← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


03:01 [ai]ܐܺܝܬܼ ܗ̱ܘܳܐ ܕܶܝܢ ܬܰܡܳܢ ܚܰܕܼ ܓܰܒܼܪܳܐ ܡܶܢ ܦܿܪ̈ܺܝܫܶܐ܃ ܢܺܝܩܳܕܼܺܡܳܘܣ ܫܡܶܗ ܗ̱ܘܳܐ܂ ܐܰܪܟܼܽܘܢܳܐ ܕܺܝܗܽܘܕܼܳܝܶܐ̈܂
03:02 [ai]ܗܳܢܳܐ ܐܶܬܼܳܐ ܠܘܳܬܼ ܝܶܫܽܘܥ ܒܠܺܠܝܳܐ܂ ܘܶܐܡܰܪ ܠܶܗ܂ ܪܰܒܺܝ܃ ܝܳܕܼܥܺܝܢܰܢ ܕܡܶܢ ܐܰܠܳܗܳܐ ܐܶܫܬܿܰܕܿܰܪܬܿ ܡܰܠܦܼܳܢܳܐ܂ ܠܳܐ ܓܶܝܪ ܐ̱ܢܳܫ ܡܶܫܟܿܰܚ ܗܳܠܶܝܢ ܐܳܬܼܘܳܬܼܳܐ̈ ܠܡܶܥܒܿܰܕܼ ܕܰܐܢ̱ܬܿ ܥܳܒܼܶܕܼ ܐܰܢ̱ܬܿ܃ ܐܶܠܳܐ ܡܰܢ ܕܰܐܠܳܗܳܐ ܥܰܡܶܗ܂
03:03 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܶܗ܂ ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܳܟܼ܃ ܕܶܐܢ ܐ̱ܢܳܫ ܠܳܐ ܡܶܬܼܺܝܠܶܕܼ ܡܶܢ ܕܪܺܝܫ܃ ܠܳܐ ܡܶܫܟܿܰܚ ܕܢܶܚܙܶܐ ܡܰܠܟܿܽܘܬܼܶܗ ܕܰܐܠܳܗܳܐ܂
03:04 [ai]ܐܳܡܰܪ ܠܶܗ ܢܺܝܩܳܕܼܺܡܳܘܣ܂ ܐܰܝܟܿܰܢܳܐ ܡܶܫܟܿܰܚ ܕܢܶܬܼܺܝܠܶܕܼ ܓܰܒܼܪܳܐ ܣܳܒܼܳܐ܂ ܕܰܠܡܳܐ܂ ܡܶܫܟܿܰܚ ܬܽܘܒܼ ܠܟܼܰܪܣܳܐ ܕܶܐܡܶܗ ܕܿܬܼܰܪ̈ܬܿܶܝܢ ܙܰܒܼܢܺܝܢ̈܃ ܠܡܶܥܰܠ܂ ܘܢܶܬܼܺܝܠܶܕܼ܃
03:05 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܶܗ܂ ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܳܟܼ܃ ܕܶܐܢ ܐ̱ܢܳܫ ܠܳܐ ܡܶܬܼܺܝܠܶܕܼ ܡܶܢ ܡܰܝܳܐ̈ ܘܪܽܘܚܳܐ܂ ܠܳܐ ܡܶܫܟܿܰܚ ܕܢܶܥܽܘܠ ܠܡܰܠܟܿܽܘܬܼܳܐ ܕܰܐܠܳܗܳܐ܂
