The Comprehensive Aramaic Lexicon

07:01 [ai]	ܒܳܬܼܰܪ ܗܳܠܶܝܢ܂ ܡܗܰܠܶܟܼ ܗ̱ܘܳܐ ܝܶܫܽܘܥ ܒܰܓܼܠܺܝܠܳܐ܂ ܠܳܐ ܓܶܝܪ ܨܳܒܼܶܐ ܗ̱ܘܳܐ ܠܰܡ ܗܰܠܳܟܼܽܘ ܒܺܝܗܽܘܕܼ܃ ܡܶܛܽܠ ܕܺܝܗܽܘܕܼܳܝܶܐ̈ ܒܿܳܥܶܝܢ ܗ̱ܘܰܘ ܠܡܶܩܛܠܶܗ܀
07:02 [ai]	ܘܩܰܪܺܝܒܼ ܗ̱ܘܳܐ ܥܰܕܼܥܺܕܼܳܐ ܕܰܡܛܰܠܶܐ̈ ܕܺܝܗܽܘܕܼܳܝܶܐ̈܂
07:03 [ai]	ܘܶܐܡܰܪܘ ܠܶܗ ܐܰܚܰܘܗ̱ܝ̈ ܠܝܶܫܽܘܥ܂ ܫܰܢܳܐ ܠܳܟܼ ܡܶܟܿܳܐ܂ ܘܙܶܠ ܠܺܝܗܽܘܕܼ܂ ܕܢܶܚܙܽܘܢ ܬܰܠܡܺܝܕܼܰܝܟܿ̈ ܥܒܼܳܕܼܶܐ̈ ܕܥܳܒܼܶܕܼ ܐܰܢ̱ܬܿ܂
07:04 [ai]	ܠܰܝܬܿ ܓܶܝܪ ܐ̱ܢܳܫ ܕܥܳܒܼܶܕܼ ܡܶܕܶܡ ܒܛܽܘܫܝܳܐ܃ ܘܨܳܒܼܶܐ ܗܽܘ ܕܰܒܼܓܼܶܠܝܳܐ ܢܶܗܘܶܐ܂ ܐܶܢ ܗܳܠܶܝܢ ܥܳܒܼܶܕܼ ܐܰܢ̱ܬܿ܂ ܚܰܘܳܐ ܢܰܦܼܫܳܟܼ ܠܥܳܠܡܳܐ܂
07:05 [ai]	ܐܳܦܼ ܠܳܐ ܓܶܝܪ ܐܰܚܰܘܗ̱ܝ̈ ܗܰܝܡܶܢܘ ܗ̱ܘܰܘ ܒܶܗ ܒܝܶܫܽܘܥ܂
07:06 [ai]	ܐܳܡܰܪ ܠܗܽܘܢ ܝܶܫܽܘܥ܂ ܙܰܒܼܢܝ ܕܺܝܠܝ܃ ܥܕܼܰܡܳܐ ܠܗܳܫܳܐ ܠܳܐ ܡܛܳܐ܂ ܙܰܒܼܢܟܼܽܘܢ ܕܶܝܢ ܕܺܝܠܟܼܽܘܢ܂ ܒܟܽܠ ܥܶܕܳܢ ܡܛܰܝܰܒܼ܂
07:07 [ai]	ܠܳܐ ܡܶܫܟܿܰܚ ܥܳܠܡܳܐ ܠܡܶܣܢܳܟܼܽܘܢ܂ ܠܺܝ ܕܶܝܢ܂ ܣܳܢܶܐ܂ ܡܶܛܽܠ ܕܶܐܢܳܐ ܡܰܣܗܶܕܼ ܐ̱ܢܳܐ ܥܠܰܘܗ̱ܝ܃ ܕܰܥܒܼܳܕܼܰܘܗ̱ܝ̈ ܒܺܝܫܺܝܢ̈ ܐܶܢܽܘܢ܂
