The Comprehensive Aramaic Lexicon

22:01 [ai]	ܩܰܪܺܝܒܼ ܗ̱ܘܳܐ ܕܶܝܢ ܥܰܕܼܥܺܕܼܳܐ ܕܿܦܼܰܛܺܝܪ̈ܶܐ܂ ܕܡܶܬܼܩܪܶܐ ܦܶܨܚܳܐ܂
22:02 [ai]	ܘܒܼܳܥܶܝܢ ܗ̱ܘܰܘ ܪ̈ܰܒܰܝ ܟܳܗܢܶܐ̈ ܘܣܳܦܼܪ̈ܶܐ܃ ܕܰܐܝܟܿܰܢܳܐ ܢܶܩܛܠܽܘܢܳܝܗ̱ܝ܂ ܕܳܚܠܺܝܢ ܗ̱ܘܰܘ ܓܶܝܪ ܡܶܢ ܥܰܡܳܐ܀
22:03 [ai]	ܥܰܠ ܗ̱ܘܳܐ ܕܶܝܢ ܣܳܛܳܢܳܐ ܒܺܝܗܽܘܕܼܳܐ ܕܡܶܬܼܩܪܶܐ ܣܟܼܰܪܝܽܘܛܳܐ܂ ܕܺܐܝܬܼܰܘܗ̱ܝ ܗ̱ܘܳܐ ܡܶܢ ܡܶܢܝܳܢܳܐ ܕܿܰܬܼܪ̈ܶܥܣܰܪ܂
22:04 [ai]	ܘܶܐܙܰܠ ܡܰܠܶܠ ܥܰܡ ܪ̈ܰܒܰܝ ܟܳܗܢܶܐ̈ ܘܣܳܦܼܪ̈ܶܐ ܘܪ̈ܰܒܰܝ ܚܰܝܠܶܐ̈ ܕܗܰܝܟܠܳܐ܂ ܐܰܝܟܼ ܕܢܰܫܠܡܺܝܘܗ̱ܝ ܠܗܽܘܢ܀
22:05 [ai]	ܘܰܚܕܼܺܝܘ܂ ܘܰܐܩܺܝܡܘ ܕܢܶܬܿܠܽܘܢ ܠܶܗ ܟܶܣܦܿܳܐ܃
22:06 [ai]	ܘܶܐܫܬܰܘܕܿܺܝ ܠܗܽܘܢ܂ ܘܒܼܳܥܶܐ ܗ̱ܘܳܐ ܦܶܠܥܳܐ ܕܢܰܫܠܡܺܝܘܗ̱ܝ ܠܗܽܘܢ܂ ܒܶܠܥܳܕܼ ܡܶܢ ܟܶܢܫܳܐ܀܀
22:07 [ai]	ܘܡܰܛܺܝ ܝܰܘܡܳܐ ܕܿܦܼܰܛܺܝܪ̈ܶܐ܃ ܕܒܶܗ ܐܺܝܬܼ ܗ̱ܘܳܐ ܥܝܳܕܼܳܐ ܕܢܶܬܼܢܟܼܶܣ ܦܶܨܚܳܐ܂
22:08 [ai]	ܘܫܰܕܿܰܪ ܝܶܫܽܘܥ ܠܟܼܺܐܦܼܳܐ ܘܰܠܝܽܘܚܰܢܳܢ܂ ܘܶܐܡܰܪ ܠܗܽܘܢ܃ ܙܶܠܘ ܛܰܝܶܒܼܘ ܠܰܢ ܦܶܨܚܳܐ ܕܢܶܠܥܰܣ܂
22:09 [ai]	ܗܶܢܽܘܢ ܕܶܝܢ ܐܶܡܰܪܘ ܠܶܗ܂ ܐܰܝܟܿܳܐ ܨܳܒܼܶܐ ܐܰܢ̱ܬܿ ܕܰܢܛܰܝܶܒܼ܂
22:10 [ai]	ܐܳܡܰܪ ܠܗܽܘܢ܂ ܗܳܐ ܡܳܐ ܕܥܳܐܠܺܝܢ ܐܢ̱ܬܿܽܘܢ ܠܰܡܕܼܺܝܢ̱ܬܳܐ܃ ܦܳܓܼܰܥ ܒܟܽܘܢ ܓܰܒܼܪܳܐ ܕܰܫܩܺܝܠ ܓܪܳܒܼܳܐ ܕܡܰܝܳܐ̈܂ ܙܶܠܘ ܒܳܬܼܪܶܗ܂
