← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


04:01 [ai]ܝܶܫܽܘܥ ܕܶܝܢ܂ ܟܰܕܼ ܡܠܶܐ ܪܽܘܚܳܐ ܕܩܽܘܕܼܫܳܐ܂ ܗܦܼܰܟܼ ܡܶܢ ܝܽܘܪܕܿܢܳܢ܂ ܘܰܕܼܒܼܰܪܬܼܶܗ ܪܽܘܚܳܐ ܠܚܽܘܪܒܿܳܐ܂
04:02 [ai]ܝܰܘܡܳܬܼܳܐ̈ ܐܰܪ̈ܒܥܺܝܢ܃ ܕܢܶܬܼܢܰܣܶܐ ܡܶܢ ܐܳܟܼܶܠܩܰܪܨܳܐ܀ ܘܠܳܐ ܠܥܶܣ ܡܶܕܶܡ ܒܗܳܢܽܘܢ ܝܰܘܡܳܬܼܳܐ̈܂ ܘܟܼܰܕܼ ܫܰܠܶܡ ܐܶܢܽܘܢ܃ ܠܚܰܪܬܼܳܐ ܟܦܼܶܢ܂
04:03 [ai]ܘܶܐܡܰܪ ܠܶܗ ܐܳܟܼܶܠܩܰܪܨܳܐ܂ ܐܶܢ ܒܪܶܗ ܐܰܢ̱ܬܿ ܕܰܐܠܳܗܳܐ܃ ܐܶܡܰܪ ܠܟܼܺܐܦܼܳܐ ܗܳܕܼܶܐ ܕܬܶܗܘܶܐ ܠܰܚܡܳܐ܂
04:04 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܶܗ܂ ܟܬܼܺܝܒܼ ܗ̱ܘ܂ ܕܠܳܐ ܗ̱ܘܳܐ ܒܠܰܚܡܳܐ ܒܰܠܚܽܘܕܼ ܚܳܝܶܐ ܒܰܪܢܳܫܳܐ܃ ܐܶܠܳܐ ܒܟܽܠ ܦܶܬܼܓܼܳܡ ܕܰܐܠܳܗܳܐ܀
04:05 [ai]ܘܰܐܣܩܶܗ ܣܳܛܳܢܳܐ ܠܛܽܘܪܳܐ ܪܳܡܳܐ܂ ܘܚܰܘܝܶܗ ܟܽܠܗܶܝܢ ܡܰܠܟܿܘܳܬܼܳܐ̈ ܕܰܐܪܥܳܐ ܒܥܶܕܳܢܳܐ ܙܥܽܘܪܳܐ܂
04:06 [ai]ܘܶܐܡܰܪ ܠܶܗ ܐܳܟܼܶܠܩܰܪܨܳܐ܂ ܠܳܟܼ ܐܶܬܿܶܠ ܫܽܘܠܛܳܢܳܐ ܗܳܢܳܐ ܟܽܠܶܗ ܘܫܽܘܒܼܚܶܗ܂ ܕܠܺܝ ܡܰܫܠܰܡ܃ ܘܰܠܡܰܢ ܕܶܐܨܒܿܶܐ܂ ܝܳܗܶܒܼ ܐ̱ܢܳܐ ܠܶܗ܂
04:07 [ai]ܐܶܢ ܗܳܟܼܺܝܠ ܬܶܣܓܿܽܘܕܼ ܩܕܼܳܡܰܝ܃ ܕܺܝܠܳܟܼ ܢܶܗܘܶܐ ܟܽܠܶܗ܂