07:08 [ai]	ܐܰܢ̱ܬܿܽܘܢ ܣܰܩܘ ܠܥܰܕܼܥܺܕܼܳܐ ܗܳܢܳܐ܂ ܐܶܢܳܐ ܠܳܐ ܣܳܠܶܩ ܐ̱ܢܳܐ ܗܳܫܳܐ ܠܥܰܕܼܥܺܕܼܳܐ ܗܳܢܳܐ܂ ܡܶܛܽܠ ܕܙܰܒܼܢܳܐ ܕܺܝܠܝ ܠܳܐ ܥܕܼܰܟܿܺܝܠ ܫܠܶܡ܂
07:09 [ai]	ܗܳܠܶܝܢ ܐܶܡܰܪ܂ ܘܦܼܳܫ ܠܶܗ ܒܰܓܼܠܺܝܠܳܐ܂
07:10 [ai]	ܟܰܕܼ ܕܶܝܢ ܣܠܶܩܘ ܐܰܚܰܘܗ̱ܝ̈ ܠܥܰܕܼܥܺܕܼܳܐ܃ ܗܳܝܕܶܝܢ ܐܳܦܼ ܗܽܘ ܣܠܶܩ܂ ܠܳܐ ܒܓܶܠܝܳܐ܂ ܐܶܠܳܐ ܐܰܝܟܼ ܕܰܒܼܛܽܘܫܝܳܐ܂
07:11 [ai]	ܺܝܗܽܘܕܼܳܝܶܐ̈ ܕܶܝܢ ܒܿܳܥܶܝܢ ܗ̱ܘܰܘ ܠܶܗ ܒܥܰܕܼܥܺܕܼܳܐ܂ ܘܳܐܡܪܺܝܢ ܗ̱ܘܰܘ܂ ܐܰܝܟܿܰܘ ܗܰܘ܂
07:12 [ai]	ܘܪܶܛܢܳܐ ܣܰܓܿܺܝܳܐܐ ܡܶܛܽܠܳܬܼܶܗ ܐܺܝܬܼ ܗ̱ܘܳܐ ܒܟܶܢܫܳܐ܂ ܐܺܝܬܼ ܗ̱ܘܰܘ ܓܶܝܪ ܕܳܐܡܪܺܝܢ܂ ܕܛܳܒܼ ܗ̱ܽܘ܂ ܘܰܐ̱ܚܪ̈ܳܢܶܐ ܐܳܡܪܺܝܢ ܗ̱ܘܰܘ܂ ܠܳܐ܂ ܐܶܠܳܐ ܡܰܛܥܶܐ ܠܥܰܡܳܐ܂
07:13 [ai]	ܠܳܐ ܕܶܝܢ ܐ̱ܢܳܫ ܓܰܠܝܳܐܺܝܬܼ ܡܡܰܠܶܠ ܗ̱ܘܳܐ ܥܠܰܘܗ̱ܝ܃ ܡܶܛܽܠ ܕܶܚܠܬܼܳܐ ܕܺܝܗܽܘܕܼܳܝܶܐ̈܂
07:14 [ai]	ܟܰܕܼ ܕܶܝܢ ܦܠܰܓܼܘ ܝܰܘܡܳܬܼܳܐ̈ ܕܥܰܕܼܥܺܕܼܳܐ܃ ܣܠܶܩ ܝܶܫܽܘܥ ܠܗܰܝܟܠܳܐ܂ ܘܡܰܠܶܦܼ ܗ̱ܘܳܐ܂
07:15 [ai]	ܘܡܶܬܿܕܰܡܪܺܝܢ ܗ̱ܘܰܘ ܺܝܗܽܘܕܼܳܝܶܐ̈܂ ܘܳܐܡܪܺܝܢ܂ ܐܰܝܟܿܰܢܳܐ ܝܳܕܼܰܥ ܗܳܢܳܐ ܣܶܦܼܪܳܐ܂ ܟܰܕܼ ܠܳܐ ܺܝܠܶܦܼ܂
07:16 [ai]	ܥܢܳܐ ܝܶܫܽܘܥ܂ ܘܶܐܡܰܪ܂ ܝܽܘܠܦܿܳܢܝ ܠܳܐ ܗܘܳܐ ܕܺܝܠܝ܂ ܐܶܠܳܐ ܕܗܰܘ ܕܫܰܕܿܪܰܢܝ܂