03:06 [ai]ܡܶܕܶܡ ܕܺܝܠܺܝܕܼ ܡܶܢ ܒܶܣܪܳܐ܂ ܒܶܣܪܳܐ ܗܽܘ܂ ܘܡܶܕܶܡ ܕܺܝܠܺܝܕܼ ܡܶܢ ܪܽܘܚܳܐ܂ ܪܽܘܚܳܐ ܗܽܘ܂
03:07 [ai]ܠܳܐ ܬܿܶܬܿܕܰܡܰܪ ܕܶܐܡܪܶܬܼ ܠܳܟܼ܂ ܕܘܳܠܶܐ ܠܟܼܽܘܢ ܠܡܶܬܼܺܝܠܳܕܼܽܘ ܡܶܢ ܕܪܺܝܫ܂
03:08 [ai]ܪܽܘܚܳܐ ܐܰܬܼܰܪ ܕܨܳܒܼܝܳܐ ܢܳܫܒܿܳܐ܂ ܘܩܳܠܳܗ ܫܳܡܰܥ ܐܰܢ̱ܬܿ܂ ܐܶܠܳܐ ܠܳܐ ܝܳܕܼܰܥ ܐܰܢ̱ܬܿ ܐܰܝܡܶܟܿܳܐ ܐܳܬܼܝܳܐ܂ ܘܠܰܐܝܟܿܳܐ ܐܳܙܳܠ̱ܐ܂ ܗܳܟܼܰܢܳܐ ܐܺܝܬܼܰܘܗ̱ܝ ܟܽܠܢܳܫ ܕܺܝܠܺܝܕܼ ܡܶܢ ܪܽܘܚܳܐ܂
03:09 [ai]ܥܢܳܐ ܢܺܝܩܳܕܼܺܡܳܘܣ܂ ܘܶܐܡܰܪ ܠܶܗ܂ ܐܰܝܟܿܰܢܳܐ ܡܶܫܟܿܚܳܢ ܗܳܠܶܝܢ ܠܡܶܗܘܳܐ܂
03:10 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܶܗ܂ ܐܰܢ̱ܬܿ ܗ̱ܽܘ ܡܰܠܦܼܳܢܶܗ ܕܺܐܝܣܪܳܝܶܠ܃ ܘܗܳܠܶܝܢ ܠܳܐ ܝܳܕܼܰܥ ܐܰܢ̱ܬܿ܂
03:11 [ai]ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܳܟܼ܃ ܕܿܡܶܕܶܡ ܕܝܳܕܼܥܺܝܢ ܚ̱ܢܰܢ ܡܡܰܠܠܺܝܢ ܚ̱ܢܰܢ܂ ܘܡܶܕܶܡ ܕܰܚܙܰܝܢ ܡܰܣܗܕܼܺܝܢ ܐܶܢܰܚܢܰܢ܂ ܘܣܳܗܕܿܽܘܬܼܰܢ ܠܳܐ ܡܩܰܒܿܠܺܝܢ ܐܢ̱ܬܿܽܘܢ܂
03:12 [ai]ܐܶܢ ܕܒܰܐܪܥܳܐ ܐܶܡܪܶܬܼ ܠܟܼܽܘܢ܂ ܘܠܳܐ ܡܗܰܝܡܢܺܝܢ ܐܢ̱ܬܿܽܘܢ܃ ܐܰܝܟܿܰܢܳܐ ܐܶܢ ܐܺܡܰܪ ܠܟܼܽܘܢ ܕܒܰܫܡܰܝܳܐ܂ ܬܗܰܝܡܢܽܘܢܳܢܝ܂
