← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


09:01 [ai]ܘܟܼܰܕܼ ܥܳܒܼܰܪ܃ ܚܙܳܐ ܓܰܒܼܪܳܐ ܣܰܡܝܳܐ ܕܡܶܢ ܟܪܶܣ ܐܶܡܶܗ܂
09:02 [ai]ܘܫܰܐܠܽܘܗ̱ܝ ܬܰܠܡܺܝܕܼܰܘܗ̱ܝ̈܂ ܘܳܐܡܪܺܝܢ܂ ܪܰܒܰܢ܂ ܡܰܢܽܘ ܚܛܳܐ܂ ܗܳܢܳܐ܂ ܐܰܘ ܐܰܒܼܳܗܰܘܗ̱ܝ̈܂ ܕܟܰܕܼ ܣܡܶܐ ܢܶܬܼܺܝܠܶܕܼ܂
09:03 [ai]ܐܳܡܰܪ ܠܗܽܘܢ ܝܶܫܽܘܥ܂ ܠܳܐ ܗܽܘ ܚܛܳܐ܂ ܘܠܳܐ ܐܰܒܼܳܗܰܘܗ̱ܝ̈܂ ܐܶܠܳܐ ܕܢܶܬܼܚܙܽܘܢ ܒܶܗ ܥܒܼܳܕܼܰܘܗ̱ܝ̈ ܕܰܐܠܳܗܳܐ܂
09:04 [ai]ܠܺܝ ܘܳܠܶܐ ܠܡܶܥܒܿܰܕܼ ܥܒܼܳܕܼܶܐ̈ ܕܡܰܢ ܕܫܰܕܿܪܰܢܝ܂ ܥܰܕܼ ܐܺܝܡܳܡܳܐ ܗܽܘ܂ ܐܳܬܼܶܐ ܠܺܠܝܳܐ܂ ܕܐ̱ܢܳܫ ܠܳܐ ܡܶܫܟܿܰܚ ܠܡܶܦܼܠܰܚ܂
09:05 [ai]ܟܡܳܐ ܕܰܒܼܥܳܠܡܳܐ ܐ̱ܢܳܐ܂ ܢܽܘܗܪܶܗ ܐ̱ܢܳܐ ܕܥܳܠܡܳܐ܂
09:06 [ai]ܘܟܼܰܕܼ ܐܶܡܰܪ ܗܳܠܶܝܢ܂ ܪܰܩ ܥܰܠ ܐܰܪܥܳܐ܂ ܘܰܓܼܒܼܰܠ ܛܺܝܢܳܐ ܡܶܢ ܪܽܘܩܶܗ܃ ܘܛܳܫ ܥܰܠ ܥܰܝܢܰܘܗ̱ܝ̈ ܕܗܰܘ ܣܰܡܝܳܐ܂
09:07 [ai]ܘܶܐܡܰܪ ܠܶܗ܂ ܙܶܠ ܐܰܫܺܝܓܼ ܒܡܰܥܡܽܘܕܼܺܝܬܼܳܐ ܕܫܺܝܠܽܘܚܳܐ܂ ܘܶܐܙܰܠ ܐܰܫܺܝܓܼ ܘܶܐܬܼܳܐ ܟܰܕܼ ܚܳܙܶܐ܂
09:08 [ai]ܫܒܼܳܒܼܰܘܗ̱ܝ̈ ܕܶܝܢ܂ ܘܰܐܝܠܶܝܢ ܕܰܚܙܶܐ ܗ̱ܘܳܐ ܠܗܽܘܢ ܡܶܢ ܩܕܼܺܝܡ ܕܚܳܕܼܰܪ ܗ̱ܘܳܐ܃ ܐܳܡܪܺܝܢ ܗ̱ܘܰܘ܂ ܠܳܐ ܗ̱ܘܳܐ ܗܳܢܰܘ ܗܰܘ ܕܝܳܬܼܶܒܼ ܗ̱ܘܳܐ܂ ܘܚܳܕܼܰܪ܃
09:09 [ai]ܐܺܝܬܼ ܕܳܐܡܪܺܝܢ ܗ̱ܘܰܘ ܕܗܽܘܝܽܘ܂ ܘܺܐܝܬܼ ܕܳܐܡܪܺܝܢ ܗ̱ܘܰܘ܂ ܠܳܐ܂ ܐܶܠܳܐ ܡܶܕܼܡܳܐ ܕܳܡܶܐ ܠܶܗ܂ ܗܽܘ ܕܶܝܢ ܐܳܡܰܪ ܗ̱ܘܳܐ܂ ܕܶܐܢܳܐ ܐ̱ܢܳܐ܂
