← Back
The Comprehensive Aramaic Lexicon
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


16:01 [ai]ܘܶܐܡܰܪ ܡܰܬܼܠܳܐ ܠܘܳܬܼ ܬܰܠܡܺܝܕܼܰܘܗ̱ܝ̈܂ ܓܰܒܼܪܳܐ ܚܰܕܼ ܐܺܝܬܼ ܗ̱ܘܳܐ ܥܰܬܿܺܝܪܳܐ܂ ܘܺܐܝܬܼ ܗ̱ܘܳܐ ܠܶܗ ܪܰܒܰܝܬܳܐ܂ ܘܶܐܬܼܶܐܟܼܶܠܘ ܠܶܗ ܩܰܪܨܰܘܗ̱ܝ܂ ܕܩܶܢܝܳܢܶܗ ܡܦܼܰܪܰܚ܂
16:02 [ai]ܘܰܩܪܳܝܗ̱ܝ ܡܳܪܶܗ܂ ܘܶܐܡܰܪ ܠܶܗ܂ ܡܳܢܰܘ ܗܳܢܳܐ ܕܫܳܡܰܥ ܐ̱ܢܳܐ ܥܠܰܝܟܿ܂ ܗܰܒܼ ܠܺܝ ܚܽܘܫܒܿܳܢܳܐ ܕܪܰܒܿܰܬܼ ܒܰܝܬܿܽܘܬܼܳܟܼ܂ ܠܳܐ ܓܶܝܪ ܡܶܫܟܿܰܚ ܐܰܢ̱ܬܿ ܡܶܟܿܺܝܠ ܪܰܒܰܝܬܳܐ ܕܬܶܗܘܶܐ ܠܺܝ܂
16:03 [ai]ܐܳܡܰܪ ܗܰܘ ܪܰܒܰܝܬܳܐ ܒܢܰܦܼܫܶܗ܂ ܡܳܢܳܐ ܐܶܥܒܿܶܕܼ܂ ܕܡܳܪܝ ܫܳܩܶܠ ܠܳܗ ܡܶܢܝ ܪܰܒܿܰܬܼ ܒܰܝܬܿܽܘܬܼܳܐ܂ ܕܶܐܚܦܿܽܘܪ ܠܳܐ ܡܶܫܟܿܰܚ ܐ̱ܢܳܐ܂ ܘܰܠܡܶܚܕܿܰܪ ܒܳܗܶܬܼ ܐ̱ܢܳܐ܂
16:04 [ai]ܝܶܕܼܥܶܬܼ ܡܳܢܳܐ ܐܶܥܒܿܶܕܼ܃ ܕܡܳܐ ܕܢܶܦܼܩܶܬܼ ܡܶܢ ܪܰܒܿܰܬܼ ܒܰܝܬܿܽܘܬܼܳܐ ܢܩܰܒܿܠܽܘܢܳܢܝ ܒܒܼܳܬܿܰܝܗܽܘܢ̈܂
16:05 [ai]ܘܰܩܪܳܐ ܚܰܕܼ ܚܰܕܼ ܡܶܢ ܚܰܝܳܒܼܶܐ̈ ܕܡܳܪܶܗ܃ ܘܶܐܡܰܪ ܠܩܰܕܼܡܳܝܳܐ܂ ܟܡܳܐ ܚܰܝܳܒܼ ܐܰܢ̱ܬܿ ܠܡܳܪܝ܂
16:06 [ai]ܐܳܡܰܪ ܠܶܗ܂ ܡܳܐܐ ܡܰܬܼܪ̈ܝܳܢ ܡܶܫܚܳܐ܂ ܐܳܡܰܪ ܠܶܗ܂ ܣܰܒܼ ܟܬܼܳܒܼܳܟܼ܃ ܘܬܼܶܒܼ ܒܰܥܓܼܰܠ ܟܬܼܽܘܒܼ܂ ܚܰܡܫܺܝܢ ܡܰܬܼܪ̈ܝܳܢ܂
