← Back
The Comprehensive Aramaic Lexicon
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


12:01 [ai]ܘܟܼܰܕܼ ܐܶܬܼܟܿܰܢܰܫܘ ܪ̈ܶܒܿܘܳܬܼܳܐ ܕܟܶܢܫܶܐ̈ ܣܰܓܿܺܝܶܐܐ̈܃ ܐܰܝܟܿܰܢܳܐ ܕܰܢܕܼܰܝܫܽܘܢ ܚܰܕܼ ܠܚܰܕܼ܃ ܫܰܪܺܝ ܝܶܫܽܘܥ ܠܡܺܐܡܰܪ ܠܬܼܰܠܡܺܝܕܼܰܘܗ̱ܝ̈܂ ܠܽܘܩܕܼܰܡ ܐܶܙܕܿܰܗ̱ܪܘ ܒܢܰܦܼܫܟܼܽܘܢ ܡܶܢ ܚܡܺܝܪܳܐ ܕܿܰܦܼܪ̈ܺܝܫܶܐ܃ ܕܺܐܝܬܼܰܘܗ̱ܝ ܡܰܣܰܒܼ ܒܰܐܦܿܶܐ̈܂
12:02 [ai]ܠܰܝܬܿ ܕܶܝܢ ܡܶܕܶܡ ܕܰܟܼܣܶܐ܂ ܕܠܳܐ ܢܶܬܼܓܠܶܐ܃ ܘܠܳܐ ܕܰܡܛܰܫܰܝ܂ ܕܠܳܐ ܢܶܬܼܺܝܕܼܰܥ܂
12:03 [ai]ܟܽܠ ܓܶܝܪ ܕܰܒܼܚܶܫܽܘܟܼܳܐ ܐܶܡܰܪܬܿܽܘܢ܃ ܒܢܰܗܺܝܪܳܐ ܢܶܫܬܿܡܰܥ܂ ܘܡܶܕܶܡ ܕܰܒܼܬܼܰܘܳܢܶܐ̈ ܒܶܐܕܼܢܶܐ̈ ܠܰܚܶܫܬܿܽܘܢ܃ ܥܰܠ ܐܶܓܿܳܪ̈ܶܐ ܢܶܬܼܟܿܪܶܙ܂
12:04 [ai]ܐܳܡܰܪ ܐ̱ܢܳܐ ܠܟܼܽܘܢ ܕܶܝܢ ܠܪ̈ܳܚܡܰܝ܂ ܠܳܐ ܬܶܕܼܚܠܽܘܢ ܡܶܢ ܐܰܝܠܶܝܢ ܕܩܳܛܠܺܝܢ ܦܰܓܼܪܳܐ܃ ܘܡܶܢ ܒܳܬܼܰܪܟܿܶܢ ܠܰܝܬܿ ܠܗܽܘܢ ܡܶܕܶܡ ܝܰܬܿܺܝܪ ܠܡܶܥܒܿܰܕܼ܂
12:05 [ai]ܐܶܚܰܘܶܝܟܼܽܘܢ ܕܶܝܢ ܡܶܢ ܡܰܢ ܬܶܕܼܚܠܽܘܢ܂ ܡܶܢ ܗܰܘ ܕܡܶܢ ܒܳܬܼܰܪ ܕܩܳܛܶܠ܃ ܫܰܠܺܝܛ ܠܡܰܪܡܳܝܽܘ ܒܓܺܗܰܢܳܐ܂ ܐܺܝܢ ܐܳܡܰܪ ܐ̱ܢܳܐ ܠܟܼܽܘܢ܂ ܕܡܶܢ ܗܳܢܳܐ ܕܚܰܠܘ܂
12:06 [ai]ܠܳܐ ܚܰܡܶܫ ܨܶܦܿܪ̈ܺܝܢ ܡܶܙܕܿܰܒܿܢܳܢ̈ ܒܰܬܼܪ̈ܶܝܢ ܐܰܣܳܪ̈ܺܝܢ܃ ܘܰܚܕܼܳܐ ܡܶܢܗܶܝܢ܂ ܠܳܐ ܛܳܥܝܳܐ ܩܕܼܳܡ ܐܰܠܳܗܳܐ܂
