The Comprehensive Aramaic Lexicon

07:01 [ai]	ܘܟܼܰܕܼ ܫܰܠܶܡ ܡܶܠܶܐ̈ ܟܽܠܗܶܝܢ ܠܡܰܫܡܰܥܬܼܶܗ ܕܥܰܡܳܐ܃ ܥܰܠ ܝܶܫܽܘܥ ܠܰܟܼܦܼܰܪܢܰܚܽܘܡ܂
07:02 [ai]	ܥܰܒܼܕܿܶܗ ܕܶܝܢ ܕܩܶܢܛܪܽܘܢܳܐ ܚܰܕܼ ܥܒܼܺܝܕܼ ܗ̱ܘܳܐ ܒܺܝܫܳܐܺܝܬܼ܂ ܐܰܝܢܳܐ ܕܝܰܩܺܝܪ ܗ̱ܘܳܐ ܥܠܰܘܗ̱ܝ܂ ܘܩܰܪܺܝܒܼ ܗ̱ܘܳܐ ܠܰܡܡܳܬܼ܂
07:03 [ai]	ܘܰܫܡܰܥ ܥܰܠ ܝܶܫܽܘܥ܂ ܘܫܰܕܿܰܪ ܠܘܳܬܼܶܗ ܩܰܫܺܝܫܶܐ̈ ܕܺܝܗܽܘܕܼܳܝܶܐ̈܂ ܘܒܼܳܥܶܐ ܗ̱ܘܳܐ ܡܶܢܶܗ܂ ܐܰܝܟܼ ܕܢܺܐܬܼܶܐ ܢܰܚܶܐ ܠܥܰܒܼܕܿܶܗ܂
07:04 [ai]	ܗܶܢܽܘܢ ܕܶܝܢ ܟܰܕܼ ܐܶܬܼܰܘ ܠܘܳܬܼ ܝܶܫܽܘܥ܃ ܒܿܳܥܶܝܢ ܗ̱ܘܰܘ ܡܶܢܶܗ ܒܛܺܝܠܳܐܺܝܬܼ܂ ܘܳܐܡܪܺܝܢ܂ ܫܳܘܶܐ ܗ̱ܘ ܕܬܶܥܒܿܶܕܼ ܠܶܗ ܗܳܕܼܶܐ܂
07:05 [ai]	ܪܳܚܶܡ ܓܶܝܪ ܠܥܰܡܰܢ܂ ܘܳܐܦܼ ܒܶܝܬܼ ܟܢܽܘܫܬܳܐ܂ ܗܽܘ ܒܢܳܐ ܠܰܢ܂
07:06 [ai]	ܝܶܫܽܘܥ ܕܶܝܢ ܐܳܙܶܠ ܗ̱ܘܳܐ ܥܰܡܗܽܘܢ܂ ܟܰܕܼ ܕܶܝܢ ܠܳܐ ܣܰܓܿܺܝ ܪܰܚܺܝܩ ܡܶܢ ܒܰܝܬܳܐ܃ ܫܰܕܿܰܪ ܠܘܳܬܼܶܗ ܩܶܢܛܪܽܘܢܳܐ ܪ̈ܳܚܡܰܘܗ̱ܝ܂ ܘܶܐܡܰܪ ܠܶܗ܂ ܡܳܪܝ܂ ܠܳܐ ܬܶܥܡܰܠ܂ ܠܳܐ ܓܶܝܪ ܫܳܘܶܐ ܐ̱ܢܳܐ ܕܬܶܥܽܘܠ ܬܚܶܝܬܼ ܡܰܛܠܰܠܝ܂
07:07 [ai]	ܡܶܛܽܠ ܗܰܘ ܐܶܢܳܐ ܠܳܐ ܫܘܺܝܬܼ ܕܰܠܘܳܬܼܳܟܼ ܐܺܬܼܶܐ܂ ܐܶܠܳܐ ܐܶܡܰܪ ܒܡܶܠܬܼܳܐ܂ ܘܢܶܬܼܰܐܣܶܐ ܛܰܠܺܝܝ ܿ܀ܿ܀ܿ