22:11 [ai]	ܘܰܐܝܟܿܳܐ ܕܥܳܐܶܠ܂ ܐܶܡܰܪܘ ܠܡܳܪܶܗ ܕܒܰܝܬܳܐ܂ ܪܰܒܰܢ ܐܳܡܰܪ܃ ܐܰܝܢܰܘ ܒܶܝܬܼ ܡܰܫܪܝܳܐ܂ ܐܰܝܟܿܳܐ ܕܶܐܟܼܽܘܠ ܦܶܨܚܳܐ ܥܰܡ ܬܰܠܡܺܝܕܼܰܝ̈܂
22:12 [ai]	ܘܗܳܐ ܗܽܘ ܡܚܰܘܶܐ ܠܟܼܽܘܢ ܥܶܠܺܝܬܼܳܐ ܚܕܼܳܐ ܪܰܒܿܬܼܳܐ ܕܰܡܫܰܘܝܳܐ܃ ܬܰܡܳܢ ܛܰܝܶܒܼܘ܂
22:13 [ai]	ܘܶܐܙܰܠܘ ܐܶܫܟܿܰܚܘ ܐܰܝܟܼ ܕܶܐܡܰܪ ܠܗܽܘܢ܃ ܘܛܰܝܶܒܼܘ ܦܶܨܚܳܐ܀
22:14 [ai]	ܘܟܼܰܕܼ ܗܘܳܐ ܥܶܕܳܢܳܐ܃ ܐܶܬܼܳܐ ܝܶܫܽܘܥ ܐܶܣܬܿܡܶܟܼ܂ ܘܰܬܼܪ̈ܶܥܣܰܪ ܫܠܺܝܚܶܐ̈ ܥܰܡܶܗ܀
22:15 [ai]	ܘܶܐܡܰܪ ܠܗܽܘܢ܂ ܪܶܓܿܬܼܳܐ ܪܰܓܼܬܿܰܢܝ܃ ܕܗܳܢܳܐ ܦܶܨܚܳܐ ܐܶܟܼܽܘܠ ܥܰܡܟܼܽܘܢ ܩܕܼܳܡ ܕܶܐܚܰܫ܂
22:16 [ai]	ܐܳܡܰܪ ܐ̱ܢܳܐ ܠܟܼܽܘܢ ܓܶܝܪ܃ ܕܡܶܟܿܺܝܠ ܠܳܐ ܐܶܟܼܠܺܝܘܗ̱ܝ܂ ܥܕܼܰܡܳܐ ܕܢܶܫܠܰܡ ܒܡܰܠܟܿܽܘܬܼܶܗ ܕܰܐܠܳܗܳܐ܀
22:17 [ai]	ܘܰܢܣܰܒܼ ܟܳܣܳܐ ܘܰܐܘܕܿܺܝ ܘܶܐܡܰܪ ܣܰܒܼܘ ܗܳܢܳܐ ܘܦܼܰܠܶܓܼܘ ܒܰܝܢܳܬܼܟܼܽܘܢ܂
22:18 [ai]	ܐܳܡܰܪ ܐ̱ܢܳܐ ܓܶܝܪ ܠܟܼܽܘܢ ܕܠܳܐ ܐܶܫܬܿܶܐ ܡܶܢ ܝܰܠܕܿܳܐ ܕܰܓܼܦܼܶܬܳܐ ܥܕܼܰܡܳܐ ܕܬܺܐܬܼܶܐ ܡܰܠܟܿܽܘܬܼܳܐ ܕܰܐܠܳܗܳܐ܂
22:19 [ai]	ܘܰܢܣܰܒܼ ܠܰܚܡܳܐ ܘܰܐܘܕܿܺܝ܂ ܘܰܩܨܳܐ܂ ܘܝܰܗ̱ܒܼ ܠܗܽܘܢ܂ ܘܶܐܡܰܪ܂ ܗܳܢܰܘ ܦܰܓܼܪܝ ܕܥܰܠ ܐܰܦܿܰܝܟܿܽܘܢ̈ ܡܶܬܼܺܝܗܶܒܼ܂ ܗܳܕܼܶܐ ܗܘܰܝܬܿܽܘܢ ܥܳܒܼܕܺܝܢ ܠܕܼܽܘܟܼܪܳܢܝ܀
