← Back
The Comprehensive Aramaic Lexicon
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


19:01 [ai]ܘܟܼܰܕܼ ܥܰܠ ܝܶܫܽܘܥ܂ ܘܰܥܒܼܰܪ ܒܺܐܝܪܺܝܚܽܘ܃
19:02 [ai]ܓܰܒܼܪܳܐ ܚܰܕܼ ܕܰܫܡܶܗ ܙܰܟܰܝ܂ ܥܰܬܿܺܝܪܳܐ ܗ̱ܘܳܐ܂ ܘܪܰܒܼ ܡܳܟܼܣܶܐ̈܃
19:03 [ai]ܘܨܳܒܼܶܐ ܗ̱ܘܳܐ ܕܢܶܚܙܶܐ ܠܝܶܫܽܘܥ܂ ܕܡܰܢܽܘ܂ ܘܠܳܐ ܡܶܫܟܿܰܚ ܗ̱ܘܳܐ ܡܶܢ ܟܶܢܫܳܐ܂ ܡܶܛܽܠ ܕܰܒܼܩܰܘܡܬܼܶܗ܂ ܙܥܽܘܪ ܗ̱ܘܳܐ ܙܰܟܰܝ܃
19:04 [ai]ܘܰܪܗܶܛ ܩܰܕܡܶܗ ܠܝܶܫܽܘܥ܂ ܘܰܣܠܶܩ ܠܶܗ ܠܬܼܺܬܳܐ ܦܰܟܿܺܝܗܬܳܐ ܕܢܶܚܙܶܝܘܗ̱ܝ܂ ܡܶܛܽܠ ܕܗܳܟܼܘܳܬܼ ܥܬܼܺܝܕܼ ܗܘܳܐ ܕܿܢܶܥܒܰܪ܂
19:05 [ai]ܘܟܼܰܕܼ ܐܶܬܼܳܐ ܠܗܳܝ ܕܽܘܟܿܬܼܳܐ ܝܶܫܽܘܥ܃ ܚܙܳܝܗ̱ܝ܂ ܘܶܐܡܰܪ ܠܶܗ܂ ܐܶܣܬܿܰܪܗ̱ܒܼ ܚܽܘܬܼ ܙܰܟܰܝ܃ ܝܰܘܡܳܢܳܐ ܓܶܝܪ ܘܳܠܶܐ ܕܰܒܼܒܼܰܝܬܿܳܟܼ ܐܶܗܘܶܐ
19:06 [ai]ܘܶܐܣܬܿܰܪܗܰܒܼ ܢܚܶܬܼ܂ ܘܩܰܒܿܠܶܗ ܟܰܕܼ ܚܳܕܼܶܐ܂
19:07 [ai]ܟܰܕܼ ܚܙܰܘ ܕܶܝܢ ܟܽܠܗܽܘܢ܃ ܪܳܛܢܺܝܢ ܗ̱ܘܰܘ܂ ܘܳܐܡܪܺܝܢ܂ ܕܰܠܘܳܬܼ ܓܰܒܼܪܳܐ ܚܰܛܳܝܳܐ ܥܰܠ ܫܪܳܐ܂
19:08 [ai]ܩܳܡ ܕܶܝܢ ܙܰܟܰܝ܂ ܘܶܐܡܰܪ ܠܝܶܫܽܘܥ܂ ܗܳܐ ܡܳܪܝ܃ ܦܶܠܓܿܽܘܬܼ ܢܶܟܼܣܰܝ̈ ܝܳܗܶܒܼ ܐ̱ܢܳܐ ܠܡܶܣܟܿܺܢܶܐ̈܂ ܘܰܠܟܼܽܠܢܳܫ܂ ܡܶܕܶܡ ܕܓܶܠܙܶܬܼ܃ ܚܰܕܼ ܒܿܰܐܪܒܥܳܐ ܦܳܪܰܥ ܐ̱ܢܳܐ܂