07:08 [ai]	ܐܳܦܼ ܐܶܢܳܐ ܓܶܝܪ ܓܰܒܼܪܳܐ ܐ̱ܢܳܐ ܕܰܡܫܰܥܒܿܰܕܼ ܐ̱ܢܳܐ ܬܚܶܝܬܼ ܫܽܘܠܛܳܢܳܐ܂ ܘܺܐܝܬܼ ܬܚܶܝܬܼ ܐܺܝܕܼܰܝ̈ ܐܶܣܛܪ̈ܰܛܺܝܽܘܛܶܐ܂ ܘܳܐܡܰܪ ܐ̱ܢܳܐ ܠܗܳܢܳܐ܂ ܕܙܶܠ܂ ܘܳܐܙܶܠ܂ ܘܠܰܐ̱ܚܪܺܢܳܐ܂ ܕܬܳܐ܂ ܘܳܐܬܼܶܐ܂ ܘܰܠܥܰܒܼܕܿܝ܂ ܥܒܼܶܕܼ ܗܳܕܼܶܐ܂ ܘܥܳܒܼܶܕܼ܂
07:09 [ai]	ܟܰܕܼ ܫܡܰܥ ܕܶܝܢ ܝܶܫܽܘܥ ܗܳܠܶܝܢ܂ ܐܶܬܿܕܰܡܰܪ ܒܶܗ܂ ܘܶܐܬܼܦܿܢܺܝ܂ ܘܶܐܡܰܪ ܠܟܼܶܢܫܳܐ ܕܳܐܬܼܶܐ ܒܳܬܼܪܶܗ܂ ܐܳܡܰܪ ܐ̱ܢܳܐ ܠܟܼܽܘܢ܃ ܕܳܐܦܼ ܠܳܐ ܒܶܝܬܼ ܐܺܝܣܪܳܝܶܠ ܐܶܫܟܿܚܶܬܼ ܐܰܝܟܼ ܗܳܕܼܶܐ ܗܰܝܡܳܢܽܘܬܼܳܐ܀
07:10 [ai]	ܘܰܗܦܼܰܟܼܘ ܗܳܢܽܘܢ ܕܶܐܫܬܿܰܕܿܰܪܘ ܠܒܼܰܝܬܳܐ܃ ܘܶܐܫܟܿܰܚܘ ܠܥܰܒܼܕܿܳܐ ܗܰܘ ܕܰܟܼܪܺܝܗ ܗܘܳܐ܂ ܟܰܕܼ ܚܠܺܝܡ܀
07:11 [ai]	ܘܰܗܘܳܐ ܠܝܰܘܡܳܐ ܕܒܳܬܼܪܶܗ܃ ܐܳܙܶܠ ܗ̱ܘܳܐ ܠܰܡܕܼܺܝܢ̱ܬܳܐ ܕܰܫܡܳܗ܂ ܢܰܐܺܝܢ܂ ܘܬܼܰܠܡܺܝܕܼܰܘܗ̱ܝ̈ ܥܰܡܶܗ܂ ܘܟܼܶܢܫܳܐ ܣܰܓܿܺܝܳܐܐ܂
07:12 [ai]	ܘܟܼܰܕܼ ܩܪܶܒܼ ܠܬܼܰܪܥܳܐ ܕܰܡܕܼܺܝܢ̱ܬܳܐ܃ ܚܙܳܐ ܟܰܕܼ ܡܠܰܘܶܝܢ ܡܺܝܬܼܳܐ܂ ܕܺܝܚܺܝܕܼܳܝܳܐ ܗ̱ܘܳܐ ܠܶܐܡܶܗ܂ ܘܗܺܝ ܐܶܡܶܗ܂ ܐܰܪܡܰܠܬܳܐ ܗܘܳܬܼ܂ ܘܟܼܶܢܫܳܐ ܣܰܓܿܺܝܳܐܐ ܕܿܰܒܼܢܰܝ ܡܕܼܺܝܢ̱ܬܳܐ ܥܰܡܳܗ܂
07:13 [ai]	ܚܙܳܗ ܕܶܝܢ ܝܶܫܽܘܥ܂ ܘܶܐܬܼܪܰܚܰܡ ܥܠܶܝܗ܂ ܘܶܐܡܰܪ ܠܳܗ܂ ܠܳܐ ܬܶܒܼܟܿܶܝܢ܂
07:14 [ai]	ܘܶܐܙܰܠ ܩܪܶܒܼ ܠܥܰܪܣܳܐ܂ ܘܗܳܢܽܘܢ ܕܰܫܩܺܝܠܺܝܢ ܗ̱ܘܰܘ ܠܶܗ ܩܳܡܘ܂ ܘܳܐܡܰܪ܂ ܥܠܰܝܡܳܐ܂ ܠܳܟܼ ܐܳܡܰܪ ܐ̱ܢܳܐ܂ ܩܽܘܡ܂
