The Comprehensive Aramaic Lexicon

09:01 [ai]	ܘܰܩܪܳܐ ܝܶܫܽܘܥ ܠܰܬܼܪܶܥܣܰܪܬܿܶܗ܃ ܘܝܰܗ̱ܒܼ ܠܗܽܘܢ ܚܰܝܠܳܐ ܘܫܽܘܠܛܳܢܳܐ܃ ܥܰܠ ܟܽܠܗܽܘܢ ܫܺܐܕܼܶܐ̈ ܘܟܼܽܘܪ̈ܗܳܢܶܐ܂ ܠܡܰܐܣܳܝܽܘ܂
09:02 [ai]	ܘܫܰܕܿܰܪ ܐܶܢܽܘܢ܂ ܠܡܰܟܼܪܳܙܽܘ ܡܰܠܟܿܽܘܬܼܶܗ ܕܰܐܠܳܗܳܐ܂ ܘܰܠܡܰܐܣܳܝܽܘ ܟܿܪ̈ܺܝܗܶܐ܀
09:03 [ai]	ܘܶܐܡܰܪ ܠܗܽܘܢ܂ ܡܶܕܶܡ ܠܳܐ ܬܶܫܩܠܽܘܢ ܠܽܐܘܪܚܳܐ܂ ܠܳܐ ܫܰܒܼܛܳܐ܂ ܘܠܳܐ ܬܰܪܡܳܠܳܐ܂ ܘܠܳܐ ܠܰܚܡܳܐ܂ ܘܠܳܐ ܟܶܣܦܿܳܐ܂ ܘܠܳܐ ܬܿܰܪ̈ܬܿܶܝܢ ܟܽܘܬܿܺܝܢܝܳܢ̈ ܢܶܗܘܝܳܢ̈ ܠܟܼܽܘܢ܂
09:04 [ai]	ܘܠܰܐܝܢܳܐ ܒܰܝܬܳܐ܂ ܕܥܳܐܠܺܝܢ ܐܢ̱ܬܿܽܘܢ ܠܶܗ܃ ܬܰܡܳܢ ܗܘܰܘ܂ ܘܡܶܢ ܬܰܡܳܢ ܦܽܘܩܘ܂
09:05 [ai]	ܘܰܠܡܰܢ ܕܠܳܐ ܡܩܰܒܿܠܺܝܢ ܠܟܼܽܘܢ܃ ܡܳܐ ܕܢܳܦܼܩܺܝܢ ܐܢ̱ܬܿܽܘܢ ܡܶܢ ܡܕܼܺܝܢ̱ܬܳܐ ܗܳܝ܃ ܐܳܦܼ ܚܶܠܳܐ ܡܶܢ ܪ̈ܶܓܼܠܰܝܟܿܽܘܢ܂ ܦܶܨܘ ܥܠܰܝܗܽܘܢ ܠܣܳܗܕܿܽܘܬܼܳܐ܀
09:06 [ai]	ܘܰܢܦܼܰܩܘ ܫܠܺܝܚܶܐ̈܂ ܘܡܶܬܼܟܰܪܟܿܺܝܢ ܗ̱ܘܰܘ ܒܩܽܘܪ̈ܝܳܐ ܘܒܼܰܡܕܼܺܝܢܳܬܼܳܐ̈܃ ܘܰܡܣܰܒܿܪܺܝܢ ܗ̱ܘܰܘ܂ ܘܡܰܐܣܶܝܢ ܒܟܽܠ ܕܽܘܟܿ܀
09:07 [ai]	ܫܡܰܥ ܕܶܝܢ ܗܶܪܳܘܕܼܶܣ ܛܶܛܪܰܪܟܼܰܐ ܟܽܠܗܶܝܢ ܕܗܳܘܝܳܢ̈ ܗ̱ܘܰܝ̈ ܒܺܐܝܕܼܶܗ܂ ܘܡܶܬܿܕܰܡܰܪ ܗ̱ܘܳܐ܂ ܡܶܛܽܠ ܕܳܐܡܪܺܝܢ ܗ̱ܘܰܘ ܐ̱ܢܳܫܺܝܢ̈܃ ܕܝܽܘܚܰܢܳܢ ܩܳܡ ܡܶܢ ܒܶܝܬܼ ܡܺܝܬܼܶܐ̈܂
09:08 [ai]	ܐ̱ܚܪ̈ܳܢܶܐ ܕܶܝܢ ܐܳܡܪܺܝܢ ܗ̱ܘܰܘ܂ ܕܺܐܠܺܝܳܐ ܐܶܬܼܚܙܺܝ܂ ܘܰܐ̱ܚܪ̈ܳܢܶܐ܂ ܕܰܢܒܼܺܝܳܐ ܡܶܢ ܢܒܼܺܝܶܐ̈ ܩܰܕܼܡܳܝ̈ܶܐ܂ ܩܳܡ܂
