← Back
The Comprehensive Aramaic Lexicon
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


11:01 [ai]ܘܰܗܘܳܐ ܕܟܰܕܼ ܗܽܘ ܡܨܰܠܶܐ ܒܕܽܘܟܿܬܼܳܐ ܚܕܼܳܐ܃ ܟܰܕܼ ܫܰܠܶܡ܂ ܐܶܡܰܪ ܠܶܗ ܚܰܕܼ ܡܶܢ ܬܰܠܡܺܝܕܼܰܘܗ̱ܝ̈܂ ܡܳܪܰܢ܂ ܐܰܠܶܦܼܰܝܢ ܠܰܡܨܰܠܳܝܽܘ܃ ܐܰܝܟܿܰܢܳܐ ܕܳܐܦܼ ܝܽܘܚܰܢܳܢ ܐܰܠܶܦܼ ܠܬܼܰܠܡܺܝܕܼܰܘܗ̱ܝ̈܀
11:02 [ai]ܐܳܡܰܪ ܠܗܽܘܢ ܝܶܫܽܘܥ܂ ܐܶܡܰܬܼܝ ܕܰܡܨܰܠܶܝܢ ܐܢ̱ܬܿܽܘܢ܃ ܗܳܟܼܰܢܳܐ ܗܘܰܝܬܿܽܘܢ ܐܳܡܪܺܝܢ܂ ܐܰܒܼܽܘܢ ܕܒܰܫܡܰܝܳܐ܂ ܢܶܬܼܩܰܕܿܰܫ ܫܡܳܟܼ܂ ܬܺܐܬܼܶܐ ܡܰܠܟܿܽܘܬܼܳܟܼ܂ ܢܶܗܘܶܐ ܨܶܒܼܝܳܢܳܟܼ܂ ܐܰܝܟܼ ܕܒܰܫܡܰܝܳܐ܂ ܐܳܦܼ ܒܰܐܪܥܳܐ܂
11:03 [ai]ܗܰܒܼ ܠܰܢ ܠܰܚܡܳܐ ܕܣܽܘܢܩܳܢܰܢ ܟܽܠܝܽܘܡ܂
11:04 [ai]ܘܰܫܒܼܽܘܩ ܠܰܢ ܚܛܳܗܰܝܢ̈܂ ܐܳܦܼ ܐܶܢܰܚܢܰܢ ܓܶܝܪ ܫܒܼܰܩܢ ܠܟܼܽܠ ܕܚܰܝܳܒܼܺܝܢ ܠܰܢ܂ ܘܠܳܐ ܬܰܥܠܰܢ ܠܢܶܣܝܽܘܢܳܐ܂ ܐܶܠܳܐ ܦܪܽܘܩܰܝܢ ܡܶܢ ܒܺܝܫܳܐ܀
11:05 [ai]ܘܶܐܡܰܪ ܠܗܽܘܢ܂ ܡܰܢܽܘ ܡܶܢܟܼܽܘܢ ܕܺܐܝܬܼ ܠܶܗ ܪܳܚܡܳܐ܃ ܘܢܺܐܙܰܠ ܠܘܳܬܼܶܗ ܒܦܶܠܓܿܽܘܬܼ ܠܺܠܝܳܐ܂ ܘܢܺܐܡܰܪ ܠܶܗ܂ ܪܳܚܶܡܝ܃ ܐܰܫܶܐܠܰܝܢܝ ܬܠܳܬܼ ܓܿܪ̈ܺܝܨܳܢ܂
11:06 [ai]ܡܶܛܽܠ ܕܪܳܚܡܳܐ ܐܶܬܼܳܐ ܠܘܳܬܼܝ ܡܶܢ ܐܽܘܪܚܳܐ܃ ܘܠܰܝܬܿ ܠܺܝ ܡܶܕܶܡ ܕܶܐܣܺܝܡ ܠܶܗ܂
