The Comprehensive Aramaic Lexicon

04:01 [ai]	ܺܝܕܼܰܥ ܕܶܝܢ ܝܶܫܽܘܥ ܕܰܫܡܰܥܘ ܦܿܪ̈ܺܝܫܶܐ ܕܬܰܠܡܺܝܕܼܶܐ̈ ܣܰܓܿܺܝܶܐܐ̈ ܥܒܼܰܕܼ܂ ܘܡܰܥܡܶܕܼ ܝܰܬܿܺܝܪ ܡܶܢ ܝܽܘܚܰܢܳܢ܂
04:02 [ai]	ܟܰܕܼ ܠܳܐ ܗ̱ܘܳܐ ܗܽܘ ܝܶܫܽܘܥ ܡܰܥܡܶܕܼ ܗ̱ܘܳܐ܂ ܐܶܠܳܐ ܬܰܠܡܺܝܕܼܰܘܗ̱ܝ̈܂
04:03 [ai]	ܘܫܰܒܼܩܳܗ ܠܺܝܗܽܘܕܼ܃ ܘܶܐܙܰܠ ܠܶܗ ܬܽܘܒܼ ܠܰܓܼܠܺܝܠܳܐ܀܀
04:04 [ai]	ܡܰܥܒܿܕܼܳܐ ܗ̱ܘܳܬܼ ܠܶܗ ܕܶܝܢ ܕܢܺܐܬܼܶܐ ܢܶܥܒܰܪ ܥܰܠ ܒܶܝܬܼ ܫܳܡܪ̈ܳܝܶܐ܂
04:05 [ai]	ܘܶܐܬܼܳܐ ܠܰܡܕܼܺܝܢ̱ܬܳܐ ܕܫܳܡܪ̈ܳܝܶܐ܂ ܕܡܶܬܼܩܰܪܝܳܐ ܫܳܟܼܰܪ܂ ܥܰܠ ܓܶܢ̱ܒܼ ܩܪܺܝܬܼܳܐ܂ ܕܝܰܗ̱ܒܼ ܗ̱ܘܳܐ ܝܰܥܩܽܘܒܼ ܠܝܰܘܣܶܦܼ ܒܪܶܗ܂
04:06 [ai]	ܘܺܐܝܬܼ ܗ̱ܘܳܐ ܬܰܡܳܢ ܡܥܺܝܢܳܐ ܕܡܰܝܳܐ̈ ܕܝܰܥܩܽܘܒܼ܂ ܗܽܘ ܕܶܝܢ ܝܶܫܽܘܥ ܠܐܶܐ ܗ̱ܘܳܐ ܡܶܢ ܥܰܡܠܳܐ ܕܽܐܘܪܚܳܐ܂ ܘܺܝܬܼܶܒܼ ܗ̱ܘܳܐ ܠܶܗ ܥܰܠ ܡܥܺܝܢܳܐ܂ ܘܺܐܝܬܼ ܗ̱ܘܰܝ̈ ܫܶܬܼ ܫܳܥܺܝܢ̈܂
04:07 [ai]	ܘܶܐܬܼܳܬܼ ܐܰܢ̱ܬܿܬܼܳܐ ܡܶܢ ܫܳܡܪܺܝܢ ܕܬܶܡܠܶܐ ܡܰܝܳܐ̈܂ ܘܶܐܡܰܪ ܠܳܗ ܝܶܫܽܘܥ܂ ܗܰܒܼ ܠܺܝ ܡܰܝܳܐ̈ ܐܶܫܬܿܶܐ܂
04:08 [ai]	ܬܰܠܡܺܝܕܼܰܘܗ̱ܝ̈ ܓܶܝܪ ܥܰܠܘ ܗ̱ܘܰܘ ܠܰܡܕܼܺܝܢ̱ܬܳܐ܂ ܕܢܶܙܒܿܢܽܘܢ ܠܗܽܘܢ ܣܰܝܒܿܳܪܬܳܐ܂