09:09 [ai]	ܘܶܐܡܰܪ ܗܶܪܳܘܕܼܶܣ܂ ܪܺܫܶܗ ܕܝܽܘܚܰܢܳܢ܂ ܐܶܢܳܐ ܦܶܣܩܶܬܼ܂ ܡܰܢܽܘ ܕܶܝܢ ܗܳܢܳܐ܂ ܕܗܳܠܶܝܢ ܫܳܡܰܥ ܐ̱ܢܳܐ ܥܠܰܘܗ̱ܝ܂ ܘܨܳܒܼܶܐ ܗ̱ܘܳܐ ܕܢܶܚܙܶܝܘܗ̱ܝ܀܀
09:10 [ai]	ܘܟܼܰܕܼ ܗܦܼܰܟܼܘ ܫܠܺܝܚܶܐ̈܃ ܐܶܫܬܿܰܥܺܝܘ ܠܝܶܫܽܘܥ ܟܽܠܡܶܕܶܡ ܕܰܥܒܼܰܕܼܘ܂ ܘܰܕܼܒܼܰܪ ܐܶܢܽܘܢ ܒܰܠܚܽܘܕܼܰܝܗܽܘܢ܂ ܠܰܐܬܼܪܳܐ ܚܽܘܪܒܿܳܐ ܕܒܼܶܝܬܼ ܨܰܝܳܕܿܳܐ܀
09:11 [ai]	ܟܶܢܫܶܐ̈ ܕܶܝܢ ܟܰܕܼ ܺܝܕܼܰܥܘ܂ ܐܶܙܰܠܘ ܒܳܬܼܪܶܗ܂ ܘܩܰܒܿܶܠ ܐܶܢܽܘܢ܂ ܘܰܡܡܰܠܶܠ ܗ̱ܘܳܐ ܥܰܡܗܽܘܢ ܥܰܠ ܡܰܠܟܿܽܘܬܼܳܐ ܕܰܐܠܳܗܳܐ܂ ܘܠܰܐܝܠܶܝܢ ܕܰܣܢܺܝܩܺܝܢ ܗ̱ܘܰܘ ܥܰܠ ܐܳܣܝܽܘܬܼܳܐ܂ ܡܰܐܣܶܐ ܗ̱ܘܳܐ܀
09:12 [ai]	ܟܰܕܼ ܕܶܝܢ ܫܪܺܝ ܝܰܘܡܳܐ ܠܡܶܨܠܳܐ܃ ܩܪܶܒܼܘ ܬܰܠܡܺܝܕܼܰܘܗ̱ܝ̈܂ ܘܳܐܡܪܺܝܢ ܠܶܗ܂ ܫܪܺܝ ܠܟܼܶܢܫܶܐ̈܂ ܕܢܺܐܙܽܠ̱ܘܢ ܠܩܽܘܪ̈ܝܳܐ ܕܰܚܕܼܳܪܰܝܢ ܘܰܠܟܼܰܦܼܪ̈ܽܘܢܶܐ܂ ܕܢܶܫܪܽܘܢ ܒܗܽܘܢ܃ ܘܢܶܫܟܿܚܽܘܢ ܠܗܽܘܢ ܣܰܝܒܿܳܪܬܳܐ܂ ܡܶܛܽܠ ܕܒܰܐܬܼܪܳܐ ܚܽܘܪܒܿܳܐ ܐܺܝܬܼܰܝܢ܂
09:13 [ai]	ܐܳܡܰܪ ܠܗܽܘܢ ܝܶܫܽܘܥ܂ ܗܰܒܼܘ ܠܗܽܘܢ ܐܰܢ̱ܬܿܽܘܢ ܠܡܶܐܟܼܰܠ܂ ܗܶܢܽܘܢ ܕܶܝܢ ܐܳܡܪܺܝܢ܂ ܠܰܝܬܿ ܠܰܢ ܝܰܬܿܺܝܪ ܡܶܢ ܚܰܡܫܳܐ ܠܰܚܡܺܝܢ̈ ܘܰܬܼܪ̈ܶܝܢ ܢܽܘܢܺܝܢ̈܃ ܐܶܠܳܐ ܐܶܢ ܐܶܙܰܠܢܰܢ ܘܰܙܒܼܰܢܰܢ ܣܰܝܒܿܳܪܬܳܐ܂ ܠܗܳܢܳܐ ܟܽܠܶܗ ܥܰܡܳܐ܂