07:17 [ai]	ܡܰܢ ܕܨܳܒܼܶܐ ܕܢܶܥܒܿܶܕܼ ܨܶܒܼܝܳܢܶܗ܃ ܡܶܣܬܿܰܟܿܰܠ ܝܽܘܠܦܿܳܢܝ ܐܶܢ ܡܶܢ ܐܰܠܳܗܳܐ ܗܽܘ܃ ܐܰܘ ܐܶܢܳܐ ܡܶܢ ܨܒܼܽܘܬܼ ܢܰܦܼܫܝ ܡܡܰܠܶܠ ܐ̱ܢܳܐ܂
07:18 [ai]	ܡܰܢ ܕܡܶܢ ܨܒܼܽܘܬܼ ܪܶܥܝܳܢܶܗ ܡܡܰܠܶܠ܃ ܫܽܘܒܼܚܳܐ ܠܢܰܦܼܫܶܗ ܒܿܳܥܶܐ܂ ܗܰܘ ܕܶܝܢ ܕܫܽܘܒܼܚܳܐ ܕܡܰܢ ܕܫܰܕܿܪܶܗ ܒܿܳܥܶܐ܂ ܫܰܪܺܝܪ ܗ̱ܽܘ܂ ܘܥܰܘܠܳܐ ܒܿܠܶܒܶܗ ܠܳܐ ܐܺܝܬܼ܂
07:19 [ai]	ܠܳܐ ܗ̱ܘܳܐ ܡܽܘܫܶܐ ܝܰܗ̱ܒܼ ܠܟܼܽܘܢ ܢܳܡܽܘܣܳܐ܃ ܘܠܳܐ ܐ̱ܢܳܫ ܡܶܢܟܼܽܘܢ ܢܳܛܰܪ ܢܳܡܽܘܣܳܐ܂
07:20 [ai]	ܡܳܢܳܐ ܒܿܳܥܶܝܢ ܐܢ̱ܬܿܽܘܢ ܠܡܶܩܛܠܰܢܝ܂ ܥܢܳܐ ܟܶܢܫܳܐ܂ ܘܳܐܡܪܺܝܢ܂ ܕܰܝܘܳܐ ܐܺܝܬܼ ܠܳܟܼ܂ ܡܰܢܽܘ ܒܿܳܥܶܐ ܠܡܶܩܛܠܳܟܼ܂
07:21 [ai]	ܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܚܰܕܼ ܥܒܼܳܕܼܳܐ ܥܶܒܼܕܿܶܬܼ܂ ܘܟܼܽܠܟܼܽܘܢ ܡܶܬܿܕܰܡܪܺܝܢ ܐܢ̱ܬܿܽܘܢ܂
07:22 [ai]	ܡܶܛܽܠ ܗܳܢܳܐ ܡܽܘܫܶܐ ܝܰܗ̱ܒܼ ܠܟܼܽܘܢ ܓܙܽܘܪܬܳܐ܂ ܠܳܐ ܗ̱ܘܳܐ ܡܶܛܽܠ ܕܡܶܢܶܗ ܗ̱ܝ ܡܶܢ ܡܽܘܫܶܐ܂ ܐܶܠܳܐ ܕܡܶܢ ܐܰܒܼܳܗܳܬܼܳܐ̈ ܗ̱ܝ܃ ܘܰܒܫܰܒܿܬܼܳܐ ܓܳܙܪܺܝܢ ܐܢ̱ܬܿܽܘܢ ܒܰܪܢܳܫܳܐ܂
07:23 [ai]	ܐܶܢ ܒܰܪܢܳܫܳܐ ܡܶܬܼܓܿܙܰܪ ܒܝܰܘܡܳܐ ܕܫܰܒܿܬܼܳܐ܂ ܡܶܛܽܠ ܕܠܳܐ ܢܶܫܬܿܪܶܐ ܢܳܡܽܘܣܳܐ ܕܡܽܘܫܶܐ܃ ܥܠܰܝ ܪܳܛܢܺܝܢ ܐܢ̱ܬܿܽܘܢ܃ ܕܟܽܠܶܗ ܒܰܪܢܳܫܳܐ ܐܰܚܠܡܶܬܼ ܒܝܰܘܡܳܐ ܕܫܰܒܿܬܼܳܐ܃