09:10 [ai]ܐܳܡܪܺܝܢ ܠܶܗ܂ ܐܰܝܟܿܰܢܳܐ ܐܶܬܼܦܰܬܿܰܚ ܥܰܝܢܰܝܟܿ̈܂
09:11 [ai]ܥܢܳܐ܂ ܘܶܐܡܰܪ ܠܗܽܘܢ܂ ܓܰܒܼܪܳܐ ܕܰܫܡܶܗ ܝܶܫܽܘܥ܃ ܥܒܼܰܕܼ ܛܺܝܢܳܐ ܘܛܳܫ ܠܺܝ ܥܰܠ ܥܰܝܢܰܝ̈܂ ܘܶܐܡܰܪ ܠܺܝ܂ ܙܶܠ ܐܰܫܺܝܓܼ ܒܡܰܝܳܐ̈ ܕܫܺܝܠܽܘܚܳܐ܂ ܘܶܐܙܶܠ̱ܬܼ ܐܰܫܺܝܓܼܶܬܼ܂ ܘܶܐܬܼܚܙܺܝ ܠܺܝ܂
09:12 [ai]ܐܳܡܪܺܝܢ ܠܶܗ ܐܰܝܟܿܰܘ܂ ܐܳܡܰܪ ܠܗܽܘܢ ܠܳܐ ܝܳܕܼܰܥ ܐ̱ܢܳܐ܂
09:13 [ai]ܘܰܐܝܬܿܝܽܘܗ̱ܝ ܠܗܰܘ ܕܡܶܢ ܩܕܼܺܝܡ ܣܰܡܝܳܐ ܗ̱ܘܳܐ܂ ܠܘܳܬܼ ܦܿܪ̈ܺܝܫܶܐ܂
09:14 [ai]ܐܺܝܬܼܶܝܗ ܗ̱ܘܳܬܼ ܕܶܝܢ ܫܰܒܿܬܼܳܐ܃ ܟܰܕܼ ܥܒܼܰܕܼ ܛܺܝܢܳܐ ܝܶܫܽܘܥ܂ ܘܦܼܰܬܿܰܚ ܠܶܗ ܥܰܝܢܰܘܗ̱ܝ̈܂
09:15 [ai]ܘܬܼܽܘܒܼ ܫܰܐܠܽܘܗ̱ܝ ܦܿܪ̈ܺܝܫܶܐ܃ ܐܰܝܟܿܰܢܳܐ ܐܶܬܼܚܙܺܝ ܠܳܟܼ܂ ܗܽܘ ܕܶܝܢ ܐܶܡܰܪ ܠܗܽܘܢ܂ ܛܺܝܢܳܐ ܣܳܡ ܥܰܠ ܥܰܝܢܰܝ̈܃ ܘܰܐܫܺܝܓܼܶܬܼ܂ ܘܶܐܬܼܚܙܺܝ ܠܺܝ܂
09:16 [ai]ܘܳܐܡܪܺܝܢ ܗ̱ܘܰܘ ܐ̱ܢܳܫܳܐ̈ ܡܶܢ ܦܿܪ̈ܺܝܫܶܐ܂ ܗܳܢܳܐ ܓܰܒܼܪܳܐ ܠܳܐ ܗ̱ܘܳܐ ܡܶܢ ܐܰܠܳܗܳܐ ܗܽܘ܂ ܕܫܰܒܿܬܼܳܐ ܠܳܐ ܢܳܛܰܪ܂ ܐ̱ܚܪ̈ܳܢܶܐ ܕܶܝܢ ܐܳܡܪܺܝܢ ܗ̱ܘܰܘ܂ ܐܰܝܟܿܰܢܳܐ ܡܶܫܟܿܰܚ ܓܰܒܼܪܳܐ ܚܰܛܳܝܳܐ܂ ܗܳܠܶܝܢ ܐܳܬܼܘܳܬܼܳܐ̈ ܠܡܶܥܒܿܰܕܼ܂ ܘܦܼܳܠܓܿܽܘܬܼܳܐ ܐܺܝܬܼ ܗ̱ܘܳܬܼ ܒܰܝܢܳܬܼܗܽܘܢ܂
