← Back
The Comprehensive Aramaic Lexicon
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


14:01 [ai]ܘܰܗܘܳܐ ܕܟܰܕܼ ܥܰܠ ܠܒܼܰܝܬܳܐ ܕܚܰܕܼ ܡܶܢ ܪ̈ܺܫܶܐ ܕܿܰܦܼܪ̈ܺܝܫܶܐ܂ ܕܢܶܐܟܼܽܘܠ ܠܰܚܡܳܐ ܒܝܰܘܡܳܐ ܕܫܰܒܿܬܼܳܐ܃ ܘܗܶܢܽܘܢ ܢܳܛܪܺܝܢ ܗ̱ܘܰܘ ܠܶܗ܂
14:02 [ai]ܘܗܳܐ ܓܰܒܼܪܳܐ ܚܰܕܼ ܕܰܟܼܢܺܝܫ ܗ̱ܘܳܐ ܡܰܝܳܐ̈܂ ܐܺܝܬܼ ܗ̱ܘܳܐ ܩܕܼܳܡܰܘܗ̱ܝ܀
14:03 [ai]ܘܰܥܢܳܐ ܝܶܫܽܘܥ܂ ܘܶܐܡܰܪ ܠܣܳܦܼܪ̈ܶܐ ܘܠܰܦܼܪ̈ܺܝܫܶܐ܂ ܕܶܐܢ ܫܰܠܺܝܛ ܒܫܰܒܿܬܼܳܐ ܠܡܰܐܣܳܝܽܘ܂
14:04 [ai]ܗܶܢܽܘܢ ܕܶܝܢ ܫܬܼܶܩܘ܂ ܘܰܐܚܕܿܶܗ ܗܽܘ܂ ܘܰܐܣܝܶܗ܂ ܘܰܫܪܳܝܗ̱ܝ܂
14:05 [ai]ܘܶܐܡܰܪ ܠܗܽܘܢ܂ ܡܰܢܽܘ ܡܶܢܟܼܽܘܢ ܕܢܶܦܿܶܠ ܒܪܶܗ܂ ܐܰܘ ܬܰܘܪܶܗ܂ ܒܒܼܺܪܳܐ ܒܝܰܘܡܳܐ ܕܫܰܒܿܬܼܳܐ܃ ܘܠܳܐ ܡܶܚܕܼܳܐ ܕܳܠܶܐ ܡܰܣܶܩ ܠܶܗ܀
14:06 [ai]ܘܠܳܐ ܐܶܫܟܿܰܚܘ ܠܡܶܬܿܰܠ ܠܶܗ ܦܶܬܼܓܼܳܡܳܐ ܥܰܠ ܗܳܕܼܶܐ܂
14:07 [ai]ܘܶܐܡܰܪ ܗ̱ܘܳܐ ܡܰܬܼܠܳܐ ܠܘܳܬܼ ܗܳܢܽܘܢ ܕܰܡܙܰܡܢܺܝܢ ܬܰܡܳܢ܃ ܥܰܠ ܕܚܳܙܶܐ ܗ̱ܘܳܐ ܠܗܽܘܢ܂ ܕܰܡܓܼܰܒܿܶܝܢ ܕܽܘܟܿܝܳܬܼܳܐ̈ ܕܪܺܝܫ ܣܡܳܟܼܶܐ̈܂
14:08 [ai]ܐܶܡܰܬܼܝ ܕܡܶܙܕܼܰܡܰܢ ܐܰܢ̱ܬܿ ܡܶܢ ܐ̱ܢܳܫ ܠܒܼܶܝܬܼ ܡܶܫܬܿܽܘܬܼܳܐ܃ ܠܳܐ ܬܺܐܙܰܠ ܬܶܣܬܿܡܶܟܼ ܠܳܟܼ ܒܪܺܝܫ ܣܡܳܟܼܳܐ܂ ܕܰܠܡܳܐ ܢܶܗܘܶܐ ܡܙܰܡܰܢ ܬܰܡܳܢ ܐ̱ܢܳܫ ܕܰܡܝܰܩܰܪ ܡܶܢܳܟܼ܃