03:13 [ai]ܘܠܳܐ ܐ̱ܢܳܫ ܣܠܶܩ ܠܰܫܡܰܝܳܐ܃ ܐܶܠܳܐ ܗܰܘ ܕܰܢܚܶܬܼ ܡܶܢ ܫܡܰܝܳܐ܂ ܒܪܶܗ ܕܐ̱ܢܳܫܳܐ ܗܰܘ ܕܺܐܝܬܼܰܘܗ̱ܝ ܒܰܫܡܰܝܳܐ܂
03:14 [ai]ܘܰܐܝܟܿܰܢܳܐ ܕܰܐܪܺܝܡ ܡܽܘܫܶܐ ܚܶܘܝܳܐ ܒܡܰܕܼܒܪܳܐ܃ ܗܳܟܼܰܢܳܐ ܥܬܼܺܝܕܼ ܠܡܶܬܿܬܿܪܳܡܽܘ ܒܪܶܗ ܕܐ̱ܢܳܫܳܐ܂
03:15 [ai]ܕܟܽܠ ܐ̱ܢܳܫ ܕܰܡܗܰܝܡܶܢ ܒܶܗ܂ ܠܳܐ ܢܺܐܒܼܰܕܼ܂ ܐܶܠܳܐ ܢܶܗܘܽܘܢ ܠܶܗ ܚܰܝ̈ܶܐ ܕܰܠܥܳܠܰܡ܂
03:16 [ai]ܗܳܟܼܰܢܳܐ ܓܶܝܪ ܐܰܚܶܒܼ ܐܰܠܳܗܳܐ ܠܥܳܠܡܳܐ܃ ܐܰܝܟܿܰܢܳܐ ܕܠܰܒܼܪܶܗ ܺܝܚܺܝܕܼܳܝܳܐ ܢܶܬܿܶܠ܂ ܕܟܽܠܡܰܢ ܕܰܡܗܰܝܡܶܢ ܒܶܗ܂ ܠܳܐ ܢܺܐܒܼܰܕܼ܂ ܐܶܠܳܐ ܢܶܗܘܽܘܢ ܠܶܗ ܚܰܝ̈ܶܐ ܕܰܠܥܳܠܰܡ܂
03:17 [ai]ܠܳܐ ܓܶܝܪ ܫܰܕܿܰܪ ܐܰܠܳܗܳܐ ܠܰܒܼܪܶܗ ܠܥܳܠܡܳܐ ܕܰܢܕܼܽܘܢܺܝܘܗ̱ܝ ܠܥܳܠܡܳܐ܂ ܐܶܠܳܐ ܕܢܺܚܶܐ ܠܥܳܠܡܳܐ ܒܺܐܝܕܼܶܗ܂
03:18 [ai]ܡܰܢ ܕܰܡܗܰܝܡܶܢ ܒܶܗ܂ ܠܳܐ ܡܶܬܿܬܿܕܼܺܝܢ܂ ܘܡܰܢ ܕܠܳܐ ܡܗܰܝܡܶܢ܂ ܡܶܢ ܟܰܕܿܽܘ ܕܺܝܢ ܗ̱ܽܘ܂ ܕܠܳܐ ܗܰܝܡܶܢ ܒܰܫܡܶܗ ܕܺܝܚܺܝܕܼܳܝܳܐ ܒܪܶܗ ܕܰܐܠܳܗܳܐ܂
03:19 [ai]ܗܳܢܰܘ ܕܶܝܢ ܕܺܝܢܳܐ܂ ܕܢܽܘܗܪܳܐ ܐܶܬܼܳܐ ܠܥܳܠܡܳܐ܃ ܘܰܐܚܶܒܼܘ ܒܢܰܝܢܳܫܳܐ ܠܚܶܫܽܘܟܼܳܐ܂ ܝܰܬܿܺܝܪ ܡܶܢ ܕܰܠܢܽܘܗܪܳܐ܂ ܐܺܝܬܼܰܝܗܽܘܢ ܗ̱ܘܰܘ ܓܶܝܪ ܥܒܼܳܕܼܰܝܗܽܘܢ̈ ܒܺܝܫܶܐ̈܂
03:20 [ai]ܟܽܠ ܓܶܝܪ ܕܣܰܢܝܳܬܼܳܐ̈ ܥܳܒܼܶܕܼ܂ ܣܳܢܶܐ ܠܢܽܘܗܪܳܐ܂ ܘܠܳܐ ܐܳܬܼܶܐ ܠܢܽܘܗܪܳܐ܂ ܕܠܳܐ ܢܶܬܼܟܿܰܣܣܽܘܢ ܥܒܼܳܕܼܰܘܗ̱ܝ̈܂