19:09 [ai]ܐܳܡܰܪ ܠܶܗ ܝܶܫܽܘܥ܂ ܝܰܘܡܳܢܳܐ ܗܘܰܘ ܚܰܝ̈ܶܐ ܠܒܼܰܝܬܳܐ ܗܳܢܳܐ܂ ܡܶܛܽܠ ܕܳܐܦܼ ܗܳܢܳܐ ܒܪܶܗ ܗ̱ܽܘ ܕܰܐܒܼܪܳܗܳܡ܂
19:10 [ai]ܐܶܬܼܳܐ ܓܶܝܪ ܒܪܶܗ ܕܐ̱ܢܳܫܳܐ܃ ܕܢܶܒܼܥܶܐ ܘܢܰܚܶܐ܂ ܗܰܘ ܡܶܕܶܡ ܕܿܰܐܒܺܝܕܼ ܗ̱ܘܳܐ܀
19:11 [ai]ܘܟܼܰܕܼ ܫܳܡܥܺܝܢ ܗ̱ܘܰܘ ܗܳܠܶܝܢ܃ ܐܰܘܣܶܦܼ ܠܡܺܐܡܰܪ ܡܰܬܼܠܳܐ܂ ܡܶܛܽܠ ܕܩܰܪܺܝܒܼ ܗ̱ܘܳܐ ܠܽܐܘܪܺܫܠܶܡ܃ ܘܣܳܒܼܪܺܝܢ ܗ̱ܘܰܘ܂ ܕܰܒܼܗܳܝ ܫܳܥܬܼܳܐ ܥܬܼܺܝܕܼܳܐ ܕܬܶܬܼܓܠܶܐ ܡܰܠܟܿܽܘܬܼܶܗ ܕܰܐܠܳܗܳܐ܀
19:12 [ai]ܘܶܐܡܰܪ܂ ܓܰܒܼܪܳܐ ܚܰܕܼ ܒܰܪ ܛܽܘܗܡܳܐ ܪܰܒܿܳܐ܃ ܐܶܙܰܠ ܠܰܐܬܼܪܳܐ ܪܰܚܺܝܩܳܐ܂ ܕܢܶܣܰܒܼ ܠܶܗ ܡܰܠܟܿܽܘܬܼܳܐ܂ ܘܢܶܗܦܿܽܘܟܼ܂
19:13 [ai]ܘܰܩܪܳܐ ܥܶܣܪܳܐ ܥܰܒܼܕܿܰܘܗ̱ܝ̈܃ ܘܝܰܗ̱ܒܼ ܠܗܽܘܢ܂ ܥܶܣܪܳܐ ܡܢܺܝܢ̈܂ ܘܶܐܡܰܪ ܠܗܽܘܢ܂ ܐܶܬܿܬܿܰܓ̱ܿܪܘ ܥܰܕܼ ܐܳܬܼܶܐ ܐ̱ܢܳܐ܀
19:14 [ai]ܒܢܰܝ ܡܕܼܺܝܢ̱ܬܿܶܗ ܕܶܝܢ܂ ܣܳܢܶܝܢ ܗ̱ܘܰܘ ܠܶܗ܂ ܘܫܰܕܿܰܪܘ ܐܺܝܙܓܿܰܕܿܶܐ̈ ܒܳܬܼܪܶܗ܂ ܘܳܐܡܪܺܝܢ܂ ܠܳܐ ܨܳܒܼܶܝܢ ܚ̱ܢܰܢ ܕܢܰܡܠܶܟܼ ܥܠܰܝܢ ܗܳܢܳܐ܀
19:15 [ai]ܘܟܼܰܕܼ ܢܣܰܒܼ ܡܰܠܟܿܽܘܬܼܳܐ ܘܰܗܦܼܰܟܼ܃ ܐܶܡܰܪ ܕܢܶܩܪܽܘܢ ܠܶܗ ܗܳܢܽܘܢ ܥܰܒܼܕܿܰܘܗ̱ܝ̈܂ ܕܝܰܗ̱ܒܼ ܠܗܽܘܢ ܟܶܣܦܿܳܐ܃ ܕܢܶܕܿܰܥ ܡܳܢܳܐ ܟܽܠ ܚܰܕܼ ܚܰܕܼ ܡܶܢܗܽܘܢ ܐܶܬܿܬܿܰܓܿܰܪ܂
