The Comprehensive Aramaic Lexicon

08:01 [ai]	ܝܶܫܽܘܥ ܕܶܝܢ ܐܶܙܰܠ ܠܛܽܘܪܳܐ ܕܙܰܝܬܿܶܐ̈܂
08:02 [ai]	ܒܨܰܦܼܪܳܐ ܕܶܝܢ ܬܽܘܒܼ ܐܶܬܼܳܐ ܠܗܰܝܟܠܳܐ ܘܟܼܽܠܶܗ ܥܰܡܳܐ ܐܳܬܼܶܐ ܗ̱ܘܳܐ ܠܘܳܬܼܶܗ܂ ܘܟܼܰܕܼ ܝܳܬܼܶܒܼ ܡܰܠܶܦܼ ܗ̱ܘܳܐ ܠܗܽܘܢ܂
08:03 [ai]	ܐܰܝܬܿܺܝܘ ܕܶܝܢ ܣܳܦܼܪ̈ܶܐ ܘܰܦܼܪ̈ܺܝܫܶܐ ܠܰܐܢ̱ܬܿܬܼܳܐ ܕܶܐܬܿܬܿܰܚܕܿܰܬܼ ܒܓܰܘܪܳܐ܂ ܘܟܼܰܕܼ ܐܰܩܺܝܡܽܘܗ ܒܰܡܨܰܥܬܼܳܐ܃
08:04 [ai]	ܐܳܡܪܺܝܢ ܠܶܗ܂ ܡܰܠܦܼܳܢܳܐ܂ ܗܳܕܼܶܐ ܐܰܢ̱ܬܿܬܼܳܐ ܐܶܬܿܬܿܰܚܕܿܰܬܼ ܓܰܠܝܳܐܺܝܬܼ ܒܶܗ ܒܣܽܘܥܪܳܢܳܐ ܕܓܰܘܪܳܐ܂
08:05 [ai]	ܘܰܒܢܳܡܽܘܣܳܐ ܕܶܝܢ ܕܡܽܘܫܶܐ ܦܰܩܶܕܼ ܕܰܠܕܼܰܐܝܟܼ ܗܳܠܶܝܢ ܢܶܪܓܿܽܘܡ܂ ܐܰܢ̱ܬܿ ܗܳܟܼܺܝܠ ܡܳܢܳܐ ܐܳܡܰܪ ܐܰܢ̱ܬܿ܂
08:06 [ai]	ܗܳܕܼܶܐ ܐܶܡܰܪܘ ܟܰܕܼ ܡܢܰܣܶܝܢ ܠܶܗ܂ ܐܰܝܟܿܰܢܳܐ ܕܬܶܗܘܶܐ ܠܗܽܘܢ ܕܰܢܩܰܛܪܓܼܽܘܢܳܝܗ̱ܝ܂ ܝܶܫܽܘܥ ܕܶܝܢ ܟܰܕܼ ܠܬܼܰܚܬܿ ܐܶܬܼܓܿܗܶܢ ܡܰܟܼܬܶܒܼ ܗ̱ܘܳܐ ܥܰܠ ܐܰܪܥܳܐ܂
08:07 [ai]	ܟܰܕܼ ܕܶܝܢ ܟܰܬܿܰܪܘ ܟܰܕܼ ܡܫܰܐܠܺܝܢ ܠܶܗ܃ ܐܶܬܼܦܿܫܶܛ ܘܶܐܡܰܪ ܠܗܽܘܢ܂ ܐܰܝܢܳܐ ܡܶܢܟܼܽܘܢ ܕܺܐܝܬܼܰܘܗ̱ܝ ܕܠܳܐ ܚܛܳܗ܂ ܩܰܕܼܡܳܝܳܐ ܢܶܫܕܿܶܐ ܥܠܶܝܗ ܟܺܐܦܼܳܐ܂
08:08 [ai]	ܘܬܼܽܘܒܼ ܟܰܕܼ ܐܶܬܼܓܿܗܶܢ ܟܳܬܼܶܒܼ ܗ̱ܘܳܐ ܥܰܠ ܐܰܪܥܳܐ܂