07:15 [ai]	ܘܺܝܬܼܶܒܼ ܗܰܘ ܡܺܝܬܼܳܐ܂ ܘܫܰܪܺܝ ܠܰܡܡܰܠܳܠܽܘ܂ ܘܝܰܗܒܶܗ ܠܶܐܡܶܗ܂
07:16 [ai]	ܘܶܐܚܕܿܰܬܼ ܕܶܚܠܬܼܳܐ ܠܐ̱ܢܳܫܳܐ̈ ܟܽܠܗܽܘܢ܂ ܘܰܡܫܰܒܿܚܺܝܢ ܗ̱ܘܰܘ ܠܰܐܠܳܗܳܐ܂ ܘܳܐܡܪܺܝܢ܂ ܕܰܢܒܼܺܝܳܐ ܪܰܒܿܳܐ܂ ܩܳܡ ܒܰܢ܃ ܘܰܣܥܰܪ ܐܰܠܳܗܳܐ ܠܥܰܡܶܗ܂
07:17 [ai]	ܘܢܶܦܼܩܰܬܼ ܥܠܰܘܗ̱ܝ ܡܶܠܬܼܳܐ ܗܳܕܼܶܐ܂ ܒܟܽܠܳܗ ܺܝܗܽܘܕܼ܂ ܘܰܒܟܼܽܠܶܗ ܐܰܬܼܪܳܐ ܕܿܰܚܕܼܳܪ̈ܰܝܗܽܘܢ܀
07:18 [ai]	ܘܶܐܫܬܿܰܥܺܝܘ ܠܝܽܘܚܰܢܳܢ ܬܰܠܡܺܝܕܼܰܘܗ̱ܝ̈ ܗܳܠܶܝܢ ܟܽܠܗܶܝܢ܂
07:19 [ai]	ܘܰܩܪܳܐ ܝܽܘܚܰܢܳܢ ܠܰܬܼܪ̈ܶܝܢ ܡܶܢ ܬܰܠܡܺܝܕܼܰܘܗ̱ܝ̈܃ ܘܫܰܕܿܰܪ ܐܶܢܽܘܢ ܠܘܳܬܼ ܝܶܫܽܘܥ܂ ܘܶܐܡܰܪ܂ ܐܰܢ̱ܬܿ ܗ̱ܽܘ ܗܰܘ ܕܳܐܬܼܶܐ܃ ܐܰܘ ܠܰܐ̱ܚܪܺܝܢ ܗ̱ܽܘ ܡܣܰܟܿܶܝܢ ܚ̱ܢܰܢ܂
07:20 [ai]	ܘܶܐܬܼܰܘ ܠܘܳܬܼ ܝܶܫܽܘܥ܂ ܘܳܐܡܪܺܝܢ ܠܶܗ܂ ܝܽܘܚܰܢܳܢ ܡܰܥܡܕܼܳܢܳܐ ܫܰܕܿܪܰܢ ܠܘܳܬܼܳܟܼ܂ ܘܳܐܡܰܪ܂ ܐܰܢ̱ܬܿ ܗ̱ܽܘ ܗܰܘ ܕܳܐܬܼܶܐ܃ ܐܰܘ ܠܰܐ̱ܚܪܺܝܢ ܗ̱ܽܘ ܡܣܰܟܿܶܝܢ ܚ̱ܢܰܢ܂
07:21 [ai]	ܒܿܳܗ ܕܶܝܢ ܒܗܳܝ ܫܳܥܬܼܳܐ܃ ܣܰܓܿܺܝܶܐܐ̈ ܐܰܣܺܝ ܡܶܢ ܟܿܽܘܪ̈ܗܳܢܶܐ܃ ܘܡܶܢ ܡܰܚܘܳܬܼܳܐ̈ ܘܡܶܢ ܪ̈ܽܘܚܶܐ ܒܺܝܫܳܬܼܳܐ̈܂ ܘܰܠܣܰܓܿܺܝܶܐܐ̈ ܣܡܰܝܳܐ̈ ܝܰܗ̱ܒܼ ܗ̱ܘܳܐ ܠܡܶܚܙܳܐ܂