11:07 [ai]ܘܗܰܘ ܪܳܚܡܶܗ ܡܶܢ ܠܓܼܰܘ ܢܶܥܢܶܐ܂ ܘܢܺܐܡܰܪ ܠܶܗ܂ ܠܳܐ ܬܰܗܰܪܰܝܢܝ܂ ܕܗܳܐ ܬܰܪܥܳܐ ܐܰܚܺܝܕܼ ܗ̱ܽܘ܂ ܘܰܒܢܰܝ ܥܰܡܝ ܒܥܰܪܣܳܐ܂ ܠܳܐ ܡܶܫܟܿܰܚ ܐ̱ܢܳܐ ܕܶܐܩܽܘܡ ܘܶܐܬܿܶܠ ܠܳܟܼ܂
11:08 [ai]ܐܳܡܰܪ ܐ̱ܢܳܐ ܠܟܼܽܘܢ܂ ܕܶܐܢ ܡܶܛܽܠ ܪܳܚܡܽܘܬܼܳܐ܂ ܠܳܐ ܢܶܬܿܶܠ ܠܶܗ܃ ܡܶܛܽܠ ܚܰܨܺܝܦܼܽܘܬܼܶܗ ܢܩܽܘܡ ܘܢܶܬܿܶܠ ܠܶܗ܂ ܟܡܳܐ ܕܡܶܬܼܒܿܥܶܐ ܠܶܗ܀
11:09 [ai]ܐܳܦܼ ܐܶܢܳܐ ܐܳܡܰܪ ܐ̱ܢܳܐ ܠܟܼܽܘܢ܃ ܫܰܐܠܘ܂ ܘܢܶܬܼܺܝܗܶܒܼ ܠܟܼܽܘܢ܂ ܒܥܰܘ܂ ܘܬܼܶܫܟܿܚܽܘܢ܂ ܩܽܘܫܘ܂ ܘܢܶܬܼܦܬܼܰܚ ܠܟܼܽܘܢ܂
11:10 [ai]ܟܽܠ ܓܶܝܪ ܕܫܳܐܶܠ܂ ܢܳܣܶܒܼ܂ ܘܰܕܼܒܼܳܥܶܐ܂ ܡܶܫܟܿܰܚ܂ ܘܰܕܼܢܳܩܶܫ܂ ܡܶܬܼܦܬܼܰܚ ܠܶܗ܂
11:11 [ai]ܐܰܝܢܳܐ ܓܶܝܪ ܡܶܢܟܼܽܘܢ ܐܰܒܼܳܐ܂ ܕܢܶܫܶܐܠܺܝܘܗ̱ܝ ܒܪܶܗ ܠܰܚܡܳܐ܃ ܠܡܳܐ܃ ܟܺܐܦܼܳܐ ܡܰܘܫܶܛ ܠܶܗ܃ ܘܶܐܢ ܢܽܘܢܳܐ ܢܶܫܶܐܠܺܝܘܗ̱ܝ܃ ܠܡܳܐ܃ ܚܠܳܦܼ ܢܽܘܢܳܐ ܚܶܘܝܳܐ ܡܰܘܫܶܛ ܠܶܗ܃
11:12 [ai]ܘܶܐܢ ܒܰܪܬܼܳܐ ܢܶܫܶܐܠܺܝܘܗ̱ܝ܃ ܠܡܳܐ܃ ܗܽܘ ܥܶܩܰܪܒܼܳܐ ܡܰܘܫܶܛ ܠܶܗ܃
11:13 [ai]ܘܶܐܢ ܐܰܢ̱ܬܿܽܘܢ ܕܒܺܝܫܶܐ̈ ܐܺܝܬܼܰܝܟܿܽܘܢ܃ ܝܳܕܼܥܺܝܢ ܐܢ̱ܬܿܽܘܢ ܡܰܘܗܒܼܳܬܼܳܐ̈ ܛܳܒܼܳܬܼܳܐ̈܂ ܠܡܶܬܿܰܠ ܠܰܒܼܢܰܝܟܿܽܘܢ܂ ܟܡܳܐ ܝܰܬܿܺܝܪܳܐܺܝܬܼ ܐܰܒܼܽܘܟܼܽܘܢ ܡܶܢ ܫܡܰܝܳܐ܃ ܢܶܬܿܶܠ ܪܽܘܚܳܐ ܕܩܽܘܕܼܫܳܐ ܠܰܐܝܠܶܝܢ ܕܫܳܐܠܺܝܢ ܠܶܗ܀܀