08:09 [ai]	ܗܶܢܽܘܢ ܕܶܝܢ ܟܰܕܼ ܫܡܰܥܘ ܢܳܦܼܩܺܝܢ ܗ̱ܘܰܘ ܚܰܕܼ ܚܰܕܼ ܟܰܕܼ ܫܰܪܺܝܘ ܡܶܢ ܩܰܫܺܝܫܶܐ̈ ܘܶܐܫܬܿܰܒܼܩܰܬܼ ܐܰܢ̱ܬܿܬܼܳܐ ܠܚܽܘܕܼܶܝܗ܃ ܟܰܕܼ ܐܺܝܬܼܶܝܗ ܒܰܡܨܰܥܬܼܳܐ܂
08:10 [ai]	ܟܰܕܼ ܕܶܝܢ ܐܶܬܼܦܿܫܶܛ ܝܶܫܽܘܥ ܐܶܡܰܪ ܠܳܗ ܠܰܐܢ̱ܬܿܬܼܳܐ܂ ܐܰܝܟܿܳܐ ܐܺܝܬܼܰܝܗܽܘܢ܂ ܠܳܐ ܐ̱ܢܳܫ ܚܰܝܒܼܶܟܼܝ܂
08:11 [ai]	ܗܳܝ ܕܶܝܢ ܐܶܡܪܰܬܼ܂ ܘܠܳܐ ܐ̱ܢܳܫ ܡܳܪܝܳܐ܂ ܐܶܡܰܪ ܕܶܝܢ ܝܶܫܽܘܥ܂ ܐܳܦܼܠܳܐ ܐܶܢܳܐ ܡܚܰܝܶܒܼ ܐ̱ܢܳܐ ܠܶܟܼܝ܂ ܙܶܠܝ ܘܡܶܢ ܗܳܫܳܐ ܬܽܘܒܼ ܠܳܐ ܬܶܚܛܶܝܢ܀
08:12 [ai]	ܬܽܘܒܼ ܕܶܝܢ ܡܰܠܶܠ ܥܰܡܗܽܘܢ ܝܶܫܽܘܥ܂ ܘܶܐܡܰܪ܂ ܐܶܢܳܐ ܐ̱ܢܳܐ ܢܽܘܗܪܶܗ ܕܥܳܠܡܳܐ܂ ܡܰܢ ܕܒܳܬܼܰܪܝ ܐܳܬܼܶܐ܂ ܠܳܐ ܢܗܰܠܶܟܼ ܒܚܶܫܽܘܟܼܳܐ܂ ܐܶܠܳܐ ܢܶܫܟܿܰܚ ܠܶܗ ܢܽܘܗܪܳܐ ܕܚܰܝ̈ܶܐ܂
08:13 [ai]	ܐܳܡܪܺܝܢ ܠܶܗ ܦܿܪ̈ܺܝܫܶܐ܂ ܐܰܢ̱ܬܿ ܥܰܠ ܢܰܦܼܫܳܟܼ ܡܰܣܗܶܕܼ ܐܰܢ̱ܬܿ܂ ܣܳܗܕܿܽܘܬܼܳܟܼ܂ ܠܳܐ ܗܘܳܬܼ ܫܰܪܺܝܪܳܐ܀
08:14 [ai]	ܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܐܳܦܼܶܢ ܐܶܢܳܐ ܡܰܣܗܶܕܼ ܐ̱ܢܳܐ ܥܰܠ ܢܰܦܼܫܝ܃ ܫܰܪܺܝܪܳܐ ܗ̱ܝ ܣܳܗܕܿܽܘܬܼܝ܂ ܡܶܛܽܠ ܕܝܳܕܼܰܥ ܐ̱ܢܳܐ ܡܶܢ ܐܰܝܡܶܟܿܳܐ ܐܶܬܼܺܝܬܼ܂ ܘܠܰܐܝܟܿܳܐ ܐܳܙܶܠ ܐ̱ܢܳܐ܂ ܐܰܢ̱ܬܿܽܘܢ ܕܶܝܢ܂ ܠܳܐ ܝܳܕܼܥܺܝܢ ܐܢ̱ܬܿܽܘܢ ܡܶܢ ܐܰܝܡܶܟܿܳܐ ܐܶܬܼܺܝܬܼ܂ ܘܠܳܐ ܠܰܐܝܟܿܳܐ ܐܳܙܶܠ ܐ̱ܢܳܐ܂
08:15 [ai]	ܐܰܢ̱ܬܿܽܘܢ܂ ܦܰܓܼܪܳܢܳܐܺܝܬܼ ܕܳܝܢܺܝܢ ܐܢ̱ܬܿܽܘܢ܂ ܐܶܢܳܐ܂ ܠܐ̱ܢܳܫ ܠܳܐ ܕܳܐܶܢ ܐ̱ܢܳܐ܂