09:17 [ai]ܐܳܡܪܺܝܢ ܬܽܘܒܼ ܠܗܰܘ ܣܰܡܝܳܐ܃ ܐܰܢ̱ܬܿ ܡܳܢܳܐ ܐܳܡܰܪ ܐܰܢ̱ܬܿ ܥܠܰܘܗ̱ܝ ܕܦܰܬܿܰܚ ܠܳܟܼ ܥܰܝܢܰܝܟܿ̈܂ ܐܳܡܰܪ ܠܗܽܘܢ܂ ܐܶܢܳܐ ܐܳܡܰܪ ܐ̱ܢܳܐ܂ ܕܰܢܒܼܺܝܳܐ ܗܽܘ܂
09:18 [ai]ܠܳܐ ܕܶܝܢ ܗܰܝܡܶܢܘ ܗ̱ܘܰܘ ܥܠܰܘܗ̱ܝ ܺܝܗܽܘܕܼܳܝܶܐ̈ ܕܣܰܡܝܳܐ ܗ̱ܘܳܐ ܘܰܚܙܳܐ܃ ܥܕܼܰܡܳܐ ܕܰܩܪܰܘ ܠܰܐܒܼܳܗܰܘܗ̱ܝ̈ ܕܗܰܘ ܕܰܚܙܳܐ܃
09:19 [ai]ܘܫܰܐܶܠܘ ܐܶܢܽܘܢ܂ ܐܶܢ܃ ܗܳܢܰܘ ܒܶܪܟܼܽܘܢ܂ ܗܰܘ ܕܰܐܢ̱ܬܿܽܘܢ ܐܳܡܪܺܝܢ ܐܢ̱ܬܿܽܘܢ܂ ܕܟܰܕܼ ܣܡܶܐ ܐܶܬܼܺܝܠܶܕܼ܂ ܐܰܝܟܿܰܢܳܐ ܗܳܫܳܐ ܚܳܙܶܐ܂
09:20 [ai]ܥܢܰܘ ܕܶܝܢ ܐܰܒܼܳܗܰܘܗ̱ܝ̈܂ ܘܶܐܡܰܪܘ܂ ܝܳܕܼܥܺܝܢܰܢ ܕܗܳܢܰܘ ܒܪܰܢ܂ ܘܰܕܼܟܼܰܕܼ ܣܡܶܐ ܐܶܬܼܺܝܠܶܕܼ܂
09:21 [ai]ܐܰܝܟܿܰܢܳܐ ܕܶܝܢ ܗܳܫܳܐ ܚܳܙܶܐ܃ ܐܰܘ ܡܰܢܽܘ ܦܰܬܿܰܚ ܠܶܗ ܥܰܝܢܰܘܗ̱ܝ̈܃ ܠܳܐ ܝܳܕܼܥܺܝܢܰܢ܂ ܐܳܦܼ ܗܽܘ ܥܰܠ ܠܶܗ ܠܰܫܢܰܘܗ̱ܝ̈܂ ܠܶܗ ܫܰܐܶܠܘ܂ ܗܽܘ ܚܠܳܦܼ ܢܰܦܼܫܶܗ ܢܡܰܠܶܠ܂
09:22 [ai]ܗܳܠܶܝܢ ܐܶܡܰܪܘ ܐܰܒܼܳܗܰܘܗ̱ܝ̈܃ ܡܶܛܽܠ ܕܕܼܳܚܠܺܝܢ ܗ̱ܘܰܘ ܡܶܢ ܺܝܗܽܘܕܼܳܝܶܐ̈܂ ܦܣܰܩܘ ܗ̱ܘܰܘ ܓܶܝܪ ܺܝܗܽܘܕܼܳܝܶܐ̈܃ ܕܶܐܢ ܐ̱ܢܳܫ ܢܰܘܕܿܶܐ ܒܶܗ ܕܰܡܫܺܝܚܳܐ ܗܽܘ܃ ܢܰܦܿܩܽܘܢܳܝܗ̱ܝ ܡܶܢ ܟܢܽܘܫܬܳܐ܂
09:23 [ai]ܡܶܛܽܠ ܗܳܢܳܐ ܐܶܡܰܪܘ ܐܰܒܼܳܗܰܘܗ̱ܝ̈܂ ܕܥܰܠ ܠܶܗ ܠܰܫܢܰܘܗ̱ܝ̈܂ ܠܶܗ ܫܰܐܶܠܘ܀܀
09:24 [ai]ܘܰܩܪܰܐܘܽܗ̱ܝ ܠܓܼܰܒܼܪܳܐ ܕܿܬܼܰܪ̈ܬܿܶܝܢ ܙܰܒܼܢܺܝܢ̈܂ ܠܗܰܘ ܕܺܐܝܬܼܰܘܗ̱ܝ ܗ̱ܘܳܐ ܣܰܡܝܳܐ܃ ܘܳܐܡܪܺܝܢ ܠܶܗ܂ ܫܰܒܿܰܚ ܠܰܐܠܳܗܳܐ܂ ܚܢܰܢ ܓܶܝܪ ܝܳܕܼܥܺܝܢܰܢ܂ ܕܗܳܢܳܐ ܓܰܒܼܪܳܐ ܚܰܛܳܝܳܐ ܗܽܘ܂