11:14 [ai]ܘܟܼܰܕܼ ܡܰܦܿܶܩ ܫܺܐܕܼܳܐ ܕܺܐܝܬܼܰܘܗ̱ܝ ܚܰܪܫܳܐ܃ ܗܘܳܐ ܕܟܰܕܼ ܢܦܼܰܩ ܗܰܘ ܫܺܐܕܼܳܐ܂ ܡܰܠܶܠ ܗܰܘ ܚܰܪܫܳܐ܂ ܘܶܐܬܿܕܰܡܰܪܘ ܟܶܢܫܶܐ̈܀
11:15 [ai]ܐ̱ܢܳܫܳܐ ܕܶܝܢ ܡܶܢܗܽܘܢ܂ ܐܶܡܰܪܘ܂ ܒܿܰܒܼܥܶܠܙܒܼܽܘܒܼ ܪܺܫܳܐ ܕܕܼܰܝܘܶܐ̈ ܡܰܦܿܶܩ ܗܳܢܳܐ ܕܰܝܘܶܐ̈܂
11:16 [ai]ܐ̱ܚܪ̈ܳܢܶܐ ܕܶܝܢ ܟܰܕܼ ܡܢܰܣܶܝܢ ܠܶܗ܃ ܐܳܬܼܳܐ ܡܶܢ ܫܡܰܝܳܐ ܫܳܐܠܺܝܢ ܗ̱ܘܰܘ ܠܶܗ܀
11:17 [ai]ܝܶܫܽܘܥ ܕܶܝܢ ܕܝܳܕܼܰܥ ܗ̱ܘܳܐ ܡܰܚܫܒܼܳܬܼܗܽܘܢ̈܃ ܐܶܡܰܪ ܠܗܽܘܢ܂ ܟܽܠ ܡܰܠܟܿܽܘ ܕܬܶܬܼܦܿܰܠܰܓܼ ܥܰܠ ܢܰܦܼܫܳܗ܂ ܬܶܚܪܰܒܼ܂ ܘܒܼܰܝܬܳܐ ܕܥܰܠ ܩܢܽܘܡܶܗ ܡܶܬܼܦܿܰܠܰܓܼ܂ ܢܶܦܿܶܠ܂
11:18 [ai]ܘܶܐܢ ܣܳܛܳܢܳܐ ܥܰܠ ܢܰܦܼܫܶܗ ܐܶܬܼܦܿܰܠܰܓܼ܃ ܐܰܝܟܿܰܢܳܐ ܬܩܽܘܡ ܡܰܠܟܿܽܘܬܼܶܗ܃ ܕܳܐܡܪܺܝܢ ܐܢ̱ܬܿܽܘܢ ܕܒܰܒܼܥܶܠܙܒܼܽܘܒܼ ܡܰܦܿܶܩ ܐ̱ܢܳܐ ܕܰܝܘܶܐ̈܂
11:19 [ai]ܘܶܐܢ ܐܶܢܳܐ ܒܿܰܒܼܥܶܠܙܒܼܽܘܒܼ ܡܰܦܿܶܩ ܐ̱ܢܳܐ ܕܰܝܘܶܐ̈܃ ܒܢܰܝܟܿܽܘܢ܂ ܒܡܳܢܳܐ ܡܰܦܿܩܺܝܢ܂ ܡܶܛܽܠ ܗܳܢܳܐ܂ ܗܶܢܽܘܢ ܢܶܗܘܽܘܢ ܠܟܼܽܘܢ ܕܰܝܳܢܶܐ̈܂
11:20 [ai]ܐܶܢ ܕܶܝܢ ܒܨܶܒܼܥܳܐ ܕܰܐܠܳܗܳܐ܂ ܡܰܦܿܶܩ ܐ̱ܢܳܐ ܕܰܝܘܶܐ̈܃ ܩܶܪܒܿܰܬܼ ܠܳܗ ܥܠܰܝܟܿܽܘܢ ܡܰܠܟܿܽܘܬܼܶܗ ܕܰܐܠܳܗܳܐ܂
