← Back
The Comprehensive Aramaic Lexicon
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


10:01 [ai]ܒܳܬܼܰܪ ܗܳܠܶܝܢ܃ ܦܪܰܫ ܝܶܫܽܘܥ ܡܶܢ ܬܰܠܡܺܝܕܼܰܘܗ̱ܝ̈ ܐ̱ܚܪ̈ܳܢܶܐ܂ ܫܰܒܼܥܺܝܢ܂ ܘܫܰܕܿܰܪ ܐܶܢܽܘܢ ܬܿܪ̈ܶܝܢ ܬܿܪ̈ܶܝܢ ܩܕܼܳܡ ܦܰܪܨܽܘܦܿܶܗ܃ ܠܟܼܽܠ ܐܰܬܼܰܪ ܘܰܡܕܼܺܝܢܳܐ܂ ܕܰܥܬܼܺܝܕܼ ܗܘܳܐ ܠܡܺܐܙܰܠ܀
10:02 [ai]ܘܶܐܡܰܪ ܠܗܽܘܢ ܚܨܳܕܼܳܐ ܣܰܓܿܺܝ܂ ܘܦܼܳܥܠܶܐ̈ ܙܥܽܘܪ̈ܺܝܢ܂ ܒܥܰܘ ܗܳܟܼܺܝܠ ܡܶܢ ܡܳܪܶܐ ܚܨܳܕܼܳܐ܃ ܕܢܰܦܿܶܩ ܦܳܥܠܶܐ̈ ܠܰܚܨܳܕܼܶܗ܀
10:03 [ai]ܙܶܠܘ܂ ܗܳܐ ܐܶܢܳܐ ܡܫܰܕܿܰܪ ܐ̱ܢܳܐ ܠܟܼܽܘܢ܂ ܐܰܝܟܼ ܐܶܡܪ̈ܶܐ ܒܰܝܢܰܝ ܕܺܐܒܼܶܐ̈܂
10:04 [ai]ܠܳܐ ܬܶܫܩܠܽܘܢ ܠܟܼܽܘܢ ܟܺܝܣܶܐ̈܃ ܘܠܳܐ ܬܿܰܪ̈ܡܳܠܶܐ܂ ܘܠܳܐ ܡܣܳܢܶܐ̈܂ ܘܒܼܰܫܠܳܡܳܐ ܕܐ̱ܢܳܫ ܒܽܐܘܪܚܳܐ܂ ܠܳܐ ܬܶܫܶܐܠܽܘܢ܀
10:05 [ai]ܘܠܰܐܝܢܳܐ ܒܰܝܬܳܐ ܕܥܳܐܠܺܝܢ ܐܢ̱ܬܿܽܘܢ܃ ܠܽܘܩܕܼܰܡ ܐܶܡܰܪܘ܂ ܫܠܳܡܳܐ ܠܒܼܰܝܬܳܐ ܗܳܢܳܐ܂
10:06 [ai]ܘܶܐܢ ܐܺܝܬܼ ܬܰܡܳܢ ܒܰܪ ܫܠܳܡܳܐ܃ ܢܶܬܿܬܿܢܺܝܚ ܥܠܰܘܗ̱ܝ ܫܠܳܡܟܼܽܘܢ܂ ܐܶܢ ܕܶܝܢ ܠܳܐ܃ ܥܠܰܝܟܿܽܘܢ ܢܶܗܦܿܽܘܟܼ܂
10:07 [ai]ܒܶܗ ܕܶܝܢ ܒܒܼܰܝܬܳܐ ܗܘܰܘ܃ ܟܰܕܼ ܠܳܥܣܺܝܢ ܐܢ̱ܬܿܽܘܢ ܘܫܳܬܼܶܝܢ ܡܶܢ ܕܺܝܠܗܽܘܢ܂ ܫܳܘܶܐ ܗ̱ܘ ܓܶܝܪ ܦܳܥܠܳܐ ܐܰܓܼܪܶܗ܂ ܘܠܳܐ ܬܫܰܢܽܘܢ ܡܶܢ ܒܰܝܬܳܐ ܠܒܼܰܝܬܳܐ܂