09:25 [ai]ܥܢܳܐ ܗܽܘ ܘܶܐܡܰܪ ܠܗܽܘܢ܂ ܐܶܢ ܚܰܛܳܝܳܐ ܗܽܘ ܠܳܐ ܝܳܕܼܰܥ ܐ̱ܢܳܐ܂ ܚܕܼܳܐ ܕܶܝܢ ܝܳܕܼܰܥ ܐ̱ܢܳܐ܃ ܕܣܰܡܝܳܐ ܗ̱ܘܺܝܬܼ ܘܗܳܫܳܐ܂ ܗܳܐ ܚܳܙܶܐ ܐ̱ܢܳܐ܂
09:26 [ai]ܐܳܡܪܺܝܢ ܠܶܗ ܬܽܘܒܼ܂ ܡܳܢܳܐ ܥܒܼܰܕܼ ܠܳܟܼ܂ ܐܰܝܟܿܰܢܳܐ ܦܰܬܿܰܚ ܠܳܟܼ ܥܰܝܢܰܝܟܿ̈܂
09:27 [ai]ܐܳܡܰܪ ܠܗܽܘܢ܂ ܐܶܡܪܶܬܼ ܠܟܼܽܘܢ܂ ܘܠܳܐ ܫܡܰܥܬܿܽܘܢ܂ ܡܳܢܳܐ ܬܽܘܒܼ ܨܳܒܼܶܝܢ ܐܢ̱ܬܿܽܘܢ ܠܡܶܫܡܰܥ܂ ܠܡܳܐ܃ ܐܳܦܼ ܐܰܢ̱ܬܿܽܘܢ ܬܰܠܡܺܝܕܼܶܐ̈ ܨܳܒܼܶܝܢ ܐܢ̱ܬܿܽܘܢ ܠܡܶܗܘܳܐ ܠܶܗ܃
09:28 [ai]ܗܶܢܽܘܢ ܕܶܝܢ ܨܰܚܝܽܘܗ̱ܝ܂ ܘܳܐܡܪܺܝܢ ܠܶܗ܂ ܐܰܢ̱ܬܿ ܗ̱ܽܘ ܬܰܠܡܺܝܕܼܶܗ ܕܗܰܘ܂ ܚܢܰܢ ܓܶܝܪ ܬܰܠܡܺܝܕܼܶܐ̈ ܚܢܰܢ ܕܡܽܘܫܶܐ܂
09:29 [ai]ܘܝܳܕܼܥܺܝܢܰܢ ܕܥܰܡ ܡܽܘܫܶܐ܂ ܐܰܠܳܗܳܐ ܡܰܠܶܠ܂ ܠܗܳܢܳܐ ܕܶܝܢ܂ ܠܳܐ ܝܳܕܼܥܺܝܢܰܢ ܡܶܢ ܐܰܝܡܶܟܿܳܐ ܗܽܘ܂
09:30 [ai]ܥܢܳܐ ܗܰܘ ܓܰܒܼܪܳܐ܂ ܘܶܐܡܰܪ ܠܗܽܘܢ܂ ܒܗܳܕܼܶܐ ܗ̱ܘ ܗܳܟܼܺܝܠ ܠܡܶܬܿܕܰܡܳܪܽܘ܂ ܕܰܐܢ̱ܬܿܽܘܢ܂ ܠܳܐ ܝܳܕܼܥܺܝܢ ܐܢ̱ܬܿܽܘܢ ܡܶܢ ܐܰܝܡܶܟܿܳܐ ܗܽܘ܃ ܘܥܰܝܢܰܝ̈ ܕܺܝܠܝ ܦܰܬܿܰܚ܂
09:31 [ai]ܝܳܕܼܥܺܝܢ ܚ̱ܢܰܢ ܕܶܝܢ ܕܰܐܠܳܗܳܐ ܒܩܳܠܳܐ ܕܚܰܛܳܝܶܐ̈ ܠܳܐ ܫܳܡܰܥ܂ ܐܶܠܳܐ ܠܡܰܢ ܕܕܼܳܚܶܠ ܡܶܢܶܗ܂ ܘܥܳܒܼܶܕܼ ܨܶܒܼܝܳܢܶܗ܂ ܠܗܰܘ ܗ̱ܽܘ ܫܳܡܰܥ܂