07:24 [ai]	ܠܳܐ ܬܶܗܘܽܘܢ ܕܳܝܢܺܝܢ ܒܡܰܣܰܒܼ ܒܰܐܦܿܶܐ̈܂ ܐܶܠܳܐ ܕܺܝܢܳܐ ܟܺܐܢܳܐ ܕܽܘܢܘ܀
07:25 [ai]	ܘܳܐܡܪܺܝܢ ܗ̱ܘܰܘ ܐ̱ܢܳܫܳܐ ܡܶܢ ܐܽܘܪܺܫܠܶܡ܂ ܠܰܘ ܗܳܢܰܘ ܗܰܘ ܕܒܳܥܶܝܢ ܠܡܶܩܛܰܠ܃
07:26 [ai]	ܘܗܳܐ ܓܰܠܝܳܐܺܝܬܼ ܡܡܰܠܶܠ܃ ܘܡܶܕܶܡ ܠܳܐ ܐܳܡܪܺܝܢ ܠܶܗ܂ ܕܰܠܡܳܐ ܺܝܕܼܰܥܘ ܩܰܫܺܝܫܰܝܢ̈ ܕܗܳܢܰܘ ܫܰܪܺܝܪܳܐܺܝܬܼ ܡܫܺܝܚܳܐ܃
07:27 [ai]	ܐܶܠܳܐ ܠܗܳܢܳܐ ܝܳܕܼܥܺܝܢ ܚ̱ܢܰܢ܂ ܡܶܢ ܐܰܝܡܶܟܿܳܐ ܗܽܘ܂ ܡܫܺܝܚܳܐ ܕܶܝܢ ܐܶܡܰܬܼܝ ܕܳܐܬܼܶܐ܃ ܠܳܐ ܐ̱ܢܳܫ ܝܳܕܼܰܥ ܡܶܢ ܐܰܝܡܶܟܿܳܐ ܗܽܘ܀
07:28 [ai]	ܘܰܐܪܺܝܡ ܝܶܫܽܘܥ ܩܳܠܶܗ ܟܰܕܼ ܡܰܠܶܦܼ ܒܗܰܝܟܠܳܐ܂ ܘܶܐܡܰܪ܂ ܘܠܺܝ ܝܳܕܼܥܺܝܢ ܐܢ̱ܬܿܽܘܢ܂ ܘܡܶܢ ܐܰܝܡܶܟܿܳܐ ܐ̱ܢܳܐ܂ ܝܳܕܼܥܺܝܢ ܐܢ̱ܬܿܽܘܢ܂ ܘܡܶܢ ܨܒܼܽܘܬܼ ܢܰܦܼܫܝ ܠܳܐ ܐܶܬܼܺܝܬܼ܂ ܐܶܠܳܐ ܫܰܪܺܝܪ ܗ̱ܽܘ ܡܰܢ ܕܫܰܕܿܪܰܢܝ܂ ܗܰܘ ܕܰܐܢ̱ܬܿܽܘܢ܂ ܠܳܐ ܝܳܕܼܥܺܝܢ ܐܢ̱ܬܿܽܘܢ ܠܶܗ܂
07:29 [ai]	ܐܶܢܳܐ ܕܶܝܢ ܝܳܕܼܰܥ ܐ̱ܢܳܐ ܠܶܗ܂ ܕܡܶܢ ܠܘܳܬܼܶܗ ܐܶܢܳܐ܂ ܘܗܽܘ ܫܰܕܿܪܰܢܝ܀
07:30 [ai]	ܘܰܒܥܰܘ ܠܡܶܐܚܕܿܶܗ܂ ܘܠܳܐ ܐ̱ܢܳܫ ܐܰܪܡܺܝ ܥܠܰܘܗ̱ܝ ܐܺܝܕܼܰܝܳܐ̈܃ ܡܶܛܽܠ ܕܠܳܐ ܥܕܼܰܟܿܺܝܠ ܐܶܬܼܳܬܼ ܗ̱ܘܳܬܼ ܫܳܥܬܼܶܗ܀