14:09 [ai]ܘܢܺܐܬܼܶܐ ܗܰܘ ܡܰܢ ܕܠܳܟܼ ܘܠܶܗ ܩܪܳܐ܃ ܘܢܺܐܡܰܪ ܠܳܟܼ܂ ܕܗܰܒܼ ܕܽܘܟܿܬܼܳܐ ܠܗܳܢܳܐ܃ ܘܬܼܶܒܼܗܰܬܼ ܟܰܕܼ ܩܳܐܶܡ ܐܰܢ̱ܬܿ܂ ܘܳܐܚܶܕܼ ܐܰܢ̱ܬܿ ܕܽܘܟܿܬܼܳܐ ܐ̱ܚܪܳܝܬܳܐ܂
14:10 [ai]ܐܶܠܳܐ ܡܳܐ ܕܿܶܐܙܕܰܡܰܢܬܿ܃ ܙܶܠ ܐܶܣܬܿܰܡ̱ܟܿ ܠܳܟܼ ܒܚܰܪܬܼܳܐ܂ ܕܡܳܐ ܕܳܐܬܼܶܐ ܗܰܘ ܕܰܩܪܳܟܼ ܢܺܐܡܰܪ ܠܳܟܼ܂ ܪܳܚܶܡܝ܃ ܐܶܬܼܥܰܠܳܐ ܠܥܶܠ܂ ܘܶܐܣܬܿܰܡ̱ܟܿ܂ ܘܬܼܶܗܘܶܐ ܠܳܟܼ ܬܿܶܫܒܿܽܘܚܬܳܐ܂ ܩܕܼܳܡ ܟܽܠܗܽܘܢ ܕܰܣܡܺܝܟܼܺܝܢ ܥܰܡܳܟܼ܂
14:11 [ai]ܡܶܛܽܠ ܕܟܽܠ ܕܰܢܪܺܝܡ ܢܰܦܼܫܶܗ ܢܶܬܼܡܰܟܿܰܟܼ܃ ܘܟܼܽܠ ܕܢܰܡܶܟܼ ܢܰܦܼܫܶܗ ܢܶܬܿܬܿܪܺܝܡ܀
14:12 [ai]ܐܶܡܰܪ ܕܶܝܢ ܐܳܦܼ ܠܗܰܘ ܕܰܩܪܳܝܗ̱ܝ܂ ܡܳܐ ܕܥܳܒܼܶܕܼ ܐܰܢ̱ܬܿ ܫܳܪܽܘܬܼܳܐ ܐܰܘ ܐܰܚܫܳܡܺܝܬܼܳܐ܃ ܠܳܐ ܬܶܗܘܶܐ ܩܳܪܶܐ ܪ̈ܳܚܡܰܝܟܿ܂ ܐܳܦܼܠܳܐ ܐܰܚܰܝܟܿ̈܂ ܐܰܘ ܐ̱ܚܝܳܢܰܝܟܿ̈܂ ܘܠܳܐ ܫܒܼܳܒܼܰܝܟܿ̈ ܥܰܬܿܺܝܪ̈ܶܐ܂ ܕܰܠܡܳܐ ܘܳܐܦܼ ܗܶܢܽܘܢ ܢܶܩܪܽܘܢܳܟܼ܃ ܘܢܶܗܘܶܐ ܠܳܟܼ ܦܽܘܪܥܳܢܳܐ ܗܳܢܳܐ܂
14:13 [ai]ܐܶܠܳܐ ܡܳܐ ܕܥܳܒܼܶܕܼ ܐܰܢ̱ܬܿ ܩܽܘܒܿܳܠܳܐ܃ ܩܪܺܝ ܠܡܶܣܟܿܺܢܶܐ̈܂ ܣܓܼܺܝܦܼܶܐ̈܂ ܚܓܼܺܝܣܶܐ̈܂ ܣܡܰܝܳܐ̈܂
