← Back
The Comprehensive Aramaic Lexicon
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


17:01 [ai]ܘܶܐܡܰܪ ܗ̱ܘܳܐ ܝܶܫܽܘܥ ܠܬܼܰܠܡܺܝܕܼܰܘܗ̱ܝ̈܂ ܠܳܐ ܡܶܫܟܿܚܳܐ ܕܠܳܐ ܢܺܐܬܼܽܘܢ ܡܰܟܼܫܽܘܠܶܐ̈܂ ܘܳܝ ܕܶܝܢ ܠܗܰܘ ܕܒܺܐܝܕܼܶܗ ܢܺܐܬܼܽܘܢ܂
17:02 [ai]ܦܰܩܳܚ ܗ̱ܘܳܐ ܠܶܗ܂ ܐܶܠܽܘ ܪܰܚܝܳܐ ܕܰܚܡܳܪܳܐ ܬܰܠܝܳܐ ܒܨܰܘܪܶܗ܂ ܘܰܫܕܼܶܐ ܒܝܰܡܳܐ܃ ܐܰܘ ܕܢܰܟܼܫܶܠ ܠܚܰܕܼ ܡܶܢ ܗܳܠܶܝܢ ܙܥܽܘܪ̈ܶܐ܂
17:03 [ai]ܐܶܙܕܿܰܗ̱ܪܘ ܒܢܰܦܼܫܟܼܽܘܢ܂ ܐܶܢ ܢܶܚܛܶܐ ܐܰܚܽܘܟܼ܂ ܟܐܺܝ ܒܶܗ܂ ܘܶܐܢ ܬܳܐܶܒܼ܂ ܫܒܼܽܘܩ ܠܶܗ܂
17:04 [ai]ܘܶܐܢ ܫܒܼܰܥ ܙܰܒܼܢܺܝܢ̈ ܒܝܰܘܡܳܐ ܢܰܣܟܿܶܠ ܒܳܟܼ܃ ܘܰܫܒܼܰܥ ܙܰܒܼܢܺܝܢ̈ ܒܝܰܘܡܳܐ ܢܶܬܼܦܿܢܶܐ ܠܘܳܬܼܳܟܼ܃ ܘܢܺܐܡܰܪ ܕܬܳܐܶܒܼ ܐ̱ܢܳܐ܂ ܫܒܼܽܘܩ ܠܶܗ܀
17:05 [ai]ܘܶܐܡܰܪܘ ܫܠܺܝܚܶܐ̈ ܠܡܳܪܰܢ܂ ܐܰܘܣܶܦܼ ܠܰܢ ܗܰܝܡܳܢܽܘܬܼܳܐ܂
17:06 [ai]ܐܳܡܰܪ ܠܗܽܘܢ܂ ܐܶܢ ܐܺܝܬܼ ܗ̱ܘܳܬܼ ܠܟܼܽܘܢ ܗܰܝܡܳܢܽܘܬܼܳܐ܂ ܐܰܝܟܼ ܦܪܶܕܿܬܳܐ ܕܿܚܰܪܕܠܳܐ܃ ܐܳܡܪܺܝܢ ܗ̱ܘܰܝܬܿܽܘܢ ܠܬܼܽܘܬܼܳܐ ܗܳܢܳܐ܂ ܕܶܐܬܼܥܰܩ̱ܪ ܘܶܐܬܼܢܰܨܒܿ ܒܝܰܡܳܐ܂ ܘܡܶܫܬܿܡܰܥ ܗ̱ܘܳܐ ܠܟܼܽܘܢ܀