08:16 [ai]	ܘܶܐܢ ܕܳܐܶܢ ܐ̱ܢܳܐ ܕܶܝܢ܂ ܕܺܝܢܝ܂ ܫܰܪܺܝܪ ܗ̱ܽܘ܂ ܡܶܛܽܠ ܕܠܳܐ ܗ̱ܘܺܝܬܼ ܒܰܠܚܽܘܕܼܰܝ܂ ܐܶܠܳܐ ܐܶܢܳܐ ܘܳܐܒܼܝ ܕܫܰܕܿܪܰܢܝ܂
08:17 [ai]	ܘܰܒܢܳܡܽܘܣܟܼܽܘܢ ܕܶܝܢ ܟܬܼܺܝܒܼ܃ ܕܣܳܗܕܿܽܘܬܼܳܐ ܕܿܰܬܼܪ̈ܶܝܢ ܓܿܰܒܼܪ̈ܺܝܢ ܫܰܪܺܝܪܳܐ ܗ̱ܝ܂
08:18 [ai]	ܐܶܢܳܐ ܐ̱ܢܳܐ ܕܣܳܗܶܕܼ ܐ̱ܢܳܐ ܥܰܠ ܢܰܦܼܫܝ܂ ܘܳܐܒܼܝ ܕܫܰܕܿܪܰܢܝ܂ ܣܳܗܶܕܼ ܥܠܰܝ܂
08:19 [ai]	ܐܳܡܪܺܝܢ ܠܶܗ܂ ܐܰܝܟܿܰܘ ܐܰܒܼܽܘܟܼ܂ ܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܘܠܳܐ ܠܺܝ ܝܳܕܼܥܺܝܢ ܐܢ̱ܬܿܽܘܢ܂ ܘܠܳܐ ܠܳܐܒܼܝ܂ ܐܶܠܽܘ ܠܺܝ ܝܳܕܼܥܺܝܢ ܗ̱ܘܰܝܬܿܽܘܢ܃ ܐܳܦܼܠܳܐ ܒܼܝ ܝܳܕܼܥܺܝܢ ܗ̱ܘܰܝܬܿܽܘܢ܀
08:20 [ai]	ܗܳܠܶܝܢ ܡܶܠܶܐ̈ ܡܰܠܶܠ ܒܶܝܬܼ ܓܰܙܳܐ܂ ܟܰܕܼ ܡܰܠܶܦܼ ܒܗܰܝܟܠܳܐ܂ ܘܠܳܐ ܐ̱ܢܳܫ ܐܰܚܕܿܶܗ܂ ܠܳܐ ܓܶܝܪ ܥܕܼܰܟܿܺܝܠ ܐܶܬܼܳܬܼ ܗ̱ܘܳܬܼ ܫܳܥܬܼܶܗ܀
08:21 [ai]	ܐܳܡܰܪ ܠܗܽܘܢ ܬܽܘܒܼ ܝܶܫܽܘܥ܂ ܐܶܢܳܐ ܐܳܙܶܠ ܐ̱ܢܳܐ܂ ܘܬܼܶܒܼܥܽܘܢܳܢܝ܂ ܘܰܬܼܡܽܘܬܼܽܘܢ ܒܰܚܛܳܗܰܝܟܿܽܘܢ̈܂ ܘܰܐܝܟܿܳܐ ܕܶܐܢܳܐ ܐܳܙܶܠ ܐ̱ܢܳܐ܃ ܐܰܢ̱ܬܿܽܘܢ ܠܳܐ ܡܶܫܟܿܚܺܝܢ ܐܢ̱ܬܿܽܘܢ ܠܡܶܐܬܼܳܐ܂
08:22 [ai]	ܐܳܡܪܺܝܢ ܺܝܗܽܘܕܼܳܝܶܐ̈܂ ܠܡܳܐ ܟܰܝ ܢܰܦܼܫܶܗ ܩܳܛܶܠ܃ ܕܳܐܡܰܪ ܕܰܐܝܟܿܳܐ ܕܶܐܢܳܐ ܐܳܙܶܠ ܐ̱ܢܳܐ܃ ܐܰܢ̱ܬܿܽܘܢ ܠܳܐ ܡܶܫܟܿܚܺܝܢ ܐܢ̱ܬܿܽܘܢ ܠܡܶܐܬܼܳܐ܃
