The Comprehensive Aramaic Lexicon

06:01 [ai]	ܗܘܳܐ ܕܶܝܢ ܒܫܰܒܿܬܼܳܐ ܟܰܕܼ ܡܗܰܠܶܟܼ ܝܶܫܽܘܥ ܒܶܝܬܼ ܙܰܪ̈ܥܶܐ܃ ܬܰܠܡܺܝܕܼܰܘܗ̱ܝ̈ ܡܳܠܓܿܺܝܢ ܗ̱ܘܰܘ ܫܶܒܿܠܶܐ̈܃ ܘܦܼܳܪܟܿܺܝܢ ܒܺܐܝܕܼܰܝܗܽܘܢ̈܂ ܘܳܐܟܼܠܺܝܢ܂
06:02 [ai]	ܐ̱ܢܳܫܺܝܢ̈ ܕܶܝܢ ܡܶܢ ܦܿܪ̈ܺܝܫܶܐ ܐܳܡܪܺܝܢ ܠܗܽܘܢ܂ ܡܳܢܳܐ ܥܳܒܼܕܺܝܢ ܐܢ̱ܬܿܽܘܢ܂ ܡܶܕܶܡ ܕܠܳܐ ܫܰܠܺܝܛ ܠܡܶܥܒܿܰܕܼ ܒܫܰܒܿܬܼܳܐ܂
06:03 [ai]	ܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܘܠܳܐ ܗܳܕܼܶܐ ܩܪܰܝܬܿܽܘܢ܃ ܡܶܕܶܡ ܕܰܥܒܼܰܕܼ ܕܿܰܘܺܝܕܼ܃ ܟܰܕܼ ܟܦܼܶܢ܂ ܗܽܘ ܘܰܐܝܠܶܝܢ ܕܥܰܡܶܗ܃
06:04 [ai]	ܕܥܰܠ ܠܒܼܰܝܬܿܶܗ ܕܰܐܠܳܗܳܐ܃ ܘܠܰܚܡܳܐ ܕܦܳܬܼܽܘܪܶܗ ܕܡܳܪܝܳܐ܂ ܢܣܰܒܼ ܐܶܟܼܰܠ܃ ܘܝܰܗ̱ܒܼ ܠܰܐܝܠܶܝܢ ܕܥܰܡܶܗ܃ ܗܰܘ ܕܠܳܐ ܫܰܠܺܝܛ ܗ̱ܘܳܐ ܠܡܶܐܟܼܰܠ܃ ܐܶܠܳܐ ܠܟܼܳܗܢܶܐ̈ ܒܰܠܚܽܘܕܼ܂
06:05 [ai]	ܘܶܐܡܰܪ ܠܗܽܘܢ܂ ܕܡܳܪܳܗ ܗ̱ܽܘ ܕܫܰܒܿܬܼܳܐ ܒܪܶܗ ܕܐ̱ܢܳܫܳܐ܀
06:06 [ai]	ܗܘܳܐ ܕܶܝܢ ܠܫܰܒܿܬܼܳܐ ܐ̱ܚܪܺܬܼܳܐ܃ ܥܰܠ ܠܰܟܼܢܽܘܫܬܳܐ܂ ܘܡܰܠܶܦܼ ܗ̱ܘܳܐ܂ ܘܺܐܝܬܼ ܗ̱ܘܳܐ ܬܰܡܳܢ ܓܰܒܼܪܳܐ܂ ܕܺܐܝܕܼܶܗ ܕܝܰܡܺܝܢܳܐ ܝܰܒܺܝܫܳܐ ܗ̱ܘܳܬܼ܂