22:20 [ai]	ܘܗܳܟܼܘܳܬܼ ܐܳܦܼ ܥܰܠ ܟܳܣܳܐ܃ ܡܶܢ ܒܳܬܼܰܪ ܕܰܐܚܫܶܡܘ܂ ܐܶܡܰܪ܂ ܗܳܢܳܐ ܟܳܣܳܐ ܕܺܝܰܬܼܺܩܺܐ ܚܕܼܰܬܼܳܐ ܒܕܶܡܝ܂ ܕܰܚܠܳܦܼܰܝܟܿܽܘܢ ܡܶܬܼܶܐܫܶܕܼ܀
22:21 [ai]	ܒܪܰܡ ܗܳܐ ܐܺܝܕܼܶܗ ܕܡܰܫܠܡܳܢܝ ܥܰܠ ܦܳܬܼܽܘܪܳܐ܀܀
22:22 [ai]	ܘܰܒܪܶܗ ܕܐ̱ܢܳܫܳܐ ܐܳܙܶܠ܂ ܐܰܝܟܿܰܢܳܐ ܕܶܐܬܼܦܿܪܶܫ܂ ܒܪܰܡ ܘܳܝ ܠܗܰܘ ܓܰܒܼܪܳܐ܂ ܕܒܺܐܝܕܼܶܗ ܡܶܫܬܿܠܶܡ܀
22:23 [ai]	ܘܫܰܪܺܝܘ ܕܰܢܥܰܩܒܼܽܘܢ ܒܰܝܢܳܬܼܗܽܘܢ܃ ܕܡܰܢܽܘ ܟܰܝ ܡܶܢܗܽܘܢ ܗܰܘ ܕܗܳܕܼܶܐ ܥܬܼܺܝܕܼ ܠܡܶܣܥܰܪ ܿ܀ܿ܀ܿ
22:24 [ai]	ܗܘܳܐ ܕܶܝܢ ܐܳܦܼ ܚܶܪܝܳܢܳܐ ܒܰܝܢܳܬܼܗܽܘܢ܃ ܕܡܰܢ ܐܺܝܬܼ ܒܗܽܘܢ ܕܪܰܒܿ܂
22:25 [ai]	ܗܽܘ ܕܶܝܢ ܝܶܫܽܘܥ܂ ܐܶܡܰܪ ܠܗܽܘܢ܂ ܡܰܠܟܰܝܗܽܘܢ̈ ܕܥܰܡ̱ܡܶܐ̈܂ ܡܳܪ̈ܰܝܗܽܘܢ ܐܶܢܽܘܢ ܘܰܕܼܫܰܠܺܝܛܺܝܢ ܥܠܰܝܗܽܘܢ܂ ܥܳܒܼܕܿܰܝ̈ ܛܳܒܼܳܬܼܳܐ̈ ܡܶܬܼܩܪܶܝܢ܂
22:26 [ai]	ܐܰܢ̱ܬܿܽܘܢ܂ ܕܶܝܢ܂ ܠܳܐ ܗܳܟܼܰܢܳܐ܂ ܐܶܠܳܐ ܐܰܝܢܳܐ ܕܪܰܒܿ ܒܟܽܘܢ܂ ܢܶܗܘܶܐ ܐܰܝܟܼ ܙܥܽܘܪܳܐ܂ ܘܰܐܝܢܳܐ ܕܪܺܫܳܐ ܗ̱ܘ܂ ܐܰܝܟܼ ܡܫܰܡܫܳܢܳܐ܂
22:27 [ai]	ܡܰܢܽܘ ܓܶܝܪ ܪܰܒܼ܂ ܗܰܘ ܕܰܣܡܺܝܟܼ܂ ܐܰܘ ܗܰܘ ܕܰܡܫܰܡܶܫ܂ ܠܳܐ ܗ̱ܘܳܐ ܗܰܘ ܕܰܣܡܺܝܟܼ܂ ܐܶܢܳܐ ܕܶܝܢ ܐܺܝܬܼܰܝ ܒܰܝܢܳܬܼܟܼܽܘܢ܂ ܐܰܝܟܼ ܗܰܘ ܕܰܡܫܰܡܶܫ܀
22:28 [ai]	ܐܰܢ̱ܬܿܽܘܢ ܐܶܢܽܘܢ ܕܶܝܢ ܕܟܰܬܿܰܪܬܿܽܘܢ ܠܘܳܬܼܝ ܒܢܶܣܝܽܘܢܰܝ̈܂
