← Back
The Comprehensive Aramaic Lexicon
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


24:01 [ai]ܒܚܰܕܼ ܒܫܰܒܿܳܐ ܕܶܝܢ܂ ܒܫܰܦܼܪܳܐ ܥܰܕܼ ܚܶܫܽܘܟܼ܃ ܐܶܬܼܰܝ̈ ܠܒܼܶܝܬܼ ܩܒܼܽܘܪܳܐ܂ ܘܰܐܝܬܿܺܝ̈ ܗܶܪ̈ܽܘܡܶܐ ܗܳܠܶܝܢ ܕܛܰܝܶܒܼ ܗ̱ܘܰܝ̈܂ ܘܺܐܝܬܼ ܗ̱ܘܰܝ̈ ܥܰܡܗܶܝܢ ܢܶܫܶܐ̈ ܐ̱ܚܪ̈ܳܢܝܳܬܼܳܐ܂
24:02 [ai]ܘܶܐܫܟܿܰܚ ܟܺܐܦܼܳܐ܂ ܕܰܡܥܰܓܠܳܐ ܡܶܢ ܒܶܝܬܼ ܩܒܼܽܘܪܳܐ܂
24:03 [ai]ܘܥܰܠܶܝܢ̈܂ ܘܠܳܐ ܐܶܫܟܿܚܳܝܗ̱ܝ̈ ܠܦܼܰܓܼܪܳܐ ܕܝܶܫܽܘܥ܂
24:04 [ai]ܘܰܗܘܳܐ ܕܟܰܕܼ ܗܶܢܶܝܢ̈ ܬܰܡܺܝܗܳܢ̈ ܥܰܠ ܗܳܕܼܶܐ܃ ܗܳܐ ܬܿܪ̈ܶܝܢ ܓܿܰܒܼܪ̈ܺܝܢ ܩܳܡܘ ܠܥܶܠ ܡܶܢܗܶܝܢ܂ ܘܡܰܒܼܪܶܩ ܗ̱ܘܳܐ ܠܒܼܽܘܫܗܽܘܢ܂
24:05 [ai]ܘܰܗܘܰܝ̈ ܒܕܶܚܠܬܼܳܐ܂ ܘܰܟܼܦܼܰܝ̈ ܐܰܦܿܰܝܗܶܝܢ̈ ܒܰܐܪܥܳܐ܀ ܘܳܐܡܪܺܝܢ ܠܗܶܝܢ܂ ܡܳܢܳܐ ܒܿܳܥܝܳܢ̈ ܐܢ̱ܬܿܶܝܢ̈ ܚܰܝܳܐ ܥܰܡ ܡܺܝܬܼܶܐ̈܂
24:06 [ai]ܠܰܝܬܰܘܗ̱ܝ ܬܢܳܢ܂ ܩܳܡ ܠܶܗ܂ ܥ̱ܶܗܰܕܼܶܝܢ̈ ܕܡܰܠܶܠ ܥܰܡܟܼܶܝܢ ܟܰܕܼ ܗܽܘ ܒܰܓܼܠܺܝܠܳܐ܂
24:07 [ai]ܘܶܐܡܰܪ ܗ̱ܘܳܐ܂ ܕܰܥܬܼܺܝܕܼ ܗ̱ܽܘ ܒܪܶܗ ܕܐ̱ܢܳܫܳܐ ܕܢܶܫܬܿܠܶܡ ܒܺܐܝܕܼܰܝ̈ ܐ̱ܢܳܫܳܐ ܚܰܛܳܝܶܐ̈܃ ܘܢܶܨܛܠܶܒܼ܂ ܘܠܰܬܼܠܳܬܼܳܐ ܝܰܘܡܺܝܢ̈ ܢܩܽܘܡ܀