10:08 [ai]ܘܠܰܐܝܕܼܳܐ ܡܕܼܺܝܢ̱ܬܳܐ ܕܥܳܐܠܺܝܢ ܐܢ̱ܬܿܽܘܢ܂ ܘܰܡܩܰܒܿܠܺܝܢ ܠܟܼܽܘܢ܃ ܠܥܰܣܘ ܡܶܕܶܡ ܕܡܶܬܿܬܣܺܝܡ ܠܟܼܽܘܢ܂
10:09 [ai]ܘܰܐܣܰܘ ܠܰܐܝܠܶܝܢ ܕܿܰܟܼܪ̈ܺܝܗܺܝܢ ܒܿܳܗ܂ ܘܶܐܡܰܪܘ ܠܗܽܘܢ܂ ܩܶܪܒܿܰܬܼ ܥܠܰܝܟܿܽܘܢ ܡܰܠܟܿܽܘܬܼܶܗ ܕܰܐܠܳܗܳܐ܀
10:10 [ai]ܠܰܐܝܕܼܳܐ ܡܕܼܺܝܢ̱ܬܳܐ ܕܶܝܢ ܕܥܳܐܠܺܝܢ ܐܢ̱ܬܿܽܘܢ܂ ܘܠܳܐ ܢܩܰܒܿܠܽܘܢܳܟܼܽܘܢ܃ ܦܽܘܩܘ ܠܟܼܽܘܢ ܠܫܽܘܩܳܐ܂ ܘܶܐܡܰܪܘ܂
10:11 [ai]ܘܳܐܦܼ ܚܶܠܳܐ܂ ܕܰܕܼܒܼܶܩ ܠܰܢ ܒܪ̈ܶܓܼܠܰܝܢ ܡܶܢ ܡܕܼܺܝܢ̱ܬܿܟܼܽܘܢ܂ ܢܳܦܼܨܺܝܢ ܚ̱ܢܰܢ ܠܟܼܽܘܢ܂ ܒܪܰܡ ܗܳܕܼܶܐ ܕܰܥܘ܃ ܕܩܶܪܒܿܰܬܼ ܠܳܗ ܥܠܰܝܟܿܽܘܢ ܡܰܠܟܿܽܘܬܼܶܗ ܕܰܐܠܳܗܳܐ܂
10:12 [ai]ܐܳܡܰܪ ܐ̱ܢܳܐ ܠܟܼܽܘܢ܃ ܕܠܰܣܕܼܽܘܡ ܢܶܗܘܶܐ ܢܺܝܚ܂ ܒܝܰܘܡܳܐ ܗܰܘ܂ ܐܰܘ ܠܰܡܕܼܺܝܢ̱ܬܳܐ ܗܳܝ܀
10:13 [ai]ܘܳܝ ܠܶܟܼܝ ܟܳܘܪܰܙܺܝܢ܃ ܘܳܝ ܠܶܟܼܝ ܒܶܝܬܼ ܨܰܝܳܕܼܳܐ܃ ܕܶܐܠܽܘ ܒܨܽܘܪ ܘܰܒܨܰܝܕܳܢ ܗܘܰܘ ܚܰܝܠܶܐ̈ ܕܰܗܘܰܘ ܒܟܶܝܢ܃ ܟܒܼܰܪ ܕܶܝܢ ܒܣܰܩܶܐ̈ ܘܰܒܩܶܛܡܳܐ܂ ܬܳܒܼܘ܂
10:14 [ai]ܒܪܰܡ ܠܨܽܘܪ ܘܰܠܨܰܝܕܳܢ ܢܶܗܘܶܐ ܢܺܝܚ܂ ܒܕܺܝܢܳܐ܂ ܐܰܘ ܠܟܼܶܝܢ܂
10:15 [ai]ܘܰܐܢ̱ܬܿܝ ܟܦܼܰܪܢܰܚܽܘܡ܂ ܗܳܝ ܕܰܥܕܼܰܡܳܐ ܠܰܫܡܰܝܳܐ ܐܶܬܿܬܿܪܺܝܡܬܿܝ܃ ܥܕܼܰܡܳܐ ܠܰܫܝܽܘܠ ܬܶܬܿܰܚܬܿܶܝܢ܀