16:07 [ai]ܘܶܐܡܰܪ ܠܰܐ̱ܚܪܺܢܳܐ܂ ܘܰܐܢ̱ܬܿ܂ ܡܳܢܳܐ ܚܰܝܳܒܼ ܐܰܢ̱ܬܿ ܠܡܳܪܝ܂ ܐܳܡܰܪ ܠܶܗ܂ ܡܳܐܐ ܟܿܽܘܪ̈ܺܝܢ ܚܶܛܶܐ̈܂ ܐܳܡܰܪ ܠܶܗ܂ ܩܰܒܿܶܠ ܟܬܼܳܒܼܳܟܼ܃ ܘܬܼܶܒܼ ܟܬܼܽܘܒܼ܂ ܬܡܳܢܺܐܝܢ ܟܿܽܘܪ̈ܺܝܢ܂
16:08 [ai]ܘܫܰܒܿܰܚ ܡܳܪܰܢ ܠܪܰܒܰܝܬܳܐ ܕܥܰܘܠܳܐ܂ ܕܚܰܟܿܺܝܡܳܐܺܝܬܼ ܥܒܼܰܕܼ܂ ܒܢܰܘܗ̱ܝ ܓܶܝܪ ܕܥܳܠܡܳܐ ܗܳܢܳܐ܃ ܚܰܟܿܺܝܡܺܝܢ ܐܶܢܽܘܢ ܡܶܢ ܒܢܰܘܗ̱ܝ ܕܢܽܘܗܪܳܐ ܒܫܰܪܒܿܰܬܼܗܽܘܢ ܗܳܕܼܶܐ܂
16:09 [ai]ܘܳܐܦܼ ܐܶܢܳܐ ܐܳܡܰܪ ܐ̱ܢܳܐ ܠܟܼܽܘܢ܃ ܕܰܥܒܼܶܕܼܘ ܠܟܼܽܘܢ ܪ̈ܳܚܡܶܐ ܡܶܢ ܡܳܡܽܘܢܳܐ ܗܳܢܳܐ ܕܥܰܘܠܳܐ܂ ܕܡܳܐ ܕܰܓܼܡܰܪ ܢܩܰܒܿܠܽܘܢܳܟܼܽܘܢ ܒܰܡܛܰܠܰܝܗܽܘܢ̈ ܕܰܠܥܳܠܰܡ܂
16:10 [ai]ܡܰܢ ܕܰܒܼܩܰܠܺܝܠ ܡܗܰܝܡܰܢ܂ ܐܳܦܼ ܒܣܰܓܿܺܝ܂ ܡܗܰܝܡܰܢ ܗ̱ܽܘ܂ ܘܡܰܢ ܕܰܒܼܩܰܠܺܝܠ ܥܰܘܳܠ܂ ܐܳܦܼ ܒܣܰܓܿܺܝ܂ ܥܰܘܳܠ ܗ̱ܽܘ܂
16:11 [ai]ܐܶܢ ܗܳܟܼܺܝܠ ܒܡܳܡܽܘܢܳܐ ܕܥܰܘܠܳܐ ܡܗܰܝܡܢܶܐ̈ ܠܳܐ ܗܘܰܝܬܿܽܘܢ܃ ܫܪܳܪܳܐ ܠܟܼܽܘܢ܂ ܡܰܢܽܘ ܡܗܰܝܡܶܢ܂
16:12 [ai]ܘܶܐܢ ܒܰܕܼܠܳܐ ܕܺܝܠܟܼܽܘܢ ܠܳܐ ܐܶܫܬܿܟܼܰܚܬܿܽܘܢ ܡܗܰܝܡܢܶܐ̈܃ ܕܺܝܠܟܼܽܘܢ܂ ܡܰܢܽܘ ܢܶܬܿܶܠ ܠܟܼܽܘܢ܀
