← Back
The Comprehensive Aramaic Lexicon
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


20:01 [ai]ܘܰܗܘܳܐ ܒܚܰܕܼ ܡܶܢ ܝܰܘܡܳܬܼܳܐ̈܃ ܟܰܕܼ ܡܰܠܶܦܼ ܒܗܰܝܟܠܳܐ ܠܥܰܡܳܐ܂ ܘܰܡܣܰܒܰܪ܃ ܩܳܡܘ ܥܠܰܘܗ̱ܝ ܪ̈ܰܒܰܝ ܟܳܗܢܶܐ̈ ܘܣܳܦܼܪ̈ܶܐ ܥܰܡ ܩܰܫܺܝܫܶܐ̈܂
20:02 [ai]ܘܳܐܡܪܺܝܢ ܠܶܗ܂ ܐܶܡܰܪ ܠܰܢ ܒܰܐܝܢܳܐ ܫܽܘܠܛܳܢܳܐ ܗܳܠܶܝܢ ܥܳܒܼܶܕܼ ܐܰܢ̱ܬܿ܂ ܘܡܰܢܽܘ ܗܰܘ ܕܝܰܗ̱ܒܼ ܠܳܟܼ ܫܽܘܠܛܳܢܳܐ ܗܳܢܳܐ܂
20:03 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܐܶܫܰܐܶܠܟܼܽܘܢ ܐܳܦܼ ܐܶܢܳܐ ܡܶܠܬܼܳܐ܂ ܘܶܐܡܰܪܘ ܠܺܝ܂
20:04 [ai]ܡܰܥܡܽܘܕܼܺܝܬܼܶܗ ܕܝܽܘܚܰܢܳܢ܂ ܡܶܢ ܫܡܰܝܳܐ ܗ̱ܘܳܬܼ ܐܰܘ ܡܶܢ ܒܢܰܝ ܐ̱ܢܳܫܳܐ̈܂
20:05 [ai]ܗܶܢܽܘܢ ܕܶܝܢ ܡܶܬܼܚܰܫܒܼܺܝܢ ܗ̱ܘܰܘ ܒܢܰܦܼܫܗܽܘܢ܂ ܘܳܐܡܪܺܝܢ܂ ܕܶܐܢ ܢܺܐܡܰܪ ܡܶܢ ܫܡܰܝܳܐ܃ ܐܳܡܰܪ ܠܰܢ܃ ܘܡܶܛܽܠ ܡܳܢܳܐ ܠܳܐ ܗܰܝܡܶܢܬܿܽܘܢܳܝܗ̱ܝ܂
20:06 [ai]ܐܶܢ ܕܶܝܢ ܢܺܐܡܰܪ ܡܶܢ ܒܢܰܝ ܐ̱ܢܳܫܳܐ̈܃ ܪܳܓܼܶܡ ܠܰܢ ܥܰܡܳܐ ܟܽܠܶܗ܂ ܡܦܿܳܣܺܝܢ ܓܶܝܪ ܕܝܽܘܚܰܢܳܢ ܢܒܼܺܝܳܐ ܗܽܘ܂
20:07 [ai]ܘܶܐܡܰܪܘ ܠܶܗ܂ ܕܠܳܐ ܝܳܕܼܥܺܝܢܰܢ ܡܶܢ ܐܰܝܡܶܟܿܳܐ ܗ̱ܝ܂