10:16 [ai]ܡܰܢ ܕܰܠܟܼܽܘܢ ܫܳܡܰܥ܂ ܠܺܝ ܫܳܡܰܥ܂ ܘܡܰܢ ܕܰܠܟܼܽܘܢ ܛܳܠܶܡ܂ ܠܺܝ ܗ̱ܽܘ ܛܳܠܶܡ܂ ܘܡܰܢ ܕܠܺܝ ܛܳܠܶܡ܂ ܛܳܠܶܡ ܠܡܰܢ ܕܫܰܠܚܰܢܝ ܿ܀ܿ܀ܿ
10:17 [ai]ܘܰܗܦܼܰܟܼܘ ܗܳܢܽܘܢ ܫܰܒܼܥܺܝܢ ܕܫܰܕܿܰܪ ܒܚܰܕܼܽܘܬܼܳܐ ܪܰܒܿܬܼܳܐ܂ ܘܳܐܡܪܺܝܢ ܠܶܗ܂ ܡܳܪܰܢ܃ ܐܳܦܼ ܫܺܐܕܼܶܐ̈ ܡܶܫܬܿܰܥܒܿܕܼܺܝܢ ܠܰܢ ܒܰܫܡܳܟܼ܂
10:18 [ai]ܗܽܘ ܕܶܝܢ ܐܶܡܰܪ ܠܗܽܘܢ܂ ܚܳܙܶܐ ܗ̱ܘܺܝܬܼ ܠܶܗ ܠܣܳܛܳܢܳܐ܃ ܕܰܢܦܼܰܠ ܐܰܝܟܼ ܒܰܪܩܳܐ ܡܶܢ ܫܡܰܝܳܐ܂
10:19 [ai]ܗܳܐ ܝܳܗܶܒܼ ܐ̱ܢܳܐ ܠܟܼܽܘܢ ܫܽܘܠܛܳܢܳܐ܃ ܕܰܗܘܰܝܬܿܽܘܢ ܕܳܝܫܺܝܢ ܚܘܰܘܳܬܼܳܐ̈ ܘܥܶܩܰܪ̈ܒܼܶܐ܂ ܘܟܼܽܠܶܗ ܚܰܝܠܶܗ ܕܰܒܼܥܶܠܕܿܒܼܳܒܼܳܐ܂ ܘܡܶܕܶܡ ܠܳܐ ܢܰܗܰܪܟܼܽܘܢ܂
10:20 [ai]ܒܪܰܡ ܒܗܳܕܼܶܐ ܠܳܐ ܬܶܚܕܿܽܘܢ܂ ܕܫܺܐܕܼܶܐ̈ ܡܶܫܬܿܰܥܒܿܕܼܺܝܢ ܠܟܼܽܘܢ܂ ܐܶܠܳܐ ܚܕܼܰܘ ܕܰܫܡܳܗܰܝܟܿܽܘܢ̈ ܐܶܬܼܟܿܬܼܶܒܼܘ ܒܰܫܡܰܝܳܐ܀
10:21 [ai]ܒܿܳܗ ܒܫܳܥܬܼܳܐ܂ ܪܘܰܙ ܝܶܫܽܘܥ ܒܪܽܘܚܳܐ ܕܩܽܘܕܼܫܳܐ܂ ܘܶܐܡܰܪ܂ ܡܰܘܕܿܶܐ ܐ̱ܢܳܐ ܠܳܟܼ ܐܳܒܼܝ܃ ܡܳܪܳܐ ܕܰܫܡܰܝܳܐ ܘܕܼܰܐܪܥܳܐ܂ ܕܟܰܣܺܝܬܿ ܗܳܠܶܝܢ ܡܶܢ ܚܰܟܿܺܝܡܶܐ̈ ܘܣܰܟܽܘܠܬܼܳܢܶܐ̈܂ ܘܰܓܼܠܰܝܬܿ ܐܶܢܶܝܢ̈ ܠܝܰܠܽܘܕܼܶܐ̈܂ ܐܺܝܢ܂ ܐܳܒܼܝ܃ ܕܗܳܟܼܰܢܳܐ ܗܘܳܐ ܨܶܒܼܝܳܢܳܐ ܩܕܼܳܡܰܝܟܿ܀