17:07 [ai]ܡܰܢܽܘ ܕܶܝܢ ܡܶܢܟܼܽܘܢ ܕܺܐܝܬܼ ܠܶܗ ܥܰܒܼܕܿܳܐ܂ ܕܕܼܳܒܼܰܪ ܦܿܰܕܳܢܳܐ ܐܰܘ ܕܪܳܥܶܐ ܥܳܢܳܐ܃ ܘܶܐܢ ܢܺܐܬܼܶܐ ܡܶܢ ܚܰܩܠܳܐ܃ ܐܳܡܰܪ ܠܶܗ ܡܶܚܕܼܳܐ܂ ܥܒܼܰܪ ܐܶܣܬܿܰܡ̱ܟܿ܂
17:08 [ai]ܐܶܠܳܐ ܐܳܡܰܪ ܠܶܗ܂ ܛܰܝܶܒܼ ܠܺܝ ܡܶܕܶܡ ܕܰܐܚܫܶܡ܂ ܘܰܐܣܽܘܪ ܚܰܨܰܝܟܿ̈܂ ܫܰܡܶܫܰܝܢܝ܂ ܥܕܼܰܡܳܐ ܕܶܐܠܥܰܣ ܘܶܐܫܬܿܶܐ܃ ܘܒܼܳܬܼܰܪܟܿܶܢ ܐܳܦܼ ܐܰܢ̱ܬܿ ܬܶܠܥܰܣ ܘܬܼܶܫܬܿܶܐ܂
17:09 [ai]ܠܡܳܐ܃ ܛܰܝܒܿܽܘܬܼܶܗ ܡܩܰܒܿܶܠ ܕܗܰܘ ܥܰܒܼܕܿܳܐ܂ ܕܰܥܒܼܰܕܼ ܡܶܕܶܡ ܕܶܐܬܼܦܿܩܶܕܼ ܠܶܗ܃ ܠܳܐ ܣܳܒܼܰܪ ܐ̱ܢܳܐ܂
17:10 [ai]ܗܳܟܼܰܢܳܐ ܐܳܦܼ ܐܰܢ̱ܬܿܽܘܢ܂ ܡܳܐ ܕܰܥܒܼܰܕܿܬܿܽܘܢ ܟܽܠܗܶܝܢ ܐܰܝܠܶܝܢ ܕܰܦܼܩܺܝܕܼܳܢ̈ ܠܟܼܽܘܢ܃ ܐܶܡܰܪܘ܂ ܕܥܰܒܼܕܿܶܐ̈ ܚܢܰܢ ܒܰܛܺܝܠܶܐ̈܂ ܕܿܡܶܕܶܡ ܕܚܰܝܳܒܼܺܝܢ ܗ̱ܘܰܝܢ ܠܡܶܥܒܿܰܕܼ ܥܒܼܰܕܼܢ܀
17:11 [ai]ܘܰܗܘܳܐ ܕܟܰܕܼ ܐܳܙܶܠ ܝܶܫܽܘܥ ܠܽܐܘܪܺܫܠܶܡ܃ ܥܳܒܼܰܪ ܗ̱ܘܳܐ ܒܶܝܬܼ ܫܳܡܪ̈ܳܝܶܐ ܠܰܓܼܠܺܝܠܳܐ܂
17:12 [ai]ܘܟܼܰܕܼ ܩܰܪܺܝܒܼ ܠܡܶܥܰܠ ܠܰܩܪܺܝܬܼܳܐ ܚܕܼܳܐ܃ ܐܰܪܥܽܘܗ̱ܝ ܥܶܣܪܳܐ ܐ̱ܢܳܫܺܝܢ̈ ܓܿܰܪ̈ܒܿܶܐ܂ ܘܩܳܡܘ ܡܶܢ ܪܽܘܚܩܳܐ܂
17:13 [ai]ܘܰܐܪܺܝܡܘ ܩܳܠܗܽܘܢ܂ ܘܳܐܡܪܺܝܢ܂ ܪܰܒܰܢ܂ ܝܶܫܽܘܥ܃ ܐܶܬܼܪܰܚܰܡ ܥܠܰܝܢ܂