20:08 [ai]ܐܳܡܰܪ ܠܗܽܘܢ ܝܶܫܽܘܥ܂ ܘܠܳܐ ܐܶܢܳܐ ܐܳܡܰܪ ܐ̱ܢܳܐ ܠܟܼܽܘܢ܂ ܒܰܐܝܢܳܐ ܫܽܘܠܛܳܢܳܐ ܗܳܠܶܝܢ ܥܳܒܼܶܕܼ ܐ̱ܢܳܐ܀
20:09 [ai]ܘܫܰܪܺܝ ܕܢܺܐܡܰܪ ܠܥܰܡܳܐ ܡܰܬܼܠܳܐ ܗܳܢܳܐ܂ ܓܰܒܼܪܳܐ ܚܰܕܼ ܢܨܰܒܼ ܟܰܪܡܳܐ܂ ܘܰܐܘܚܕܼܶܗ ܠܦܼܰܠܳܚܶܐ̈܂ ܘܰܐܒܼܥܶܕܼ ܙܰܒܼܢܳܐ ܣܰܓܿܺܝܳܐܐ܂
20:10 [ai]ܘܰܒܙܰܒܼܢܳܐ ܫܰܕܿܰܪ ܥܰܒܼܕܿܶܗ ܠܘܳܬܼ ܦܰܠܳܚܶܐ̈܃ ܕܢܶܬܿܠܽܘܢ ܠܶܗ ܡܶܢ ܦܿܺܐܪ̈ܶܐ ܕܟܰܪܡܳܐ܂ ܦܰܠܳܚܶܐ̈ ܕܶܝܢ ܡܚܰܐܘܽܗ̱ܝ܂ ܘܫܰܕܿܪܽܘܗ̱ܝ ܟܰܕܼ ܣܪܺܝܩ܂
20:11 [ai]ܘܰܐܘܣܶܦܼ܂ ܘܫܰܕܿܰܪ ܠܥܰܒܼܕܿܶܗ ܐ̱ܚܪܺܢܳܐ܂ ܗܶܢܽܘܢ ܕܶܝܢ ܐܳܦܼ ܠܗܰܘ܂ ܡܚܰܐܘܽܗ̱ܝܘ ܨܰܥܪܽܘܗ̱ܝ܂ ܘܫܰܕܿܪܽܘܗ̱ܝ ܟܰܕܼ ܣܪܺܝܩ܂
20:12 [ai]ܘܰܐܘܣܶܦܼ܂ ܘܫܰܕܿܰܪ ܕܰܬܼܠܳܬܼܳܐ܂ ܗܶܢܽܘܢ ܕܶܝܢ ܘܳܐܦܼ ܠܗܰܘ ܨܰܠܦܼܽܘܗ̱ܝ܂ ܘܰܐܦܿܩܽܘܗ̱ܝ܂
20:13 [ai]ܐܳܡܰܪ ܡܳܪܶܐ ܟܰܪܡܳܐ܂ ܡܳܢܳܐ ܐܶܥܒܿܶܕܼ܂ ܐܶܫܰܕܿܰܪ ܒܶܪܝ ܚܰܒܺܝܒܼܳܐ܃ ܟܒܼܰܪ ܢܶܚܙܽܘܢܳܝܗ̱ܝ܂ ܘܢܶܬܼܟܿܰܚܕܼܽܘܢ܂
20:14 [ai]ܟܰܕܼ ܚܙܰܐܘܽܗ̱ܝ ܕܶܝܢ ܦܰܠܳܚܶܐ̈܃ ܡܶܬܼܚܰܫܒܼܺܝܢ ܗ̱ܘܰܘ ܒܢܰܦܼܫܗܽܘܢ܂ ܘܳܐܡܪܺܝܢ܂ ܗܳܢܰܘ ܝܳܪܬܳܐ܂ ܬܰܘ ܢܶܩܛܠܺܝܘܗ̱ܝ܂ ܘܬܼܶܗܘܶܐ ܝܳܪܬܿܽܘܬܼܳܐ ܕܺܝܠܰܢ܂
20:15 [ai]ܘܰܐܦܿܩܽܘܗ̱ܝ ܠܒܼܰܪ ܡܶܢ ܟܰܪܡܳܐ܂ ܘܩܰܛܠܽܘܗ̱ܝ܂ ܡܳܢܳܐ ܗܳܟܼܺܝܠ ܢܶܥܒܿܶܕܼ ܠܗܽܘܢ ܡܳܪܶܐ ܟܰܪܡܳܐ܂