04:09 [ai]	ܐܳܡܪܳܐ ܠܶܗ ܗܳܝ ܐܰܢ̱ܬܿܬܼܳܐ ܫܳܡܪܳܝܬܳܐ܂ ܐܰܝܟܿܰܢܳܐ ܐܰܢ̱ܬܿ ܺܝܗܽܘܕܼܳܝܳܐ ܐܰܢ̱ܬܿ܃ ܘܡܶܢܝ ܫܳܐܶܠ ܐܰܢ̱ܬܿ ܠܡܶܫܬܳܐ܂ ܕܺܐܝܬܼܰܝ ܐܰܢ̱ܬܿܬܼܳܐ ܫܳܡܪܳܝܬܳܐ܂ ܠܳܐ ܓܶܝܪ ܡܶܬܼܚܰܫܚܺܝܢ ܺܝܗܽܘܕܼܳܝܶܐ̈ ܥܰܡ ܫܳܡܪ̈ܳܝܶܐ܂
04:10 [ai]	ܥܢܳܐ ܝܶܫܽܘܥ܂ ܘܶܐܡܰܪ ܠܳܗ܂ ܐܶܠܽܘ ܝܳܕܼܥܳܐ ܗ̱ܘܰܝܬܿܝ ܡܰܘܗܰܒܼܬܳܐ ܕܰܐܠܳܗܳܐ܃ ܘܡܰܢܽܘ ܗܳܢܳܐ ܕܶܐܡܰܪ ܠܶܟܼܝ܂ ܗܰܒܼ ܠܺܝ ܐܶܫܬܿܶܐ܃ ܐܰܢ̱ܬܿܝ ܫܳܐܠܳܐ ܗ̱ܘܰܝܬܿܝ ܠܶܗ܂ ܘܝܳܗܶܒܼ ܗ̱ܘܳܐ ܠܶܟܼܝ ܡܰܝܳܐ̈ ܚܰܝ̈ܶܐ܂
04:11 [ai]	ܐܳܡܪܳܐ ܠܶܗ ܐܰܢ̱ܬܿܬܼܳܐ ܗܳܝ܂ ܡܳܪܝ܃ ܠܳܐ ܕܰܘܠܳܐ ܐܺܝܬܼ ܠܳܟܼ܂ ܘܒܼܺܪܳܐ ܥܰܡܺܝܩܳܐ܂ ܐܰܝܡܶܟܿܳܐ ܠܳܟܼ ܡܰܝܳܐ̈ ܚܰܝ̈ܶܐ܂
04:12 [ai]	ܠܡܳܐ ܐܰܢ̱ܬܿ ܪܰܒܼ ܐܰܢ̱ܬܿ ܡܶܢ ܐܰܒܼܽܘܢ ܝܰܥܩܽܘܒܼ܃ ܗܰܘ ܕܗܽܘ ܝܰܗ̱ܒܼ ܠܰܢ ܒܺܪܳܐ ܗܳܕܼܶܐ܃ ܘܗܽܘ ܡܶܢܳܗ ܐܶܫܬܿܺܝ ܘܰܒܢܰܘܗ̱ܝ ܘܥܳܢܶܗ̈܂
04:13 [ai]	ܥܢܳܐ ܝܶܫܽܘܥ ܘܶܐܡܰܪ ܠܳܗ܂ ܟܽܠ ܕܢܶܫܬܿܶܐ ܡܶܢ ܗܳܠܶܝܢ ܡܰܝܳܐ̈܂ ܬܽܘܒܼ ܢܶܨܗܶܐ܂
04:14 [ai]	ܟܽܠ ܕܶܝܢ ܕܢܶܫܬܿܶܐ ܡܶܢ ܡܰܝܳܐ̈ ܕܶܐܢܳܐ ܐܶܬܿܶܠ ܠܶܗ܂ ܠܳܐ ܢܶܨܗܶܐ ܠܥܳܠܰܡ܂ ܐܶܠܳܐ ܡܰܝܳܐ̈ ܗܳܢܽܘܢ ܕܝܳܗܶܒܼ ܐ̱ܢܳܐ ܠܶܗ܃ ܢܶܗܘܽܘܢ ܒܶܗ ܡܥܺܝܢܳܐ ܕܡܰܝܳܐ̈܂ ܕܢܳܒܼܥܺܝܢ ܠܚܰܝ̈ܶܐ ܕܰܠܥܳܠܰܡ܂