10:22 [ai]ܘܶܐܬܼܦܿܢܺܝ ܠܘܳܬܼ ܬܰܠܡܺܝܕܼܰܘܗ̱ܝ̈܂ ܘܶܐܡܰܪ ܠܗܽܘܢ܂ ܟܽܠ ܡܶܕܶܡ ܐܶܫܬܿܠܶܡ ܠܺܝ ܡܶܢ ܐܳܒܼܝ܂ ܘܠܳܐ ܐ̱ܢܳܫ ܝܳܕܼܰܥ ܡܰܢܽܘ ܒܪܳܐ܂ ܐܶܠܳܐ ܐܶܢ ܐܰܒܼܳܐ܃ ܘܡܰܢܽܘ ܐܰܒܼܳܐ܂ ܐܶܠܳܐ ܐܶܢ ܒܪܳܐ܂ ܘܰܠܡܰܢ ܕܶܐܢ ܢܶܨܒܿܶܐ ܒܪܳܐ ܕܢܶܓܼܠܶܐ܀
10:23 [ai]ܘܶܐܬܼܦܿܢܺܝ ܠܘܳܬܼ ܬܰܠܡܺܝܕܼܰܘܗ̱ܝ̈ ܒܰܠܚܽܘܕܼܰܝܗܽܘܢ܂ ܘܶܐܡܰܪ܂ ܛܽܘܒܼܰܝܗܶܝܢ̈ ܠܥܰܝܢܶܐ̈ ܕܚܳܙܝܳܢ̈ ܡܶܕܶܡ ܕܰܐܢ̱ܬܿܽܘܢ ܚܳܙܶܝܢ܂
10:24 [ai]ܐܳܡܰܪ ܐ̱ܢܳܐ ܠܟܼܽܘܢ ܓܶܝܪ܃ ܕܰܢܒܼܺܝܶܐ̈ ܣܰܓܿܺܝܶܐܐ̈ ܘܡܰܠܟܿܶܐ̈܂ ܨܒܼܰܘ ܕܢܶܚܙܽܘܢ ܡܶܕܶܡ ܕܚܳܙܶܝܢ ܐܢ̱ܬܿܽܘܢ܂ ܘܠܳܐ ܚܙܰܘ܃ ܘܰܠܡܶܫܡܰܥ ܡܶܕܶܡ ܕܰܐܢ̱ܬܿܽܘܢ ܫܳܡܥܺܝܢ܂ ܘܠܳܐ ܫܡܰܥܘ܀
10:25 [ai]ܘܗܳܐ ܣܳܦܼܪܳܐ ܚܰܕܼ ܩܳܡ ܕܰܢܢܰܣܶܝܘܗ̱ܝ܂ ܘܶܐܡܰܪ܂ ܡܰܠܦܼܳܢܳܐ܂ ܡܳܢܳܐ ܐܶܥܒܿܶܕܼ ܕܺܐܪܰܬܼ ܚܰܝ̈ܶܐ ܕܰܠܥܳܠܰܡ܂
10:26 [ai]ܗܽܘ ܕܶܝܢ ܝܶܫܽܘܥ ܐܶܡܰܪ ܠܶܗ܂ ܒܢܳܡܽܘܣܳܐ ܐܰܝܟܿܰܢܳܐ ܟܬܼܺܝܒܼ܂ ܐܰܝܟܿܰܢܳܐ ܩܳܪܶܐ ܐܰܢ̱ܬܿ܂
10:27 [ai]ܥܢܳܐ܂ ܘܶܐܡܰܪ ܠܶܗ܂ ܕܬܶܪܚܰܡ ܠܡܳܪܝܳܐ ܐܰܠܳܗܳܟܼ܃ ܡܶܢ ܟܽܠܶܗ ܠܶܒܳܟܼ܂ ܘܡܶܢ ܟܽܠܳܗ ܢܰܦܼܫܳܟܼ܂ ܘܡܶܢ ܟܽܠܶܗ ܚܰܝܠܳܟܼ܂ ܘܡܶܢ ܟܽܠܶܗ ܪܶܥܝܳܢܳܟܼ܂ ܘܰܠܩܰܪܺܝܒܼܳܟܼ܂ ܐܰܝܟܼ ܢܰܦܼܫܳܟܼ܂