07:22 [ai]	ܘܰܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܙܶܠܘ ܐܶܡܰܪܘ ܠܝܽܘܚܰܢܳܢ܂ ܟܽܠ ܡܶܕܶܡ ܕܰܚܙܰܝܬܿܽܘܢ܂ ܘܰܫܡܰܥܬܿܽܘܢ܂ ܕܰܣܡܰܝܳܐ̈܂ ܚܳܙܶܝܢ܂ ܘܰܚܓܼܺܝܪ̈ܶܐ܂ ܡܗܰܠܟܼܺܝܢ܂ ܘܓܼܰܪ̈ܒܿܶܐ܂ ܡܶܬܿܕܿܰܟܿܶܝܢ܂ ܘܚܰܪ̈ܫܶܐ܂ ܫܳܡܥܺܝܢ܂ ܘܡܺܝܬܼܶܐ̈܂ ܩܳܝܡܺܝܢ܂ ܘܡܶܣܟܿܺܢܶܐ̈܂ ܡܶܣܬܿܰܒܿܪܺܝܢ܂
07:23 [ai]	ܘܛܽܘܒܼܰܘܗ̱ܝ ܠܡܰܢ ܕܠܳܐ ܢܶܬܼܟܿܫܶܠ ܒܺܝ܀܀
07:24 [ai]	ܟܰܕܼ ܕܶܝܢ ܐܶܙܰܠܘ ܬܰܠܡܺܝܕܼܰܘܗ̱ܝ̈ ܕܝܽܘܚܰܢܳܢ܃ ܫܰܪܺܝ ܠܡܺܐܡܰܪ ܠܟܼܶܢܫܶܐ̈ ܥܰܠ ܝܽܘܚܰܢܳܢ܂ ܡܳܢܳܐ ܢܦܼܰܩܬܿܽܘܢ ܠܚܽܘܪܒܿܳܐ ܠܡܶܚܙܳܐ܂ ܩܰܢܝܳܐ܃ ܕܡܶܢ ܪܽܘܚܳܐ ܡܶܬܿܬܿܙܺܝܥ܂
07:25 [ai]	ܘܶܐܠܳܐ ܡܳܢܳܐ ܢܦܼܰܩܬܿܽܘܢ ܠܡܶܚܙܳܐ܂ ܓܰܒܼܪܳܐ܃ ܕܢܰܚܬܿܶܐ̈ ܪ̈ܰܟܿܺܝܟܼܶܐ ܠܒܼܺܝܫ܂ ܗܳܐ ܐܰܝܠܶܝܢ ܕܒܰܠܒܼܽܘܫܶܐ̈ ܡܫܰܒܿܚܶܐ̈ ܘܰܒܦܼܽܘܢܳܩܶܐ̈ ܐܺܝܬܼܰܝܗܽܘܢ܂ ܒܶܝܬܼ ܡܰܠܟܿܶܐ̈ ܐܶܢܽܘܢ܂
07:26 [ai]	ܘܶܐܠܳܐ ܡܳܢܳܐ ܢܦܼܰܩܬܿܽܘܢ ܠܡܶܚܙܳܐ܂ ܢܒܼܺܝܳܐ܃ ܐܺܝܢ܂ ܐܳܡܰܪ ܐ̱ܢܳܐ ܠܟܼܽܘܢ܂ ܘܝܰܬܿܺܝܪ ܡܶܢ ܢܒܼܺܝܶܐ̈܂
07:27 [ai]	ܗܳܢܰܘ ܕܰܥܠܰܘܗ̱ܝ ܟܬܼܺܝܒܼ܃ ܕܗܳܐ ܐܶܢܳܐ ܡܫܰܕܿܰܪ ܐ̱ܢܳܐ ܡܰܠܰܐܟܼܝ ܩܕܼܳܡ ܦܰܪܨܽܘܦܿܳܟܼ܃ ܕܢܰܬܼܩܶܢ ܐܽܘܪܚܳܐ ܩܕܼܳܡܰܝܟܿ܀
07:28 [ai]	ܐܳܡܰܪ ܐ̱ܢܳܐ ܠܟܼܽܘܢ܃ ܕܠܰܝܬܿ ܢܒܼܺܝܳܐ ܒܺܝܠܺܝܕܼܰܝ̈ ܢܶܫܶܐ̈ ܕܪܰܒܿ ܡܶܢ ܝܽܘܚܰܢܳܢ ܡܰܥܡܕܼܳܢܳܐ܂ ܙܥܽܘܪܳܐ ܕܶܝܢ ܒܡܰܠܟܿܽܘܬܼܳܐ ܕܰܐܠܳܗܳܐ܂ ܪܰܒܼ ܗ̱ܽܘ ܡܶܢܶܗ܀