19:16 [ai]ܘܶܐܬܼܳܐ ܩܰܕܼܡܳܝܳܐ܂ ܘܶܐܡܰܪ܂ ܡܳܪܝ܃ ܡܰܢܝܳܟܼ܂ ܥܶܣܪܳܐ ܡܢܺܝܢ̈ ܐܰܘܬܿܰܪ܂
19:17 [ai]ܐܳܡܰܪ ܠܶܗ܂ ܐܺܝܘ ܥܰܒܼܕܿܳܐ ܛܳܒܼܳܐ܂ ܕܰܒܼܩܰܠܺܝܠ ܐܶܫܬܿܟܼܰܚܬܿ ܡܗܰܝܡܰܢ܃ ܬܶܗܘܶܐ ܫܰܠܺܝܛ ܥܰܠ ܥܶܣܪܳܐ ܟܰܪ̈ܟܼܺܝܢ܂
19:18 [ai]ܘܶܐܬܼܳܐ ܕܰܬܼܪܶܝܢ ܘܶܐܡܰܪ܂ ܡܳܪܝ܃ ܡܰܢܝܳܟܼ܂ ܚܰܡܫܳܐ ܡܢܺܝܢ̈ ܥܒܼܰܕܼ܂
19:19 [ai]ܐܶܡܰܪ ܐܳܦܼ ܠܗܳܢܳܐ܂ ܐܳܦܼ ܐܰܢ̱ܬܿ ܬܶܗܘܶܐ ܫܰܠܺܝܛ܂ ܥܰܠ ܚܰܡܫܳܐ ܟܰܪ̈ܟܼܺܝܢ܂
19:20 [ai]ܘܶܐܬܼܳܐ ܐ̱ܚܪܺܢܳܐ܂ ܘܶܐܡܰܪ܂ ܡܳܪܝ܃ ܗܳܐ ܡܰܢܝܳܟܼ ܗܰܘ ܕܺܐܝܬܼ ܗ̱ܘܳܐ ܠܘܳܬܼܝ܂ ܟܰܕܼ ܣܺܝܡ ܒܣܶܕܿܽܘܢܳܐ܂
19:21 [ai]ܕܶܚܠܶܬܼ ܓܶܝܪ ܡܶܢܳܟܼ܂ ܕܓܰܒܼܪܳܐ ܐܰܢ̱ܬܿ ܩܰܫܝܳܐ܂ ܘܫܳܩܶܠ ܐܰܢ̱ܬܿ ܡܶܕܶܡ ܕܠܳܐ ܣܳܡܬܿ܂ ܘܚܳܨܶܕܼ ܐܰܢ̱ܬܿ ܡܶܕܶܡ ܕܠܳܐ ܙܪܰܥܬܿ܂
19:22 [ai]ܐܳܡܰܪ ܠܶܗ܂ ܡܶܢ ܦܽܘܡܳܟܼ ܐܶܕܿܽܘܢܳܟܼ ܥܰܒܼܕܿܳܐ ܒܺܝܫܳܐ܂ ܝܳܕܼܰܥ ܗ̱ܘܰܝܬܿ ܠܺܝ ܕܓܰܒܼܪܳܐ ܐ̱ܢܳܐ ܩܰܫܝܳܐ܃ ܘܫܳܩܶܠ ܐ̱ܢܳܐ ܡܶܕܶܡ ܕܠܳܐ ܣܳܡܶܬܼ܃ ܘܚܳܨܶܕܼ ܐ̱ܢܳܐ ܡܶܕܶܡ ܕܠܳܐ ܙܶܪܥܶܬܼ܃
19:23 [ai]ܠܡܳܢܳܐ ܠܳܐ ܝܰܗ̱ܒܼܬܿ ܟܶܣܦܿܝ ܥܰܠ ܦܳܬܼܽܘܪܳܐ܂ ܘܶܐܢܳܐ ܐܳܬܼܶܐ ܗ̱ܘܺܝܬܼ ܬܳܒܼܰܥ ܠܶܗ܂ ܥܰܡ ܪ̈ܶܒܿܝܳܬܼܶܗ܂