12:07 [ai]ܕܺܝܠܟܼܽܘܢ ܕܶܝܢ܂ ܐܳܦܼ ܡܶܢܶܐ̈ ܕܣܰܥܪܳܐ ܕܪܺܫܟܼܽܘܢ܃ ܟܽܠܗܶܝܢ ܡܰܢܝܳܢ̈ ܐܶܢܶܝܢ̈܂ ܠܳܐ ܗܳܟܼܺܝܠ ܬܶܕܼܚܠܽܘܢ܂ ܕܡܶܢ ܣܽܘܓܼܳܐܐ ܕܿܨܶܦܿܪ̈ܶܐ ܡܝܰܬܿܪܺܝܢ ܐܢ̱ܬܿܽܘܢ܂
12:08 [ai]ܐܳܡܰܪ ܐ̱ܢܳܐ ܠܟܼܽܘܢ ܕܶܝܢ܃ ܕܟܽܠ ܕܢܰܘܕܿܶܐ ܒܺܝ ܩܕܼܳܡ ܒܢܰܝܢܳܫܳܐ܃ ܐܳܦܼ ܒܪܶܗ ܕܐ̱ܢܳܫܳܐ ܢܰܘܕܿܶܐ ܒܶܗ܂ ܩܕܼܳܡ ܡܰܠܰܐܟܼܰܘܗ̱ܝ̈ ܕܰܐܠܳܗܳܐ܂
12:09 [ai]ܐܰܝܢܳܐ ܕܶܝܢ ܕܟܳܦܼܰܪ ܒܺܝ ܩܕܼܳܡ ܒܢܰܝܢܳܫܳܐ܃ ܢܶܬܼܟܦܼܰܪ ܒܶܗ ܩܕܼܳܡ ܡܰܠܰܐܟܼܰܘܗ̱ܝ̈ ܕܰܐܠܳܗܳܐ܂
12:10 [ai]ܘܟܼܽܠ ܕܢܺܐܡܰܪ ܡܶܠܬܼܳܐ ܥܰܠ ܒܪܶܗ ܕܐ̱ܢܳܫܳܐ܂ ܢܶܫܬܿܒܼܶܩ ܠܶܗ܂ ܡܰܢ ܕܥܰܠ ܪܽܘܚܳܐ ܕܶܝܢ ܕܩܽܘܕܼܫܳܐ ܢܓܼܰܕܿܶܦܼ܂ ܠܳܐ ܢܶܫܬܿܒܼܶܩ ܠܶܗ܀
12:11 [ai]ܡܳܐ ܕܰܡܩܰܪܒܼܺܝܢ ܠܟܼܽܘܢ ܕܶܝܢ ܠܰܟܼܢܽܘܫܳܬܼܳܐ̈܂ ܩܕܼܳܡ ܪ̈ܺܫܶܐ ܘܫܰܠܺܝܛܳܢܶܐ̈܃ ܠܳܐ ܬܺܐܨܦܿܽܘܢ ܐܰܝܟܿܰܢܳܐ ܬܶܦܿܩܽܘܢ ܪܽܘܚܳܐ܂ ܐܰܘ ܡܳܢܳܐ ܬܺܐܡܪܽܘܢ܂
12:12 [ai]ܪܽܘܚܳܐ ܓܶܝܪ ܕܩܽܘܕܼܫܳܐ ܢܰܠܶܦܼܟܼܽܘܢ ܒܗܳܝ ܫܳܥܬܼܳܐ܂ ܡܶܕܶܡ ܕܘܳܠܶܐ ܕܬܺܐܡܪܽܘܢ܀܀
12:13 [ai]ܐܶܡܰܪ ܠܶܗ ܕܶܝܢ ܐ̱ܢܳܫ ܡܶܢ ܗܰܘ ܟܶܢܫܳܐ܂ ܡܰܠܦܼܳܢܳܐ܃ ܐܶܡܰܪ ܠܳܐܚܝ ܦܳܠܶܓܼ ܥܰܡܝ ܝܳܪܬܿܽܘܬܼܳܐ܂
12:14 [ai]ܝܶܫܽܘܥ ܕܶܝܢ ܐܶܡܰܪ ܠܶܗ܂ ܓܰܒܼܪܳܐ܃ ܡܰܢܽܘ ܐܰܩܺܝܡܰܢܝ ܥܠܰܝܟܿܽܘܢ ܕܰܝܳܢܳܐ ܘܰܡܦܼܰܠܓܼܳܢܳܐ܂
