← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


02:01 [ai]ܘܰܠܝܰܘܡܳܐ ܕܰܬܼܠܳܬܼܳܐ܃ ܗܘܳܬܼ ܡܶܫܬܿܽܘܬܼܳܐ ܒܩܳܛܢܶܐ ܡܕܼܺܝܢ̱ܬܳܐ ܕܰܓܼܠܺܝܠܳܐ܂ ܘܶܐܡܶܗ ܕܝܶܫܽܘܥ ܬܰܡܳܢ ܗ̱ܘܳܬܼ܂
02:02 [ai]ܘܳܐܦܼ ܗܽܘ ܝܶܫܽܘܥ ܘܬܼܰܠܡܺܝܕܼܰܘܗ̱ܝ̈܂ ܐܶܬܼܩܪܺܝܘ ܠܳܗ ܠܡܶܫܬܿܽܘܬܼܳܐ܂
02:03 [ai]ܘܰܚܣܰܪ ܗ̱ܘܳܐ ܚܰܡܪܳܐ܂ ܘܳܐܡܪܳܐ ܠܶܗ ܐܶܡܶܗ ܠܝܶܫܽܘܥ܂ ܚܰܡܪܳܐ ܠܰܝܬܿ ܠܗܽܘܢ܂
02:04 [ai]ܐܳܡܰܪ ܠܳܗ ܝܶܫܽܘܥ܂ ܡܳܐ ܠܺܝ ܘܠܶܟܼܝ܂ ܐܰܢ̱ܬܿܬܼܳܐ܃ ܠܳܐ ܥܕܼܰܟܿܺܝܠ ܐܶܬܼܳܬܼ ܫܳܥܰܬܼܝ܂
02:05 [ai]ܐܳܡܪܳܐ ܐܶܡܶܗ ܠܰܡܫܰܡܫܳܢܶܐ̈܂ ܡܶܕܶܡ ܕܳܐܡܰܪ ܠܟܼܽܘܢ܂ ܥܒܼܶܕܼܘ܂
02:06 [ai]ܐܺܝܬܼ ܗ̱ܘܰܝ̈ ܕܶܝܢ ܬܰܡܳܢ܂ ܐܰܓܼܳܢܶܐ̈ ܕܟܺܐܦܼܳܐ ܫܶܬܼ܂ ܕܣܺܝܡܳܢ̈ ܠܬܼܰܕܼܟܿܺܝܬܼܳܐ ܕܺܝܗܽܘܕܼܳܝܶܐ̈܂ ܕܳܐܚܕܳܢ̈ ܬܿܪ̈ܶܝܢ ܬܿܪ̈ܶܝܢ ܪ̈ܶܒܼܥܺܝܢ܂ ܐܰܘ ܬܠܳܬܼܳܐ܂
02:07 [ai]ܐܳܡܰܪ ܠܗܽܘܢ ܝܶܫܽܘܥ܂ ܡܠܰܘ ܐܶܢܶܝܢ̈ ܡܰܝܳܐ̈ ܠܰܐܓܼܳܢܶܐ̈܂ ܘܰܡܠܰܘ ܐܶܢܶܝܢ̈ ܥܕܼܰܡܳܐ ܠܥܶܠ܂
02:08 [ai]ܐܳܡܰܪ ܠܗܽܘܢ܂ ܙܠܽܘܥܘ ܡܶܟܿܺܝܠ܂ ܘܰܐܝܬܰܘ ܠܪܺܝܫ ܣܡܳܟܼܳܐ܂ ܘܰܐܝܬܿܺܝܘ܂
02:09 [ai]ܘܟܼܰܕܼ ܛܥܶܡ ܗܰܘ ܪܺܝܫ ܣܡܳܟܼܳܐ ܡܰܝܳܐ̈ ܗܳܢܽܘܢ ܕܰܗܘܰܘ ܚܰܡܪܳܐ܃ ܘܠܳܐ ܝܳܕܼܰܥ ܗ̱ܘܳܐ ܡܶܢ ܐܰܝܡܶܟܿܳܐ ܗ̱ܘܳܐ܃ ܡܫܰܡܫܳܢܶܐ̈ ܕܶܝܢ ܝܳܕܼܥܺܝܢ ܗ̱ܘܰܘ܂ ܕܗܶܢܽܘܢ ܡܠܰܘ ܐܶܢܽܘܢ ܠܡܰܝܳܐ̈܂ ܩܪܳܐ ܪܺܝܫ ܣܡܳܟܼܳܐ ܠܚܰܬܼܢܳܐ܂