14:14 [ai]ܘܛܽܘܒܼܰܝܟܿ̈܂ ܕܠܰܝܬܿ ܠܗܽܘܢ ܕܢܶܦܼܪܥܽܘܢܳܟܼ܂ ܢܶܗܘܶܐ ܓܶܝܪ ܦܽܘܪܥܳܢܳܟܼ܂ ܒܰܩܝܳܡܳܐ ܕܙܰܕܿܺܝܩܶܐ̈܀܀
14:15 [ai]ܟܰܕܼ ܫܡܰܥ ܕܶܝܢ܂ ܚܰܕܼ ܡܶܢ ܗܳܢܽܘܢ ܕܰܣܡܺܝܟܼܺܝܢ ܗܳܠܶܝܢ܃ ܐܶܡܰܪ ܠܶܗ܂ ܛܽܘܒܼܰܘܗ̱ܝ̈ ܠܡܰܢ ܕܢܶܐܟܼܽܘܠ ܠܰܚܡܳܐ ܒܡܰܠܟܿܽܘܬܼܶܗ ܕܰܐܠܳܗܳܐ܀
14:16 [ai]ܐܳܡܰܪ ܠܶܗ ܝܶܫܽܘܥ܂ ܓܰܒܼܪܳܐ ܚܰܕܼ ܥܒܼܰܕܼ ܐܰܚܫܳܡܺܝܬܼܳܐ ܪܰܒܿܬܼܳܐ܂ ܘܰܩܪܳܐ ܠܣܰܓܿܺܝܶܐܐ̈܂
14:17 [ai]ܘܫܰܕܿܰܪ ܥܰܒܼܕܿܶܗ ܒܥܶܕܳܢܳܐ ܕܰܐܚܫܳܡܺܝܬܼܳܐ܂ ܕܢܺܐܡܰܪ ܠܰܐܝܠܶܝܢ ܕܰܩܪܶܝܢ܃ ܗܳܐ ܟܽܠܡܶܕܶܡ ܡܛܰܝܰܒܼ ܠܟܼܽܘܢ܂ ܬܰܘ܂
14:18 [ai]ܘܫܰܪܺܝܘ ܡܶܢ ܚܰܕܼ ܟܽܠܗܽܘܢ ܠܡܶܫܬܳܐܠܽܘ܂ ܐܳܡܰܪ ܠܶܗ ܩܰܕܼܡܳܝܳܐ܂ ܩܪܺܝܬܼܳܐ ܙܶܒܼܢܶܬܼ܃ ܘܰܐܠܺܝܨ ܐ̱ܢܳܐ ܕܶܐܦܽܘܩ ܐܶܚܙܶܝܗ܂ ܒܿܳܥܶܐ ܐ̱ܢܳܐ ܡܶܢܳܟܼ܂ ܫܒܼܽܘܩܰܝܢܝ ܕܡܶܫܬܿܶܐܠ ܐ̱ܢܳܐ܂
14:19 [ai]ܐ̱ܚܪܺܢܳܐ ܐܳܡܰܪ܂ ܚܰܡܫܳܐ ܙܰܘܓܿܺܝܢ̈ ܬܰܘܪ̈ܶܐ ܙܶܒܼܢܶܬܼ܃ ܘܳܐܙܶܠ ܐ̱ܢܳܐ ܕܶܐܒܼܩܶܐ ܐܶܢܽܘܢ܂ ܒܿܳܥܶܐ ܐ̱ܢܳܐ ܡܶܢܳܟܼ܂ ܫܒܼܽܘܩܰܝܢܝ ܕܡܶܫܬܿܶܐܠ ܐ̱ܢܳܐ ܿ܀ܿ܀ܿ
14:20 [ai]ܘܰܐ̱ܚܪܺܢܳܐ ܐܳܡܰܪ܂ ܐܰܢ̱ܬܿܬܼܳܐ ܢܶܣܒܿܶܬܼ܃ ܘܡܶܛܽܠ ܗܳܕܼܶܐ ܠܳܐ ܡܶܫܟܿܰܚ ܐ̱ܢܳܐ ܕܺܐܬܼܶܐ܂