03:21 [ai]ܗܰܘ ܕܶܝܢ ܕܥܳܒܼܶܕܼ ܫܪܳܪܳܐ܂ ܐܳܬܼܶܐ ܠܘܳܬܼ ܢܽܘܗܪܳܐ܂ ܕܢܶܬܼܺܝܕܼܥܽܘܢ ܥܒܼܳܕܼܰܘܗ̱ܝ̈ ܕܒܰܐܠܳܗܳܐ ܥܒܼܺܝܕܼܺܝܢ ܿ܀ܿ܀ܿ
03:22 [ai]ܒܳܬܼܰܪ ܗܳܠܶܝܢ܂ ܐܶܬܼܳܐ ܝܶܫܽܘܥ ܘܬܼܰܠܡܺܝܕܼܰܘܗ̱ܝ̈ ܠܰܐܪܥܳܐ ܕܺܝܗܽܘܕܼ܂ ܘܬܼܰܡܳܢ ܡܶܬܼܗܰܦܿܰܟܼ ܗ̱ܘܳܐ ܥܰܡܗܽܘܢ܂ ܘܡܰܥܡܶܕܼ܀
03:23 [ai]ܐܳܦܼ ܝܽܘܚܰܢܳܢ ܕܶܝܢ ܡܰܥܡܶܕܼ ܗ̱ܘܳܐ ܒܥܺܝܢ ܝܳܘܢ܂ ܕܥܰܠ ܓܶܢ̱ܒܼ ܫܳܠܺܝܡ܂ ܡܶܛܽܠ ܕܡܰܝܳܐ̈ ܐܺܝܬܼ ܗ̱ܘܰܘ ܬܰܡܳܢ ܣܰܓܿܺܝܶܐܐ̈܂ ܘܳܐܬܼܶܝܢ ܗ̱ܘܰܘ ܘܥܳܡܕܺܝܢ܂
03:24 [ai]ܠܳܐ ܓܶܝܪ ܥܕܼܰܟܿܺܝܠ ܢܦܼܰܠ ܗ̱ܘܳܐ ܝܽܘܚܰܢܳܢ ܒܶܝܬܼ ܐܰܣܺܝܪ̈ܶܐ܀
03:25 [ai]ܗܘܳܬܼ ܗ̱ܘܳܬܼ ܕܶܝܢ ܒܥܳܬܼܳܐ ܠܚܰܕܼ ܡܶܢ ܬܰܠܡܺܝܕܼܰܘܗ̱ܝ̈ ܕܝܽܘܚܰܢܳܢ ܥܰܡ ܺܝܗܽܘܕܼܳܝܳܐ ܚܰܕܼ ܥܰܠ ܬܰܕܼܟܿܺܝܬܼܳܐ܂
03:26 [ai]ܘܶܐܬܼܰܘ ܠܘܳܬܼ ܝܽܘܚܰܢܳܢ ܘܶܐܡܰܪܘ ܠܶܗ܂ ܪܰܒܰܢ܃ ܗܰܘ ܕܥܰܡܳܟܼ ܗ̱ܘܳܐ ܒܥܶܒܼܪܳܐ ܕܝܽܘܪܕܿܢܳܢ܃ ܕܰܐܢ̱ܬܿ ܣܗܶܕܼܬܿ ܥܠܰܘܗ̱ܝ܃ ܗܳܐ ܐܳܦܼ ܗܽܘ ܡܰܥܡܶܕܼ܂ ܘܣܰܓܿܺܝܶܐܐ̈ ܐܳܬܼܶܝܢ ܠܘܳܬܼܶܗ܀
03:27 [ai]ܥܢܳܐ ܝܽܘܚܰܢܳܢ ܘܶܐܡܰܪ ܠܗܽܘܢ܂ ܠܳܐ ܡܶܫܟܿܰܚ ܒܰܪܢܳܫܳܐ ܠܡܶܣܰܒܼ ܡܶܢ ܨܒܼܽܘܬܼ ܢܰܦܼܫܶܗ ܡܶܕܶܡ܃ ܐܶܠܳܐ ܐܶܢ ܐܶܬܼܺܝܗܶܒܼ ܠܶܗ ܡܶܢ ܫܡܰܝܳܐ܂
03:28 [ai]ܐܰܢ̱ܬܿܽܘܢ ܣܳܗܕܺܝܢ ܐܢ̱ܬܿܽܘܢ ܠܺܝ܂ ܕܶܐܡܪܶܬܼ܃ ܕܶܐܢܳܐ ܠܳܐ ܗܘܺܝܬܼ ܡܫܺܝܚܳܐ܂ ܐܶܠܳܐ ܫܠܺܝܚܳܐ ܐ̱ܢܳܐ ܕܰܩܕܼܳܡܰܘܗ̱ܝ܂