07:29 [ai]	ܘܟܼܽܠܶܗ ܥܰܡܳܐ ܕܰܫܡܰܥܘ܂ ܐܳܦܼ ܡܳܟܼܣܶܐ̈܃ ܙܰܕܿܶܩܘ ܠܰܐܠܳܗܳܐ܃ ܕܰܥܡܰܕܼܘ ܡܰܥܡܽܘܕܼܺܝܬܼܶܗ ܕܝܽܘܚܰܢܳܢ܂
07:30 [ai]	ܦܿܪ̈ܺܝܫܶܐ ܕܶܝܢ ܘܣܳܦܼܪ̈ܶܐ܃ ܛܠܰܡܘ ܒܢܰܦܼܫܗܽܘܢ ܨܶܒܼܝܳܢܳܐ ܕܰܐܠܳܗܳܐ܃ ܕܠܳܐ ܐܶܬܼܥܡܶܕܼܘ ܡܶܢܶܗ܀
07:31 [ai]	ܠܡܰܢ ܗܳܟܼܺܝܠ ܐܶܕܼܰܡܶܐ ܠܐ̱ܢܳܫܳܐ̈ ܕܫܰܪܒܿܬܼܳܐ ܗܳܕܼܶܐ܃ ܘܰܠܡܰܢ ܕܳܡܶܝܢ܂
07:32 [ai]	ܕܳܡܶܝܢ ܠܰܛܠܳܝܶܐ̈ ܕܿܝܳܬܼܒܺܝܢ ܒܫܽܘܩܳܐ܃ ܘܩܳܥܶܝܢ ܠܚܰܒܼܪ̈ܰܝܗܽܘܢ܂ ܘܳܐܡܪܺܝܢ܂ ܙܡܰܪܢ ܠܟܼܽܘܢ܂ ܘܠܳܐ ܪܰܩܶܕܼܬܿܽܘܢ܂ ܘܶܐܠܰܝܢ ܠܟܼܽܘܢ܂ ܘܠܳܐ ܒܟܰܝܬܿܽܘܢ܂
07:33 [ai]	ܐܶܬܼܳܐ ܓܶܝܪ ܝܽܘܚܰܢܳܢ ܡܰܥܡܕܼܳܢܳܐ܃ ܠܳܐ ܐܳܟܼܶܠ ܠܰܚܡܳܐ܂ ܘܠܳܐ ܫܳܬܼܶܐ ܚܰܡܪܳܐ܃ ܘܳܐܡܪܺܝܢ ܐܢ̱ܬܿܽܘܢ܂ ܫܺܐܕܼܳܐ ܐܺܝܬܼ ܒܶܗ܂
07:34 [ai]	ܐܶܬܼܳܐ ܒܪܶܗ ܕܐ̱ܢܳܫܳܐ܂ ܐܳܟܼܶܠ ܘܫܳܬܼܶܐ܃ ܘܳܐܡܪܺܝܢ ܐܢ̱ܬܿܽܘܢ܂ ܗܳܐ ܓܰܒܼܪܳܐ ܐܳܟܽܘܠܳܐ܂ ܘܫܳܬܼܶܐ ܚܰܡܪܳܐ܃ ܘܪܳܚܡܳܐ ܕܡܳܟܼܣܶܐ̈܂ ܘܰܕܼܚܰܛܳܝܶܐ̈܂
07:35 [ai]	ܘܶܐܙܕܿܰܕܿܩܰܬܼ ܚܶܟܼܡܬܼܳܐ܂ ܡܶܢ ܟܽܠܗܽܘܢ ܒܢܶܝܗ܀
07:36 [ai]	ܐܶܬܼܳܐ ܕܶܝܢ ܒܥܳܐ ܡܶܢܶܗ ܚܰܕܼ ܡܶܢ ܦܿܪ̈ܺܝܫܶܐ܂ ܕܢܶܠܥܰܣ ܥܰܡܶܗ܂ ܘܥܰܠ ܠܒܼܰܝܬܿܶܗ ܕܰܦܼܪܺܝܫܳܐ ܗܰܘ܂ ܘܶܐܣܬܿܡܶܟܼ܂