11:21 [ai]ܐܶܡܰܬܼܝ ܕܚܰܣܺܝܢܳܐ ܟܰܕܼ ܡܙܰܝܰܢ ܢܶܛܰܪ ܕܳܪܬܿܶܗ܂ ܒܫܰܝܢܳܐ ܗ̱ܘ ܩܶܢܝܳܢܶܗ܂
11:22 [ai]ܐܶܢ ܕܶܝܢ ܢܺܐܬܼܶܐ ܡܰܢ ܕܚܰܣܺܝܢ ܡܶܢܶܗ܂ ܢܶܙܟܿܶܝܘܗ̱ܝ܃ ܟܽܠܶܗ ܙܰܝܢܶܗ ܫܳܩܶܠ ܗܰܘ ܕܰܬܼܟܼܺܝܠ ܗܘܳܐ ܥܠܰܘܗ̱ܝ܂ ܘܒܼܶܙܬܼܶܗ ܡܦܼܰܠܶܓܼ ܿ܀ܿ܀ܿ
11:23 [ai]ܡܰܢ ܕܠܳܐ ܗ̱ܘܳܐ ܥܰܡܝ܂ ܠܽܘܩܒܼܰܠܝ ܗ̱ܽܘ܂ ܘܡܰܢ ܕܠܳܐ ܟܳܢܶܫ ܥܰܡܝ܂ ܡܒܼܰܕܿܳܪܽܘ ܡܒܼܰܕܿܰܪ܀
11:24 [ai]ܪܽܘܚܳܐ ܛܰܢܦܼܬܼܳܐ܂ ܡܳܐ ܕܢܶܦܼܩܰܬܼ ܡܶܢ ܒܰܪ ܐ̱ܢܳܫܳܐ܃ ܐܳܙܳܠ̱ܐ ܡܶܬܼܟܰܪܟܿܳܐ܂ ܒܰܐܬܼܪ̈ܰܘܳܬܼܳܐ ܕܡܰܝܳܐ̈ ܠܰܝܬܿ ܒܗܽܘܢ܂ ܕܬܶܒܼܥܶܐ ܠܳܗ ܢܝܳܚܳܐ܂ ܘܡܳܐ ܕܠܳܐ ܐܶܫܟܿܚܰܬܼ܂ ܐܳܡܪܳܐ܂ ܐܶܗܦܿܽܘܟܼ ܠܒܼܰܝܬܿܝ ܐܰܝܡܶܟܿܳܐ ܕܢܶܦܼܩܶܬܼ܂
11:25 [ai]ܘܶܐܢ ܐܶܬܼܳܬܼ ܐܶܫܟܿܰܚܬܼܶܗ ܕܰܚܡܺܝܡ ܘܰܡܨܰܒܿܰܬܼ܃
11:26 [ai]ܗܳܝܕܶܝܢ ܐܳܙܳܠ̱ܐ ܕܳܒܼܪܳܐ ܫܒܼܰܥ ܪ̈ܽܘܚܺܝܢ ܐ̱ܚܪ̈ܳܢܝܳܢ܂ ܕܒܺܝܫܳܢ̈ ܡܶܢܳܗ܂ ܘܥܳܐܠܳܢ̈܂ ܘܥܳܡܪ̈ܳܢ ܬܰܡܳܢ܂ ܘܗܳܘܝܳܐ ܚܰܪܬܼܶܗ ܕܒܰܪܢܳܫܳܐ ܗܰܘ܂ ܒܺܝܫܳܐ ܡܶܢ ܩܰܕܼܡܳܝܬܿܶܗ܀
11:27 [ai]ܘܟܼܰܕܼ ܗܳܠܶܝܢ ܡܡܰܠܶܠ ܗ̱ܘܳܐ܃ ܐܰܪܺܝܡܰܬܼ ܐܰܢ̱ܬܿܬܼܳܐ ܚܕܼܳܐ ܩܳܠܳܗ ܡܶܢ ܟܶܢܫܳܐ܂ ܘܶܐܡܪܰܬܼ ܠܶܗ܂ ܛܽܘܒܼܶܝܗ ܠܟܼܰܪܣܳܐ ܕܰܛܥܶܢܬܼܳܟܼ܃ ܘܠܰܬܿܕܼܰܝܳܐ̈ ܕܰܐܝܢܩܽܘܟܼ܂