24:08 [ai]ܘܗܶܢܶܝܢ̈ ܐܶܬܿܕܿܟܼܰܪ̈ܶܝܢ ܠܡܶܠܰܘܗ̱ܝ̈܃
24:09 [ai]ܘܰܗܦܼܰܟܼ ܡܶܢ ܩܰܒܼܪܳܐ܂ ܘܶܐܡܰܪ̈ܶܝܢ ܗܳܠܶܝܢ ܟܽܠܗܶܝܢ ܠܰܚܕܼܰܥܣܰܪ܂ ܘܰܠܫܰܪܟܿܳܐ܂
24:10 [ai]ܐܺܝܬܼܰܝܗܶܝܢ ܗ̱ܘܰܝ̈ ܕܶܝܢ܃ ܡܰܪܝܰܡ ܡܰܓܼܕܿܠܳܝܬܳܐ܂ ܘܝܽܘܚܰܢ܂ ܘܡܰܪܝܰܡ ܐܶܡܶܗ ܕܝܰܥܩܽܘܒܼ܂ ܘܫܰܪܟܿܳܐ ܕܥܰܡܗܶܝܢ܂ ܗܳܠܶܝܢ ܕܶܐܡܰܪ ܗ̱ܘܰܝ̈ ܠܰܫܠܺܝܚܶܐ̈܂
24:11 [ai]ܘܶܐܬܼܚܙܺܝ̈ ܒܥܰܝܢܰܝܗܽܘܢ̈ ܡܶܠܶܐ̈ ܗܳܠܶܝܢ܂ ܐܰܝܟܼ ܫܳܢܝܳܬܼܳܐ̈܂ ܘܠܳܐ ܗܰܝܡܶܢܘ ܐܶܢܶܝܢ̈܀
24:12 [ai]ܫܶܡܥܽܘܢ ܕܶܝܢ܂ ܩܳܡ ܘܰܪܗܶܛ ܠܩܰܒܼܪܳܐ܂ ܘܰܐܕܼܺܝܩ ܚܙܳܐ ܟܶܬܿܳܢܶܐ̈ ܕܣܺܝܡܺܝܢ ܒܰܠܚܽܘܕܼ܂ ܘܶܐܙܰܠ܂ ܟܰܕܼ ܡܶܬܿܕܰܡܰܪ ܒܢܰܦܼܫܶܗ܂ ܥܰܠ ܡܶܕܶܡ ܕܰܗܘܳܐ܀
24:13 [ai]ܘܗܳܐ ܬܿܪ̈ܶܝܢ ܡܶܢܗܽܘܢ ܒܶܗ ܒܝܰܘܡܳܐ܂ ܐܳܙܺܠ̱ܝܢ ܗ̱ܘܰܘ ܠܰܩܪܺܝܬܼܳܐ܃ ܕܰܫܡܳܗ ܥܶܡܰܐܘܽܣ܂ ܘܦܼܰܪܺܝܩܳܐ ܡܶܢ ܐܽܘܪܺܫܠܶܡ ܐܶܣܛܕܼܰܘܳܬܼܳܐ̈ ܫܬܿܺܝܢ܂
24:14 [ai]ܘܗܶܢܽܘܢ ܡܡܰܠܠܺܝܢ ܗ̱ܘܰܘ ܚܰܕܼ ܥܰܡ ܚܰܕܼ܃ ܥܰܠ ܗܳܠܶܝܢ ܟܽܠܗܶܝܢ ܕܰܓܼܕܼܰܫ܂
24:15 [ai]ܘܟܼܰܕܼ ܗܶܢܽܘܢ ܡܡܰܠܠܺܝܢ ܘܒܼܳܥܶܝܢ ܚܰܕܼ ܥܰܡ ܚܰܕܼ܃ ܐܶܬܼܳܐ ܗܽܘ ܝܶܫܽܘܥ܂ ܘܡܰܛܺܝ ܐܶܢܽܘܢ܂ ܘܰܡܗܰܠܶܟܼ ܗ̱ܘܳܐ ܥܰܡܗܽܘܢ܂