08:23 [ai]	ܘܶܐܡܰܪ ܠܗܽܘܢ܂ ܐܰܢ̱ܬܿܽܘܢ܂ ܡܶܢ ܕܰܠܬܼܰܚܬܿ ܐܰܢ̱ܬܿܽܘܢ܂ ܘܶܐܢܳܐ܂ ܡܶܢ ܕܰܠܥܶܠ ܐ̱ܢܳܐ܂ ܐܰܢ̱ܬܿܽܘܢ ܡܶܢ ܗܳܢܳܐ ܐܰܢ̱ܬܿܽܘܢ ܥܳܠܡܳܐ܂ ܐܶܢܳܐ ܠܳܐ ܗ̱ܘܺܝܬܼ ܡܶܢ ܗܳܢܳܐ ܥܳܠܡܳܐ܂
08:24 [ai]	ܐܶܡܪܶܬܼ ܠܟܼܽܘܢ܂ ܕܰܬܼܡܽܘܬܼܽܘܢ ܒܰܚܛܳܗܰܝܟܿܽܘܢ̈܂ ܐܶܠܳܐ ܓܶܝܪ ܬܗܰܝܡܢܽܘܢ ܕܶܐܢܳܐ ܐ̱ܢܳܐ܂ ܬܡܽܘܬܼܽܘܢ ܒܰܚܛܳܗܰܝܟܿܽܘܢ̈܂
08:25 [ai]	ܐܳܡܪܺܝܢ ܺܝܗܽܘܕܼܳܝܶܐ̈܂ ܐܰܢ̱ܬܿ ܡܰܢ ܐܰܢ̱ܬܿ܂ ܐܳܡܰܪ ܠܗܽܘܢ ܝܶܫܽܘܥ܂ ܐܳܦܼܶܢ ܕܫܰܪܺܝܬܼ ܕܶܐܡܰܠܶܠ ܥܰܡܟܼܽܘܢ܃
08:26 [ai]	ܣܰܓܿܺܝ ܐܺܝܬܼ ܠܺܝ ܥܠܰܝܟܿܽܘܢ ܠܡܺܐܡܰܪ ܘܠܰܡܕܼܳܢ܂ ܐܶܠܳܐ ܡܰܢ ܕܫܰܕܿܪܰܢܝ܂ ܫܰܪܺܝܪ ܗ̱ܽܘ܂ ܘܶܐܢܳܐ ܐܰܝܠܶܝܢ ܕܫܶܡܥܶܬܼ ܡܶܢܶܗ܃ ܗܳܠܶܝܢ ܗ̱ܽܘ ܡܡܰܠܶܠ ܐ̱ܢܳܐ ܒܥܳܠܡܳܐ܂
08:27 [ai]	ܘܠܳܐ ܺܝܕܼܰܥܘ ܕܥܰܠ ܐܰܒܼܳܐ ܐܶܡܰܪ ܠܗܽܘܢ܀܀
08:28 [ai]	ܐܳܡܰܪ ܠܗܽܘܢ ܬܽܘܒܼ ܝܶܫܽܘܥ܂ ܐܶܡܰܬܼܝ ܕܰܬܼܪܺܝܡܽܘܢܶܗ ܠܰܒܼܪܶܗ ܕܐ̱ܢܳܫܳܐ܃ ܗܳܝܕܶܝܢ ܬܶܕܿܥܽܘܢ ܕܶܐܢܳܐ ܐ̱ܢܳܐ܂ ܘܡܶܕܶܡ ܡܶܢ ܨܒܼܽܘܬܼ ܢܰܦܼܫܝ܂ ܠܳܐ ܥܳܒܼܶܕܼ ܐ̱ܢܳܐ܂ ܐܶܠܳܐ ܐܰܝܟܿܰܢܳܐ ܕܰܐܠܦܼܰܢܝ ܐܳܒܼܝ܂ ܗܳܟܼܘܳܬܼ ܗ̱ܽܘ ܡܡܰܠܶܠ ܐ̱ܢܳܐ܂
08:29 [ai]	ܘܡܰܢ ܕܫܰܕܿܪܰܢܝ ܥܰܡܝ ܐܺܝܬܼܰܘܗ̱ܝ܂ ܘܠܳܐ ܫܰܒܼܩܰܢܝ ܒܰܠܚܽܘܕܼܰܝ ܐܳܒܼܝ܂ ܡܶܛܽܠ ܕܶܐܢܳܐ ܡܶܕܶܡ ܕܫܳܦܼܰܪ ܠܶܗ ܥܳܒܼܶܕܼ ܐ̱ܢܳܐ ܒܟܽܠܙܒܼܰܢ܀