06:07 [ai]	ܘܣܳܦܼܪ̈ܶܐ ܘܰܦܼܪ̈ܺܝܫܶܐ ܢܳܛܪܺܝܢ ܗ̱ܘܰܘ ܠܶܗ܃ ܕܶܐܢ ܗܽܘ ܕܡܰܐܣܶܐ ܒܫܰܒܿܬܼܳܐ܂ ܕܢܶܫܟܿܚܽܘܢ ܢܶܐܟܼܠܽܘܢ ܩܰܪ̈ܨܰܘܗ̱ܝ܂
06:08 [ai]	ܗܽܘ ܕܶܝܢ ܺܝܕܼܰܥ ܡܰܚܫܒܼܳܬܼܗܽܘܢ̈܃ ܘܶܐܡܰܪ ܠܗܰܘ ܓܰܒܼܪܳܐ܂ ܕܿܝܰܒܺܝܫܳܐ ܐܺܝܕܼܶܗ܂ ܩܽܘܡ ܬܳܐ ܠܳܟܼ ܠܡܶܨܥܰܬܼ ܟܢܽܘܫܬܳܐ܂ ܘܟܼܰܕܼ ܐܶܬܼܳܐ ܘܩܳܡ܃
06:09 [ai]	ܐܶܡܰܪ ܠܗܽܘܢ ܝܶܫܽܘܥ܂ ܐܶܫܰܐܶܠܟܼܽܘܢ܂ ܡܳܢܳܐ ܫܰܠܺܝܛ ܒܫܰܒܿܬܼܳܐ܂ ܕܛܳܒܼ ܠܡܶܥܒܿܰܕܼ ܐܰܘ ܕܒܺܝܫ܂ ܢܰܦܼܫܳܐ ܠܡܰܚܳܝܽܘ ܐܰܘ ܠܡܰܘܒܿܳܕܼܽܘ܂
06:10 [ai]	ܘܚܳܪ ܒܗܽܘܢ܂ ܒܟܽܠܗܽܘܢ܂ ܘܶܐܡܰܪ ܠܶܗ ܦܫܽܘܛ ܐܺܝܕܼܳܟܼ܂ ܘܰܦܼܫܰܛ܂ ܘܬܼܶܩܢܰܬܼ ܐܺܝܕܼܶܗ܂ ܐܰܝܟܼ ܚܒܼܰܪܬܿܳܗ܀
06:11 [ai]	ܗܶܢܽܘܢ ܕܶܝܢ ܐܶܬܼܡܠܺܝܘ ܚܣܳܡܳܐ܂ ܘܰܡܡܰܠܠܺܝܢ ܗ̱ܘܰܘ ܚܰܕܼ ܥܰܡ ܚܰܕܼ܃ ܕܡܳܢܳܐ ܢܶܥܒܿܕܼܽܘܢ ܠܶܗ ܠܝܶܫܽܘܥ ܿ܀ܿ܀ܿ
06:12 [ai]	ܗܘܳܐ ܕܶܝܢ ܒܝܰܘܡܳܬܼܳܐ̈ ܗܳܢܽܘܢ܃ ܢܦܼܰܩ ܝܶܫܽܘܥ ܠܛܽܘܪܳܐ ܠܰܡܨܰܠܳܝܽܘ܂ ܘܬܼܰܡܳܢ ܐܰܓܿܰܗ ܗ̱ܘܳܐ܂ ܒܰܨܠܽܘܬܼܶܗ ܕܰܐܠܳܗܳܐ܂
06:13 [ai]	ܘܟܼܰܕܼ ܢܶܓܼܗܰܬܼ܃ ܩܪܳܐ ܠܬܼܰܠܡܺܝܕܼܰܘܗ̱ܝ̈܂ ܘܰܓܼܒܼܳܐ ܡܶܢܗܽܘܢ܂ ܬܿܪ̈ܶܥܣܰܪ܂ ܗܳܢܽܘܢ ܕܰܫܠܺܝܚܶܐ̈ ܫܰܡܺܝ ܐܶܢܽܘܢ܀