09:14 [ai]	ܗܳܘܶܝܢ ܗ̱ܘܰܘ ܓܶܝܪ ܐܰܝܟܼ ܚܰܡܫܳܐ ܐܰܠܦܼܺܝܢ̈ ܓܿܰܒܼܪ̈ܺܝܢ܂ ܐܳܡܰܪ ܠܗܽܘܢ ܝܶܫܽܘܥ܂ ܐܰܣܡܶܟܼܘ ܐܶܢܽܘܢ ܣܡܳܟܼܶܐ̈܃ ܚܰܡܫܺܝܢ ܐ̱ܢܳܫܺܝܢ̈ ܒܰܣܡܳܟܼܳܐ܂
09:15 [ai]	ܘܰܥܒܼܰܕܼܘ ܗܳܟܼܘܳܬܼ ܬܰܠܡܺܝܕܼܶܐ̈܃ ܘܰܐܣܡܶܟܼܘ ܠܟܼܽܠܗܽܘܢ܂
09:16 [ai]	ܘܰܢܣܰܒܼ ܝܶܫܽܘܥ ܗܳܢܽܘܢ ܚܰܡܫܳܐ ܠܰܚܡܺܝܢ̈ ܘܰܬܼܪ̈ܶܝܢ ܢܽܘܢܺܝܢ̈܂ ܘܚܳܪ ܒܰܫܡܰܝܳܐ܂ ܘܒܼܰܪܶܟܼ ܘܰܩܨܳܐ ܘܝܰܗ̱ܒܼ ܠܬܼܰܠܡܺܝܕܼܰܘܗ̱ܝ̈܂ ܕܰܢܣܺܝܡܽܘܢ ܠܟܼܶܢܫܶܐ̈܂
09:17 [ai]	ܘܶܐܟܼܰܠܘ ܟܽܠܗܽܘܢ ܘܰܣܒܼܰܥܘ܂ ܘܰܫܩܰܠܘ ܩܨܳܝܶܐ̈ ܡܶܕܶܡ ܕܰܐܘܬܿܰܪܘ܂ ܬܿܪ̈ܶܥܣܰܪ ܩܽܘܦܼܺܝܢܺܝܢ̈܀܀
09:18 [ai]	ܘܟܼܰܕܼ ܡܨܰܠܶܐ ܒܰܠܚܽܘܕܼܰܘܗ̱ܝ܂ ܘܬܼܰܠܡܺܝܕܼܰܘܗ̱ܝ̈ ܥܰܡܶܗ܃ ܫܰܐܶܠ ܐܶܢܽܘܢ ܘܶܐܡܰܪ܂ ܡܰܢܽܘ ܐܳܡܪܺܝܢ ܥܠܰܝ ܟܶܢܫܶܐ̈ ܕܺܐܝܬܼܰܝ܂
09:19 [ai]	ܥܢܰܘ ܘܳܐܡܪܺܝܢ ܠܶܗ܂ ܕܝܽܘܚܰܢܳܢ ܡܰܥܡܕܼܳܢܳܐ܂ ܘܰܐ̱ܚܪ̈ܳܢܶܐ܂ ܕܺܐܠܺܝܳܐ܂ ܐ̱ܚܪ̈ܳܢܶܐ ܕܶܝܢ܂ ܕܰܢܒܼܺܝܳܐ ܚܰܕܼ ܡܶܢ ܢܒܼܺܝܶܐ̈ ܩܰܕܼܡܳܝ̈ܶܐ ܩܳܡ܂
09:20 [ai]	ܐܳܡܰܪ ܠܗܽܘܢ܂ ܐܰܢ̱ܬܿܽܘܢ ܕܶܝܢ܂ ܡܰܢܽܘ ܐܳܡܪܺܝܢ ܐܢ̱ܬܿܽܘܢ ܕܺܐܝܬܼܰܝ܂ ܥܢܳܐ ܫܶܡܥܽܘܢ܂ ܘܶܐܡܰܪ܂ ܡܫܺܝܚܶܗ ܕܰܐܠܳܗܳܐ܀
09:21 [ai]	ܗܽܘ ܕܶܝܢ ܟܐܳܐ ܒܗܽܘܢ܂ ܘܙܰܗܰܪ ܐܶܢܽܘܢ܃ ܕܗܳܕܼܶܐ ܠܐ̱ܢܳܫ܂ ܠܳܐ ܢܺܐܡܪܽܘܢ܂
09:22 [ai]	ܘܶܐܡܰܪ ܠܗܽܘܢ܂ ܕܰܥܬܼܺܝܕܼ ܗ̱ܽܘ ܒܪܶܗ ܕܐ̱ܢܳܫܳܐ ܕܣܰܓܿܺܝܳܐܬܼܳܐ̈ ܢܶܚܰܫ܂ ܘܰܕܼܢܶܣܬܠܶܐ܂ ܡܶܢ ܩܰܫܺܝܫܶܐ̈ ܘܪ̈ܰܒܰܝ ܟܳܗܢܶܐ̈ ܘܣܳܦܼܪ̈ܶܐ܂ ܘܢܶܩܛܠܽܘܢܳܝܗ̱ܝ܂ ܘܰܠܝܰܘܡܳܐ ܕܰܬܼܠܳܬܼܳܐ܂ ܢܩܽܘܡ܀