24:16 [ai]ܘܥܰܝܢܰܝܗܽܘܢ̈ ܐܰܚܺܝܕܼܳܢ̈ ܗܘܰܝ̈ ܕܠܳܐ ܢܶܣܬܿܰܟܠܽܘܢܳܝܗ̱ܝ܂
24:17 [ai]ܘܶܐܡܰܪ ܠܗܽܘܢ܂ ܡܳܢܳܐ ܐܶܢܶܝܢ̈ ܡܶܠܶܐ̈ ܗܳܠܶܝܢ ܕܰܡܡܰܠܠܺܝܢ ܐܢ̱ܬܿܽܘܢ ܚܰܕܼ ܥܰܡ ܚܰܕܼ܃ ܟܰܕܼ ܡܗܰܠܟܼܺܝܢ ܐܢ̱ܬܿܽܘܢ܂ ܘܰܟܼܡܺܝܪܺܝܢ ܐܢ̱ܬܿܽܘܢ܂
24:18 [ai]ܥܢܳܐ ܚܰܕܼ ܡܶܢܗܽܘܢ ܕܰܫܡܶܗ ܩܠܶܝܳܘܦܿܰܐ܂ ܘܶܐܡܰܪ ܠܶܗ܂ ܐܰܢ̱ܬܿ ܗ̱ܽܘ ܟܰܝ ܒܰܠܚܽܘܕܼܰܝܟܿ ܢܽܘܟܼܪܳܝܳܐ ܡܶܢ ܐܽܘܪܺܫܠܶܡ܃ ܕܠܳܐ ܝܳܕܼܰܥ ܐܰܢ̱ܬܿ ܡܶܕܶܡ ܕܰܗܘܳܐ ܒܿܳܗ ܒܗܳܢܽܘܢ ܝܰܘܡܳܬܼܳܐ̈܃
24:19 [ai]ܐܳܡܰܪ ܠܗܽܘܢ܂ ܡܳܢܳܐ܂ ܐܳܡܪܺܝܢ ܠܶܗ܂ ܥܰܠ ܝܶܫܽܘܥ ܗܰܘ ܕܡܶܢ ܢܳܨܪܰܬܼ܂ ܓܰܒܼܪܳܐ ܕܰܗܘܳܐ ܢܒܼܺܝܳܐ܂ ܘܚܰܝܠܬܼܳܢ ܗ̱ܘܳܐ ܒܡܶܠܬܼܳܐ ܘܒܼܰܥܒܼܳܕܼܶܐ̈܃ ܩܕܼܳܡ ܐܰܠܳܗܳܐ ܘܰܩܕܼܳܡ ܟܽܘܠܶܗ ܥܰܡܳܐ܂
24:20 [ai]ܘܰܐܫܠܡܽܘܗ̱ܝ ܪ̈ܰܒܰܝ ܟܳܗܢܶܐ̈ ܘܩܰܫܺܝܫܶܐ̈ ܠܕܼܺܝܢܳܐ ܕܡܰܘܬܳܐ܂ ܘܙܰܩܦܿܽܘܗ̱ܝ܂
24:21 [ai]ܚܢܰܢ ܕܶܝܢ ܣܳܒܼܪܺܝܢ ܗ̱ܘܰܝܢ܃ ܕܗܽܘܝܽܘ ܥܬܼܺܝܕܼ ܗ̱ܘܳܐ ܕܢܶܦܼܪܩܺܝܘܗ̱ܝ ܠܺܐܝܣܪܳܝܶܠ܂ ܘܗܳܐ ܬܠܳܬܼܳܐ ܝܰܘܡܺܝܢ̈ ܗܳܐ ܡܶܢ ܕܗܳܠܶܝܢ ܟܽܠܗܶܝܢ ܗܘܰܝ̈܂