04:15 [ai]	ܐܳܡܪܳܐ ܠܶܗ ܐܰܢ̱ܬܿܬܼܳܐ ܗܳܝ܂ ܡܳܪܝ܃ ܗܰܒܼ ܠܺܝ ܡܶܢ ܗܳܠܶܝܢ ܡܰܝܳܐ̈܂ ܕܠܳܐ ܬܽܘܒܼ ܐܶܨܗܶܐ܂ ܘܠܳܐ ܗܘܺܝܬܼ ܐܳܬܼܝܳܐ ܕܳܠܝܳܐ ܡܶܢ ܗܳܪܟܿܳܐ܂
04:16 [ai]	ܐܳܡܰܪ ܠܳܗ ܝܶܫܽܘܥ܂ ܙܶܠܝ ܩܪܳܝ ܠܒܼܰܥܠܶܟܼܝ܂ ܘܬܼܳܝ ܠܗܳܪܟܿܳܐ܂
04:17 [ai]	ܐܳܡܪܳܐ ܠܶܗ܂ ܠܰܝܬܿ ܠܺܝ ܒܰܥܠܳܐ܂ ܐܳܡܰܪ ܠܳܗ ܝܶܫܽܘܥ܂ ܫܰܦܿܺܝܪ ܐܶܡܰܪܬܿܝ܂ ܕܠܰܝܬܿ ܠܺܝ ܒܰܥܠܳܐ܂
04:18 [ai]	ܚܰܡܫܳܐ ܓܶܝܪ ܒܰܥܠܺܝܢ̈ ܗܘܰܘ ܠܶܟܼܝ܂ ܘܗܳܢܳܐ ܕܺܐܝܬܼ ܠܶܟܼܝ ܗܳܫܳܐ܂ ܠܳܐ ܗܘܳܐ ܒܰܥܠܶܟܼܝ܂ ܗܳܕܼܶܐ܂ ܫܰܪܺܝܪܬܳܐ ܐܶܡܰܪܬܿܝ܂
04:19 [ai]	ܐܳܡܪܳܐ ܠܶܗ ܗܳܝ ܐܰܢ̱ܬܿܬܼܳܐ܂ ܡܳܪܝ܃ ܚܳܙܝܳܐ ܐ̱ܢܳܐ ܕܰܢܒܼܺܝܳܐ ܐܰܢ̱ܬܿ܂
04:20 [ai]	ܐܰܒܼܳܗܰܝܢ̈ ܒܗܳܢܳܐ ܛܽܘܪܳܐ ܣܓܼܶܕܼܘ܂ ܘܰܐܢ̱ܬܿܽܘܢ ܐܳܡܪܺܝܢ ܐܢ̱ܬܿܽܘܢ܂ ܕܒܽܐܘܪܺܫܠܶܡ ܗ̱ܽܘ ܐܰܬܼܰܪ ܕܘܳܠܶܐ ܠܡܶܣܓܿܰܕܼ܂
04:21 [ai]	ܐܳܡܰܪ ܠܳܗ ܝܶܫܽܘܥ܂ ܐܰܢ̱ܬܿܬܼܳܐ܂ ܗܰܝܡܶܢܺܝܢܝ ܕܳܐܬܼܝܳܐ ܫܳܥܬܼܳܐ܃ ܕܠܳܐ ܒܗܳܢܳܐ ܛܽܘܪܳܐ܂ ܘܳܐܦܼ ܠܳܐ ܒܽܐܘܪܺܫܠܶܡ ܬܶܣܓܿܕܼܽܘܢ ܠܰܐܒܼܳܐ܂
04:22 [ai]	ܐܰܢ̱ܬܿܽܘܢ ܣܳܓܼܕܺܝܢ ܐܢ̱ܬܿܽܘܢ܂ ܠܡܶܕܶܡ ܕܠܳܐ ܝܳܕܼܥܺܝܢ ܐܢ̱ܬܿܽܘܢ܂ ܚܢܰܢ ܕܶܝܢ ܣܳܓܼܕܺܝܢ ܚ̱ܢܰܢ܂ ܠܡܳܐ ܕܝܳܕܼܥܺܝܢ ܚ̱ܢܰܢ܂ ܕܚܰܝ̈ܶܐ ܡܶܢ ܺܝܗܽܘܕܼܳܝܶܐ̈ ܐܶܢܽܘܢ܂