06:14 [ai]	ܫܶܡܥܽܘܢ ܗܰܘ ܕܫܰܡܺܝ ܟܺܐܦܼܳܐ܃ ܘܰܐܢܕܿܪܶܐܘܳܣ ܐܰܚܽܘܗ̱ܝ܂ ܘܝܰܥܩܽܘܒܼ܂ ܘܝܽܘܚܰܢܳܢ܂ ܘܦܼܺܝܠܺܝܦܿܳܘܣ܂ ܘܒܼܰܪ ܬܿܽܘܠܡܰܝ܂
06:15 [ai]	ܘܡܰܬܿܰܝ܂ ܘܬܼܳܐܘܡܰܐ܂ ܘܝܰܥܩܽܘܒܼ ܒܰܪ ܚܰܠܦܼܰܝ܂ ܘܫܶܡܥܽܘܢ ܕܡܶܬܼܩܪܶܐ ܛܰܢܳܢܳܐ܂
06:16 [ai]	ܘܺܝܗܽܘܕܼܳܐ ܒܰܪ ܝܰܥܩܽܘܒܼ܂ ܘܺܝܗܽܘܕܼܳܐ ܣܟܼܰܪܝܽܘܛܳܐ܂ ܗܰܘ ܕܰܗܘܳܐ ܡܰܫܠܡܳܢܳܐ܀
06:17 [ai]	ܘܰܢܚܶܬܼ ܥܰܡܗܽܘܢ ܝܶܫܽܘܥ܂ ܘܩܳܡ ܒܰܦܼܩܰܥܬܼܳܐ܂ ܘܟܼܶܢܫܳܐ ܣܰܓܿܺܝܳܐܐ ܕܬܰܠܡܺܝܕܼܰܘܗ̱ܝ̈܃ ܘܣܽܘܓܼܳܐܐ ܕܟܶܢܫܳܐ ܕܥܰܡܳܐ܂ ܡܶܢ ܟܽܠܳܗ ܺܝܗܽܘܕܼ܃ ܘܡܶܢ ܐܽܘܪܺܫܠܶܡ܃ ܘܡܶܢ ܣܦܼܳܪ ܝܰܡܳܐ ܕܨܽܘܪ ܘܰܕܼܨܰܝܕܳܢ܃
06:18 [ai]	ܕܶܐܬܼܰܘ ܕܢܶܫܡܥܽܘܢ ܡܶܠܬܼܶܗ܂ ܘܰܕܼܢܶܬܼܰܐܣܽܘܢ ܡܶܢ ܟܿܽܘܪ̈ܗܳܢܰܝܗܽܘܢ܂ ܘܰܐܝܠܶܝܢ ܕܡܶܬܼܰܐܠܨܺܝܢ ܡܶܢ ܪ̈ܽܘܚܶܐ ܛܰܢܦܼܳܬܼܳܐ̈܂ ܘܡܶܬܼܰܐܣܶܝܢ ܗ̱ܘܰܘ܂
06:19 [ai]	ܘܟܼܽܠܶܗ ܟܶܢܫܳܐ܂ ܒܿܳܥܶܝܢ ܗ̱ܘܰܘ ܠܡܶܬܼܩܰܪܳܒܼܽܘ ܠܶܗ܂ ܚܰܝܠܳܐ ܓܶܝܪ ܢܳܦܼܶܩ ܗ̱ܘܳܐ ܡܶܢܶܗ܂ ܘܰܠܟܼܽܠܗܽܘܢ ܡܰܐܣܶܐ ܗ̱ܘܳܐ܀