03:29 [ai]ܡܰܢ ܕܺܐܝܬܼ ܠܶܗ ܟܰܠܬܼܳܐ܂ ܚܰܬܼܢܳܐ ܗܽܘ܂ ܪܳܚܡܶܗ ܕܶܝܢ ܕܚܰܬܼܢܳܐ܂ ܗܰܘ ܕܩܳܐܶܡ ܘܨܳܐܶܬܼ ܠܶܗ܂ ܚܰܕܼܽܘܬܼܳܐ ܪܰܒܿܬܼܳܐ ܚܳܕܼܶܐ ܡܶܛܽܠ ܩܳܠܶܗ ܕܚܰܬܼܢܳܐ܂ ܗܳܕܼܶܐ ܗܳܟܼܺܝܠ ܚܰܕܼܽܘܬܼܳܐ ܕܺܝܠܝ ܗܳܐ ܡܡܰܠܝܳܐ܂
03:30 [ai]ܠܗܰܘ ܗ̱ܽܘ ܘܳܠܶܐ ܠܡܶܪܒܿܳܐ܂ ܘܠܺܝ ܠܡܶܒܼܨܰܪ܂
03:31 [ai]ܗܰܘ ܓܶܝܪ ܕܡܶܢ ܠܥܶܠ ܐܶܬܼܳܐ܂ ܠܥܶܠ ܡܶܢ ܟܽܠ ܗ̱ܽܘ܂ ܘܗܰܘ ܕܡܶܢ ܐܰܪܥܳܐ܂ ܡܶܢ ܐܰܪܥܳܐ ܗܽܘ܂ ܘܡܶܢ ܐܰܪܥܳܐ ܡܡܰܠܶܠ܂ ܗܰܘ ܕܡܶܢ ܫܡܰܝܳܐ ܐܶܬܼܳܐ܂ ܠܥܶܠ ܡܶܢ ܟܽܠ ܗ̱ܽܘ܂
03:32 [ai]ܘܡܶܕܶܡ ܕܰܚܙܳܐ ܘܰܫܡܰܥ ܡܰܣܗܶܕܼ܂ ܘܣܳܗܕܿܽܘܬܼܶܗ ܠܳܐ ܐ̱ܢܳܫ ܡܩܰܒܿܶܠ܂
03:33 [ai]ܗܰܘ ܕܶܝܢ ܕܩܰܒܿܶܠ ܣܳܗܕܿܽܘܬܼܶܗ܃ ܚܬܼܰܡ ܕܰܐܠܳܗܳܐ ܫܰܪܺܝܪܳܐ ܗܽܘ܂
03:34 [ai]ܐܰܝܢܳܐ ܓܶܝܪ ܕܰܐܠܳܗܳܐ ܫܰܕܿܪܶܗ܃ ܡܶܠܶܐ̈ ܗ̱ܘ ܕܰܐܠܳܗܳܐ ܡܡܰܠܶܠ܂ ܠܳܐ ܗ̱ܘܳܐ ܓܶܝܪ ܒܟܰܝܠܳܐ ܝܰܗ̱ܒܼ ܐܰܠܳܗܳܐ ܪܽܘܚܳܐ܂
03:35 [ai]ܐܰܒܼܳܐ ܡܰܚܶܒܼ ܠܰܒܼܪܳܐ܂ ܘܟܼܽܠ ܡܶܕܶܡ ܝܰܗ̱ܒܼ ܒܺܐܝܕܼܰܘܗ̱ܝ̈܂
03:36 [ai]ܡܰܢ ܕܰܡܗܰܝܡܶܢ ܒܰܒܼܪܳܐ܂ ܐܺܝܬܼ ܠܶܗ ܚܰܝ̈ܶܐ ܕܰܠܥܳܠܰܡ܂ ܘܡܰܢ ܕܠܳܐ ܡܶܬܿܛܦܿܺܝܣ ܠܰܒܼܪܳܐ܂ ܠܳܐ ܢܶܚܙܶܐ ܚܰܝ̈ܶܐ܂ ܐܶܠܳܐ ܪܽܘܓܼܙܶܗ ܕܰܐܠܳܗܳܐ ܢܩܰܘܶܐ ܥܠܰܘܗ̱ܝ܀܀

next chapter