08:30 [ai]	ܟܰܕܼ ܗܳܠܶܝܢ ܡܡܰܠܶܠ ܗ̱ܘܳܐ܃ ܣܰܓܿܺܝܶܐܐ̈ ܗܰܝܡܶܢܘ ܒܶܗ܂
08:31 [ai]	ܘܶܐܡܰܪ ܝܶܫܽܘܥ ܠܗܳܢܽܘܢ ܺܝܗܽܘܕܼܳܝܶܐ̈ ܕܗܰܝܡܶܢܘ ܒܶܗ܃ ܐܶܢ ܐܰܢ̱ܬܿܽܘܢ ܬܟܼܰܬܿܪܽܘܢ ܒܡܶܠܰܬܼܝ܃ ܫܰܪܺܝܪܳܐܺܝܬܼ ܬܰܠܡܺܝܕܼܰܝ̈ ܐܰܢ̱ܬܿܽܘܢ܂
08:32 [ai]	ܘܬܼܶܕܿܥܽܘܢ ܫܪܳܪܳܐ܂ ܘܗܽܘ ܫܪܳܪܳܐ ܢܚܰܪܰܪܟܼܽܘܢ܂
08:33 [ai]	ܐܳܡܪܺܝܢ ܠܶܗ܂ ܙܰܪܥܶܗ ܚܢܰܢ ܕܰܐܒܼܪܳܗܳܡ܂ ܘܡܶܢ ܡܬܼܽܘܡ ܥܰܒܼܕܿܽܘܬܼܳܐ ܠܐ̱ܢܳܫ܂ ܠܳܐ ܦܠܺܝܚܳܐ ܠܰܢ܂ ܐܰܝܟܿܰܢܳܐ ܐܳܡܰܪ ܐܰܢ̱ܬܿ ܕܬܶܗܘܽܘܢ ܒܢܰܝ ܚܺܐܪ̈ܶܐ܂
08:34 [ai]	ܐܳܡܰܪ ܠܗܽܘܢ ܝܶܫܽܘܥ܂ ܐܰܡܺܝܢ ܐܰܡܺܝܢ ܐܳܡܰܪܢܳܐ ܠܟܼܽܘܢ܃ ܕܟܽܠܡܰܢ ܕܥܳܒܼܶܕܼ ܚܛܺܝܬܼܳܐ܂ ܥܰܒܼܕܿܳܗ ܗ̱ܽܘ ܕܰܚܛܺܝܬܼܳܐ܂
08:35 [ai]	ܘܥܰܒܼܕܿܳܐ ܠܳܐ ܡܩܰܘܶܐ ܠܥܳܠܰܡ ܒܒܼܰܝܬܳܐ܂ ܒܪܳܐ ܕܶܝܢ ܠܥܳܠܰܡ ܡܩܰܘܶܐ܂
08:36 [ai]	ܐܶܢ ܗܽܘ ܗܳܟܼܺܝܠ ܕܰܒܼܪܳܐ ܢܚܰܪܰܪܟܼܽܘܢ܃ ܫܰܪܺܝܪܳܐܺܝܬܼ ܬܶܗܘܽܘܢ ܒܢܰܝ ܚܺܐܪ̈ܶܐ܂
08:37 [ai]	ܝܳܕܼܰܥ ܐ̱ܢܳܐ ܕܙܰܪܥܶܗ ܐܰܢ̱ܬܿܽܘܢ ܕܰܐܒܼܪܳܗܳܡ܂ ܐܶܠܳܐ ܒܿܳܥܶܝܢ ܐܢ̱ܬܿܽܘܢ ܠܡܶܩܛܠܰܢܝ܃ ܡܶܛܽܠ ܕܰܠܡܶܠܰܬܼܝ ܠܳܐ ܣܳܦܼܩܺܝܢ ܐܢ̱ܬܿܽܘܢ܂
08:38 [ai]	ܐܶܢܳܐ ܡܶܕܶܡ ܕܰܚܙܺܝܬܼ ܠܘܳܬܼ ܐܳܒܼܝ ܡܡܰܠܶܠ ܐ̱ܢܳܐ܂ ܘܰܐܢ̱ܬܿܽܘܢ ܡܶܕܶܡ ܕܰܚܙܰܝܬܿܽܘܢ ܠܘܳܬܼ ܐܰܒܼܽܘܟܼܽܘܢ ܥܳܒܼܕܺܝܢ ܐܢ̱ܬܿܽܘܢ܂