02:10 [ai]ܘܶܐܡܰܪ ܠܶܗ܂ ܟܽܠ ܐ̱ܢܳܫ ܠܽܘܩܕܼܰܡ ܚܰܡܪܳܐ ܛܳܒܼܳܐ ܡܰܝܬܿܶܐ܂ ܘܡܳܐ ܕܰܪܘܺܝܘ ܗܳܝܕܶܝܢ ܐܰܝܢܳܐ ܕܰܒܼܨܺܝܪ܂ ܐܰܢ̱ܬܿ ܕܶܝܢ ܢܛܰܪܬܿܳܝܗ̱ܝ ܠܚܰܡܪܳܐ ܛܳܒܼܳܐ ܥܕܼܰܡܳܐ ܠܗܳܫܳܐ܂
02:11 [ai]ܗܳܕܼܶܐ ܗ̱ܝ ܐܳܬܼܳܐ ܩܰܕܼܡܳܝܬܳܐ ܕܰܥܒܼܰܕܼ ܝܶܫܽܘܥ ܒܩܳܛܢܶܐ ܕܰܓܼܠܺܝܠܳܐ܃ ܘܰܐܘܕܿܰܥ ܫܽܘܒܼܚܶܗ܂ ܘܗܰܝܡܶܢܘ ܒܶܗ ܬܰܠܡܺܝܕܼܰܘܗ̱ܝ̈܀
02:12 [ai]ܒܳܬܼܰܪ ܗܳܕܼܶܐ ܢܚܶܬܼ ܠܰܟܼܦܼܰܪܢܰܚܽܘܡ܃ ܗܽܘ ܘܶܐܡܶܗ ܘܰܐܚܰܘܗ̱ܝ̈ ܘܬܼܰܠܡܺܝܕܼܰܘܗ̱ܝ̈܂ ܘܬܼܰܡܳܢ ܗ̱ܘܰܘ ܩܰܠܺܝܠ ܝܰܘܡܳܬܼܳܐ̈܀
02:13 [ai]ܘܩܰܪܺܝܒܼ ܗ̱ܘܳܐ ܦܶܨܚܳܐ ܕܺܝܗܽܘܕܼܳܝܶܐ̈܂ ܘܰܣܠܶܩ ܠܽܐܘܪܺܫܠܶܡ ܝܶܫܽܘܥ܃
02:14 [ai]ܘܶܐܫܟܿܰܚ ܒܗܰܝܟܠܳܐ ܠܗܳܠܶܝܢ ܕܰܡܙܰܒܢܺܝܢ ܬܰܘܪ̈ܶܐ ܘܥܶܪ̈ܒܿܶܐ ܘܝܰܘܢܶܐ̈܂ ܘܠܰܡܥܰܪ̈ܦܼܳܢܶܐ ܕܿܝܳܬܼܒܺܝܢ܂
02:15 [ai]ܘܰܥܒܼܰܕܼ ܠܶܗ ܦܪܳܓܼܶܠܳܐ ܡܶܢ ܚܰܒܼܠܳܐ܃ ܘܰܠܟܼܽܠܗܽܘܢ ܐܰܦܿܶܩ ܡܶܢ ܗܰܝܟܠܳܐ܂ ܘܰܠܥܶܪ̈ܒܿܶܐ ܘܰܠܬܼܰܘܪ̈ܶܐ ܘܠܰܡܥܰܪ̈ܦܼܳܢܶܐ܂ ܘܶܐܫܰܕܼ ܥܽܘܪܦܼܳܢܗܽܘܢ܂ ܘܦܼܳܬܼܽܘܪ̈ܰܝܗܽܘܢ ܗܦܼܰܟܼ܂
02:16 [ai]ܘܰܠܗܳܢܽܘܢ ܕܰܡܙܰܒܢܺܝܢ ܝܰܘܢܶܐ̈܂ ܐܶܡܰܪ܂ ܫܩܽܘܠܘ ܗܳܠܶܝܢ ܡܶܟܿܳܐ܂ ܘܠܳܐ ܬܶܥܒܿܕܼܽܘܢܶܗ ܠܒܼܰܝܬܿܶܗ ܕܳܐܒܼܝ ܒܶܝܬܼ ܬܿܶܐܓܼܽܘܪܬܳܐ܀
02:17 [ai]ܘܶܐܬܿܕܿܟܼܰܪܘ ܬܰܠܡܺܝܕܼܰܘܗ̱ܝ̈ ܕܰܟܼܬܼܺܝܒܼ܃ ܕܰܛܢܳܢܶܗ ܕܒܰܝܬܿܳܟܼ ܐܰܟܼܠܰܢܝ܀