16:13 [ai]ܠܰܝܬܿ ܥܰܒܼܕܿܳܐ ܕܡܶܫܟܿܰܚ ܠܰܬܼܪ̈ܶܝܢ ܡܳܪ̈ܰܘܳܢ ܠܡܶܦܼܠܰܚ܂ ܐܰܘ ܓܶܝܪ ܠܚܰܕܼ ܢܶܣܢܶܐ܂ ܘܠܰܐ̱ܚܪܺܢܳܐ ܢܶܪܚܰܡ܂ ܐܰܘ ܠܚܰܕܼ ܢܝܰܩܰܪ܂ ܘܠܰܐ̱ܚܪܺܢܳܐ ܢܫܽܘܛ܂ ܠܳܐ ܡܶܫܟܿܚܺܝܢ ܐܢ̱ܬܿܽܘܢ ܠܡܶܦܼܠܰܚ ܠܰܐܠܳܗܳܐ ܘܰܠܡܳܡܽܘܢܳܐ܀
16:14 [ai]ܦܿܪ̈ܺܝܫܶܐ ܕܶܝܢ ܟܰܕܼ ܫܡܰܥܘ ܗܳܠܶܝܢ ܟܽܠܗܶܝܢ܃ ܡܶܛܽܠ ܕܪܳܚܡܺܝܢ ܗ̱ܘܰܘ ܟܶܣܦܿܳܐ܂ ܡܡܰܝܩܺܝܢ ܗ̱ܘܰܘ ܒܶܗ܂
16:15 [ai]ܝܶܫܽܘܥ ܕܶܝܢ ܐܶܡܰܪ ܠܗܽܘܢ܂ ܐܰܢ̱ܬܿܽܘܢ ܐܶܢܽܘܢ ܕܰܡܙܰܕܿܩܺܝܢ ܢܰܦܼܫܗܽܘܢ ܩܕܼܳܡ ܒܢܰܝ ܐ̱ܢܳܫܳܐ܂ ܐܰܠܳܗܳܐ ܕܶܝܢ ܝܳܕܼܰܥ ܠܶܒܿܰܘܳܬܼܟܼܽܘܢ̈܂ ܕܿܡܶܕܶܡ ܕܪܳܡ ܒܶܝܬܼ ܒܢܰܝ ܢܳܫܳܐ܃ ܩܕܼܳܡ ܐܰܠܳܗܳܐ ܢܕܼܺܝܕܼ ܗ̱ܽܘ܀
16:16 [ai]ܢܳܡܽܘܣܳܐ ܘܰܢܒܼܺܝܶܐ̈ ܥܕܼܰܡܳܐ ܠܝܽܘܚܰܢܳܢ܂ ܡܶܢ ܗܳܝܕܶܝܢ ܡܰܠܟܿܽܘܬܼܳܐ ܕܰܐܠܳܗܳܐ ܡܶܣܬܿܰܒܪܳܐ܂ ܘܟܼܽܠ ܠܳܗ ܚܳܒܼܶܨ ܕܢܶܥܽܘܠ܂
16:17 [ai]ܦܫܺܝܩ ܗ̱ܽܘ ܕܶܝܢ ܕܰܫܡܰܝܳܐ ܘܰܐܪܥܳܐ ܢܶܥܒܿܪܽܘܢ܃ ܐܰܘ ܐܳܬܼܽܘܬܼܳܐ ܚܕܼܳܐ ܡܶܢ ܢܳܡܽܘܣܳܐ ܬܿܶܥܒܰܪ܀
16:18 [ai]ܟܽܠ ܡܰܢ ܕܫܳܪܶܐ ܐܰܢ̱ܬܿܬܼܶܗ ܘܢܳܣܶܒܼ ܐ̱ܚܪܺܬܼܳܐ܂ ܓܳܐܰܪ܂ ܘܟܼܽܠ ܡܰܢ ܕܢܳܣܶܒܼ ܫܒܼܺܝܩܬܳܐ ܓܳܐܰܪ܀