08:39 [ai]	ܥܢܰܘ܂ ܘܳܐܡܪܺܝܢ ܠܶܗ܂ ܐܰܒܼܽܘܢ ܕܺܝܠܰܢ ܐܰܒܼܪܳܗܳܡ ܗ̱ܽܘ ܿ܀ܿ܀ܿ ܐܳܡܰܪ ܠܗܽܘܢ ܝܶܫܽܘܥ܂ ܐܶܠܽܘ ܒܢܰܘܗ̱ܝ ܗ̱ܘܰܝܬܿܽܘܢ ܕܰܐܒܼܪܳܗܳܡ܃ ܥܒܼܳܕܼܰܘܗ̱ܝ̈ ܕܰܐܒܼܪܳܗܳܡ ܥܳܒܼܕܺܝܢ ܗ̱ܘܰܝܬܿܽܘܢ܂
08:40 [ai]	ܗܳܫܳܐ ܕܶܝܢ ܗܳܐ ܒܿܳܥܶܝܢ ܐܢ̱ܬܿܽܘܢ ܠܡܶܩܛܠܰܢܝ܃ ܠܓܼܰܒܼܪܳܐ ܕܫܰܪܺܝܪܬܳܐ ܡܰܠܠܶܬܼ ܥܰܡܟܼܽܘܢ܃ ܐܰܝܕܼܳܐ ܕܫܶܡܥܶܬܼ ܡܶܢ ܐܰܠܳܗܳܐ܃ ܗܳܕܼܶܐ ܐܰܒܼܪܳܗܳܡ ܠܳܐ ܥܒܼܰܕܼ܂
08:41 [ai]	ܐܰܢ̱ܬܿܽܘܢ ܕܶܝܢ ܥܳܒܼܕܺܝܢ ܐܢ̱ܬܿܽܘܢ ܥܒܼܳܕܼܶܐ̈ ܕܰܐܒܼܽܘܟܼܽܘܢ܂ ܐܳܡܪܺܝܢ ܠܶܗ܂ ܚܢܰܢ ܡܶܢ ܙܳܢܝܽܘܬܼܳܐ ܠܳܐ ܗܘܰܝܢ܂ ܚܰܕܼ ܐܰܒܼܳܐ ܐܺܝܬܼ ܠܰܢ܂ ܐܰܠܳܗܳܐ܂
08:42 [ai]	ܐܳܡܰܪ ܠܗܽܘܢ ܝܶܫܽܘܥ܂ ܐܶܠܽܘ ܐܰܠܳܗܳܐ ܗ̱ܘܳܐ ܐܰܒܼܽܘܟܼܽܘܢ܂ ܡܰܚܒܼܺܝܢ ܗ̱ܘܰܝܬܿܽܘܢ ܠܺܝ܂ ܐܶܢܳܐ ܓܶܝܪ ܡܶܢ ܐܰܠܳܗܳܐ ܢܶܦܼܩܶܬܼ ܘܶܐܬܼܺܝܬܼ܂ ܘܠܳܐ ܗ̱ܘܳܐ ܡܶܢ ܨܒܼܽܘܬܼ ܢܰܦܼܫܝ ܐܶܬܼܺܝܬܼ܂ ܐܶܠܳܐ ܗܽܘ ܫܰܕܿܪܰܢܝ܂
08:43 [ai]	ܡܶܛܽܠ ܡܳܢܳܐ ܡܶܠܰܬܼܝ ܠܳܐ ܡܶܫܬܰܘܕܥܺܝܢ ܐܢ̱ܬܿܽܘܢ܂ ܥܰܠ ܕܠܳܐ ܡܶܫܟܿܚܺܝܢ ܐܢ̱ܬܿܽܘܢ ܫܳܡܥܺܝܢ ܡܶܠܰܬܼܝ܂
08:44 [ai]	ܐܰܢ̱ܬܿܽܘܢ ܡܶܢ ܐܰܒܼܳܐ ܐܳܟܼܶܠܩܰܪܨܳܐ ܐܺܝܬܼܰܝܟܿܽܘܢ܂ ܘܪܶܓܿܬܼܶܗ ܕܰܐܒܼܽܘܟܼܽܘܢ ܨܳܒܼܶܝܢ ܐܢ̱ܬܿܽܘܢ ܠܡܶܥܒܿܰܕܼ܂ ܗܰܘ ܕܡܶܢ ܒܪܺܫܺܝܬܼ ܩܳܛܶܠ ܐ̱ܢܳܫܳܐ̈ ܗܽܘ܂ ܘܒܼܰܫܪܳܪܳܐ ܠܳܐ ܩܳܐܶܡ܂ ܡܶܛܽܠ ܕܰܫܪܳܪܳܐ ܠܰܝܬܿ ܒܶܗ܂ ܐܶܡܰܬܼܝ ܕܰܡܡܰܠܶܠ ܟܰܕܿܳܒܼܽܘܬܼܳܐ܂ ܡܶܢ ܕܺܝܠܶܗ ܗܽܘ ܡܡܰܠܶܠ܂ ܡܶܛܽܠ ܕܕܼܰܓܿܳܠܳܐ ܗܽܘ܂ ܐܳܦܼ ܐܰܒܼܽܘܗ܂