02:18 [ai]ܥܢܰܘ ܕܶܝܢ ܺܝܗܽܘܕܼܳܝܶܐ̈܂ ܘܶܐܡܰܪܘ ܠܶܗ܂ ܡܳܢܳܐ ܐܳܬܼܳܐ ܡܚܰܘܶܐ ܐܰܢ̱ܬܿ ܠܰܢ܂ ܕܗܳܠܶܝܢ ܥܳܒܼܶܕܼ ܐܰܢ̱ܬܿ܂
02:19 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܣܬܼܽܘܪܘ ܗܰܝܟܠܳܐ ܗܳܢܳܐ܃ ܘܠܰܬܼܠܳܬܼܳܐ ܝܰܘܡܺܝܢ̈܂ ܐܶܢܳܐ ܡܩܺܝܡ ܐ̱ܢܳܐ ܠܶܗ܂
02:20 [ai]ܐܳܡܪܺܝܢ ܠܶܗ ܺܝܗܽܘܕܼܳܝܶܐ̈܂ ܠܰܐܪܒܥܺܝܢ ܘܫܶܬܼ ܫܢܺܝܢ̈ ܐܶܬܼܒܿܢܺܝ ܗܰܝܟܠܳܐ ܗܳܢܳܐ܃ ܘܰܐܢ̱ܬܿ܃ ܠܰܬܼܠܳܬܼܳܐ ܝܰܘܡܺܝܢ̈ ܡܩܺܝܡ ܐܰܢ̱ܬܿ ܠܶܗ܃
02:21 [ai]ܗܽܘ ܕܶܝܢ ܐܶܡܰܪ ܗ̱ܘܳܐ ܥܰܠ ܗܰܝܟܠܳܐ ܕܦܰܓܼܪܶܗ܂
02:22 [ai]ܟܰܕܼ ܩܳܡ ܕܶܝܢ ܡܶܢ ܒܶܝܬܼ ܡܺܝܬܼܶܐ̈܃ ܐܶܬܿܕܿܟܼܰܪܘ ܬܰܠܡܺܝܕܼܰܘܗ̱ܝ̈ ܕܗܳܕܼܶܐ ܐܶܡܰܪ ܗ̱ܘܳܐ܂ ܘܗܰܝܡܶܢܘ ܠܰܟܼܬܼܳܒܼܶܐ̈܂ ܘܰܠܡܶܠܬܼܳܐ ܕܶܐܡܰܪ ܝܶܫܽܘܥ܀܀
02:23 [ai]ܟܰܕܼ ܐܺܝܬܼܰܘܗ̱ܝ ܗ̱ܘܳܐ ܕܶܝܢ ܝܶܫܽܘܥ ܒܽܐܘܪܺܫܠܶܡ܂ ܒܦܶܨܚܳܐ ܒܥܰܕܼܥܺܕܼܳܐ܃ ܣܰܓܿܺܝܶܐܐ̈ ܗܰܝܡܶܢܘ ܒܶܗ܂ ܕܰܚܙܰܘ ܐܳܬܼܘܳܬܼܳܐ̈ ܕܥܳܒܼܶܕܼ܂
02:24 [ai]ܗܽܘ ܕܶܝܢ ܝܶܫܽܘܥ܂ ܠܳܐ ܡܗܰܝܡܶܢ ܗ̱ܘܳܐ ܠܗܽܘܢ ܢܰܦܼܫܶܗ܂ ܡܶܛܽܠ ܕܗܽܘ ܝܳܕܼܰܥ ܗ̱ܘܳܐ ܠܟܼܽܠܢܳܫ܂
02:25 [ai]ܘܠܳܐ ܣܢܺܝܩ ܗ̱ܘܳܐ ܕܐ̱ܢܳܫ ܢܶܣܗܰܕܼ ܠܶܗ ܥܰܠ ܟܽܠ ܒܰܪܢܳܫ܂ ܗܽܘ ܓܶܝܪ ܝܳܕܼܰܥ ܗ̱ܘܳܐ ܡܳܢܳܐ ܐܺܝܬܼ ܒܒܼܰܪܢܳܫܳܐ܀܀

next chapter