17:14 [ai]ܘܟܼܰܕܼ ܚܙܳܐ ܐܶܢܽܘܢ܂ ܐܶܡܰܪ ܠܗܽܘܢ܂ ܙܶܠܘ ܚܰܘܰܘ ܢܰܦܼܫܟܼܽܘܢ ܠܟܼܳܗܢܶܐ̈܂ ܘܟܼܰܕܼ ܐܳܙܺܠ̱ܝܢ܂ ܐܶܬܿܕܰܟܿܺܝܘ܂
17:15 [ai]ܚܰܕܼ ܕܶܝܢ ܡܶܢܗܽܘܢ܂ ܟܰܕܼ ܚܙܳܐ ܕܿܶܐܬܿܕܰܟܿܺܝ܂ ܗܦܼܰܟܼ ܠܶܗ܂ ܘܰܒܩܳܠܳܐ ܪܳܡܳܐ ܡܫܰܒܿܰܚ ܗ̱ܘܳܐ ܠܰܐܠܳܗܳܐ܃
17:16 [ai]ܘܰܢܦܼܰܠ ܥܰܠ ܐܰܦܿܰܘܗ̱ܝ̈ ܩܕܼܳܡ ܪ̈ܶܓܼܠܰܘܗ̱ܝ ܕܝܶܫܽܘܥ܂ ܟܰܕܼ ܡܰܘܕܿܶܐ ܠܶܗ܂ ܘܗܽܘ ܗܳܢܳܐ܂ ܫܳܡܪܳܝܳܐ ܗܘܳܐ܂
17:17 [ai]ܥܢܳܐ ܕܶܝܢ ܝܶܫܽܘܥ܂ ܘܶܐܡܰܪ܂ ܠܳܐ ܗ̱ܘܳܐ܃ ܥܶܣܪܳܐ ܗܳܘܶܝܢ ܗܳܠܶܝܢ ܕܿܶܐܬܿܕܰܟܿܺܝܘ܃ ܐܰܝܟܿܳܐ ܐܶܢܽܘܢ ܬܶܫܥܳܐ܂
17:18 [ai]ܠܡܳܐ ܦܪܰܫܘ܃ ܕܢܺܐܬܼܽܘܢ ܢܶܬܿܠܽܘܢ ܬܿܶܫܒܿܽܘܚܬܳܐ ܠܰܐܠܳܗܳܐ܃ ܐܶܠܳܐ ܗܳܢܳܐ ܕܡܶܢ ܥܰܡܳܐ ܗ̱ܘ ܢܽܘܟܼܪܳܝܳܐ܂
17:19 [ai]ܘܶܐܡܰܪ ܠܶܗ܂ ܩܽܘܡ ܙܶܠ܂ ܗܰܝܡܳܢܽܘܬܼܳܟܼ ܐܰܚܝܰܬܼܳܟܼ ܿ܀ܿ܀ܿ
17:20 [ai]ܘܟܼܰܕܼ ܫܰܐܠܽܘܗ̱ܝ ܠܝܶܫܽܘܥ ܡܶܢ ܦܿܪ̈ܺܝܫܶܐ܃ ܐܶܡܰܬܼܝ ܐܳܬܼܝܳܐ ܡܰܠܟܿܽܘܬܼܶܗ ܕܰܐܠܳܗܳܐ܃ ܥܢܳܐ܂ ܘܶܐܡܰܪ ܠܗܽܘܢ܂ ܠܳܐ ܐܳܬܼܝܳܐ ܡܰܠܟܿܽܘܬܼܶܗ ܕܰܐܠܳܗܳܐ ܒܰܢܛܽܘܪ̈ܳܬܼܳܐ܂
17:21 [ai]ܘܠܳܐ ܐܳܡܪܺܝܢ܂ ܗܳܐ ܗܳܪܟܿܳܐ ܗ̱ܝ܂ ܘܗܳܐ ܗܳܪ ܬܰܡܳܢ ܗ̱ܺܝ܂ ܗܳܐ ܓܶܝܪ ܡܰܠܟܿܽܘܬܼܶܗ ܕܰܐܠܳܗܳܐ܂ ܠܓܼܰܘ ܡܶܢܟܼܽܘܢ ܗ̱ܺܝ܀