07:31 [ai]	ܣܰܓܿܺܝܶܐܐ̈ ܕܶܝܢ ܡܶܢ ܟܶܢܫܳܐ ܗܰܝܡܶܢܘ ܒܶܗ܂ ܘܳܐܡܪܺܝܢ܂ ܡܫܺܝܚܳܐ ܡܳܐ ܕܳܐܬܼܶܐ܃ ܠܡܳܐ܃ ܕܝܰܬܿܺܝܪ̈ܳܢ ܡܶܢ ܗܳܠܶܝܢ ܐܳܬܼܘܳܬܼܳܐ̈ ܕܥܳܒܼܶܕܼ ܗܳܢܳܐ ܥܳܒܼܶܕܼ܃
07:32 [ai]	ܘܰܫܡܰܥܘ ܦܿܪ̈ܺܝܫܶܐ ܠܟܼܶܢܫܶܐ̈ ܕܰܡܡܰܠܠܺܝܢ ܥܠܰܘܗ̱ܝ ܗܳܠܶܝܢ܂ ܘܫܰܕܿܰܪܘ ܗܶܢܽܘܢ ܘܪ̈ܰܒܰܝ ܟܳܗܢܶܐ̈ ܕܰܚܫܶܐ̈ ܕܢܶܐܚܕܿܽܘܢܳܝܗ̱ܝ܀
07:33 [ai]	ܘܶܐܡܰܪ ܝܶܫܽܘܥ܂ ܩܰܠܺܝܠ ܬܽܘܒܼ ܙܰܒܼܢܳܐ ܥܰܡܟܼܽܘܢ ܐܶܢܳܐ܂ ܘܳܐܙܶܠ ܐ̱ܢܳܐ ܠܘܳܬܼ ܡܰܢ ܕܫܰܕܿܪܰܢܝ܂
07:34 [ai]	ܘܬܼܶܒܼܥܽܘܢܳܢܝ܂ ܘܠܳܐ ܬܶܫܟܿܚܽܘܢܳܢܝ܂ ܘܰܐܝܟܿܳܐ ܕܶܐܢܳܐ ܐܺܝܬܼܰܝ܂ ܠܳܐ ܡܶܫܟܿܚܺܝܢ ܐܢ̱ܬܿܽܘܢ ܠܡܶܐܬܼܳܐ܂
07:35 [ai]	ܐܳܡܪܺܝܢ ܺܝܗܽܘܕܼܳܝܶܐ̈ ܒܢܰܦܼܫܗܽܘܢ܂ ܠܰܐܝܟܿܳܐ ܥܬܼܺܝܕܼ ܗܳܢܳܐ ܠܡܺܐܙܰܠ܃ ܕܰܚܢܰܢ ܠܳܐ ܡܶܫܟܿܚܺܝܢ ܚ̱ܢܰܢ ܠܶܗ܂ ܠܡܳܐ ܟܰܝ ܠܰܐܬܼܪ̈ܰܘܳܬܼܳܐ ܕܥܰܡ̱ܡܶܐ̈܃ ܥܬܼܺܝܕܼ ܕܢܺܐܙܰܠ܂ ܘܢܰܠܶܦܼ ܠܚܰܢܦܼܶܐ̈܂
07:36 [ai]	ܡܳܢܳܐ ܗܺܝ ܗܳܕܼܶܐ ܡܶܠܬܼܳܐ ܕܶܐܡܰܪ܂ ܕܬܶܒܼܥܽܘܢܳܢܝ ܘܠܳܐ ܬܶܫܟܿܚܽܘܢܳܢܝ܃ ܘܰܐܝܟܿܳܐ ܕܶܐܢܳܐ ܐܺܝܬܼܰܝ܂ ܐܰܢ̱ܬܿܽܘܢ ܠܳܐ ܡܶܫܟܿܚܺܝܢ ܐܢ̱ܬܿܽܘܢ ܠܡܶܐܬܼܳܐ ܿ܀ܿ܀ܿ