08:45 [ai]	ܐܶܢܳܐ ܕܶܝܢ ܕܰܫܪܳܪܳܐ ܡܡܰܠܶܠ ܐ̱ܢܳܐ܃ ܠܳܐ ܡܗܰܝܡܢܺܝܢ ܐܢ̱ܬܿܽܘܢ ܠܺܝ܂
08:46 [ai]	ܡܰܢܽܘ ܡܶܢܟܼܽܘܢ ܡܰܟܿܶܣ ܠܺܝ ܥܰܠ ܚܛܺܝܬܼܳܐ܂ ܘܶܐܢ ܫܪܳܪܳܐ ܡܡܰܠܶܠ ܐ̱ܢܳܐ܃ ܐܰܢ̱ܬܿܽܘܢ ܠܡܳܢܳܐ ܠܳܐ ܡܗܰܝܡܢܺܝܢ ܐܢ̱ܬܿܽܘܢ ܠܺܝ܂
08:47 [ai]	ܡܰܢ ܕܡܶܢ ܐܰܠܳܗܳܐ ܐܺܝܬܼܰܘܗ̱ܝ܂ ܡܶܠܶܐ̈ ܕܰܐܠܳܗܳܐ ܫܳܡܰܥ܂ ܡܶܛܽܠ ܗܳܢܳܐ ܐܰܢ̱ܬܿܽܘܢ ܠܳܐ ܫܳܡܥܺܝܢ ܐܢ̱ܬܿܽܘܢ܂ ܡܶܛܽܠ ܕܠܳܐ ܗܘܰܝܬܿܽܘܢ ܡܶܢ ܐܰܠܳܗܳܐ܂
08:48 [ai]	ܥܢܰܘ ܺܝܗܽܘܕܼܳܝܶܐ̈ ܘܳܐܡܪܺܝܢ ܠܶܗ܂ ܠܳܐ ܫܰܦܿܺܝܪ ܐܳܡܪܺܝܢ ܐܶܢܰܚܢܰܢ܂ ܕܫܳܡܪܳܝܳܐ ܐܰܢ̱ܬܿ܃ ܘܕܼܰܝܘܳܐ ܐܺܝܬܼ ܠܳܟܼ܃
08:49 [ai]	ܐܳܡܰܪ ܠܗܽܘܢ ܝܶܫܽܘܥ܂ ܠܺܝ ܕܰܝܘܳܐ ܠܳܐ ܐܺܝܬܼ܂ ܐܶܠܳܐ ܠܳܐܒܼܝ ܡܝܰܩܰܪ ܐ̱ܢܳܐ܂ ܘܰܐܢ̱ܬܿܽܘܢ ܡܨܰܥܪܺܝܢ ܠܺܝ܂
08:50 [ai]	ܐܶܢܳܐ ܕܶܝܢ ܠܳܐ ܒܿܳܥܶܐ ܐ̱ܢܳܐ ܫܽܘܒܼܚܝ܂ ܐܺܝܬܼ ܗ̱ܽܘ ܕܒܳܥܶܐ ܘܕܼܳܐܶܢ܂
08:51 [ai]	ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܡܰܢ ܕܡܶܠܰܬܼܝ ܢܳܛܰܪ܂ ܡܰܘܬܳܐ ܠܳܐ ܢܶܚܙܶܐ ܠܥܳܠܰܡ܂
08:52 [ai]	ܐܳܡܪܺܝܢ ܠܶܗ ܺܝܗܽܘܕܼܳܝܶܐ̈܂ ܗܳܫܳܐ ܺܝܕܼܰܥܢ ܕܕܼܰܝܘܳܐ ܐܺܝܬܼ ܠܳܟܼ܂ ܐܰܒܼܪܳܗܳܡ ܡܺܝܬܼ ܘܰܢܒܼܺܝܶܐ̈܃ ܘܰܐܢ̱ܬܿ ܐܳܡܰܪ ܐܰܢ̱ܬܿ ܕܡܰܢ ܕܡܶܠܰܬܼܝ ܢܳܛܰܪ ܡܰܘܬܳܐ ܠܳܐ ܢܶܛܥܰܡ ܠܥܳܠܰܡ܃