04:23 [ai]	ܐܶܠܳܐ ܐܳܬܼܝܳܐ ܫܳܥܬܼܳܐ܂ ܘܗܳܫܳܐ ܐܺܝܬܼܶܝܗ܃ ܐܶܡܰܬܼܝ ܕܣܳܓܼܽܘܕܼܶܐ̈ ܫܰܪ̈ܺܝܪܶܐ ܢܶܣܓܿܕܼܽܘܢ ܠܰܐܒܼܳܐ ܒܪܽܘܚܳܐ܂ ܘܒܼܰܫܪܳܪܳܐ܂ ܐܳܦܼ ܐܰܒܼܳܐ ܓܶܝܪ ܕܰܐܝܟܼ ܗܳܠܶܝܢ ܗ̱ܽܘ ܣܳܓܼܽܘܕܼܶܐ̈ ܒܿܳܥܶܐ܂
04:24 [ai]	ܪܽܘܚܳܐ ܗܽܘ ܓܶܝܪ ܐܰܠܳܗܳܐ܂ ܘܰܐܝܠܶܝܢ ܕܣܳܓܼܕܺܝܢ ܠܶܗ܃ ܒܪܽܘܚܳܐ ܘܒܼܰܫܪܳܪܳܐ ܘܳܠܶܐ ܕܢܶܣܓܿܕܼܽܘܢ܂
04:25 [ai]	ܐܳܡܪܳܐ ܠܶܗ ܐܰܢ̱ܬܿܬܼܳܐ ܗܳܝ܂ ܝܳܕܼܥܳܐ ܐ̱ܢܳܐ ܕܰܡܫܺܝܚܳܐ ܐܳܬܼܶܐ܂ ܘܡܳܐ ܕܶܐܬܼܳܐ܂ ܗܽܘ ܡܰܠܶܦܼ ܠܰܢ ܟܽܠܡܶܕܶܡ܂
04:26 [ai]	ܐܳܡܰܪ ܠܳܗ ܝܶܫܽܘܥ܂ ܐܶܢܳܐ ܐ̱ܢܳܐ܂ ܕܰܡܡܰܠܶܠ ܐ̱ܢܳܐ ܥܰܡܶܟܼܝ܂
04:27 [ai]	ܘܟܼܰܕܼ ܡܡܰܠܶܠ܃ ܐܶܬܼܰܘ ܬܰܠܡܺܝܕܼܰܘܗ̱ܝ̈܂ ܘܡܶܬܿܕܰܡܪܺܝܢ ܗ̱ܘܰܘ ܕܥܰܡ ܐܰܢ̱ܬܿܬܼܳܐ ܡܡܰܠܶܠ܂ ܠܳܐ ܕܶܝܢ ܐ̱ܢܳܫ ܐܶܡܰܪ܂ ܡܳܢܳܐ ܒܿܳܥܶܐ ܐܰܢ̱ܬܿ܃ ܐܰܘ ܡܳܢܳܐ ܡܡܰܠܶܠ ܐܰܢ̱ܬܿ ܥܰܡܳܗ܂
04:28 [ai]	ܘܫܶܒܼܩܰܬܼ ܩܽܘܠܬܼܳܗ ܐܰܢ̱ܬܿܬܼܳܐ܂ ܘܶܐܙܰܠ̱ܬܼ ܠܰܡܕܼܺܝܢ̱ܬܳܐ܂ ܘܳܐܡܪܳܐ ܠܐ̱ܢܳܫܳܐ܂
04:29 [ai]	ܬܰܘ ܚܙܰܘ ܓܰܒܼܪܳܐ܂ ܕܶܐܡܰܪ ܠܺܝ ܟܽܠ ܡܶܕܶܡ ܕܥܶܒܼܕܿܶܬܼ܂ ܠܡܳܐ ܗܽܘܝܽܘ ܡܫܺܝܚܳܐ܂
04:30 [ai]	ܘܰܢܦܼܰܩܘ ܐ̱ܢܳܫܳܐ ܡܶܢ ܡܕܼܺܝܢ̱ܬܳܐ܃ ܘܳܐܬܼܶܝܢ ܗ̱ܘܰܘ ܠܘܳܬܼܶܗ ܿ܀ܿ܀ܿ
04:31 [ai]	ܘܒܼܰܝܢܳܬܼ ܗܳܠܶܝܢ ܒܿܳܥܶܝܢ ܗ̱ܘܰܘ ܡܶܢܶܗ ܬܰܠܡܺܝܕܼܰܘܗ̱ܝ̈܂ ܘܳܐܡܪܺܝܢ ܠܶܗ܂ ܪܰܒܰܢ ܠܥܰܣ܂