12:15 [ai]ܘܶܐܡܰܪ ܠܬܼܰܠܡܺܝܕܼܰܘܗ̱ܝ̈܂ ܐܶܙܕܿܰܗ̱ܪܘ ܡܶܢ ܟܽܠܳܗ ܝܰܥܢܽܘܬܼܳܐ܂ ܡܶܛܽܠ ܕܠܳܐ ܗ̱ܘܳܐ ܒܝܰܬܿܺܝܪܽܘܬܼܳܐ ܕܢܶܟܼܣܶܐ̈ ܐܺܝܬܼ ܚܰܝ̈ܶܐ ܿ܀ܿ܀ܿ
12:16 [ai]ܘܶܐܡܰܪ ܡܰܬܼܠܳܐ ܠܘܳܬܼܗܽܘܢ܂ ܓܰܒܼܪܳܐ ܚܰܕܼ ܥܰܬܿܺܝܪܳܐ܃ ܐܰܥܠܰܬܼ ܠܶܗ ܐܰܪܥܶܗ ܥܰܠ̱ܠܳܬܼܳܐ̈ ܣܰܓܿܺܝܳܐܬܼܳܐ̈܂
12:17 [ai]ܘܡܶܬܼܚܰܫܰܒܼ ܗ̱ܘܳܐ ܒܢܰܦܼܫܶܗ܂ ܘܶܐܡܰܪ܂ ܡܳܢܳܐ ܐܶܥܒܿܶܕܼ ܕܠܰܝܬܿ ܠܺܝ ܐܰܝܟܿܳܐ ܕܶܐܚܡܽܘܠ ܥܰܠ̱ܠܳܬܼܝ̈܂
12:18 [ai]ܘܶܐܡܰܪ܂ ܗܳܕܼܶܐ ܐܶܥܒܿܶܕܼ܂ ܐܶܣܬܿܽܘܪ ܒܶܝܬܼ ܩܦܼܳܣܰܝ̈܃ ܘܶܐܒܼܢܶܐ ܘܰܐܘܪܶܒܼ ܐܶܢܽܘܢ܂ ܘܶܐܚܡܽܘܠ ܬܰܡܳܢ ܟܽܠܶܗ ܥܒܼܽܘܪܝ ܘܛܳܒܼܳܬܼܝ̈܂
12:19 [ai]ܘܺܐܡܰܪ ܠܢܰܦܼܫܝ܂ ܢܰܦܼܫܝ܂ ܐܺܝܬܼ ܠܶܟܼܝ ܛܳܒܼܳܬܼܳܐ̈ ܣܰܓܿܺܝܳܐܬܼܳܐ̈܃ ܕܣܺܝܡܳܢ̈ ܠܰܫܢܰܝܳܐ̈ ܣܰܓܿܺܝܳܐܬܼܳܐ̈܂ ܐܶܬܿܬܿܢܺܝܚܝ܂ ܐܰܟܼܽܘܠܝ܂ ܐܶܫܬܿܳܝ܂ ܐܶܬܼܒܿܰܣ̱ܡܝ܂
12:20 [ai]ܐܳܡܰܪ ܠܶܗ ܕܶܝܢ ܐܰܠܳܗܳܐ܂ ܚܣܺܝܪ ܪܶܥܝܳܢܳܐ܂ ܒܗܳܢܳܐ ܠܺܠܝܳܐ ܢܰܦܼܫܳܟܼ܂ ܬܳܒܼܥܺܝܢ ܠܳܗ ܡܶܢܳܟܼ܂ ܘܗܳܠܶܝܢ ܕܛܰܝܶܒܼܬܿ ܠܡܰܢ ܢܶܗܘܝܳܢ̈܂
12:21 [ai]ܗܳܟܼܰܢܳܐ ܗ̱ܘ ܡܰܢ ܕܣܳܐܶܡ ܠܶܗ ܣܺܝܡܳܬܼܳܐ̈܃ ܘܒܼܰܐܠܳܗܳܐ ܠܳܐ ܥܰܬܿܺܝܪ܀
12:22 [ai]ܘܶܐܡܰܪ ܠܬܼܰܠܡܺܝܕܼܰܘܗ̱ܝ̈܂ ܡܶܛܽܠ ܗܳܢܳܐ ܠܟܼܽܘܢ ܐܳܡܰܪ ܐ̱ܢܳܐ܂ ܠܳܐ ܬܺܐܨܦܿܽܘܢ ܠܢܰܦܼܫܟܼܽܘܢ܂ ܡܳܢܳܐ ܬܶܐܟܼܠܽܘܢ܃ ܘܠܳܐ ܠܦܼܰܓܼܪܟܼܽܘܢ܂ ܡܳܢܳܐ ܬܶܠܒܿܫܽܘܢ܂