09:23 [ai]	ܘܳܐܡܰܪ ܗ̱ܘܳܐ ܩܕܼܳܡ ܟܽܠܢܳܫ܂ ܡܰܢ ܕܨܳܒܼܶܐ ܕܢܺܐܬܼܶܐ ܒܳܬܼܰܪܝ܃ ܢܶܟܼܦܿܽܘܪ ܒܢܰܦܼܫܶܗ܂ ܘܢܶܫܩܽܘܠ ܙܩܺܝܦܼܶܗ ܟܽܠܝܽܘܡ܂ ܘܢܺܐܬܼܶܐ ܒܳܬܼܰܪܝ܂
09:24 [ai]	ܡܰܢ ܓܶܝܪ ܕܨܳܒܼܶܐ ܕܢܰܦܼܫܶܗ ܢܰܚܶܐ܂ ܡܰܘܒܿܶܕܼ ܠܳܗ܂ ܡܰܢ ܕܶܝܢ ܕܢܰܘܒܿܶܕܼ ܢܰܦܼܫܶܗ ܡܶܛܽܠܳܬܼܝ܃ ܗܳܢܳܐ ܡܰܚܶܐ ܠܳܗ܂
09:25 [ai]	ܡܳܢܳܐ ܓܶܝܪ ܢܶܬܼܥܰܕܿܰܪ ܒܰܪ ܐ̱ܢܳܫܳܐ܂ ܕܢܺܐܬܼܰܪ ܥܳܠܡܳܐ ܟܽܠܶܗ܃ ܢܰܦܼܫܶܗ ܕܶܝܢ ܢܰܘܒܿܶܕܼ܂ ܐܰܘ ܢܶܚܣܰܪ܂
09:26 [ai]	ܡܰܢ ܕܢܶܒܼܗܰܬܼ ܒܺܝ ܕܶܝܢ ܘܰܒܡܶܠܰܝ̈܃ ܢܶܒܼܗܰܬܼ ܒܶܗ ܒܪܶܗ ܕܐ̱ܢܳܫܳܐ܃ ܡܳܐ ܕܳܐܬܼܶܐ ܒܫܽܘܒܼܚܳܐ ܕܰܐܒܼܽܘܗ̱ܝ܂ ܥܰܡ ܡܰܠܰܐܟܼܰܘܗ̱ܝ̈ ܩܰܕܿܺܝܫܶܐ̈܀
09:27 [ai]	ܫܪܳܪܳܐ ܐܳܡܰܪ ܐ̱ܢܳܐ ܠܟܼܽܘܢ܂ ܕܺܐܝܬܼ ܐ̱ܢܳܫܳܐ ܕܩܳܝܡܺܝܢ ܗܳܪܟܿܳܐ܃ ܕܠܳܐ ܢܶܛܥܡܽܘܢ ܡܰܘܬܳܐ܃ ܥܕܼܰܡܳܐ ܕܢܶܚܙܽܘܢ ܡܰܠܟܿܽܘܬܼܶܗ ܕܰܐܠܳܗܳܐ܀
09:28 [ai]	ܗܘܳܐ ܕܶܝܢ ܒܳܬܼܰܪ ܡܶܠܶܐ̈ ܗܳܠܶܝܢ܂ ܐܰܝܟܼ ܬܡܳܢܝܳܐ ܝܰܘܡܺܝܢ̈܃ ܕܒܰܪ ܝܶܫܽܘܥ ܠܫܶܡܥܽܘܢ ܘܰܠܝܰܥܩܽܘܒܼ ܘܰܠܝܽܘܚܰܢܳܢ܂ ܘܰܣܠܶܩ ܠܛܽܘܪܳܐ ܠܰܡܨܰܠܳܝܽܘ܂
09:29 [ai]	ܘܟܼܰܕܼ ܗܽܘ ܡܨܰܠܶܐ܃ ܐܶܬܼܚܰܠܰܦܼ ܚܶܙܘܳܐ ܕܰܐܦܿܰܘܗ̱ܝ̈܂ ܘܢܰܚܬܰܘܗ̱ܝ̈ ܚܘܰܪܘ܂ ܘܡܰܒܼܪܩܺܝܢ ܗ̱ܘܰܘ܂
09:30 [ai]	ܘܗܳܐ ܬܿܪ̈ܶܝܢ ܓܿܰܒܼܪ̈ܺܝܢ ܡܡܰܠܠܺܝܢ ܗ̱ܘܰܘ ܥܰܡܶܗ܂ ܕܺܐܝܬܼܰܝܗܽܘܢ܂ ܡܽܘܫܶܐ ܘܺܐܠܺܝܳܐ܂