04:08 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܶܗ܂ ܟܬܼܺܝܒܼ ܗ̱ܘ ܕܰܠܡܳܪܝܳܐ ܐܰܠܳܗܳܟܼ ܬܶܣܓܿܽܘܕܼ܂ ܘܠܶܗ ܒܰܠܚܽܘܕܼܰܘܗ̱ܝ ܬܶܦܼܠܽܘܚ܀
04:09 [ai]ܘܰܐܝܬܿܝܶܗ ܠܽܐܘܪܺܫܠܶܡ܂ ܘܰܐܩܺܝܡܶܗ ܥܰܠ ܟܶܢܦܼܳܐ ܕܗܰܝܟܠܳܐ܂ ܘܶܐܡܰܪ ܠܶܗ܂ ܐܶܢ ܒܪܶܗ ܐܰܢ̱ܬܿ ܕܰܐܠܳܗܳܐ܃ ܐܰܪܡܳܐ ܢܰܦܼܫܳܟܼ ܡܶܟܿܳܐ ܠܬܼܰܚܬܿ܂
04:10 [ai]ܟܬܼܺܝܒܼ ܓܶܝܪ܃ ܕܰܠܡܰܠܰܐܟܼܰܘܗ̱ܝ̈܂ ܢܦܼܰܩܶܕܼ ܥܠܰܝܟܿ ܕܰܢܢܰܛܪܽܘܢܳܟܼ܂
04:11 [ai]ܘܥܰܠ ܕܿܪ̈ܳܥܰܝܗܽܘܢ ܢܶܫܩܠܽܘܢܳܟܼ܃ ܕܠܳܐ ܬܶܬܿܩܶܠ ܪܶܓܼܠܳܟܼ ܒܟܺܐܦܼܳܐ܂
04:12 [ai]ܥܢܳܐ ܕܶܝܢ ܝܶܫܽܘܥ܂ ܘܶܐܡܰܪ ܠܶܗ܂ ܐܰܡܺܝܪ ܗ̱ܘ܂ ܕܠܳܐ ܬܢܰܣܶܐ ܠܡܳܪܝܳܐ ܐܰܠܳܗܳܟܼ܀
04:13 [ai]ܘܟܼܰܕܼ ܫܰܠܶܡ ܐܳܟܼܶܠܩܰܪܨܳܐ ܟܽܠܗܽܘܢ ܢܶܣܝܽܘܢܰܘܗ̱ܝ̈܃ ܦܪܰܩ ܡܶܢ ܠܘܳܬܼܶܗ ܥܰܕܼ ܙܰܒܼܢܳܐ܀܀
04:14 [ai]ܘܰܗܦܼܰܟܼ ܝܶܫܽܘܥ ܒܚܰܝܠܳܐ ܕܪܽܘܚܳܐ ܠܰܓܼܠܺܝܠܳܐ܂ ܘܰܢܦܼܰܩ ܥܠܰܘܗ̱ܝ ܛܶܒܿܳܐ܂ ܒܟܽܠܶܗ ܐܰܬܼܪܳܐ ܕܿܰܚܕܼܳܪ̈ܰܝܗܽܘܢ܂
04:15 [ai]ܘܗܽܘ ܡܰܠܶܦܼ ܗ̱ܘܳܐ ܒܰܟܼܢܽܘܫܳܬܼܗܽܘܢ̈܃ ܘܡܶܫܬܿܰܒܿܰܚ ܗ̱ܘܳܐ ܡܶܢ ܟܽܠ ܐ̱ܢܳܫ܀
04:16 [ai]ܘܶܐܬܼܳܐ ܠܢܳܨܪܰܬܼ܂ ܐܰܝܟܿܳܐ ܕܿܶܐܬܼܪܰܒܺܝ܃ ܘܥܰܠ ܐܰܝܟܿܰܢܳܐ ܕܰܡܥܳܕܼ ܗ̱ܘܳܐ ܠܰܟܼܢܽܘܫܬܳܐ܂ ܒܝܰܘܡܳܐ ܕܫܰܒܿܬܼܳܐ܂ ܘܩܳܡ ܠܡܶܩܪܳܐ܃