24:22 [ai]ܐܶܠܳܐ ܐܳܦܼ ܢܶܫܶܐ̈ ܡܶܢܰܢ܂ ܐܰܬܼܡܗܳܢ܂ ܩܰܕܶܡ ܗ̱ܘܰܝ̈ ܓܶܝܪ ܠܒܼܶܝܬܼ ܩܒܼܽܘܪܳܐ܂
24:23 [ai]ܘܟܼܰܕܼ ܠܳܐ ܐܶܫܟܿܰܚ ܦܰܓܼܪܶܗ܃ ܐܶܬܼܰܝ̈ ܐܳܡܪ̈ܳܢ ܠܰܢ܂ ܕܡܰܠܰܐܟܼܶܐ̈ ܚܙܰܝܢ ܬܰܡܳܢ ܘܳܐܡܪܺܝܢ ܥܠܰܘܗ̱ܝ܂ ܕܚܰܝ ܗ̱ܽܘ܂
24:24 [ai]ܘܳܐܦܼ ܐ̱ܢܳܫܳܐ ܡܶܢܰܢ ܐܶܙܰܠܘ ܠܒܼܶܝܬܼ ܩܒܼܽܘܪܳܐ܃ ܘܶܐܫܟܿܰܚܘ ܗܳܟܼܰܢܳܐ܂ ܐܰܝܟܼ ܡܳܐ ܕܶܐܡܰܪ ܢܶܫܶܐ̈܂ ܠܶܗ ܕܶܝܢ ܠܳܐ ܚܙܰܘ܂
24:25 [ai]ܗܳܝܕܶܝܢ ܐܶܡܰܪ ܠܗܽܘܢ ܝܶܫܽܘܥ܂ ܐܳܘ ܚܰܣܺܝܪ̈ܰܝ ܪܶܥܝܳܢܳܐ܃ ܘܝܰܩܺܝܪ̈ܰܝ ܠܶܒܿܳܐ ܠܰܡܗܰܝܡܳܢܽܘ ܒܟܽܠܗܶܝܢ ܐܰܝܠܶܝܢ ܕܡܰܠܶܠܘ ܢܒܼܺܝܶܐ̈܃
24:26 [ai]ܠܳܐ ܗ̱ܘܳܐ ܗܳܠܶܝܢ ܥܬܼܺܝܕܼ ܗܘܳܐ ܕܿܰܢܣܰܝܒܰܪ ܡܫܺܝܚܳܐ܃ ܘܰܕܼܢܶܥܽܘܠ ܠܬܼܶܫܒܿܽܘܚܬܿܶܗ܃
24:27 [ai]ܘܫܰܪܺܝ ܗ̱ܘܳܐ ܡܶܢ ܡܽܘܫܶܐ܂ ܘܡܶܢ ܟܽܠܗܽܘܢ ܢܒܼܺܝܶܐ̈܂ ܘܰܡܦܼܰܫܶܩ ܗ̱ܘܳܐ ܠܗܽܘܢ ܥܰܠ ܢܰܦܼܫܶܗ܂ ܡܶܢ ܟܽܠܗܽܘܢ ܟܬܼܳܒܼܶܐ̈܂
24:28 [ai]ܘܰܩܪܶܒܼܘ ܗ̱ܘܰܘ ܠܰܩܪܺܝܬܼܳܐ ܗܳܝ ܕܳܐܙܺܠ̱ܝܢ ܗ̱ܘܰܘ ܠܳܗ܂ ܘܗܽܘ ܡܰܣܒܰܪ ܗ̱ܘܳܐ ܠܗܽܘܢ܃ ܕܰܐܝܟܼ ܕܰܠܕܼܽܘܟܿܳܐ ܪܰܚܺܝܩܳܐ ܐܳܙܶܠ ܗ̱ܘܳܐ܂
24:29 [ai]ܘܰܐܠܨܽܘܗ̱ܝ ܘܳܐܡܪܺܝܢ ܠܶܗ܂ ܦܽܘܫ ܠܘܳܬܼܰܢ܂ ܡܶܛܽܠ ܕܝܰܘܡܳܐ ܗܳܫܳܐ܂ ܪܟܼܶܢ ܠܶܗ ܠܡܶܚܫܰܟܼ܂ ܘܥܰܠ ܕܰܢܩܰܘܶܐ ܠܘܳܬܼܗܽܘܢ܂