22:29 [ai]	ܘܶܐܢܳܐ ܡܶܫܬܰܘܕܿܶܐ ܐ̱ܢܳܐ ܠܟܼܽܘܢ܂ ܐܰܝܟܼ ܕܶܐܫܬܰܘܕܿܺܝ ܠܺܝ ܐܳܒܼܝ܂ ܡܰܠܟܿܽܘܬܼܳܐ܂
22:30 [ai]	ܕܬܶܐܟܼܠܽܘܢ ܘܬܼܶܫܬܿܽܘܢ ܥܰܠ ܦܳܬܼܽܘܪܳܐ ܕܡܰܠܟܿܽܘܬܼܳܐ ܕܺܝܠܝ܂ ܘܬܼܶܬܿܒܼܽܘܢ ܥܰܠ ܟܿܽܘܪ̈ܣܰܘܳܬܼܳܐ܃ ܘܰܬܕܼܽܘܢܽܘܢ ܬܿܪ̈ܶܥܣܰܪ ܫܰܒܼܛܶܐ̈ ܕܺܐܝܣܪܳܝܶܠ܀
22:31 [ai]	ܘܶܐܡܰܪ ܝܶܫܽܘܥ ܠܫܶܡܥܽܘܢ܂ ܫܶܡܥܽܘܢ܃ ܗܳܐ ܣܳܛܳܢܳܐ ܫܳܐܶܠ ܕܢܶܥܪܽܘܒܼܟܼܽܘܢ ܐܰܝܟܼ ܕܰܠܚܶܛܶܐ̈܂
22:32 [ai]	ܘܶܐܢܳܐ ܒܥܺܝܬܼ ܥܠܰܝܟܿ ܕܠܳܐ ܬܶܚܣܰܪ ܗܰܝܡܳܢܽܘܬܼܳܟܼ܂ ܐܳܦܼ ܐܰܢ̱ܬܿ ܒܰܙܒܼܰܢ ܐܶܬܼܦܿܰܢܝ܂ ܘܫܰܪܰܪ ܐܰܚܰܝܟܿ̈܀
22:33 [ai]	ܫܶܡܥܽܘܢ ܕܶܝܢ ܐܶܡܰܪ ܠܶܗ܂ ܡܳܪܝ܂ ܥܰܡܳܟܼ ܡܛܰܝܰܒܼ ܐ̱ܢܳܐ܂ ܘܰܠܒܼܶܝܬܼ ܐܰܣܺܝܪ̈ܶܐ܂ ܘܰܠܡܰܘܬܳܐ܂
22:34 [ai]	ܐܳܡܰܪ ܠܶܗ ܝܶܫܽܘܥ܂ ܐܳܡܰܪ ܐ̱ܢܳܐ ܠܳܟܼ ܫܶܡܥܽܘܢ܃ ܕܠܳܐ ܢܶܩܪܶܐ ܬܰܪܢܳܓܼܠܳܐ ܝܰܘܡܳܢܳܐ܃ ܥܕܼܰܡܳܐ ܕܰܬܼܠܳܬܼ ܙܰܒܼܢܺܝܢ̈ ܬܶܟܼܦܿܽܘܪ ܕܠܳܐ ܝܳܕܼܰܥ ܐܰܢ̱ܬܿ ܠܺܝ܀
22:35 [ai]	ܘܶܐܡܰܪ ܠܗܽܘܢ܂ ܟܰܕܼ ܫܰܕܿܰܪܬܿܟܼܽܘܢ ܕܠܳܐ ܟܺܝܣܶܐ̈ ܘܰܕܼܠܳܐ ܬܿܰܪ̈ܡܳܠܶܐ ܘܰܡܣܳܢܶܐ̈܃ ܠܡܳܐ܃ ܚܣܰܪ ܠܟܼܽܘܢ ܡܶܕܶܡ܂ ܐܳܡܪܺܝܢ ܠܶܗ܂ ܘܠܳܐ ܡܶܕܶܡ܂
22:36 [ai]	ܐܳܡܰܪ ܠܗܽܘܢ܂ ܡܶܢ ܗܳܫܳܐ ܡܰܢ ܕܺܐܝܬܼ ܠܶܗ ܟܺܝܣܳܐ܂ ܢܶܣܰܒܼ܂ ܘܗܳܟܼܰܢܳܐ ܐܳܦܼ ܬܰܪܡܳܠܳܐ܂ ܘܡܰܢ ܕܠܰܝܬܿ ܠܶܗ ܣܰܝܦܼܳܐ܃ ܢܙܰܒܿܶܢ ܢܰܚܬܿܶܗ ܘܢܶܙܒܿܶܢ ܠܶܗ ܣܰܝܦܼܳܐ܂