04:17 [ai]ܘܶܐܬܼܺܝܗܶܒܼ ܠܶܗ ܣܶܦܼܪܳܐ ܕܶܐܫܰܥܝܳܐ ܢܒܼܺܝܳܐ܂ ܘܰܦܼܬܼܰܚ ܝܶܫܽܘܥ ܣܶܦܼܪܳܐ܃ ܘܶܐܫܟܿܰܚ ܕܽܘܟܿܬܼܳܐ܂ ܐܰܝܟܿܳܐ ܕܰܟܼܬܼܺܝܒܼ܂
04:18 [ai]ܪܽܘܚܶܗ ܕܡܳܪܝܳܐ ܥܠܰܝ܂ ܘܡܶܛܽܠ ܗܳܕܼܶܐ ܡܰܫܚܰܢܝ܂ ܠܰܡܣܰܒܿܳܪܽܘ ܠܡܶܣܟܿܺܢܶܐ̈܂ ܘܫܰܠܚܰܢܝ܂ ܠܡܰܐܣܳܝܽܘ ܠܰܬܼܒܼܺܝܪ̈ܰܝ ܠܶܒܿܳܐ܂ ܘܰܠܡܰܟܼܪܳܙܽܘ ܠܰܫܒܼܰܝܳܐ̈ ܫܽܘܒܼܩܳܢܳܐ܂ ܘܠܰܥܘܺܝܪ̈ܶܐ ܚܙܳܝܳܐ܂ ܘܠܰܡܫܰܪܳܪܽܘ ܠܰܬܼܒܼܺܝܪ̈ܶܐ ܒܫܽܘܒܼܩܳܢܳܐ܂
04:19 [ai]ܘܰܠܡܰܟܼܪܳܙܽܘ ܫܰܢ̱ܬܳܐ ܡܩܰܒܿܰܠܬܳܐ ܠܡܳܪܝܳܐ܂
04:20 [ai]ܘܰܟܼܪܰܟܼ ܣܶܦܼܪܳܐ܂ ܘܝܰܗܒܶܗ ܠܰܡܫܰܡܫܳܢܳܐ܂ ܘܶܐܙܰܠ ܺܝܬܼܶܒܼ܂ ܟܽܠܗܽܘܢ ܕܶܝܢ ܕܒܰܟܼܢܽܘܫܬܳܐ܃ ܥܰܝܢܰܝܗܽܘܢ̈ ܚܳܝܪ̈ܳܢ ܗ̱ܘܰܝ̈ ܒܶܗ܂
04:21 [ai]ܘܫܰܪܺܝ ܠܡܺܐܡܰܪ ܠܘܳܬܼܗܽܘܢ܂ ܕܝܰܘܡܳܢܳܐ ܐܶܫܬܿܰܠܰܡ ܟܬܼܳܒܼܳܐ ܗܳܢܳܐ ܒܶܐܕܼܢܰܝܟܿܽܘܢ̈܂
04:22 [ai]ܘܣܳܗܕܺܝܢ ܗܘܰܘ ܠܶܗ ܟܽܠܗܽܘܢ܂ ܘܡܶܬܿܕܰܡܪܺܝܢ ܗ̱ܘܰܘ ܒܡܶܠܶܐ̈ ܕܛܰܝܒܿܽܘܬܼܳܐ ܕܢܳܦܼܩܳܢ̈ ܗ̱ܘܰܝ̈ ܡܶܢ ܦܽܘܡܶܗ܂ ܘܳܐܡܪܺܝܢ ܗ̱ܘܰܘ܂ ܠܳܐ ܗ̱ܘܳܐ ܗܳܢܳܐ ܒܰܪ ܝܰܘܣܶܦܼ ܀܀
04:23 [ai]ܐܳܡܰܪ ܠܗܽܘܢ ܝܶܫܽܘܥ܂ ܟܒܼܰܪ ܬܺܐܡܪܽܘܢ ܠܺܝ ܡܰܬܼܠܳܐ ܗܳܢܳܐ܂ ܐܳܣܝܳܐ ܐܰܣܳܐ ܢܰܦܼܫܳܟܼ܂ ܘܟܼܽܠ ܕܰܫܡܰܥܢ܂ ܕܰܥܒܼܰܕܿܬܿ ܒܰܟܼܦܼܰܪܢܰܚܽܘܡ܃ ܥܒܼܶܕܼ ܐܳܦܼ ܗܳܪܟܿܳܐ ܒܰܡܕܼܺܝܢ̱ܬܿܳܟܼ܂