10:28 [ai]ܐܳܡܰܪ ܠܶܗ ܝܶܫܽܘܥ܂ ܬܪܺܝܨܳܐܺܝܬܼ ܐܶܡܰܪܬܿ܂ ܗܳܕܼܶܐ ܥܒܼܶܕܼ܂ ܘܬܼܺܚܶܐ܂
10:29 [ai]ܗܽܘ ܕܶܝܢ ܟܰܕܼ ܨܒܼܳܐ ܠܰܡܙܰܕܿܳܩܽܘ ܢܰܦܼܫܶܗ܂ ܐܶܡܰܪ ܠܶܗ܂ ܘܡܰܢܽܘ ܩܰܪܺܝܒܼܝ܀
10:30 [ai]ܐܳܡܰܪ ܠܶܗ ܝܶܫܽܘܥ܂ ܓܰܒܼܪܳܐ ܚܰܕܼ ܢܳܚܶܬܼ ܗ̱ܘܳܐ ܡܶܢ ܐܽܘܪܺܫܠܶܡ ܠܺܐܝܪܺܝܚܽܘ܂ ܘܰܢܦܼܰܠܘ ܥܠܰܘܗ̱ܝ ܠܶܣܛܳܝܶܐ̈܂ ܘܫܰܠܚܽܘܗ̱ܝ܂ ܘܰܡܚܰܐܘܽܗ̱ܝ܂ ܘܫܰܒܼܩܽܘܗ̱ܝ܂ ܟܰܕܼ ܩܰܠܺܝܠ ܩܰܝܳܡܳܐ ܒܶܗ ܢܰܦܼܫܳܐ܂ ܘܶܐܙܰܠܘ܂
10:31 [ai]ܘܰܓܼܕܼܰܫ ܟܳܗܢܳܐ ܚܰܕܼ ܢܳܚܶܬܼ ܗ̱ܘܳܐ ܒܽܐܘܪܚܳܐ ܗܳܝ܂ ܘܰܚܙܳܝܗ̱ܝ܂ ܘܰܥܒܼܰܪ܂
10:32 [ai]ܘܗܳܟܼܰܢܳܐ ܐܳܦܼ ܠܶܘܳܝܳܐ܂ ܐܶܬܼܳܐ ܡܛܳܐ ܠܗܳܝ ܕܽܘܟܿܬܼܳܐ܂ ܘܰܚܙܳܝܗ̱ܝ܂ ܘܰܥܒܼܰܪ܂
10:33 [ai]ܐ̱ܢܳܫ ܕܶܝܢ ܫܳܡܪܳܝܳܐ܂ ܟܰܕܼ ܪܳܕܼܶܐ ܗ̱ܘܳܐ܃ ܐܶܬܼܳܐ ܐܰܝܟܿܳܐ ܕܺܐܝܬܼܰܘܗ̱ܝ ܗ̱ܘܳܐ܂ ܘܰܚܙܳܝܗ̱ܝ܂ ܘܶܐܬܼܪܰܚܰܡ ܥܠܰܘܗ̱ܝ܂
10:34 [ai]ܘܶܐܬܼܩܰܪܰܒܼ܂ ܘܰܥܨܰܒܼ ܡܰܚܘܳܬܼܶܗ̈܂ ܘܰܢܨܰܠ ܥܠܰܝܗܶܝܢ ܚܰܡܪܳܐ ܘܡܶܫܚܳܐ܂ ܘܣܳܡܶܗ ܥܰܠ ܚܡܳܪܶܗ܂ ܘܰܐܝܬܿܝܶܗ ܠܦܼܽܘܬܿܩܳܐ܂ ܘܶܐܬܼܒܿܛܶܠ ܠܶܗ ܥܠܰܘܗ̱ܝ܂
10:35 [ai]ܘܰܠܨܰܦܼܪܶܗ ܕܝܰܘܡܳܐ܃ ܐܰܦܿܶܩ ܬܿܪ̈ܶܝܢ ܕܺܝܢܳܪ̈ܺܝܢ܃ ܝܰܗ̱ܒܼ ܠܦܼܽܘܬܿܩܳܝܳܐ܂ ܘܶܐܡܰܪ ܠܶܗ܂ ܺܝܨܰܦܼ ܕܺܝܠܶܗ܂ ܘܶܐܢ ܡܶܕܶܡ ܝܰܬܿܺܝܪ ܬܰܦܿܶܩ܃ ܡܳܐ ܕܗܳܦܼܶܟܼ ܐ̱ܢܳܐ ܝܳܗܶܒܼ ܐ̱ܢܳܐ ܠܳܟܼ܂