22:37 [ai]	ܐܳܡܰܪ ܐ̱ܢܳܐ ܠܟܼܽܘܢ ܓܶܝܪ܃ ܕܳܐܦܼ ܗܳܕܼܶܐ ܕܰܟܼܬܼܺܝܒܼܳܐ܂ ܘܳܠܶܐ ܕܬܶܬܼܡܰܠܶܐ ܒܺܝ܃ ܕܥܰܡ ܥܰܘܳܠܶܐ̈ ܐܶܬܼܡܢܶܐ܂ ܟܽܠܗܶܝܢ ܓܶܝܪ ܕܰܥܠܰܝ ܐܶܫܬܿܰܠܰܡ܀
22:38 [ai]	ܘܗܶܢܽܘܢ ܐܳܡܪܺܝܢ ܠܶܗ܂ ܡܳܪܰܢ܃ ܗܳܐ ܗܳܪܟܿܳܐ ܐܺܝܬܼ ܬܿܪ̈ܶܝܢ ܣܰܝܦܼܺܝܢ̈܂ ܐܳܡܰܪ ܠܗܽܘܢ ܣܳܦܼܩܺܝܢ܀
22:39 [ai]	ܘܰܢܦܼܰܩ ܘܶܐܙܰܠ ܐܰܝܟܼ ܕܰܡܥܳܕܼ ܗ̱ܘܳܐ ܠܛܽܘܪܳܐ ܕܒܶܝܬܼ ܙܰܝܬܿܶܐ̈܂ ܘܶܐܙܰܠܘ ܒܳܬܼܪܶܗ ܐܳܦܼ ܬܰܠܡܺܝܕܼܰܘܗ̱ܝ̈܀
22:40 [ai]	ܘܟܼܰܕܼ ܡܰܛܺܝ ܠܕܼܽܘܟܿܬܼܳܐ܂ ܐܶܡܰܪ ܠܗܽܘܢ܂ ܨܰܠܰܘ܂ ܕܠܳܐ ܬܶܥܠܽܘܢ ܠܢܶܣܝܽܘܢܳܐ܀
22:41 [ai]	ܘܗܽܘ ܦܪܰܩ ܡܶܢܗܽܘܢ܂ ܐܰܝܟܼ ܡܰܫܕܿܶܐ ܟܺܐܦܼܳܐ܂ ܘܣܳܡ ܒܽܘܪܟܿܰܘܗ̱ܝ ܘܰܡܨܰܠܶܐ ܗ̱ܘܳܐ܂
22:42 [ai]	ܘܳܐܡܰܪ܂ ܐܰܒܼܳܐ܃ ܐܶܢ ܨܳܒܼܶܐ ܐܰܢ̱ܬܿ܂ ܢܶܥܒܪܰܢܝ ܟܳܣܳܐ ܗܳܢܳܐ܂ ܒܪܰܡ܂ ܠܳܐ ܨܶܒܼܝܳܢܝ܂ ܐܶܠܳܐ ܕܺܝܠܳܟܼ ܢܶܗܘܶܐ܀
22:43 [ai]	ܘܶܐܬܼܚܙܺܝ ܠܶܗ ܡܰܠܰܐܟܼܳܐ܂ ܡܶܢ ܫܡܰܝܳܐ ܕܰܡܚܰܝܶܠ ܠܶܗ܂
22:44 [ai]	ܘܟܼܰܕܼ ܗܘܳܐ ܒܕܶܚܠܬܼܳܐ ܬܟܼܺܝܒܼܳܐܺܝܬܼ ܡܨܰܠܶܐ ܗ̱ܘܳܐ܂ ܘܰܗܘܳܬܼ ܕܽܘܥܬܿܶܗ ܐܰܝܟܼ ܫܶܠܬܼܶܐ̈ ܕܰܕܼܡܳܐ܂ ܘܰܢܦܼܰܠ ܥܰܠ ܐܰܪܥܳܐ܀
22:45 [ai]	ܘܩܳܡ ܡܶܢ ܨܠܽܘܬܼܶܗ܂ ܘܶܐܬܼܳܐ ܠܘܳܬܼ ܬܰܠܡܺܝܕܼܰܘܗ̱ܝ̈܂ ܘܶܐܫܟܿܰܚ ܐܶܢܽܘܢ ܟܰܕܼ ܕܰܡܟܿܺܝܢ ܡܶܢ ܥܳܩܬܼܳܐ܂