09:31 [ai]	ܕܶܐܬܼܚܙܺܝܘ ܒܬܶܫܒܿܽܘܚܬܳܐ܂ ܐܳܡܪܺܝܢ ܗ̱ܘܰܘ ܕܶܝܢ ܥܰܠ ܡܰܦܿܩܳܢܶܗ܃ ܕܰܥܬܼܺܝܕܼ ܗ̱ܘܳܐ ܕܢܶܫܬܿܰܠܰܡ ܒܽܐܘܪܺܫܠܶܡ܂
09:32 [ai]	ܘܺܝܩܰܪܘ ܗ̱ܘܰܘ ܠܗܽܘܢ ܒܫܶܢܬܼܳܐ ܫܶܡܥܽܘܢ ܘܗܳܢܽܘܢ ܕܥܰܡܶܗ܂ ܘܰܠܡܰܚܣܶܢ ܐܶܬܿܬܿܥܺܝܪܘ܂ ܘܰܚܙܰܘ ܫܽܘܒܼܚܶܗ܃ ܘܰܠܗܳܢܽܘܢ ܬܿܪ̈ܶܝܢ ܐ̱ܢܳܫܺܝܢ̈ ܕܩܳܝܡܺܝܢ ܗ̱ܘܰܘ ܠܘܳܬܼܶܗ ܿ܀ܿ܀ܿ
09:33 [ai]	ܘܟܼܰܕܼ ܫܰܪܺܝܘ ܠܡܶܦܼܪܰܫ ܡܶܢܶܗ܃ ܐܶܡܰܪ ܫܶܡܥܽܘܢ ܠܝܶܫܽܘܥ܂ ܪܰܒܺܝ܃ ܫܰܦܿܺܝܪ ܗ̱ܽܘ ܠܰܢ ܕܗܳܪܟܿܳܐ ܢܶܗܘܶܐ܂ ܘܢܶܥܒܿܶܕܼ ܬܠܳܬܼ ܡܰܛܠܺܝܢ̈܂ ܠܳܟܼ ܚܕܼܳܐ܂ ܘܰܠܡܽܘܫܶܐ ܚܕܼܳܐ܂ ܘܠܺܐܠܺܝܳܐ ܚܕܼܳܐ܂ ܘܠܳܐ ܝܳܕܼܰܥ ܗ̱ܘܳܐ ܡܳܢܳܐ ܐܳܡܰܪ܂
09:34 [ai]	ܘܟܼܰܕܼ ܐܳܡܰܪ ܗܳܠܶܝܢ܃ ܗܘܳܬܼ ܥܢܳܢܳܐ ܘܰܐܛܠܰܬܼ ܥܠܰܝܗܽܘܢ܂ ܘܰܕܼܚܶܠܘ ܟܰܕܼ ܚܙܰܘ ܠܡܽܘܫܶܐ ܘܠܺܐܠܺܝܳܐ ܕܥܰܠܘ ܒܰܥܢܳܢܳܐ܂
09:35 [ai]	ܘܩܳܠܳܐ ܗܘܳܐ ܡܶܢ ܥܢܳܢܳܐ ܕܳܐܡܰܪ܃ ܗܳܢܰܘ ܒܶܪܝ ܚܰܒܺܝܒܼܳܐ܂ ܠܶܗ ܫܡܰܥܘ܂
09:36 [ai]	ܘܟܼܰܕܼ ܗܘܳܐ ܩܳܠܳܐ܃ ܐܶܫܬܿܟܼܰܚ ܝܶܫܽܘܥ ܒܰܠܚܽܘܕܼܰܘܗ̱ܝ܂ ܘܗܶܢܽܘܢ ܫܬܼܶܩܘ܂ ܘܰܠܐ̱ܢܳܫ ܠܳܐ ܐܶܡܰܪܘ ܒܗܳܢܽܘܢ ܝܰܘܡܳܬܼܳܐ̈ ܡܶܕܶܡ ܕܰܚܙܰܘ܀
09:37 [ai]	ܘܰܗܘܳܐ ܠܝܰܘܡܳܐ ܕܒܳܬܼܪܶܗ܂ ܟܰܕܼ ܢܳܚܬܿܺܝܢ ܡܶܢ ܛܽܘܪܳܐ܃ ܦܓܼܰܥ ܒܗܽܘܢ ܟܶܢܫܳܐ ܣܰܓܿܺܝܳܐܐ܀
09:38 [ai]	ܘܓܼܰܒܼܪܳܐ ܚܰܕܼ ܡܶܢ ܟܶܢܫܳܐ ܗܰܘ ܩܥܳܐ܂ ܘܶܐܡܰܪ܂ ܡܰܠܦܼܳܢܳܐ܂ ܒܿܳܥܶܐ ܐ̱ܢܳܐ ܡܶܢܳܟܼ ܐܶܬܼܦܿܰܢܝ ܥܠܰܝ܂ ܒܶܪܝ ܕܺܝܚܺܝܕܼܳܝܳܐ ܗ̱ܘ ܠܺܝ܂