07:37 [ai]	ܘܰܐܢ̱ܬܿܬܼܳܐ ܚܰܛܳܝܬܳܐ ܐܺܝܬܼ ܗ̱ܘܳܬܼ ܒܰܡܕܼܺܝܢ̱ܬܳܐ ܗܳܝ܂ ܘܟܼܰܕܼ ܝܶܕܼܥܰܬܼ ܕܰܒܼܒܼܰܝܬܿܶܗ ܕܰܦܼܪܺܝܫܳܐ ܗܰܘ ܣܡܺܝܟܼ܃ ܢܶܣܒܿܰܬܼ ܫܳܛܺܝܦܼܬܳܐ ܕܒܶܣܡܳܐ܂
07:38 [ai]	ܘܩܳܡܰܬܼ ܒܶܣܬܿܪܶܗ ܠܘܳܬܼ ܪ̈ܶܓܼܠܰܘܗ̱ܝ܂ ܘܒܼܳܟܼܝܳܐ ܗ̱ܘܳܬܼ܂ ܘܫܰܪܝܰܬܼ ܒܕܶܡܥܶܝܗ̈ ܡܨܰܒܥܳܐ ܪ̈ܶܓܼܠܰܘܗ̱ܝ܂ ܘܰܒܣܰܥܪܳܐ ܕܪܺܫܳܗ ܡܫܰܘܶܝܢ ܠܗܶܝܢ܂ ܘܰܡܢܰܫܩܳܐ ܗ̱ܘܳܬܼ ܪ̈ܶܓܼܠܰܘܗ̱ܝ܂ ܘܡܳܫܚܳܐ ܒܶܣܡܳܐ܀
07:39 [ai]	ܟܰܕܼ ܚܙܳܐ ܕܶܝܢ ܦܪܺܝܫܳܐ ܗܰܘ ܕܰܩܪܳܝܗ̱ܝ܃ ܐܶܬܼܚܰܫܰܒܼ ܒܢܰܦܼܫܶܗ܂ ܘܶܐܡܰܪ܂ ܗܳܢܳܐ ܐܶܠܽܘ ܢܒܼܺܝܳܐ ܗܘܳܐ܃ ܝܳܕܼܰܥ ܗ̱ܘܳܐ ܡܰܢ ܗ̱ܺܝ܂ ܘܡܳܐ ܛܶܒܿܳܗ܂ ܕܚܰܛܳܝܬܳܐ ܗ̱ܝ܂ ܐܰܢ̱ܬܿܬܼܳܐ ܗܳܝ ܕܩܶܪܒܿܰܬܼ ܠܶܗ܂
07:40 [ai]	ܥܢܳܐ ܕܶܝܢ ܝܶܫܽܘܥ܂ ܘܶܐܡܰܪ ܠܶܗ܂ ܫܶܡܥܽܘܢ܂ ܡܶܕܶܡ ܐܺܝܬܼ ܠܺܝ ܕܺܐܡܰܪ ܠܳܟܼ܂ ܗܽܘ ܕܶܝܢ ܐܶܡܰܪ ܠܶܗ܂ ܐܶܡܰܪ ܪܰܒܺܝ܃ ܐܳܡܰܪ ܠܶܗ ܝܶܫܽܘܥ܂
07:41 [ai]	ܬܿܪ̈ܶܝܢ ܚܰܝܳܒܼܶܐ̈ ܐܺܝܬܼ ܗ̱ܘܰܘ܂ ܠܚܰܕܼ ܡܳܪܶܐ ܚܰܘܒܿܳܐ܂ ܚܰܕܼ ܚܰܝܳܒܼ ܗ̱ܘܳܐ ܕܺܝܢܳܪ̈ܶܐ ܚܰܡܶܫܡܳܐܐ܂ ܘܰܐ̱ܚܪܺܢܳܐ܂ ܕܺܝܢܳܪ̈ܶܐ ܚܰܡܫܺܝܢ܂
07:42 [ai]	ܘܰܕܼܠܰܝܬܿ ܗ̱ܘܳܐ ܠܗܽܘܢ ܠܡܶܦܼܪܰܥ܂ ܠܰܬܼܪ̈ܰܝܗܽܘܢ ܫܒܼܰܩ܂ ܐܰܝܢܳܐ ܗܳܟܼܺܝܠ ܡܶܢܗܽܘܢ ܝܰܬܿܺܝܪ ܢܰܚܒܼܺܝܘܗ̱ܝ܂