22:46 [ai]	ܘܶܐܡܰܪ ܠܗܽܘܢ܂ ܡܳܢܳܐ ܕܰܡܟܿܺܝܢ ܐܢ̱ܬܿܽܘܢ܂ ܩܽܘܡܘ ܨܰܠܰܘ ܕܠܳܐ ܬܶܥܠܽܘܢ ܠܢܶܣܝܽܘܢܳܐ܀
22:47 [ai]	ܘܥܰܕܼ ܗܽܘ ܡܡܰܠܶܠ܃ ܗܳܐ ܟܶܢܫܳܐ܂ ܘܗܰܘ ܕܡܶܬܼܩܪܶܐ ܺܝܗܽܘܕܼܳܐ܃ ܚܰܕܼ ܡܶܢ ܬܿܪ̈ܶܥܣܰܪ ܐܳܬܼܶܐ ܩܕܼܳܡܰܝܗܽܘܢ܃ ܘܰܩܪܶܒܼ ܠܘܳܬܼ ܝܶܫܽܘܥ܂ ܘܢܰܫܩܶܗ܂ ܗܳܕܼܶܐ ܓܶܝܪ ܐܳܬܼܳܐ ܝܰܗ̱ܒܼ ܗ̱ܘܳܐ ܠܗܽܘܢ܂ ܕܰܐܝܢܳܐ ܕܢܳܫܶܩ ܐ̱ܢܳܐ܂ ܗܽܘܝܽܘ܀
22:48 [ai]	ܐܳܡܰܪ ܠܶܗ ܝܶܫܽܘܥ܂ ܺܝܗܽܘܕܼܳܐ܃ ܒܢܽܘܫܰܩܬܳܐ ܡܰܫܠܶܡ ܐܰܢ̱ܬܿ ܠܶܗ ܠܰܒܼܪܶܗ ܕܐ̱ܢܳܫܳܐ܀
22:49 [ai]	ܟܰܕܼ ܚܙܰܘ ܕܶܝܢ ܐܰܝܠܶܝܢ ܕܥܰܡܶܗ ܡܶܕܶܡ ܕܰܗܘܳܐ܃ ܐܳܡܪܺܝܢ ܠܶܗ܂ ܡܳܪܰܢ܃ ܢܶܡܚܶܐ ܐܶܢܽܘܢ ܒܣܰܝܦܼܶܐ̈܂
22:50 [ai]	ܘܰܡܚܳܐ ܚܰܕܼ ܡܶܢܗܽܘܢ ܠܥܰܒܼܕܿܶܗ ܕܿܪ̈ܰܒܿ ܟܿܳܗܢܶܐ܂ ܘܢܰܣܒܿܳܗ ܐܶܕܼܢܶܗ ܕܝܰܡܺܝܢܳܐ܀
22:51 [ai]	ܥܢܳܐ ܕܶܝܢ ܝܶܫܽܘܥ܂ ܘܶܐܡܰܪ܂ ܟܰܕܿܽܘ ܥܕܼܰܡܳܐ ܠܗܳܕܼܶܐ܂ ܘܰܩܪܶܒܼ ܠܶܐܕܼܢܶܗ ܕܗܰܘ ܕܰܒܼܠܰܥ܂ ܘܰܐܣܝܳܗ܂
22:52 [ai]	ܘܶܐܡܰܪ ܝܶܫܽܘܥ ܠܗܳܢܽܘܢ ܕܶܐܬܼܰܘ ܥܠܰܘܗ̱ܝ܃ ܪ̈ܰܒܰܝ ܟܳܗܢܶܐ̈ ܘܩܰܫܺܝܫܶܐ̈ ܘܪ̈ܰܒܰܝ ܚܰܝܠܶܐ̈ ܕܗܰܝܟܠܳܐ܃ ܐܰܝܟܼ ܕܥܰܠ ܠܶܣܛܳܝܳܐ ܢܦܼܰܩܬܿܽܘܢ ܥܠܰܝ ܒܣܰܝܦܼܶܐ̈ ܘܰܒܚܽܘܛܪ̈ܶܐ ܕܬܶܐܚܕܿܽܘܢܳܢܝ܂
22:53 [ai]	ܟܽܠܝܽܘܡ ܥܰܡܟܼܽܘܢ ܗ̱ܘܺܝܬܼ ܒܗܰܝܟܠܳܐ܃ ܘܠܳܐ ܐܰܘܫܶܛܬܿܽܘܢ ܥܠܰܝ ܐܺܝܕܼܰܝܳܐ̈܂ ܐܶܠܳܐ ܗܳܕܼܶܐ ܗ̱ܝ ܫܳܥܰܬܼܟܼܽܘܢ ܘܫܽܘܠܛܳܢܳܐ ܕܚܶܫܽܘܟܼܳܐ܀