10:36 [ai]ܡܰܢܽܘ ܗܳܟܼܺܝܠ ܡܶܢ ܗܳܠܶܝܢ ܬܠܳܬܼܳܐ܂ ܡܶܬܼܚܙܶܐ ܠܳܟܼ܃ ܕܰܗܘܳܐ ܩܰܪܺܝܒܼܳܐ ܠܗܰܘ ܕܰܢܦܼܰܠ ܒܺܐܝܕܼܰܝ̈ ܓܰܝܳܣܶܐ̈܂
10:37 [ai]ܗܽܘ ܕܶܝܢ ܐܶܡܰܪ܂ ܗܰܘ ܕܶܐܬܼܪܰܚܰܡ ܥܠܰܘܗ̱ܝ܂ ܐܳܡܰܪ ܠܶܗ ܝܶܫܽܘܥ܂ ܙܶܠ܃ ܐܳܦܼ ܐܰܢ̱ܬܿ ܗܳܟܼܰܢܳܐ ܗܘܰܝܬܿ ܥܳܒܼܶܕܼ܀܀
10:38 [ai]ܘܰܗܘܳܐ ܕܟܰܕܼ ܗܶܢܽܘܢ ܪܳܕܼܶܝܢ ܒܽܐܘܪܚܳܐ܃ ܥܰܠ ܠܰܩܪܺܝܬܼܳܐ ܚܕܼܳܐ܂ ܘܰܐܢ̱ܬܿܬܼܳܐ ܕܰܫܡܳܗ ܡܳܪܬܳܐ܃ ܩܰܒܿܶܠܬܼܶܗ ܒܒܼܰܝܬܿܳܗ܂
10:39 [ai]ܘܺܐܝܬܼ ܗ̱ܘܳܬܼ ܠܳܗ ܚܳܬܼܳܐ ܕܰܫܡܳܗ ܡܰܪܝܰܡ܂ ܘܶܐܬܼܳܬܼ ܝܶܬܼܒܿܰܬܼ ܠܳܗ ܠܘܳܬܼ ܪ̈ܶܓܼܠܰܘܗ̱ܝ ܕܡܳܪܰܢ܂ ܘܫܳܡܥܳܐ ܗ̱ܘܳܬܼ ܡܶܠܰܘܗ̱ܝ̈܂
10:40 [ai]ܡܳܪܬܳܐ ܕܶܝܢ ܥܰܢܝܳܐ ܗ̱ܘܳܬܼ ܒܬܶܫܡܶܫܬܳܐ ܣܰܓܿܺܝܐܬܼܳܐ܂ ܘܶܐܬܼܳܬܼ ܐܳܡܪܳܐ ܠܶܗ܂ ܡܳܪܝ܃ ܠܳܐ ܒܛܺܝܠ ܠܳܟܼ܃ ܕܚܳܬܼܝ ܫܒܼܰܩܬܼܰܢܝ ܒܰܠܚܽܘܕܼܰܝ ܠܰܡܫܰܡܳܫܽܘ܃ ܐܶܡܰܪ ܠܳܗ ܡܥܰܕܿܪܳܐ ܠܺܝ܂
10:41 [ai]ܥܢܳܐ ܕܶܝܢ ܝܶܫܽܘܥ܂ ܘܶܐܡܰܪ ܠܳܗ܂ ܡܳܪܬܳܐ ܡܳܪܬܳܐ܃ ܝܳܨܦܿܰܬܿܝ ܘܰܪܗܺܝܒܼܰܬܿܝ܂ ܥܰܠ ܣܰܓܿܺܝܳܐܬܼܳܐ̈܂
10:42 [ai]ܚܕܼܳܐ ܗ̱ܝ ܕܶܝܢ ܕܡܶܬܼܒܿܰܥܝܳܐ܂ ܡܰܪܝܰܡ ܕܶܝܢ ܡܢܳܬܼܳܐ ܛܳܒܼܬܼܳܐ܂ ܓܒܼܳܬܼ ܠܳܗ܃ ܗܳܝ ܕܠܳܐ ܬܶܬܼܢܣܶܒܼ ܡܶܢܳܗ܀

next chapter