12:23 [ai]ܢܰܦܼܫܳܐ ܓܶܝܪ ܝܰܬܿܺܝܪܳܐ ܡܶܢ ܣܰܝܒܿܳܪܬܳܐ܃ ܘܦܼܰܓܼܪܳܐ ܡܶܢ ܠܒܼܽܘܫܳܐ܂
12:24 [ai]ܐܶܬܼܒܿܰܩܰܘ ܒܢܰܥܒܼܶܐ̈܂ ܕܠܳܐ ܙܳܪܥܺܝܢ܂ ܘܠܳܐ ܚܳܨܕܺܝܢ܂ ܘܠܰܝܬܿ ܠܗܽܘܢ ܬܰܘܳܢܶܐ̈ ܘܒܼܶܝܬܼܩܦܼܳܣܶܐ̈܂ ܘܰܐܠܳܗܳܐ ܡܬܼܰܪܣܶܐ ܠܗܽܘܢ܂ ܟܡܳܐ ܗܳܟܼܺܝܠ ܐܰܢ̱ܬܿܽܘܢ ܝܰܬܿܺܝܪܺܝܢ ܐܢ̱ܬܿܽܘܢ ܡܶܢ ܦܿܳܪ̈ܚܳܬܼܳܐ܂
12:25 [ai]ܐܰܝܢܳܐ ܕܶܝܢ ܡܶܢܟܼܽܘܢ ܟܰܕܼ ܝܳܨܶܦܼ܃ ܡܶܫܟܿܰܚ ܠܡܰܘܣܳܦܼܽܘ ܥܰܠ ܩܰܘܡܬܼܶܗ ܐܰܡܬܼܳܐ ܚܕܼܳܐ܂
12:26 [ai]ܐܶܢ ܕܶܝܢ ܐܳܦܼ ܠܳܐ ܙܥܽܘܪܬܳܐ ܡܶܫܟܿܚܺܝܢ ܐܢ̱ܬܿܽܘܢ܃ ܡܳܢܳܐ ܥܰܠ ܫܰܪܟܿܳܐ ܝܳܨܦܿܺܝܢ ܐܢ̱ܬܿܽܘܢ܂
12:27 [ai]ܐܶܬܼܒܿܰܩܰܘ ܒܫܽܘܫܰܢܶܐ̈ ܐܰܝܟܿܰܢܳܐ ܪ̈ܳܒܼܝܳܢ܂ ܕܠܳܐ ܠܳܐܝܳܢ̈ ܘܠܳܐ ܥܳܙܠܳܢ̈܂ ܐܳܡܰܪ ܐ̱ܢܳܐ ܠܟܼܽܘܢ ܕܶܝܢ܃ ܕܳܐܦܼ ܠܳܐ ܫܠܶܝܡܳܘܢ ܒܟܽܠܶܗ ܫܽܘܒܼܚܶܗ܂ ܐܶܬܼܟܿܰܣܺܝ ܐܰܝܟܼ ܚܕܼܳܐ ܡܶܢ ܗܳܠܶܝܢ܂
12:28 [ai]ܐܶܢ ܕܶܝܢ ܠܰܥܡܺܝܪܳܐ ܕܝܰܘܡܳܢܳܐ ܐܺܝܬܼܰܘܗ̱ܝ ܒܚܰܩܠܳܐ܃ ܘܰܡܚܳܪ ܢܳܦܼܶܠ ܒܬܰܢܽܘܪܳܐ܃ ܐܰܠܳܗܳܐ ܗܳܟܼܰܢܳܐ ܡܰܠܒܿܶܫ܃ ܟܡܳܐ ܝܰܬܿܺܝܪ ܠܟܼܽܘܢ ܙܥܽܘܪ̈ܰܝ ܗܰܝܡܳܢܽܘܬܼܳܐ܃
12:29 [ai]ܘܰܐܢ̱ܬܿܽܘܢ ܠܳܐ ܬܶܒܼܥܽܘܢ ܡܳܢܳܐ ܬܶܐܟܼܠܽܘܢ܂ ܘܡܳܢܳܐ ܬܶܫܬܿܽܘܢ܂ ܘܠܳܐ ܢܶܦܼܗܶܐ ܪܶܥܝܳܢܟܼܽܘܢ ܒܗܳܠܶܝܢ܂