22:54 [ai]	ܘܶܐܚܰܕܼܘ ܐܰܝܬܿܝܽܘܗ̱ܝ ܠܒܼܰܝܬܿܶܗ ܕܿܪ̈ܰܒܿ ܟܿܳܗܢܶܐ܂ ܘܫܶܡܥܽܘܢ ܐܳܬܼܶܐ ܗ̱ܘܳܐ ܒܳܬܼܪܶܗ ܡܶܢ ܪܽܘܚܩܳܐ܂
22:55 [ai]	ܐܰܘܚܶܕܼܘ ܕܶܝܢ ܢܽܘܪܳܐ ܡܶܨܥܰܬܼ ܕܳܪܬܳܐ܃ ܘܝܳܬܼܒܺܝܢ ܗ̱ܘܰܘ ܚܕܼܳܪ̈ܶܝܗ܂ ܘܝܳܬܼܶܒܼ ܗ̱ܘܳܐ ܐܳܦܼ ܗܽܘ ܫܶܡܥܽܘܢ ܒܰܝܢܳܬܼܗܽܘܢ܀
22:56 [ai]	ܘܰܚܙܳܬܼܶܗ ܥܠܰܝܡܬܼܳܐ ܚܕܼܳܐ ܕܝܳܬܼܶܒܼ ܠܘܳܬܼ ܢܽܘܪܳܐ܃ ܘܚܳܪܰܬܼ ܒܶܗ܂ ܘܳܐܡܪܳܐ܂ ܐܳܦܼ ܗܳܢܳܐ܂ ܥܰܡܶܗ ܗܘܳܐ܂
22:57 [ai]	ܗܽܘ ܕܶܝܢ ܟܦܼܰܪ ܘܶܐܡܰܪ܂ ܐܰܢ̱ܬܿܬܼܳܐ܂ ܠܳܐ ܝܳܕܼܰܥ ܐ̱ܢܳܐ ܠܶܗ܂
22:58 [ai]	ܘܒܼܳܬܼܰܪ ܩܰܠܺܝܠ ܚܙܳܝܗ̱ܝ ܐ̱ܚܪܺܢܳܐ܂ ܘܶܐܡܰܪ ܠܶܗ܂ ܐܳܦܼ ܐܰܢ̱ܬܿ ܡܶܢܗܽܘܢ ܐܰܢ̱ܬܿ܂ ܟܺܐܦܼܳܐ ܕܶܝܢ ܐܶܡܰܪ܂ ܠܳܐ ܗܘܺܝܬܼ܂
22:59 [ai]	ܘܒܼܳܬܼܰܪ ܫܳܥܳܐ ܚܕܼܳܐ܃ ܐ̱ܚܪܺܢܳܐ ܡܶܬܼܚܪܶܐ ܗ̱ܘܳܐ܂ ܘܳܐܡܰܪ܂ ܫܰܪܺܝܪܳܐܺܝܬܼ ܐܳܦܼ ܗܳܢܳܐ܂ ܥܰܡܶܗ ܗ̱ܘܳܐ܂ ܐܳܦܼ ܓܠܺܝܠܳܝܳܐ ܗ̱ܘ ܓܶܝܪ܂
22:60 [ai]	ܐܳܡܰܪ ܟܺܐܦܼܳܐ܂ ܓܰܒܼܪܳܐ܂ ܠܳܐ ܝܳܕܼܰܥ ܐ̱ܢܳܐ ܡܳܢܳܐ ܐܳܡܰܪ ܐܰܢ̱ܬܿ܂ ܘܡܶܚܕܼܳܐ ܟܰܕܼ ܗܽܘ ܡܡܰܠܶܠ܂ ܩܪܳܐ ܬܰܪܢܳܓܼܠܳܐ܂
22:61 [ai]	ܘܶܐܬܼܦܿܢܺܝ ܝܶܫܽܘܥ܂ ܘܚܳܪ ܒܟܺܐܦܼܳܐ܂ ܘܶܐܬܿܕܿܟܼܰܪ ܫܶܡܥܽܘܢ ܡܶܠܬܼܶܗ ܕܡܳܪܰܢ ܕܶܐܡܰܪ ܗ̱ܘܳܐ ܠܶܗ܃ ܕܰܩܕܼܳܡ ܕܢܶܩܪܶܐ ܬܰܪܢܳܓܼܠܳܐ ܬܶܟܼܦܿܽܘܪ ܒܺܝ ܬܠܳܬܼ ܙܰܒܼܢܺܝܢ̈܂