09:39 [ai]	ܘܪܽܘܚܳܐ ܥܳܕܼܝܳܐ ܥܠܰܘܗ̱ܝ܂ ܘܡܶܢ ܫܶܠܝܳܐ ܩܳܥܶܐ܂ ܘܰܡܚܰܪܶܩ ܫܶܢܰܘܗ̱ܝ̈܂ ܘܡܰܪܥܶܬܼ܂ ܘܰܠܡܰܚܣܶܢ ܦܳܪܩܳܐ ܡܶܢܶܗ܂ ܡܳܐ ܕܰܫܚܰܩܬܼܶܗ܂
09:40 [ai]	ܘܰܒܥܺܝܬܼ ܡܶܢ ܬܰܠܡܺܝܕܼܰܝܟܿ̈ ܕܢܰܦܿܩܽܘܢܳܝܗ̱ܝ܂ ܘܠܳܐ ܐܶܫܟܿܰܚܘ܂
09:41 [ai]	ܥܢܳܐ ܕܶܝܢ ܝܶܫܽܘܥ܂ ܘܶܐܡܰܪ܂ ܐܽܘܢ ܫܰܪܒܿܬܼܳܐ ܕܠܳܐ ܡܗܰܝܡܢܳܐ ܘܰܡܥܰܩܰܠܬܳܐ܃ ܥܕܼܰܡܳܐ ܠܶܐܡܰܬܼܝ ܐܶܗܘܶܐ ܠܘܳܬܼܟܼܽܘܢ܂ ܘܶܐܣܰܝܒܰܪܟܼܽܘܢ܂ ܩܰܪܶܒܼܳܝܗ̱ܝ ܠܟܼܳܐ ܠܰܒܼܪܳܟܼ܂
09:42 [ai]	ܘܟܼܰܕܼ ܡܩܰܪܶܒܼ ܠܶܗ܃ ܐܰܪܡܝܶܗ ܕܰܝܘܳܐ ܗܰܘ ܘܡܰܥܣܶܗ܂ ܘܰܟܼܐܳܐ ܝܶܫܽܘܥ ܒܪܽܘܚܳܐ ܗܳܝ ܛܰܢܦܼܬܼܳܐ܃ ܘܰܐܣܝܶܗ ܠܛܰܠܝܳܐ܂ ܘܝܰܗܒܶܗ ܠܰܐܒܼܽܘܗ̱ܝ܀
09:43 [ai]	ܘܶܐܬܿܕܰܡܰܪܘ ܟܽܠܗܽܘܢ ܒܪܰܒܿܽܘܬܼܶܗ ܕܰܐܠܳܗܳܐ܀ ܘܟܼܰܕܼ ܟܽܠܢܳܫ ܡܶܬܿܕܰܡܰܪ ܗ̱ܘܳܐ ܥܰܠܟܽܠ܂ ܟܽܠ܂ ܕܥܳܒܼܶܕܼ ܝܶܫܽܘܥ܂ ܐܶܡܰܪ ܠܬܼܰܠܡܺܝܕܼܰܘܗ̱ܝ̈܃
09:44 [ai]	ܣܺܝܡܘ ܐܰܢ̱ܬܿܽܘܢ ܡܶܠܶܐ̈ ܗܳܠܶܝܢ ܒܶܐܕܼܢܰܝܟܿܽܘܢ̈܂ ܒܪܶܗ ܓܶܝܪ ܕܐ̱ܢܳܫܳܐ܂ ܥܬܼܺܝܕܼ ܕܢܶܫܬܿܠܶܡ ܒܺܐܝܕܼܰܝ̈ ܒܢܰܝ ܐ̱ܢܳܫܳܐ܂
09:45 [ai]	ܗܶܢܽܘܢ ܕܶܝܢ ܠܳܐ ܐܶܫܬܰܘܕܿܥܽܘܗ ܠܡܶܠܬܼܳܐ ܗܳܕܼܶܐ܂ ܡܶܛܽܠ ܕܰܡܟܼܰܣܝܳܐ ܗ̱ܘܳܬܼ ܡܶܢܗܽܘܢ܂ ܕܠܳܐ ܢܶܕܿܥܽܘܢܳܗ܂ ܘܕܼܳܚܠܺܝܢ ܗ̱ܘܰܘ ܕܰܢܫܰܐܠܽܘܢܳܝܗ̱ܝ ܥܠܶܝܗ ܥܰܠ ܡܶܠܬܼܳܐ ܗܳܕܼܶܐ܀