12:30 [ai]ܗܳܠܶܝܢ ܓܶܝܪ ܟܽܠܗܶܝܢ܂ ܥܰܡ̱ܡܶܐ̈ ܗ̱ܘ ܕܥܳܠܡܳܐ ܒܿܳܥܶܝܢ܂ ܐܳܦܼ ܠܟܼܽܘܢ ܕܶܝܢ ܐܰܒܼܽܘܟܼܽܘܢ ܝܳܕܼܰܥ ܕܡܶܬܼܒܿܰܥܝܳܢ̈ ܠܟܼܽܘܢ ܗܳܠܶܝܢ܂
12:31 [ai]ܒܪܰܡ ܒܥܰܘ ܡܰܠܟܿܽܘܬܼܶܗ ܕܰܐܠܳܗܳܐ܃ ܘܗܳܠܶܝܢ ܟܽܠܗܶܝܢ ܡܶܬܿܬܰܘܣܦܼܳܢ̈ ܠܟܼܽܘܢ܀
12:32 [ai]ܠܳܐ ܬܶܕܼܚܰܠ ܓܙܳܪܳܐ ܙܥܽܘܪܳܐ܂ ܕܰܨܒܼܳܐ ܐܰܒܼܽܘܟܼܽܘܢ ܕܢܶܬܿܶܠ ܠܟܼܽܘܢ ܡܰܠܟܿܽܘܬܼܳܐ܀
12:33 [ai]ܙܰܒܿܶܢܘ ܩܶܢܝܳܢܟܼܽܘܢ܂ ܘܗܰܒܼܘ ܙܶܕܼܩܬܼܳܐ܂ ܥܒܼܶܕܼܘ ܠܟܼܽܘܢ ܟܺܝܣܶܐ̈ ܕܠܳܐ ܒܳܠܶܝܢ܂ ܘܣܺܝܡܬܼܳܐ ܕܠܳܐ ܓܳܝܙܳܐ܂ ܒܰܫܡܰܝܳܐ܂ ܐܰܝܟܿܳܐ ܕܓܰܢܳܒܼܳܐ ܠܳܐ ܩܳܪܶܒܼ܂ ܘܣܳܣܳܐ ܠܳܐ ܡܚܰܒܿܶܠ܂
12:34 [ai]ܐܰܝܟܿܳܐ ܓܶܝܪ ܕܺܐܝܬܼܶܝܗ ܣܺܝܡܰܬܼܟܼܽܘܢ܃ ܬܰܡܳܢ ܢܶܗܘܶܐ ܐܳܦܼ ܠܶܒܟܽܘܢ܀
12:35 [ai]ܢܶܗܘܽܘܢ ܐܰܣܺܝܪܺܝܢ ܚܰܨܰܝܟܿܽܘܢ̈܂ ܘܡܰܢܗܪܺܝܢ ܫܪ̈ܳܓܼܰܝܟܿܽܘܢ܂
12:36 [ai]ܘܰܗܘܰܘ ܕܳܡܶܝܢ ܠܐ̱ܢܳܫܳܐ ܕܰܡܣܰܟܿܶܝܢ ܠܡܳܪܗܽܘܢ܃ ܕܶܐܡܰܬܼܝ ܢܶܦܼܢܶܐ ܡܶܢ ܒܶܝܬܼ ܡܶܫܬܿܽܘܬܼܳܐ܂ ܕܡܳܐ ܕܶܐܬܼܳܐ ܘܰܢܩܰܫ܃ ܡܶܚܕܼܳܐ ܢܶܦܼܬܿܚܽܘܢ ܠܶܗ܂
12:37 [ai]ܛܽܘܒܼܰܝܗܽܘܢ ܠܥܰܒܼܕܿܶܐ̈ ܗܳܢܽܘܢ܃ ܐܰܝܠܶܝܢ ܕܢܺܐܬܼܶܐ ܡܳܪܗܽܘܢ ܘܢܶܫܟܿܰܚ ܐܶܢܽܘܢ ܟܰܕܼ ܥܺܝܪܺܝܢ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܢܶܐܣܽܘܪ ܚܰܨܰܘܗ̱ܝ̈܂ ܘܢܰܣܡܶܟܼ ܐܶܢܽܘܢ܃ ܘܢܶܥܒܰܪ܂ ܢܫܰܡܶܫ ܐܶܢܽܘܢ܂