07:37 [ai]	ܒܝܰܘܡܳܐ ܕܶܝܢ ܪܰܒܿܳܐ܂ ܕܺܐܝܬܼܰܘܗ̱ܝ ܐ̱ܚܪܳܝܳܐ ܕܥܰܕܼܥܺܕܼܳܐ܃ ܩܳܐܶܡ ܗ̱ܘܳܐ ܝܶܫܽܘܥ ܘܩܳܥܶܐ܂ ܘܳܐܡܰܪ܂ ܐܶܢ ܐ̱ܢܳܫ ܨܗܶܐ܂ ܢܺܐܬܼܶܐ ܠܘܳܬܼܝ܂ ܘܢܶܫܬܿܶܐ܂
07:38 [ai]	ܟܽܠ ܡܰܢ ܕܰܡܗܰܝܡܶܢ ܒܺܝ܂ ܐܰܝܟܿܰܢܳܐ ܕܶܐܡܰܪܘ ܟܬܼܳܒܼܶܐ̈܃ ܢܰܗܪ̈ܰܘܳܬܼܳܐ ܕܡܰܝܳܐ̈ ܚܰܝ̈ܶܐ ܢܶܪܕܿܽܘܢ ܡܶܢ ܟܰܪܣܶܗ܂
07:39 [ai]	ܗܳܕܼܶܐ ܕܶܝܢ ܐܶܡܰܪ ܥܰܠ ܪܽܘܚܳܐ ܕܰܥܬܼܺܝܕܼܺܝܢ ܗ̱ܘܰܘ ܠܰܡܩܰܒܿܳܠܽܘ܃ ܐܰܝܠܶܝܢ ܕܰܡܗܰܝܡܢܺܝܢ ܒܶܗ܂ ܠܳܐ ܓܶܝܪ ܥܕܼܰܟܿܺܝܠ ܐܶܬܼܝܰܗܒܿܰܬܼ ܗ̱ܘܳܬܼ ܪܽܘܚܳܐ܃ ܡܶܛܽܠ ܕܠܳܐ ܥܕܼܰܟܿܺܝܠ ܐܶܫܬܿܰܒܿܰܚ ܗ̱ܘܳܐ ܝܶܫܽܘܥ܀
07:40 [ai]	ܣܰܓܿܺܝܶܐܐ̈ ܕܶܝܢ ܡܶܢ ܟܶܢܫܶܐ̈ ܕܰܫܡܰܥܘ ܡܶܠܰܘܗ̱ܝ̈܂ ܐܳܡܪܺܝܢ ܗ̱ܘܰܘ܂ ܗܳܢܰܘ ܫܰܪܺܝܪܳܐܺܝܬܼ ܢܒܼܺܝܳܐ܂
07:41 [ai]	ܐ̱ܚܪ̈ܳܢܶܐ ܐܳܡܪܺܝܢ ܗ̱ܘܰܘ܂ ܗܳܢܰܘ ܡܫܺܝܚܳܐ܂ ܐ̱ܚܪ̈ܳܢܶܐ ܐܳܡܪܺܝܢ܂ ܕܰܠܡܳܐ܃ ܡܶܢ ܓܠܺܝܠܳܐ ܐܳܬܼܶܐ ܡܫܺܝܚܳܐ܂
07:42 [ai]	ܠܳܐ ܗ̱ܘܳܐ ܟܬܼܳܒܼܳܐ ܐܶܡܰܪ܂ ܕܡܶܢ ܙܰܪܥܶܗ ܕܕܼܰܘܺܝܕܼ܃ ܘܡܶܢ ܒܶܝܬܼ ܠܚܶܡ ܩܪܺܝܬܼܳܐ ܕܺܝܠܶܗ ܕܕܼܰܘܺܝܕܼ ܐܳܬܼܶܐ ܡܫܺܝܚܳܐ܃
07:43 [ai]	ܘܰܗܘܳܬܼ ܗ̱ܘܳܬܼ ܦܳܠܓܿܽܘܬܼܳܐ ܒܟܶܢܫܶܐ̈ ܡܶܛܽܠܳܬܼܶܗ܂
07:44 [ai]	ܘܺܐܝܬܼ ܗ̱ܘܰܘ ܐ̱ܢܳܫܺܝܢ̈ ܡܶܢܗܽܘܢ܂ ܕܨܳܒܼܶܝܢ ܗ̱ܘܰܘ ܕܢܶܐܚܕܿܽܘܢܳܝܗ̱ܝ܂ ܐܶܠܳܐ ܠܳܐ ܐ̱ܢܳܫ ܐܰܪܡܺܝ ܥܠܰܘܗ̱ܝ ܐܺܝܕܼܰܝܳܐ̈܀