04:24 [ai]ܗ̱ܘ ܕܶܝܢ ܐܶܡܰܪ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܠܰܝܬܿ ܢܒܼܺܝܳܐ ܕܡܶܬܼܩܰܒܿܰܠ ܒܰܡܕܼܺܝܢ̱ܬܿܶܗ܂
04:25 [ai]ܫܪܳܪܳܐ ܓܶܝܪ ܐܳܡܰܪ ܐ̱ܢܳܐ ܠܟܼܽܘܢ܂ ܕܣܰܓܿܺܝ ܐܰܪ̈ܡܠܳܬܼܳܐ ܐܺܝܬܼ ܗ̱ܘܰܝ̈ ܒܺܐܝܣܪܳܝܶܠ܂ ܒܝܰܘܡܰܝ̈ ܐܺܠܺܝܳܐ ܢܒܼܺܝܳܐ܃ ܟܰܕܼ ܐܶܬܿܬܿܚܶܕܼܘ ܫܡܰܝܳܐ̈ ܫܢܺܝܢ̈ ܬܠܳܬܼ ܘܝܰܪ̈ܚܶܐ ܫܬܳܐ܃ ܘܰܗܘܳܐ ܟܰܦܼܢܳܐ ܪܰܒܿܳܐ ܒܟܽܠܳܗ ܐܰܪܥܳܐ܂
04:26 [ai]ܘܰܠܘܳܬܼ ܚܕܼܳܐ ܡܶܢܗܶܝܢ ܠܳܐ ܐܶܫܬܿܰܕܿܰܪ ܐܺܠܺܝܳܐ܃ ܐܶܠܳܐ ܠܨܰܪܦܿܰܬܼ ܕܨܰܝܕܳܢ܂ ܠܘܳܬܼ ܐܰܢ̱ܬܿܬܼܳܐ ܐܰܪܡܰܠܬܳܐ܂
04:27 [ai]ܘܣܰܓܿܺܝܶܐܐ̈ ܓܿܰܪ̈ܒܿܶܐ ܐܺܝܬܼ ܗ̱ܘܰܘ ܒܶܝܬܼ ܐܺܝܣܪܳܝܶܠ܂ ܒܝܰܘܡܰܝ̈ ܐܶܠܺܝܫܰܥ ܢܒܼܺܝܳܐ܃ ܘܚܰܕܼ ܡܶܢܗܽܘܢ ܠܳܐ ܐܶܬܿܕܰܟܿܺܝ܃ ܐܶܠܳܐ ܐܶܢ ܢܰܥܡܳܢ ܐܰܪܡܳܝܳܐ܂
04:28 [ai]ܘܟܼܰܕܼ ܫܡܰܥܘ ܗܳܠܶܝܢ܂ ܗܳܢܽܘܢ ܕܒܰܟܼܢܽܘܫܬܳܐ܃ ܐܶܬܼܡܠܺܝܘ ܚܶܡܬܳܐ ܟܽܠܗܽܘܢ܃
04:29 [ai]ܘܩܳܡܘ ܐܰܦܿܩܽܘܗ̱ܝ ܠܒܼܰܪ ܡܶܢ ܡܕܼܺܝܢ̱ܬܳܐ܃ ܘܰܐܝܬܿܝܽܘܗ̱ܝ ܥܕܼܰܡܳܐ ܠܰܓܼܒܼܺܝܢܳܐ ܕܛܽܘܪܳܐ܃ ܗܰܘ ܕܰܡܕܼܺܝܢ̱ܬܿܗܽܘܢ ܒܰܢܝܳܐ ܗ̱ܘܳܬܼ ܥܠܰܘܗ̱ܝ܂ ܕܢܶܫܕܿܽܘܢܳܝܗ̱ܝ ܡܶܢ ܫܩܺܝܦܼܳܐ܂
04:30 [ai]ܗܽܘ ܕܶܝܢ ܥܒܼܰܪ ܒܰܝܢܳܬܼܗܽܘܢ ܘܶܐܙܰܠ܀
04:31 [ai]ܘܰܢܚܶܬܼ ܠܰܟܼܦܼܰܪܢܰܚܽܘܡ ܡܕܼܺܝܢ̱ܬܳܐ ܕܰܓܼܠܺܝܠܳܐ܃ ܘܡܰܠܶܦܼ ܗ̱ܘܳܐ ܠܗܽܘܢ ܒܫܰܒܿܶܐ̈܂