24:30 [ai]ܘܰܗܘܳܐ ܕܟܰܕܼ ܐܶܣܬܿܡܶܟܼ ܥܰܡܗܽܘܢ܃ ܢܣܰܒܼ ܠܰܚܡܳܐ܂ ܘܒܼܰܪܶܟܼ ܘܰܩܨܳܐ܂ ܘܝܰܗ̱ܒܼ ܠܗܽܘܢ܂
24:31 [ai]ܘܡܶܚܕܼܳܐ ܐܶܬܼܦܰܬܿܰܚ ܥܰܝܢܰܝܗܽܘܢ̈܂ ܘܶܐܫܬܰܘܕܿܥܽܘܗ̱ܝ܂ ܘܗܽܘ ܐܶܫܬܿܩܶܠ ܠܶܗ ܡܶܢܗܽܘܢ܂
24:32 [ai]ܘܳܐܡܪܺܝܢ ܗ̱ܘܰܘ ܚܰܕܼ ܠܚܰܕܼ܂ ܠܳܐ ܗ̱ܘܳܐ ܠܶܒܰܢ ܝܰܩܺܝܪ ܗ̱ܘܳܐ ܒܓܰܘܰܢ܃ ܟܰܕܼ ܡܡܰܠܶܠ ܥܰܡܰܢ ܒܽܐܘܪܚܳܐ܃ ܘܰܡܦܼܰܫܶܩ ܠܰܢ ܟܬܼܳܒܼܶܐ̈܃
24:33 [ai]ܘܩܳܡܘ ܒܿܳܗ ܒܫܳܥܬܼܳܐ܂ ܘܰܗܦܼܰܟܼܘ ܠܽܐܘܪܺܫܠܶܡ܂ ܘܶܐܫܟܿܰܚܘ ܠܰܚܕܼܰܥܣܰܪ ܕܰܟܼܢܺܝܫܺܝܢ܂ ܘܠܰܐܝܠܶܝܢ ܕܥܰܡܗܽܘܢ܂
24:34 [ai]ܟܰܕܼ ܐܳܡܪܺܝܢ܂ ܕܫܰܪܺܝܪܳܐܺܝܬܼ ܩܳܡ ܡܳܪܰܢ܂ ܘܶܐܬܼܚܙܺܝ ܠܫܶܡܥܽܘܢ܂
24:35 [ai]ܘܳܐܦܼ ܗܶܢܽܘܢ܂ ܐܶܫܬܿܰܥܺܝܘ ܐܰܝܠܶܝܢ ܕܰܗܘܰܝ̈ ܒܽܐܘܪܚܳܐ܃ ܘܰܐܝܟܿܰܢܳܐ ܐܶܬܼܺܝܕܼܰܥ ܠܗܽܘܢ ܟܰܕܼ ܩܨܳܐ ܠܰܚܡܳܐ܀
24:36 [ai]ܘܟܼܰܕܼ ܗܳܠܶܝܢ ܡܡܰܠܠܺܝܢ ܗ̱ܘܰܘ܃ ܝܶܫܽܘܥ ܩܳܡ ܒܰܝܢܳܬܼܗܽܘܢ܂ ܘܶܐܡܰܪ ܠܗܽܘܢ܂ ܫܠܳܡܳܐ ܥܰܡܟܼܽܘܢ܂ ܐܶܢܳܐ ܐ̱ܢܳܐ܂ ܠܳܐ ܬܶܕܼܚܠܽܘܢ܂
24:37 [ai]ܘܗܶܢܽܘܢ ܐܶܬܼܪܗܶܒܼܘ܂ ܘܰܗܘܰܘ ܒܕܶܚܠܬܼܳܐ܂ ܣܳܒܼܪܺܝܢ ܗ̱ܘܰܘ ܓܶܝܪ ܕܪܽܘܚܳܐ ܚܳܙܶܝܢ܂