22:62 [ai]	ܘܰܢܦܼܰܩ ܠܒܼܰܪ ܫܶܡܥܽܘܢ܂ ܒܟܳܐ ܡܰܪܺܝܪܳܐܺܝܬܼ܀
22:63 [ai]	ܘܓܼܰܒܼܪ̈ܶܐ ܕܰܐܚܺܝܕܼܺܝܢ ܗܘܰܘ ܠܝܶܫܽܘܥ܃ ܡܒܼܰܙܚܺܝܢ ܗ̱ܘܰܘ ܒܶܗ܂ ܘܰܡܚܰܦܿܶܝܢ ܗ̱ܘܰܘ ܠܶܗ܂
22:64 [ai]	ܘܡܳܚܶܝܢ ܗ̱ܘܰܘ ܠܶܗ ܥܰܠ ܐܰܦܿܰܘܗ̱ܝ̈܂ ܘܳܐܡܪܺܝܢ܂ ܐܶܬܼܢܰܒܿܳܐ ܡܰܢܽܘ ܡܚܳܟܼ܂
22:65 [ai]	ܘܰܐ̱ܚܪ̈ܳܢܝܳܬܼܳܐ ܣܰܓܿܺܝܳܐܬܼܳܐ̈ ܡܓܼܰܕܿܦܼܺܝܢ ܗ̱ܘܰܘ ܘܳܐܡܪܺܝܢ ܥܠܰܘܗ̱ܝ܀
22:66 [ai]	ܘܟܼܰܕܼ ܢܶܓܼܗܰܬܼ܃ ܐܶܬܼܟܿܰܢܰܫܘ ܩܰܫܺܝܫܶܐ̈ ܘܪ̈ܰܒܰܝ ܟܳܗܢܶܐ̈ ܘܣܳܦܼܪ̈ܶܐ܃ ܘܰܐܣܩܽܘܗ̱ܝ ܠܒܼܶܝܬܼ ܟܿܢܽܘܫܬܿܗܽܘܢ܂
22:67 [ai]	ܘܳܐܡܪܺܝܢ ܠܶܗ܂ ܐܶܢ ܐܰܢ̱ܬܿ ܗ̱ܽܘ ܡܫܺܝܚܳܐ܂ ܐܶܡܰܪ ܠܰܢ܂ ܐܳܡܰܪ ܠܗܽܘܢ܂ ܐܶܢ ܐܺܡܰܪ ܠܟܼܽܘܢ܂ ܠܳܐ ܬܗܰܝܡܢܽܘܢܳܢܝ܂
22:68 [ai]	ܘܶܐܢ ܐܶܫܰܐܶܠܟܼܽܘܢ܂ ܠܳܐ ܡܦܼܰܢܶܝܢ ܐܢ̱ܬܿܽܘܢ ܠܺܝ ܦܶܬܼܓܼܳܡܳܐ܂ ܐܰܘ ܫܳܪܶܝܢ ܐܢ̱ܬܿܽܘܢ ܠܺܝ܂
22:69 [ai]	ܡܶܢ ܗܳܫܳܐ ܢܶܗܘܶܐ ܒܪܶܗ ܕܐ̱ܢܳܫܳܐ ܝܳܬܼܶܒܼ ܡܶܢ ܝܰܡܺܝܢܳܐ ܕܚܰܝܠܳܐ ܕܰܐܠܳܗܳܐ܀
22:70 [ai]	ܐܳܡܪܺܝܢ ܕܶܝܢ ܟܽܠܗܽܘܢ܂ ܐܰܢ̱ܬܿ ܗ̱ܽܘ ܗܳܟܼܺܝܠ ܒܪܶܗ ܕܰܐܠܳܗܳܐ܂ ܐܳܡܰܪ ܠܗܽܘܢ ܝܶܫܽܘܥ܃ ܐܰܢ̱ܬܿܽܘܢ ܐܳܡܪܺܝܢ ܐܢ̱ܬܿܽܘܢ ܕܶܐܢܳܐ ܐ̱ܢܳܐ܀
22:71 [ai]	ܐܳܡܪܺܝܢ܂ ܡܳܢܳܐ ܬܽܘܒܼ ܡܶܬܼܒܿܥܶܝܢ ܠܰܢ ܣܳܗܕܿܶܐ̈܂ ܚܢܰܢ ܓܶܝܪ ܫܡܰܥܢ ܡܶܢ ܦܽܘܡܶܗ܀

next chapter