17:22 [ai]ܘܶܐܡܰܪ ܠܬܼܰܠܡܺܝܕܼܰܘܗ̱ܝ̈܂ ܢܺܐܬܼܽܘܢ ܝܰܘܡܳܬܼܳܐ̈܃ ܕܬܶܬܼܪܰܓܼܪܓܼܽܘܢ ܠܡܶܚܙܳܐ ܚܰܕܼ ܡܶܢ ܝܰܘܡܳܬܼܳܐ̈ ܕܰܒܼܪܶܗ ܕܐ̱ܢܳܫܳܐ܂ ܘܠܳܐ ܬܶܚܙܽܘܢ܂
17:23 [ai]ܘܶܐܢ ܢܺܐܡܪܽܘܢ ܠܟܼܽܘܢ܂ ܗܳܐ ܗܳܪܟܿܳܐ ܗ̱ܘ܂ ܘܗܳܐ ܗܳܪ ܬܰܡܳܢ ܗ̱ܽܘ܂ ܠܳܐ ܬܺܐܙܽܠ̱ܘܢ܂
17:24 [ai]ܐܰܝܟܿܰܢܳܐ ܓܶܝܪ ܕܒܰܪܩܳܐ ܒܳܪܶܩ ܡܶܢ ܫܡܰܝܳܐ܃ ܘܟܼܽܠܶܗ ܬܚܶܝܬܼ ܫܡܰܝܳܐ ܡܰܢܗܰܪ܃ ܗܳܟܼܰܢܳܐ ܢܶܗܘܶܐ ܒܪܶܗ ܕܐ̱ܢܳܫܳܐ ܒܝܰܘܡܶܗ܂
17:25 [ai]ܠܽܘܩܕܼܰܡ ܕܶܝܢ܂ ܥܬܼܺܝܕܼ ܗ̱ܽܘ ܕܢܶܚܰܫ ܣܰܓܿܺܝܳܐܬܼܳܐ̈܃ ܘܢܶܣܬܠܶܐ ܡܶܢ ܫܰܪܒܿܬܼܳܐ ܗܳܕܼܶܐ܀
17:26 [ai]ܘܰܐܝܟܿܰܢܳܐ ܕܰܗܘܳܐ ܒܝܰܘܡܳܬܼܶܗ̈ ܕܢܽܘܚ܃ ܗܳܟܼܰܢܳܐ ܢܶܗܘܶܐ ܒܝܰܘܡܳܬܼܶܗ̈ ܕܰܒܼܪܶܗ ܕܐ̱ܢܳܫܳܐ܂
17:27 [ai]ܕܳܐܟܼܠܺܝܢ ܗ̱ܘܰܘ ܘܫܳܬܼܶܝܢ܃ ܘܢܳܣܒܺܝܢ ܢܶܫܶܐ̈܂ ܘܝܳܗܒܺܝܢ ܠܓܼܰܒܼܪ̈ܶܐ܃ ܥܕܼܰܡܳܐ ܠܝܰܘܡܳܐ ܕܥܰܠ ܢܽܘܚ ܠܟܼܶܘܶܝܠܳܐ܃ ܘܶܐܬܼܳܐ ܛܰܘܦܼܳܢܳܐ܂ ܘܰܐܘܒܿܶܕܼ ܠܟܼܽܠ ܐ̱ܢܳܫ܀
17:28 [ai]ܘܰܐܝܟܿܰܢܳܐ ܬܽܘܒܼ ܕܰܗܘܳܐ ܒܝܰܘܡܳܬܼܶܗ̈ ܕܠܽܘܛ܃ ܕܳܐܟܼܠܺܝܢ ܗ̱ܘܰܘ ܘܫܳܬܼܶܝܢ܃ ܘܙܳܒܼܢܺܝܢ ܘܰܡܙܰܒܢܺܝܢ܃ ܘܢܳܨܒܺܝܢ ܗ̱ܘܰܘ ܘܒܼܳܢܶܝܢ܃