14:21 [ai]ܘܶܐܬܼܳܐ ܗܰܘ ܥܰܒܼܕܿܳܐ܂ ܘܶܐܡܰܪ ܠܡܳܪܶܗ ܗܳܠܶܝܢ܂ ܗܳܝܕܶܝܢ ܪܓܼܶܙ ܡܳܪܶܐ ܒܰܝܬܳܐ܂ ܘܶܐܡܰܪ ܠܥܰܒܼܕܿܶܗ܂ ܦܽܘܩ ܒܰܥܓܼܰܠ ܠܫܽܘܩܶܐ̈ ܘܰܠܒܼܺܪ̈ܝܳܬܼܳܐ ܕܰܡܕܼܺܝܢ̱ܬܳܐ܃ ܘܰܐܥܶܠ ܠܟܼܳܐ܂ ܠܡܶܣܟܿܺܢܶܐ̈܂ ܘܰܠܡܰܟܼܶܐܒܼܶܐ̈܂ ܘܠܰܡܚܰܓܿܪ̈ܶܐ ܘܠܰܥܘܺܝܪ̈ܶܐ܂
14:22 [ai]ܘܶܐܡܰܪ ܥܰܒܼܕܿܳܐ܂ ܡܳܪܝ܃ ܗܘܳܐ ܐܰܝܟܼ ܕܰܦܼܩܰܕܿܬܿ܂ ܘܬܼܽܘܒܼ ܐܺܝܬܼ ܐܰܬܼܪܳܐ܂
14:23 [ai]ܘܶܐܡܰܪ ܡܳܪܳܐ ܠܥܰܒܼܕܿܶܗ܂ ܦܽܘܩ ܠܽܐܘܪ̈ܚܳܬܼܳܐ܂ ܘܰܠܒܼܶܝܬܼ ܣܝܳܓܼܶܐ̈܃ ܘܰܐܠܽܘܨ ܕܢܶܥܠܽܘܢ܂ ܕܢܶܬܼܡܠܶܐ ܒܰܝܬܿܝ܀
14:24 [ai]ܐܳܡܰܪ ܐ̱ܢܳܐ ܠܟܼܽܘܢ ܓܶܝܪ܃ ܕܚܰܕܼ ܡܶܢ ܗܳܢܽܘܢ ܐ̱ܢܳܫܳܐ܂ ܕܰܩܪܶܝܢ ܗ̱ܘܰܘ܂ ܠܳܐ ܢܶܛܥܡܽܘܢ ܡܶܢ ܐܰܚܫܳܡܺܝܬܼܝ܀
14:25 [ai]ܘܟܼܰܕܼ ܐܳܙܺܠ̱ܝܢ ܗ̱ܘܰܘ ܥܰܡܶܗ ܟܶܢܫܶܐ̈ ܣܰܓܿܺܝܶܐܐ̈܃ ܐܶܬܼܦܿܢܺܝ܂ ܘܶܐܡܰܪ ܠܗܽܘܢ܂
14:26 [ai]ܡܰܢ ܕܳܐܬܼܶܐ ܠܘܳܬܼܝ܂ ܘܠܳܐ ܣܳܢܶܐ ܠܰܐܒܼܽܘܗ̱ܝ ܘܠܶܐܡܶܗ܃ ܘܠܰܐܚܰܘܗ̱ܝ̈ ܘܠܰܐܚܘܳܬܼܶܗ̈܃ ܘܠܰܐܢ̱ܬܿܬܼܶܗ ܘܠܰܒܼܢܰܘܗ̱ܝ܂ ܘܳܐܦܼ ܠܢܰܦܼܫܶܗ܃ ܬܰܠܡܺܝܕܼܳܐ܂ ܠܳܐ ܡܶܫܟܿܰܚ ܕܢܶܗܘܶܐ ܠܺܝ܂
14:27 [ai]ܘܡܰܢ ܕܠܳܐ ܫܳܩܶܠ ܨܠܺܝܒܼܶܗ ܘܳܐܬܼܶܐ ܒܳܬܼܰܪܝ܂ ܬܰܠܡܺܝܕܼܳܐ܂ ܠܳܐ ܡܶܫܟܿܰܚ ܕܢܶܗܘܶܐ ܠܺܝ܀