20:16 [ai]ܢܺܐܬܼܶܐ ܘܢܰܘܒܿܶܕܼ ܠܦܼܰܠܳܚܶܐ̈ ܗܳܢܽܘܢ܂ ܘܢܶܬܿܶܠ ܟܰܪܡܳܐ ܠܰܐ̱ܚܪ̈ܳܢܶܐ܂ ܟܰܕܼ ܫܡܰܥܘ ܕܶܝܢ܂ ܐܶܡܰܪܘ܂ ܠܳܐ ܬܶܗܘܶܐ ܗܳܕܼܶܐ܂
20:17 [ai]ܗܽܘ ܕܶܝܢ ܚܳܪ ܒܗܽܘܢ܂ ܘܶܐܡܰܪ܂ ܘܡܳܢܳܐ ܗ̱ܝ ܗܳܝ ܕܰܟܼܬܼܺܝܒܼܳܐ܃ ܕܟܺܐܦܼܳܐ ܕܰܐܣܠܺܝܘ ܒܰܢܳܝܶܐ̈܃ ܗܺܝ ܗܘܳܬܼ ܠܪܺܝܫ ܩܰܪܢܳܐ ܕܙܳܘܺܝܬܼܳܐ܂
20:18 [ai]ܘܟܼܽܠ ܕܢܶܦܿܶܠ ܥܰܠ ܗܳܝ ܟܺܐܦܼܳܐ܂ ܢܶܬܼܪܥܰܥ܂ ܘܟܼܽܠ ܡܰܢ ܕܗܺܝ ܬܶܦܿܶܠ ܥܠܰܘܗ̱ܝ ܬܶܕܼܪܶܝܘܗ̱ܝ܀
20:19 [ai]ܒܥܰܘ ܗ̱ܘܰܘ ܕܶܝܢ ܪ̈ܰܒܰܝ ܟܳܗܢܶܐ̈ ܘܣܳܦܼܪ̈ܶܐ ܕܢܰܪܡܽܘܢ ܥܠܰܘܗ̱ܝ ܐܺܝܕܼܰܝܳܐ̈ ܒܗܳܝ ܫܳܥܬܼܳܐ܃ ܘܰܕܼܚܶܠܘ ܡܶܢ ܥܰܡܳܐ܂ ܺܝܕܼܰܥܘ ܓܶܝܪ ܕܰܥܠܰܝܗܽܘܢ ܐܶܡܰܪ ܡܰܬܼܠܳܐ ܗܳܢܳܐ܀
20:20 [ai]ܘܫܰܕܿܰܪܘ ܠܘܳܬܼܶܗ ܓܳܫܽܘܫܶܐ̈܂ ܕܿܡܶܬܿܕܰܡܶܝܢ ܒܙܰܕܿܺܝܩܶܐ̈܃ ܕܢܶܐܚܕܿܽܘܢܳܝܗ̱ܝ ܒܡܶܠܬܼܳܐ܂ ܘܢܰܫܠܡܽܘܢܳܝܗ̱ܝ ܠܕܼܰܝܳܢܳܐ܂ ܘܰܠܫܽܘܠܛܳܢܶܗ ܕܗܺܓܼܡܽܘܢܳܐ܂
20:21 [ai]ܘܫܰܐܠܽܘܗ̱ܝ܂ ܘܳܐܡܪܺܝܢ ܠܶܗ܂ ܡܰܠܦܼܳܢܳܐ܃ ܝܳܕܼܥܺܝܢܰܢ܂ ܕܰܬܼܪܺܝܨܳܐܺܝܬܼ ܡܡܰܠܶܠ ܐܰܢ̱ܬܿ ܘܡܰܠܶܦܼ܂ ܘܠܳܐ ܢܳܣܶܒܼ ܐܰܢ̱ܬܿ ܒܰܐܦܿܶܐ̈܂ ܐܶܠܳܐ ܒܩܽܘܫܬܳܐ܂ ܐܽܘܪܚܳܐ ܕܰܐܠܳܗܳܐ ܡܰܠܶܦܼ ܐܰܢ̱ܬܿ܂