11:28 [ai]ܐܳܡܰܪ ܠܳܗ ܗܽܘ܃ ܛܽܘܒܼܰܝܗܽܘܢ̈܂ ܠܰܐܝܠܶܝܢ ܕܰܫܡܰܥܘ ܡܶܠܬܼܶܗ ܕܰܐܠܳܗܳܐ܂ ܘܢܳܛܪܺܝܢ ܠܳܗ܀
11:29 [ai]ܘܟܼܰܕܼ ܡܶܬܼܟܿܰܢܫܺܝܢ ܗ̱ܘܰܘ ܟܶܢܫܶܐ̈܃ ܫܰܪܺܝ ܠܡܺܐܡܰܪ܂ ܫܰܪܒܿܬܼܳܐ ܗܳܕܼܶܐ ܒܺܝܫܬܳܐ܂ ܐܳܬܼܳܐ ܒܿܳܥܝܳܐ܂ ܘܳܐܬܼܳܐ ܠܳܐ ܬܶܬܼܺܝܗܶܒܼ ܠܳܗ܃ ܐܶܠܳܐ ܐܳܬܼܶܗ ܕܝܰܘܢܳܢ ܢܒܼܺܝܳܐ܂
11:30 [ai]ܐܰܝܟܿܰܢܳܐ ܓܶܝܪ ܕܰܗܘܳܐ ܝܰܘܢܳܢ ܐܳܬܼܳܐ ܠܢܺܝܢܘܳܝܶܐ̈܃ ܗܳܟܼܰܢܳܐ ܢܶܗܘܶܐ ܐܳܦܼ ܒܪܶܗ ܕܐ̱ܢܳܫܳܐ ܠܫܰܪܒܿܬܼܳܐ ܗܳܕܼܶܐ܂
11:31 [ai]ܡܰܠܟܿܬܼܳܐ ܕܬܰܝܡܢܳܐ ܬܩܽܘܡ ܒܕܺܝܢܳܐ ܥܰܡ ܐ̱ܢܳܫܳܐ̈ ܕܫܰܪܒܿܬܼܳܐ ܗܳܕܼܶܐ܂ ܘܰܬܼܚܰܝܶܒܼ ܐܶܢܽܘܢ܂ ܕܶܐܬܼܳܬܼ ܡܶܢ ܥܶܒܼܪ̈ܶܝܗ ܕܰܐܪܥܳܐ܃ ܕܬܶܫܡܰܥ ܚܶܟܼܡܬܼܶܗ ܕܰܫܠܶܝܡܽܘܢ܃ ܘܗܳܐ ܕܝܰܬܿܺܝܪ ܡܶܢ ܫܠܶܝܡܳܘܢ ܗܳܪܟܿܳܐ܂
11:32 [ai]ܓܿܰܒܼܪ̈ܶܐ ܢܺܝܢܘܳܝܶܐ̈ ܢܩܽܘܡܽܘܢ ܒܕܺܝܢܳܐ܂ ܥܰܡ ܫܰܪܒܿܬܼܳܐ ܗܳܕܼܶܐ܂ ܘܰܢܚܰܝܒܼܽܘܢܳܗ܂ ܕܬܳܒܼܘ ܒܟܳܪܽܘܙܽܘܬܼܶܗ ܕܝܰܘܢܳܢ܂ ܘܗܳܐ ܕܝܰܬܿܺܝܪ ܡܶܢ ܝܰܘܢܳܢ ܗܳܪܟܿܳܐ܀
11:33 [ai]ܠܳܐ ܐ̱ܢܳܫ ܡܰܢܗܰܪ ܫܪܳܓܼܳܐ܃ ܘܣܳܐܶܡ ܠܶܗ ܒܟܶܣܝܳܐ܃ ܐܰܘ ܬܚܶܝܬܼ ܣܰܐܬܼܳܐ܂ ܐܶܠܳܐ ܠܥܶܠ ܡܶܢ ܡܢܳܪܬܳܐ܂ ܕܰܐܝܠܶܝܢ ܕܥܳܐܠܺܝܢ܂ ܢܶܚܙܽܘܢ ܢܽܘܗܪܶܗ܀