19:24 [ai]ܘܰܠܗܳܢܽܘܢ ܕܩܳܝܡܺܝܢ ܩܕܼܳܡܰܘܗ̱ܝ܂ ܐܶܡܰܪ܂ ܣܰܒܼܘ ܡܶܢܶܗ ܡܰܢܝܳܐ܃ ܘܗܰܒܼܘ ܠܗܰܘ ܕܺܐܝܬܼ ܠܘܳܬܼܶܗ ܥܶܣܪܳܐ ܡܢܺܝܢ̈܀
19:25 [ai]ܐܳܡܪܺܝܢ ܠܶܗ܂ ܡܳܪܰܢ܃ ܐܺܝܬܼ ܠܘܳܬܼܶܗ ܥܶܣܪܳܐ ܡܢܺܝܢ̈܀
19:26 [ai]ܐܳܡܰܪ ܠܗܽܘܢ܂ ܐܳܡܰܪ ܐ̱ܢܳܐ ܠܟܼܽܘܢ܃ ܕܰܠܟܼܽܠ ܡܰܢ ܕܺܐܝܬܼ ܠܶܗ܂ ܢܶܬܼܺܝܗܶܒܼ ܠܶܗ܂ ܘܡܶܢ ܗܰܘ ܕܠܰܝܬܿ ܠܶܗ܃ ܐܳܦܼ ܗܰܘ ܕܺܐܝܬܼ ܠܶܗ܂ ܢܶܬܼܢܣܶܒܼ ܡܶܢܶܗ܂
19:27 [ai]ܒܪܰܡ ܠܗܳܢܽܘܢ ܒܥܶܠܕܿܒܼܳܒܼܰܝ̈܂ ܐܰܝܠܶܝܢ ܕܠܳܐ ܨܒܼܰܘ ܕܰܐܡܠܶܟܼ ܥܠܰܝܗܽܘܢ܃ ܐܰܝܬܰܘ ܐܶܢܽܘܢ܂ ܘܩܰܛܶܠܘ ܐܶܢܽܘܢ ܩܕܼܳܡܰܝ܀
19:28 [ai]ܘܟܼܰܕܼ ܐܶܡܰܪ ܗܳܠܶܝܢ ܝܶܫܽܘܥ܃ ܢܦܼܰܩ ܠܰܩܕܼܳܡܰܘܗ̱ܝ ܕܢܺܐܙܰܠ ܠܽܐܘܪܺܫܠܶܡ܂
19:29 [ai]ܘܟܼܰܕܼ ܡܰܛܺܝ ܠܒܼܶܝܬܼ ܦܿܳܓܿܶܐ ܘܒܼܶܝܬܼ ܥܰܢܝܳܐ܃ ܥܰܠ ܓܶܢ̱ܒܼ ܛܽܘܪܳܐ ܕܡܶܬܼܩܪܶܐ ܕܒܶܝܬܼ ܙܰܝܬܿܶܐ̈܃ ܫܰܕܿܰܪ ܬܿܪ̈ܶܝܢ ܡܶܢ ܬܰܠܡܺܝܕܼܰܘܗ̱ܝ̈܂
19:30 [ai]ܘܶܐܡܰܪ ܠܗܽܘܢ܂ ܙܶܠܘ ܠܰܩܪܺܝܬܼܳܐ ܗܳܝ ܕܰܠܩܽܘܒܼܠܰܢ܂ ܘܟܼܰܕܼ ܥܳܐܠܺܝܢ ܐܢ̱ܬܿܽܘܢ ܠܳܗ܃ ܗܳܐ ܡܶܫܟܿܚܺܝܢ ܐܢ̱ܬܿܽܘܢ ܥܺܝܠܳܐ ܕܰܐܣܺܝܪ܃ ܕܐ̱ܢܳܫ ܡܶܡܬܼܽܘܡ ܠܳܐ ܪܟܼܶܒܼ ܥܠܰܘܗ̱ܝ܂ ܫܪܰܘ ܐܰܝܬܿܰܐܘܽܗ̱ܝ܂
19:31 [ai]ܘܶܐܢ ܐ̱ܢܳܫ ܡܫܰܐܶܠ ܠܟܼܽܘܢ܂ ܠܡܳܢܳܐ ܫܳܪܶܝܢ ܐܢ̱ܬܿܽܘܢ ܠܶܗ܃ ܗܳܟܼܰܢܳܐ ܐܶܡܰܪܘ ܠܶܗ܂ ܠܡܳܪܰܢ ܡܶܬܼܒܿܥܶܐ܀