04:32 [ai]	ܗܽܘ ܕܶܝܢ ܐܶܡܰܪ ܠܗܽܘܢ܂ ܐܺܝܬܼ ܠܺܝ ܡܶܐܟܼܽܘܠܬܳܐ ܕܶܐܟܼܽܘܠ܃ ܐܰܝܕܼܳܐ ܕܰܐܢ̱ܬܿܽܘܢ܂ ܠܳܐ ܝܳܕܼܥܺܝܢ ܐܢ̱ܬܿܽܘܢ܂
04:33 [ai]	ܐܳܡܪܺܝܢ ܬܰܠܡܺܝܕܼܶܐ̈ ܒܰܝܢܰܝܗܽܘܢ̈܂ ܠܡܳܐ܃ ܐ̱ܢܳܫ ܐܰܝܬܿܺܝ ܠܶܗ ܡܶܕܶܡ ܠܡܶܐܟܼܰܠ܃
04:34 [ai]	ܐܳܡܰܪ ܠܗܽܘܢ ܝܶܫܽܘܥ܂ ܡܶܐܟܼܽܘܠܬܿܝ܂ ܕܺܝܠܝ ܐܺܝܬܼܶܝܗ܃ ܕܶܐܥܒܿܶܕܼ ܨܶܒܼܝܳܢܶܗ ܕܡܰܢ ܕܫܰܕܿܪܰܢܝ܂ ܘܶܐܫܰܠܡܺܝܘܗ̱ܝ ܠܰܥܒܼܳܕܼܶܗ܂
04:35 [ai]	ܠܳܐ ܐܰܢ̱ܬܿܽܘܢ ܐܳܡܪܺܝܢ ܕܒܳܬܼܰܪ ܐܰܪܒܥܳܐ ܝܰܪ̈ܚܺܝܢ܂ ܐܳܬܼܶܐ ܚܨܳܕܼܳܐ܂ ܗܳܐ ܐܳܡܰܪ ܐ̱ܢܳܐ ܠܟܼܽܘܢ܂ ܕܰܐܪܺܝܡܘ ܥܰܝܢܰܝܟܿܽܘܢ̈܂ ܘܰܚܙܰܘ ܐܰܪ̈ܥܳܬܼܳܐ ܕܰܚܘܰܪ ܘܡܰܛܺܝ ܠܰܚܨܳܕܼܳܐ܂ ܡܶܢ ܟܰܕܿܽܘ܂
04:36 [ai]	ܘܰܐܝܢܳܐ ܕܚܳܨܶܕܼ܂ ܐܰܓܼܪܳܐ ܢܳܣܶܒܼ܂ ܘܟܼܳܢܶܫ ܦܿܺܐܪ̈ܶܐ܂ ܠܚܰܝ̈ܶܐ ܕܰܠܥܳܠܰܡ܂ ܘܙܳܪܽܘܥܳܐ ܘܚܳܨܽܘܕܼܳܐ܂ ܐܰܟܼܚܕܼܳܐ ܢܶܚܕܿܽܘܢ܂
04:37 [ai]	ܒܗܳܕܼܶܐ ܓܶܝܪ ܐܺܝܬܼܶܝܗ ܡܶܠܬܼܳܐ ܕܰܫܪܳܪܳܐ܂ ܕܰܐ̱ܚܪܺܝܢ ܗ̱ܽܘ ܙܳܪܰܥ܃ ܘܰܐ̱ܚܪܺܝܢ ܚܳܨܶܕܼ܂
04:38 [ai]	ܐܶܢܳܐ ܫܰܕܿܰܪܬܿܟܼܽܘܢ ܠܡܶܚܨܰܕܼ܃ ܡܶܕܶܡ ܕܠܳܐ ܗ̱ܘܳܐ ܐܰܢ̱ܬܿܽܘܢ ܠܐܺܝܬܿܽܘܢ ܒܶܗ܂ ܐ̱ܚܪ̈ܳܢܶܐ ܓܶܝܪ ܠܐܺܝܘ܃ ܘܰܐܢ̱ܬܿܽܘܢ ܥܰܠܬܿܽܘܢ ܥܰܠ ܥܰܡܠܗܽܘܢ ܕܗܳܢܽܘܢ܀