06:20 [ai]	ܘܰܐܪܺܝܡ ܥܰܝܢܰܘܗ̱ܝ̈ ܥܰܠ ܬܰܠܡܺܝܕܼܰܘܗ̱ܝ̈܂ ܘܶܐܡܰܪ܂ ܛܽܘܒܼܰܝܟܿܽܘܢ ܡܶܣܟܿܺܢܶܐ̈܂ ܕܕܼܺܝܠܟܼܽܘܢ ܗ̱ܺܝ ܡܰܠܟܿܽܘܬܼܳܐ ܕܰܐܠܳܗܳܐ܀
06:21 [ai]	ܛܽܘܒܼܰܝܟܿܽܘܢ ܐܰܝܠܶܝܢ ܕܟܰܦܼܢܺܝܢ ܗܳܫܳܐ܂ ܕܬܶܣܒܿܥܽܘܢ܀ ܛܽܘܒܼܰܝܟܿܽܘܢ ܠܰܕܼܒܼܳܟܼܶܝܢ ܗܳܫܳܐ܂ ܕܬܶܓܼܚܟܼܽܘܢ܀
06:22 [ai]	ܛܽܘܒܼܰܝܟܿܽܘܢ ܡܳܐ ܕܣܳܢܶܝܢ ܠܟܼܽܘܢ ܒܢܰܝܢܳܫܳܐ܃ ܘܰܡܦܼܰܪܫܺܝܢ ܠܟܼܽܘܢ܂ ܘܰܡܚܰܣܕܼܺܝܢ ܠܟܼܽܘܢ܃ ܘܡܰܦܿܩܺܝܢ ܫܶܡܟܼܽܘܢ ܐܰܝܟܼ ܒܺܝܫܶܐ̈܂ ܚܠܳܦܼ ܒܪܶܗ ܕܐ̱ܢܳܫܳܐ܂
06:23 [ai]	ܚܕܼܰܘ ܒܗܰܘ ܝܰܘܡܳܐ܂ ܘܕܼܽܘܨܘ܃ ܕܰܐܓܼܪܟܼܽܘܢ ܣܰܓܿܺܝ ܒܰܫܡܰܝܳܐ܂ ܗܳܟܼܰܢܳܐ ܓܶܝܪ ܥܳܒܼܕܺܝܢ ܗ̱ܘܰܘ ܐܰܒܼܳܗܳܬܼܗܽܘܢ̈ ܠܰܢܒܼܺܝܶܐ̈܀
06:24 [ai]	ܒܪܰܡ ܘܳܝ ܠܟܼܽܘܢ ܥܰܬܿܺܝܪ̈ܶܐ܂ ܕܩܰܒܿܶܠܬܿܽܘܢ ܒܽܘܝܳܐܟܼܽܘܢ܂
06:25 [ai]	ܘܳܝ ܠܟܼܽܘܢ ܣܰܒܼܥܶܐ̈܂ ܕܬܶܟܼܦܿܢܽܘܢ܂ ܘܳܝ ܠܟܼܽܘܢ ܠܰܕܼܓܼܳܚܟܼܺܝܢ ܗܳܫܳܐ܂ ܕܬܶܒܼܟܿܽܘܢ܂ ܘܬܼܶܬܼܰܐܒܼܠܽܘܢ܂
06:26 [ai]	ܘܳܝ ܠܟܼܽܘܢ܂ ܟܰܕܼ ܢܶܗܘܽܘܢ ܐܳܡܪܺܝܢ ܥܠܰܝܟܿܽܘܢ ܒܢܰܝ ܐ̱ܢܳܫܳܐ ܕܫܰܦܿܺܝܪ܂ ܗܳܟܼܰܢܳܐ ܓܶܝܪ ܥܳܒܼܕܺܝܢ ܗ̱ܘܰܘ ܠܰܢܒܼܺܝܶܐ̈ ܕܕܼܰܓܳܠܽܘܬܼܳܐ ܐܰܒܼܳܗܳܬܼܗܽܘܢ̈܀