04:32 [ai]ܘܬܼܰܡܺܝܗܺܝܢ ܗܘܰܘ ܒܝܽܘܠܦܿܳܢܶܗ܂ ܕܰܡܫܰܠܛܳܐ ܗ̱ܘܳܬܼ ܡܶܠܬܼܶܗ܀܀
04:33 [ai]ܘܺܐܝܬܼ ܗ̱ܘܳܐ ܒܰܟܼܢܽܘܫܬܳܐ܂ ܓܰܒܼܪܳܐ ܕܺܐܝܬܼ ܗ̱ܘܳܐ ܒܶܗ܂ ܪܽܘܚܳܐ ܕܫܺܐܕܼܳܐ ܛܰܢܦܼܳܐ܂ ܘܰܙܥܰܩ ܒܩܳܠܳܐ ܪܳܡܳܐ܂
04:34 [ai]ܘܶܐܡܰܪ܂ ܫܒܼܽܘܩܰܝܢܝ܂ ܡܳܐ ܠܰܢ ܘܠܳܟܼ܂ ܝܶܫܽܘܥ܃ ܢܳܨܪܳܝܳܐ܂ ܐܶܬܼܰܝܬܿ ܠܡܰܘܒܿܳܕܼܽܘܬܼܰܢ܂ ܝܳܕܼܰܥ ܐ̱ܢܳܐ ܠܳܟܼ ܡܰܢ ܐܰܢ̱ܬܿ܂ ܩܰܕܿܺܝܫܶܗ܃ ܕܰܐܠܳܗܳܐ܂
04:35 [ai]ܘܰܟܼܐܳܐ ܒܶܗ ܝܶܫܽܘܥ܂ ܘܶܐܡܰܪ܂ ܣܟܼܽܘܪ ܦܽܘܡܳܟܼ܂ ܘܦܼܽܘܩ ܡܶܢܶܗ܂ ܘܰܫܕܼܳܝܗ̱ܝ ܫܺܐܕܼܳܐ ܒܰܡܨܰܥܬܼܳܐ܃ ܘܰܢܦܼܰܩ ܡܶܢܶܗ܂ ܟܰܕܼ ܠܳܐ ܣܪܰܚ ܒܶܗ ܡܶܕܶܡ܂
04:36 [ai]ܘܬܼܶܡܗܳܐ ܪܰܒܿܳܐ ܐܶܚܰܕܼ ܠܟܼܽܠܢܳܫ܂ ܘܰܡܡܰܠܠܺܝܢ ܗ̱ܘܰܘ܂ ܥܰܡ ܚܕܼܳܕܼܶܐ̈ ܘܳܐܡܪܺܝܢ܂ ܡܳܢܳܐ ܗ̱ܝ ܟܰܝ ܡܶܠܬܼܳܐ ܗܳܕܼܶܐ܃ ܕܰܒܼܫܽܘܠܛܳܢܳܐ ܘܰܒܚܰܝܠܳܐ ܦܳܩܕܿܳܐ ܠܪ̈ܽܘܚܶܐ ܛܰܢܦܼܳܬܼܳܐ̈܂ ܘܢܳܦܼܩܳܢ̈܂
04:37 [ai]ܘܰܢܦܼܰܩ ܥܠܰܘܗ̱ܝ ܛܶܒܿܳܐ ܒܟܽܠܶܗ ܐܰܬܼܪܳܐ ܕܿܰܚܕܼܳܪ̈ܰܝܗܽܘܢ܀
04:38 [ai]ܘܟܼܰܕܼ ܢܦܼܰܩ ܝܶܫܽܘܥ ܡܶܢ ܟܢܽܘܫܬܳܐ܃ ܥܰܠ ܠܒܼܰܝܬܿܶܗ ܕܫܶܡܥܽܘܢ܂ ܘܰܚܡܳܬܼܶܗ ܕܫܶܡܥܽܘܢ܂ ܐܰܠܺܝܨܳܐ ܗ̱ܘܳܬܼ ܒܶܐܫܳܬܼܳܐ ܪܰܒܿܬܼܳܐ܂ ܘܰܒܥܰܘ ܡܶܢܶܗ ܡܶܛܽܠܳܬܼܳܗ܂