20:22 [ai]ܫܰܠܺܝܛ ܠܰܢ܂ ܕܢܶܬܿܶܠ ܟܣܶܦܼ ܪܺܫܳܐ ܠܩܶܣܰܪ܂ ܐܰܘ ܠܳܐ܂
20:23 [ai]ܗܽܘ ܕܶܝܢ ܐܶܣܬܿܰܟܿܰܠ ܚܳܪܥܽܘܬܼܗܽܘܢ܂ ܘܶܐܡܰܪ܂ ܡܳܢܳܐ ܡܢܰܣܶܝܢ ܐܢ̱ܬܿܽܘܢ ܠܺܝ܂
20:24 [ai]ܚܰܘܰܐܘܽܢܝ ܕܺܝܢܳܪܳܐ܂ ܕܡܰܢ ܐܺܝܬܼ ܒܶܗ ܨܰܠܡܳܐ ܘܰܟܼܬܼܺܝܒܼܳܬܼܳܐ̈܂ ܗܶܢܽܘܢ ܕܶܝܢ ܐܶܡܰܪܘ܂ ܕܩܶܣܰܪ܂
20:25 [ai]ܐܳܡܰܪ ܠܗܽܘܢ ܝܶܫܽܘܥ܂ ܗܰܒܼܘ ܗܳܟܼܺܝܠ ܕܩܶܣܰܪ ܠܩܶܣܰܪ܂ ܘܕܼܰܐܠܳܗܳܐ ܠܰܐܠܳܗܳܐ܂
20:26 [ai]ܘܠܳܐ ܐܶܫܟܿܰܚܘ ܠܡܶܐܚܰܕܼ ܡܶܢܶܗ ܡܶܠܬܼܳܐ ܩܕܼܳܡ ܥܰܡܳܐ܂ ܘܶܐܬܿܕܰܡܰܪܘ ܥܰܠ ܦܶܬܼܓܼܳܡܶܗ܂ ܘܰܫܬܼܶܩܘ܀
20:27 [ai]ܩܪܶܒܼܘ ܕܶܝܢ ܐ̱ܢܳܫܺܝܢ̈ ܡܶܢ ܙܰܕܿܽܘܩܳܝܶܐ̈܃ ܗܳܢܽܘܢ ܕܳܐܡܪܺܝܢ ܕܰܩܝܳܡܬܳܐ ܠܰܝܬܿ܂ ܘܫܰܐܠܽܘܗ̱ܝ܂
20:28 [ai]ܘܳܐܡܪܺܝܢ ܠܶܗ܂ ܡܰܠܦܼܳܢܳܐ܃ ܡܽܘܫܶܐ ܟܬܼܰܒܼ ܠܰܢ܃ ܕܶܐܢ ܐ̱ܢܳܫ ܢܡܽܘܬܼ ܐܰܚܽܘܗ̱ܝ܂ ܕܺܐܝܬܼ ܠܶܗ ܐܰܢ̱ܬܿܬܼܳܐ ܕܠܳܐ ܒܢܰܝܳܐ܃ ܢܶܣܰܒܼ ܐܰܚܽܘܗ̱ܝ ܐܰܢ̱ܬܿܬܼܶܗ܂ ܘܰܢܩܺܝܡ ܙܰܪܥܳܐ ܠܰܐܚܽܘܗ̱ܝ܂
20:29 [ai]ܫܰܒܼܥܳܐ ܕܶܝܢ ܐܰܚܺܝܢ̈ ܐܺܝܬܼ ܗ̱ܘܰܘ܂ ܩܰܕܼܡܳܝܳܐ ܢܣܰܒܼ ܐܰܢ̱ܬܿܬܼܳܐ܂ ܘܡܺܝܬܼ ܕܠܳܐ ܒܢܰܝܳܐ܂
20:30 [ai]ܘܢܰܣܒܿܳܗ ܕܿܰܬܼܪ̈ܶܝܢ ܠܰܐܢ̱ܬܿܬܼܶܗ܂ ܘܗܳܢܳܐ ܡܺܝܬܼ ܕܠܳܐ ܒܢܰܝܳܐ܂