09:46 [ai]	ܘܥܶܠܰܬܼ ܒܗܽܘܢ ܡܰܚܫܰܒܼܬܳܐ܂ ܕܡܰܢܽܘ ܟܰܝ ܪܰܒܼ ܒܗܽܘܢ܂
09:47 [ai]	ܝܶܫܽܘܥ ܕܶܝܢ ܺܝܕܼܰܥ ܡܰܚܫܰܒܼܬܳܐ ܕܿܠܶܒܗܽܘܢ܃ ܘܰܢܣܰܒܼ ܛܰܠܝܳܐ܂ ܘܰܐܩܺܝܡܶܗ ܠܘܳܬܼܶܗ܂
09:48 [ai]	ܘܶܐܡܰܪ ܠܗܽܘܢ܂ ܡܰܢ ܕܰܡܩܰܒܿܶܠ ܛܰܠܝܳܐ ܐܰܝܟܼ ܗܳܢܳܐ܂ ܒܫܶܡܝ܂ ܠܺܝ ܗ̱ܽܘ ܡܩܰܒܿܶܠ܃ ܘܡܰܢ ܕܠܺܝ ܡܩܰܒܿܶܠ܃ ܡܩܰܒܿܶܠ ܠܡܰܢ ܕܫܰܕܿܪܰܢܝ܂ ܐܰܝܢܳܐ ܓܶܝܪ ܕܰܙܥܽܘܪ ܒܟܽܠܟܼܽܘܢ܃ ܗܳܢܳܐ ܢܶܗܘܶܐ ܪܰܒܼ܀
09:49 [ai]	ܘܰܥܢܳܐ ܝܽܘܚܰܢܳܢ܂ ܘܶܐܡܰܪ܂ ܪܰܒܰܢ܃ ܚܙܰܝܢ ܐ̱ܢܳܫ ܕܡܰܦܿܶܩ ܕܰܝܘܶܐ̈ ܒܰܫܡܳܟܼ܃ ܘܰܟܼܠܰܝܢܳܝܗ̱ܝ܂ ܥܰܠ ܕܠܳܐ ܐܶܬܼܳܐ ܥܰܡܰܢ ܒܳܬܼܪܳܟܼ܂
09:50 [ai]	ܐܳܡܰܪ ܠܗܽܘܢ ܝܶܫܽܘܥ܃ ܠܳܐ ܬܶܟܼܠܽܘܢ܂ ܡܰܢ ܓܶܝܪ ܕܠܳܐ ܗ̱ܘܳܐ ܠܽܘܩܒܼܰܠܟܼܽܘܢ܂ ܚܠܳܦܼܰܝܟܿܽܘܢ ܗ̱ܽܘ܀
09:51 [ai]	ܘܰܗܘܳܐ ܕܟܰܕܼ ܡܶܬܼܡܰܠܶܝܢ ܝܰܘܡܳܬܼܳܐ̈ ܕܣܽܘܠܳܩܶܗ܃ ܐܰܬܼܩܶܢ ܦܰܪܨܽܘܦܿܶܗ ܕܢܺܐܙܰܠ ܠܽܐܘܪܺܫܠܶܡ܂
09:52 [ai]	ܘܫܰܕܿܰܪ ܡܰܠܰܐܟܼܶܐ̈ ܩܕܼܳܡ ܦܰܪܨܽܘܦܿܶܗ܂ ܘܶܐܙܰܠܘ ܥܰܠܘ ܠܰܩܪܺܝܬܼܳܐ ܕܫܳܡܪ̈ܳܝܶܐ܂ ܐܰܝܟܼ ܕܢܰܬܼܩܢܽܘܢ ܠܶܗ܂
09:53 [ai]	ܘܠܳܐ ܩܰܒܿܠܽܘܗ̱ܝ܂ ܡܶܛܽܠ ܕܦܰܪܨܽܘܦܿܶܗ܂ ܠܽܐܘܪܺܫܠܶܡ ܣܺܝܡ ܗ̱ܘܳܐ ܠܡܺܐܙܰܠ܂
09:54 [ai]	ܘܟܼܰܕܼ ܚܙܰܘ ܝܰܥܩܽܘܒܼ ܘܝܽܘܚܰܢܳܢ܂ ܬܰܠܡܺܝܕܼܰܘܗ̱ܝ̈܂ ܐܳܡܪܺܝܢ ܠܶܗ܂ ܡܳܪܰܢ܃ ܨܳܒܼܶܐ ܐܰܢ̱ܬܿ ܕܢܺܐܡܰܪ܃ ܘܬܼܶܚܽܘܬܼ ܢܽܘܪܳܐ ܡܶܢ ܫܡܰܝܳܐ ܘܰܬܿܣܺܝܦܼ ܐܶܢܽܘܢ܃ ܐܰܝܟܼ ܕܳܐܦܼ ܐܺܠܺܝܳܐ ܥܒܼܰܕܼ܃