12:38 [ai]ܘܶܐܢ ܒܡܰܛܰܪܬܼܳܐ ܕܿܬܼܰܪ̈ܬܿܶܝܢ ܐܰܘ ܕܰܬܼܠܳܬܼ ܢܺܐܬܼܶܐ܂ ܘܢܶܫܟܿܰܚ ܗܳܟܼܰܢܳܐ܃ ܛܽܘܒܼܰܝܗܽܘܢ ܠܥܰܒܼܕܿܶܐ̈ ܗܳܢܽܘܢ܀
12:39 [ai]ܗܳܕܼܶܐ ܕܶܝܢ ܕܰܥܘ܂ ܕܶܐܠܽܘ ܝܳܕܼܰܥ ܗ̱ܘܳܐ ܡܳܪܶܐ ܒܰܝܬܳܐ܂ ܒܰܐܝܕܼܳܐ ܡܰܛܰܪܬܼܳܐ ܐܳܬܼܶܐ ܓܰܢܳܒܼܳܐ܃ ܡܶܬܿܬܿܥܺܝܪ ܗ̱ܘܳܐ܂ ܘܠܳܐ ܫܳܒܼܶܩ ܗ̱ܘܳܐ ܕܢܶܬܼܦܿܠܶܫ ܒܰܝܬܿܶܗ܂
12:40 [ai]ܐܳܦܼ ܐܰܢ̱ܬܿܽܘܢ ܗܳܟܼܺܝܠ ܗܘܰܘ ܡܛܰܝܒܼܶܐ̈܂ ܕܰܒܼܗܳܝ ܫܳܥܬܼܳܐ ܕܠܳܐ ܣܳܒܼܪܺܝܢ ܐܢ̱ܬܿܽܘܢ܂ ܐܳܬܼܶܐ ܒܪܶܗ ܕܐ̱ܢܳܫܳܐ܀
12:41 [ai]ܐܳܡܰܪ ܠܶܗ ܫܶܡܥܽܘܢ ܟܺܐܦܼܳܐ܂ ܡܳܪܰܢ܂ ܠܘܳܬܼܰܢ ܐܳܡܰܪ ܐܰܢ̱ܬܿ ܠܶܗ ܠܡܰܬܼܠܳܐ ܗܳܢܳܐ܃ ܐܰܘ ܐܳܦܼ ܠܘܳܬܼ ܟܽܠܢܳܫ܀
12:42 [ai]ܐܳܡܰܪ ܠܶܗ ܝܶܫܽܘܥ܂ ܡܰܢܽܘ ܟܰܝ ܐܺܝܬܼ ܪܰܒܰܝܬܳܐ ܡܗܰܝܡܢܳܐ ܘܚܰܟܿܺܝܡܳܐ܃ ܕܰܢܩܺܝܡܺܝܘܗ̱ܝ ܡܳܪܶܗ ܥܰܠ ܬܶܫܡܶܫܬܿܶܗ܃ ܕܢܶܬܿܶܠ ܦܳܪܣܳܐ ܒܙܰܒܼܢܶܗ܂
12:43 [ai]ܛܽܘܒܼܰܘܗ̱ܝ ܠܗܰܘ ܥܰܒܼܕܿܳܐ ܕܢܺܐܬܼܶܐ ܡܳܪܶܗ ܢܶܫܟܿܚܺܝܘܗ̱ܝ܂ ܕܥܳܒܼܶܕܼ ܗܳܟܼܰܢܳܐ܂
12:44 [ai]ܫܰܪܺܝܪܳܐܺܝܬܼ ܐܳܡܰܪ ܐ̱ܢܳܐ ܠܟܼܽܘܢ܃ ܕܰܢܩܺܝܡܺܝܘܗ̱ܝ ܥܰܠ ܟܽܠܶܗ ܩܶܢܝܳܢܶܗ܂
12:45 [ai]ܐܶܢ ܕܶܝܢ ܢܺܐܡܰܪ ܥܰܒܼܕܿܳܐ ܗܰܘ ܒܿܠܶܒܶܗ܃ ܕܡܳܪܝ ܡܰܘܚܰܪ ܠܡܶܐܬܼܳܐ܃ ܘܰܢܫܰܪܶܐ ܠܡܶܡܚܳܐ ܠܥܰܒܼܕܿܶܐ̈ ܘܠܰܐܡܗܳܬܼܳܐ̈ ܕܡܳܪܶܗ܃ ܘܰܢܫܰܪܶܐ ܠܡܶܠܥܰܣ ܘܰܠܡܶܫܬܳܐ ܘܰܠܡܶܪܘܳܐ܃