04:39 [ai]	ܡܶܢ ܗܳܝ ܡܕܼܺܝܢ̱ܬܳܐ ܕܶܝܢ ܣܰܓܿܺܝܶܐܐ̈ ܗܰܝܡܶܢܘ ܒܶܗ ܫܳܡܪ̈ܳܝܶܐ܂ ܡܶܛܽܠ ܡܶܠܬܼܳܗ ܕܰܐܢ̱ܬܿܬܼܳܐ ܗܳܝ܂ ܕܡܰܣܗܕܼܳܐ ܗ̱ܘܳܬܼ ܕܶܐܡܰܪ ܠܺܝ ܟܽܠܡܶܕܶܡ ܕܥܶܒܼܕܿܶܬܼ܂
04:40 [ai]	ܘܟܼܰܕܼ ܐܶܬܼܰܘ ܠܘܳܬܼܶܗ ܗܳܢܽܘܢ ܫܳܡܪ̈ܳܝܶܐ܃ ܒܥܰܘ ܡܶܢܶܗ ܕܢܶܗܘܶܐ ܠܘܳܬܼܗܽܘܢ܂ ܘܰܗܘܳܐ ܠܘܳܬܼܗܽܘܢ ܬܿܪ̈ܶܝܢ ܝܰܘܡܺܝܢ̈܂
04:41 [ai]	ܘܣܰܓܿܺܝܶܐܐ̈ ܗܰܝܡܶܢܘ ܒܶܗ ܡܶܛܽܠ ܡܶܠܬܼܶܗ܃
04:42 [ai]	ܘܳܐܡܪܺܝܢ ܗ̱ܘܰܘ ܠܰܐܢ̱ܬܿܬܼܳܐ ܗܳܝ܂ ܕܡܶܟܿܺܝܠ ܠܳܐ ܗ̱ܘܳܐ ܡܶܛܽܠ ܡܶܠܬܼܶܟܼܝ ܡܗܰܝܡܢܺܝܢ ܚ̱ܢܰܢ ܒܶܗ܂ ܚܢܰܢ ܓܶܝܪ ܫܡܰܥܢ ܘܺܝܕܼܰܥܢ܃ ܕܗܳܢܰܘ ܫܰܪܺܝܪܳܐܺܝܬܼ ܡܫܺܝܚܳܐ܂ ܡܰܚܝܳܢܶܗ ܕܥܳܠܡܳܐ܀
04:43 [ai]	ܘܒܼܳܬܼܰܪ ܬܿܪ̈ܶܝܢ ܝܰܘܡܺܝܢ̈܃ ܢܦܼܰܩ ܝܶܫܽܘܥ ܡܶܢ ܬܰܡܳܢ܂ ܘܶܐܙܰܠ ܠܰܓܼܠܺܝܠܳܐ܂
04:44 [ai]	ܗܽܘ ܓܶܝܪ ܝܶܫܽܘܥ ܣܗܶܕܼ܃ ܕܰܢܒܼܺܝܳܐ ܒܰܡܕܼܺܝܢ̱ܬܿܶܗ ܠܳܐ ܡܶܬܼܝܰܩܰܪ܀
04:45 [ai]	ܟܰܕܼ ܕܶܝܢ ܐܶܬܼܳܐ ܠܰܓܼܠܺܝܠܳܐ܂ ܩܰܒܿܠܽܘܗ̱ܝ ܓܠܺܝܠܳܝܶܐ̈܂ ܕܰܚܙܰܘ ܐܳܬܼܘܳܬܼܳܐ̈ ܟܽܠ ܕܰܥܒܼܰܕܼ ܒܽܐܘܪܺܫܠܶܡ ܒܥܰܕܼܥܺܕܼܳܐ܂ ܐܶܬܼܰܘ ܗ̱ܘܰܘ ܓܶܝܪ ܘܳܐܦܼ ܗܶܢܽܘܢ ܠܥܰܕܼܥܺܕܼܳܐ܂
04:46 [ai]	ܐܶܬܼܳܐ ܕܶܝܢ ܬܽܘܒܼ ܝܶܫܽܘܥ ܠܩܳܛܢܶܐ ܕܰܓܼܠܺܝܠܳܐ܃ ܐܰܝܟܿܳܐ ܕܰܥܒܼܰܕܼ ܡܰܝܳܐ̈ ܚܰܡܪܳܐ܀ ܘܺܐܝܬܼ ܗ̱ܘܳܐ ܒܰܟܼܦܼܰܪܢܰܚܽܘܡ ܥܒܼܶܕܼ ܡܰܠܟܿܳܐ ܚܰܕܼ܂ ܕܰܒܼܪܶܗ ܟܪܺܝܗ ܗ̱ܘܳܐ܂