09:55 [ai]	ܘܶܐܬܼܦܿܢܺܝ ܘܰܟܼܐܳܐ ܒܗܽܘܢ܂ ܘܶܐܡܰܪ܂ ܠܳܐ ܝܳܕܼܥܺܝܢ ܐܢ̱ܬܿܽܘܢ ܕܰܐܝܕܼܳܐ ܐܰܢ̱ܬܿܽܘܢ ܪܽܘܚܳܐ܂
09:56 [ai]	ܒܪܶܗ ܓܶܝܪ ܕܐ̱ܢܳܫܳܐ܃ ܠܳܐ ܐܶܬܼܳܐ ܠܡܰܘܒܿܳܕܼܽܘ ܢܰܦܼܫܳܬܼܳܐ̈܂ ܐܶܠܳܐ ܠܡܰܚܳܝܽܘ܂ ܘܶܐܙܰܠܘ ܠܗܽܘܢ ܠܰܩܪܺܝܬܼܳܐ ܐ̱ܚܪܺܬܼܳܐ܀
09:57 [ai]	ܘܟܼܰܕܼ ܐܳܙܺܠ̱ܝܢ ܒܽܐܘܪܚܳܐ܂ ܐܶܡܰܪ ܠܶܗ ܐ̱ܢܳܫ܂ ܐܺܬܼܶܐ ܒܳܬܼܪܳܟܼ ܠܰܐܬܼܰܪ ܕܳܐܙܶܠ ܐܰܢ̱ܬܿ܂ ܡܳܪܝ܂
09:58 [ai]	ܐܳܡܰܪ ܠܶܗ ܝܶܫܽܘܥ܂ ܠܬܼܰܥܠܶܐ̈܂ ܢܶܩܥܶܐ̈ ܐܺܝܬܼ ܠܗܽܘܢ܂ ܘܰܠܦܼܳܪܰܚܬܼܳܐ ܕܰܫܡܰܝܳܐ܂ ܡܰܛܠ̱ܠܳܐ܂ ܠܰܒܼܪܶܗ ܕܶܝܢ ܕܐ̱ܢܳܫܳܐ܂ ܠܰܝܬܿ ܠܶܗ ܐܰܝܟܿܳܐ ܕܢܶܣܡܽܘܟܼ ܪܺܫܶܗ܂
09:59 [ai]	ܘܶܐܡܰܪ ܠܰܐ̱ܚܪܺܢܳܐ܂ ܬܳܐ ܒܳܬܼܰܪܝ܂ ܗܽܘ ܕܶܝܢ ܐܶܡܰܪ ܠܶܗ܂ ܡܳܪܝ܃ ܐܰܦܿܶܣ ܠܺܝ ܠܽܘܩܕܼܰܡ ܐܺܙܰܠ ܐܶܩܒܿܽܘܪ ܐܳܒܼܝ܂
09:60 [ai]	ܐܳܡܰܪ ܠܶܗ ܝܶܫܽܘܥ܂ ܫܒܼܽܘܩ ܡܺܝܬܼܶܐ̈܂ ܩܳܒܼܪܺܝܢ ܡܺܝܬܼܰܝܗܽܘܢ̈܃ ܘܰܐܢ̱ܬܿ ܙܶܠ ܣܰܒܰܪ ܡܰܠܟܿܽܘܬܼܶܗ ܕܰܐܠܳܗܳܐ܀
09:61 [ai]	ܐܳܡܰܪ ܠܶܗ ܐ̱ܚܪܺܢܳܐ܂ ܐܺܬܼܶܐ ܒܳܬܼܪܳܟܼ ܡܳܪܝ܃ ܠܽܘܩܕܼܰܡ ܕܶܝܢ ܐܰܦܿܶܣ ܠܺܝ܂ ܐܺܙܰܠ ܐܶܫܰܠܶܡ ܠܰܒܼܢܰܝ ܒܰܝܬܿܝ܂ ܘܺܐܬܼܶܐ܂
09:62 [ai]	ܐܳܡܰܪ ܠܶܗ ܝܶܫܽܘܥ܂ ܠܳܐ ܐ̱ܢܳܫ ܪܳܡܶܐ ܐܺܝܕܼܶܗ ܥܰܠ ܚܰܪܒܿܳܐ ܕܿܦܼܰܕܳܢܳܐ܂ ܘܚܳܐܰܪ ܠܒܼܶܣܬܿܪܶܗ܃ ܘܚܳܫܰܚ ܠܡܰܠܟܿܽܘܬܼܶܗ ܕܰܐܠܳܗܳܐ܀

next chapter