16:19 [ai]ܓܰܒܼܪܳܐ ܕܶܝܢ ܚܰܕܼ ܥܰܬܿܺܝܪܳܐ ܐܺܝܬܼ ܗ̱ܘܳܐ܃ ܘܠܳܒܼܶܫ ܗ̱ܘܳܐ ܒܽܘܨܳܐ ܘܰܐܪܓܿܘܳܢܳܐ܂ ܘܟܼܽܠܝܽܘܡ ܡܶܬܼܒܿܰܣܡܺܝܢ ܗ̱ܘܳܐ ܓܰܐܝܳܐܺܝܬܼ܂
16:20 [ai]ܘܡܶܣܟܿܺܢܳܐ ܚܰܕܼ ܐܺܝܬܼ ܗ̱ܘܳܐ܂ ܕܰܫܡܶܗ ܠܳܥܳܙܰܪ܂ ܘܰܪܡܶܐ ܗ̱ܘܳܐ ܠܘܳܬܼ ܬܰܪܥܶܗ ܕܗܰܘ ܥܰܬܿܺܝܪܳܐ܂ ܟܰܕܼ ܡܡܰܚܰܝ ܒܫܽܘܚܢܶܐ̈܂
16:21 [ai]ܘܡܶܬܼܝܰܐܰܒܼ ܗ̱ܘܳܐ ܕܢܶܡܠܶܐ ܟܰܪܣܶܗ ܡܶܢ ܦܿܰܪ̈ܬܿܽܘܬܼܶܐ ܕܢܳܦܼܠܺܝܢ ܡܶܢ ܦܳܬܼܽܘܪܶܗ ܕܗܰܘ ܥܰܬܿܺܝܪܳܐ܂ ܐܶܠܳܐ ܐܳܦܼ ܟܰܠܒܿܶܐ̈ ܐܳܬܼܶܝܢ ܗ̱ܘܰܘ܂ ܡܠܰܚܟܼܺܝܢ ܫܽܘܚܢܰܘܗ̱ܝ̈܂
16:22 [ai]ܗܘܳܐ ܕܶܝܢ ܘܡܺܝܬܼ ܗܰܘ ܡܶܣܟܿܺܢܳܐ܃ ܘܰܐܘܒܿܠܽܘܗ̱ܝ ܡܰܠܰܐܟܼܶܐ̈ ܠܥܽܘܒܶܗ ܕܰܐܒܼܪܳܗܳܡ܂ ܐܳܦܼ ܗܰܘ ܕܶܝܢ ܥܰܬܿܺܝܪܳܐ ܡܺܝܬܼ܂ ܘܶܐܬܼܩܒܼܰܪ܂
16:23 [ai]ܘܟܼܰܕܼ ܡܶܫܬܿܰܢܰܩ ܒܰܫܝܽܘܠ܃ ܐܰܪܺܝܡ ܥܰܝܢܰܘܗ̱ܝ̈ ܡܶܢ ܪܽܘܚܩܳܐ܃ ܘܰܚܙܳܐ ܠܰܐܒܼܪܳܗܳܡ ܘܰܠܠܳܥܳܙܰܪ ܒܥܽܘܒܶܗ܂
16:24 [ai]ܘܰܩܪܳܐ ܒܩܳܠܳܐ ܪܳܡܳܐ܂ ܘܶܐܡܰܪ܂ ܐܳܒܼܝ܂ ܐܰܒܼܪܳܗܳܡ܂ ܐܶܬܼܪܰܚܰܡ ܥܠܰܝ܂ ܘܫܰܕܿܰܪ ܠܠܳܥܳܙܰܪ܂ ܕܢܶܨܒܿܽܘܥ ܪܺܝܫ ܨܶܒܼܥܶܗ ܒܡܰܝܳܐ̈ ܘܰܢܪܰܛܶܒܼ ܠܺܝ ܠܶܫܳܢܝ܃ ܕܗܳܐ ܡܶܫܬܿܰܢܰܩ ܐ̱ܢܳܐ ܒܫܰܠܗܶܒܼܺܝܬܼܳܐ ܗܳܕܼܶܐ܂
