ܠܶܘܺܝ܂ ܒܰܪ ܡܶܠܟܿܺܝ܂ ܒܰܪ ܝܰܐܢܺܝ܂ ܒܰܪ ܝܰܘܣܶܦܼ܂
03:25 [ai]ܒܰܪ ܡܰܬܿܬܼܰܐ܂ ܒܰܪ ܥܰܡܽܘܨ܂ ܒܰܪ ܢܰܚܽܘܡ܂ ܒܰܪ ܚܶܣܠܺܝ܂ ܒܰܪ ܢܰܓܿܺܝ܂
03:26 [ai]ܒܰܪ ܡܳܐܰܬܼ܂ ܒܰܪ ܡܰܛܰܬܼ܂ ܒܰܪ ܫܰܡܥܺܝ܂ ܒܰܪ ܝܰܘܣܶܦܼ܂ ܒܰܪ ܺܝܗܽܘܕܼܳܐ܂
03:27 [ai]ܒܰܪ ܝܽܘܚܰܢܳܢ܂ ܒܰܪ ܪܳܣܳܐ܂ ܒܰܪ ܙܽܘܪܒܿܳܒܼܶܠ܂ ܒܰܪ ܫܶܠܰܬܼܺܐܝܠ܂ ܒܰܪ ܢܺܪܺܝ܂
03:28 [ai]ܒܰܪ ܡܶܠܟܿܺܝ܂ ܒܰܪ ܐܰܕܿܺܝ܂ ܒܰܪ ܩܽܘܣܰܡ܂ ܒܰܪ ܐܶܠܡܽܘܕܼܳܕܼ܂ ܒܰܪ ܥܺܝܪ܂
03:29 [ai]ܒܰܪ ܝܽܘܣܺܐ܂ ܒܰܪ ܐܶܠܺܝܥܳܙܳܪ܂ ܒܰܪ ܝܽܘܪܰܡ܂ ܒܰܪ ܡܰܬܼܺܝܬܼܳܐ܂ ܒܰܪ ܠܶܘܺܝ܂
03:30 [ai]ܒܰܪ ܫܶܡܥܽܘܢ܂ ܒܰܪ ܺܝܗܽܘܕܼܳܐ܂ ܒܰܪ ܝܰܘܣܶܦܼ܂ ܒܰܪ ܝܽܘܢܳܡ܂ ܒܰܪ ܐܶܠܺܝܰܩܺܝܡ
03:31 [ai]ܒܰܪ ܡܰܠܝܳܐ܂ ܒܰܪ ܡܰܐܢܺܝ܂ ܒܰܪ ܡܰܛܬܼܳܐ܂ ܒܰܪ ܢܳܬܼܳܢ܂ ܒܰܪ ܕܿܰܘܺܝܕܼ܂
03:32 [ai]ܒܰܪ ܐܺܝܫܰܝ܂ ܒܰܪ ܥܽܘܒܼܺܝܕܼ܂ ܒܰܪ ܒܿܳܥܳܙ܂ ܒܰܪ ܣܰܠܡܳܘܢ܂ ܒܰܪ ܢܰܚܫܽܘܢ܂
03:33 [ai]ܒܰܪ ܥܰܡܺܝܢܳܕܼܳܒܼ܂ ܒܰܪ ܐܳܪܳܡ܂ ܒܰܪ ܚܶܨܪܽܘܢ܂ ܒܰܪ ܦܿܰܪܨ܂ ܒܰܪ ܺܝܗܽܘܕܼܳܐ܂
03:34 [ai]ܒܰܪ ܝܰܥܩܽܘܒܼ܂ ܒܰܪ ܐܺܝܣܚܳܩ܂ ܒܰܪ ܐܰܒܼܪܳܗܳܡ܂ ܒܰܪ ܬܿܰܪܰܚ܂ ܒܰܪ ܢܳܚܽܘܪ܂
03:35 [ai]ܒܰܪ ܣܳܪܽܘܓܼ܂ ܒܰܪ ܐܰܪܥܽܘ܂ ܒܰܪ ܦܿܳܠܳܓܼ܂ ܒܰܪ ܥܳܒܼܳܪ܂ ܒܰܪ ܫܳܠܳܚ܂
03:36 [ai]ܒܰܪ ܩܰܝܢܰܢ܂ ܒܰܪ ܐܰܪܦܼܰܟܼܫܳܪ܂ ܒܰܪ ܫܺܝܡ܂ ܒܰܪ ܢܽܘܚ܂ ܒܰܪ ܠܰܡܶܟܼ܂
03:37 [ai]ܒܰܪ ܡܰܬܼܽܘܫܠܰܚ܂ ܒܰܪ ܚܢܽܘܟܼ܂ ܒܰܪ ܝܰܪܕܿ܂ ܒܰܪ ܡܰܗܠܳܠܳܐܝܶܠ܂ ܒܰܪ ܩܰܝܢܰܢ܂
03:38 [ai]ܒܰܪ ܐܰܢܽܘܫ܂ ܒܰܪ ܫܺܝܬܼ܂ ܒܰܪ ܐܳܕܼܳܡ܂ ܕܡܶܢ ܐܰܠܳܗܳܐ ܿ܀ܿ܀ܿ

next chapter