11:34 [ai]ܫܪܳܓܼܶܗ ܕܦܰܓܼܪܳܟܼ ܐܺܝܬܼܶܝܗ ܥܰܝܢܳܟܼ܂ ܐܶܡܰܬܼܝ ܗܳܟܼܺܝܠ ܕܥܰܝܢܳܟܼ ܦܫܺܝܛܳܐ܃ ܐܳܦܼ ܟܽܠܶܗ ܦܰܓܼܪܳܟܼ ܢܶܗܘܶܐ ܢܰܗܺܝܪ܂ ܐܶܢ ܕܶܝܢ ܬܶܗܘܶܐ ܒܺܝܫܳܐ܃ ܘܳܐܦܼ ܦܰܓܼܪܳܟܼ ܢܶܗܘܶܐ ܚܶܫܽܘܟܼ܂
11:35 [ai]ܐܶܙܕܿܰܗ̱ܪ ܗܳܟܼܺܝܠ ܕܰܠܡܳܐ ܢܽܘܗܪܳܐ ܕܒܳܟܼ ܚܶܫܽܘܟܼܳܐ ܗ̱ܘ܂
11:36 [ai]ܐܶܢ ܕܶܝܢ ܦܰܓܼܪܳܟܼ ܟܽܠܶܗ ܢܰܗܺܝܪ܃ ܘܠܰܝܬܿ ܒܶܗ ܡܢܳܬܼܳܐ ܡܶܕܶܡ ܚܶܫܽܘܟܼܳܐ܃ ܢܶܗܘܶܐ ܡܰܢܗܰܪ ܟܽܠܶܗ܃ ܐܰܝܟܼ ܕܰܫܪܳܓܼܳܐ ܒܕܰܠܩܶܗ ܡܰܢܗܰܪ ܠܳܟܼ܀܀
11:37 [ai]ܟܰܕܼ ܕܶܝܢ ܡܡܰܠܶܠ܂ ܒܥܳܐ ܡܶܢܶܗ ܦܪܺܝܫܳܐ ܚܰܕܼ ܕܢܶܫܬܿܰܪܶܐ ܠܘܳܬܼܶܗ܂ ܘܥܰܠ ܐܶܣܬܿܡܶܟܼ܂
11:38 [ai]ܗܰܘ ܕܶܝܢ ܦܪܺܝܫܳܐ ܟܰܕܼ ܚܙܳܝܗ̱ܝ܂ ܐܶܬܿܕܰܡܰܪ܃ ܕܠܳܐ ܠܽܘܩܕܼܰܡ ܥܡܰܕܼ ܡܶܢ ܩܕܼܳܡ ܫܳܪܽܘܬܼܶܗ܀
11:39 [ai]ܐܶܡܰܪ ܠܶܗ ܕܶܝܢ ܝܶܫܽܘܥ܂ ܗܳܫܳܐ܂ ܐܰܢ̱ܬܿܽܘܢ ܦܿܪ̈ܺܝܫܶܐ܃ ܒܰܪܶܗ ܕܟܳܣܳܐ ܘܰܕܼܦܺܝܢܟܿܳܐ ܡܕܼܰܟܿܶܝܢ ܐܢ̱ܬܿܽܘܢ܂ ܠܓܼܰܘ ܡܶܢܟܼܽܘܢ ܕܶܝܢ ܡܠܶܐ ܚܛܽܘܦܼܝܳܐ ܘܒܼܺܝܫܬܳܐ܂
11:40 [ai]ܚܰܣܺܝܪ̈ܰܝ ܪܶܥܝܳܢܳܐ܃ ܠܳܐ ܗ̱ܘܳܐ ܡܰܢ ܕܰܥܒܼܰܕܼ ܕܰܠܒܼܰܪ܃ ܘܕܼܰܠܓܼܰܘ ܗܽܘ ܥܒܼܰܕܼ܂
11:41 [ai]ܒܪܰܡ ܡܶܕܶܡ ܕܺܐܝܬܼ ܗܰܒܼܽܘܗ̱ܝ ܒܙܶܕܼܩܬܼܳܐ܃ ܘܗܳܐ ܟܽܠܡܶܕܶܡ ܕܟܶܐ ܗ̱ܽܘ ܠܟܼܽܘܢ܀