12:46 [ai]ܢܺܐܬܼܶܐ ܡܳܪܶܗ ܕܥܰܒܼܕܿܳܐ ܗܰܘ ܒܝܰܘܡܳܐ ܕܠܳܐ ܣܳܒܼܰܪ܂ ܘܰܒܫܳܥܬܼܳܐ ܕܠܳܐ ܝܳܕܼܰܥ܂ ܘܢܶܦܼܠܓܼܺܝܘܗ̱ܝ܂ ܘܰܢܣܺܝܡ ܡܢܳܬܼܶܗ ܥܰܡ ܗܳܢܽܘܢ ܕܠܳܐ ܡܗܰܝܡܢܺܝܢ܀
12:47 [ai]ܥܰܒܼܕܿܳܐ ܕܶܝܢ ܐܰܝܢܳܐ ܕܝܳܕܼܰܥ ܨܶܒܼܝܳܢܳܐ ܕܡܳܪܶܗ܃ ܘܠܳܐ ܛܰܝܶܒܼ ܠܶܗ ܐܰܝܟܼ ܨܶܒܼܝܳܢܶܗ܃ ܢܶܒܼܠܰܥ ܣܰܓܿܺܝܳܐܬܼܳܐ̈܂
12:48 [ai]ܗܰܘ ܕܶܝܢ ܕܠܳܐ ܝܳܕܼܰܥ܂ ܘܥܳܒܼܶܕܼ ܡܶܕܶܡ ܕܫܳܘܶܐ ܠܡܰܚܘܳܬܼܳܐ̈܃ ܢܶܒܼܠܰܥ ܡܰܚܘܳܬܼܳܐ̈ ܙܥܽܘܪ̈ܝܳܬܼܳܐ܂ ܟܽܠ ܓܶܝܪ ܕܶܐܬܼܺܝܗܶܒܼ ܠܶܗ ܣܰܓܿܺܝ܃ ܣܰܓܿܺܝ ܢܶܬܿܬܿܒܼܰܥ ܡܶܢܶܗ܂ ܘܰܠܗܰܘ ܕܰܐܓܼܥܶܠܘ ܠܶܗ ܣܰܓܿܺܝ܃ ܝܰܬܿܺܝܪܳܐܺܝܬܼ ܢܶܬܼܒܿܥܽܘܢ ܒܺܐܝܕܼܶܗ܀܀
12:49 [ai]ܢܽܘܪܳܐ ܐܶܬܼܺܝܬܼ ܕܰܐܪܡܶܐ ܒܰܐܪܥܳܐ܂ ܘܨܳܒܼܶܐ ܐ̱ܢܳܐ܂ ܐܶܠܽܘ ܡܶܢ ܟܰܕܿܽܘ ܚܶܒܿܰܬܼ܂
12:50 [ai]ܘܡܰܥܡܽܘܕܼܺܝܬܼܳܐ ܐܺܝܬܼ ܠܺܝ ܕܶܐܥܡܰܕܼ܃ ܘܣܰܓܿܺܝ ܐܰܠܺܝܨ ܐ̱ܢܳܐ܂ ܥܕܼܰܡܳܐ ܕܬܶܫܬܿܰܡܠܶܐ܂
12:51 [ai]ܣܳܒܼܪܺܝܢ ܐܢ̱ܬܿܽܘܢ܃ ܕܫܰܝܢܳܐ ܐܶܬܼܺܝܬܼ ܕܰܐܪܡܶܐ ܒܰܐܪܥܳܐ܃ ܐܳܡܰܪ ܐ̱ܢܳܐ ܠܟܼܽܘܢ܂ ܕܠܳܐ܃ ܐܶܠܳܐ ܦܳܠܓܿܽܘܬܼܳܐ܂
12:52 [ai]ܡܶܢ ܗܳܫܳܐ ܓܶܝܪ ܢܶܗܘܽܘܢ ܚܰܡܫܳܐ ܒܒܼܰܝܬܳܐ ܚܰܕܼ܃ ܕܰܦܼܠܺܝܓܼܺܝܢ ܬܠܳܬܼܳܐ ܥܰܠ ܬܿܪ̈ܶܝܢ܂ ܘܰܬܼܪ̈ܶܝܢ ܥܰܠ ܬܠܳܬܼܳܐ܂