04:47 [ai]	ܗܳܢܳܐ ܫܡܰܥ ܕܶܐܬܼܳܐ ܝܶܫܽܘܥ ܡܶܢ ܺܝܗܽܘܕܼ ܠܰܓܼܠܺܝܠܳܐ܃ ܘܶܐܙܰܠ ܠܘܳܬܼܶܗ܂ ܘܒܼܳܥܶܐ ܗ̱ܘܳܐ ܡܶܢܶܗ܃ ܕܢܶܚܽܘܬܼ ܘܢܰܐܣܶܐ ܠܰܒܼܪܶܗ܂ ܩܰܪܺܝܒܼ ܗ̱ܘܳܐ ܓܶܝܪ ܠܰܡܡܳܬܼ܂
04:48 [ai]	ܐܳܡܰܪ ܠܶܗ ܝܶܫܽܘܥ܂ ܐܶܢ ܐܳܬܼܘܳܬܼܳܐ̈ ܘܬܼܶܕܼܡܪ̈ܳܬܼܳܐ ܠܳܐ ܬܶܚܙܽܘܢ܂ ܠܳܐ ܬܗܰܝܡܢܽܘܢ܂
04:49 [ai]	ܐܳܡܰܪ ܠܶܗ ܗܰܘ ܥܒܼܶܕܼ ܡܰܠܟܿܳܐ܂ ܡܳܪܝ܃ ܚܽܘܬܼ܂ ܥܰܕܼܠܳܐ ܡܳܐܶܬܼ ܠܶܗ ܛܰܠܝܳܐ܂
04:50 [ai]	ܐܳܡܰܪ ܠܶܗ ܝܶܫܽܘܥ܂ ܙܶܠ܃ ܒܪܳܟܼ ܚܰܝ ܗ̱ܽܘ܂ ܘܗܰܝܡܶܢ ܗܰܘ ܓܰܒܼܪܳܐ ܒܡܶܠܬܼܳܐ ܕܶܐܡܰܪ ܠܶܗ ܝܶܫܽܘܥ܂ ܘܶܐܙܰܠ܂
04:51 [ai]	ܟܰܕܼ ܕܶܝܢ ܢܚܶܬܼ ܗ̱ܘܳܐ܃ ܐܰܪܥܽܘܗ̱ܝ ܥܰܒܼܕܿܰܘܗ̱ܝ̈܂ ܘܣܰܒܿܪܽܘܗ̱ܝ ܘܳܐܡܪܺܝܢ ܠܶܗ܂ ܒܪܳܟܼ ܚܝܳܐ܂
04:52 [ai]	ܘܫܰܐܶܠ ܐܶܢܽܘܢ܂ ܒܰܐܝܢܳܐ ܥܶܕܳܢܳܐ ܐܶܬܼܚܠܶܡ܂ ܐܳܡܪܺܝܢ ܠܶܗ܂ ܐܶܬܼܡܳܠܝ܂ ܒܰܫܒܼܰܥ ܫܳܥܺܝܢ̈ ܫܒܼܰܩܬܼܶܗ ܐܶܫܳܬܼܳܐ܂
04:53 [ai]	ܘܺܝܕܼܰܥ ܐܰܒܼܽܘܗ̱ܝ܂ ܕܰܒܼܗܳܝ ܫܳܥܬܼܳܐ ܕܒܳܗ ܐܶܡܰܪ ܠܶܗ ܝܶܫܽܘܥ ܕܰܒܼܪܳܟܼ ܚܝܳܐ܂ ܘܗܰܝܡܶܢ ܗܽܘ ܘܒܼܰܝܬܿܶܗ ܟܽܠܶܗ܂
04:54 [ai]	ܗܳܕܼܶܐ ܬܽܘܒܼ ܐܳܬܼܳܐ ܕܿܬܼܰܪ̈ܬܿܶܝܢ ܥܒܼܰܕܼ ܝܶܫܽܘܥ܃ ܟܰܕܼ ܐܶܬܼܳܐ ܡܶܢ ܺܝܗܽܘܕܼ ܠܰܓܼܠܺܝܠܳܐ܀

next chapter