24:38 [ai]ܘܳܐܡܰܪ ܠܗܽܘܢ ܝܶܫܽܘܥ܂ ܡܳܢܳܐ ܡܶܬܿܙܺܝܥܺܝܢ ܐܢ̱ܬܿܽܘܢ܂ ܘܡܳܢܳܐ ܣܳܠܩܳܢ̈ ܡܰܚܫܒܼܳܬܼܳܐ̈ ܥܰܠ ܠܶܒܿܰܘܳܬܼܟܼܽܘܢ̈܂
24:39 [ai]ܚܙܰܘ ܐܺܝܕܼܰܝ̈ ܘܪ̈ܶܓܼܠܰܝ܂ ܕܶܐܢܳܐ ܐ̱ܢܳܐ܂ ܓܽܘܫܽܘܢܳܢܝ ܘܕܼܰܥܘ܃ ܕܰܠܪܽܘܚܳܐ܂ ܒܶܣܪܳܐ ܘܓܼܰܪ̈ܡܶܐ ܠܰܝܬܿ ܠܳܗ܃ ܐܰܝܟܼ ܕܚܳܙܶܝܢ ܐܢ̱ܬܿܽܘܢ ܕܺܐܝܬܼ ܠܺܝ܂
24:40 [ai]ܘܟܼܰܕܼ ܗܳܠܶܝܢ ܐܶܡܰܪ܃ ܚܰܘܺܝ ܐܶܢܽܘܢ ܐܺܝܕܼܰܘܗ̱ܝ̈܂ ܘܪ̈ܶܓܼܠܰܘܗ̱ܝ܂
24:41 [ai]ܘܟܼܰܕܼ ܥܕܼܰܡܳܐ ܠܗܳܫܳܐ ܠܳܐ ܡܗܰܝܡܢܺܝܢ ܗ̱ܘܰܘ ܡܶܢ ܚܰܕܼܘܰܬܼܗܽܘܢ܂ ܘܡܶܬܿܬܿܰܡܗܺܝܢ ܗ̱ܘܰܘ܂ ܐܶܡܰܪ ܠܗܽܘܢ܂ ܐܺܝܬܼ ܠܟܼܽܘܢ ܬܢܳܢ ܡܶܕܶܡ ܠܡܶܐܟܼܰܠ܂
24:42 [ai]ܗܶܢܽܘܢ ܕܶܝܢ ܝܰܗ̱ܒܼܘ ܠܶܗ ܡܢܳܬܼܳܐ ܡܶܢ ܢܽܘܢܳܐ ܕܛܰܘܝܳܐ܂ ܘܡܶܢ ܟܰܟܿܳܪܺܝܬܼܳܐ ܕܕܼܶܒܼܫܳܐ܂
24:43 [ai]ܘܰܢܣܰܒܼ ܐܶܟܼܰܠ ܠܥܺܢܰܝܗܽܘܢ̈܀
24:44 [ai]ܘܶܐܡܰܪ ܠܗܽܘܢ܂ ܗܳܠܶܝܢ ܐܶܢܶܝܢ̈ ܡܶܠܶܐ̈ ܕܡܰܠܠܶܬܼ ܥܰܡܟܼܽܘܢ܂ ܟܰܕܼ ܠܘܳܬܼܟܼܽܘܢ ܗ̱ܘܺܝܬܼ܂ ܕܘܳܠܶܐ ܗ̱ܘ ܕܢܶܫܬܿܰܠܰܡ ܟܽܠ ܡܶܕܶܡ ܕܰܟܼܬܼܺܝܒܼ ܒܢܳܡܽܘܣܳܐ ܕܡܽܘܫܶܐ܃ ܘܒܼܰܢܒܼܺܝܶܐ̈ ܘܰܒܡܰܙܡܽܘܪ̈ܶܐ܃ ܥܠܰܝ܂