09:32 [ai]ܡܶܢ ܥܳܠܰܡ ܠܳܐ ܐܶܫܬܿܰܡܥܰܬܼ ܕܦܰܬܿܰܚ ܐ̱ܢܳܫ ܥܰܝܢܶܐ̈ ܕܣܰܡܝܳܐ ܕܶܐܬܼܺܝܠܶܕܼ܂
09:33 [ai]ܐܶܠܽܘ ܠܳܐ ܡܶܢ ܐܰܠܳܗܳܐ ܗ̱ܘܳܐ ܗܳܢܳܐ܃ ܠܳܐ ܡܶܫܟܿܰܚ ܗ̱ܘܳܐ ܗܳܕܼܶܐ ܠܡܶܥܒܿܰܕܼ܂
09:34 [ai]ܥܢܰܘ܂ ܘܳܐܡܪܺܝܢ ܠܶܗ܂ ܐܰܢ̱ܬܿ ܟܽܠܳܟܼ ܒܰܚܛܳܗܶܐ̈ ܐܶܬܼܺܝܠܶܕܿܬܿ܃ ܘܰܐܢ̱ܬܿ܃ ܡܰܠܶܦܼ ܐܰܢ̱ܬܿ ܠܰܢ܃ ܘܰܐܦܿܩܽܘܗ̱ܝ ܠܒܼܰܪ܂
09:35 [ai]ܘܰܫܡܰܥ ܝܶܫܽܘܥ ܕܰܐܦܿܩܽܘܗ̱ܝ ܠܒܼܰܪ܃ ܘܶܐܫܟܿܚܶܗ܂ ܘܶܐܡܰܪ ܠܶܗ܂ ܐܰܢ̱ܬܿ ܡܗܰܝܡܶܢ ܐܰܢ̱ܬܿ ܒܰܒܼܪܶܗ ܕܰܐܠܳܗܳܐ܃
09:36 [ai]ܥܢܳܐ ܗܰܘ ܕܶܐܬܼܰܐܣܺܝ܂ ܘܶܐܡܰܪ܂ ܡܰܢܽܘ ܡܳܪܝ܃ ܕܶܐܗܰܝܡܶܢ ܒܶܗ܂
09:37 [ai]ܐܳܡܰܪ ܠܶܗ ܝܶܫܽܘܥ܂ ܚܙܰܝܬܿܳܝܗ̱ܝ܂ ܘܗܰܘ ܕܰܡܡܰܠܶܠ ܥܰܡܳܟܼ܂ ܗܽܘܝܽܘ܂
09:38 [ai]ܗܽܘ ܕܶܝܢ ܐܶܡܰܪ܂ ܡܗܰܝܡܶܢ ܐ̱ܢܳܐ ܡܳܪܝ܃ ܘܰܢܦܼܰܠ ܣܓܼܶܕܼ ܠܶܗ܀
09:39 [ai]ܘܶܐܡܰܪ ܝܶܫܽܘܥ܂ ܠܕܼܺܝܢܶܗ ܕܥܳܠܡܳܐ ܗܳܢܳܐ ܐܶܬܼܺܝܬܼ܂ ܕܰܐܝܠܶܝܢ ܕܠܳܐ ܚܳܙܶܝܢ܂ ܢܶܚܙܽܘܢ܂ ܘܰܐܝܠܶܝܢ ܕܚܳܙܶܝܢ܂ ܢܶܣܡܽܘܢ܂
09:40 [ai]ܘܰܫܡܰܥܘ ܡܶܢ ܦܿܪ̈ܺܝܫܶܐ܂ ܐܰܝܠܶܝܢ ܕܥܰܡܶܗ ܗ̱ܘܰܘ ܗܳܠܶܝܢ܃ ܘܶܐܡܰܪܘ ܠܶܗ܂ ܠܡܳܐ܃ ܐܳܦܼ ܚܢܰܢ ܣܡܰܝܳܐ̈ ܚܢܰܢ܃
09:41 [ai]ܐܳܡܰܪ ܠܗܽܘܢ ܝܶܫܽܘܥ܂ ܐܶܠܽܘ ܣܡܰܝܳܐ̈ ܗ̱ܘܰܝܬܿܽܘܢ܃ ܠܰܝܬܿ ܗ̱ܘܳܬܼ ܠܟܼܽܘܢ ܚܛܺܝܬܼܳܐ܂ ܗܳܫܳܐ ܕܶܝܢ܂ ܐܳܡܪܺܝܢ ܐܢ̱ܬܿܽܘܢ܂ ܕܚܳܙܶܝܢܰܢ܂ ܡܶܛܽܠ ܗܳܢܳܐ ܚܛܺܝܬܼܟܼܽܘܢ ܩܰܝܳܡܳܐ ܗ̱ܝ܀܀

next chapter