20:31 [ai]ܘܕܼܰܬܼܠܳܬܼܳܐ ܬܽܘܒܼ ܢܰܣܒܿܳܗ܂ ܘܗܳܟܼܘܳܬܼ ܘܳܐܦܼ ܫܰܒܼܥܳܬܼܰܝܗܽܘܢ܂ ܘܡܺܝܬܼܘ܂ ܘܠܳܐ ܫܒܼܰܩܘ ܒܢܰܝܳܐ܂
20:32 [ai]ܘܡܺܝܬܼܰܬܼ ܒܚܰܪܬܼܳܐ ܐܳܦܼ ܐܰܢ̱ܬܿܬܼܳܐ܂
20:33 [ai]ܒܰܩܝܳܡܬܳܐ ܗܳܟܼܺܝܠ܂ ܕܰܐܝܢܳܐ ܡܶܢܗܽܘܢ ܬܶܗܘܶܐ ܐܰܢ̱ܬܿܬܼܳܐ܂ ܫܰܒܼܥܳܬܼܰܝܗܽܘܢ̈ ܓܶܝܪ ܢܰܣܒܿܽܘܗ܂
20:34 [ai]ܐܳܡܰܪ ܠܗܽܘܢ ܝܶܫܽܘܥ܂ ܒܢܰܘܗ̱ܝ ܕܥܳܠܡܳܐ ܗܳܢܳܐ܂ ܢܳܣܒܺܝܢ ܢܶܫܶܐ̈܂ ܘܢܶܫܶܐ̈ ܗܳܘܝܳܢ̈ ܠܓܼܰܒܼܪ̈ܶܐ܂
20:35 [ai]ܗܳܢܽܘܢ ܕܶܝܢ ܕܰܠܗܰܘ ܥܳܠܡܳܐ ܫܘܰܘ܂ ܘܠܰܩܝܳܡܬܳܐ ܕܡܶܢ ܒܶܝܬܼ ܡܺܝܬܼܶܐ̈܃ ܠܳܐ ܢܳܣܒܺܝܢ ܢܶܫܶܐ̈܂ ܘܳܐܦܼ ܠܳܐ ܢܶܫܶܐ̈ ܗܳܘܝܳܢ̈ ܠܓܼܰܒܼܪ̈ܶܐ܂
20:36 [ai]ܐܳܦܼܠܳܐ ܓܶܝܪ ܬܽܘܒܼ ܠܰܡܡܳܬܼ ܡܶܫܟܿܚܺܝܢ܂ ܐܰܝܟܼ ܡܰܠܰܐܟܼܶܐ̈ ܐܶܢܽܘܢ ܓܶܝܪ܂ ܘܰܒܢܰܝܳܐ ܐܺܝܬܼܰܝܗܽܘܢ ܕܰܐܠܳܗܳܐ܂ ܡܶܛܽܠ ܕܰܗܘܰܘ ܒܢܰܝܳܐ ܕܰܩܝܳܡܬܳܐ܂
20:37 [ai]ܕܩܳܝܡܺܝܢ ܕܶܝܢ ܡܺܝܬܼܶܐ̈܂ ܐܳܦܼ ܡܽܘܫܶܐ ܒܰܕܿܶܩ܂ ܐܰܕܼܟܰܪ ܓܶܝܪ ܒܣܰܢܝܳܐ ܟܰܕܼ ܐܳܡܰܪ܂ ܡܳܪܝܳܐ ܐܰܠܳܗܶܗ ܕܰܐܒܼܪܳܗܳܡ܂ ܘܰܐܠܳܗܶܗ ܕܺܐܝܣܚܳܩ܂ ܘܰܐܠܳܗܶܗ ܕܝܰܥܩܽܘܒܼ܂
20:38 [ai]ܐܰܠܳܗܳܐ ܕܶܝܢ ܠܳܐ ܗ̱ܘܳܐ ܕܡܺܝܬܼܶܐ̈܂ ܐܶܠܳܐ ܕܚܰܝ̈ܶܐ܂ ܟܽܠܗܽܘܢ ܓܶܝܪ ܚܰܝܺܝܢ ܐܶܢܽܘܢ ܠܶܗ܀