04:39 [ai]ܘܩܳܡ ܠܥܶܠ ܡܶܢܳܗ܃ ܘܰܟܼܐܳܐ ܒܶܐܫܳܬܼܳܗ܂ ܘܰܫܒܼܰܩܬܼܳܗ܂ ܘܡܶܚܕܼܳܐ ܩܳܡܰܬܼ܂ ܘܰܡܫܰܡܫܳܐ ܗ̱ܘܳܬܼ ܠܗܽܘܢ܀
04:40 [ai]ܡܰܥܪ̈ܳܒܼܰܝ ܫܶܡܫܳܐ ܕܶܝܢ܃ ܟܽܠܗܽܘܢ ܐܰܝܠܶܝܢ ܕܺܐܝܬܼ ܗ̱ܘܳܐ ܠܗܽܘܢ ܟܿܪ̈ܺܝܗܶܐ܂ ܕܰܟܼܪܺܝܗܺܝܢ ܒܟܽܘܪ̈ܗܳܢܶܐ ܡܫܰܚܠܦܼܶܐ̈܂ ܐܰܝܬܿܺܝܘ ܐܶܢܽܘܢ ܠܘܳܬܼܶܗ܂ ܗܽܘ ܕܶܝܢ ܥܰܠ ܚܰܕܼ ܚܰܕܼ ܡܶܢܗܽܘܢ܂ ܐܺܝܕܼܶܗ ܣܳܐܶܡ ܗ̱ܘܳܐ܂ ܘܡܰܐܣܶܐ ܗ̱ܘܳܐ ܠܗܽܘܢ܂
04:41 [ai]ܘܢܳܦܼܩܺܝܢ ܗ̱ܘܰܘ ܐܳܦܼ ܫܺܐܕܼܶܐ̈ ܡܶܢ ܣܰܓܿܺܝܶܐܐ̈܂ ܟܰܕܼ ܡܰܙܥܩܺܝܢ܂ ܘܳܐܡܪܺܝܢ܂ ܕܰܐܢ̱ܬܿ ܗ̱ܽܘ ܡܫܺܝܚܳܐ ܒܪܶܗ ܕܰܐܠܳܗܳܐ܂ ܘܟܼܳܐܶܐ ܗ̱ܘܳܐ ܒܗܽܘܢ܃ ܘܠܳܐ ܫܳܒܼܶܩ ܗ̱ܘܳܐ ܠܗܽܘܢ ܕܢܺܐܡܪܽܘܢ܂ ܕܝܳܕܼܥܺܝܢ ܕܗܽܘܝܽܘ ܡܫܺܝܚܳܐ܀
04:42 [ai]ܘܰܠܨܰܦܼܪܶܗ ܕܝܰܘܡܳܐ܂ ܢܦܼܰܩ ܐܶܙܰܠ ܠܶܗ ܠܰܐܬܼܪܳܐ ܚܽܘܪܒܿܳܐ܂ ܘܟܼܶܢܫܶܐ̈ ܒܿܳܥܶܝܢ ܗ̱ܘܰܘ ܠܶܗ܂ ܘܶܐܬܼܰܘ ܥܕܼܰܡܳܐ ܠܘܳܬܼܶܗ܂ ܘܰܐܚܕܿܽܘܗ̱ܝ܂ ܕܠܳܐ ܢܺܐܙܰܠ ܠܶܗ ܡܶܢ ܠܘܳܬܼܗܽܘܢ܂
04:43 [ai]ܗܽܘ ܕܶܝܢ ܝܶܫܽܘܥ ܐܶܡܰܪ ܠܗܽܘܢ܂ ܕܳܐܦܼ ܠܰܡܕܼܺܝܢܳܬܼܳܐ̈ ܐ̱ܚܪ̈ܳܢܝܳܬܼܳܐ ܘܳܠܶܐ ܠܺܝ ܠܰܡܣܰܒܿܳܪܽܘ ܡܰܠܟܿܽܘܬܼܶܗ ܕܰܐܠܳܗܳܐ܂ ܕܥܰܠ ܗܳܕܼܶܐ ܗ̱ܘ ܐܶܫܬܿܰܕܿܪܶܬܼ܂
04:44 [ai]ܘܗܽܘ ܡܰܟܼܪܶܙ ܗ̱ܘܳܐ ܒܰܟܼܢܽܘܫܳܬܼܳܐ̈ ܕܰܓܼܠܺܝܠܳܐ܀܀

next chapter