06:27 [ai]	ܠܟܼܽܘܢ ܕܶܝܢ ܐܳܡܰܪ ܐ̱ܢܳܐ ܠܰܕܼܫܳܡܥܺܝܢ܃ ܐܰܚܶܒܼܘ ܠܰܒܼܥܶܠܕܿܒܼܳܒܼܰܝܟܿܽܘܢ̈܂ ܘܰܥܒܼܶܕܼܘ ܕܫܰܦܿܺܝܪ ܠܰܐܝܠܶܝܢ ܕܣܳܢܶܝܢ ܠܟܼܽܘܢ܂
06:28 [ai]	ܘܒܼܰܪܶܟܼܘ ܠܰܐܝܠܶܝܢ ܕܠܳܝܛܺܝܢ ܠܟܼܽܘܢ܂ ܘܨܰܠܰܘ ܥܰܠ ܐܰܝܠܶܝܢ ܕܕܼܳܒܼܪܺܝܢ ܠܟܼܽܘܢ ܒܰܩܛܺܝܪܳܐ܂
06:29 [ai]	ܘܠܰܕܼܡܳܚܶܐ ܠܳܟܼ ܥܰܠ ܦܰܟܿܳܟܼ܃ ܩܰܪܶܒܼ ܠܶܗ ܐ̱ܚܪܺܢܳܐ܂ ܘܡܶܢ ܡܰܢ ܕܫܳܩܶܠ ܡܰܪܛܽܘܛܳܟܼ܃ ܠܳܐ ܬܶܟܼܠܶܐ ܐܳܦܼ ܟܽܘܬܿܺܝܢܳܟܼ܀
06:30 [ai]	ܠܟܼܽܠ ܕܫܳܐܶܠ ܠܳܟܼ܂ ܗܰܒܼ ܠܶܗ܂ ܘܡܶܢ ܡܰܢ ܕܫܳܩܶܠ ܕܺܝܠܳܟܼ܂ ܠܳܐ ܬܶܬܼܒܿܰܥ܀
06:31 [ai]	ܘܰܐܝܟܿܰܢܳܐ ܕܨܳܒܼܶܝܢ ܐܢ̱ܬܿܽܘܢ܂ ܕܢܶܥܒܿܕܼܽܘܢ ܠܟܼܽܘܢ ܒܢܰܝ ܐ̱ܢܳܫܳܐ܃ ܗܳܟܼܘܳܬܼ ܥܒܼܶܕܼܘ ܠܗܽܘܢ܂ ܐܳܦܼ ܐܰܢ̱ܬܿܽܘܢ܀
06:32 [ai]	ܐܶܢ ܓܶܝܪ ܡܰܚܒܼܺܝܢ ܐܢ̱ܬܿܽܘܢ܂ ܠܰܐܝܠܶܝܢ ܕܡܰܚܒܼܺܝܢ ܠܟܼܽܘܢ܃ ܐܰܝܕܼܳܐ ܗ̱ܝ ܛܰܝܒܿܽܘܬܼܟܼܽܘܢ܂ ܐܳܦܼ ܓܶܝܪ ܚܰܛܳܝܶܐ̈ ܠܰܐܝܠܶܝܢ ܕܡܰܚܒܼܺܝܢ ܠܗܽܘܢ܂ ܪܳܚܡܺܝܢ܂
06:33 [ai]	ܘܶܐܢ ܥܳܒܼܕܺܝܢ ܐܢ̱ܬܿܽܘܢ ܕܛܳܒܼ܂ ܠܰܐܝܠܶܝܢ ܕܡܰܛܶܐܒܼܺܝܢ ܠܟܼܽܘܢ܃ ܐܰܝܕܼܳܐ ܗ̱ܝ ܛܰܝܒܿܽܘܬܼܟܼܽܘܢ܂ ܐܳܦܼ ܚܰܛܳܝܶܐ̈ ܓܶܝܪ ܗܳܟܼܰܢܳܐ ܥܳܒܼܕܺܝܢ܂