12:53 [ai]ܢܶܬܼܦܿܠܶܓܼ ܓܶܝܪ ܐܰܒܼܳܐ ܥܰܠ ܒܪܶܗ܃ ܘܰܒܪܳܐ ܥܰܠ ܐܰܒܼܽܘܗ̱ܝ܂ ܐܶܡܳܐ ܥܰܠ ܒܰܪܬܼܳܗ܃ ܘܒܼܰܪܬܼܳܐ ܥܰܠ ܐܶܡܳܗ܂ ܚܡܳܬܼܳܐ ܥܰܠ ܟܰܠܬܼܳܗ܃ ܘܟܼܰܠܬܼܳܐ ܥܰܠ ܚܡܳܬܼܳܗ܀
12:54 [ai]ܘܶܐܡܰܪ ܠܟܼܶܢܫܶܐ̈܂ ܡܳܐ ܕܰܚܙܰܝܬܿܽܘܢ ܥܢܳܢܳܐ ܕܕܼܳܢܚܳܐ ܡܶܢ ܡܰܥܪܒܼܳܐ܃ ܡܶܚܕܼܳܐ ܐܳܡܪܺܝܢ ܐܢ̱ܬܿܽܘܢ܂ ܡܶܛܪܳܐ ܐܳܬܼܶܐ܂ ܘܗܳܘܶܐ ܗܳܟܼܰܢܳܐ܂
12:55 [ai]ܘܡܳܐ ܕܢܳܫܒܿܳܐ ܬܰܝܡܢܳܐ܃ ܐܳܡܪܺܝܢ ܐܢ̱ܬܿܽܘܢ܂ ܚܽܘܡܳܐ ܗܳܘܶܐ܂ ܘܗܳܘܶܐ܂
12:56 [ai]ܢܳܣܒܰܝ̈ ܒܰܐܦܿܶܐ̈܃ ܦܰܪܨܽܘܦܿܳܐ ܕܰܐܪܥܳܐ ܘܕܼܰܫܡܰܝܳܐ ܝܳܕܼܥܺܝܢ ܐܢ̱ܬܿܽܘܢ ܕܬܶܦܼܪܫܽܘܢ܃ ܙܰܒܼܢܳܐ ܕܶܝܢ ܗܳܢܳܐ ܐܰܝܟܿܰܢܳܐ ܠܳܐ ܦܳܪܫܺܝܢ ܐܢ̱ܬܿܽܘܢ܀
12:57 [ai]ܠܡܳܢܳܐ ܕܶܝܢ ܡܶܢ ܢܰܦܼܫܟܼܽܘܢ ܠܳܐ ܕܳܝܢܺܝܢ ܐܢ̱ܬܿܽܘܢ ܩܽܘܫܬܳܐ܂
12:58 [ai]ܡܳܐ ܓܶܝܪ ܕܳܐܙܶܠ ܐܰܢ̱ܬܿ ܥܰܡ ܒܥܶܠܕܺܝܢܳܟܼ ܠܘܳܬܼ ܐܰܪܟܼܽܘܢܳܐ܃ ܥܰܕܼ ܒܽܐܘܪܚܳܐ ܐܰܢ̱ܬܿ܃ ܗܰܒܼ ܬܿܶܐܓܼܽܘܪܬܳܐ ܘܬܼܶܬܼܦܿܰܪܰܩ ܡܶܢܶܗ܂ ܕܰܠܡܳܐ ܢܰܘܒܿܠܳܟܼ ܠܘܳܬܼ ܕܰܝܳܢܳܐ܃ ܘܕܼܰܝܳܢܳܐ ܢܰܫܠܡܳܟܼ ܠܓܼܰܒܿܳܝܳܐ܃ ܘܓܼܰܒܿܳܝܳܐ ܢܰܪܡܶܝܟܼ ܒܶܝܬܼ ܐܰܣܺܝܪ̈ܶܐ܂
12:59 [ai]ܘܳܐܡܰܪ ܐ̱ܢܳܐ ܠܳܟܼ܃ ܕܠܳܐ ܬܿܶܦܽܘܩ ܡܶܢ ܬܰܡܳܢ܂ ܥܕܼܰܡܳܐ ܕܬܶܬܿܶܠ ܫܳܡܽܘܢܳܐ ܐ̱ܚܪܳܝܳܐ܀܀

next chapter