11:42 [ai]ܐܶܠܳܐ ܘܳܝ ܠܟܼܽܘܢ ܦܿܪ̈ܺܝܫܶܐ܃ ܕܰܡܥܰܣܪܺܝܢ ܐܢ̱ܬܿܽܘܢ ܢܳܢܥܳܐ ܘܦܼܺܓܼܰܢܳܐ ܘܟܼܽܠ ܝܽܘܪܳܩ܃ ܘܥܳܒܼܪܺܝܢ ܐܢ̱ܬܿܽܘܢ ܥܰܠ ܕܺܝܢܳܐ ܘܥܰܠ ܚܽܘܒܿܳܐ ܕܰܐܠܳܗܳܐ܂ ܗܳܠܶܝܢ ܕܶܝܢ ܘܳܠܶܐ ܗ̱ܘܳܐ ܕܬܶܥܒܿܕܼܽܘܢ܃ ܘܗܳܠܶܝܢ ܠܳܐ ܬܶܫܒܿܩܽܘܢ܀
11:43 [ai]ܘܳܝ ܠܟܼܽܘܢ ܦܿܪ̈ܺܝܫܶܐ܃ ܕܪܳܚܡܺܝܢ ܐܢ̱ܬܿܽܘܢ ܪܺܝܫ ܡܰܘܬܿܒܼܶܐ̈ ܒܰܟܼܢܽܘܫܳܬܼܳܐ̈܂ ܘܰܫܠܳܡܳܐ ܒܫܽܘܩܶܐ̈܀
11:44 [ai]ܘܳܝ ܠܟܼܽܘܢ ܣܳܦܼܪ̈ܶܐ ܘܰܦܼܪ̈ܺܝܫܶܐ ܢܳܣܒܰܝ̈ ܒܰܐܦܿܶܐ̈܂ ܕܺܐܝܬܼܰܝܟܿܽܘܢ ܐܰܝܟܼ ܩܰܒܼܪ̈ܶܐ ܕܠܳܐ ܺܝܕܼܺܝܥܺܝܢ܂ ܘܰܒܢܰܝ ܐ̱ܢܳܫܳܐ ܡܗܰܠܟܼܺܝܢ ܥܠܰܝܗܽܘܢ܂ ܘܠܳܐ ܝܳܕܼܥܺܝܢ܀
11:45 [ai]ܘܰܥܢܳܐ ܚܰܕܼ ܡܶܢ ܣܳܦܼܪ̈ܶܐ܂ ܘܶܐܡܰܪ ܠܶܗ܂ ܡܰܠܦܼܳܢܳܐ܃ ܟܰܕܼ ܗܳܠܶܝܢ ܐܳܡܰܪ ܐܰܢ̱ܬܿ܂ ܐܳܦܼ ܠܰܢ ܡܨܰܥܰܪ ܐܰܢ̱ܬܿ܂
11:46 [ai]ܗܽܘ ܕܶܝܢ ܐܶܡܰܪ܂ ܐܳܦܼ ܠܟܼܽܘܢ ܣܳܦܼܪ̈ܶܐ܂ ܘܳܝ܂ ܕܡܰܛܥܢܺܝܢ ܐܢ̱ܬܿܽܘܢ ܠܰܒܼܢܰܝ ܐ̱ܢܳܫܳܐ ܡܰܘܒܿܠܶܐ̈ ܝܰܩܺܝܪ̈ܳܬܼܳܐ܂ ܘܰܐܢ̱ܬܿܽܘܢ ܒܰܚܕܼܳܐ ܡܶܢ ܨܶܒܼܥܳܬܼܟܼܽܘܢ̈܂ ܠܳܐ ܩܳܪܒܺܝܢ ܐܢ̱ܬܿܽܘܢ ܠܗܶܝܢ ܠܡܰܘܒܿܠܶܐ̈܀
11:47 [ai]ܘܳܝ ܠܟܼܽܘܢ܂ ܕܒܳܢܶܝܢ ܐܢ̱ܬܿܽܘܢ ܩܰܒܼܪ̈ܶܐ ܕܰܢܒܼܺܝܶܐ̈܃ ܕܰܐܒܼܳܗܰܝܟܿܽܘܢ̈ ܩܰܛܶܠܘ ܐܶܢܽܘܢ܂