08:53 [ai]	ܠܡܳܐ ܐܰܢ̱ܬܿ ܪܰܒܼ ܐܰܢ̱ܬܿ ܡܶܢ ܐܰܒܼܽܘܢ ܐܰܒܼܪܳܗܳܡ ܕܡܺܝܬܼ܂ ܘܡܶܢ ܢܒܼܺܝܶܐ̈ ܕܡܺܝܬܼܘ܂ ܡܰܢܽܘ ܥܳܒܼܶܕܼ ܐܰܢ̱ܬܿ ܢܰܦܼܫܳܟܼ܂
08:54 [ai]	ܐܳܡܰܪ ܠܗܽܘܢ ܝܶܫܽܘܥ܂ ܐܶܢ ܐܶܢܳܐ ܡܫܰܒܿܰܚ ܐ̱ܢܳܐ ܢܰܦܼܫܝ܃ ܫܽܘܒܼܚܝ ܠܳܐ ܗ̱ܘܳܐ ܡܶܕܶܡ܂ ܐܺܝܬܼܰܘܗ̱ܝ ܐܳܒܼܝ ܕܰܡܫܰܒܿܰܚ ܠܺܝ܃ ܗܰܘ ܕܳܐܡܪܺܝܢ ܐܢ̱ܬܿܽܘܢ ܕܰܐܠܳܗܰܢ ܗ̱ܽܘ܂
08:55 [ai]	ܘܠܳܐ ܺܝܕܼܰܥܬܿܽܘܢܳܝܗ̱ܝ܂ ܐܶܢܳܐ ܕܶܝܢ ܝܳܕܼܰܥ ܐ̱ܢܳܐ ܠܶܗ܂ ܘܶܐܢ ܐܳܡܰܪ ܐ̱ܢܳܐ ܕܠܳܐ ܝܳܕܼܰܥ ܐ̱ܢܳܐ ܠܶܗ܃ ܗܳܘܶܐ ܐ̱ܢܳܐ ܠܺܝ ܟܰܕܿܳܒܼܳܐ܂ ܐܰܟܼܘܳܬܼܟܼܽܘܢ܂ ܐܶܠܳܐ ܝܳܕܼܰܥ ܐ̱ܢܳܐ ܠܶܗ܂ ܘܡܶܠܬܼܶܗ ܢܳܛܰܪ ܐ̱ܢܳܐ܂
08:56 [ai]	ܐܰܒܼܪܳܗܳܡ ܐܰܒܼܽܘܟܼܽܘܢ ܡܣܰܘܰܚ ܗ̱ܘܳܐ ܕܢܶܚܙܶܐ ܝܰܘܡܝ܂ ܘܰܚܙܳܐ܂ ܘܰܚܕܼܺܝ܂
08:57 [ai]	ܐܳܡܪܺܝܢ ܠܶܗ ܺܝܗܽܘܕܼܳܝܶܐ̈܂ ܥܕܼܰܟܿܺܝܠ ܒܰܪ ܚܰܡܫܺܝܢ ܫܢܺܝܢ̈ ܠܳܐ ܗ̱ܘܰܝܬܿ܃ ܘܠܰܐܒܼܪܳܗܳܡ ܚܙܰܝܬܿ܃
08:58 [ai]	ܐܳܡܰܪ ܠܗܽܘܢ ܝܶܫܽܘܥ܂ ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܥܰܕܼܠܳܐ ܢܶܗܘܶܐ ܐܰܒܼܪܳܗܳܡ ܐܶܢܳܐ ܐܺܝܬܼܰܝ܂
08:59 [ai]	ܘܰܫܩܰܠܘ ܟܺܐܦܼܶܐ̈ ܕܢܶܪܓܿܡܽܘܢܳܝܗ̱ܝ܂ ܘܝܶܫܽܘܥ ܐܶܬܿܛܰܫܺܝ܂ ܘܰܢܦܼܰܩ ܡܶܢ ܗܰܝܟܠܳܐ܂ ܘܰܥܒܼܰܪ ܒܰܝܢܳܬܼܗܽܘܢ܂ ܘܶܐܙܰܠ܀܀

next chapter