06:34 [ai]	ܘܶܐܢ ܡܰܘܙܦܼܺܝܢ ܐܢ̱ܬܿܽܘܢ ܠܡܰܢ ܕܣܳܒܼܪܺܝܢ ܐܢ̱ܬܿܽܘܢ܂ ܕܬܶܬܼܦܿܰܪܥܽܘܢ ܡܶܢܶܗ܃ ܐܰܝܕܼܳܐ ܗ̱ܝ ܛܰܝܒܿܽܘܬܼܟܼܽܘܢ܂ ܐܳܦܼ ܚܰܛܳܝܶܐ̈ ܓܶܝܪ ܠܚܰܛܳܝܶܐ̈ ܡܰܘܙܦܼܺܝܢ܃ ܕܗܳܟܼܘܳܬܼ ܢܶܬܼܦܿܰܪܥܽܘܢ܂
06:35 [ai]	ܒܪܰܡ ܐܰܚܶܒܼܘ ܠܰܒܼܥܶܠܕܿܒܼܳܒܼܰܝܟܿܽܘܢ̈܂ ܘܰܐܛܶܐܒܼܘ ܠܗܽܘܢ܂ ܘܰܐܘܙܶܦܼܘ܂ ܘܠܳܐ ܬܶܦܼܣܩܽܘܢ ܣܰܒܼܪܳܐ ܕܐ̱ܢܳܫ܂ ܘܢܶܗܘܶܐ ܣܰܓܿܺܝ ܐܰܓܼܪܟܼܽܘܢ܂ ܘܬܼܶܗܘܽܘܢ ܒܢܰܘܗ̱ܝ ܕܪܳܡܳܐ܂ ܕܗܽܘ ܒܰܣܺܝܡ ܗ̱ܽܘ܂ ܥܰܠ ܒܺܝܫܶܐ̈ ܘܥܰܠ ܟܿܳܦܼܽܘܪ̈ܶܐ܀
06:36 [ai]	ܗܘܰܘ ܗܳܟܼܺܝܠ ܡܪ̈ܰܚܡܳܢܶܐ܃ ܐܰܝܟܿܰܢܳܐ ܕܳܐܦܼ ܐܰܒܼܽܘܟܼܽܘܢ ܡܪܰܚܡܳܢܳܐ ܗ̱ܘ܀
06:37 [ai]	ܠܳܐ ܬܕܼܽܘܢܽܘܢ܂ ܘܠܳܐ ܡܶܬܿܬܿܕܼܺܝܢܺܝܢ ܐܢ̱ܬܿܽܘܢ܂ ܠܳܐ ܬܚܰܝܒܼܽܘܢ܂ ܘܠܳܐ ܡܶܬܼܚܰܝܒܼܺܝܢ ܐܢ̱ܬܿܽܘܢ܂ ܫܪܰܘ܂ ܘܬܼܶܫܬܿܪܽܘܢ܂
06:38 [ai]	ܗܰܒܼܘ܂ ܘܡܶܬܼܺܝܗܶܒܼ ܠܟܼܽܘܢ܂ ܒܰܟܼܝܳܠܬܳܐ ܛܳܒܼܬܼܳܐ ܘܰܪܩܺܝܥܬܳܐ ܘܰܡܫܰܦܿܰܥܬܳܐ ܢܰܪܡܽܘܢ ܒܥܽܘܒܰܝܟܿܽܘܢ̈܂ ܒܗܳܝ ܓܶܝܪ ܟܝܳܠܬܳܐ ܕܰܡܟܼܺܝܠܺܝܢ ܐܢ̱ܬܿܽܘܢ܂ ܡܶܬܿܬܟܼܺܝܠ ܠܟܼܽܘܢ܀