19:32 [ai]ܘܶܐܙܰܠܘ ܗܳܢܽܘܢ ܕܶܐܫܬܿܰܕܿܰܪܘ܃ ܘܶܐܫܟܿܰܚܘ ܐܰܝܟܿܰܢܳܐ ܕܶܐܡܰܪ ܠܗܽܘܢ܂
19:33 [ai]ܘܟܼܰܕܼ ܫܳܪܶܝܢ ܠܶܗ ܠܥܺܝܠܳܐ܃ ܐܳܡܪܺܝܢ ܠܗܽܘܢ ܡܳܪ̈ܰܘܗ̱ܝ܂ ܡܳܢܳܐ ܫܳܪܶܝܢ ܐܢ̱ܬܿܽܘܢ ܥܺܝܠܳܐ ܗܰܘ܂
19:34 [ai]ܘܶܐܡܰܪܘ ܠܗܽܘܢ܂ ܕܰܠܡܳܪܰܢ ܡܶܬܼܒܿܥܶܐ܀
19:35 [ai]ܘܰܐܝܬܿܝܽܘܗ̱ܝ ܠܘܳܬܼ ܝܶܫܽܘܥ܂ ܘܰܐܪܡܺܝܘ ܥܰܠ ܥܺܝܠܳܐ ܡܳܐܢܰܝܗܽܘܢ̈܃ ܘܰܐܪܟܿܒܼܽܘܗ̱ܝ ܠܝܶܫܽܘܥ ܥܠܰܘܗ̱ܝ܀
19:36 [ai]ܟܰܕܼ ܕܶܝܢ ܐܳܙܶܠ܃ ܦܳܪܣܺܝܢ ܗ̱ܘܰܘ ܡܳܐܢܰܝܗܽܘܢ̈ ܒܽܐܘܪܚܳܐ܂
19:37 [ai]ܘܟܼܰܕܼ ܩܪܶܒܼ ܠܡܰܚܰܬܿܬܼܳܐ ܕܛܽܘܪܳܐ ܕܒܶܝܬܼ ܙܰܝܬܿܶܐ̈܃ ܫܰܪܺܝܘ ܟܽܠܶܗ ܟܶܢܫܳܐ ܕܬܰܠܡܺܝܕܼܶܐ̈ ܚܳܕܼܶܝܢ܃ ܘܰܡܫܰܒܿܚܺܝܢ ܠܰܐܠܳܗܳܐ ܒܩܳܠܳܐ ܪܳܡܳܐ܃ ܥܰܠ ܟܽܠ ܚܰܝܠܶܐ̈ ܕܰܚܙܰܘ܂
19:38 [ai]ܘܳܐܡܪܺܝܢ ܗ̱ܘܰܘ܃ ܒܪܺܝܟܼ ܗ̱ܽܘ ܡܰܠܟܿܳܐ ܕܳܐܬܼܶܐ ܒܰܫܡܶܗ ܕܡܳܪܝܳܐ܂ ܫܠܳܡܳܐ ܒܰܫܡܰܝܳܐ܂ ܘܫܽܘܒܼܚܳܐ ܒܰܡܪ̈ܰܘܡܶܐ܀
19:39 [ai]ܐ̱ܢܳܫܳܐ̈ ܕܶܝܢ ܡܶܢ ܦܿܪ̈ܺܝܫܶܐ ܡܶܢ ܒܰܝܢܰܝ ܟܶܢܫܶܐ̈܂ ܐܳܡܪܺܝܢ ܠܶܗ܂ ܪܰܒܺܝ܂ ܟܐܺܝ ܒܬܰܠܡܺܝܕܼܰܝܟܿ̈܂
19:40 [ai]ܐܳܡܰܪ ܠܗܽܘܢ܂ ܐܳܡܰܪ ܐ̱ܢܳܐ ܠܟܼܽܘܢ܃ ܕܶܐܢ ܗܳܠܶܝܢ ܢܶܫܬܿܩܽܘܢ܂ ܟܺܐܦܼܶܐ̈ ܢܶܩܥܝܳܢ̈܀