20:39 [ai]ܘܰܥܢܰܘ ܐ̱ܢܳܫܺܝܢ̈ ܡܶܢ ܣܳܦܼܪ̈ܶܐ܂ ܘܳܐܡܪܺܝܢ ܠܶܗ܂ ܡܰܠܦܼܳܢܳܐ܂ ܫܰܦܿܺܝܪ ܐܳܡܰܪ ܐܰܢ̱ܬܿ܂
20:40 [ai]ܘܠܳܐ ܬܽܘܒܼ ܐܰܡܪܰܚܘ ܠܰܡܫܰܐܳܠܽܘܬܼܶܗ ܥܰܠ ܡܶܕܶܡ܀
20:41 [ai]ܘܶܐܡܰܪ ܗ̱ܘܳܐ ܠܗܽܘܢ܂ ܐܰܝܟܿܰܢܳܐ ܐܳܡܪܺܝܢ ܣܳܦܼܪ̈ܶܐ ܥܰܠ ܡܫܺܝܚܳܐ ܕܰܒܼܪܶܗ ܗ̱ܽܘ ܕܕܼܰܘܺܝܕܼ܂
20:42 [ai]ܘܗܽܘ ܕܿܰܘܺܝܕܼ ܐܶܡܰܪ ܒܰܟܼܬܼܳܒܼܳܐ ܕܿܡܰܙܡܽܘܪ̈ܶܐ܂ ܕܶܐܡܰܪ ܡܳܪܝܳܐ ܠܡܳܪܝ܂ ܬܶܒܼ ܠܳܟܼ ܡܶܢ ܝܰܡܺܝܢܝ܃
20:43 [ai]ܥܕܼܰܡܳܐ ܕܶܐܣܺܝܡ ܒܥܶܠܕܿܒܼܳܒܼܰܝܟܿ̈ ܬܚܶܝܬܼ ܪ̈ܶܓܼܠܰܝܟܿ܂
20:44 [ai]ܐܶܢ ܗܳܟܼܺܝܠ ܕܿܰܘܺܝܕܼ ܡܳܪܝ ܩܳܪܶܐ ܠܶܗ܃ ܐܰܝܟܿܰܢܳܐ ܒܪܶܗ ܗ̱ܽܘ܀܀
20:45 [ai]ܘܟܼܰܕܼ ܟܽܠܶܗ ܥܰܡܳܐ ܫܳܡܰܥ ܗ̱ܘܳܐ܃ ܐܶܡܰܪ ܠܬܼܰܠܡܺܝܕܼܰܘܗ̱ܝ̈܂
20:46 [ai]ܐܶܙܕܿܰܗ̱ܪܘ ܡܶܢ ܣܳܦܼܪ̈ܶܐ ܕܨܳܒܼܶܝܢ ܠܰܡܗܰܠܳܟܼܽܘ ܒܶܐܣܛܠܶܐ̈܃ ܘܪܳܚܡܺܝܢ ܫܠܳܡܳܐ ܒܫܽܘܩܶܐ̈܃ ܘܪܺܝܫ ܡܰܘܬܿܒܼܶܐ̈ ܒܰܟܼܢܽܘܫܳܬܼܳܐ̈܃ ܘܪܺܝܫ ܣܡܳܟܼܶܐ̈ ܒܰܐܚܫܳܡܝܳܬܼܳܐ̈܂
20:47 [ai]ܗܳܢܽܘܢ ܕܳܐܟܼܠܺܝܢ ܒܳܬܿܶܐ̈ ܕܿܰܐܪ̈ܡܠܳܬܼܳܐ܃ ܒܥܶܠܬܼܳܐ ܕܡܰܘܪܟܼܺܝܢ ܨܠܰܘܳܬܼܗܽܘܢ̈܂ ܗܶܢܽܘܢ ܢܩܰܒܿܠܽܘܢ ܕܺܝܢܳܐ ܝܰܬܿܺܝܪܳܐ܀

next chapter