11:48 [ai]ܣܳܗܕܺܝܢ ܐܢ̱ܬܿܽܘܢ ܗܳܟܼܺܝܠ܂ ܘܨܳܒܼܶܝܢ ܐܢ̱ܬܿܽܘܢ ܒܰܥܒܼܳܕܼܶܐ̈ ܕܰܐܒܼܳܗܰܝܟܿܽܘܢ̈܂ ܕܗܶܢܽܘܢ ܩܰܛܶܠܘ ܐܶܢܽܘܢ܃ ܘܰܐܢ̱ܬܿܽܘܢ ܒܳܢܶܝܢ ܐܢ̱ܬܿܽܘܢ ܩܰܒܼܪ̈ܰܝܗܽܘܢ܀
11:49 [ai]ܡܶܛܽܠ ܗܳܢܳܐ ܐܳܦܼ ܚܶܟܼܡܬܼܳܐ ܕܰܐܠܳܗܳܐ ܐܶܡܪܰܬܼ܂ ܕܗܳܐ ܐܶܢܳܐ ܐܶܫܰܕܿܰܪ ܠܗܽܘܢ ܢܒܼܺܝܶܐ̈܂ ܘܰܫܠܺܝܚܶܐ̈܂ ܡܶܢܗܽܘܢ ܢܶܪܕܿܦܼܽܘܢ܂ ܘܢܶܩܛܠܽܘܢ܂
11:50 [ai]ܕܢܶܬܿܬܿܒܼܰܥ ܕܡܳܐ ܕܟܽܠܗܽܘܢ ܢܒܼܺܝܶܐ̈ ܕܶܐܬܼܶܐܫܶܕܼ ܡܶܢ ܕܶܐܬܼܒܿܪܺܝ ܥܳܠܡܳܐ܃ ܡܶܢ ܫܰܪܒܿܬܼܳܐ ܗܳܕܼܶܐ܃
11:51 [ai]ܡܶܢ ܕܡܶܗ ܕܗܳܒܼܶܝܠ܂ ܥܕܼܰܡܳܐ ܠܰܕܼܡܶܗ ܕܰܙܟܼܰܪܝܳܐ܃ ܗܰܘ ܕܶܐܬܼܩܛܶܠ ܒܰܝܢܰܝ ܗܰܝܟܠܳܐ ܠܡܰܕܼܒܿܚܳܐ܂ ܐܺܝܢ܂ ܐܳܡܰܪ ܐ̱ܢܳܐ ܠܟܼܽܘܢ܃ ܕܡܶܬܿܬܿܒܼܰܥ ܡܶܢ ܫܰܪܒܿܬܼܳܐ ܗܳܕܼܶܐ܀
11:52 [ai]ܘܳܝ ܠܟܼܽܘܢ ܣܳܦܼܪ̈ܶܐ܃ ܕܰܫܩܰܠܬܿܽܘܢ ܩܠܺܝܕܼܶܐ̈ ܕܺܝܕܼܰܥܬܼܳܐ܂ ܐܰܢ̱ܬܿܽܘܢ ܠܳܐ ܥܰܠܬܿܽܘܢ܂ ܘܠܰܐܝܠܶܝܢ ܕܥܳܐܠܺܝܢ܂ ܟܠܰܝܬܿܽܘܢ܀
11:53 [ai]ܘܟܼܰܕܼ ܗܳܠܶܝܢ ܐܶܡܰܪ ܗ̱ܘܳܐ ܠܗܽܘܢ܂ ܫܰܪܺܝܘ ܣܳܦܼܪ̈ܶܐ ܘܰܦܼܪ̈ܺܝܫܶܐ ܡܶܬܼܒܿܶܐܫ ܠܗܽܘܢ܃ ܘܡܶܬܼܚܰܡܬܼܺܝܢ ܘܰܡܬܼܰܟܣܺܝܢ ܡܶܠܰܘܗ̱ܝ̈܃
11:54 [ai]ܘܢܳܟܼܠܺܝܢ ܠܶܗ ܒܣܰܓܿܺܝܳܐܬܼܳܐ̈܂ ܟܰܕܼ ܒܿܳܥܶܝܢ ܠܡܶܐܚܰܕܼ ܡܶܕܶܡ ܡܶܢ ܦܽܘܡܶܗ܂ ܕܢܶܫܟܿܚܽܘܢ ܢܶܐܟܼܠܽܘܢ ܩܰܪ̈ܨܰܘܗ̱ܝ܀܀

next chapter