19:41 [ai]ܘܟܼܰܕܼ ܩܪܶܒܼ ܘܰܚܙܳܗ ܠܰܡܕܼܺܝܢ̱ܬܳܐ܃ ܒܟܳܐ ܥܠܶܝܗ܂
19:42 [ai]ܘܶܐܡܰܪ܂ ܐܶܠܽܘ ܟܰܝ ܝܳܕܼܰܥܬܿܝ ܐܰܝܠܶܝܢ ܕܺܐܝܬܼܰܝܗܶܝܢ ܕܰܫܠܳܡܶܟܼܝ܃ ܐܳܦܼܶܢ ܒܗܳܢܳܐ ܝܰܘܡܶܟܼܝ܃ ܗܳܫܳܐ ܕܶܝܢ ܐܶܬܼܟܿܰܣܺܝ ܠܗܶܝܢ ܡܶܢ ܥܰܝܢܰܝܟܿܝ̈܂
19:43 [ai]ܢܺܐܬܼܽܘܢ ܠܶܟܼܝ ܕܶܝܢ ܝܰܘܡܳܬܼܳܐ̈܃ ܕܢܶܚܕܿܪܽܘܢܶܟܼܝ ܒܥܶܠܕܿܒܼܳܒܼܰܝܟܿܝ̈܃ ܘܢܶܐܠܨܽܘܢܶܟܼܝ ܡܶܢ ܟܽܠ ܕܽܘܟܿܳܐ܂
19:44 [ai]ܘܢܶܣܚܦܼܽܘܢܶܟܼܝ܂ ܘܠܰܒܼܢܰܝܟܿܝ ܒܓܰܘܶܟܼܝ܂ ܘܠܳܐ ܢܶܫܒܿܩܽܘܢ ܒܶܟܼܝ ܟܺܐܦܼ ܥܰܠ ܟܺܐܦܼ܃ ܚܠܳܦܼ ܕܠܳܐ ܺܝܕܼܰܥܬܿܝ ܙܰܒܼܢܳܐ ܕܣܽܘܥܪܳܢܶܟܼܝ܀
19:45 [ai]ܘܟܼܰܕܼ ܥܰܠ ܠܗܰܝܟܠܳܐ܃ ܫܰܪܺܝ ܠܡܰܦܿܳܩܽܘ ܠܰܐܝܠܶܝܢ ܕܙܳܒܼܢܺܝܢ ܒܶܗ ܘܰܡܙܰܒܢܺܝܢ܂
19:46 [ai]ܘܶܐܡܰܪ ܠܗܽܘܢ܂ ܟܬܼܺܝܒܼ ܕܒܰܝܬܿܝ܂ ܒܶܝܬܼ ܨܠܽܘܬܼܳܐ ܐܺܝܬܼܰܘܗ̱ܝ܂ ܐܰܢ̱ܬܿܽܘܢ ܕܶܝܢ ܥܒܼܰܕܿܬܿܽܘܢܳܝܗ̱ܝ ܡܥܰܪܬܼܳܐ ܕܠܶܣܛܳܝܶܐ̈܀
19:47 [ai]ܘܗܽܘ ܡܰܠܶܦܼ ܗ̱ܘܳܐ ܟܽܠ ܝܽܘܡ ܒܗܰܝܟܠܳܐ܂ ܪ̈ܰܒܰܝ ܟܳܗܢܶܐ̈ ܕܶܝܢ ܘܣܳܦܼܪ̈ܶܐ ܘܩܰܫܺܝܫܶܐ̈ ܕܥܰܡܳܐ܃ ܒܿܳܥܶܝܢ ܗ̱ܘܰܘ ܠܡܰܘܒܿܳܕܼܽܘܬܼܶܗ܂
19:48 [ai]ܘܠܳܐ ܡܶܫܟܿܚܺܝܢ ܗ̱ܘܰܘ ܡܳܢܳܐ ܢܶܥܒܿܕܼܽܘܢ ܠܶܗ܂ ܟܽܠܶܗ ܓܶܝܪ ܥܰܡܳܐ ܬܠܶܐ ܗ̱ܘܳܐ ܒܶܗ ܠܡܶܫܡܥܶܗ ܿ܀ܿ܀ܿ

next chapter