16:25 [ai]ܐܳܡܰܪ ܠܶܗ ܐܰܒܼܪܳܗܳܡ܂ ܒܶܪܝ܃ ܐܶܬܿܕܿܰܟܼ̱ܪ ܕܩܰܒܿܶܠܬܿ ܛܳܒܼܳܬܼܳܟܼ̈ ܒܚܰܝܰܝܟܿ̈܂ ܘܠܳܥܳܙܰܪ ܒܺܝܫܳܬܼܶܗ̈܂ ܘܗܳܫܳܐ܂ ܗܳܐ ܡܶܬܿܬܿܢܺܝܚ ܗܳܪܟܿܳܐ܂ ܘܰܐܢ̱ܬܿ ܡܶܫܬܿܰܢܰܩ܂
16:26 [ai]ܘܥܰܡ ܗܳܠܶܝܢ ܟܽܠܗܶܝܢ܃ ܗܰܘܬܼܳܐ ܪܰܒܿܬܼܳܐ ܣܺܝܡܳܐ ܒܰܝܢܰܝܢ ܘܰܠܟܼܽܘܢ܂ ܕܰܐܝܠܶܝܢ ܕܨܳܒܼܶܝܢ ܡܶܟܿܳܐ ܕܢܶܥܒܿܪܽܘܢ ܠܘܳܬܼܟܼܽܘܢ܂ ܠܳܐ ܢܶܫܟܿܚܽܘܢ܂ ܘܳܐܦܼܠܳܐ ܕܡܶܢ ܬܰܡܳܢ ܢܶܥܒܿܪܽܘܢ ܠܘܳܬܼܰܢ܂
16:27 [ai]ܐܳܡܰܪ ܠܶܗ܂ ܡܳܕܼܶܝܢ ܒܿܳܥܶܐ ܐ̱ܢܳܐ ܡܶܢܳܟܼ ܐܳܒܼܝ܃ ܕܰܬܼܫܰܕܿܪܺܝܘܗ̱ܝ ܠܒܼܶܝܬܼ ܐܳܒܼܝ܂
16:28 [ai]ܚܰܡܫܳܐ ܓܶܝܪ ܐܰܚܺܝܢ̈ ܐܺܝܬܼ ܠܺܝ܂ ܢܺܐܙܰܠ܂ ܢܣܰܗܶܕܼ ܐܶܢܽܘܢ܃ ܕܠܳܐ ܐܳܦܼ ܗܶܢܽܘܢ ܢܺܐܬܼܽܘܢ ܠܕܼܽܘܟܿܬܼܳܐ ܗܳܕܼܶܐ ܕܬܰܫܢܺܝܩܳܐ܂
16:29 [ai]ܐܳܡܰܪ ܠܶܗ ܐܰܒܼܪܳܗܳܡ܂ ܐܺܝܬܼ ܠܗܽܘܢ ܡܽܘܫܶܐ ܘܰܢܒܼܺܝܶܐ̈܃ ܢܶܫܡܥܽܘܢ ܐܶܢܽܘܢ܂
16:30 [ai]ܗܽܘ ܕܶܝܢ ܐܶܡܰܪ ܠܶܗ܂ ܠܳܐ ܐܳܒܼܝ܃ ܐܰܒܼܪܳܗܳܡ܂ ܐܶܠܳܐ ܐܶܢ ܐ̱ܢܳܫ ܡܶܢ ܡܺܝܬܼܶܐ̈ ܢܺܐܙܰܠ ܠܘܳܬܼܗܽܘܢ܂ ܬܿܳܝܒܺܝܢ܂
16:31 [ai]ܐܳܡܰܪ ܠܶܗ ܐܰܒܼܪܳܗܳܡ܂ ܐܶܢ ܠܡܽܘܫܶܐ ܘܠܰܢܒܼܺܝܶܐ̈ ܠܳܐ ܫܳܡܥܺܝܢ܃ ܐܳܦܼ ܠܳܐ ܐܶܢ ܐ̱ܢܳܫ ܡܶܢ ܡܺܝܬܼܶܐ̈ ܢܩܽܘܡ܂ ܡܗܰܝܡܢܺܝܢ ܠܶܗ܀

next chapter