24:45 [ai]ܗܳܝܕܶܝܢ ܦܬܼܰܚ ܪܶܥܝܳܢܗܽܘܢ ܠܡܶܣܬܿܰܟܿܳܠܽܘ ܟܬܼܳܒܼܶܐ̈܂
24:46 [ai]ܘܶܐܡܰܪ ܠܗܽܘܢ܂ ܕܗܳܟܼܰܢܳܐ ܟܬܼܺܝܒܼ܂ ܘܗܳܟܼܰܢܳܐ ܙܳܕܼܶܩ ܗ̱ܘܳܐ ܕܢܶܚܰܫ ܡܫܺܝܚܳܐ܂ ܘܕܼܰܢܩܽܘܡ ܡܶܢ ܒܶܝܬܼ ܡܺܝܬܼܶܐ̈ ܠܰܬܼܠܳܬܼܳܐ ܝܰܘܡܺܝܢ̈܂
24:47 [ai]ܘܰܕܼܢܶܬܼܟܿܪܶܙ ܒܰܫܡܶܗ ܬܝܳܒܿܽܘܬܼܳܐ ܠܫܽܘܒܼܩܳܢܳܐ ܕܰܚܛܳܗܶܐ̈܂ ܒܟܽܠܗܽܘܢ ܥܰܡ̱ܡܶܐ̈܂ ܘܫܽܘܪܳܝܳܐ ܢܶܗܘܶܐ܂ ܡܶܢ ܐܽܘܪܺܫܠܶܡ܂
24:48 [ai]ܘܰܐܢ̱ܬܿܽܘܢ ܐܶܢܽܘܢ ܣܳܗܕܿܶܐ̈ ܕܗܳܠܶܝܢ܂
24:49 [ai]ܘܶܐܢܳܐ ܐܶܫܰܕܿܰܪ ܥܠܰܝܟܿܽܘܢ ܡܽܘܠܟܿܳܢܳܐ ܕܳܐܒܼܝ܂ ܐܰܢ̱ܬܿܽܘܢ ܕܶܝܢ ܩܰܘܰܘ ܒܽܐܘܪܺܫܠܶܡ ܡܕܼܺܝܢ̱ܬܳܐ܃ ܥܕܼܰܡܳܐ ܕܬܶܠܒܿܫܽܘܢ ܚܰܝܠܳܐ ܡܶܢ ܪܰܘܡܳܐ܀
24:50 [ai]ܘܰܐܦܿܶܩ ܐܶܢܽܘܢ ܥܕܼܰܡܳܐ ܠܒܼܶܝܬܼ ܥܰܢܝܳܐ܂ ܘܰܐܪܺܝܡ ܐܺܝܕܼܰܘܗ̱ܝ̈܂ ܘܒܼܰܪܶܟܼ ܐܶܢܽܘܢ܂
24:51 [ai]ܘܰܗܘܳܐ ܕܟܰܕܼ ܡܒܼܰܪܶܟܼ ܠܗܽܘܢ܃ ܐܶܬܼܦܿܪܶܫ ܡܶܢܗܽܘܢ܂ ܘܰܣܠܶܩ ܠܰܫܡܰܝܳܐ܀
24:52 [ai]ܗܶܢܽܘܢ ܕܶܝܢ ܣܓܼܶܕܼܘ ܠܶܗ܂ ܘܰܗܦܼܰܟܼܘ ܠܽܐܘܪܺܫܠܶܡ܂ ܒܚܰܕܼܽܘܬܼܳܐ ܪܰܒܿܬܼܳܐ܂
24:53 [ai]ܘܰܒܟܼܽܠܙܒܼܰܢ ܐܺܝܬܼܰܝܗܽܘܢ ܗ̱ܘܰܘ ܒܗܰܝܟܠܳܐ܃ ܟܰܕܼ ܡܫܰܒܿܚܺܝܢ ܘܰܡܒܼܰܪܟܼܺܝܢ ܠܰܐܠܳܗܳܐ܂ ܐܰܡܺܝܢ ܿ܀ܿ܀ܿ