07:43 [ai]	ܥܢܳܐ ܫܶܡܥܽܘܢ܂ ܘܶܐܡܰܪ܂ ܣܳܒܼܰܪ ܐ̱ܢܳܐ܂ ܕܗܰܘ ܕܶܐܫܬܿܒܼܶܩ ܠܶܗ ܣܰܓܿܺܝ܂ ܐܳܡܰܪ ܠܶܗ ܝܶܫܽܘܥ܃ ܬܪܺܝܨܳܐܺܝܬܼ ܕܳܢܬܿ܂
07:44 [ai]	ܘܶܐܬܼܦܿܢܺܝ ܠܘܳܬܼ ܗܳܝ ܐܰܢ̱ܬܿܬܼܳܐ܂ ܘܶܐܡܰܪ ܠܫܶܡܥܽܘܢ܂ ܚܳܙܶܐ ܐܰܢ̱ܬܿ ܐܰܢ̱ܬܿܬܼܳܐ ܗܳܕܼܶܐ܃ ܠܒܼܰܝܬܿܳܟܼ ܥܶܠܶܬܼ܂ ܡܰܝܳܐ̈ ܠܪ̈ܶܓܼܠܰܝ ܠܳܐ ܝܰܗ̱ܒܼܬܿ܂ ܗܳܕܼܶܐ ܕܶܝܢ ܒܕܶܡܥܶܝܗ̈ ܪ̈ܶܓܼܠܰܝ ܨܰܒܼܥܰܬܼ܂ ܘܰܒܣܰܥܪܳܗ ܫܰܘܝܰܬܼ ܐܶܢܶܝܢ̈܂
07:45 [ai]	ܐܰܢ̱ܬܿ ܠܳܐ ܢܫܰܩܬܿܳܢܝ܂ ܗܳܕܼܶܐ ܕܶܝܢ ܗܳܐ ܡܶܢ ܕܥܶܠܰܬܼ܃ ܠܳܐ ܫܶܠܝܰܬܼ ܪ̈ܶܓܼܠܰܝ ܠܰܡܢܰܫܳܩܽܘ܂
07:46 [ai]	ܐܰܢ̱ܬܿ ܡܶܫܚܳܐ ܠܪܺܫܝ ܠܳܐ ܡܫܰܚܬܿ܂ ܗܳܕܼܶܐ ܕܶܝܢ ܒܡܶܫܚܳܐ ܕܒܶܣܡܳܐ܂ ܪ̈ܶܓܼܠܰܝ ܡܶܫܚܰܬܼ܂
07:47 [ai]	ܚܠܳܦܼ ܗܳܕܼܶܐ ܐܳܡܰܪ ܐ̱ܢܳܐ ܠܳܟܼ܃ ܕܰܫܒܼܺܝܩܺܝܢ ܠܳܗ ܚܛܳܗܶܝܗ̈ ܣܰܓܿܺܝܶܐܐ̈܃ ܡܶܛܽܠ ܕܰܐܚܒܼܰܬܼ ܣܰܓܿܺܝ܂ ܗܰܘ ܕܶܝܢ ܕܩܰܠܺܝܠ ܡܶܫܬܿܒܼܶܩ ܠܶܗ܂ ܩܰܠܺܝܠ ܡܰܚܶܒܼ܀
07:48 [ai]	ܘܶܐܡܰܪ ܠܗܳܝ ܐܰܢ̱ܬܿܬܼܳܐ܂ ܫܒܼܺܝܩܺܝܢ ܠܶܟܼܝ ܚܛܳܗܰܝܟܿܝ̈܂
07:49 [ai]	ܫܰܪܺܝܘ ܕܶܝܢ ܗܳܢܽܘܢ ܕܰܣܡܺܝܟܼܺܝܢ ܐܳܡܪܺܝܢ ܒܢܰܦܼܫܗܽܘܢ܂ ܡܰܢܽܘ ܗܳܢܳܐ ܕܳܐܦܼ ܚܛܳܗܶܐ̈ ܫܳܒܼܶܩ܂
07:50 [ai]	ܝܶܫܽܘܥ ܕܶܝܢ ܐܶܡܰܪ ܠܗܳܝ ܐܰܢ̱ܬܿܬܼܳܐ܂ ܗܰܝܡܳܢܽܘܬܼܶܟܼܝ ܐܰܚܝܰܬܼܶܟܼܝ܂ ܙܶܠܝ ܒܰܫܠܳܡܳܐ܀

next chapter