06:39 [ai]	ܘܶܐܡܰܪ ܗ̱ܘܳܐ ܠܗܽܘܢ ܡܰܬܼܠܳܐ܂ ܠܡܳܐ܃ ܡܶܫܟܿܰܚ ܣܰܡܝܳܐ ܠܣܰܡܝܳܐ ܠܰܡܕܼܰܒܿܳܪܽܘ܃ ܠܳܐ ܬܿܪ̈ܰܝܗܽܘܢ ܒܓܽܘܡܳܨܳܐ ܢܳܦܼܠܺܝܢ܀
06:40 [ai]	ܠܰܝܬܿ ܬܰܠܡܺܝܕܼܳܐ ܕܝܰܬܿܺܝܪ ܡܶܢ ܪܰܒܶܗ܂ ܟܽܠܢܳܫ ܓܶܝܪ ܕܰܓܼܡܺܝܪ ܢܶܗܘܶܐ ܐܰܝܟܼ ܪܰܒܶܗ܀
06:41 [ai]	ܡܳܢܳܐ ܕܶܝܢ ܚܳܙܶܐ ܐܰܢ̱ܬܿ ܓܶܠܳܐ ܕܰܒܼܥܰܝܢܶܗ ܕܰܐܚܽܘܟܼ܂ ܩܳܪܺܝܬܳܐ ܕܶܝܢ ܕܰܒܼܥܰܝܢܳܟܼ ܠܳܐ ܡܶܬܼܚܰܙܝܳܐ ܠܳܟܼ܂
06:42 [ai]	ܐܰܘ ܐܰܝܟܿܰܢܳܐ ܡܶܫܟܿܰܚ ܐܰܢ̱ܬܿ ܠܡܺܐܡܰܪ ܠܰܐܚܽܘܟܼ܃ ܐܳܚܝ܂ ܫܒܼܽܘܩ ܐܰܦܿܶܩ ܓܶܠܳܐ ܡܶܢ ܥܰܝܢܳܟܼ܃ ܕܗܳܐ ܩܳܪܺܝܬܳܐ ܕܰܒܼܥܰܝܢܳܟܼ ܕܺܝܠܳܟܼ ܠܳܐ ܡܶܬܼܚܰܙܝܳܐ ܠܳܟܼ܂ ܢܳܣܶܒܼ ܒܰܐܦܿܶܐ̈܃ ܐܰܦܿܶܩ ܠܽܘܩܕܼܰܡ ܩܳܪܺܝܬܳܐ ܡܶܢ ܥܰܝܢܳܟܼ܃ ܘܗܳܝܕܶܝܢ ܢܶܬܼܚܙܶܐ ܠܳܟܼ܂ ܠܡܰܦܿܳܩܽܘ ܓܶܠܳܐ ܡܶܢ ܥܰܝܢܶܗ ܕܰܐܚܽܘܟܼ܀
06:43 [ai]	ܠܳܐ ܐܺܝܬܼ ܐܺܝܠܳܢܳܐ ܛܳܒܼܳܐ܂ ܕܥܳܒܼܶܕܼ ܦܿܺܐܪ̈ܶܐ ܒܺܝܫܶܐ̈܂ ܐܳܦܼ ܠܳܐ ܐܺܝܠܳܢܳܐ ܒܺܝܫܳܐ܂ ܕܥܳܒܼܶܕܼ ܦܿܺܐܪ̈ܶܐ ܛܳܒܼܶܐ̈܂
06:44 [ai]	ܟܽܠ ܐܺܝܠܳܢܳܐ ܓܶܝܪ ܡܶܢ ܦܿܺܐܪ̈ܰܘܗ̱ܝ ܗ̱ܘ ܡܶܬܼܺܝܕܼܰܥ܂ ܠܳܐ ܓܶܝܪ ܠܳܩܛܺܝܢ ܡܶܢ ܟܽܘܒܿܶܐ̈ ܬܺܐܢܶܐ̈܂ ܐܳܦܼ ܠܳܐ ܡܶܢ ܣܰܢܝܳܐ ܩܳܛܦܿܺܝܢ ܥܶܢܒܿܶܐ̈܀