17:29 [ai]ܒܝܰܘܡܳܐ ܕܶܝܢ܂ ܕܰܢܦܼܰܩ ܠܽܘܛ ܡܶܢ ܣܕܼܽܘܡ܃ ܐܰܡܛܰܪ ܡܳܪܝܳܐ ܢܽܘܪܳܐ ܘܟܼܶܒܼܪܺܝܬܼܳܐ ܡܶܢ ܫܡܰܝܳܐ܃ ܘܰܐܘܒܿܶܕܼ ܠܟܼܽܠܗܽܘܢ܂
17:30 [ai]ܗܳܟܼܰܢܳܐ ܢܶܗܘܶܐ ܒܝܰܘܡܳܐ ܕܡܶܬܼܓܠܶܐ ܒܪܶܗ ܕܐ̱ܢܳܫܳܐ܀
17:31 [ai]ܒܗܰܘ ܝܰܘܡܳܐ܂ ܡܰܢ ܕܒܶܐܓܿܳܪܳܐ ܗ̱ܘ ܘܡܳܐܢܰܘܗ̱ܝ̈ ܒܒܼܰܝܬܳܐ܃ ܠܳܐ ܢܶܚܽܘܬܼ ܕܢܶܫܩܽܘܠ ܐܶܢܽܘܢ܂ ܘܡܰܢ ܕܰܒܼܚܰܩܠܳܐ ܗ̱ܘ܃ ܠܳܐ ܢܶܬܼܗܦܼܶܟܼ ܠܒܼܶܣܬܿܪܶܗ܂
17:32 [ai]ܐܶܬܿܕܿܰܟܼ̱ܪܘ ܠܰܐܢ̱ܬܿܬܼܶܗ ܕܠܽܘܛ܂
17:33 [ai]ܡܰܢ ܕܨܳܒܼܶܐ ܕܢܰܚܶܐ ܢܰܦܼܫܶܗ܂ ܢܰܘܒܿܕܼܺܝܗ܂ ܘܡܰܢ ܕܢܰܘܒܿܶܕܼ ܢܰܦܼܫܶܗ ܢܰܚܶܝܗ܀
17:34 [ai]ܐܳܡܰܪ ܐ̱ܢܳܐ ܠܟܼܽܘܢ܂ ܕܰܒܼܗܰܘ ܠܺܠܝܳܐ܃ ܬܿܪ̈ܶܝܢ ܢܶܗܘܽܘܢ ܒܰܚܕܼܳܐ ܥܰܪܣܳܐ܂ ܚܰܕܼ ܢܶܬܿܕܒܰܪ܂ ܘܰܐ̱ܚܪܺܢܳܐ ܢܶܫܬܿܒܼܶܩ܂
17:35 [ai]ܬܿܰܪ̈ܬܿܶܝܢ ܢܶܗܘܝܳܢ̈ ܛܳܚܢܳܢ̈ ܐܰܟܼܚܕܼܳܐ܂ ܚܕܼܳܐ ܬܿܶܬܿܕܒܰܪ܂ ܘܰܐ̱ܚܪܺܬܼܳܐ ܬܶܫܬܿܒܼܶܩ܂
17:36 [ai]ܬܿܪ̈ܶܝܢ ܢܶܗܘܽܘܢ ܒܚܰܩܠܳܐ܂ ܚܰܕܼ ܢܶܬܿܕܒܰܪ܂ ܘܰܐ̱ܚܪܺܢܳܐ ܢܶܫܬܿܒܼܶܩ܀
17:37 [ai]ܥܢܰܘ܂ ܘܳܐܡܪܺܝܢ ܠܶܗ܂ ܠܰܐܝܟܿܳܐ ܡܳܪܰܢ܃ ܐܳܡܰܪ ܠܗܽܘܢ܂ ܐܰܝܟܿܳܐ ܕܦܰܓܼܪܳܐ܂ ܬܰܡܳܢ ܢܶܬܼܟܿܰܢܫܽܘܢ ܢܶܫܪ̈ܶܐ܀

next chapter