07:45 [ai]	ܘܶܐܬܼܰܘ ܕܰܚܫܶܐ̈ ܗܳܢܽܘܢ ܠܘܳܬܼ ܪ̈ܰܒܰܝ ܟܳܗܢܶܐ̈ ܘܰܦܼܪ̈ܺܝܫܶܐ܂ ܘܶܐܡܰܪܘ ܠܗܽܘܢ ܟܳܗܢܶܐ̈܂ ܠܡܳܢܳܐ ܠܳܐ ܐܰܝܬܿܺܝܬܿܽܘܢܳܝܗ̱ܝ܂
07:46 [ai]	ܐܳܡܪܺܝܢ ܠܗܽܘܢ ܕܰܚܫܶܐ̈܂ ܠܳܐ ܡܶܡܬܼܽܘܡ ܗܳܟܼܰܢܳܐ ܡܰܠܶܠ ܒܰܪܢܳܫܳܐ܃ ܐܰܝܟܼ ܕܰܡܡܰܠܶܠ ܓܰܒܼܪܳܐ ܗܳܢܳܐ܂
07:47 [ai]	ܐܳܡܪܺܝܢ ܠܗܽܘܢ ܦܿܪ̈ܺܝܫܶܐ܂ ܠܡܳܐ܃ ܐܳܦܼ ܐܰܢ̱ܬܿܽܘܢ ܛܥܰܝܬܿܽܘܢ܂
07:48 [ai]	ܠܡܳܐ܃ ܐ̱ܢܳܫ ܡܶܢ ܪ̈ܺܫܶܐ ܐܰܘ ܡܶܢ ܦܿܪ̈ܺܝܫܶܐ ܗܰܝܡܶܢܘ ܒܶܗ܂
07:49 [ai]	ܐܶܠܳܐ ܐܶܢ ܥܰܡܳܐ ܗܳܢܳܐ܃ ܕܠܳܐ ܝܳܕܼܰܥ ܢܳܡܽܘܣܳܐ܃ ܠܺܝܛܺܝܢ ܐܶܢܽܘܢ܂
07:50 [ai]	ܐܳܡܰܪ ܠܗܽܘܢ ܢܺܝܩܳܕܼܺܡܳܘܣ ܚܰܕܼ ܡܶܢܗܽܘܢ܂ ܗܰܘ ܕܶܐܬܼܳܐ ܗ̱ܘܳܐ ܠܘܳܬܼ ܝܶܫܽܘܥ ܒܠܺܠܝܳܐ܂
07:51 [ai]	ܕܰܠܡܳܐ ܢܳܡܽܘܣܳܐ ܕܺܝܠܰܢ ܡܚܰܝܶܒܼ ܠܒܼܰܪܢܳܫܳܐ܃ ܐܶܠܳܐ ܐܶܢ ܢܶܫܡܰܥ ܡܶܢܶܗ ܠܽܘܩܕܼܰܡ܃ ܘܢܶܕܿܰܥ ܡܳܢܳܐ ܥܒܼܰܕܼ܂
07:52 [ai]	ܥܢܰܘ ܘܳܐܡܪܺܝܢ ܠܶܗ܂ ܠܡܳܐ܃ ܐܳܦܼ ܐܰܢ̱ܬܿ ܡܶܢ ܓܠܺܝܠܳܐ ܐܰܢ̱ܬܿ܃ ܒܨܺܝ ܘܰܚܙܺܝ܂ ܕܰܢܒܼܺܝܳܐ ܡܶܢ ܓܠܺܝܠܳܐ܂ ܠܳܐ ܩܳܐܶܡ܀܀
07:53 [ai]	ܐܶܙܰܠ ܗܳܟܼܺܝܠ ܟܽܠܚܰܕܼ ܠܒܼܰܝܬܿܶܗ܀

next chapter