06:45 [ai]	ܓܰܒܼܪܳܐ܂ ܛܳܒܼܳܐ܂ ܡܶܢ ܣܺܝܡܳܬܼܳܐ̈ ܛܳܒܼܳܬܼܳܐ̈ ܕܿܰܒܼܠܶܒܶܗ ܡܰܦܿܶܩ ܛܳܒܼܳܬܼܳܐ̈܂ ܘܓܼܰܒܼܪܳܐ ܒܺܝܫܳܐ܂ ܡܶܢ ܣܺܝܡܳܬܼܳܐ̈ ܒܺܝܫܳܬܼܳܐ̈ ܕܿܰܒܼܠܶܒܶܗ ܡܰܦܿܶܩ ܒܺܝܫܳܬܼܳܐ̈܂ ܡܶܢ ܬܰܘܬܿܳܪ̈ܰܝ ܠܶܒܿܳܐ ܓܶܝܪ ܡܡܰܠܠܳܢ̈ ܣܶܦܼܘܳܬܼܳܐ̈܀
06:46 [ai]	ܡܳܢܳܐ ܩܳܪܶܝܢ ܐܢ̱ܬܿܽܘܢ ܠܺܝ ܡܳܪܝ܂ ܡܳܪܝ܃ ܘܡܶܕܶܡ ܕܳܐܡܰܪ ܐ̱ܢܳܐ ܠܳܐ ܥܳܒܼܕܺܝܢ ܐܢ̱ܬܿܽܘܢ܀
06:47 [ai]	ܟܽܠ ܐ̱ܢܳܫ ܕܳܐܬܼܶܐ ܠܘܳܬܼܝ܂ ܘܫܳܡܰܥ ܡܶܠܰܝ̈ ܘܥܳܒܼܶܕܼ ܠܗܶܝܢ܃ ܐܶܚܰܘܶܝܟܼܽܘܢ ܠܡܳܢܳܐ ܕܳܡܶܐ܂
06:48 [ai]	ܕܳܡܶܐ ܠܓܼܰܒܼܪܳܐ ܕܰܒܼܢܳܐ ܒܰܝܬܳܐ܂ ܘܰܚܦܼܰܪ ܘܥܰܡܶܩ܂ ܘܣܳܡ ܫܶܬܼܶܐܣܶܐ̈܂ ܥܰܠ ܫܽܘܥܳܐ܂ ܟܰܕܼ ܗܘܳܐ ܕܶܝܢ ܡܶܠܶܐܳܐ܃ ܐܶܬܿܛܰܪܺܝ ܡܶܠܶܐܳܐ ܒܒܼܰܝܬܳܐ ܗܰܘ܂ ܘܠܳܐ ܐܶܫܟܿܰܚ ܕܰܢܙܺܝܥܺܝܘܗ̱ܝ܂ ܣܺܝܡܳܐ ܗ̱ܘܳܬܼ ܓܶܝܪ ܫܶܬܼܶܐܣܬܿܶܗ܂ ܥܰܠ ܫܽܘܥܳܐ܂
06:49 [ai]	ܘܗܰܘ ܕܫܳܡܰܥ ܘܠܳܐ ܥܳܒܼܶܕܼ܃ ܕܳܡܶܐ ܠܓܼܰܒܼܪܳܐ ܕܰܒܼܢܳܐ ܒܰܝܬܿܶܗ ܥܰܠ ܥܰܦܼܪܳܐ܂ ܕܠܳܐ ܫܶܬܼܶܐܣܬܳܐ܂ ܘܟܼܰܕܼ ܐܶܬܿܛܰܪܺܝ ܒܶܗ ܢܰܗܪܳܐ܂ ܒܰܪ ܫܳܥܬܼܶܗ ܢܦܼܰܠ܂ ܘܰܗܘܳܬܼ ܡܰܦܿܽܘܠܬܿܶܗ ܪܰܒܿܳܐ ܕܒܰܝܬܳܐ ܗܰܘ܀

next chapter