14:28 [ai]ܡܰܢܽܘ ܓܶܝܪ ܡܶܢܟܼܽܘܢ܂ ܕܨܳܒܼܶܐ ܕܢܶܒܼܢܶܐ ܡܰܓܼܕܠܳܐ܃ ܘܠܳܐ ܠܽܘܩܕܼܰܡ ܝܳܬܼܶܒܼ ܚܳܫܶܒܼ ܢܶܦܼܩܳܬܼܶܗ̈܃ ܐܶܢ ܐܺܝܬܼ ܠܶܗ ܠܰܡܫܰܠܳܡܽܘܬܼܶܗ܂
14:29 [ai]ܕܠܳܐ ܟܰܕܼ ܢܣܺܝܡ ܫܶܬܼܶܐܣܬܳܐ܂ ܘܠܳܐ ܢܶܫܟܿܰܚ ܠܰܡܫܰܠܳܡܽܘ܃ ܟܽܠ ܕܚܳܙܶܝܢ܂ ܢܶܗܘܽܘܢ ܡܒܼܰܙܚܺܝܢ ܒܶܗ܂
14:30 [ai]ܘܳܐܡܪܺܝܢ܂ ܕܗܳܢܳܐ ܓܰܒܼܪܳܐ ܫܰܪܺܝ ܠܡܶܒܼܢܳܐ܂ ܘܠܳܐ ܐܶܫܟܿܰܚ ܠܰܡܫܰܠܳܡܽܘ܂
14:31 [ai]ܐܰܘ ܡܰܢܽܘ ܡܰܠܟܿܳܐ܂ ܕܳܐܙܶܠ ܠܰܩܪܳܒܼܳܐ ܠܡܶܬܼܟܿܰܬܿܳܫܽܘ ܥܰܡ ܡܰܠܟܿܳܐ ܚܰܒܼܪܶܗ܃ ܘܠܳܐ ܠܽܘܩܕܼܰܡ ܡܶܬܼܪܰܥܶܐ܃ ܕܶܐܢ ܡܶܫܟܿܰܚ ܒܥܶܣܪܳܐ ܐܰܠܦܼܺܝܢ̈ ܠܡܶܐܪܰܥ ܠܗܰܘ ܕܳܐܬܼܶܐ ܥܠܰܘܗ̱ܝ ܒܥܶܣܪܺܝܢ ܐܰܠܦܼܺܝܢ̈܂
14:32 [ai]ܘܶܐܢ ܕܶܝܢ ܠܳܐ܂ ܥܰܕܼ ܗܽܘ ܪܰܚܺܝܩ ܡܶܢܶܗ܃ ܡܫܰܕܿܰܪ ܐܺܝܙܓܿܰܕܿܶܐ̈܂ ܘܒܼܳܥܶܐ ܥܰܠ ܫܠܳܡܳܐ܂
14:33 [ai]ܗܳܟܼܰܢܳܐ ܟܽܠܢܳܫ ܡܶܢܟܼܽܘܢ܂ ܕܠܳܐ ܫܳܒܼܶܩ ܟܽܠܶܗ ܩܶܢܝܳܢܶܗ܃ ܠܳܐ ܡܶܫܟܿܰܚ ܕܢܶܗܘܶܐ ܠܺܝ ܬܰܠܡܺܝܕܼܳܐ܀
14:34 [ai]ܫܰܦܿܺܝܪܳܐ ܗ̱ܝ ܡܶܠܚܳܐ܂ ܐܶܢ ܕܶܝܢ ܐܳܦܼ ܡܶܠܚܳܐ ܬܶܦܼܟܿܰܗ܂ ܒܡܳܢܳܐ ܬܶܬܼܡܠܰܚ܂
14:35 [ai]ܠܳܐ ܠܰܐܪܥܳܐ܂ ܘܠܳܐ ܠܙܶܒܼܠܳܐ ܐܳܙܳܠ̱ܐ܂ ܠܒܼܰܪ ܫܳܕܼܶܝܢ ܠܳܗ܀ ܡܰܢ ܕܺܐܝܬܼ ܠܶܗ ܐܶܕܼܢܶܐ̈ ܕܢܶܫܡܰܥ܂ ܢܶܫܡܰܥ܀

next chapter